الأخبار
منوعات سودانية
كمال آفرو : مميز في لبسي عشان أغطي على فلسي
كمال آفرو : مميز في لبسي عشان أغطي على فلسي
كمال آفرو : مميز في لبسي عشان أغطي على فلسي


12-16-2013 09:06 PM

الخرطوم – نصر حامد

وزير الشؤون الإنسانية, والي دار الرياضة تعدد الألقاب تأكيد على عظمة الرياضي المطبوع كمال آفرو صاحب السخرية اللاذعة الذي حل ضيفاً عزيزاً على "اليوم التالي" عبر حوار خفيف ومتنوع تفضل مشكوراً بالإجابة على جميع تساؤلاته كما سنطالع كذلك عبر السطور التالية:

نريد أن نعرفك أكثر؟

أنا جموعي من مواليد حي البوستة أم درمان 1949 درست في مدارس الأحفاد بأم درمان ووصلت إلى الشهادة الثانوية وتربيتي كانت في حي العرب, متزوج مرتين, الأولى بنت عمي والثانية معروفة, ولدي أربعة أولاد وستة بنات.

هل تمتلك منزلين أم أن الزوجتين في منزل واحد؟

انت قايلنا والي جد جد, أنا ما عندي غير بيت واحد وكل الأولاد والبنات والزوجتين في البيت ده.

هل ترغب في الزواج من الثالثة؟

هو في بنات عشان الزول يتزوج التالتة, ياخي ديل شاركننا في الشغل والمواصلات والبنطلون والقميص تاني في شي بخلينا نعرس.

بتحب شنو في الدنيا؟

المال والجمال وأكره الفقر والقبح.

اشتغلت شنو بعد المدرسة؟

مشيت السعودية واشتغلت مترجم وجبت لي حبة قريشات وعملت محلات تجميل وحلاقة ومحلات تصوير والقصة مشت معاي وبقيت من أثرى أثرياء البلد, زمان الفنان ولاعب الكورة ورجل الأعمال لو ماجهز نفسو عند آفرو معناها أي كلام.

وين الأموال دي مشت؟

أنا ود اليوم أي قروش ألقاها حار حار بنتهي منها, يعني كل ما أجمع لي قرشين تلاتة طوالي المطار جاك زول, كل أسبوع في بلد جديد لي حدي ما قطعت كل العندي والفلسا الياها لي يوم الليلة معاي, شفتو الطيران ده عملا فيني كيف.

ندمان عشان كملت كل قروشك وبقيت مفلس؟

أبداً, والله الزمن لو رجع بي لي ورا حا اعمل نفس الشي, أنا ضقت طعم لحياتي واستمتعت بي أي لحظة فيها, وما خليت بلد في الدنيا ما سافرت ليهو, كنت الصباح بي عربية والمسا بي عربية وعشت شبابي بالطول بالعرض البخليني أندم شنو؟

سر لقب آفرو؟

كنت بسافر لي اثيوبيا طوالي زمن المال جاري في يدي ولما اجي مطار اديس الإثيوبيين بقولو "آفرو" جا وهو نوع من أنواع تسريحة الشعر ومن ديك الاسم مشى معاي.

بعد فلست عملت شنو؟

طوالي مشيت الوسط الرياضي وبقيت سيدو, زمن عندي قروش كنت بي جمبهم ما بجي وكنت شايف ناس الكورة ديل ناس ما عندهم شغلة.

لو جاتك القروض راجعا تاني؟

أول حاجة بعملها بخلي الوسط الرياضي وبمشي لي ناس المال والجمال والدنيا الجميلة.

سر لبستك المميزة؟

زمان الناس كان بتعاين لي عشان شبابي ومالي, هسة لا مال لاشباب لازم الزول يكون مميز في لبسو عشان يغطي على فلسو والناس تشوف اللبسة تقول "القبة تحتا فكي".

علاقتك بي الكورة؟

لعبت في الحي مع ناس ديم الصغير وعلي قاقرين وكنت جوكر في الملعب.

صحيفة سياسية؟

كل الصحف السياسية.

لونك السياسي؟

مؤتمر وطني.

شخصية سياسية؟

المشير عمر حسن أحمد البشير رئيس الجمهورية وبي المناسبة دي أنا علاقتي ميزة جداً مع الرئيس.

شئ في المريخ تتمناه في الهلال؟

جمال الوالي.

ماذا وجدت في الوسط الرياضي؟

أجمل وأنقى وسط وإن كثر الحديث عن سلبياته.

كلمة أخيرة؟

أشكركم كثيراً

اليوم التالي


تعليقات 19 | إهداء 0 | زيارات 3188

التعليقات
#860168 [محمد حبيب]
0.00/5 (0 صوت)

12-18-2013 08:45 AM
افرو واحد موهوم وعامل دمو خفيف

عائيش على الكورة وبتسول من مشاكل الناس المساكين

امشي للمسؤولين وأصحاب القروش فلان عنده مشكلة وبعدين القروش البتتجمع

بقسمها معاهز وزدمو تقيل وبايخ ومؤتمر وطني تف تف عليك


#860033 [عادل احمد]
0.00/5 (0 صوت)

12-17-2013 11:45 PM
شئ مؤسف احد ظرفاء امدرمان يكون مؤتمر وطني ( ياللحسرة ) كنا نود ان نتذكرك ونذكرك بأحسن من ذلك . هذه لوحدها سبة .


#859858 [kKambalawi]
5.00/5 (2 صوت)

12-17-2013 06:58 PM
دي النوعية البتنفع مع إعلام السلطة, ياهو ده سقف إعلامنا البعتمد في مواده البنشرها علي طفيليات وحسالة بشر. دقش, كمال أفرو, التجاني حاج موسي, الحلنقي, وبتاع الأمن التافه فرفور......الخ الطفيليين.


#859791 [كيس الموز التحت السرير]
5.00/5 (1 صوت)

12-17-2013 05:20 PM
كميه بتاعة ختم وزياده على ذلك منظر الشعر . حركات مراهقين ليس الا . وعامل السن له دور .


#859769 [مستغرب]
0.00/5 (0 صوت)

12-17-2013 04:46 PM
هو ناس المؤتمر الوطني بخجلو ما بقولو نحن مؤتمر وطني شايل وجه القباحة مالك يعني عاجبك العملوه في السودان والشهداء الماتو ديل كم واحد منهم جيرانك؟؟؟ ما دمّهم في رقبتك


#859606 [موسى الضو]
0.00/5 (0 صوت)

12-17-2013 01:41 PM
الطاقية مع الشعر زي العصيدة بملاح بدون صحن


#859557 [الجموعى ود ام درمان]
0.00/5 (0 صوت)

12-17-2013 01:00 PM
والله انت ما بتشبه الجموعية ولاناس ام درمان لا فى شكلك ولا فى كلامك .الظاهر عليك مفلس وداير ليك قريشات من الوالى.كان انت جموعى ما تمشى لابن الجموعية ود الجبل.


#859518 [lwlawa]
0.00/5 (0 صوت)

12-17-2013 12:28 PM
امثال ديل ياهم الجابو خبر البلد..؟؟


#859457 [كمال]
5.00/5 (1 صوت)

12-17-2013 11:45 AM
ياجماعة السودان ده انتهي خلاص يدليل هذا المسخ العامل زحمه في الفاضي ومعاها فلسفة وقعيد كلام بدون معني يغطي بيهاعلي خوائه و جهله. يعني شنو بالله حايم بالعراقي ومخنفس شعره القبيح ده وعامل نفسه شاب !!
ياخي احترم سنك وعد الي رشدك قوم بلاء يخمك يا مرتزقه ولاحس جزم الاكابر ! قال مؤتمر وطني وعلاقته مميزه بالبشير ...ياخي اختشي ...جاتكم داهية كلكم .


#859445 [عدو الاسلامويين المفسدين]
0.00/5 (0 صوت)

12-17-2013 11:32 AM
علاقتك مميزة مع الرئيس ... ؟؟؟

يا شايب يا عايب ... الاختشو ماتو


#859372 [ابو ملاذ]
0.00/5 (0 صوت)

12-17-2013 10:18 AM
هذا المعتوه لا يملك زرة مؤهل غير كسير التلج والشحدة من المسؤولين ورجال الاعمال والله قبل يومين شفتو في شارع الموردة راكب عربية كامري جديدة دا واحد كضاب وصعلوك ساي هو البلد دي الخربا شنو غير الصيع ديل عمرو كلو سفر وشراب كحول .... لكن ليكم يوم


#859361 [الكاهلية]
0.00/5 (0 صوت)

12-17-2013 10:12 AM
هههههههههههههههههههههههههههههههههههههههههه
عشنا وشفنا


#859326 [حنك]
0.00/5 (0 صوت)

12-17-2013 09:41 AM
قال لفا الدنيا كلها لكن مرة في برنامج تلفزيوني أظن في قناة أم درمان كان مستضاف مع عبد المطلب الفحل وآخرين ، وتحدث عبد المطلب الفحل عن النخلة وأخرج ( دفقيات ) من جيبه ، وأفرو قال ( الدفيق ) معناه شنو؟ دا كيف لفا الدنيا كلها وما بعرف الدفيق في سوداني ما بيعرف الدفيق ، الدفيفيق الدابه ني ، دا تلقاه ما طلع من أم درمان خالص.


ردود على حنك
[مسيكين] 12-17-2013 05:20 PM
يا حنك ياخي بالله عليك الدفيق ده شنو والله مابعرفوا . صادق معاك والله .

[الكاهلية] 12-17-2013 10:14 AM
وفي لقاء اخر كان يتكلم عن المرأة وانها سبب تخلف الرجال ولم يراعي حرمة زوجتيه
ويرقص بطريقة لا تليق بسنه


#859306 [الأفريقى]
5.00/5 (1 صوت)

12-17-2013 09:29 AM
لونك السياسي؟

مؤتمر وطني.

شخصية سياسية؟

المشير عمر حسن أحمد البشير رئيس الجمهورية وبي المناسبة دي أنا علاقتي ميزة جداً مع الرئيس.

أنت ما مفلس ماليا بس، انت مفلس اخلاقيا وواضح من اجاباتك الركيكة انك فاقد تربوى. ليك حق تكون مؤتمر وثني.


ردود على الأفريقى
United States [الغريب] 12-17-2013 11:27 AM
لونك السياسي؟

مؤتمر وطني.

شخصية سياسية؟

المشير عمر حسن أحمد البشير رئيس الجمهورية وبي المناسبة دي أنا علاقتي ميزة جداً مع الرئيس.

شئ في المريخ تتمناه في الهلال؟

جمال الوالي.

والله يا الأفريقي سبقتني على الكلام الداير أقوله على العموم شكرا


#859263 [abdelkhaleq mohammed]
5.00/5 (1 صوت)

12-17-2013 08:21 AM
من قريت انو مؤتمر وطني ما تميت باقي الحوار ,,, وطلعت من نفسي يا افرو


#859251 [كمال الشناوي]
0.00/5 (0 صوت)

12-17-2013 07:50 AM
والله يا كمال آفرو انت ما من أمدرمان والمؤتمر الوطني ياهو شبهك يا متسلق واذا كنت فعلا من العاصمة الوطنية ما بتقول هذا الكلام علاقتي مميزة جدا مع الحرامي والسفاح عمر بشير لكن لانك وسخان زيهم اللهم اجعل كيدهم في نحرهم


#859250 [الكاتـــــــــــــــــــــــــــــــــــــــــــم]
0.00/5 (0 صوت)

12-17-2013 07:35 AM
استحى ياراجل ياكبير وسيب الهبل .. عمرك فى السبعينات


#859242 [ود الرهد]
5.00/5 (1 صوت)

12-17-2013 07:07 AM
لو كنت صالون ما تحلق شعرك دا فى الاول


#859234 [؟؟؟؟]
0.00/5 (0 صوت)

12-17-2013 06:44 AM
خخخخخخخخخخخخخ قال البشششءرندمتنى على الفراية



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة