الأخبار
أخبار إقليمية
ايدينا فوق بعضها ونحن علي وشك الوصول .. وفاءً للشهداء والسودان
ايدينا فوق بعضها ونحن علي وشك الوصول .. وفاءً للشهداء والسودان



09-27-2013 09:42 AM
صالح عمار

انا مهتم وناشط وصحفي وبتابع بدقه حراك المجتمع لسنين، وهسي بكتب من الخرطوم وعارف الكتير مما يجري فيها ..

لكن دا ماموضوعي ولا هي صفات يمتاز بيها زول علي تاني .. لانو اكيد كتيرين جدا عندهم تاريخ اطول مني، وشعبنا البسيط اكبر وهو يناضل ليبقي في الحياة .. يااااخي وكمان الشهداء اشرف مننا كلنا..

قاصد من المقدمه دي فقط لفت انتباهكم للرساله دي :

البشير وعصابتو ماشين ماشين دا موضوع منتهي .. ولكن اذا كنا دايرنوم يمشوا سريع وننتهي من عهد المهزله علينا نعرف انو الايام التلاته الجايه في غاية الاهمية وحيحددوا مصير الثوره، وعلي كل واحد منا واجب ..

الصحيح ان نخرج جميعا للشوارع ونتظاهر ودا الحل الامثل والاسرع، ولكن انا مابدعو احد للتظاهر او عدم التظاهر، دا خيار فردي وكل زول يقدر حالتو ..

دعوتي هي دون ذلك :

الالاف الشباب طلعوا الشوارع وصدورهم مكشوفه وسطروا مواقف بطولية، والكان بفتش عن شهيد زمان فخلال يومين سقط مئات الشهداء ، وصار عندك قضية تحميها دماء شهداء ..

*انت / ي صحفي او اعلامي اطلع من بيتك وامشي المستشفيات والمشرحه وبيوت العزاء، اجمع المعلومات بمهنية ووثق الاحداث وانشرها .. فيها شوية مخاطره لكن ماكبيره

*انت طبيب او بتعمل في الحقل الصحي انزل المستشفيات : عالج الجرحي وقدم المساعدات الطبيه للجرحي واسرهم ، وانقل ماتراه عينك للجمهور .. مافي زول حيقدر يمنعك من انك تعمل كدا

*انت محامي في مئات المعتقلين والمحتجزين باقسام الشرطه والضحايا، راقب المراكز دي ومايجري فيها، وتابع المحاكم المتوقع انعقادا الايام الجايه .. وثقف اسر الشهداء والجرحي والمعتقلين عن حقوقهم القانونيه ، ووثق للانتهاكات

*عندك فائض مالي ادعم الثوار والناشطين فهم في حوجه ماسه لكل انواع الدعم خصوصا المعدات الاعلاميه، السيارات، طعام ومياه، ماوي ..الخ

*انت موجود خارج السودان ممكن تفكر في مايلي واكيد عندك افكار وخيارات تانيه :

1- تنظيم مسيرات بالخارج واقتحام سفارات السودان ببلدانكم

2 - ارسال رسائل ومعلومات لكافة اجهزة الاعلام ببلدانكم

3 - الضغط علي المنظمات الدوليه ومنظمات حقوق الانسان لمتابعة اوضاع المعتقلين وادانة الانتهاكات التي تجري

4 - توفير المال لعلاج الجرحي ورعاية اسر المعتقلين، وتنبيه المنظمات الدوليه للمساعده بهذا الخصوص.

*نحن كلنا : علينا واجب الدفاع بشراسه عن الشهداء وحفظ عهدهم، علينا واجب انو نفهم اسرنا وجيران السكن والعمل وزملاء الدراسه والاقارب وكل الشعب انو ديل ناس محترمين ..

وديل اولادهم وبناتهم وطلعوا الشارع عشان يقولوا كفاية قتل، وابادة وتشريد .. وعشان الحياه الكريمه لاسرهم وشعبهم

اتذكر دائما وخليك علي ثقه ان الطغاة مكانهم مذبلة التاريخ، وعشان نوديهم هناك لازم نقوم كلنا بادوارنا، اي شخص بامكانو المساهمة، ومساهمة فوق تانيه حتعجل بالنصر، وحتسجل بكفاحك وعطاءك نفسك مع العظماء في سجلات التاريخ ..

لاتلتفت لاحاديث القتله والطغاه وتاكد انو هم في حالة خوف ماعندو حدود

ثق ان النصر حليفكم جميعا والمتعة مافي النصر علي فكره

بل في رحلة الكفاح للنصر، ولقدام ياشباب وياشابات حتتذكروا الايام دي بفخر

عاش كفاح شعبنا العظيم من اجل الحرية والسلام والعيش الكريم

ورددوا دائما :

انني أؤمن بالشعب .. حبيبي وأبي

وبابناء بلادي البسطاء

الذين انحصدوا في ساحة المجد فزدنا عددا

وبابناء بلادي الشرفاء الذين اقتحموا النار وصاروا في يد الشعب مشاعل

وبابناء بلادي الشهداء الذين احتقروا الموت وعاشوا أبدا

[email protected]


تعليقات 12 | إهداء 0 | زيارات 2430

التعليقات
#779727 [aldufar]
0.00/5 (0 صوت)

09-27-2013 01:55 PM
ياجماعة هل صحيح ان الثورة اخمدت تكون كارثة لو كان صاح افيدونا لاننا خارج السودان ، وعاوزين كلام رجال بصدق ويجب تزويد المتابع من خارج السودن بالحقيقة لاننا نعيش على اعصابنا ، لما نسمع ان الثورة خمدت أوعى نسمع كلام زي دا يا ثوار .




الثورة مازالت في بداية المشوار
الثورة مازالت في انتظار الاحرار
الثورة مازالت تبحث عن الاشرار



افيدونا يا ناس الخرطوم هل الثورة ماضية ونتمنى من الله النجاح لها وقد غمرتنا السعادة ومازالت تغمر كل سوداني ولكن اذا حصل العكس سوف نحبط جميعا داخل وخارج السودان .


افيدونا عاجل ....................................... ياثوار


#779690 [بت حبوبتها]
0.00/5 (0 صوت)

09-27-2013 01:18 PM
كلام في الصميم أخ صالح, وأرجو من الجميع أن يسى لتطبيق ما قلته نصرة للثورة ووفاء لدماء الشهداء

وأقترح لعامة الشعب العصيان المدني الشاااااااااااااامل
كل من لا يستطيع التظاهر يبقى في البيت حتى تنتصر الثورة
فلا شئ يعجل بنجاحها - مع ما ذكره أخ صالح - إلا إنقلاب عسكري أو عصيان مدني شامل


#779682 [المتفائلة جدا]
0.00/5 (0 صوت)

09-27-2013 01:10 PM
عندى إقتراح مهم جدا

ونداء عاجل جدا جدا للمغتربين ولأهلناداخل السودان الحبيب فى كل الأحياء واصحاب المخابز والمطاعم والفكهانية وأصحاب البقالات ساهموا بإطعام المتظاهرين

عاجل جدا جدا ..
أنا عندى إقتراح ونداء لأهلنا فى الداخل والخارج وهو تزويد المتظاهرين بالطعام و العصيروالماء خاصة الطلاب لأنكم كما تعلمون يوجد أكثر من ربع مليون طالب وربما أكثر يذهبون لمدارسهم بدون وجبة الفطور فلازم نعمل نفير لأجل إطعامهم ضرورى وعاجل حنى يتمكنوا من الصمود..
وإنى متأكدة جدا إن النصر قادم بإذن الله


#779578 [حسان]
0.00/5 (0 صوت)

09-27-2013 11:33 AM
علينا ببداية الحرب النفسية و نشرها اعلاميا مثل سفر بعض الدستوريين فجر اليوم في الوقت الذي تقمع الاجهزة الامنية الشعب من اجلهم ثم تصميم قفص يرمز لهدف الثورة النهائي المتمثل في ارسال البشير الي لاهاي


#779540 [نافع الما نافع]
0.00/5 (0 صوت)

09-27-2013 11:04 AM
يا ثوار بلادي
اهم شي الوحدة
امة واتحادي ومؤتمر شعبي وشيوعي وانصار سنة وجيش تحرير السودان والعدل والمسواة وتنظيمات اشباب وكل التنظيمات الحرة وكل حملة السلاح
كلنا واحد ضد الانقاذ الفاسد
كلنا قبيلة واحدة
وحدة اديان وحدة انسان
دم اشهداء في رقابكم
انحنا مرقنا مرقنا مرقنا ضد الناس السرقوا عرقنا
انحنا مرقنا مرقنا مرقنا ضد الناس القتلوا ولدنا
جيش واحد شعب واحد وما دايرين غير راس نافع(اصلوا الجيش بيكره نافع)
خاين يابشير خاين*ماليك امان خاين
يا خرطوم ثوري ثوري لن يحكمنا لص كافوري
عزة في هواك عزة نحنا الجبال


#779499 [حسان]
0.00/5 (0 صوت)

09-27-2013 10:25 AM
اقترح اخي الفاضل تفعيل الحرب النفسية و نشرها اعلاميا واقترح تصميم قفص ليرمز لهدف الثورة النهائي و هو تسليم المدعو البشير الي لاهاي


ردود على حسان
[سيد احمد الشايقي] 09-27-2013 01:15 PM
اوعك من قفص والله بي سببو الا يكمل الثوار كلهم التور ده


#779495 [قرقاب الرفلة]
0.00/5 (0 صوت)

09-27-2013 10:24 AM
الإضراب مشروع مشروع ضد الفقر وضد الجوع
الإضراب العام مشروع ضد بقايا نظام الجوع
العدالة الإجتماعية هى طريقنا للحرية
يسقط يسقط حكم العسكر


#779488 [ابوزول]
0.00/5 (0 صوت)

09-27-2013 10:18 AM
شكرًا اخي
الحكومة جنحت للعنف فاجنحوا له ولكن بتمييز
1- عدم التعرض لمتلكات المواطنين
2-عدم التعرض للمتلكات العامة فهي ملك للشعب
3-مواجهة عنف الانقاذ باستهداف منازل وقصور رموز النظام ......وهي معروفة علي سبيل المثال فان قصور عوض الجاز .....علي عثمان طه .....ابن الزبير وبنت نافع في شارع واحد بالقرب من جامع سيدة السنهوري .......يمكن التوجه مباشرة بعد الصلاة وتحطيم وحرق هذه القصور
3- لا بد من إرهاب هؤلاء القتلة ونشر الرعب في قلوبهم مهما كانت التضحيات حتي يعلموا ان العنف سيقابله عنف مضاد
4-لا تأخذكم بهم رحمة فقد اغتالوا ابناءكم بدم بارد
5- اعتصموا بالميادين العامة واحرصوا من المندسين
6- اعلموا ان لا تراجع حتي النصر .......
7-اقبضوا علي المخربين واكشفوا عن هويتهم وان كانوا من المندسين سجلوا أعترافاتهم وأنشروها علي مواقع التواصل
8- علي المواطنين المقتدرين تقديم العون للمعتصمين في شكل وجبات جاهزة ومشروبات
وليستمر نضال الشعب حتي النصر ولا نامت أعين الجبناء


#779484 [قرفان خالص]
0.00/5 (0 صوت)

09-27-2013 10:10 AM
بس يــا ودّ
حيلك شـــدّ
ويد علي يد
كلنـــــا ضدّ
ضد العسكر وحكـــم الفرد
ضد الظلمــة ومــن أفســد
نضال وارثنو أبّ عـن جدّ
أكـتوبر أولى لــنا بتشــــهد
وأبريل التانية أعادت مجد
والتـالتة قريبة وما بتبــعد
خليك واثق وإتأكــد
للأحلى حيكون الغد
للأفضل راجنّو الغد
للأجمل حنبني الغد
للأحلى حيكون الغد
للأفضل راجنّو الغد
للأجمل حنبني الغد

أخخخخخخخخ


#779475 [ابو احمد]
0.00/5 (0 صوت)

09-27-2013 09:58 AM
جمعة الشهداء .. تحت شعارشهداء في كل مكان من اجلك يا سودان اليوم الجمعة بمشيئة الله نخرج لتكريم من هم اكرم منا الشهداء وفاء لهم واستمرارا لمسيرة بدأوها ولتكن سلمية حضارية لتحقيق اهدافها في التغيير، الدعوة من كل حركات التغيير


#779474 [خالد حسن]
0.00/5 (0 صوت)

09-27-2013 09:58 AM
زمان المثبطين والخزله وعملاء الانظمه الديكتاتوريه كانو بقولوا انه ده شعب جبان وانه الشعب السوداني منذ الاستقلال ماقدم شهداء وانه الستقلال جاء باردا دون اراقة دماء
الان الشعب والشباب اثبتوا ضحالة تفكير هؤلاء وتجنيهم علي الشعب وافتراءهم عليه
اكثر من مئة شهيد هل تريدون اثباتا اكثر من هذا علي عظمة هذا الشعب المناضل ؟



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة