جاكوزي..!!!



08-27-2013 12:58 PM
صلاح الدين عووضة

(خاص بـ"الراكوبة")

* كاتب هذه السطور قريب عهد بـ(المذكور!!) أعلاه..
* ولا أعني بالعهد هنا (التجربة) وإنما محض (العلم بالشيء)..
* فلم أسمع بالمفردة هذه- مجرد سمع- إلا قبل نحو أعوام ثلاثة..
* ثم كانت (المشاهدة) من بعد ذلك...
* أما (الإستخدام!!) فلم (يحصل لنا الشرف) بعد..
* فقد تلقيت دعوة هاتفية- آنذاك- من شخص يقول إنه قدم إلى البلاد في إجازة من (بلاد برة) ويشرفه أن أتناول معه وجبة سمك (موردابية)..
* وبعد إلحاح بلغ حد (السماجة) رأيت أن ألبي الدعوة مستصحباً معي نفراً من أصحابي (الحرافيش)..
* أي نفراً من زملائي الصحفيين الذين هم (دون) مقامات (التمكين!!) الآتي من (علٍ!!)..
* وبعد إلتهام لـ(ربع) ما كان أمامنا من أصناف السمك- من شدة كثرته- أصرَّ مُضيِّفُنا (المجهول) على أخذنا إلى (قصره) لسبب لا نعلمه..
* أو لم نكن نعلمه حتى اللحظة تلك..
* وبعد جولة تفقدية لم (تنج) منها حتى خزانة الملابس الفخيمة دلف بنا صاحبنا إلى الحمام..
* وهنالك شاهدت الجاكوزي...
* ونتوقف هنا عن سرد حكاية صاحب الوليمة السمكية إلى أن نكشف عن (أسبابها!!) في خاتمة كلمتنا هذه..
* فكما هو معلوم لا حديث للمجالس في أيامنا هذه سوى (أوامر) الكف عن البناء بالجالوص..
* أوامر من قيادات إنقاذية على خلفية ما فعلت أمطار الأيام الفائتة في الناس والأنعام والممتلكات..
* فرموز الإنقاذ هؤلاء يرون أن مشكلة انهيار المنازل- جراء الخريف- يمكن حلها فور إمتناع الناس عن استخدام الطين..
* أي أن عليهم أن يبنوا بالطوب الأحمر أو لا يبنوا (خالص) إن لم يكن بمقدورهم إيجاد البدائل (غالية الثمن)..
* طيب؛ إذا افترضنا أن الناس قد استجابت لـ(الأوامر العليا!!) هذه وأضحت بيوت الجالوص من الماضي فكيف تُحل مشاكل (إنهيارات!!) أخرى لا علاقة لها بـ(زفت الطين) وإنما هي من (زفت النفط!!)؟!..
*وحين نقول (زفت الطين) - ونعني بيوت الجالوص- فإنما نجهر بحقيقة ما يعتمل في نفوس أصحاب (السرايات الإنقاذية !!) تجاه منازل غلابى أهل السودان ..
* فشوارع الأسفلت- مثلاً- التي تصدعت وتشققت و(اتماصت) لا علاقة لها بالطين الذي (تشطَّرت) عليه الحكومة ممثلةً في بعض قياداتها..
* والمصارف التي (أحرجت!!) الحكومة هذه الطين براء..
* وأعمال الصيانة (الشوارعية!!) التي شعارها (على أقل من مهلك) لا صلة للطين المسكين بها..
* أما (الآمرون) هؤلاء فقد نشأوا جميعهم- أو أغلبهم- في بيوت الطين هذه..
* والآن يمتلكون قصوراً بداخلها حمامات (الجاكوزي!!)، وخارجها أحواض السباحة..
* والفرق بين هؤلاء وبين صاحب (الجاكوزي) المغترب ذاك أن (متنعِّمي الإنقاذ) لا يريدون منا أن نكتب عن (جواكيزهم!!) كيما تظل (مستورة)..
* أما الثاني فقد علمنا أن السبب في وليمته السمكية تلك هو أن نكتب عن فخامة قصره وأثاثه وحدائقه و(خادماته!!)..
* ثم أن نكتب- على وجه الخصوص- عن الجاكوزي (الإيطالي) الخاص به..
* وها قد فعلنا !!!!!!!


تعليقات 20 | إهداء 0 | زيارات 6979

التعليقات
#754582 [semba]
0.00/5 (0 صوت)

08-28-2013 08:43 PM
بطل حسادة يا عووضة ما هو عندك ناس محمد احمد بيوتهم كلها احواض سباحة ايه رايك .


#754571 [الصوت]
0.00/5 (0 صوت)

08-28-2013 08:22 PM
بالمناسبة يا ود عووضه الجاكوزي نوعين ساخن وبارد ... الشوّفكم لي الراجل ده ياتو فيهم... وما قال ليكم المدة القصوى للبقاء داخل الاول كم وداخل الثاني كم ؟؟؟ ارجعوا اسألوا ....


#754170 [EzzSudan]
0.00/5 (0 صوت)

08-28-2013 11:32 AM
why did you accept his invitation in the first place?!(no offense?!-respect.


#753817 [دا كلام ما صاااااح]
5.00/5 (2 صوت)

08-27-2013 09:22 PM
حظك انت الشفت الجاكوزى
ونحن نحمد الله قرينا لى عووضة الكتب عن الجاكوزى
شق المداين علم


#753788 [المتفائلة جدا]
5.00/5 (4 صوت)

08-27-2013 08:27 PM
رائع كالعادة يا أستاذ عووضة لكن أظنك نسيت وصيتى ليك ما قلت ليك أكتب عن التيس والخروف والثعلب وحتى الغول البلع الإغاثة لكن ما تهبش الديكور الداخلى يعنى الكراسى والترابيز وهلم جرا تقوم تجيب ليك جاكوزى ؟؟ وأغلب الظن كان إسمه جا ولما إتعمل جوه بيوت الجماعة بقى كوزى ..


ردود على المتفائلة جدا
United States [الصوت] 08-28-2013 08:15 PM
يخت محنك يالمتفائلة والله ضحكتيني.....


#753766 [quickly]
5.00/5 (7 صوت)

08-27-2013 07:44 PM
لكين جاكوزي من جاكوزي ما بفرق دا جايبو من عرق جبينو وحلالو بعد سنين الغربة والبشتنة
والتانين جايبنو من المال الحرام من حق الشعب المسكين السفوهو
انشاالله يتلسقو فيهو يارب بموية نار.... قولوا امييين


#753751 [ود ابو زهانة]
4.88/5 (4 صوت)

08-27-2013 07:24 PM
ناس من البسابير للجاكوزى !! حكمة والله وحكاية كما غنى الجابرى عليه رحمة الله


#753727 [هميم جابر]
5.00/5 (4 صوت)

08-27-2013 06:37 PM
المؤتمرجية يريدون أن يتوقف الناس عن بناء الجالوص لسببين: الأول أنهم حاقدون ويريدون من الغلابى أن يسكنوا في الشارع لعجز الغلابى عن بناء بيت من الطوب الأحمر. الثاني هو أن يشتري الغلابى الأسمنت والطوب وبقية مستلزمات بيوت الطوب من مصانعهم وكمائنهم ومغالقهم فقد سيطر المؤتمرجية على كل شيء في السوق (وهذا إذا تبرع أحد أقارب الغلبان بثمن هذه المنتجات المؤتمرجية)... قاتل الله الظالمين أينما حلوا


#753619 [كتمت!!!]
4.00/5 (2 صوت)

08-27-2013 03:59 PM
جكوزي حوض للاستجمام و يوضع فيه ماء حار جدا بخاري لإستجمام فيه ويمكن وضع مياه بارده ثلجيه


#753566 [حسكنبت]
5.00/5 (4 صوت)

08-27-2013 03:10 PM
الجاكوزى دا فيهو شوك زى الدبسة وللا لحم صافى ؟


ردود على حسكنبت
[MAHMOUDJADEED] 08-27-2013 05:57 PM
يا سلام يا حسكنيت !!. وعندك واحد جاكوزي وصلّحو .لي الآن بالسعودية ثلاثون عاماً حسوماً ولسع ما شفت الجاكوزي مجرد شوف ناهيك عن امتلاكه .

[الــســيــف الــبــتــار] 08-27-2013 04:08 PM
من جدك بتتكلم يا راجل ؟
جاكوزرى بالفرن أمكن ولا محشى بالرز و الزبيب ؟


#753556 [ابونضال]
5.00/5 (2 صوت)

08-27-2013 03:00 PM
بمناسبة قصورهم الجاكوزيه...نرجو من القراء الكرام الجيران القدامى ان يعرضوا علينا البيوت التي اتى منها هوءلاء المتجكزين اذا لم تكون قد تجكزت بعد!!!لمجرد الذكرى التي قد تنفع غير المتجكزين....


ردود على ابونضال
United States [الــســيــف الــبــتــار] 08-27-2013 04:10 PM
عليك يا عزيزى ابو نضال زيارة اطلال العارف بالله حسن أحمد الشير بكوبر و جنوب سجن المجانين وستجد ما يسرك و ينشرح له صدرك من مبانى الجالوص المحكر فى الواطه و مطلى بتراب ام درمان الحمراء بالزيتون و الطحنيه ؟
يا للعجب من نسى قديمه تـــاه يا اولاد ......


#753535 [اسف يا سودان]
5.00/5 (2 صوت)

08-27-2013 02:38 PM
لاذع لكن يا عووضة اديك العافية ...وعشان كده اقول ..ناس القصور هملو ليك حظر ...بس ولا تزعل مني 1000000like


#753534 [بت الديم]
5.00/5 (1 صوت)

08-27-2013 02:37 PM
الليلة مالك ياودعووضة مقالك ده مبشتن كده ....


#753522 [faisalmukhtar]
5.00/5 (2 صوت)

08-27-2013 02:29 PM
ياصلاح انت ما داير تتوب ولا شنو بعدين أزيدك من الشعر بيت أنا شفت في فلة واحد من الناس الكانوا حمام للابن الصغير به جاكوزي ميني وعجبا*


#753519 [Hafiz Mohamed Zein]
4.50/5 (2 صوت)

08-27-2013 02:25 PM
يعنى ايه جاكوزى ياصلاح؟ حيرتنا معاك! اشرح


#753518 [ود الحاجة]
5.00/5 (1 صوت)

08-27-2013 02:25 PM
يا استاذنا, اعتقد ان الكثير من ساكني بيوت الطوب الاحمر و الجالوص كانوا متلهفين ان تكتب لهم وصفا شيقا عن الجاكوزي (حتى و لو كان رواية عن ءاخرين) الذي ربما رأوه رؤية خاطفة و لكنهم لم يستمتعوا بالتمعن فيه او التنعم به و لو مرة في العمر


#753508 [القافل على كرت ميت]
5.00/5 (3 صوت)

08-27-2013 02:19 PM
ألا ترى أخي عووضة أن هذا المقال ينقصه هامش أو جملة بين قوسين تورينا فيها إيه الجاكوزي .... والله ما عرفتوووو،،،


#753462 [USAMA]
5.00/5 (2 صوت)

08-27-2013 01:39 PM
طيب يا عووضة فهمنا الجاكوزي هو شيء يوجد في الحمام..
لكن ما قلت لينا هل الجاكوزي دا طالما انو يوجد في الحمام هل يوضح فيه الوسخ ام يزال فيه الوسخ بمعنى هل يجلس فوقه ام يتم الجلوس فيه؟ لازم تجيب المعلومة كاملة
على كل طالما ان اسمه جاكوزي و يمكن ان تحريف ل (جاء كوزي) فأغلب الظن الاحتمال الاول هو الارجح.


ردود على USAMA
European Union [julgam] 08-27-2013 07:20 PM
الجاكوزى كلمه من مقطعين الجاء كوزى يعنى من أتى هو كوزى براى ...وفى رواية أخرى الجاع كوزى ولكن بعد شقلبة الحال مع الإنخاس وبعد أن جاعت بيوت الشبع وشبعت بيوت الجوع لكى لا تتكدر خواطر العصبه من مستجدى النعمه حذفت العين أو بالأحرى جنبت حتى لا تأتى لفظة جاع.....
ثانيا هاك يا ود عووضه جرده بمساكن هؤلاء الأبالسه قبل يونيو1989...أولا العياط الأكبر كان يسكن فى بيت من غرفتين جنوب ولصق مصحة كوبر هو وفاطمه خالد وحاج حسن أحمد والحاجه هديه وربع دسته من المليارديرات الجدد..أما شيخ على فكان يسكن قلب الخرطوم محل قصر الصداقه وفندق برج الفاتح ومع الرأفه أسرته كانت تسكن بيت إيجار بالديوم...أما غازى صلاح الدين وبعد حردته الأولى رأى مجموعه من الخيرين من أثرياء الغفله أن يبروه بشراء قصر بالعمارات بمبلغ مليون ونصف المليون دولار...أما الطيب سيخه(رد الله غربته ليذوق من العذاب ألوان وليشهد سقوط المشروع الحضارى وإجتثاث الأصل المصرى وموجات الجلع..)كان يسكن بيت جالوص عشوائى فى زقلونا....أما مطرف فكان يشارك أسرته الأنصاريه بيت جالوص بود نوباوى ...
الله يخت محنك يا ود عووضه ياخى بس خلينا نتفرغ ليهم شويه بس حنجيب ليك أخبار مساكنهم تكل تكل وقطيه قطيه من عند الطفل المعجزه شاتم الشعب السودانى وحتى سليل القرمه الحريف وليس بالكيشه سارق أموال الشعب السودانى ...وأخبار كل مستجدى النعمه....


#753452 [Sudani1]
5.00/5 (2 صوت)

08-27-2013 01:24 PM
مرحب بصاحب القلم المصادم. وكت نشوف كتابتك بنشعر بالامل في التغيير القادم ولو ابى اصحاب (الجواكيز) بالسترة!


#753443 [محمد]
5.00/5 (2 صوت)

08-27-2013 01:15 PM
يعني إعلان مدفوع الأجر!!



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة