الأخبار
أخبار إقليمية
إشمعني البنزين !!!
إشمعني البنزين !!!
إشمعني البنزين !!!


09-23-2013 08:18 AM
كمال كرار

وزير المالية داير قروش عشان الميزانية فيها عجز ، وعشان كدة البنزين ح يزيد سعره والجازولين كمان ، والدولار الجمركي ح يتحرك والدقيق ح يزيد سعره لاحقاً والعاجبو عاجبو والما عاجبو يحلق حاجبو .

وتتوزع الأدوار داخل المؤتمر الوطني وكل زول فيه حسب ( طق حنكو) ومنهم معتمد امبدة الذي حذر المخربين – ويعني المعارضة- من النزول للشارع .

ولست هنا في معرض نصح وزير المالية ، ولكنني أكشف كما كشف المراجع العام عن قروش منهوبة يعلمها وزير المالية – بحكم اطلاعه علي تقرير المراجع العام لسنة 2011- لكنه لن يستردها لصالح الميزانية بدلاً عن رفع أسعار البنزين

72 مليون جنيه عائدات الخصخصة لعام 2011 في بطن ( اللجنة الفنية ) ، 23.7 مليون جنيه صرفت على البرنامج القومي للقمح دون أن تقدم للمراجعة شهادات إنجاز تبين ما تم إنجازه وأوجه الصرف.

721 مليون جنيه عبارة عن مسحوبات وزارة التعاون الدولي(المنحلة)لا يعرف كنهها وأوجه صرفها، كذلك لم يعرف المراجع العام أوجه صرف منحتي قطر والجزائر

مخالفات في هيئة المخزون الاستراتيجي تتمثل في عجز المخازن وشيكات مرتدة وسلفيات ذرة لم تسدد بما يعادل 13.9 مليون جنيه إضافة لمديونيات لم تحصل تبلغ 86.7 مليون جنيه ( الجنيه ينطح جنيه)

بلغت الأموال المجنبة خارج الموازنة على المستويين الولائي والقومي 497 مليون جنيه خلال عام 2011 ، أما جملة الشيكات المرتدة والمتأخرات بالضرائب والجمارك فتبلغ 326.2 مليون جنيه.

أضف لما ذكر عائدات الذهب والكهرباء والامدادات الطبية التي لا تدخل الميزانية ، ثم أرباح شركات الشرطة والجيش والأمن .

ثم شركات وزارة البترول ، والشركات الولائية ، وصناديق استثمار التأمين الاجتماعي والمعاشات وأرباح بنك العمال التي لايري العمال منها ولا مليم .

لو جات القروش دي الميزانية ، زمااان كان انتهينا من حكاية العجز ، وكان بمقدور المؤتمر الوطني دعم مرسي مادياً قبل أن تطيح به ( تمرد) .

ولو دا كلو ما كفّي ما راحت حاجة واحد ( سلك) طويل من أي كوز لي أمير قطر وتتحول الوديعة البالغ قدرها 2 مليار دولار والتي رفضتها مصر إلي كافوري وليس ناس الماطوري .

ولو دا كلو ما كفّي دقوا الجرس في جياد أو التصنيع الحربي زي ما دقيتيهو في المحالج والنقل الميكانيكي والمخازن والمهمات والسكة حديد ، يمكن يفيد .

إشمعني بس البنزين ؟ ولا رزق الكيزان علي المساكين !!!!

شفتوا وزير وقف في ( طرمبة) كبّ بنزين ودفع ولو قرشين ؟! عشان كدة ح يزيدوا البنزين وعشان كدة الناس طالعين .

الميدان


تعليقات 0 | إهداء 0 | زيارات 4400


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة