الأخبار
أخبار إقليمية
اللواء شرطة أبو عبيدة سليمان يهدد الأسرى بالتصفية الجسدية إذا لم ينهوا الإضراب عن الطعام.
اللواء شرطة أبو عبيدة سليمان يهدد الأسرى بالتصفية الجسدية إذا لم ينهوا الإضراب عن الطعام.


08-30-2013 01:21 AM
اللواء شرطة أبو عبيدة سليمان يهدد الأسرى بالتصفية الجسدية إذا لم ينهوا الإضراب عن الطعام.
قي خطوة غير مسؤولة على الإطلاق من قبل مدير عام السجون المدعو اللواء / أبو عبيدة سليمان الذي حضر اليوم الخميس الموافق 29/08/2013 الساعة الخامسة مساءا حضر الى سجن كوبر حيث أسرى حركة العدل والمساواة وسجناء الهامش المضربين عن الطعام لليوم الرابع على التوالي وقام السيد مدير عام السجون بتهديد الأسرى بلهجة وعبارات غير مسؤولة تنم عن سلوك وضيع قدر صاحبه حيث قال بالحرف الواحد للأسرى "نحن عندنا القوة والسلطة والقرار والمال والطائرات والعربات وممكن نعمل أي شئ دايرنو" وأضاف "انتوا ما بتقدروا تلووا إيدنا انحنا السودان ده كلو حقنا نعمل زي ما دايرين في أي زول" وقال "للمرة الأخيرة بنحذركم تخلوا الفوضى البتعملوا فيها وإلا انا شخصيا حتشوفوا مني حاجة ما شفتوها حياتكم" وأضاف " دايركم تعرفوا حاجة واحدة بس لو انا قتلتكم كلكم ما في زول بسالني" انتهى .
بعد تضامن كل من سجناء الفاشر والأبيض وأم درمان وبورتسودان قامت إدارة السجون بإدخال عدد كبير من السجناء الى الزنازين الانفرادية وقاموا بتشتيت السجناء، ومنعوا كافة الزيارات حتى لا تصل أي معلومات عن السجناء الذين صاروا في وضع المجهول.
إزاء هذه العمل الإجرامي تود حركة العدل والمساواة السودانية تاكيد الآتي :
أولا : إذ نستهجن سلوك ادارة السجون نصدر تحذيرا شديد اللهجة لمدير عام السجون اللواء / أبو عبيدة سليمان لما قام ويقوم به من عمل غير اخلاقي لا يشبه القانون والقانونيين، ونحملة شخصياً مسؤولية أي ضرر لحق او يلحق بأي من الأسرى والسجناء في كافة سجون السودان والحساب ولد.
ثانياً : نحمل مسؤولية صحة وسلامة الأسرى والسجناء لوزارة الداخلية وجهاز الأمن والمخابرات وإدارة السجون ووزارة العدل ونيابة جرائم امن الدولة.
ثالثاً : نناشد كل المنظمات الحقوقية بضرورة التدخل العاجل للحيلولة دون تعذيب الأسرى وسجناء الهامش السوداني.
رابعاً : نهيب بكل القوى السياسية ومنظمات المجتمع المدني السوداني الذين أعلنوا تضامنا مع الأسرى وسجناء الهامش السوداني.
الحرية للأسرى والسجناء وإنها لثورة حتى النصر

جبريل آدم بلال
أمين الإعلام الناطق الرسمي
29/08/2013


تعليقات 18 | إهداء 0 | زيارات 8102

التعليقات
#763402 [MMSEA]
0.00/5 (0 صوت)

09-11-2013 12:47 AM
الكلام الما بدخل العقل ده المصدر بتاعو شنو؟؟؟ وكيف يكون السجناء في عزله تامه ومقطوعين من العالم الخارجي وكلام زي ده يمرق؟؟!!
ولي كل من اهان الراجل ده بقوليهو الراجل ده اشرف منك ومن الجابوك...


#756298 [مهدى]
0.00/5 (0 صوت)

08-31-2013 02:41 PM
تمام يا بت الصافى , ويا جماعة , بالله اسمعوا كلام بت الصافى دا وفكروا فيهو كويس , ح تلقوا أنو مافى حل غيرو ! الثورة المابشترك فيها كل الشعب السودانى , حتى لو نجحت , ما بتخلق التغيير البيدعموا كل الشعب , وكل الحتعملو إنها تستبدل نظام عنصرى بنظام أكثر عنصرية منو !!


#756207 [بت الصافى]
5.00/5 (1 صوت)

08-31-2013 12:37 PM
من زمان قلنا الكلام دا , التغيير ما بيحصل فى كبكابية ولا قيسان ولا ود شريفى , التغيير بحصل فى الخرطوم. وكل الناس الشايلة سلاح ضد النظام القاتل دا وهى قاعدة تقاتل وسط أهلها ولا فى أصقاع الريف البعيدة من الخرطوم , غير إنها بتتسبب فى تدمير قراها وقتل أهلها بطيران النظام الفاشى دا تانى ما بتعمل حاجة , دا غير إنها بتطول فى عمر النظام بصورة مستمرة ومن غير ما تدرى. والخرطوم دى , ما ضرورى الناس تخشها شايلة سلاح , لكن الإنسان المستعد إنو يشيل سلاح ويقدم روحو فدا وطنو وشعبو , مابغلبو أبدا أنو يواجه النظام دا بصدر عارى ويسقطو فى خلال ساعات , بس كييييف المعارضة دى تتحد !! .. كيف تتحد وهى بتهاجم فى بعض وبتنفر فى بعض ومخلية النظام مرتاح يتفرج فيها ويضحك عليها.
يا شباب , كل الناس دى دايرة سودان جديد ونظام حكم جديد , كلها دايرة سودان العدل والمساواة , وكلها نفسها تأمن لأطفالها مستقبل فيهو سلام وتنمية , وكلها متفقة على وحدة السودان على أسس جديدة عشان حتى الجنوب الإنفصل دا يرجع تانى !.
والحلم الجميل والعادل دا يا شباب ما بتحقق إلا إذا طلعنا ليهو فى الشارع سوا , كتوفنا فى كتوف بعض , متماسكييييين .. إيدينا فى إيدين بعض , الشايقى ماسك البجاوى , والزغاوى ماسك الجعلى , والنوباوى ماسك الدنقلاوى .. وكلنا نطلع الشارع دا , هتافنا واحد وهدفنا واحد (السودان الجديد) .. وشوفوا بعد داك كان بتنقدروا !!


ردود على بت الصافى
European Union [محمود مهدى] 08-31-2013 01:21 PM
الله يفتح عليك يا بت الصافى , فعلا كل الناس دايرة سودان جديد , سودان حدادى مدادى , نعيش فيهو بى سلام ومساواة زى ما عايشين فى أحياء مدنا وقرانا , بس كيف أنحنا نتفق ونتحد , الباقى سااااهل !!


#755892 [ودالمطر]
0.00/5 (0 صوت)

08-30-2013 10:55 PM
ياأرحم الراحمين ياأرحم الراحمين ياأرحم الراحمين اللهم كل من يحب لوطنى الخير فأجعل الخير في يديه ومن أراد غير ذلك فله منا مايرضيك عنايارب


#755886 [Asmar]
4.00/5 (1 صوت)

08-30-2013 10:41 PM
عاوزين البيان بالعمل وفترنا من التصريحات
و اقتدوا بالسيسي ولو بالسيسي


#755872 [عصمتووف]
0.00/5 (0 صوت)

08-30-2013 09:49 PM
لواء غبي كقوانين الدولة والجهاز التنفيذي الشرطة الواحد يريد ان ينتحر ويغادرها ليخفف 3 رغيفات في اليوم ومقعد دراسة او بص او وظيفة يفتحوا بلاغ انا قنعان بلاغ شنو بدل تعالج المشكله تزيدها وهذا الاخرق معروف الامتناع عن الطعام نتائجة معروفة هم قنعوا من خيرها بدل الحبس بدون محاكمة قالوا نموت لو تريد لهم الموت الرحيم اطلق نيرانك شنوا يعني موت موت كان جائع ولا رصاص طريق اتجاة واحد يقود للمقابر لكن يا اغلف الجماعة ديل لو لموا فيك يخلوا ريحتك طير طير لكن بتعوي وتهوهو وسط كلابك كدي جرب لو مافي زول بسالك لا تنسي الله هو بسالك وخلي البشير ينفعك بعدين


#755869 [abusafarouq]
0.00/5 (0 صوت)

08-30-2013 09:44 PM
يا حركات الجبهة الثورية دى عايزة بيان . كلام اللواء واضح هو خليفة أبراهيم شمس الدين وصلاح قوش الجديد يجب توجيه التهديد المباشر للواء قبل تنفيذ التصفيات بالأسرى فى السجون هؤلاء يمكنهم تنفيذ الامر لأن إنسان الهامش عندهم أقل من روح جرادة وبالتالى التهديد يكون أرسال كتائب سرية لتتبع هذا اللواء العنصرى المفترى برد حاسم وسريع وأعطاه درسا وعبرة لاينساه أبدا وعبرة لمن تسول له نفسه الضرر بالمعتقلين .طالما أتعرف أسمه وقام بتهديد السجناء بالتصفية الجسدية يا حركات أتعلمو الدروس والعبر من هؤلاء القتلة لكم أسرى حرب ولاأسرى حرب عندهم ..


#755846 [Bull]
0.00/5 (0 صوت)

08-30-2013 08:42 PM
الاسرى ديل خلوهم يمارسوا حياتهم بصورة طبيعية داخل السجن طالما هم أسرى لديكم يا قائد السجن, طبعاً إطلاقهم سراحهم غير وارد ما لم تكن هناك تسوية سياسية, الناس البحرضوهم علي الإضراب عن الطعام من خارج السجن غاشنهم, لذا فكوا اضرابكم وما تنسوا هناك في ناس خارج السجن يدعون عليكم لأنكم أزهقتم أرواح أبرياء عند غزوكم لام درمان, هل هذا في بالكم؟


ردود على Bull
[Bull] 08-31-2013 05:04 AM
طالما رغبت أنك تعمل تعديل لوحدك,يلا كبه في رأسك يا زنقار حتى يسيل علي فمك ومناخيرك وبقية أجزاء جسدك وتسير به في الشوارع, والناس تضحك وبعضهم يشمئز من منظرك. كدي كويس

[Zingar] 08-31-2013 12:12 AM
غلاسه كده أنا عايز أعمل شوية تعديل فى إسمك إلى (Bullshit)عشان يكون آخر حلاوه بالصلا على النبى.


#755751 [معاويــــــــــــــــــــــــــــــــــة]
5.00/5 (1 صوت)

08-30-2013 04:33 PM
قلنا تشكيل لواء الردع اول باول الناس ديل غير شغل السلاح ماب ينفع معاهم اى شيى
يا اهل السودان اوووووووووووووووووك اصطفو هذه الطقمه الفاسده يجب ازالتها الان وقبل
غدا النظام منهار وعلى حافة الهاوية .............................................


#755740 [ود الباشا]
4.00/5 (2 صوت)

08-30-2013 03:49 PM
سجناء الهامش حتى داخل السجون فى تصنيفات ياخى السودان كلو هامش بعدين الناس كللللللها متعاطفة مع المساجين ككتلة واحدة بدون مسميات ويكفى انه سجين سياسيا


#755616 [saif]
3.00/5 (1 صوت)

08-30-2013 10:25 AM
احسن ليكم توجهو تسبقكم عواميدكم ان شايف كدة احسن


#755555 [ود سوق البروش الضعين]
0.00/5 (0 صوت)

08-30-2013 07:23 AM
الحرية للأسرى والشفاء للجرحى أولا انتم اصبحتم ناس تصريحات وليس إلا ليه كل يوم نؤكد نؤكد ولا نرى اي تحرك فعل ملموس انتم ما تعذبوا اسراهم اللي عندكم دا والواحد لو كان اسير في سجون الحكومة دا اصلا ماعنده امل للعودة غلى اهل غير الموت ما في حاجة ومن الانسانية ان تفقد من يتابعك ويساندك ..
وللآسف تمنينا ان نكونوا حركات مسلحة منذ مجيئكم للكن كنا صغار والآن تربينا على عهدكم وغيبتم أملنا عشرة سنوات لن تستولوا على اقليم واحد! ولاحتى مدينة معتبرة! والان فضلنا عن نتابعكم بالإعلام على صفحات الانترنت وبالطريقة دي برضوا هانمل من المتابعة لذا اناشدكم بالعمل البناء نحو الهدف وهو اسقاط النظآآآآآم


#755550 [أأه يا بلد]
0.00/5 (0 صوت)

08-30-2013 06:51 AM
والله شايلين سلاح وكذابين
زمان لواء تسلط على الشيوعين فى السجن
يروى انه راقد شهر بين الحياة والموت
فى المستشفى وفهم الف حاجه
كلامكم فى الاسافير كتر مره واحده


#755538 [البندول]
4.00/5 (2 صوت)

08-30-2013 04:49 AM
يا جبريل..يا جبريل ....يا جبريل إن حديثك يجافي المنطق ويستخف بعقول الفراء والأخطر أنه يشعل نار الفتنة النائمة التي لعن الله من يوقظها وإني والله لأشتم فيه رائحة الكذب والفبركة والتهويل ...فكيف يستقيم عقلا أن هؤلاء المسجونين معزولين عن العالم ولا يسمح بزيارتهم بتاتا وفي الوقت نفسه يتسرب إليك حديث مدير السجون بحذافيره "وضبانته" ..يا أخي كفى بك داء أن ترى أن إثارة الفتنة هي الشافي !!! ....يا أخي لا خير فبنا إن لم نقلها.... تبا لهذه التي تسمي نفسها بالإنقاذ التي أوردتنا للحروب والمهالك وتبا لما تسمى نفسها بالعدل والمساواة التي بذرت فينا الفرقة والشتات والعنصرية ولا نامت أعين كلاهما ... ودمت يا وطني موحدا ساميا فوق الضغائن والمحن والحروب.


#755524 [Dong]
5.00/5 (1 صوت)

08-30-2013 03:18 AM
أولا التحية الي هؤلاء الأشاوس الأبطال الذين ضحوا من اجل. عن يبقي الشعب السوداني حرا ابي ونسأل الله عن يجزيهم الثواب والآجر ولكن دعوني أقول كلام الي السيد مدير السجون نحن نقول لك بأننا حتي هذة اللحظة محافظين بقواعد اللعبة وتعلم جيدا. يالسيد. مدير السجن ماذا نعني بقواعد اللعبة وفي نفس لحظه الطرف الآخر خرج من قواعد اللعبة منذو عمدا بعيد فيا سيد مدير السجن نحن ليس لدينا ما نخسره ومن هنا نقول لك قل ما تشاء ولكن احسب العواقب جيدا شكرًا نائب مسؤول جبهة صناع التغيير


#755522 [انصاري]
0.00/5 (0 صوت)

08-30-2013 03:04 AM
الحرية لكل الشرفاء والخزي والعار لسدنة الظلم.. أشباه الرجال وأنصاف النساء..والحساب ولد.. والغريق قدام..


#755518 [بت حبوبتها]
5.00/5 (1 صوت)

08-30-2013 02:26 AM
نداء عاجل لأهالي أسرى العدل والمساواة وبقية السجناء المضربين عن الطعام,

توجهوا تسبقكم لافتاتكم بالعربي والانجليزي لحقوق الانسان أوأي منظمة حقوقية ويا ريت لو أضربتوا عن الطعام تضامنآ مع أبنائكم المساجين حتى يفرج عنهم أو تضمنون سلامتهم الشخصية من مدير سجون النظام اللي مفروض يتسجن تأبيدة من تهديداته ليهم..وما تنسوا خلوا الشباب يصور من مبايلاته وينزل في اليوتيوب عشان العالم يشوف البلاوي دي.


#755509 [اسف يا سودان]
5.00/5 (1 صوت)

08-30-2013 02:07 AM
إذا قال الكلام دا البادي اظلم ومدام انتو عرفتو الكلام دا رد فعلكم شنووو نحن عايزين بيان بالعمل وبطلوا الولوله البتعملوا فيها دي ولله زهجنا وقرفنا من الضعف والهوان ولوما شفنا خطوات عملية تجاه منتسبنكم ح تعملوا للشعب السوداني ايه واذا حصل لي المواطنين ديل اي ضرر نحن كسودانين بنحمل من عقار والحلو وياسر وكل القيادات المسؤلية وبعد دا ماتلموا الا نفسكم وبنعتبر انو نضالكم دا ما عن قناعة وح يضعفكم يابشر ...ياهوووووي


ردود على اسف يا سودان
[اسف يا سودان] 08-30-2013 10:33 AM
هووووي يا استاذ بكري ما تخليني اغير رأي فيك الحلول حقت مسك العصاية من النص دي ما بتنفع هولاء سودانيون من غربنا الحبيب عاشرناهم سنين عددا مسلمين ومضيافين ومحبين للشمالين وكافة اهل السودان ومن جنوب النيل الازرق وجبال النوبة ماذا قدمنا لهم وهم يخدمون الوطن بكل مصداقية وتفاني والوعي الكامل والقناعة ضد تجار الدين واجب على كل ثوري فنحن بني جلدتهم من الشماليين ماذا جنينا غير التشريد والاهانة وتغبر المناهج بمناهج ضعيفة في التعليم والصحة والخدمة المدنية وسخرت لمصالحهم ليستقووا وينفردوا بالوطن أوا تعلم حينما يخطبون الجموع عندما يقولوا ايها الشعب السوداني فهم يقصدون افراد حزبهم فقط اما المرتزقة الذين باعوا ابناء جلدتهم في المناطق الثائرة فهولاء ان لم يتعقلوا حين الطامة من المفترض ان يضاعف لهم العقاب لانهم باعوا اهلهم بالرخيص وتركوهم يواجهوا الموت لاحول لهم ولاقوة . ولو انتظرنا -فاتو - هي مع الامريكان والامريكان بيحموا الكيزان لانهم خير معين لتفتيت السودان ونهبه وزرع الفتن بين كل مكونات المجتمع للاقتتال والابادة حتي يخلو لهم السودان دون منازع
اخيرا لما الخوف من انتقال الحرب داخل الوسط السوداني اوا ليس القادة بمدركين حتي يبصروا الثوار باهدافهم وتربيتهم تربية وطنية والتمييز بين من هو مواطن مسالم داعم للقضية وبين تجار الدين المتمكنين وبين المغفلين النافعين من ازلام النظام اذن نريد حلول هملية ناجعة بدل حرب الاستنذاف طويلة الامد التي تستنذف المواطن الفضل .
والله من وراء القصد

United States [بكري الصائغ] 08-30-2013 03:16 AM
يجب ترجمة هذا المقال الي اللغة الانجليزية وارساله للسيدة فاتو بنسودة رئيسة محكمة الجنايات الدولية بتاريخ اليوم الجمعة 30 أغسطس الحالي للعلم والافادة. وعلينا ان نتابع باهتمام شديد ماسيقوم به اللواء اللواء شرطة أبو عبيدة سليمان.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة