الأخبار
أخبار إقليمية
إستمع للقصيدة : ما تفوتو خلاص قاعدين لمتين ؟
إستمع للقصيدة : ما تفوتو خلاص قاعدين لمتين ؟


09-12-2013 08:14 AM

ما تفوتو خلاص قاعدين لمتين
نحنا معاكم ضقنا الويل
جعنا عطشنا يا ظلم عديل
شوف عيني يبستو النيل
ما تفوتو خلاص قاعدين لمتين ؟!!

***

قسمتو جنوبنا ما اتكلمنا
عدلتو الخرطة الفيها وطنا
في دارفور خيتو كفنا
قتيل في قتيل وكتير من جنا
ما تفوتو خلاص قاعدين لمتين ؟!!!

****
النيل الازرق حكايتو حكاية
اتمردو ناسو وقالو كفاية
الجوع الفقر الما عندو نهاية
كفاية الظلم علينا كفاية
ما تفوتو خلاص قاعدين لمتين ؟!!
***
وانتو هناك عايشين في امان
في اوروبا اولادكم بالجامعات
ونحن نكوس لحق الحلة فطورنا غدانا بقى لقيمات
قصوركم فارهة كمين عربات
حساب في اوروبا كمان شركات
شردتو الكادر مننا فات
لارض المهجر فر شتات
ما تغورو خلاص قاعدين لمتين ؟!!

***
سويتو كباري وسفلتو الشارع
كباري جيبوكم سرقة عديييل
حتى سمكنا الجوا النيل بالجد عارفكم وعندو دليل
ما تفوتو خلاص قاعدين لمتين ؟!!

*****
فوتو خلاص سيبونا في حالنا
وادو الراية وريحو بالنا
بكيتو وطنا سحبتو اموالنا
حطمتو النيل عطشتو حلالنا
ما تفوتو خلاص قاعدين لمتين ؟!!

****

الخريج كايسلو وظيفة
مع انو نبيه ونتيجتو نضيفة
لمعاينة خش اجابتو صحيحة
مرق زعلان ما اللجنة كفيفة
ما تغورو خلاص قاعدين لمتين ؟!!

****

ناس كادوقلي شالو سلاح
لانو الكعكعة بقت بالتاح
دخول القصر ما دايرلو نجاح
ابقى معارض دا ياهو المفتاح
ما تفوتو خلاص قاعدين لمتين ؟؟!!

****

احسبو كم سنوات قاعدين
وما عارفين جابوكم دين
خلاص ملوكم شدو رحيل
كرسيكم داك دايرلو بديل
ما تفوتو خلاص قاعدين لمتين ؟!!

*****
الطالب بقرا كمان شغال
واولادكم انتو عال العال
سيبونا خلاص كفاية ضلال
بعدكم جد بنصلح الحال
ما تفوتو خلاص قاعدين لمتين ؟؟!!
****
بلد اجدادنا دي ريقا نشف
وحتى النبض الفيها وقف
بعتوها زمان انسانا عرف
استثمار ومعاهو ختف
ما تفوتو خلاص قاعدين لمتين ؟!!

*****
عرباتكم فارهة اشكال والوان
وجيبوكم يورو كمان دولار
فوتو خلاص كفانا دمار
وكفانا حصار وقرار في قرار
وما تفوتو خلاص قادين لمتين ؟!!
****
منعتو علمنا يرفرف تاني
دمرتو النيل الفي شرياني
طمستو هوية كل سوداني
ومننا ايه دايرين من تاني
ما طيرو خلاص قاعدين لمتين ؟!!!

***

دارفور الكعبة دي نار وضرب
وارض التاكا انسانا غضب
امشو خلاص كفاية لعب
وعودكم لينا فارغة كضب
ما تطيرو خلاص قاعدين لمتين ؟!!!

*****
وطنا الغالي بقى مكتوف
في حكمكم ياما دخلنا الخوف
عمينا عديل فقدنا الشوف
يوماتي تموت بالانة الوف
ما تفوتو خلاص قاعدين لمتين ؟؟!!!

****

قاعدين لمتين ضيعتو الزين
باع الكارو وباع البيت
طلق مرتو عشان الدين
جن عدييييل وجاب الزيت
ما تفوتو خلاص قاعدين لمتين ؟!!

****
شبعتونا كلام في كلام
بترولنا الضخ اتباع قدام
لا لسنا عقال لا لقينا سلام
مرتاحييييين وشبعتو حرام
ما تفوتو خلاص قاعدين لمتين ؟؟!!

***

الساب القرية وج الخرتوم
الما عندو ضهر يبيع ليمون
او برد في السوق مهموم
الغول راجيهو محل ما يكون
ما تفوتو خلاص قاعدين لمتين ؟!!
***

بقينا بنحلم بالبنكوت
لانو جيوبنا سكنا عنكبوت
بجنمب البنك بنجري نفوت
خفنا يقولو دا حرامي يموت
ما تفوتو خلاص قاعدين لمتين ؟!!
***
كم من والدة يتمتوها
جبتو ليها السكر وسكتوها
جناها رحل جندتو اخوها
سميتو شهيد عشان ترضوها
ما تفوتو خلاص قاعدين لمتين ؟!!!
***
نحن معاكم ضقنا الويل
يا ظلم عديل
شوف عيني يبستو النيل
ما تغورو خلاص قاعدين لمتين ؟!!



فوتو خلاص قاعدين لمتين






تعليقات 15 | إهداء 0 | زيارات 13881

التعليقات
#765443 [أبوضوة الوراريق]
0.00/5 (0 صوت)

09-13-2013 09:34 PM
ديل قعادم مرهون بالفينا.
وديلا قعادن مربوط برهينة.
وديلا قعادن يحلنا منو الحلا رضينة.
هم بيكضبو وإنتو تكضبو لما إتمصاالحرق الفينا.
هم بيألفِّفو وإنتو تألّفو إلا كضبكم جابلو إخينة.
إنتو كذبكم ظاهر وماكر ويجعل من الفتنة عجينة.
وإنتو كذبكم لونو براهو مابشبه الوان الزينة.
وهم بيكذبو بالسودني وإنتو تكذبو بالبريطاني.
وديل َ قعادم مرهون بالفِينا.
لمانتابع كل أخباركم نلقي الفبركة شايلي رتينة.
ولما نطالع مانشيتاتكم نلقي العكس مروس لينا.
خلوها الحاكومة عرفناهاماذنب الجيش الحامينا.
فبركتو قصص للفتنة زرعتوهاحكايات سقطت في حينا.
فالجيش حق الشعب طعامو طعامنا شرابو شرابنا مشيهو مشِنا.
صلاة إستسقاءبتبلّو ظمأنا ونحن عُقب صابرين بالفينا.
وقراصتنا بتملأبطوناوسع حيشانَّا الكان ضاَمينا.
ولمن يحرق مصنع تفرحوا تجرو تقولوا الليلة سمينة.
وماعرفين المصنع حق الشعب وبعرق الشعب والماكينا.
كنتوا تحرضوا كنتوابتضحكوا لما البترول راح للمينا.
ولمن هجليج كانت مضروبة كنتوا في عز الشمتة علينا.
ولما الغرب يحاصر فينا كنت معاهو تدفرو علينا.
فديل قعادن مرهون بالفينا.
عفوا صرخاتكم مابتشبه صراختنا
ونظارتكم مابتشبه نظراتنا.
ولا خضرتكم زي خضرتنا.


#764817 [مهاجر]
0.00/5 (0 صوت)

09-12-2013 08:03 PM
ليكن معلوم ان ممارسات الكيزان واليساريين هي التي مهدت الطريق لوأد الديقراطية بعد انتفاطة 1985 م بس الكيزان كانوا يلعبوا للاستلاء علي السلطة وساعدوهم اليساريين بكثرة الاضربات وتقوية النقابات علي الحكومة التي ولدت من الاساس ضعيفة ولم تحمي نفسها ولم تحمي الديمقراطية ياليتنا نتعلم من اخطائنا .اما العنصرية العزف عليها هي التي ستمزق السودلن اكثر مماهو عليه .الله من وراء القصد


#764811 [Me too]
0.00/5 (0 صوت)

09-12-2013 07:51 PM
لا ادري الي متي سنظل نولول ونلطم الخدود ونشق الجيوب كالنساء!!!!أبقو مارقين والموت الخايفين منو جاييكم في بيوتكم وخلونا نموت بي شرف ومن أجل حق ومن اجل اجيال ستاتي بعدنا ستتشرف بكم وتترحم عليكم في قبوركم.


#764791 [ابو كريم]
0.00/5 (0 صوت)

09-12-2013 07:07 PM
ديل مابحســوا ليك و جلدهم بقى اتخن من جلد القرنتي وقاعديين ليك في قلبك الى يوم يبعثون لو ماقلعوهم قلــع
احسن تكتب قصيدة للشعب عشان يصحى من نوموا وينتقض بعنوان (ماتقوموا خلاص ساكتين لمتين) او .... نايمين لمتين


#764759 [ابومازن]
0.00/5 (0 صوت)

09-12-2013 05:28 PM
لقد فشلتم في إدارة الدوله ,, فتنحوا ,يامن شردتم الكوادر الوطنيه , ويامن فصلتم جنوبنا الحبيب , ويامن أثريتم من عرق المواطن المطحون,, وإنتفخت جيوبكم من أموال الشعب ,, يامن إشتريتم القصور في دبى وماليزيا ,, علاجكم في الخارج بالدولار ,, إجازاتكم بالخارج بالدولار على حساب الشعب المسحوق,,, أما كفاكم ؟؟؟لقد فعلتم مالم يفعله إبليس ,, إنظروا إلى تأريخ من حكموا السودان قبلكم ,, هل منهم من فعل فعائلكم ؟؟؟ هل منهم من بنى قصرا ,, أو إمتلك شركة؟؟؟إتقوا الله,, وتنحوا ,,كفاكم جورا وظلما
والله لقد ملاتم السودان جراحا وجورا وظلما,, قاتلكم الله


#764574 [ابوراس كفر]
0.00/5 (0 صوت)

09-12-2013 12:48 PM
ماقلتا ليكم الف مرة ان المشروب السحرى لعصابة بنى كوز هو خلط الزبادى بالسفن اب فى الاماكن العامة والخلطة السرية فى الاماكن الخاصة هى الزبادى بالشامبيون
يس يس " مش سورة ياسين ياوهم" وى ار ذا شامبيونز
شفتو ابو العفين داقس كيف تحت تاثير خلطة المشروب السحرى
اما ناس بشة ابجاعورة ورجلين مكعوجة والاحوص بكرى حسن صالح وابوريالة عبدالرحيم فهم بالاضافة
للشامبيون بالزبادى " لزوم التقشف طبعا" بيضربوا الخدرا البسببا موليعين النار فى دارفور
عشان يحتكروا زراعة وسوق البنقو وهو استثمار برضو وسوقو مضمون


ردود على ابوراس كفر
[موسفينى] 09-13-2013 02:29 AM
التيس الوسط الغنم دا نائم مالو كتر منهم ولا ايه هههههههههههه


#764569 [سعاد صالح التني]
5.00/5 (1 صوت)

09-12-2013 12:45 PM
انتو عايزنهم يمشوا بس؟
والشعب داير يحاكمهم ويسألهم سؤال الملكين ودى هي المشكله عشان كده مكنكشين ومستعدين يبيدونا جميعا تفاديا للحظات الحساب ودا معناه انو الناس لازم تقوم قومه واحده بس من الصباح الباكر واقسم بالله لن ينتهي اليوم حتي يتساقط البشير الرقاص وكل عصابتو في ايادى الشعب فهم أضعف وأهش ممايتخيل أى مواطن والاخوان المسلمين في مصر مثالا.


#764565 [sudani]
0.00/5 (0 صوت)

09-12-2013 12:39 PM
ديل كرهونا حياتنا كفاية ظلم ديل خلوا آمال الناس غطست في الطين واولاد العز بقوا شحادين والباقين فارشين في الشارع بفتشوا عن 150 .... ويارب بي رفع الدعم الجاي ده نلقاكم مافيشين ياتجار الدين......


#764546 [khaled]
0.00/5 (0 صوت)

09-12-2013 12:13 PM
سرقت ظلمت بطشت كذبت فنمت


#764401 [ادم تية]
4.00/5 (2 صوت)

09-12-2013 10:10 AM
قد كان يا ما كان
كان هنا سودان
من خيرة البلدان
خضرة وجمال وجنان
شعب من الشجعان
سمح هو السودان
حلو بلا كيزان
الحطمو الانسان
الهدمو الاركان
للدين والاوطان
الهجرو الحبان
وشردو الاخوان
لا ونسة لا جيران
لا جبنة لا فنجان
سودان مع الكيزان
رجس من الشيطان
لا شكل لا الوان
لا طعم لا ريحان
***** كمان رمدان
لا اسم لا عنوان
كم نام هناك جعان
والنيل كمان عطشان
الزارع الحيران
الطالب العدمان
العامل التعبان
المصنع العطلان
النازح العريان
الخايف الهربان
من قذفة النيران
والراقص الخيبان
يرقص وسط نسوان
لا هام ولا دريان
كم كم أهان نسوان
بالجلد بالسيطان
وكم كم قتل انسان
بالضرب في المليان
وكم كم اباد شبان
في محرقة طرشان
وكم كمم الافواه
بالمال والطغيان
وكم كم كمان وكمان
اسرار طي الكتمان
محفوظ بلا نسيان
ليوم حساب كربان
لا عفو لا نسيان
لا رحمة لا غفران

لا ماما بتحل كوز
لا ولولة نسوان
لا واي ولا لاهاي
لا جقلبة غلمان
حتشوفو لحس الكع
شاهد عيان وبيان
مش زي نفش ريشا
زي نفخة العفنان


#764369 [مهاجر]
5.00/5 (1 صوت)

09-12-2013 09:53 AM
مااسهل ان تزول الانقاذ بس المعارضة تنظف صفوفها من العنصريين واليساريين والانتهازين وتخلص النوايا .


ردود على مهاجر
United States [علوب] 09-12-2013 11:14 AM
زي نوع تفكير مهاجر ده إذا ما انتهى لا فايدة من التغيير ن أهم شيء تكون المعرضة ضد العنصريين أمثاله و ترى أن أهل الجنوب و الغرب هم أخوة لأبناء الشمال و الوسط النيلي و أن اليساريين مواطنون يسعون لخدمة بلدهم و هم من أشرف الناس و أطهرهم يدا و أن النوايا وحدها لا تطور بلدا لا بد من برنامج علمي ينهي التخلف و ينشر الحرية ، حرية الضمير و أن أغلى شيء هو الإنسان و القيمة الإنسانية أغلى و أقيم من أي فكر أو دين و إن الإنسان بقيمته الإنسانية و ليس بدينه ، أي لا يقتل الإنسان لإقامة الدين أو لأي غرض آخر ، حين يحدث ذلك و تختفي الأمخاخ العفنة و الفساء الكريه باسم الدين ، عندها ستمتليء بلادنا بالمبدعين و العلماء و الأدباء و المخترعين و الفنانين ... طبعا ناس مهاجر بح ، لا ينتجون معرفة و لا إبداع و لا فن و لا ثقافة و لا علم و لا ، و لا ... كل من يشتم اليسار أو العلمانية ينتج الفقر و التعصب و الحروب و القحط المعرفي و الثقافي و لا يعرف للإبداع بمختلف صنوفه دربا ... العقل المتصحر لا ينتج إلا القمل و بول البعير و الجلد و القتل و القطع و البتر ... كفروا الفارابي و ابن سينا و ابن الهيثم و ابن رشد و كل العلماء و العباقرة فلم ينتجوا إلا التخلف الذي نحن فيه ...


#764336 [جكان فاضى]
0.00/5 (0 صوت)

09-12-2013 09:37 AM
رغم خوفنا على الوطن الا اننا اكثر اشفاقا على صحة هذا الشاعر المرهف الرقيق...فقد هد عليه الانقاذ قصره كما هد كل قصور الناس....قصره الذى بناه برقيق الكلام وعذب المعانى...ها هو الانقاذ يهد عليه قصره بنابالم الفساد والافساد والضياع...فتراكمت على صدره كل هذه الحجارة الصماء البكماء القاسية...وهو يئن تحتها ويطلب منها ان ترحل عن صدره وجسده حتى يعود عصفورا مغردا فى سماء الوطن الزرقاء وينثر على الناس كل معانى المحبة والخير والجمال


#764332 [لسان حال الحيكومة]
5.00/5 (10 صوت)

09-12-2013 09:34 AM
رد بلسان حال المسئولين في النظام

بلسان الرئيس

قاعدين في قلبك وقلب الجابك
زعلان مالك ورينا اسبابك
عجبك عجبك قلنا حبابك
لو ما عجبك اقفل خشمك واقفل بابك

نحن معاك في كل زقاق
نحن ندمر للاخلاق
نحن نعاقب بدون اشفاق
امشوا بعيد شذاذ آفاق


بلسان نافع
لمتين بتسال وده موضوعك
نحن الكنا سبب لي جوعك
قعدنا حكمنا وشفنا خضوعك
لو ما عجبك الحس كوع

البقية تاتِ


ردود على لسان حال الحيكومة
United States [بعشوم] 09-12-2013 11:58 AM
قصيدة روعة والرد "على لسان الحيكومة" أروع .. شكرا لكم

[سوداني ون] 09-12-2013 11:58 AM
والله دي احلي من القصيدة الاصلية ........ ابداع

United States [سوداني] 09-12-2013 11:37 AM
والله انت مبدع شديد

United States [بتاع بتتييخ] 09-12-2013 10:55 AM
قاعدين لمتين ماتغورو خلاص

United States [Tahir] 09-12-2013 10:15 AM
ياخ انت عجيــــــــــــب


#764276 [على]
5.00/5 (1 صوت)

09-12-2013 08:58 AM
يا كيزان يا انجاس اسمعو هنا..والله العظيم ما تسلموها بالزوق على الطلاق و والله العظيم نجيكم كاسرين جوا القصر الجموهري وفي بيوتكم وقصوركم المحصنية والله خلاص طفحت طفحت طفحت..ما يا تمشو،، يا تمشو،، وحاتمشو


ردود على على
United States [موسى محمد] 09-12-2013 11:06 AM
كضب ساكت يا علي،،، والمحرش ما بكاتل


#764226 [ابومونتي.]
5.00/5 (1 صوت)

09-12-2013 08:25 AM
نايم,,,تنوم ماتقوم.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة