الأخبار
أخبار إقليمية
المعارضة : رفع الدعم البداية الحقيقية لإسقاط النظام
المعارضة : رفع الدعم البداية الحقيقية لإسقاط النظام
المعارضة  : رفع الدعم البداية الحقيقية لإسقاط النظام


09-15-2013 07:17 AM

أعلن تحالف أحزاب المعارضة السودانية الانتهاء من ترتيبات الخروج فى مظاهرات سلمية متزامنة فى المراكز والولايات، حال إعلان الحكومة رفع الدعم عن السلع والمحروقات، مؤكدا أن هذه الخطوة ستكون البداية الحقيقية لإسقاط النظام، وأن الثورة الشعبية تأتى بغتة.

وقال الأمين السياسى لحزب المؤتمر الشعبى كمال عمر عبد السلام، لصحيفة "آخر لحظة" الصادرة بالخرطوم يوم السبت، إن الزيادة التى يتم تطبيقها بإلغاء الدعم لا يستطيع المواطن تحملها، ووصف سياسات النظام "بالفاشلة"، وأضاف أن "عليه أن يتحمل فاتورة الإصرار على التمادى فى أخطائه وسياساته، التى أدت لحدوث الأزمة الاقتصادية"، وأكد أن الأوضاع الاقتصادية والمعيشية للمواطنين لا تتحمل زيادة الأسعار.

وكان رئيس حزب الأمة القومى الصادق المهدى قد شن هجوماً عنيفاً على السياسات الاقتصادية للحكومة السودانية وحملها مسئولية وقوع الضرر على المواطنين الفقراء، لاتجاهها لرفع الدعم عن القمح والمحروقات.


تعليقات 13 | إهداء 0 | زيارات 4259

التعليقات
#766874 [Ahmed Yassin]
0.00/5 (0 صوت)

09-15-2013 11:06 PM
القرار تم تطبيقه من يوم امس لم نراى اي مظاهرات او نقاشات حتى الان


#766826 [المندكورو وقع في براسن الفشل!]
5.00/5 (1 صوت)

09-15-2013 09:50 PM
قسم الأرزاق ... ووزّع لينا مليون ألف سارق!!!
قسم الأرزاق ... ووزّع لينا مليون ألف سارق!!!!
قسم الأرزاق ... ووزّع لينا مليون ألف سارق


#766689 [نص الكوب الفاضي]
0.00/5 (0 صوت)

09-15-2013 05:40 PM
للمتابع للوضع المزرى الذى وصل اليه الوضع المعيشي والانبطاح المتكرر من جموع الشعب السودانى الفضل وحسب اعتقادى واكاد اجزم بان الحكومة لو سحبت المحروقات نهائيا من الاسواق ناهيك عن رفع الدعم فقط فلا شئ سيحدث وغدا رؤوس النظام ستجد التاييد وترقص فى السحاحات العامة على جاجم الشعب الذى علم الشعوب الثورات ......... ودمتم....... نرجو عدم الاحباط فقط هو الواقع... سلام للمغتربين


#766648 [كجاجا]
0.00/5 (0 صوت)

09-15-2013 04:41 PM
الحل الشاررررععع بس الناس تطلع الشارع الصغير قبل الكبير ،يعني حا يعملو شنو لو البيوت كلهم مرقوا الشارع ،يلا شعبنا العزيز اصحوووووو


#766475 [أبو تمام]
5.00/5 (1 صوت)

09-15-2013 01:26 PM
جلساء الراكوبة .. لكم أطيب التحايا .. هذه مساهمة باللسان والقلب .. قد تكون ضعيفة ولكن على أمل أن يساهم رفع الأسعار في إنقاذنا من الإنقاذ ..
إرفع .. ارفع
إنت حاكمنا المدلّع ..
ما يهمك لو لهيب السعر في أكبادنا ولّع ..
ارفع .. ارفع
يمكن البتسوي ينفع ..
أو يحرك ذرة فينا من المشاعر ..
أو يخلي الشعب يطلع ، ،
أو يؤذن في المقابر ..
أو يحرك شعرة في الممكون وصابر ، ،
نحنا ننزل وانت تعرض في المنابر ، ،
نحنا جايين ليك باكر ..!!
إرفع .. ارفع
لما " ميتين زيتنا يطلع "
لما تاني نخيّط اللّبس المرقّع
لما عين الشعب .. دم .. تنزف وتدمع
لما تهدم فوقنا جدران بيتنا والباب المخلّع
نحنا في عهدك شحدنا الخيمة والزيت والمشمّع
و نحنا شلنا " الكوز " ، ملينا .. شربنا
لمّا ابليسنا كرّع ..
( شعبنا سُمّاَ تجرع )
ارفع .. ارفع
يمكن المكتولة تسمع
انت حبك في قلوب الشعب .. اتحكّر .. تربّع !!
نحنا نتسوّل حندفع ..
نحنا نتبهدل .. حندفع
نحنا نتوسل .. بندفع
لوصرخنا .. وقلنا وين يا رب نقبّل ؟
برضو ندفع
لو صبرنا وقلنا باكر ..
قلتو هسع ..
نستحق طبعا تقولو علينا
نحنا حثالة الشعب المغفل !
وبرضو ندفع
نحنا لسه أولادنا شُفّع
نحنا لسه ورانا رُضّع .. .
ونحنا يوم الحظ تقسّم ..ونحنا يوم الحق توزع ..
كنت إنت نصيبنا من دون الخلايق ..
جيتنا ولّعت البلد شرقا وغربا .. بالحرايق ..
جيتنا حوّلت البلد .. منكوب وضايق ..
جيتنا يا سجم الرماد .. ممحوق وحايق !!
ناس بتزرع في بلادا وانت تقلع
ناس تعمّر وانت تشتري في البنادق ..
كل زول ياخد مصيبتو
قسم الأرزاق ... ووزّع لينا مليون ألف سارق ..
أنت تأمر ونحنا ندفع ..
نحنا نطرح .. نحنا نطرح .. نحنا نطرح ..
وانت تجمع ..
.......
ارفع ارفع .. وخلّنا نسميك رافع ..
انت رافع للضرايب
لي عدد ، عدد المصايب
في بلد أصبح موزّع..
فيهو اسم الشر " نافع "
يا بلد منهوكة لامن صوتا رايح ..
ينخفض صوت الحقايق
ويرتفع صوت النوايح
وفيها ترتفع الأراضي
وفيها ترتفع المقاضي
ويرتفع صوت المدافع ..!!
ونحنا حا نكورك .. نكورك
يمكن المكتولة تسمع ..
وتمرق الناس للشوارع..
والهتاف يملا المسامع..
"شعب جايع ..
شعب عن حق الحياة ..
لازم يدافع ..
يا يموت يا إما " يلحس كوعو "
أصلو خلاص أكل ... حتى الأصابع .. ! ! "

..


#766471 [محسن]
5.00/5 (1 صوت)

09-15-2013 01:22 PM
فعلاً ما عاد الوضع يحتمل، يا إلهنا نسألك الخلاص من هذا الكابوس الجاثم على نفوسنا، لا يعقل أن يكون المواطن المغلوب على أمره هو دائماً كبش الفداء لأخطاء قاتلة إرتكبها هذا النظام الفاشل الذي لا يشغله شاغل سوى سرقة ونهب موارد الدولة، لك الله يا سودان، لك الله يا سودان. لكن هيهات مهما تجبر الطغاه فلابد لليل أن ينجلي ولابد للقيد أن ينكسر


#766468 [الطريفي زول النصيحة]
5.00/5 (2 صوت)

09-15-2013 01:16 PM
انتو عارفين السودانيين صابرين على الحكومة ليه لانه مافي معارضة مقنعة تخلي الناس تضحي بانفسها لاحداث تغيير جديد لانه اي زول يمسك الحكم بيفكر في نفسه و اهله و داير يكاوش كله شىء كان سلطة و لا ثروة الخ عايزها لنفسه و لاهله و محاسيبه و يستعبد الناس العجبو عجبو الما عجبو يشرب من البحر عشان كده الناس تقول ليك حراميه لحراميه اخير نخلي الناس الحاكمين علي الاقل كما شبعوا قربوا يشبعوا ما يقوم يجينا واحد جديد شرفان و داير ليه زمن عشان يشبع اقلها كم و عشرين سنه .يعني الناس في احباط تام .


#766464 [aldufar]
0.00/5 (0 صوت)

09-15-2013 01:07 PM
ايها الشعب السوداني الفضل عليكم بالخروج للشاعر حالا مثل شعب مصر وتونس وذلك ليس ببعيد فانتم اهل الثورات قبل ان تعرفها تلك الشعوب ,
يا سيادة الرئيس البشير نايم في العسل مع وداد وما جايب خير البحصل في البلد دا كله ما عارفة تبقى المصيبة لو كنت ما عارف ولو عارف تكون المصيبة اعظم انتم مسئولين امام الله عن هذا الشعب المغلوب على امره تخلي وزير المالية الطابور الخامس اعمل في زي ما عاوز يزيد وينقص ويرفع وينزل حتى ممكن المرة الجاية انزلك انت من كرسيك الراجل دا طابور خامص ومثله كثر وانتم ما جايب خبر وراجل على نياتك الناس ديل بحفروا ليكم ليحدى ما تقع والبلد اضيع اكثر ما هو ضائع صحي النوم يا رئيس الهنا وسيب الرقص دا كفاية .


#766362 [مالك]
0.00/5 (0 صوت)

09-15-2013 11:30 AM
لا حولا ولا قوة الا بالله العلي العظيم اللهم لا تسلط علينا بذنوبنا من لا يخافك ولا يرحمنا 25 عام من التخبط والسياسات الغلط دمار شامل للسودان دمار زراعي دمار صناعي دمار اخلاقي دمار ثقافي فكري تشريد كل العقول النيره تحطيم طموحات الشباب قتل الاطفال والابرياء العجزه وفي الاخر حيبيعو الهواء ويمسكو الطعام بغلاء الاسعار ورفع الدعم المزعوم هو وينو الدعم اصلا مع الدمار الحاصل في كل البنيات التي وجتموها وينو الدعم
تعليم اتعلمنا بقروشنا علاج لو عندنا قروش نتعالج لو م عندنا نموت شغل م لقينا طفشنا خلينا البلد وبرضو اهلنا عايزين تموتوهم الشعب المغلوب على امرو
لا يغير الله م بقوم حتى يغيروا ما بانفسهم


#766271 [ابو الشوش]
0.00/5 (0 صوت)

09-15-2013 09:59 AM
يا سودانيين يا اهلنا السودانيين يا شعب السودان ...كفاية كفاية ظلم ومذلة وفساد وتجويع للناس وكمان عاوزين يرفعوا الدعم عن المحروقات معقولة ما مفاهم البعملوا في الشعب وكمان عاوزين يرفعوا الدعم بالله دي حكومة بالله دي حكومة بتخاف الله 24 سنة ما شفنا فيها أي خير للشعب السوداني غير موت الشباب في الجنوب وفي النهاية جو وقالوا حرب الجنوب ما كانت حرب جهادية والماتوا كلهم (فطيس.)
المحيرني إنو المواطن شابف وعامل فيها ما شايف الفظائع البرتكبوا فيها في حقهم.
الشارع يا ناس الشارع مافي حل واذا الناس ما طلعت هسي على الله السلامة.


#766260 [Fato]
0.00/5 (0 صوت)

09-15-2013 09:46 AM
عندى أحساس قوى أن الزيادة المتوقعة هذه سوف تكون القشة التى قسمت ظهر البعير.لن يسكت الشعب على قرار الموت أو الحياة فهذه الزيادة معناها الموت والفناء ل90& من أبناء الشعب فلذا فسوف يخرج الشعب غير مبالى بشىء ولن تخيفه الأجهزة الأمنية وعند تفاقم الأمور سوف ينضم الكثير من شرفاء القوات المسلحة لحمايتهم وستنتهى الأنقاذ بلارجعة ولا أسف عليها وسوف يسحق الكيزان سحقا وسحلا.


#766185 ['طائر الفينيق]
0.00/5 (0 صوت)

09-15-2013 08:10 AM
+ رغم المآخذ العديدة عليها , فاننا نحمد للمعارضة بكل أطيافها وقفتها المبدئية الصلبة ضد هذه الزيادات .. المعارضة فوتت فرصا كثيرة سانحة للانقضاض على النظام.. و الآن تتوفر لها فرصة أخرى فلا تفوتوها.

+ الشعب أيضا ملام .. ويبدو أن شعبنا العظيم قد أصيب منذ فترة طويلة بحالة (اكتئاب وطني شامل), ففسرته الحكومة خطأ كعادتها وفهمت أن هذا (الصمت غير الطبيعي) يعني أن الشعب يحبها ورضيان عنها !!!! على الشعب أن يتخلى عن هذا الاكتئاب الوطني ويقوم بمسئولياته التاريخية تجاه نفسه وبلده !!

+ دخول الاتحادي الحكومة يعني أصلا قصر نظر سياسي للحزب وقيادته ومن المعروف أنه تم ضد ارادة قواعد الحزب ومازال يجد معارضة شديدة داخل هذه القواعد وستكون الصعوبة في ابعاد وزراء الاتحادي من قطعة الكيكة الصغيرة التى منحها لهم النظام والنظام كعادتها يفسد الداخلين الجدد عليه حتى يتلوث الجميع.. فعلى الاتحادي الانسحاب الفوري من الحكومة وفض الائتلاف الذي لا معنى سياسيا حقيقيا له !!

+ كان على الاتحادي أن يتبع تكتيك حزب الأمة البارع وهو محاورة النظام باستمرار, ولكن عدم التورط معه في مشاركات لا معنى لها !!


#766178 [ابشر]
0.00/5 (0 صوت)

09-15-2013 08:01 AM
ايها الشعب السوداني انتم اهل الثورات الكل يعرف بكم نحن من ادخل الثورات بالعالم العربي ليس ببعيد نظام نميري وامنه القوي تم قلعه ونندم الي الان عليه معا جميعا من اجل الطلوع الي الشارع من اجل قلع الفساد لانهم هم وصلونا الي تلك الحاله المعيشه غاليه وها رفع الدعم عن المحروقات قد اتا يعنى مزيد من الفساد لماذا المواطن المسكين يغطي هذا النقص او يدفع الضريبه انتم اذا قلبكم علي السودان حاسبو اهل المال الان اهل القصور بالخارج والامارات ماليزيا الكل عارف محاسبه تلك المؤسسات العسكريه التي تفشي فيها الفساد اهل كافوري الكل يعلم اين الفساد ايها الشعب السوداني نحن وصلنا مرحله خطيره جدااااا حلها الطلوع الي الشارع لان المعارضه الان ضعيفه وباعت القضيه لا اقول كلها بس اكبر حزبين الامه والاتحادى الكل يعلم التفاصيل الشارع الشارع الحل الحل وانا واثق بان في الجيش الكثير منتظر انكم تتحركوا وقتها تشوفوا جيشنا النظيف يطلع ويقف معكم عاوزين نحاسب الكيزان مافي شي اسمه عفو لنا عوده عاش السودان حرا عاش المواطن مرفوع الراس



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة