الأخبار
أخبار إقليمية
فى رثاء شهيد الوطن صلاح السنهوري
فى رثاء شهيد الوطن صلاح السنهوري
فى رثاء شهيد الوطن صلاح السنهوري


10-01-2013 06:58 AM
إبراهيم الكرسني


أهدى هذه الخواطر الى روح شهيد الشباب الدكتور صلاح مدثر السنهوري الذى قدم روحه الطاهرة فداءا للوطن فى جمعة الشهداء، والى أفراد أسرته الحزينة، وأخص منهم والدته المكلومة السيدة حنان صلاح سيد طه، وأقول لهم بأن دم إبنكم الشهيد لن يذهب سدى بإذن الله تعالي. كما أسأل الله الغفور الرحيم أن يتقبله عنده شهيدا، وأن يجعل قبره روضة من رياض الجنة، وأن يسكنه فسيح جناته مع الصديقين والشهداء، وأن يلزم أسرته الصبر والسلوان.
سلام يا صلاح

سلام يا صلاح
أرقد مرتاح
وسط الصلاح
ما الظلم إنداح
والشعب طلع
نسوان ورجال
يهتف ويقول
"مليون صلاح
فدى الإصلاح"
...
كان شفتا صلاح
خلف الجثمان
كل السودان
كيمان..كيمان
ما فضل زول
حتى العيان...
الكل بيصيح...
ينده ويقول...
يا رب..يا عالم..يا منان
"مليون صلاح
فدى السودان"
...
كان شفتا صلاح
كل الأرواح الكتلوها
شلعت زي نور
بتضوى قبور
الكل حلمان
عايشين فى جنان
والكل بيقول...
لو تاني حييت
بفدي السودان
...
كان شفتا صلاح
الناس ماشين
الكل يسأل...
وين التأبين؟
ناس من بري
وناس من توتي
السيرة تسير
وكل الجماهير
تهدر فى هدير
تهتف وتقول
"مليون صلاح
فدى الإصلاح"
...
سلام يا صلاح
ما الشعب إرتاح
الشعب مرق...
وقلع السفاح...
والجوع ولى...
بعد الإصلاح...
والحلة بقت....
ملياني ملاح...
...
ما شفتا صلاح
يوم جا السفاح
ما دقو شباب...
وملوهو ’بزاغ‘
ناسن صلاح...
والكل يهتف
"مليون صلاح
فدى الإصلاح"
...
كان شفتا صلاح
قام جارى جرى
أظنو نسى...
بيت الأشباح...
ونسى ضرب الناس
خرطوش وسلاح
زفو النسوان...
وبنوتنا تصيح...
"يسقط...يسقط
حكم الكيزان"
...
كان شفتا صلاح
كلنا عارفين...
"كلنا مارقين
ضد الناس...
السرقو الدين"
كلنا عارفين...
الناس مرقت
ضد الكيزان...
تجار الدين...
...
كان شفتا صلاح
كلنا عارفين
كان حلمك كان
تبنى الأوطان
تنقح تزرع...
كل السودان
مويتو تدفق...
تملا الحيضان
أرضو تخدر...
مليون فدان
ناسو الطيبين
ماكلين...شاربين
لافى زول مرضان
لافى زول جيعان
...
كان شفتا صلاح
الكل يسأل...
نان وينو صلاح؟!
جاتن من فوق...
جات جارى "حنان"
جات جارى تقول
"داك ولدي صلاح
الطالعه رويحتو
فدى السودان!"
...
كان شفتا صلاح
أمك بى هناك...
وسط النسوان
يوم جو الحبان
الكل يوم داك...
والله "حنان"!!
والكل يهتف...
لو عندو صلاح
يفدي السودان
ويطهر أرضو
من الكيزان...
...
كان شفتا صلاح
الكل فرحان...
الكل بقران...
لو عندو صلاح
يبني الأوطان
الكل بيقول...
لو عندو صلاح
كان السودان
بيعيش فى أمان
...
كان شفتا صلاح
كل الأمات...
كل الخالات...
كل العمات...
كل الأخوات...
حالمات سودان
من غير بنبان
حالمات سودان
من غير كيزان
حالمات بولاد
يبنو الأوطان
وإن جات الحاره
يقدمو روحن
فى إيمان...
فدى للسودان

30/9/2013م


[email protected]


تعليقات 6 | إهداء 0 | زيارات 6480

التعليقات
#786438 [مهيره بت عبود]
0.00/5 (0 صوت)

10-01-2013 04:42 PM
سلام لكل شهداء السودان *و نقول لهم بإذن الله الى جنات الفردوس ... و يا اسر الشهداء نلتم شرفا عظيما *ونحن على الدرب ان شاءالله سائرون
اود ان اوضح ان كل الشهداء متساوين قدرا و نضالا و نبلا و شجاعته *وكلنا على هذا اليقين بلا شك ..ان 210 شهيدا كلهم نادوا للحريه و العداله ..ولا احد منا يفرق بينهم *
*اما الشهيد صلاح سنهوري *ليس لأنه صيدلي او من اسره كبيره *لكن *اسره صلاح سنهوري * جابو بري منددين و مطالبين بالقصاص *و منذ استشهاده *لازالو يتظاهرون ليل نهار و قدت شهدت مظاهراتم *...وهتفنا مليون صلاح فدى الإصلاح *..فأخذت المظاهره طابع الثأر*
*(التّار) و ايضا لتكمله ما كان *يتمناه كل السودانيون ان ننعم بوطن حر تسوده العداله و بدون عصبيه قبليه*
و اطالب اسر الشهداء ان تخرج *تطالب بحق الحريه و بالقصاص من *افراد النظام *اخوان الشهداء *و الجيران و الاصدقاء *و كل الاسرلها ان تخرج و تثور *تطالب بدم الشهيد الذي نادى للحريه *هذا فرض عين على كل مواطن سوداني شريف *و كلنا قد تظاهرنا ننادي لإسقاط النظام *ننادي للحريه و لوقف النزيف والعنف*
في ام درمان *و بري *فكل الشهداء هم اخواننا *و كلهم *شرف الثوره *وكلنا يجب ان نكمل مسيرتهم *حتي يسقط هذا النظام الغاشم *الديكتاتوري*
ولنهتف جميعا * مليون شهيد لسودان جديد*
وان شالله لازلت الثوره مستمره الى ان يسقط النظام*


#786273 [salah]
0.00/5 (0 صوت)

10-01-2013 02:52 PM
لاحولة ولاقوة الا باللة , الهم ارحمة رحمة واسعة , والهم اهلة الصبر والسلوان


#786205 [Khalid_Lawal]
5.00/5 (2 صوت)

10-01-2013 02:12 PM
في اكتر من 210 شهيد ماتو فدائآ للوطن رغم مكانت شهيدنا السنهوري لاكن لازم معاملة الشهداء كلهم معاملة واحدة تعظيم شهيد بعينه من دون ال 210+ فيه جرح كبير لأسر الشهداء


ردود على Khalid_Lawal
United States [كجاجا] 10-01-2013 05:50 PM
ربنا يتقبلهم جميعا انشاء الله وهم موقد الثورة
ثورة حتى النصر وكنس الكيزان الارزقية


#785948 [Salim]
0.00/5 (0 صوت)

10-01-2013 12:01 PM
عبق الشهادة الله يرزقنا


#785808 [شوق]
0.00/5 (0 صوت)

10-01-2013 10:49 AM
الخوف ياصلاح دمك يكون راح,,
والله يكضب الشينة

ربنا يرحمك ويرحم جميع الشهداء ويتقبلكم القبول الحسن
ويصبر آلكم وذويكم يارب


ردود على شوق
United States [سنهورابية] 10-01-2013 04:36 PM
يا شوق ما دم السناهير البروح هدر لابنخاف ولا بنهاب الشعب خلاص لازم يرتاح من السفاح

United States [شكبزور] 10-01-2013 01:13 PM
الله يكضب الشينة



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة