الأخبار
منوعات سودانية
الحلنقي : الاجاويد اعادوا (لون المنقة) للبلابل
الحلنقي : الاجاويد اعادوا (لون المنقة) للبلابل
الحلنقي : الاجاويد اعادوا (لون المنقة) للبلابل


09-18-2013 07:29 AM

حوار: حسام ميرغني:

اثار منع الشاعر اسحق الحلنقي للبلابل من ترديد اعماله الفنية عددا من الآراء التي وصل بعضها لوصف موقف الحلنقي بـ(المادي) فيما يرى آخرون انه من حقه ان يمنعهن من ترديد اعماله التي اوصلتهن لقمة النجومية دون منحه الحق الادبي والمادي،الرأي العام قدمت تساؤلاتها لاسحق الحلنقي ،اسباب المنع والتراجع عن قرار سحب اغنيات كـ(لون المنقة) من بنات طلسم.



?الحلنقي ،ليه منعت البلابل من ترديد غنائك قبل ان تتراجع عن القرار؟

في ناس دخلوا وساطات بيننا وسمحت ليهن بترديد اغنياتي طرفهن،الاغاني دي اصبحت ملك الشعب وبالتالي اي وقف لها مثل اغلاق ابواب البساتين امام العصافير.

طيب..انت ما عارف كدا من أول؟

اخذت القرار باعتبار انني كنت احس بالظلم ولم يتم استئذاني في التغني باشعاري من قبل البلابل.

معرفتك مع البلابل لا من الليلة ولا امبارح ،ألم تصل لحل الزمن دا كلو؟

بيغنن غناي في الحفلات والمسارح دون استئذان ،قبل كدا اوقفتهن من غنائي لكن برضو الاجاويد تدخلوا.

توقيف اعمالك تكرر كثيرا ،البعض يتهمك بالجنوح لـ(الماديات)؟

ما بمنع زول ساكت،طلب السماح ما بيكلف الفنان حاجة، ما في شاعر وصل بقضية اغنية للمحكمة لكن هي اشارات لاتباع الطرق الصحيحة في حقوق الملكية الفكرية ،انت داير الناس ـ تأكل شعرنا دا ساكت؟

الشعر دا جزء مننا وتعبنا فيهو بي دمانا ودموعنا وعذاباتنا وسهرنا،طالما المسألة فيها عائد مادي الاولى بيهو نحنا.

و سبق ان اوقفت غناك من الاذاعة،السبب شنو؟

ثلث برنامج الاذاعة تجسده اغنياتي المبثوثة عبر اثيرها من سنة 68 الاذاعة بتبث غنائي وعندي اكثر من مائة اغنية مسجلة يبث منها يوميا حوالي (ُثلاثة اربعة ) اعمال،وقفت غنائي لان حقي ضائع .ليه دائما نحنا مجابهين بالظلم كشعراء،الفنان عداده وصل الى 30 مليونا في الحفل ،نحنا حقنا وين؟!!

?وبرضو اتراجعت من قرارك؟

الاجاويد برضو تدخلوا،بعدين الاذاعة هي الوصلتني للناس ولها فضل علىّ برضو راعيت الحتة دي ،الاذاعة خلتني ادخل بيوت وقلوب الشعب السوداني كلو،بطبعي انا اسحق الحلنقي دا بميل لرأي الاخوان ومحب للسماح اي قضية في الدنيا مهما صعبت السماح اكبر منها ومن العقاب.

ما شاعر ان الشعر بهذه المعطيات بيصبح مثله مثل شغل السوق؟ تدفع تغني؟

من حقنا ان نتعاطى مقابل ما نكتب مالا، الفنانين ديل بيغنوا ساكت، انا ما ببيع شعري لكني اعرف قيمته.

حصل منحت اغنية بالمجان؟

كثير جدا،من سنة 68 امنح اعمالي بالمجان،اي حفلة في البلد دي لازم تتغنى لي اغنية.

?اعلى اجر تقاضيته في قصيدة؟

ما بوريك..مش بقولوا (خليها مستورة)؟

توقيف اعمالك بعد نجاحها، مش بخلي الفنانين يتجهوا لشعراء آخرين؟

البلد دي فيها ثلاثة شعراء غنائيين وانا واحد منهم ،لا يمكن ان تتجاوزهم تجربة اي فنان، كل الفنانين الفي الساحة لحدي مرحلة ناس طه سليمان ديل بيتمنوا يغنوا لينا ،وبيفرحوا لمن نتعامل معاهم.شفت كيف؟

طيب..انسب طريقة للتعامل بين الشاعر والفنان لحجب المنع وتفاديه؟

يدونا حقنا،عذابنا دا يستحق ان يمنح بقدر صدقة،في تجاهل لحقوق الشعراء ودا المزعلني ،مرة ابو عركي اتفق لتسجيل سهرة لقناة فضائية واشترط ان تدفع مبلغا معينا للشعراء القناة تعللت بارتفاع قيمته ابوعركي (دور عربيتو وطلع) ..نحنا دايرين فنانين يعرفوا قيمة الشعر قبل معرفة حقوقنا..حقنا حق اصيل ، وما زالت لنا القدرة على كتابة الشعر ومجاراة خيوله.

الراي العام


تعليقات 3 | إهداء 0 | زيارات 3161

التعليقات
#769206 [بشرى]
5.00/5 (2 صوت)

09-18-2013 05:43 PM
والله كلامو صاح الفنان عدادو بالشىء الفلانى والشاعر يقعد شحاد انا بعتقد مافى عدل .بعدين شوف الشعراء الكبار فى التلفزيون لابسين كيف لبس تعبان ظاهر عليهم مفلسين وحالتهم حالة.وانصاف الفنانين هاك يا البدلات والعربات الفارهة حاجة تقطع مصارين الشاعر وتكرهو اليوم الزارتو فيهو ربة الشعر او كديسة الشعر.غايتو انا قلبى عليك يا اسحق الحلنقى ما شبه البهدلة دى.


#769048 [مأسورة]
5.00/5 (1 صوت)

09-18-2013 02:27 PM
لم نكن نعرف عنه الكثير!
كان الحلنقى (المغترب) فى مخيلتنا نحنا
عشاق الكلمة الجميلة ..الرقيقة..المعبرة
شاعر اسطورى او كائن خرافى يلامس وجدان الناس
بكلمات شديدة العذوبة والجمال تحملنا الى
عوالم من النشوة والطرب الأصيل ..
عاد الرجل..عاد الريس (رئيس جمهورية الحب)
أصبح حاضرآ فى كل الصحف والقنوات
وأمسى متاحآ لصلاح إدريس وأفراح عصام ولأشباه المبدعين
يملأ الدنيا ويشغل الناس بالتصريحات والصراعات
مع رموز الفن والابداع (وردى) (البلابل)!
اكثر ما يزعجنى فى هذا السبعينى المتصابى
عندما اشاهده يتحدث فى التلفاز مرتديآ عبأة الرقة والرهافة
والظرافة مقدمآ نفسه كرئيس لجمهورية الحب!
بشكل فيه الكثير من التكلف والإدعاء!


#768837 [جمال الدين التجاني يوسف]
5.00/5 (2 صوت)

09-18-2013 11:17 AM
القال حقي غلب .. ما دام الفنان يتقاضى أجر مقابل غناءه فمن الاولّى ان يتقاضى الشاعر أجر مقابل شعره .. والشاعر مثله مثل المحامي والطبيب .. الكل يرى انه انساني ويخدم الآخرين ولكن على حسب طريقته وقناعاته .. التحية والتجلى للشاعر المرح الكبير الحلنقي ..



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة