الأخبار
أخبار إقليمية
وقف (السف) .. هل البداية منع التمباك؟
وقف (السف) .. هل البداية منع التمباك؟
وقف (السف) .. هل البداية منع التمباك؟


12-14-2010 10:49 AM
(صواع الملك)

وقف (السف) .. هل البداية منع التمباك؟

فيصل عبد اللطيف


على الرغم من أنني من التمباكة ( مستعملي التمباك ، الصعوط، ود عماري، النشوق) فإنني أؤيد كل خطوة تأخذ مجتمعنا من هذه العادة . إلا أن القرارات التي اتخذها الدكتور عبد الملك البرير، معتمد محلية الخرطوم، بشأن منع التمباك لا تحقق هذا الهدف بالصورة التي أراها، بل هي مثيرة للجدل. القرارات في ذاتها ليست سيئة، فالتمباك ضار صحياً، وله آثار اجتماعية وبيئية شديدة الضرر ، وليس هناك من لا يقر بهذه الأضرار ـ حتى معظم الذين يستعملون التمباك مثلي .. ولكن تقديري أن القرارات تبعث استفهامات عديدة من حيث طريقة صدورها، وأسلوب معالجة عادة متمكنة من المجتمع السوداني بجميع طبقاته وشرائحه .

التغييرات المجتمعية ، الإيحابية منها والسلبية ، تأتي تدريجية.. والتغيير الذي يأتي في صورة سريعة ومفاجئة ( طفرة ) لا يستمر .. وعادة ( التمباك) في مجتمعنا امتداد طويل جداً، أخذتها الأجيال ، كما يقال " كابراً عن كابر "، ولذلك اعتقد أن معالجتها ، أو مكافحتها لا بد أن تأخذ في الحسبان هذا التجذر، وتعمق هذه العادة في المجتمع.. وهنا تحضرني نكتة قديمة عن انتشار التمباك في جميع الأوساط ، يقول الأب لابنه: " سف ، وأديني أسف ،وأدي أمك تسف ، وألحقني ...." كما أعيد القراء إلي المقالة التي كتبها الزميل هاشم كرار بعنوان " بريسترويكا التمباك"، وذلك بعد رحلة صحفية مع ( الرئاسة ) إلى موسكو، والقصة طريفة جداً.

نعود إلى قرارات معتمد الخرطوم، التي قرأت فيها فجائية تغيير عادة متمكنة حد الإدمان. لا أدري إن كانت القرارات جاءت بنفس الترتيب الذي ورد في الخبر المنشور في ( الرأي العام)، فالفقرة الأولى من القرار تقول : "منع منح أيِّ تصاديق جديدة لمحلات بيع التمباك.. توجيه الجهات المختصة بضرورة منع التصديقات للأكشاك والطبالي العاملة في بيعه حتى نهاية العام الجاري". وهذه الفقرة ما أعنيها بفجائية التغيير ..

وهناك فقرة ثانية تقرأ هكذا : " مسح وإزالة أيّة كتابة تعلن وتُروِّج لتعاطي التمباك، واستبدالها بعبارة تحذيرية التمباك ضار بالصحة ويسبب السرطان" .. هذه الفقرة هي ما كان يفترض أن تبدأ بها المعتمدية مشروعاً مدروساً ـ بأبعاده الاجتماعية والاقتصادية والبيئية ـ لمكافحة عادة التمباك .. وليس قرارات عاجلة بمنع التمباك تربك المجتمع وتدخل البعض في حيص بيص، وتؤدي بالبعض إلى البطالة. أجزم أن سيكون لهذا القرار انعكاس اجتماعي سيء. فكثيرون، في الشرق والشمال والوسط خاصة ـــ ملاحظة وليست دراسة ـــ أدمنوا التمباك، ولا يطيقون عدم وجود ( الحُقة أو الكيس ) في الجيب .. ما بالك أن يفقدوا فجأة المصدر، وما يملأ ( الحُقة ) ، عندما تتوقف أكشاك " ود العماري " عن البيع.

ومنع التمباك بصورة مفاجئة ، فضلاً عما سنلمسه من" آثار انسحابية " على المدمنين ـ كما يقول الاختصاصيون النفسيون ـ له أبعاده الاقتصادية، فالتمباك (صناعة ) هائلة ترد أموالاً طائلة على قطاع معروف ، فما مصير تجار التمباك ؟ أين يذهب (العمال) بائعو التمباك ، بعد سحب التراخيص نهاية العام الجاري ، كما جاء في القرار؟ هل أعددنا لهم فرص عمل بديلة شريفة؟ وكيف سيكون حال المواطنين أصحاب مزارع التمباك ، وهذه المزارع في دارفور المضطربة؟ هل وجدنا لهم محاصيل بديلة ( نافعة ) مدرة للدخل ؟ بل هل من الأساس ناقشنا معهم هذا الأمر.
أذكر أن السلطات في عهد نميري اتخذت مثل هذه الخطوة المفاجئة لمنع التمباك، ولكن لم يكتب لها النجاح والاستمرار، لأنها لم تكن مدروسة، ولأن المتحمسون لمنع هذه العادة حركتهم أرقام وإحصاءات عن إصابات السرطان، وبعضهم استفزته المناظر المؤذية في الشارع ، وفي نوافذ الوزارات والمصالح الحكومية. ومما يذكر في هذا الصدد أن السلطات في ذلك العهد رأت أن مناظر عمال ميناء بورتسودان من أبناء الشرق ليست كما يجب ، خاصة شعر الرأس ، المنسدل ، المدهون بالودك ، ولذلك قرروا إجبارهم على تغير هذه الصورة ( العادة) ، الثقافة الضاربة في عمق المجتمع الشرقي، كانت النتيجة أن أضرب (عمال الكلات ) عن الذهاب للعمل في الشحن والتفريغ، فسكنت الميناء، وتوقف العمل ، فعادت الحكومة عن قرارها .

كنت أرجو أن تبدأ المعتمدية بقراءة الماضي ، وكل التجارب التي أخفقت في تغيير العادات قسرياً، وبالعين الحمراء، ثم تضع خطة علمية لإقناع الناس بالإقلاع عن عادة (التمبكة) .. وتبدأ ببرامج تثقيفية، من شاكلة " التمباك ضار بالصحة ويسبب السرطان .. ويؤذي البيئة"، وإقامة الندوات والمحاضرات.. وبعدها يتم تقويم هذه البرامج، وبناء على النتائج تصاغ جرعات تثقيفية أكثر تأثيراً ، تخاطب مستخدمي التمباك، وحبذا تكون بالأرقام لبيان الهدر الاقتصادي، وعندما تتوجه إلى الناس عبر مختلف وسائل الإعلام ، وفي المدارس، والمكاتب والمصالح الحكومية والشركات، وفي الشارع.. سيصبح المجتمع معبأ ضد التمبكة، وعندئذ تبدأ قرارات المنع بالتدرج ، مثلاً : منع التمبكة في الأماكن العامة، وفي المرافق الحكومية ، ثم فرض عقوبات وغرامات على مشوهي الشوارع، وأخير سحب التراخيص ومنع التمباك نهائياً .. مثل هذه الخطوات يمكن أن تكون مجدية، في تقديري.
والأسلوب العلمي في المعالجة يجعلنا نتفادي كثير من العوائق والانعكاسات غير المحبذة، فخلال ( المدة المحددة ) للبرامج، وخطوات المنع بالتدرج سيقوم العاملون في ( صناعة التمباك) بتدبير بدائل، وكذلك الدولة. أما غير ذلك فالارتجال ، والتجريب ، ومحاولة الظهور بمظهر الصارم ، فلا يحل إشكالاً ، والأمثلة حاضرة ، في تجربة ( البكور) التي طبقت بدون دراسة مجتمعية ثم ألغيت ، ومن زمان ( رامبو).. فالقرارت التي تمس المجتمع لا يفيد فيها التحدي .. إنما المباصرة أفضل .. ولنا أسوة في معالجة القرآن الكريم للقضايا المجتمعية ، والعادات الراسخة، التي يؤدي إلغاؤها فجأة إلى مشكلات أكثر من مضار تلك العادات، مثل أسلوب منع الخمر، ومعالجة قضية الرق، والتعامل مع قضية اقتصادية مهمة مثل الربا.

المتوقع بعد قرارات المعتمدية أن يتصاعد سعر التمباك، ويشارك سلع قفة الملاح في ذلك، ثم (ود العماري) دخول قائمة السلع النادرة، ثم السوق السوداء، فيدفع المتعاطون ثمن سلعة تباع تحت الطاولة .. والنهاية مفتوحة.

كان خيراً للمعتمدية أن تؤجل قراراتها ، وتتأنى فيها حتى لا تضطر إلى الإلغاء أو التجميد مثل كثير من القرارات التي صدرت بدون دراسة.. فعلاج الداء من الجذور أفضل من التعامل مع الظواهر.. ثم ما معنى هذا التعامل الجزئي مع ظاهرة تعم المجتمع ، كيف نمنع التمباك في الخرطوم ويكون موجوداً في بقية المناطق والأقاليم والولايات؟ ثم أليس من سيطبقون قرارات منع التمباك هم أنفسهم تمباكة؟ هل يستقيم الأمر هكذا؟

القضية يجب أن تعالج في إطار إصلاح أشمل يمنع سف التمباك، وكل أنواع السف. فليس وحده سف التمباك هو الضار بالمجتمع.

اعتقد أن قرارات معتمد محلية الخرطوم ستصدم كثيرين .. وبذلك ستكون الصدمة مرتين في شهر واحد، صدمة الانفصال، وصدمة منع التمباك بهذه الصورة المفاجئة!!

[email protected]


تعليقات 28 | إهداء 0 | زيارات 7738


التعليقات
#59492 [حسن إبراهيم]
0.00/5 (0 صوت)

12-16-2010 01:27 AM
يا شبــاب
أيها السفيفووون
الحكومة ما قاصدة انكم ما تسفو لكن دا بسموهو باااص واحد تلاته. يعني هي شاتت القرار إنتو إعترضتو و شتوها جات لي ناس دارفور مسكو الكورة قالو دايرين ننفصل رجعو الكورة لي الحكومة.
وفي الختام الحكومة حا تقول انفصـــــال الغرب
وحضرو شعوركم وكل واحد لو عندو نجيلة في بيتم يزرعا عماري والعندو كم فدان يزرعو برضو. انفصال الغرب جاي اذا استمرينا بالحال دا


#59478 [تان تان]
0.00/5 (0 صوت)

12-15-2010 11:42 PM
نبطل التمباك ؟؟؟ اها نسف شنو يعني ... يسفسف ريسينكم
هو انتو خليتو حاجه للمواطن ولا مزاج ساي غير يسف؟؟
يعني انا طاقيها كدراويه للاستاد عشان اركب مثلا .. مثلا يعني .. والله منتظر مثلا افاده الكمبيوتر في واحد ستين بتاعت الخدمه ولا قول ساي واقف في صف الكهربا .. ما اسف اها اعمل شنو ؟؟ اكون مربع يدي يعني وداقاني السخانه وسرحان !! ؟
دمرتوا البلد كلها قبلتو كمان لي رؤسنا ؟؟ ... اصلا نحن الفاضل لينا في البلد ياهو السما ده بالليل في نص الحوش وكم ضل نيمه معاهم زيرين وكم ركن مصطبه وعمارينا الممتاز .. ماعندنا غيرهم ولا بنرض فيهم .. سامعين كلمنااااااااااكم .. اوعكم تجو جمب الصعرد .. قال يمنعوهو .. قوم لف بالله


#59458 [الحوت]
0.00/5 (0 صوت)

12-15-2010 10:15 PM
والله يا حكومة الجن حيرتونا (ظاتو) خلاص معانة الشعب بقت فى التمباك؟؟؟
طيب البصبرنا عليكم لو سفينا التمباك شنو؟؟؟؟
كمان شىء تانى ما تحاولوا تكبروا لينا وزن الرغيف شويه ما برضو الناس بتعانى منو!!!
ولا انتو يا حكومه قالوا ليكم فصايل دارفور بتستفيد من عايد زراعة التمباك مثل ما بعمل اخوانكم الظلامييين الافغان؟؟؟
والله يا هو الفضل !!بالله عليكم سف التمباك مستكترنوا على الشعب الفضل.
شوفو حاجه تانيه والحاجات العاوزه اهتمامكم اكثر من الهم فى القلب.
بنسف وبنسف وبنسف لكن ما بنسف حق الشعب.


#59340 [يوماتي سافي ]
0.00/5 (0 صوت)

12-15-2010 05:03 PM
والله بوظتو صورة الصعوط بعرض مثل هذين اليدين ...الصعوط ليه طرق وأدب قد تختلف معاهو لكن هو أدب شعبي .. أولاد الزول البوسخ يدينه ديل ده ما زول صعوط ده مبتدئي .. والله أسف من ماقمت قبل كدا سنة وشهر يوم واحد ما وسخت يديني ولا شلوفتي ... وأسألوا أي زول بتاع صعوط قول ليه الكلام ده صحيح


#59332 [المعتصم]
0.00/5 (0 صوت)

12-15-2010 04:40 PM
بصراحة وما نكذب علي أنفسنا من المستحيل نتخلى عن الصعود لأنه محبب لدينا أكثر من كل شي هل تصدقون أني تخليت عنه لمدة عشرة أعوام وكل هذه الفترة أنا عايش مثل المجنون تصرفاتي تغيرة للأسواء وضاق خلقي وحاسي أني فاقد شئ كبير جدآ ومهم جدآ وما تحسن وضعي الا بعد رجعت للصعود مرة أخرى علشان كدى أنا مجرب الصعود من عدمه وأغلبية الشعب السوداني متحرك في الشوارع وشغال في المزارع والرعاة جميعهم عايشين على الصعود يعني الواحد فينا بأمن الصعود قبل أن يأمن الغذاء هذي هيا الحقيقة


#59304 [gobara]
0.00/5 (0 صوت)

12-15-2010 03:10 PM
تسفوةا فى مال الدوله وعاوةزين تحرمونه من ود عمارى


#59184 [Ibnadam]
0.00/5 (0 صوت)

12-15-2010 11:55 AM

القرار داه الغرض منه ليس الاضرار التي يسببها التمباك من الصحة والبئية وغيرها من الاضرار.
وانما الهدف الاساسي هو سلسلة من سياسات الابادة الجماعية المتواصلة لابناء دارفور بكل الوسائل المختلفة من اجل التخلص منهم وعدم مشاهدتهم من قبل الحكومة في الخارطة الجغرافية الكونية الاسمة السودان.
اولأ:- بعدما نفذة حكومة الانغاذ الابادة الجماعية في دارفور بسياسة الارض المحروقة في كل انحاء دارفور، وابادة كل ما ابادة
وما تبقي من شعب دارفور والتي تجمع في مدن ريئسية مثل الفاشر ،نيالا ...........وغيرها من المدن ، الي وان الحكومة اتخذ سياسة ثانيه في محاربتهم وهو الحرب الاقتصادية بالنسب المتبقين من الابادة في تلك المدن عن طريق سوق المواسيرة المشهورة في الفاشر والذى حققت اهدافها الاولية المرجوة للنظام،
وهو سحب جميع اموال الفقراء والمساكين مما زاد الفقره في دارفور والدليل علي ذالك الاحصاءات الاخيرة اللتي اظهرته بان دخل الفرد في دارفور لايتجاوز 1$ في اليوم وهي من افقره الولايات السودانية مما سبب في وفاة الكثيرين جوعا.
وتم جمع هذة الاموال من داخل الولاية وتم تحويلة الي ابليس النظام في جيوبهم ومخازنهم واستثماراتهم الخارجية.
وهذا القرار مرحل من المراحل السياس المخطط له من قبل النظام في الاستمرار في الابادة الجماعية عن طريق الاقتصاد لشعب دارفور.
واذا نظرنا الي التمباك من جميع النواحي الاقتصادية بالنسب لدارفور .وهو يمثل الشريحة الاقتصادية الاكبر والدخل الاساسي بالنسبة لدارفور، وخاصة شمال دارفور ،اي ان 90% من اقتصاد الولاية. من التمباك.
*اين مناطق الانتاج في السودان (دارفور) اليس المقصود هو شعب دارفور وليس التمباك.
*من هم العاملين في زراعتة في السودان (دارفور) اليس المقصود هو ابناء دارفور وليس التمباك
*من هم الموردون والتجارة المستفيدون منة في السودان (دارفور) اليس المقصود هو ابناء دارفور وليس التمباك
* من هم الموزعون في جميع انحاء السودان(دارفور) اليس المقصود هو ابناء دافور وليس التمباك.
واللة واللة واللة التمباك بريه منكم كل البراء من اكاذبكم ونفاقكم يا (حكومة الابادة الجماعية) . تكذبوا علي الشعب السوداني من اجل تبرير طريقتكم المستخدمة في السياسات الزائفة في الابادة الجماعية بنسبة لابناء دارفور.


#59167 [awad]
0.00/5 (0 صوت)

12-15-2010 11:35 AM
ماعايزين زول يسف معاهم حتى لو كان تمباك هو يعنى سف التمباك دى مشكلة السودان ***كم عدد المصابين بسرطان اللثة من التمباكه****** كم عدد الوفيات من الملاريا بل كم نسبة الوفيات نتيجة جهل الاطباء لعدم وجود تدريب****ياناس هوى شوفوا الاهم ثم المهم وماتشغلونا يالفارغة


#58989 [mostafa]
0.00/5 (0 صوت)

12-15-2010 07:53 AM
ايها الذين تتكلمون عن الصحه وضرر التمباك منذ متي والحكومه مهتمه بضرر المواطن ؟؟؟ يكون اكتشفو ليهم مزرعه كبييييييييييره لناس العدل والمساواه ؟؟؟؟؟ولا يكون مناوي معظم مؤيديه وداعميه من مال التمباك؟؟او لانه يزرع في دار فور؟؟ اختارو احد الافتراضات الثلاثه لا اكثر ولا اقل


#58876 [ابو رائد]
0.00/5 (0 صوت)

12-14-2010 10:20 PM
:D :D :D :D هههههههههه


والله اليدين دى مابتشبه يدين بتاعين التنباك اكان كدا نحنا بناكلوووووو اكل مش نسفو



:D :D )) :D :D :D :D :D











#58842 [دخري الحوبة]
0.00/5 (0 صوت)

12-14-2010 09:04 PM
ياعالم مشاكلنا مش التمبـــــــاك - زي ما قال واحد سفه من الصباح أحسن من بقر مراح - وسفه بي عطرونها - خير من الانقاذ وفنونها - هذه - إحدي الحركات الكيزانية - لإشغال الناس عن فشهلم المر - وهذه سياسة اليهود عندما يريدوا التقدم في الاستيطان يشغلوا الرأي العام بمصيبة إستهلاكية الرجاء عدم الكتابة في الموضوع وخاصة موضوع الفتاة السودانية التي جلدت - صدقوني ياشباب مقصودة وهم الصوروها ووضعوها في اليوتيوب - أنا أعرفهم كما أعرف ذات نفسيى - دخري الحوبة


#58819 [بيشو]
0.00/5 (0 صوت)

12-14-2010 08:01 PM
البشير كان بسف....لاكين جائتنا انباء من مصادر مقربة أن مدام ودواد دقت جرس..
\"بيشو ياخي البتاع دا ديسكستنج\" خليهو


#58796 [سودانى ]
0.00/5 (0 صوت)

12-14-2010 07:11 PM
انا اشك فى القرار اذا كان من ناحية صحية اوحضارية عارفين ليه الحكومة دى اصلو مابتعمل فائدة يكون فى واحد من الكيزان استورد سجائر وعايز يبيعها قبل الاستفتاء مش جائز وخائف الحكومة تنقلب ذى ماسمعنا انو قبل كم سنة فى نيالا الوالى عمل حملة لاى محل تجارى لازم يكون مضروب بهية خضراء لانو قريبو عندو بهية كتير ماباعة شفتوا الكيزان بتعمل شنو نظام( يهووووووووووووووووووودى)


#58787 [محمد احمد]
0.00/5 (0 صوت)

12-14-2010 06:57 PM
يااخوانا دي بداية النهاية انشاء الله للكيزان...عندما يبتدي النظام بمحاصرة حريات الافراد الخاصة حتما سيتولد الانفجار


#58778 [أوندي]
0.00/5 (0 صوت)

12-14-2010 06:33 PM
كلامك جميل و سليم . . بس أحب أضيف أن التمباك من العادات التي لا يمكن أن تترك بالمنع .

و إنما بالإقتناع . . و حتى بعد الإقتناع لا يقدر على فراقه إلا أولو العزيمة القوية مع توافر

أجواء معينة (مساعدة) من المحيط . . و هو ما لا يتراءى لي في سودان اليوم .

وأهم وسائل الإقناع الصور . . سرطانات الشفاه و الفم و الحناجر و بقية الجهاز الهضمي و تشوه

الاسنان و ثقوب الشفه . لأن ما تفعله صورة واحدة لا تتحقق بألف محاضرة . و بعد ذلك يترك

المجتمع ليكون دافعاً و وقوداً لهكذا قرار .


#58758 [جادي]
0.00/5 (0 صوت)

12-14-2010 05:38 PM
اعمل حسابك يا معتمد هوي,,دي الحاجات البتجيب المظاهرات ,,معقولة معقولة معقولة بس
تمنعو بالسهولة دي؟ دي الحاجات المصبرة الشعب عليكم,,,,,وبعدين يا حلاتة سفة بعد الشاي ((سفة بعد الشاي شنقهاي )) يا حلاتة سفة قبل النوم ((سفة قبل النوم بتسوا الكون)),,انا هنا في الغربة متعذب مافي صعوط ((دوا)) سوداني,,و اشكر الذي وضع الصورة في اعلى المقال بتاعت الزول المتحمس لوضع تلك السفة الدسمة لانها حركت عواطفي وجعلت شلاليفي ترتجف خرما
في وحادة قالت لي خطيبها يا انا يا الصعوط البتسف فيو دا ,,,,بكل بساطة وبسرعة بديهية قال ليها: اكيد الصعوط يا حلوة !!!((شبه نكتة)).


(((بصراحة الصعوط مضر بالصحة ومسبب للسرطان وبالاضافةالى ذلك عادة غير اجتماعية )))

لكن المعتمد ما عندو حق يتكلم فيو ابدا خاصة في الايام دي ,,واحسن ليو يشوف مشكله الادارة والفساد ولو جا لي المزاج يشوف مشكلة العرقي والبنقو الرخيص الجنن الشباب العاطل.
ونسال الله ان يهدينا لترك اي ضار.


#58706 [تررررنتى]
0.00/5 (0 صوت)

12-14-2010 04:05 PM
لا خلاص المشاكل كلها اتحلت بقت على التمباك والله غليتو علينا الحلو والمر سافين شنو نحن تمباك وبس ماسفينا بنوك ولاشركات خلو يكسر باقى اسنانا


#58705 [محمد احمد]
0.00/5 (0 صوت)

12-14-2010 04:04 PM
يااخوانا القرار ده فاشل: كل القوات النظامية من جيش وبوليس وأمن بيسفوا السعوط حتى الريس ماعارف اذا كان بطل التمباك هسع ولا لسه مواصل. بعدين الاهم لينا ياالبرير توقف السف التاني وده برضو أشك تقدر عليه. امكن القرار ده محاولة جديدة للسف من السف (تورية)!


#58703 [تررررنتى]
0.00/5 (0 صوت)

12-14-2010 04:03 PM
لا خلاص المشاكل كلها اتحلت بقت على التمباك والله غليتو علينا الحلو والمر سافين شنو نحن تمباك وبس


#58701 [مامون]
0.00/5 (0 صوت)

12-14-2010 04:02 PM
الحمد لله اننا بره السودان ومحصلين التمباك وما اتقطعنا منو والسودانيين ما ح يخلو التمباك حتي لو وصل سعر الكيس مائه جنيه حقو يشوفو شغله تاني عشان ما ترتفع اسعارو زي ما السوق كلو مرتفع تبقي مصيبه انك تشتري الكيس بالغالي ولو شافك عسكري تدفع ليه


#58692 [اواب]
0.00/5 (0 صوت)

12-14-2010 03:48 PM
ماعندكم موضوع خلاص جلد بنات كمان ده اسع بسف


#58689 [Ali Algarabndi]
0.00/5 (0 صوت)

12-14-2010 03:44 PM
نحن علي ثقة من أن تحالف \" ود الجزيرة و المحسي\" سيتصدي وبكل قوة لهذا القرار غير المدروس.


#58655 [azaaism]
0.00/5 (0 صوت)

12-14-2010 03:05 PM
الناس فى شنو الحسانيه فى شنو


ردود على azaaism
Qatar [ابواحمد] 12-14-2010 04:18 PM
علق بدون التعرض للحسانية ومافي داعي ان تسب قبيلة من مكونات هذا البلد عايزين نعيش في وحدة وطنية عايز تعرف يعني اية وحدة وطنية يعني ماتفتكر ان انت احسن من غيرك0


#58652 [عكليته]
0.00/5 (0 صوت)

12-14-2010 03:04 PM
هههههههههههه
خلاص مشاكل البلد إتحلت وبقى التمباك هو المشكلة ؟!!!

خلي المعتمد يحل المشاكل الرئيسية أول
وتلقاهو المعتمد زااااااااااااااتو بسف
وأتحدى يكون ما عندهم زول بسف في البيت

خليكم من التمباك وشوفوا لينا مشكلة الخبز والدقيق شنو

جيب سفه


ردود على عكليته
Saudi Arabia [أوندي] 12-14-2010 06:21 PM
و الله ( جيب سفة ) الأخيرة دي . . جاية جيّة !

و هي جملة بتتكرر مع كل زنقة و دبرسة . . و ما أكثرها في بلدنا الحبوب .

لك التحية


#58650 [عـــــــــجب]
0.00/5 (0 صوت)

12-14-2010 02:59 PM
ياربي ما تحرم زول من الاغتراب !!!!!!! دا عصررررر شديددددد خلاص ....دي امتحانات قدره التحمل ولا شنو ؟؟ لالا للوحده ..... لالا للشيشه .... لالا للتمباك ..لالا لي ستات الشاي ...لالا للبنطلون ....لالا لاكل الخبز الرخيص ...لالا للعيشه الهنيه


#58643 [Abrahim alshaikh]
0.00/5 (0 صوت)

12-14-2010 02:53 PM
إذا أٌريد منع التمباك فينبغى تجفيف وإيقاف مزارعه فى وادى شقرا وبقيه الوديان بدارفور وإيجاد بدائل أخرى,شكرا للكاتب بتحليله الضافى وإشارته الذكيه لمنع وإيقاف لكل أنواع السف بالسودان،المدهش أن الذين يزرعونه لا يسفونه مطلقا ;) ;) ;)


#58626 [ود الثورة]
0.00/5 (0 صوت)

12-14-2010 02:34 PM
شئ ممتاز ان يمنع الصاعود والشيشه ، واخطر شينين : الشيشه والشيعه وياليت لو حاربو نشر المذهب الشيعي بالسودان لأنه أخطر من الشيشه والشعب السوداني طيب حتى الآن لايعرف من هم الشيعة ، محاربة الصاعود شئ ممتاز جداً ، وهذا يصب في مصلحة الشعب السوداني وابناء الشعب السوداني .



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية

تقييم
3.97/10 (94 صوت)

الاكثر تفاعلاً/ق/ش

الاكثر مشاهدةً/ق/ش

الاكثر مشاهدةً/ش





الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة