الأخبار
أخبار إقليمية
بنك البركة يلدغ مغتربا مرتين و"السَّعِيدُ مَنْ وُعِظَ بِغَيْرِهِ "
بنك البركة يلدغ مغتربا مرتين و"السَّعِيدُ مَنْ وُعِظَ بِغَيْرِهِ "



تحذير للمغتربين لا توجد دولارات بالبنوك
12-03-2013 02:36 PM


مثل كثيرين غيرنا استبشرنا بما أعلنه وأذاعه البنك المركزي بأنه وجه البنوك المحلية للعمل بتسليم الحوالات الواردة إليها بالعملة المحددة في التحويل للمستفيد (دولار- يورو- ريال – درهم- استرليني ... وغيرها من العملات)، واتجه الكثيرون للتعامل عبر هذه الآلية ، ولكن!! ( ولكن السودانية هذه دائما هي استدراك " للكن الكلام أو الموضوع") يبدو أنها كانت شركا لأمثالنا ممن لازالت لديهم ثقة في النظام المصرفي و سياساته التي يعلن الالتزام بها!!!
في أواخر شهر أكتوبر 2013 قمت بتحويل مبلغ بالدولار عبر بنك (تلي موني) إلى بنك البركة – فرع المغتربين، وعند مراجعة المستفيد أفادوا بأنه لا تتوفر لديهم دولارات في الوقت الحاضر وعليه مراجعتهم بعد الساعة (12) ظهر اليوم التالي، وعند مراجعته لهم أفادوه بأنه ليست لديهم دولارات وأنه أمام خيارات ثلاثة:
• استلام المبلغ بالعملة المحلية!!
• استلام المبلغ بالريال السعودي بعد ان أبانوا له أنهم سيحاسبونه على أساس سعر الدولار 3.75 ريالا سعوديا مع العلم بأن البنك المراسل (تلي موني) يبيعك الدولار بسعر 3.77 ريالا، وبعد السؤال عن السبب في فرق السعر أجابوا أنه بيع وشراء!!
• إعادة المبلغ للبنك المرسل (تلي موني) ليعيده لصاحبه بعد خصم قيمة الإعادة – بمعنى أنك تدفع للبنك المرسل رسوم التحويل و تدفع للبنك المراسل رسوم إعادة بعد فشله هو في الإيفاء بالتزاماته للبنك المرسل!!
وبعد الاتصالات وتدخل ممثل البنك في السعودية تمت معالجة الأمر وسلم المبلغ بالدولار وقلنا ( العَتْرَة بِتْصَلِّح المشية)! وما كنا ندري أنها لدغة أولى، أو لعلها قد تكون لدغة واحدة وبس!!
ولسذاجتنا ما كنا نظن أننا سنلدغ ثانية وخلال شهر !!
وهذا ما جري صبيحة يوم الاثنين 2/12/2013، فعندما راجع المستلم بنك البركة فرع المغتربين لاستلام مبلغ محول بالدولار حول عبر(تلي متوني) يوم الخميس 28/11/2013 أفادوه بالتالي:
• استلام المبلغ بالريال السعودي بنفس طريق الحساب السابقة!!
• وإن كان في عجلة من أمره يمكنه استلام المبلغ بالعملة المحلية!!
• وقد ترك الخيار الثالث هذه المرة مفتوحا؟ بمعنى أن يقوم هو بالمتابعة معهم عبر رقم هاتف تم تزويده به ليتصل عليهم من وقت لآخر ومتى ما توفرت دولارات لدى البنك يحضر لاستلام المبلغ بدون أي تحديد لتاريخ أو وقت لذلك!!
وهذه تجربة شخص لدغ من بنك البركة مرتين خلال شهرين والغريق قدام وعلى كل مغترب تدبر أمر تحويله بصورة أفضل؟
ومن وعظ بفعله كان هاديا
السعيد من وعظ بغيره

عمر محمد الأمين


تعليقات 27 | إهداء 2 | زيارات 8428

التعليقات
#846900 [زول]
2.00/5 (1 صوت)

12-04-2013 07:34 PM
يا جماعة دولار مااااااااااااااااااااااافي


#846599 [جنرال زمان]
2.00/5 (1 صوت)

12-04-2013 01:18 PM
تستاهل لكن لأنك صدقت كلامهم. نحن من زمان خلينا ناس تلي موني وتحويل الراجحي والشغلات دي. تشيل قروشك حية وتخليها عند العيال في السودان وكل شهر يفكوا منها مصاريفهم في سوق الله أكبر وأحسن حاجة تشوف تجار العملة من الكيزان لأنه سعرهم أعلي سعر وقروشهم جديدة لنج من بنك السودان الذي يقوده الجبهجي محمد خير الزبير وكان صاحبنا زمان بس بقي زي يوسف كوة اللي نسي الخوة وضرب الليري من جوا (دي بعرفوها ناس كردفان في الثمانينات) والله يلعن الكيزان في أي مزيرة


#846497 [alBaraka member]
3.50/5 (2 صوت)

12-04-2013 11:45 AM
السلام عليكم و رحمة الله
بالنسبة للموضوع المؤثر أعلاه و نحن في بنك البركة نؤكد لكم جميعاً أننا نحاول بكل مواردنا تغطية كل الإحتياجات للعملة الصعبة للأخوة المغتربين و المقيمين . و لكن نحن مواجهون بصعوبات و عقبات يومية تكتف أيدينا من القيام بواجبنا تجاه الجمهور الكريم . بالنسبة لإستلام التحاويل بالعملة الصعبة ، فإن السيولة منها و الدولار بصفة خاصة فيها شح كبير جداً جداً علماً بأن البنك يستلم نقده الأجنبي أسبوعياً من بنك السودان ، لكن هل لديكم فكرة كم نستلم من البنك المركزي لتغطية إحتياجات العملاء (والله تضحكوا لو وريتكم) المهم ، نحن نحاول بكل الطرق و ما يثبت هذا شيئين ذكرهم الأخ المتضرر ،
أولاً سعي البنك لإرضاء العميل بتوفير المبلغ المحول بالريال السعودي مما يعني تسليمه التحويل بالعملة الصعبة لعدم توفر الدولار ، والقيمة الكلية للتحويل لم تتأثر إلا بفرق التحويل وهو 02. من الجنيه (صدقني مافي بنك حيحول ليك أقل من كدة) ،
ثانياً تأكيد البنك لتغطية التحويل فور توفر النقد الأجنبي ما يعني يومين أو ثلاث بالأكثر . ما يوضح صدق نية البنك .
نقطة أخيرة لتأكيد صدق النوايا ، أرجو فعلاً تجربة أييييييييييي بنك في السودان حتى ما يقال أنه مرفوع عنه الحظر بنك الخرطوم . (حتشوفو الويل والله ) . ولكن للأمانة المعضلة أولعا و آخرها لدى البنك المركزي لتأويله و سنَه القوانين (حرورة جعلية ساااااااي) بدون دراسة واقعية أو تغطية لإحتياجات البنوك الإستثمارية للنقد الأجنبي .
(بس مؤتمرات و ندوات و قرارات و سفر و تدريب ،، فوووووووق شنو إحنا إقتصاد ما عندنا )


ردود على alBaraka member
[موطن منصف] 12-04-2013 04:33 PM
كفيت ووفيت يا اخوي وردك كافي وشافي
الأخ الشاكي متخيل انو قروشو السلمالناس البنك العربي هي ذااااااااتا بيشيلوها بالطيارة بيجو يسلموها لناس بيتو هنا في الخرطوم وما عارف البنوك الخاصة دي ( الغير حكومية ) بتعاني كيف عشان توفر دولار للعملاء في ظل شح الدولار من السودان
وفقكم الله وسدد خطاكم يا ناس بنك البركة

United States [النقر عثمان] 12-04-2013 02:37 PM
الغلط ما غلطتكم يا ناس البركة وأنتو ما بيدكم حيلة ،،، أهو تحاولو تلقطو العملة لقيط لأنه بنك السودان ما بيديكم إلا القليل مما يثير الضحك ،،، لو ألف دولار بس ما عندكم في البنك بعد شوية الريالات دي ذاتها ما حتكون متوفرة ،،، يعني باب تحول بالعملة الصعبة وتستلمها صعبة حيكون مش صعب ولكن مستحيل ،،، عشان كده المغتربين يشوفوا ليهم دبارة ،،، لأنو بنك السودان ضحك عليهم ولكن طبعا ضحك لبعض الوقت وقد لخصت الوضع برمته في كلماتك الأخيرة "إحنا إقتصاد ما عندنا"

United States [زهجان أفندي] 12-04-2013 02:17 PM
ولا ينبئك مثل خبير
شكرا


#846449 [kamuzu]
1.00/5 (1 صوت)

12-04-2013 11:11 AM
نفس الشيء حاصل للعربات ذات الموديلات القديمة والاعفاءات الممنوحة لها ولما سالنا القائمين علي الامر بسواكن افادوا ان ها مجرد كلام وليست لديهم تعليمات بذلك
نامل من ادارة شؤون المغتربن الرد علي هذا الموضوع


#846304 [المشروع]
4.00/5 (2 صوت)

12-04-2013 09:22 AM
اما انا لا اركب سودانير ولو تذكرة مجان ولا احول ببنك سوداني الى ان يقضى الله امراً كان مفعولا.. لا بنك البركة ولا بنك المحقة لان من صفات المؤمن (الصدق) و(الوفاء)اما ديل (الكذب) و(المرمطة)


#846290 [omera]
1.00/5 (1 صوت)

12-04-2013 09:14 AM
احسب ان هذا الشخص كاذب، كيف تقول البنك ليس به دولارات، يعني لا يوجد الف دولار واحد بالبنك ليعطوك حقك ؟ ولكن اتفق معاك اذا كنت محول مليار دولار وهذا امر مستبعد من مغترب ولو عمل بالخارج 100 سنة، كفاية مبالغاااااااات


#845965 [Mohamed]
3.00/5 (1 صوت)

12-03-2013 09:33 PM
اساءلكم بالله نشر الخبر عشان الناس ماتدبس في المشاكل دي. لا يؤمن احدكم حتى يحب لاخيه ما يحب لنفسه. الله يحفظ بلدنا من الفساد


#845919 [عبدالله]
5.00/5 (1 صوت)

12-03-2013 08:37 PM
دا بنك البركة و أللا بنك الفبركة


ردود على عبدالله
European Union [عبدالله] 12-04-2013 12:48 AM
اسم على مسمى بنك الفبركة


#845895 [sudani]
4.50/5 (2 صوت)

12-03-2013 07:44 PM
سياسة الكيزان قايمة علي مبدا الهف انهب الهط و اهرب استثمر في ماليزيا... ياخوي قريشاتك الله يعوضك فيهن يكونن هسع بيتفسحن في بنوك ماليزيا باسم واحد من الحرامية..


#845885 [عاصم]
2.00/5 (2 صوت)

12-03-2013 07:35 PM
يا عمر محمد الامين يعني انت داير تصدق الحكومةبتاعت البشير وقراراتهم يعني تحول دولار وتستلم دولار ياخي ديل مافية مجرد ما يدخل دولار البلد بلحسوه طوالي على ماليزيا


#845877 [المستغرب]
4.97/5 (6 صوت)

12-03-2013 07:25 PM
ههههههههههههه....والله انت تستاهل يدوك بالجزمة ياعمر محمد الأمين مش بالعملة
المحلية ولا الريال السعودي..انت الجن الخلاك تحول بالبنك شنو؟؟؟الناس اكلوا الاخضر واليابس
يعني انت ارجل من الناس عشان ما ياكلوا حقك؟؟!!وين تحويلا مغتربي العراق؟؟!!!


ردود على المستغرب
United States [hmamizo] 12-03-2013 07:47 PM
وكمان كاتب اسمك عمر محمد الأمين ... فالح


#845861 [سالم السالم]
4.00/5 (1 صوت)

12-03-2013 07:12 PM
اقسم بالله هذا حصل معي قبل سنوات مع بنك الخرطوم ..
نفس الخيارات (الجنيه -الريال السعودي) ولامن رفضت خياراتهم ..وصممت وأقسمت وحرنت واتوعدت ..
جابو لي الدولار ..ونكاية فيهم ..بعتو لواحد جوة البنك بسعر السوق الأسود وطلع لي فرق أكثر من ثلاثة مليون (قبل عشر سنوات) أوعكم تصدقوا ديل حراااااامية في حرااااامية ..السوق الأسود بس لا بنك ولا يحزنون....


#845826 [جركان فاضى]
5.00/5 (1 صوت)

12-03-2013 06:36 PM
يا بنك البركة...الله لايخت فيك بركة...قروش دولارات ووصلتك بجورج واشنطن ذاتو تقول مافى؟..يعنى الدولاارات دى انقلبت لى ورق جنيه والله شنو؟...والغريب فى الامر ان اعلان بنك البركة مازال يجرى فى شريط قنوات التلفزيون...وان المغترب يشاهد الشريط يوميا


#845801 [فارس عبدالرحمن]
5.00/5 (2 صوت)

12-03-2013 06:04 PM
طيب الفرق شنو يا عمر بين الدولار الامريكى والريال السعودى ما كلها عملات حرة يعنى مافى اى مشكلة الا فى فرق السعر بس


#845753 [الحزن النبيل]
4.00/5 (2 صوت)

12-03-2013 05:26 PM
الاخ عمر محمد الامين للاسف انت كيشة ياخى بنوكة السودان عندما تودع فى حسابك بالجنية بخصموا منك رسوم ايــــــــــــــــــــــــــــــــداع مش دولار بالعربى انت البوديك تفلسف شنو هو اصلا مافى قانون مصرفى ولاقانون قضائى واذيك من بيت القصيد الصراف الالى بالسودان لمان تسحب بخصموا من رصيدك دة سودانى الجوة وجدانى وياسيد عمر لو انت عندك حساب بالجنية او باي عملة بالسودان مثلا فيه رصيد10مليونبخصموا منه يعنى بالبلدى فلوسك مابرجعوها ليك نفس المبلغ واسأل مجرب ولاتسأل طبيب ، عموما ربنا يعوضك ويخلف عليك


#845721 [حمدان جابر]
3.50/5 (6 صوت)

12-03-2013 04:58 PM
انا ابغض الانقاذ و اهلها و مؤيديها و من يذكرها بغير سوء. لكن يا اخى ، الخيار الثانى و هو تسليمك ريال سعودى بسعر 3،75 للدولار الامريكى هو خيار صحيح من البنك و يعادل انه سلمك دولار كامل. يا اخى ، فى السعودية عندما تصلك حواله ماليه بالدولار ، البنوط تسلمط بسعر 3.74 ريال للدولار او يزيد عنه قليلا و لكن قط لن يصل السعر 3.75 ريال . الدولار الحى تشترية منك الصرافات فى السعوية بسعر 3.73 ريال سعودى للدولار. المشكلة ان كل من عرف منكم تربيط الحروف ياتى و يكتب مقال فى الراكوبة. عدم معرفه كهذه هى من اضاع البلد.


#845676 [ود الشمالية]
4.00/5 (2 صوت)

12-03-2013 04:13 PM
يبدو انك محرض درجة عاشرة ، ومن الطابور الخامس ( طابور الاشاعة ) ورينا ليه تاني حولت بالبنك طالما عملوا فيك كده ، الاولى ان تتعظ انت قبل ان تعظ غيرك


ردود على ود الشمالية
European Union [ياسر عبدالحميد] 12-03-2013 05:01 PM
طيب ايه رايك ياود الشمالية تقوم تجرب انت بنفسك عشان تعرف الزول طابور وخامس ولا لا. جرب حول ليكي 1000 دولار من خارج السودان الى اي بنك سوداني وشوف حتستلم كيف.

ما تتهم ناس ساي...................... تحياتي


#845668 [كمال العامرى]
4.50/5 (3 صوت)

12-03-2013 04:06 PM
الكيزان سحبو الدولارات من البنوك استعدادا للهروب


#845662 [SESE]
3.50/5 (3 صوت)

12-03-2013 04:01 PM
مشكلتكم انكم لم تصدقوا حتى الآن ان البلد قد ذبحت وهي في حالة نزيف كثيف لن تتعافى منه الى الابد حتى أنها لم يعد فيها حراك بمعنى الدولة المفهوم وكله فهولة في فهولة من النظام لتمشية الامور بنظام رزق اليوم باليوم (يوم بيوم نبيع الكمبا) وانها لا محالة تتجه نحو نقطة التوقف التام ثم يأتي الانهيار في كل شئ لأن الفهلوة لا تنفع ولا تنجح في قيادة الدول وكل ذلك أتى كنتيجة محتومة لعملية بتر الجنوب بتلك الطريقة البليدة التي لم يسبق ان حدثت في احدى في الزمن الحديث......

الغريب انه لا زال هناك من يهلل ويكبر ويعتقد جازما ان السودان قد نال استقلاله الحقيقي بعدما تخلص من الجنوب واصبح سليما معافى من المرض العضال كما قال المريض الطيب مصطفى ولكن الحقائق الارض تكذب ما ذهبوا اليه وانهم سيغرقون مع السفينة الغارقة عندها سيقولون اننا كنا مغفلون وقد فات ساعة مندم......


#845654 [حسن]
3.00/5 (1 صوت)

12-03-2013 03:50 PM
انت بليد؟تستاهل!!!


#845651 [تينا]
2.00/5 (1 صوت)

12-03-2013 03:49 PM
اسمح لى أقول ليك انت الغلطان المرة الأولى مشيناها ليك مع انها أصلا غلط لكن الثانية ما بتتمشى . عموما هاردلك وتانى ما تكررها هههههههه . تحياتى


#845643 [عام سقوط الجرذان]
4.00/5 (5 صوت)

12-03-2013 03:39 PM
والله يا أخ عمر إنته مش مفروض يلدغوك مفروض يبلعوك عديل كده في حد يصدق حرامي ديل حامية عديل كدة والبقتل الشباب عشان يعيش مرفه ده لا أمان منو أبدا أنا ما عارف إنتو عايشين وين ما معقول تكون لحدي هسع بتصدق الكذابين ديل لم قروشك عليك وفي مليون طريقة إنك تحولها عالم أصلو ما بتوب من الدقون الشيطانية ديل والله ديل يسرقوا مال النبي زاتو.


#845616 [ثورة لاحت تدك عرش الطغاة]
3.50/5 (3 صوت)

12-03-2013 03:15 PM
ات ذاتك ياعمر يا اخوي الوداك ترسل قريشاتك دي بالبنك شنو
الناس ديل ( بني كوز ) خلاص دقوا الواطه وقريشاتم كملت
الودوها بره ودوها واللهطوها لهطوها
دحين اته واخوانا المغتربين الباقيين
ساهموا في اسقاط حكومة الفساد والافساد
عبر (عدم التحويل بالبنك ) الى حين سقوط النظام
وكل سنة وانتم بالف خير
وعقبال العيد الوطنى سودان نضيف بدون كيزان


ردود على ثورة لاحت تدك عرش الطغاة
European Union [سوداني بعيييييد] 12-03-2013 05:16 PM
تااااااااني وطني ,, اسمو عيد الاستقلال بالله , كلمة وطني دي الواحد بقي يسمعا بطنو تطم عدييييييييييييييل


#845608 [ود امدر]
2.00/5 (1 صوت)

12-03-2013 03:07 PM
,وانت ما دام بتحول دولارات كل شهر الريالين كتار عليك


#845605 [hmamizo]
1.00/5 (1 صوت)

12-03-2013 03:04 PM
ولسذاجتنا ما كنا نظن أننا سنلدغ ثانية وخلال شهر !! ؟؟؟؟ فعلآ ساذج .


#845594 [Tatto]
1.00/5 (1 صوت)

12-03-2013 02:56 PM
دقست مرتين .. والله سذاجه غريبه


#845586 [النقر عثمان]
1.00/5 (2 صوت)

12-03-2013 02:53 PM
منشور بنك السودان واضح جدا ،،، المغترب يحول بالدولار يستلم بالدولار ،، يحول ريال يستلم ريال ،،، السؤال لماذا لا يتوفر الدولار لدى البنوك التجارية ؟؟؟؟ !!!!! لماذا لا يقوم البنك المركزي بتوفير الدولار تحديدا ؟؟؟ كل المغتربين الشايفنهم في بلاد الغربة بحولوا لذويهم وما عندهم مشكلة في استلام العملة وعادة ما يطلبونها بالعملة المحلية لأنه لا يوجد فرق بين السعر الرسمي والسعر الموازي بل يمكن القول بعدم وجود سعر موازي البته ،،، إن تشجيع المغترب على التحويل عبر القنوات الرسمية هو أمر طيب للدولة ولكن عندما يفقد المغترب الثقة بالجهاز المصرفي تبرز المشكلة ،،، من المفترض أن يقوم بنك السودان بمراقبة توفر النقد الأجنبي لدى البنوك التجارية وسرعة صرف المبالغ المحولة من المغتربين بالعملة التي تم لهم تحويلها من بلاد إغترابهم ،،،، وإلا فإن إحجاما كبيرا سوف تشهده البنوك السودانية من جانب المغتربين ....


ردود على النقر عثمان
United States [النقر عثمان] 12-04-2013 11:09 AM
الرد على محمد شرف

المقصود بالنسبة للمغتربين غير السودانيين عندما يرسلون تحاويلهم للخارج غالبا ما يستلموها بالعملة المحلية لأن السعر الرسمي والسعر الموازي ذي بعض وبالتالي ما في سوق أسود ولا أبيض هذا هو بيت القصيد

[sahar] 12-03-2013 09:48 PM
وهل اذا اردت شراء ( عملة صعبة - دولار، ريا ل، درهم، جنيه استرليني........الخ ) من البنوك في السودان هل يمكنك ذلك ؟؟؟؟؟؟؟؟؟!!!!!!!!!!

United States [محمد شرف] 12-03-2013 05:47 PM
اسعار الدولار في السودان اليوم 7.9 جنيهات والشراء عند 7.6 جنيهات خارج البنوك , اما داخل البنوك
العملة شراء بيع
الدولار 5.6816 5.7100 كيف لا يوجد فرق ؟؟؟؟



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة