الأخبار
أخبار إقليمية
رابطة طلاب سودانيون بماليزيا يرفضون التخرج حداداً على الشهداء الذين أسقطهم نظام البشير
رابطة طلاب سودانيون بماليزيا يرفضون التخرج حداداً على الشهداء الذين أسقطهم نظام البشير



09-28-2013 11:01 PM
كوالالمبور: أحمد علي

انعقد اجتماع طاريء للجمعية العمومية لرابطة الطلاب السودانيين بجامعة كوالالمبور للبنية التحتية - وتعتبر هذه الجمعية التي تضمن 650 طالباً سودانياً من أقوى الرواب في ماليزيا للطلاب السودانيين - لمناقشة حفل التخريج الذي كان من المقرر أن تقيمه السفارة السودانية بماليزيا، وكان القرار بعدم المشاركة في حفل التخريج حداداً عل الشهداء الذين اغتيلوا بواسطة الشرطة السودانية وجهاز الأمن، إلا أنه في آخر المطاف قررت الجمعية على المشاركة بشرط أن يرتدوا وشاحات سوداء مكتوب عليه حداد، وفقط يكرمون ويخرجون دون من المشاركة في الحفل الذي يحييه الفنان شكرالله، وقد قامت الرابطة بإبلاغ السفارة بهذا القرار، ولكن السفارة رفضت ارتداء الوشاح الأسود، بسبب قيام قناة النيل بنقل الأحتفال وخوفاً من ارسال رسالة تضامن مع المتظاهرين داخل البلاد. فما كان من الرابطة إلا الأنسحاب من التخريج.


تعليقات 15 | إهداء 0 | زيارات 4032

التعليقات
#783333 [elahmady]
0.00/5 (0 صوت)

09-29-2013 06:08 PM
يااااااخ دي عايزه تظهر مااكتر والحاجه الماعارفاها لو سمحتي ماتتكلمي فيها


#783010 [بت حبوبتها]
5.00/5 (1 صوت)

09-29-2013 02:26 PM
تخليتم عن حفل التخرج البيحصل مرة واحدة في العمر بكل وطنية وإحساس بالمسئولية..عفيت منكم يا شباب, الواحد لما يشوف موقفكم دة وشباب الثورة الفي السودان بيطمئن على البلد, ربنا يحميكم جميعآ


#782969 [بقولوا علي مواطن]
5.00/5 (2 صوت)

09-29-2013 02:04 PM
بسم الله الرحمن الرحيم
السلام عليكم ورحمه الله وبركاته ..
اولا : انا واحد من طلاب هذه الجامعه "كولالمبور للبنيه التحتيه" ومن اعضاء الرابطه في تلك الجامعه ..
بحب اقول للناس البتقول علينا كيزان انتو ماتحكمو علي ناس من غير خلفيه مسبقه ..
ثانيا: ماليزيا عباره عن خزينه لاموال للكيزان مع بعض الرعايه لحمايه هذه الاموال..
ثالثا: لو كنا كيزان مارقين من السودان ليه ومتعبين ابهاتنا ليه وصارفين قروش عشان نتعلم ونواكب التطورات الحاصله عشان البلد البقت لينا ضيقه دي نرجع نصلحها ونطورها ..
وبنقرا بي حقنا ياناس بي حقنا .. وقت اقول بي حقنا معناها تابعو معانا الدولار وشوفونا متازمين قدر شنو والواحد لاعارف يرجع ولا عارف يواصل ولورجع جزء من عمرنا بضيع ولو قعدنا القروش علينا زايده ..
...
وبعدين ياناس البقولو علينا كيزان خلو في بالكم انو نحن وطنين وماعندنا علاقه بي الاحزاب ياناس الاحزاب انتو ..واللبيب بي الاشاره يفهم ..
سلام


#782914 [احمد علي]
5.00/5 (1 صوت)

09-29-2013 01:30 PM
الاخت محاسن انا صاحب البوست وانا من ارسل لموقع الراكوبة ونشكرهم علي النشر ...

اولا الجميع ردو ليك واوضحو ما هي الحقائق و الواحد ما يمشي وراء كلام الناس انو اولاد ماليزيا كلهم اولاد كيزان وانا واحد من الناس الهنا ما عندي اي علاقة بي الكيزان المعفنين وكمية كبيره جدا من الطلاب هم يدرسون علي نفقتهم الخاصة و لو كان كما تقولي اذا لماذا نرسل ونندد بما يفعله الكيزان وكلاب الامن والشرطة بالشعب السودان ولماذا نستنكر ان كنا منهم.. ولماذ نطلع الجميع علي انه امتنعنا ؟ حاولي اوسعي افقك


#782406 [الوحش]
5.00/5 (1 صوت)

09-29-2013 07:25 AM
التحية للشرفاء والشرفاء فقط
انا بقول ان هناك فساد فكري حاد ناتج من استنشاق غاز ثاني اكسيد الكيزان ده المسبب للافكار العقيمه..


#782356 [ميمو]
5.00/5 (2 صوت)

09-29-2013 04:44 AM
اولا :
السفارة اقامة احتفال التخريج هذا بصورة انتقائية .... !! فهو ليس شاملا لجميع الخريجين بجامعات ماليزيا ... ولا نعرف اسباب التمييز هذه .... فمثلا عدد كبير من خريجي الدراسات العليا من جامعة بتروناس لم يسمعوا بهذا التخريج مجرد سمع ... عندما قراءت الخبر في الراكوبة اتصلت باصحابي الخريجين الذين يتواجدون الان بماليزيا لمعرفة ان كانو مشاركين في الاحتفال ... الا ان جميع من اتصلت بهم قالوا لم تصلنا دعوة بهذا الخصوص .... ومعظمهم قال لم يسمع بهذا التخريج اصلا الا من استفساري هذا .. اما قليل جدا منهم قالوا انهم سمعوا به مجرد سمع من اصدقائهم من الجامعات الاخرى ...
السؤال للسفير و للملحق الثقافي ... لماذا هذا التمييز ؟ هل كان ذلك سهوا ؟ ان كان كذلك هل هذا السهو مقبولا ويليق بسفارة بحجم سفارة ماليزيا ؟ ان قبلنا ذلك .. هل في مقدوركم ان ترسلوا لخريجي بتروناس خطابات اعتزار بديلا لخطابات الدعوة التي لم تشرفوهم بها ؟ لا اظنكم تمتلكون هذه الشجاعة !!

ثانيا :
ردا على تعليق الاخت "محاسن ام الفارس" ... فاقول نعم ان النظام حول معظم اموال السودان لماليزيا ... الا اننا نحن ابناء اللاكيزان (الغير كيزان) فوالله نعاني كما تعانون انتم ونكتوي بالم الحقيقة اكثر منكم لاننا نرى من افعال اسر الكيزان ما لا ترون !! ...
نحن بماليزيا لسنا مترفون ..!! فمثلا جميع طلاب الدراسات العليا في جامعة بتروناس ... بلا اسثناء ... يعملون في الجامعة في التدريس والمعامل والورش والمراقبات والتصحيح وكل ما يتعلق بالعمل الاكاديمي بالجامعة .. كل ذلك من اجل الحصول على دعم مالي من الجامعة واعفاء من الرسوم الدراسية يا محاسن ام الفارس .... كنا نظنها جنة يا "محاسن" ولم نجدها كذلك ..!!! ولكن ... الحمد لله..!!

وهكذا معظم الطلاب في الجامعات الاخرى يمولون دراستهم من عرقهم وعرق اسرهم ... وكم من طالب لم يستطع اكمال دراسته وعاد لوطنه يجرجر الخيبة على استحياء منكم يا "محاسن" .. !!

هذا لا ينفي ان فينا من هم من اتباع النظام .. نعم ان بيننا كيزان ذوي رائحة نتنه بسبب الريح التي تخرج من بطونهم (باستمرار) من اكل مال الحرام ...!! نعم يوجد كدسة سمان يرتعون بيننا يا "محاسن" !! .. و بعضهم كدسة ضعاف ياملون في ان يمن عليهم اسيادهم( من دون الله) بقليل من تلك الريح النتنه لعلها تنعم جلودهم وتغير من حالهم .. !!

انا اتفهم رأيك يا "محاسن ام الفارس" ... انه راي نابع عن الغيرة على الوطن ... فهنيئا لك غيرتك على الوطن !! ولكن ... هوني علينا نحن طلاب ماليزيا ...


#782333 [moawia mudawi]
5.00/5 (1 صوت)

09-29-2013 03:10 AM
للاسف في لحظات الانسان بفكر بي قلبوا وهذا خطأ , لان لو اجتهدتي شوية وفكرتي بعقلك في الكلام المكتوب اكيد ح تفهمي ان نحن ما اولاد كيزان والدليل اننا امتنعنا عن المشاركة في التخريج بسبب ان السفارة رفضت ان تعطينا تصريح للبس الوشاح المكتوب عليه حداد ..@


#782272 [ezoo mohamed]
5.00/5 (2 صوت)

09-29-2013 01:35 AM
انتي في مفهومك انو اي واحد بفراء برا السودان ينتمي لي الكيزان بس صراحة حرام الواحد يرد عليك لكن ان شاء الله البلد بعد نجاح الثورة حتنضف من الزيك ديل


#782239 [إلى محاسن ام الفارس]
5.00/5 (1 صوت)

09-29-2013 01:07 AM
والله حرام عليك طلبة كتار رجعو بسبب الدولار البتقولي عليهو لانه بقى صعب شديد تتحول قروش من السودان

ولو تجي وتشوف الجامعة زاتها حتلاقي كل واحد مديون للجامعة بي مبالغ كتيرة انا حسي علي ما يقارب 5000 رنجت وامتحاناتي بعد كم يوم وما بقدر ادخل الا ادفع القروش دي وفي ناس عليها ارقام اكتر من دي بكتير ... وصح في طلبة من ابناء كبارات المؤتمر الوطني على قولتك لاكن والله باقي الطلبة القروش بتكفيهم اسبوعين بالكتير وباقي بنقضيه ديون وده كلو عشان شنو مش عشان ننفع البلد الما ساعدتنه في حاجة .. لاكن والله كلامك جارح وانا بدمع وبكتب ليك لانه مافي زول عارف حالتنه كيف


#782235 [ودعمر]
5.00/5 (1 صوت)

09-29-2013 01:03 AM
ليس كل من يدرس بماليزيا يتبع للموتمر الوطني بل ان 90% ممن يدرسوا بماليزيا لاعلاقة لهم بالحكومة فلتعلموا انه بسبب رئسكم الرقاص قد انسدت كل الطرق للدراسة بامريكا وانجلترا اتجه ابناء السودان الي ماليزيا. وبعدين انته زول بيقول ليك انا ضد الحكومة!!!


#782220 [مقاطع]
5.00/5 (2 صوت)

09-29-2013 12:49 AM
با محاسن اول شي قرار الوشاح الاسود دا كان خيار للناس الحتنظم الحفل كان حيشاركو المنظمين بس ما حيمشي جمهور لانو الرابطه عندها اتفاق مع السفاره من قبل الاحداث بعد الاحداث الحصلت دي الرابطه عملت اجتماع ناقشت فيه انو يشاركو بس يلبسو وشاح في كلمه حداد ويجو يخرجو الطلبه بس عشان خاطر الاسر والناس الجات للتخريج دا بوضو عندها حق تفرح ،، وبعد تسليم الشهادات الرابطه تطلع قبل بدايه الحفل والموضوع دا كان بعكس صوره وبرسل رساله اقوى من رساله المقاطعه ،، وبعدين بالنسبه لي اولاد الكيزان دي ما تتكلمي ساي حاجه ما عارفها طلبه iukl ديل معروفين حتى لو فيها قله من الشباب اسرهم في الحكومه دا ما ذنبهم وبعدين المعانا ديل لرجل من ناس كتيره وبقيفو مع الناس وضد الحكومه لكن انتو فهمكم متخلف شويه اي زول ابوهو جوز معناها الولد حرامي وقروش الحكومه اهاا الولد ذنبو شنو اذا هو واحد نتواضع جدا وما حصل منو اي سلوك غلط ،، يتبرا ليكم من ابوهو عشان ترحموهو ولا كيف !!


#782218 [مواطن سوداني]
5.00/5 (2 صوت)

09-29-2013 12:46 AM
لو سمحتي ماتجمعي لانك ماعارفه الظروف البواجهوها كيف ..اولا" مافي طالب في ماليزيا بقرا بمنحة الا القليل جدا ...ثانيا" الاغلبية العظمي من الطلبه ديل ظروف السودان الموحشه والفساد وتردي التعليم هي المرقتم برا ووراهم اهلم ببيعوا القدامهم ويلوكوا الصبر لمن يرجعوا يشيلوا معاهم الحمل ....اغلبية الطلبه من الطبقه الوسطي لاكين ابهاتم مقتنعين بفكرة انوا الاستثمار في البني هوافضل اسثمار عشان كده مهما بعصروا ويداقشو عشان يقروهم ..كفاية عليهم غربتهم ووحددتهم وفوق ده شايفين البحصل في وطنهم وبحاولوا بكل مايقدروا ان يساندوا اهلهم ولو بمقاطعات وحزن ده اقل مايقدروا يقدموهم فرجاء مراعاة لوضعهم ومانجمع لانوا بكون عندك وداخ وله ود اخت وله قريب ابوهوا بقريهوا بره علي حساب اهلوا وعلي حساب تعبوا عشان يجيهوا ويشيل منو ..ولك كل الود والاحترام ..حنبنبهوا البنحلم بيهوا يوماتي وطن شامخ وطن جامع


#782215 [loay moh salih]
4.50/5 (3 صوت)

09-29-2013 12:43 AM
انا لؤي محمد صالح طالب بي جامعه كوالا لمبور للبنا التحتيه يااستاذه محاسن ... وبالجد انا عايز اعلق على الكلام الغبي والغير مدروس والنابع عن جهل وعشوائيه شديده ..نحن طلاب رفضنا الذهاب للتخريج حدادا على ارواح الشهداء في سوداننا الحبيب اللذين عطرت دمائهم اراضي الوطن .. لسنا من النظام او من ابناء النظام كما ذكرتي ...ولو عندك كلام زي مدروس قوليهو او اسكتي فان السكوت من ذهب ...


#782213 [عاصم]
5.00/5 (1 صوت)

09-29-2013 12:40 AM
سبحان الله يامره ماتلمي


#782139 [محاسن ام الفارس]
1.25/5 (5 صوت)

09-28-2013 11:45 PM
هم ديل ذاتهم طلاب المؤتمر الوطني وابناء كبارات المؤتمر الوطني البعثوهم علي حساب الشعب السوداني ويدفعوا ليهم بالدولار واولادنا المساكين يدفعوا من جيبهم الخاص. حقوا كلهم لما يجوا ما يعترفوا بشهاداتهم ويدفعوهم تكاليف دراستهم اذا ثبت انه الحكومة دفعت ليهم.
قال وشاح قال , ياخي قوم اكل هوت دوقك ساكت.


ردود على محاسن ام الفارس
United States [كاك] 09-29-2013 01:59 AM
انتو لاعاجبكم العجب ولا الصيام في رجب

Hong Kong [مهند الخليفة] 09-29-2013 01:22 AM
ربنا اعلم بانوايا وربنا يسامحك على سوء الظن دا ... ونحن ارقى من الرد على امثالك لانو ما عملنا كدا ليك انتي
قرارنا وموقفنا دا لهدف نبيل صعب على الزيك يفهمو
مهند الخليفة
الامين الثقافي لرابطة جامعة كوالا لمبور للبنية التحتية

Hong Kong [mohamed] 09-29-2013 01:09 AM
﴿ يَا أَيُّهَا الَّذِينَ آَمَنُوا إِنْ جَاءَكُمْ فَاسِقٌ بِنَبَأٍ فَتَبَيَّنُوا أَنْ تُصِيبُوا قَوْمًا بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ (6) ﴾
يا اختي الفاضلة انا طالب بجامعة كوالالمبور للبنية التحتية نحن الحمد هنا اغلبنا اولياء امورنا مغتربين خارج ربوع الوطن
انا واحد من الناس الما اتولدت في السودان بس في النهاية وطنا وشايلين جوازو اولاد كباراتك ديل اغلبم هناك عندك في جامعاتكم السودانية
و رفضنا نمشي تخريج عشان نحن عندنا وطنية زرعوها فينا اهلنا طبعا عملنا اجتماع والناس دي صوتت انها ما تمشي التخريج
ما تحكمي يا اختي الفاضلة على الناس ساي ...........

Hong Kong [osman babiker] 09-29-2013 12:55 AM
انا واحد من طلاب الجامعه البتكلمو عنها والا وهي جامعه كوالا لمبور للبنيه التحتيه ونحنا بجد بنقول يا ريت لو كنا في بلدنا كان الواحد علي الاقل قدر يعمل حاجه لي بلدو بس لي الاسف نحنا ما جمب اهلنا وربنا يحمي اهلنا ويحفظهم وانا وبأسم رابطه السودانين بجامعه كوالا لمبور للبنيه التحتيه انفي تماما ما تظنينه ونحنا جايين بي عرق اهلنا وشقي ابواتنا

Hong Kong [مواطن سوداني] 09-29-2013 12:45 AM
لو سمحتي ماتجمعي لانك ماعارفه الظروف البواجهوها كيف ..اولا" مافي طالب في ماليزيا بقرا بمنحة الا القليل جدا ...ثانيا" الاغلبية العظمي من الطلبه ديل ظروف السودان الموحشه والفساد وتردي التعليم هي المرقتم برا ووراهم اهلم ببيعوا القدامهم ويلوكوا الصبر لمن يرجعوا يشيلوا معاهم الحمل ....اغلبية الطلبه من الطبقه الوسطي لاكين ابهاتم مقتنعين بفكرة انوا الاستثمار في البني هوافضل اسثمار عشان كده مهما بعصروا ويداقشو عشان يقروهم ..كفاية عليهم غربتهم ووحددتهم وفوق ده شايفين البحصل في وطنهم وبحاولوا بكل مايقدروا ان يساندوا اهلهم ولو بمقاطعات وحزن ده اقل مايقدروا يقدموهم فرجاء مراعاة لوضعهم ومانجمع لانوا بكون عندك وداخ وله ود اخت وله قريب ابوهوا بقريهوا بره علي حساب اهلوا وعلي حساب تعبوا عشان يجيهوا ويشيل منو ..ولك كل الود والاحترام ..حنبنبهوا البنحلم بيهوا يوماتي وطن شامخ وطن جامع

Hong Kong [زول جدا] 09-29-2013 12:45 AM
لو كانوا اولاد المؤتمر الوطني .. و ابناء الكبار لتخرجوا و رقصوا دون ان يهتز لهم جفن .. انت لا تعرفيهم يا ام الفارس .. فالرجاء عدم التعميم و التنميط و اطلاق العبارات الجارحة المثبطة يمينا و يسارا .. فيهم مئات من الشرفاء اولاد شرفاء .. عصف بهم بؤس الحال في السودان الي السعودية و الخليج .. فانعم عليهم الله بسعة رزق .. و ارسلوا ابناءهم الي ماليزيا للتعلم .. هؤلاء الشباب .. في العام الماضي عند انطلاق مسيرات جمعة شذاذ افاق .. و لحس الكوع (بوادر الانتفاضة التي قمعها النظام بسبب جلوس الكثيرين امثالك يطلقون الاحكام و يوزعون الاتهامات جزافا .. و دايرين الانتفاضة يقوم بيها ناس سنهوري و وفاء .. و هم يتابعوها في الراكوبة و الجزيرة) الشباب ديل سجلوا موقف بطولي رائع .. بالتظاهر احتاجا امام السفارة السودانية في ماليزيا .. متحدين البوليس و الامن الماليزي .. في دولة حقوق التعبير فيها غير مكفولة و تشتهر بسمعة سيئة في مجال حقوق الانسان .. نسبة للقمع و الامن فيها ما بيفرق عن الامن في الخرطوم .. وحشية و قوة ..بالاضافة للعلاقة الجيدة لحكومة المؤتمر الوطني بالحكومة الماليزية .. اها الاولاد الانت بتسئ فيهم (علشان في 100 كوز قاعدين في ماليزيا) .. اتحدوا كل هذا .. و تهديد الامن .. و حشد رجال العمليات من الشرطة .. الذين تجمهرو امام السفارة مغلقين اي منفذ ..تحدو وحشدو و زلزلوا اركان حي السفارات و لفتوا نظر الكثيرين من سفارات الدول الاخري و الاعلاميين و رفعوا صوتهم عالي تضامنا مع اخوانهم في الخرطوم .. و هتفوا بسقوط النظام .. مع انهم في احسن حال و قروشهم محولة من السعودية في ميعادها و كلو 100 ال 100 .. تفتكري طلعوا ليه؟ لانهم واعين لمشكلة السودان الكبير ..و مؤمنين بالقضية.. و لي وضع اهلهم المساكين الفي السودان.. مخاطرين بمستقبلهم (ممارست العمل السياسي في ماليزيا .. يعاقب عليها القانون بالفصل من الجامعة .. و اول يوم بتمضي علي الشرط دا قبال ما تسجل).. او ابسط شئ سحب الفيزا .. او السجن .. و الكلام دا كلو موثق و انا شاهد عيان .. حاضر و مشارك .. يعني ماحكوه لي .. موقفهم التاريخ يسجله لهم في قائمة الشرف .. فلم يكون اقل من المتضامنين في القاهرة و لندن و نيويورك .. حيث حقوق الانسان و الديمقراطية و حرية التعبير و المنظمات .. بل هم اكثر قوة .. لصعوبة وضعهم ..

اطلاق التهم من غير دليل ساهل جدا .. و نوعك دا مع احترامي ليك جدا (ارجو ان يتسع صدرك لنقدي) .. هو المرجعنا لي ورا .. الاقصائية .. و التنميط .. اصلا .. مافي فرق بينك و بين الكيزان .. يا تكون معاهم .. يا تكون شيوعي و ملحد و كافر (ولو اعتكفت 10 سنين داخل الكعبة .. تصلي ليل نهار)

التحية لشرفاء KLIUC علي الموقف النبيل .. ورفضكم الرقص و الهجيج (المحبب لنفس) حدادا و علي اخواننا الشهداء و تضامنا مع اسرهم و مشاركتهم حزنهم و التاريخ لا يفقد الزاكرة..

[mustafa] 09-29-2013 12:44 AM
انا طالب فى ماليزيا وبدرس على نفقتى الخاصه و انا خريح امتنعت عن التخريح فى تخريح السفاره نسبه لى تضامن مع اخوانى فى السودان فما صح منك تقولى الكلام ده على كل الطلبه فى ماليزيا لانو اغلبهم بدرسو على نفقتهم الخاصه و جاين من السودان

Hong Kong [Momen] 09-29-2013 12:43 AM
السلام عليكم اخت محاسن
انا طالب سوداني ادرس في ماليزيا. نحنا وعندما اكتب نحنا دي قاصد بيها مجموعه كبيره من الطلبه المستقليين الشرفاء نحنا بندرس بي مال اباءناا الخاص والسبب الذي جعلنا ناتي للدراسه هنا هو السياسه في السودان المتداخله في اي شي حتى التعليم....نحن نعرف كثير من الطلبه تركوا الدراسه في السودان بسبب اعتراضهم من قبل تجار الدين (الكيزان)وارادة اشراكهم في السلم السياسي القذر في بلدنا السودان.مع احترامي الكامل لكي واني اعرف انك كتبتي الكلام دا في لحظة غضب...ربنا ارفع البلاء عن اخواننا في السودان..

Hong Kong [Babiker Mohamed] 09-29-2013 12:38 AM
ما كل الطلاب هنا بيجو علي حساب الحكومه وهي وينا الحكومه البتدفع قروش وما كل الناس الهنا ابواتم من المؤتمر الوطني
نحن اهلنا من الناس التعبو وعرقو عشان يجيبو لينا لقمه العيش
ولو كنا فعلا ابناء المؤتمر الوطني كان مشينا ورقصنا علي دماء اخوانا
مفروض تقدرو مجهود الناس ديل وتبطلو استفزاز
ونحن مرقتنا ظروف الدراسه لو ما كده كان بتلقونا في الصفوف الاماميه للمتظاهرين

United States [امير بابكر] 09-29-2013 12:38 AM
الاخت ام فارس و الله انتي ظلمتينا و نحن ما ناكرين انو في مجموعة كبيرة من ابناء لصوص المؤتمر الوطني بيدرسو في ماليزيا لكن و الله معظمنا من ابناء عامة الشعب السوداني الكادح و ايضا من ابناء مغتربين دول الخليج و ابائنا دفعوا دم قلبهم عشان ندرس هنا و نحن كان كل منانا نكون في وسط المتظاهرين لكن دي اقل حاجة قدرنا نعملا انو نقاطع هذا التخريج و كلامك انو ما يعتمدوا شهاداتنا دا مفروض تتراجعي عنو فكلنا مع الثورة و في المظاهرات الفاتت نظمنا وقفة احتجاجية امام السفارة السودانية حتى انو في بعضنا تم اعتقالهم من قبل الشرطة الماليزية بتحريض من سفارتنا... والله تعليقك دا احزني شديد

[طالب ماليزي] 09-29-2013 12:28 AM
سبحان الله .. طيب حضراتهم ديل عاملين حداد ليه ؟؟ انزلي هنا لو سمحتي اي حاجه هي بقت قروش المؤتمر الوثني ... احمدي الله علي كل حال ... والحاصل في السودان ما هو الا فتنه اسرائليه لتحقيق اهدافه في بناء دولته العظماء من النيل لي الفرات (زي ما موضح في علم اسرائيل الخطين تعني النيل والفرات) زي ما دمروا العراق ومصر وسوريا وليبيا والصومال وتونس والدور الان علي السودان ... انها فتن اسرائليه ماسونيه انها فتن المسيح الدجال وانها علامات يوم القيامه ربنا يصلح اخرتنا ... اللهم احفظ لنا بلدنا من الفتن ما ظهر منها وما بطن ... اللهم احفظ اهلنا من فتن المسيح الدجال .

[ود الماحي] 09-29-2013 12:06 AM
والله يا محاسن لو كانو فعلا أولاد كبار المؤتمر وكانت بعثاتم بقروش الشعب السوداني قروشنا ما وقعت وآطة..
يكفي إنهم مع الثورة



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية



الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة