الأخبار
أخبار إقليمية
ابن شداد يحذر بنت مالك من زميلها الهيثم بن هشام الذي يرتدي بنطلون داقي سستم
ابن شداد يحذر بنت مالك من زميلها الهيثم بن هشام الذي يرتدي بنطلون داقي سستم



عنتر وعبلة الحلقة العاشرة
08-03-2013 09:13 AM
قصة وسيناريو وحوار : حسن عمر العطبراوي : خرجت عبله من الكافتريا التى بجوار معهد الصحراء للكمبيوتر والذى التحقت به بعد مشاكل كثيره مع أسرة عنتر وأسرتها مما أدى الى فركشة العقد الذى اجتمع من اجله الرجال ومشاكلها مع عنتر الذى رفض ان تلتحق بالمعهد وتطورت المشاكل حتى وصلت مرحله جعلت عبله تعيد له كل صوره وخطاباته والشنطه المصنوعه من جلد الاسد الذى اصطاده شرف بتاع كتاب المطالعة والذى كان معه عنتر عندما اصطاد الاسد ولكنه طلب من عنتر ان يسمح له بعدم ذكر اسمه فى كتاب المطالعة عشان يقشر حبه. . . . كان برفقة عبله لحظه خروجها من الكافتريا زميلها الهيثم بن هشام الذى حذرها عنتر كثيرا من مباراته بسبب لبسه للبنطلون السستم. . وتفاجأت عبله بعنتر يقف بحصانه جوار المعهد فصاحت بسرعة . . ابتعد ايها الهيثم وتالله لو شاهدك عنتر الان لقطعك اربا اربا فان عنتر لايؤمن بالصداقه بين الرجل والمرأه . . فابتعد الهيثم سريعا وهو يرتجف من الخوف واتجهت عبله ناحية عنتر الذى صاح فيها. . تبا لكى يا عبله اهذه هى دراستك ؟؟؟ تقضين جل وقتك فى الكافتريا. . فصاحت عبله وما حاجتك بى مش نحنا فرتقنا من بعض ؟؟؟ فأخذ عنتر نفسا عميقا وانشد قائلا :
انا الراجيكى يا عبله واشوفك جايه مخلوطه
فى الكافتريا قاعده هناك
وتطلبى قهوه مظبوطه
قاعده كمان مع الهيثم زى جكسويه جلفوطه
يغشك انتى بالمكنات ومدنقره انتى فى الفوطه
فصاحت فيه عبله ويحك يا عنتر اتتهمنى فى شرفى ثم انشدت قائله:
عنتر انت زول حقار
ودايما صرت بتنقنق
بقيت طوالى متضايق ويوم والله بتطرشق
بقيت يومى بتجوط فينى وتهدد انو حتفرتق
أسيب الكبيوتر كيف ؟؟ حلاتك ويا حلاة لقلق
فرد عنتر بسرعة بجد ما اتوقعت اسمع منك شعر زى ده ، فطأطأت عبله رأسها فى خجل، وقالت اعذرنى يا حبيبى اسمح لى باكمال الكورس ولن ادخل هذه الكافتريا بعد اليوم وحتى الفطور حأجى حاشيه من البيت ولكن قل لى كيف حالك انت . . . فرد عنتر انا ذاهب الان لحراسة البترول مع الفرسان حتى يعطونى الكثير من الدراهم واجى اعرسك. . فصاحت عبله ماذا يا عنتر ؟؟؟ اتريدنى ان انتظرك حتى خروج البترول ثم تنهدت وامسكت بلجام حصانه وانشدت قائله :
منتظراكا يا عنتر يمضى شهر ويمر الحول
وحاتك اصلى ما خنتك وما قابلت غيرك زول
كتير طلبونى من اهلى واسأل ناجى ود الصول
ودايرني برضو انتظرك لمن تحرس البترول؟؟؟؟؟
فطأطأ عنتر رأسه وهو فى حيره من امره . . فصاحت العفراء، وبعدين تعال هنا لقد رأيتك فى زواج سعديه بنت الشامى عندما كنا مختلفين فى وضع لم يعجبنى ولا يشرف فارسا مثلك ثم انشدت قائله :
لقيتك انت فى الحفله وقاعد جنبك الجكسى
لابس ليكا شال اصفر وتشرب ليكا فى ببسى
غلبنى اتعشى وحياتك بس اكلت من الصحن شبسى
وشايفاك انت تتلفت تقول سواق بتاع تكسى
فرد عنتر عذرا حبيبتى فقد حضرت الى الحفل متأخرا ولم اجد مكانا غير ذلك فصاحت فيه ولكن اى شهامة الفرسان وحتى وان كنا مختلفين لماذا لم تقم بتوصيلى لخيمتى بعد انتهاء الحفل فرد عنتر بسرعة: بالله ؟؟؟ عشان يفوتنى الجرتق!

الصحافة


تعليقات 2 | إهداء 1 | زيارات 2646

التعليقات
#736242 [Adam Ibrahim]
0.00/5 (0 صوت)

08-03-2013 07:44 PM
ههههه.. مبدع والله يا العطبراوى.. يديك العافية..


#736181 [أبوالكجص]
0.00/5 (0 صوت)

08-03-2013 05:58 PM
رائع والله بريك (break ) معقول من ساس يسوس ونكد حروب وهلم جرا.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة