الأخبار
منوعات سودانية
البشرة السمراء (الخضرة) تسيطر على وجدان اهل السودان
البشرة السمراء (الخضرة) تسيطر على وجدان اهل السودان



08-26-2013 07:17 AM
الخرطوم: خديجة عبد الرحيم : تختلف ألوان البشر في المجتمع وتتباين تبعا للأعراق والأنساب والقبائل ومع ذلك الاختلاف نجد أن للون الاسمر أو ما يعرف بالخضرة ميزته الخاصة عن بقية الألوان اذ يتربع على عرش الذوق والمزاج ليس على اهل السودان وحسب وانما على مستوى العالم وفي السودان تبدو مؤشرات وقعه في النفوس واستملاحه بائنة حتى احتل مكانة واسعة في الطيف الغنائي فالعديد من اهل الفن والغناء تغزلوا فيه وورد العشوق الاخضراني في معظم أغنياتهم.
واللون الاسمر ليس مميزا عند الفنانين السودانيين والعرب وحسب بل لدى حواء السودانية التى نجد فى معظم اغانيها مدح للذين يتحلون ببشرة سمراء وايضا اغنيات البنات في المناسبات مثل (الخدار خداري يا ناس خداري من العين بضاري ) وكذلك (خضرة ناعمة صوت حنين ) وايضا (خداري ما بخلي ) التي تغنى بها الفنان عثمان الشفيع واغنية (زولي الاخضر كن شفتو بخضر) التى يتغنى بها الفنان عمر احساس و(سبب لي اذية الاخضر ابو طاقية) و(يا الزرعي تعال فايح) وكثير من الاغنيات التي تستدعى الوقفة عند اصحاب البشرة السمراء.
وللتعرف والحديث اكثر عن السمرة التقت (الصحافة) ببعض فئات المجتمع
اذ تقول فايقة عمر ان الجمال الحقيقى لكل من الجنسين الرجل والمرأة يكمن فى اللون الاسمر وخاصة المرأة السمراء التى يتغزل بها الكثير من الفنانين مثل الفنان محمد وردى فى اغنيته (الليلة ياسمراء ياسمارة) وتضيف ان التغني للخضرة او السمرة يأتى لحب وعشق الناس لها ولان اللون الاخضر يوحي للطبيعة وان الانسان بطبعه يميل الى الخضرة حتى فى الطبيعة التى عندما ينظر لها ينشرح صدره ويهدأ باله. وختمت حديثها بان ثلاثة يذهبن الحزن (الخضرة والماء والوجه الحسن).
وتقول سونا كمال انها ايضا تحب اللون الاسمر وتميل لاصحاب البشرة السمراء وانها تفضله لدرجة انها حتى لو ارادت الزواج من شخص تفضل ان يكون صاحب بشرة سمراء وهى ترى ان الرجل الاسمر يتميز بقوة الشخصية والنخوة والشهامة وانه يتحمل المسؤولية.
ويقول عمر الزين ايضا انه من الذين يميلون الى السمار ويحبونه ويؤكد عمر الزين ان ارتباط اغنيات الفتيات بالخدرة او اصحاب البشرة السمراء يعود لحب الفتيات لهم ولان الفتيات يغرمن كثيرا بالرجال اصحاب البشرة السمراء وكذلك الرجال يميلون الى الفتاة ذات اللون الاسمر الجميل الذى يكون على طبيعته. ويضيف عمر يا ليت كل الفتيات يعلمن جمال اللون الاسمر حتى لا يلجأنا الى الكريمات التي تمحى ذلك اللون تماما ولا يستطعن اعادته.
ويقول ابوبكر الزين: اللون الاسمر هو رمز الجمال اذ يحمله معظم ابناء الشعب السودانى ويتميزون به عن بقية الشعوب الاخرى ونجد ان الفنانين الذين تغنوا للسمار أرادوا عكس سر جمال اللون الاسمر، واضافت منال الشيخ ان اللون الاسمر هو السائد فى الشعب السودانى ولذلك من الطبيعى ان يحبه السودانيون ويتغنى به فنانونهم وهى ترى انه على الرغم من ان الجميع من السودانيين لا يكونون على قناعة بلونهم وعلى الرغم من ان الكثيرين من الذين يحملون بشرة فاتحة او صفراء يسخرون من الذين يحملون اللون الاسمر الا انه يعتبر لونا جذابا ويظل الاجمل بين الالوان والا لما تغنى له اغلب الفنانين ويكفى ان قال الفنان محمد الامين في اغنيته (اسمر جميل فتان ملاك فى شكل انسان) .

الصحافة


تعليقات 7 | إهداء 0 | زيارات 6106

التعليقات
#753025 [saif]
0.00/5 (0 صوت)

08-27-2013 12:44 AM
الخداااااااااار ياااااااااسمعة


#753004 [Adam Ibrahim]
0.00/5 (0 صوت)

08-26-2013 11:38 PM
الغريبة اللون الاسمر الغامق(الاخدر كما نسميه فى العامية) كان هو لون الاصالة عندنا خصوصاً بعد فترة الاستعمار وما تبعها.. كثيراً ما سمعت من حبوباتنا عندما تأتى سيرة فلان من قبيلة كذا، يقلن: دا ود بلد و ود قبائل.. مانك شايف الخدرة الدقاقة؟.. واحياناً يضيفن: والشلوخ فوق وجناتو؟..


#752754 [البشير]
0.00/5 (0 صوت)

08-26-2013 03:58 PM
http://www.youtube.com/watch?v=_0vyIhNffhk


#752711 [sudani]
0.00/5 (0 صوت)

08-26-2013 03:08 PM
خديجة ما عندك موضوع عشان كده كتبتي الموضوع ده


#752646 [محمد السر الأبيتر]
4.50/5 (2 صوت)

08-26-2013 02:04 PM
المهم يكون اللون نقي , نضييييف . أخدر اسمر اصفر قمحي اسود عديييل نضافة البشرة


واللون مطلوبة


#752642 [مؤيد عبد الرحمن]
2.50/5 (2 صوت)

08-26-2013 02:00 PM
(( واغنية (زولي الاخضر كن شفتو بخضر) التى يتغنى بها الفنان عمر احساس ))


كان شفتو بخدر من الخدر و ليس الخضرة . . . . .


وبالمناسبة أنا خدوري وبحب لي واحدة خديرة وناوين نتزوج عشان نجيب عيال


عدة جبنة . . . . قر قر قر قر قر قر


ردود على مؤيد عبد الرحمن
United States [شكمان مكرفس] 08-26-2013 03:59 PM
ما يحتاج تتزوج خدوريةةيا مؤيد بيضاء بس افطم عيالك بالجبنة بطلعو خددددددر


واحلاتي يا ناس


#752360 [المكوجي]
4.00/5 (3 صوت)

08-26-2013 08:43 AM
دا كان زمان اما الآن فللاسف الشديد اللون المفضل هو الابيض الاصطناعي والمضحك ان اللون الاسمر اصبح نادر وسط تجمعات الشابات. قأنا بصراحة بشفق على بنات بلدي من الجلبغة والبهدلة دي. اللون الاسمر خلقة ربنا فلماذا لا نقبل خلقة ربنا؟


ردود على المكوجي
[شكوكو] 08-26-2013 07:14 PM
اعترافنا باللون الاسمر وجماله مش معناها انو الابيض اصطناعي ،للعلم دا تخلف مسألة انو نصنف من ناحية الجنسية ،العرقية،الديانة ،اللهجة ،اللونية ،القبلية ،الجهوية ،القومية ..... الخ .
لانه المثل بيقول ( كل شاه معلقة من عرقوبة )، في كل مما زكر سابقا في الصالح وفي الطالح .اوكي ؟!
نحن البنميز والاساس في المعيار الشخصية دون المراعاة الى ما ذكر سابقا .
لانه كل الذكرناه فوق ديل فيهم الصالح والطالح ،
عشان كدا يا اخوان ىن الاوان ،لنجمع كل هذه الاصناف المختلفة والتي لايوجد شئ يجمعها الا السودااااااااان وبس .
نحن سودانيين واخوان .هكذا خلقنا وهكذا عرفنا ،وهكذا سنموت ،مهما تآمروا علينا الكيزان فلابد ان نرجع زي اول واحسن كمان بإذن الله .
ولا شنو ؟؟!!
سمك !!

United States [سمية بشير] 08-26-2013 03:57 PM
لكن إنت يا المكوجي مش مكوجي وبس ؟ الفهمك في الحاجات دي شنو ؟



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة