الأخبار
أخبار إقليمية
قصيدة ثورية جديدة للشاعر عبدالله وداعة الأمين .. حرية حرية ، ثورتنا سلمية
قصيدة ثورية جديدة للشاعر عبدالله وداعة الأمين .. حرية حرية ، ثورتنا سلمية
قصيدة ثورية جديدة للشاعر عبدالله وداعة الأمين .. حرية حرية ، ثورتنا سلمية


لا فينا رجعية الجنس سوداني و الامر الناهي فينا الضمير الحر و السلطة شرعية
10-03-2013 10:08 AM
قصيدة جديدة للشاعر عبدالله وداعة الأمين، تتضامن حروفها مع ثورة شعب السودان ضد الظلم والجبروت

حرية حرية
ثورتنا سلمية
مد البصر و الشوف بي عرقنا محمية
بنجيبها لو بي الحق او حتى زندية
حقك تشيلو براك .. رافع جبينك فوق
ما بجيكا بي النية
مهر الخلاص الروح تمن المحبة جروح
و الروح تروح احسن بي عزة مرضية
علي الهتاف ارفع نبرة غناكا و فوق
يا نعيش كمان احرار يا موتة دغرية
واصلو التمن غالي حق الوطن اكبر
من عسكري و والي و شلة حرامية
و الارض هي الميراث
و العزة لو تنداس الموت بكون احسن
من عيشة مخزية
شن فايدة الحراس يا يما ديل اشرار
اولادك الفراس ماهم سماسرية
ما ساموا عرضك يوم
لا داهنوا التجار لا خالفوا المعلوم
فتحوا الصدور لي الموت
و الموتة عيدية
لو تبقى في الاوطان
لو تبقى شان عرضك
ارضك كما عرضك تحميها جندية
يا يما باعوا الناس
قسموا الوطن نصين
نهبوا البلد و خلاص
خلوها مرمية
واجب النضال اول
فرض الوطن واجب
يا نموت كمان واقفين
يا نعيش و نرضى الذل
و رسينا متكية
واسوا الصفوف احسن
و نشد سواعد الخوف
حد السماء الممدود و ايدينا ما شويية
عايزاني اسكت ليه؟
يا يما اسكت ليه؟
نسكن كمان لي متين و البيعة مشرية؟
و اصلو التمن مدفوع بنجيبها بنجيبها
حرية السودان
غصبا عن الحاصل .. عن المرابيّة
ما شفتي يا يما زورا باسم الله
سرقونا دقونا كتلونا كيدية؟
و طلعنا مطلوبين
شذاذ و افكاين
و كمان باسم الدين نهبونا بالمية
بالالف و المليون
ندفع عشان جيبهم
رسم الجباية غصب
و يخصمو ماهية
و الحال كما هو الحال
و الظلم نفس الظلم
ويكرروا الموال و الحالة بس هيا
قايلين حنفضل يوت
مالين جيوبنا الخوف
و عيونا مطفية؟
ابدا ورب الكون بنجيبها حرية
كل الحقوق ترجع
و حلفنا ما بنرجع لا نوطي لا نركع
لي سلطة فردية
بي همة ثورية
شمس الخلاص تشرق
و ارجع بلدنا جميل
و الضحكة لي الخرطوم ترجع كمان اجمل
و البسمة وردية
لا فينا ديكتاتور
لا فينا رجعية
الجنس سوداني
و الامر الناهي فينا الضمير الحر
و السلطة شرعية
نتساوى في القانون
و الحق يبقى الحق
و الفوضى منهية
و نعمر السودان
و نكون كمان اخوان
و نبيض النية
و علوا الهتاف اكتر
حرية حرية
دم الشهيد ما بروح
و الوهبوا ما شوية
حرية السودان بي دمانا مروية
علوا الهتاف اكتر
بنجيبها حرية
لي اليرضى و اليابا
حوتنا جيابا
و ايدينا ما شوية
حرية حرية
عبدالله وداعه الامين
لندن 29.09.2013


تعليقات 5 | إهداء 0 | زيارات 4650

التعليقات
#789428 [سعاد صالح التني]
0.00/5 (0 صوت)

10-04-2013 12:20 AM
دعوة لسحب الثقه من البشير ولأجراء انتخابات رئاسيه مبكره
دعوة لسحب الثقه من البشير ولأجراء انتخابات رئاسيه مبكره
10-03-2013 05:46 AM


كنا نخال أن في وجهه دم فيقوم من تلقاء نفسه بطرح نفسه علي الجماهير لأعادة الثقه في نفسه كرئيس للسودان في تحد قوى لمعارضيه وثقة في مؤيديه الذى يدعي زورا أنهم غالب أهل السودان بعد أن سمع بأذنيه ملايين السودانيين في كل ربوع السودان تهتف في وجهه أرحل أرحل أرحل يارقاص ...جوعت الناس يارقاص ... نحن مرقنا مرقنا مرقنا ضد الناس السرقو عرقنا وبعد أن أعترف قناصيه بحصدهم لأرواح شباب السودان اليافع الذى خرج مسالما عارى الصدر مطالبا بحقه في الحريه والعداله والعيش الكريم في وطنه علي اعتبار أن منح الثقه أو سحبها ممارسه ديموقراطيه وهو يدعي أن حكمه ديموقراطيا واعمالا لصحيح نظرية سيادة الشعب في ممارسة السلطه استخداما وممارسه وكل ذلك مكفول بنص الدستور.

وبما ان الحق الأكثر ثبوتا والذى يتغافل عنه بل وينكره البشير ونظامه هو أن الشعب مانح السلطات والسيد الأعلي في السودان يحتفظ لنفسه دوما بالحق في محاسبته ومحاسبة نظامه فأنني بالأصالة عن نفسي ونيابة عن كل نساء السودان طالما لم يأتي الأمر من الرجال أدعو كل الشعب السوداني الي سحب الثقه من البشير ونظامه وندعو في ذات الوقت لأنتخابات رئاسيه مبكره لأنقاذ البلد.


ولما كانت الجرائم التى ارتكبها البشير ونظامه منذ انقلابه المشؤم في حق كل السودانيين اصبحت مشهودة وقد شاهدها كل الشعب وكل شعوب وحكومات العالم وهو مايمنعه من طرح نفسه للثقه خوفا ورعبا من عواقب مهوله تنتظره وتنتظر نظامه فأنه يحق للملاين التي خرجت في كل اركان السودان تطالب برحيله مؤخرا هذه الملايين من حقها عزله ومحاسبته جنائيا بل يجوز لهذه الملايين اعمالا لنصوص قانون الاجراءات الجنائية القبض عليه وتقديمه للسلطات القائمة من اجل العدالة التى تشفى صدور الوطن والمواطنين ولكنها تعلم مدى سذاجة الفكره وهي تعلم أن القضاء قضاؤه والشرطه شرطته والجيش جيشه فكيف ستكون العداله غير ان هذه الجماهير الديموقراطيه بطبعها التي قطرت عليه وفي ممارسه ديموقراطيه قد اتفقوا علي سحب الثقه من البشير وتدعو لانتخابات رئاسيه مبكره انقاذا للبلد وتغاديا للمزيد من سفك الدماء السودانيه الزكيه علي ايادى زبانية البشير وتكوين حكومة قومية تشمل كل الوان الساسه والسياسيين في السودان دون عزل او استقصاء لأحد فالسودان لكل بنيه وبناته وتكوين لجنه لصياغة دستور يليق بالسودان وتطلعات السودانيين لمستقبل مشرق واعد خاليا من الخزعبلات والتخاريف والأوهام وياحبذا لو كان بدون كيزان.

سيقول قائل انه لم يمنح أحد من السودانيين ثقته للبشير الذى جاء أصلا بليل علي ظهر دبابه في انقلاب خائن خسيس علي النظام الديموقراطي المنتخب فكيف نسحبها منه وهو لم يمنحها أصلا في يوم من الأيام أقول اننا نمارس عملا وفعلا ديموقراطيا مع الأمر الواقع منذ أكثر من عقدين وصبرنا عليه مخدوعين بشعارات براقه كلها تدين وطهر وعفاف ثم أكتشفنا الأن أن من يحكمنا قد خدعنا واكتشفنا أنه قاتل ودجال ومتاجر ومحتال باسم الدين ومفرط في تراب السودان ومهين لكرامة وآدمية السودانيات قبل السودانيين بعد ان نهب ثرواتهم هو وزوجته واخوانه وباقي زمرته وجعلهم شحاتين يتسولون في بلاد الناس ثم يرقص طربا ببلاهة وغباء منقطعين النظير علي أشلاء الوطن.......فهل نسكت عليه وعلي زمرته مارأيكم يارجال السودان هل اقتراحي هذا نيابة عن نساء السودان ديموقراطي ام غير ديموقراطي؟ ولقانوني السودان الشرفاء وضع الآليه المناسبه لسحب الثقه من الرقاص ويتثني من ذلك قضاة البيض في المحكمتين العليا والدستوريه.

[email protected]


#789393 [الوجع]
0.00/5 (0 صوت)

10-04-2013 12:00 AM
ضجت زنازين البلد اتجملت واتعطرت بعرق التعابا
متر فى شبر زنازينك كبرت واتوسعت بانفاس التعابي
شريف مرمي علي باب زنازينك يغني فرحان
وتغني معاه الزنازين والطيور شايلا الشوق
شبر فى شبر هامتك ياكوز
قصورك تلعنك اموالك سرطانك اصحابك عصابتك
اهلك ما اهلك ياتهلك يايجيك الاجل وبرضو تهلك
قصورك تنسم عفون
عطورك حنوط الموتي
احلامك اطفال فى راسه رصاصه
وبارودتك تشهد عليك وتقول هو القالي اكتل
ايامك ياهالك ايام طغاة ازالم الرحمن وازلهم الشيطان
دم فى دم تغسل برضو يديك دم اطفال بقطر
لو فاكر الكرسي المسروق حقك جرب واقعد
وكل متقعد نارو توقد فيك حمي وخوف
سيد الكرسي قاعد صابر علي الظلم والافتره
ايام وتبقي فى كتب التاريخ تاريخ اسود
تلعنك اجيال قاعده واجيال جايه واجيال ماشه
زي الاجيال الفاتت مالعنتك
يبكي عليك اللصوص والسفاحين
وقصورك ضجت من صراخ كوابيسك واضنيها صنو
ايه زنب الطالب ليه فى الراس تديه بالرصاص
بكره الرصاص يتكلم ويقول الحقيقه
بكره كل رصاصه تمرق وسام من الشهيد وتطاردك
عملك لايهود قريظه سوهو ولاعن هولاكو شفناهو
سمعنا بازيك فى التاريخ كتير بس بقتل الاطفال واولاد لا
وكمان تنكر
ياربي كيف احساس الكاتل وهو بقتل روح
ياربي مافكر ان ده اخوه او ابوه او ولد
وكم تمن رصاصك ياريت نعرف التمن الغالي الفوق تمن روح الاطفال
وياربي دفعوليك بالليره السوريه ولا بجنيه مابجيب اربع عيشات نصاح
راجين بعد رصاصك الغاز تجربو فينا ماشعبك بقى هوان
غايتو اقول ماك سوداني ولا من البشر البضرب الاطفال والابرياء
عشان يخوف او يهظر او شنو مابفهم
شوقتنا لرصاصك الحار بعد صغارنا كتلتهم دمنا بعدم بقى مويه
عصير تشرب وحاتك كاس او جردل بس فى عروقنا وانتا فينا
دم بقى ماعندنا الا تفوت حتي العرق يجر فيه الدم
والسرابه تجري فيها المويه
كافر من يقتل الاطفال كافر بكل الاديان والانسانيه


#789058 [كركبه شديده]
0.00/5 (0 صوت)

10-03-2013 05:11 PM
تسلم يا عبدالله وداعه ... قصيدة راااااائعة . دائماً مبدع و خلاق و شفيف و مهموم بالوطن . سمعت لك قصائد رائعة من قبل في منتدى ثقافي لا أذكر إسمه ..ولكن أظنه ( منتدى نوافذ الثقافي ) .


#788685 [بيكانتو]
0.00/5 (0 صوت)

10-03-2013 12:10 PM
البنت دى ما لابسه طرحه ليه


ردود على بيكانتو
European Union [كركبه شديده] 10-03-2013 05:13 PM
و ما أجملها بالبنطلون .... عسل والله ماشاء الله عليها .


#788588 [Adam]
0.00/5 (0 صوت)

10-03-2013 11:07 AM
Abdullah Excellent
perfect poem



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة