أها وين عاد؟



09-14-2013 05:23 AM

طارق الامين

تحسبا ما بتغتي معاك
تراجعا .. مافي زول برجاك
تكورك يقولوا زول كوراك
تدقها هد تجيك بي وراك
تحصلا.. يلحقك سيردباك
تطنطن .. ديل بلفو معاك
أها وين عاد؟

تفلس .. يقولوا صرفو غلط
تعاين تلقي سوو ظلط
تنقرط يقول داك نقرط
تعوعي يقولو ضكر البط
تسكسك .. يقولو واقف لط
أها وين عاد؟

تقحقح يقولوا بتمارض
تعارض يقولوا داك عارض
تأيّد يقولوا عندو غرض
تنطط .. يحيروك بالنط
تهوهو .. يقطعوك بالعض
آها وين عاد؟

تدستر يقولوا دا الدستور
تكسر يلحقوك الخور
تكشر يقولوا عندو كجور
تصرصر يقولوا من دارفور
آها وين عاد؟

تشمشر يقولوا جنو شمار
تدنقر تبقي زول دنقار
تهزر .. ما بعرفوا هزار
تصنقع يقشطك دفار
آها وين عاد؟

تطنش يقولوا اصلو غبي
تندد يقولوا داك شعبي
تغبش يقولوا متخبي
تمسح يطلعوك حلبي
آها وين عاد؟

توصل يقولوا زول وصال
تفصل يقولوا دا الفصال
تحصل يقولوا ما حصال
تخرم يقطعوك ايصال
آها وين عاد؟

ترخص يقولوا ما أمنَّ
تأمن يقولوا زول في الأمن
توضح يقولوا مافي زمن
تحمرَّ يقولوا مجلس أمن
آها وين عاد؟

تغني يقولوا غناهو كعب
تلعب يكرهوك تلعب
تنبذ يحاكموك بالسب
تهادن يقولوا ود الكب
آها وين عاد؟

تبادر يقولوا داك بادار
في ثانية يودروكا ودار
توحوح يقولوا استدرار
تنتحر ..يصوروك في الدار
آها وين عاد؟

الصحافة


تعليقات 0 | إهداء 0 | زيارات 1660


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة