الأخبار
أخبار إقليمية
المهدي المنتظر ... والوطن الذي يحتضر !!!
المهدي المنتظر ... والوطن الذي يحتضر !!!
المهدي المنتظر ... والوطن الذي يحتضر !!!


01-07-2014 06:51 AM
أسماء الجنيد


كتب الأخ عبد الباقي الظافر خلاصة قوله ما يلي :
(وصول المهدي الصغير الى القصر الرئاسي بهذه المعادلة سيمثل هبوطا ناعما للازمة السودانية وكسر للقاعدة التي تتحدث ان الحكومات الانقلابية في السودان لا تستطيع ان تعدل مسارها الا بانتفاضة شعبية)
بربك ايها الكاتب هل هذه معادلة سليمة للأزمة السودانية ؟ أم موت جماعي للفضل من هذا الشعب الما عندو وجيع ؟؟؟
(هبوط ناعم )!! تعبير مجحف في حق كل مواطن صبر وصبر! ثم هرم وما زال صامتا وصابرا !!

إن صح توقعك هذا و نجح مخطط السيد المهدي الكبير وحليفه البشير ! وسلمت الراية للمهدي الصغير على حد قولك !! تكونوا حكمتوا جميعكم على ما تبقى من المطحونين بقنبلة هيروشيما التي قضت على الأخضر واليابس في اليبابان وما زالت اضرارها ليومنا هذا !! رغم الطفرة البائنة في العمران باليابان !

وطن مقسوم وشعب محموم! محتاج لشفاء من كل الجروح الغائرة التي تسببت فيها نفس هذه الأسماء والوجوه من الكيزان وأحزابهم الكرتونية الواهنة !! كيف تتوقع ان يقبل اي سوداني وطني عاقل بحكم البلاد من أحفاد من سلموا الراية للكيزان؟ هذا المخطط الخبيث ، القصد منه مصالح شخصية!! سوف تقود البلاد لدرك وهاوية وخراب ودمار ينافس دمار القنبلة الذرية هيروشيما بكل جدارة!

دحين كان البلاد قعدت في السهلة ، والقانون صبح هملة ! والناس لا شغل لا مشغلة!! تتوقع ان يقبل الشعب المطحون وصابر بهذا الهوان ؟ ويسمحوا أن يحكم البلد بقايا الكيزان ولاعقي احذية السلطان؟ و غلمان الأحزاب التي أكل عليها الدهر وشرب ؟؟ والله هملت يا السودان !! كان تكمل جميلك و تتم الناقصة وتقترح السيد (جعفر الخاترو ما بنكسر،وديمة في حالة سفر) يكون وزيرا للخارجية !! اصلها عايرة وادوها صوت !! ما شاء الله تبارك الله ناس راحات وما بتحملوا كتاحة البرلمان اللامة ناس حسبو وجيروات نافع المدربهم على الهوهيو في خلق الله بلا سبب!! يحمد سيدو مساعد الرئيس،، لا نقناق ولا هوراط ولا هراش,, صامي خشمو ولازم مكانو! قطعوا التذكرة بسافر لندن ! ركت طيارتو في القاهرة بتلب يزور السيدة زينب وضريح الحسين !! وإن كترها خلاااااص بديكم كلمتين مفادها .. وصلنا الوصية !! الوصية دي شن نفرها زاتو ما عارف ! ولا فاهم دخلوه القصر الجمهوري يبرطع مع الخشنين ناس نافع وحاج ساطور ليه وكيف؟ عشان كده ما تطالبوه فوق قدرته وطاقته يا شعبنا الصامد! و ما تتلوموا مع الجماعة ناس سيدي وسيدهم !! يقوموا يسخطوكم في صمة خشومكم !! وبعد الجوع والمرض ! تجيكم بلوة جديدة ! و يقوم لي كل زول فيكم ضنب ولا كوكة في نص راسو!!(( اللهم لا تمحنا ولا تبلينا ))

يا عالم الشعب مستف وجع و مورم هموم! وطفح بيه الكيل والروح وصلت الحلقوم,, عنده رأي في السيد الإمام الضيع البلد بي افكاره المشاترة ومواقفو الضبابية ، و تصريحاته الغريبة الفارضها على ابناء حزبه وعلى كل الناس ، وإصراره إقناع الجميع بمعارضة حكومة البشير من ناحية ! وإنتماؤه الباين زي هلال رمضان للآوطنى من ناحية اخرى !! أصبح الإنتماء حقيقة لا ولن يتغالط فيها اثنان,, وآخرتها جابت ليها اوسمة ونياشين ودروع من البشير للإمام المهدي الكبير !! تكريم على رؤوس الأشهاد وتصريحات ضد الإنقاذ؟؟ على ماذا كرم البشير الإمام المهدي؟ على تكسير مجاديف الثورة وغتيس حجر زلط همة شبابها ؟
ام على تخدير هذا الشعب ومسك العصا من النص لإستمرارية الكيزان لشيء في نفس المهدي !!

أين مساندة الإمام أو إبنه للشعب ؟ هل ادان قتل كلاب أمن البشير عمدا للشهداء الشباب؟ هل وقفوا مع الغبش في محنة السيول ؟ في ضحك على العقول ومهازل اكتر من كده!! حقارة آل المهدي بهذا الشعب فاتت كل الحدود! محتاج الشعب يفوق من صدمات التناقض البائن والتمثيليات الهزيلة من هؤلاء القوم الذي همه نفسه ومصالحه! شعب أدمن الجروح والألم و ملان غبن حد السقف !! لم ينسى الآمه من سياسات الصادق الذي سلم البلد للكيزان! ورغم كل الغبن الموكر, ترشح ايها الكاتب مرة واحدة عبد الرحمن الصادق رئيسا ؟!! تخجها بي ربوبها وتصب الملح على الجروح ؟ !!! ليه ؟ هل عقرت حواء السودان؟؟ ماذا قدم عبد الرحمن للبلد في مركزه الحالي مع بنوكوز؟ وجد فرصته مثل والده في هرم الدولة ، وأكد بنفسه إن مشاركته ليس طمع نحو مركز مرموق،، بل هي إتاحة فرصة لمعالجة مشكلة ملف الجنوب ؟ و أكد إنه حا يقف في جانب الشعب المظلوم! ومشاركته حكومة البشير تتيح له فرص كتيرة لمساعدة هذا الشعب إبن اللذينة ؟؟ الشعب الذي حرق روح كل الأحزاب واتباعهم وكل الكيزان وطباليهم!! حكموا الكبار وهرموا والشعب صامت! سلم الراية للأبناء وايضا الصمت سيد الموقف ! والدور الجاي على الأحفاد لتكملة مشوار حقول التجارب الفاشلة بكل المقاييس في ضهور هذا الشعب المستكين !!

إنتو يا ناس ما كفاكم! ما تعبتوا من الحكم ؟ ما فترتوا ؟ ما قنعتوا ؟؟ من زمنا خدو مشلخ مدورين في الغلابة ،، فات فات الثعلب سبعة لفات !! مافي غير آل المهدي والميرغني يحكموا البلد دي؟ بعد ما اتوكح الناس بي تجارب المهدي الكبير! جابت ليها مهدي صغير؟ وميرغني داخل القصر لكنه خارج الشبكة !!

الناس دي مأخداها مقاولة ؟ البلد دي حقتهم براهم ؟ وباقي الناس دي جايين السودان بالغلط؟
ما هي إنجازاتهم عشان تفرضوهم علينا زكاة واجبة من لحم الغلابة الحي؟ لم يعرف لهم الشعب اي خير للبلد !غير إنهم داخلين لمصلحتهم ومصلحة اسرهم وحياتهم العايشنها بالطول والعرض من دم وعرق المطحونين! حياة سادة وأباطرة و ترف وعيشة خمج ورغد على جثث واشلاء الوطن المات وشبع موت !! وباقى الغبش متوسدين الجوع وملتحفين المرض! وبرضو مصرين تطحنوا الفضل من الشعب!! الناس نفدت بجلدها بقدرة قادر من القتل العمد، والمرض والتهجير، ومن كل الكوارث الإبتلى بيها البلد !برضو مصرين تقضوا عليهم بالإقتراحات المدمرة البتصيب الفضل من الممكونين وصابرين بأمراض السكر والضغط وحرق الأعصاب ؟ !!

النجيضة : البلد ما محتاجة احزاب هرمت وشاخت ولا اولادهم من الفئة الشبابية ولا المهدية ولا الميرغنية ولا غيرها من المسميات السطحية لفئة محددة من البشر المفروضين قسرا على الشعب الصبر عليهم عشرات السنين!! البلد محتاجة لنظام ينتشلها من القاع الذي تحكرت فيه لربع قرن من الزمان!! محتاجة لنظام وقائي وعلاج ناجع يشفيها من امراضها المستأصلة ! نظام ينتشل الوطن من الغرق الذي اصبح قاب قوسين او أدنى !! وليس هناك مجالا لحقل تجارب يقضي على الروح التي تبقت في هذا الجسد الهزيل !!!

متاوقة
اخشى ان يصبح هؤلاء السادة تمومة جرتق للغلابة عصبا عنهم!!بعد ان ظهر الولاء والطاعة من الكثيرين من البسطاء يستغل إستغلالا سيئا وخير مثال شيخ الأمين الأفرنجي صاحب المزازيك والجلاليب المزركشة وعصرية !! حسبي الله ونعم الوكيل ,, يمهل ولا يهمل..
أسماء الجنيد

[email protected]


تعليقات 24 | إهداء 0 | زيارات 5691

التعليقات
#880313 [الحقاني]
0.00/5 (0 صوت)

01-08-2014 01:46 PM
اذا نزل العقيد في انتخابات ساصوت له مع اني لست متحزب لماذا؟
1- من جيل الشباب وهو غير جيل الثلاثينات والاربعينات الذي اوردنا المهالك
2-سينهي لنا الدايرة الجهنمية حكم عسكري او حكم طايفي لأنه ببساطة سيمثل الاثنين يعني اثنين في واحدااذا نجح فالحمد لله واذا فشل نبتعد نهائي عن الدائرة الجهنميه


#879652 [كنى]
5.00/5 (2 صوت)

01-07-2014 10:31 PM
اين الشتائم يا هولاء دى الحقايق مجردة من مساحيق وبدر ’ (الاستاذة صاحبه اسلوب مغاير وجديد بالنسبه لدى البعض المعتودين للتدليس والالتفاف , فى نفس الوقت وتعرف اماكن العلل والحروح ولا تنتمى للغير الوطن والشعب كما يبدو مصابه بداء الوطنيه المكافح من قبل النظام((لك التحيه يا بت الجيد وشمائل نور))


#879522 [منصور محمد صالح محمد العباسي]
3.00/5 (2 صوت)

01-07-2014 07:17 PM
لا ادري لماذا يسئ بعض الناس الي رؤساء الدول بهذه الطريقة!!!!يجب علي المحترمين من الانسان يكونو محترمين في الكلام ،،الإساءات والشتائم والكلام الفارغ عمرها ماحلت مشكلة ،،،وعمرها لم تقدم بلدا!!!!لوةافترضنا جدلا ان البشير نصب للناس المشانق في ميدان الخليفة وقتل وذبح الناس مثل الدجاج كما يفعل بشار الاسد ،،لما وجبت الإساءة ،،،السودانيين شعب محترم وعفيف اللسان هكذا كانو وما زالو ،،،اما معلقو الراكوبة فلا ادري من اي ورشة تخرجو !!!! ألسنتهم بذيئة وتعليقاتهم سيئة ،،،كسودانييين حينما نزور القاهرة كنا تستغرب وتعجب علي السنة المصريين البذيئة من كلمات لا استطيع ان اذكرها ،،،وكنا نستغرب حتي نساء المصريين كن بذيئات اللسان مثل الرجال،،مالذي أصاب هذا الشعب الذي كان يوصف بالطيبة وعفت اللسان ،،،قديما قيل ان الاختلاف في الرأي لا يفسد للود قضية ،،،الان عندنا علي مستوي الراكوبة لو أبديت رأيك وكان مخالفا لرأي القاري فسوف ينبري بكيل الشتائم لك ويسمعك كلاما يندي له الجبين !!!!!!!!!!اقله يا اهبل ،ياجاهل ،،يا عميل ياكلب،،،، لما ذا انحدر الناس في بلادي لمثل هذا المستوي ؟؟؟؟؟لماذا ما الذي أصاب شعب السودان ؟؟؟؟؟اصبح الناس غير موضوعيون في نقاشهم ،،الكل يكيل الشتائم يمنة ويسري ،،،،هل اصبح شعب السودان كله خريج الورش ؟؟؟هل اصبحو جميعهم ميكانيكية ؟؟مع اعتذارنا للأخوة الحدادين والسمكرجية،،ختاما ليس المؤمن بالطعان ولا باللعان ولا بالفاحش البذيء،،،كانت هذه صفات كل الشعب السوداني ،،حتي الشيوعي السوداني ،،،،،،،،فمالذي جري؟؟؟؟؟؟؟؟؟؟؟؟؟؟؟؟؟؟؟؟؟؟


ردود على منصور محمد صالح محمد العباسي
United States [one] 01-07-2014 10:31 PM
هذا أقل واجِب نقدمه للكيزان.انا عارف هُم إستاهلو أكثر من كِده,لكن دى قُدرتنا..... نعمل شنو؟نجيب ليهم إساءات من وين تانى؟.إلا نجيب واحِد منهم يرد عليهم.

United States [اوبرا] 01-07-2014 09:49 PM
،،حتي الشيوعي السوداني ؟؟؟؟ عيب لي الشيوعي السوداني ؟؟؟ يظهر إنك خريج الورش ؟؟؟

United States [بومدين] 01-07-2014 09:42 PM
كـلام عــجـيب .. مـن شـخـص قــادم مـن الـمـريـخ !!!!.
ثـانيا .. أثمن عــالـيا كــل حــرف قـالـته الاسـتاذه أسـمـاء ( ســلـم كيبورديهـا ) ..
أولا .. مـن أين تـعـلـمـنا هـذه الـثقافـه ، أو قـل الـسـخـافـه ؟؟؟؟.
ســـبـحـان الله وبحمــده .. نشـهـد بالله أننا كـنا أكـثر شــعـب خـلـوق ، وشـهـم ، ومـهـذب !!.
نشـهـد بالله أننا أكـثر شــعـب ( مـتمـيز ) عـلي كـوكـب الأرض ، والـكـواكـب ، والـمجـرات الـمجـاورة !!.
حـينمـا يـعـض الإنسـان كـلـب مـسـعـور .. يصـاب الإنســان بالـسـعـر ..
ولـكـن لاينبـغـي الـقـول إن هـــذا الإنســان كـلـب ضـال مسـعـور ؟؟؟؟.
بل ينبـغـي أن يـقـال للـكـلـب .. هـذا كـلـب إبن كـلـب سـليل كـلاب ضـالـه موبوءه مسـعـورة ، عــضــت هــذا الإنسـان الـخـلـوق ؟؟.
مـانـقـولـه لـيســت ســوي ( بـعـض ) بضـاعـتهـم ردت إلـيهـم .. وقــع لـيك كــلامـي ؟؟؟.
ثـم ثالثا ..
شــنو حـكاية ( لو افترضنا جدلا ان البشير نصب للناس المشانق في ميدان الخليفة وقتل وذبح الناس مثل الدجاج كما يفعل بشار الاسد ،،لما وجبت الإساءة ) ؟؟؟؟.
مـاهــذا الـهـراء والـخـلـط .. الـبشــير بتاعــك ده .. ســفـاح دولـي ، مـطلوب دولـي فـي جـرائم مـقـززه ، مـقـرفـه تشــيب مـن هـولـهـا الـولـدان .. جـرائم إباده جـمـاعـيه شـامـلـه .. جـرائم ضـدالإنسـانية .. جـرائم تـطـهـير عـرقـي .. فـظـائـع حـروبات ، تمييز عـنصـري ) قـال لـو إفترضــنا .. آل ؟؟؟.
ده كـلـو كــوم .. ولـغـته ، ومـفـرداته كــوم قـائم بذاتو ؟؟؟؟.
تحــت جـزمـتي .. شـحـاتين .. ألـحســو كـوعـكـم .. الـزارعـنا الـيقـلـعـنا .. وجبناهـا بســلاحـنا .. والأغـرب والأعـجب ( الـدغمسـه ) ؟؟؟.
حـيث أكــد عـلمـاء اللـغـات الـحيه ، والـمنقرضــه أنـهـا لاعـلاقـه ( لـدغمســه ) بأي لـغـه .. ولـكـنهـم أجمـعـوا أن وصـفـهـا أقـرب مـا يكـون لـخـلـيط مـن ( هــرار + طـراش ) . شــفـت كـيف ؟؟؟!!!.
رمـتني بـدائـهـا .. وانـســلـت ؟؟؟.


#879455 [زول وطني غيور]
0.00/5 (0 صوت)

01-07-2014 05:40 PM
كيف يتم تغيير هذا النظام بدون محاكمات وبدون رد إعتبار لهذا الشعب المكافح الذي عاني كثيرا من ويلات هذا النظام؟؟ دي تبقي إسمها لعبة كرآسي فقط!! شيل أحمد وجيب حاج أحمد!!


ردود على زول وطني غيور
[ابن كوش] 01-07-2014 07:46 PM
نعم يجب القصاص ورد المنهوب ومصادوت كل البنايات واجراء محاكمات ميدانية. ما في اي عفو ولا يحزنون. القصاص للغلابا التي سرقت حليب اطفالهم وتنظيف البلد من الاجانب وكذلك اعادة الخدمة الوطنية ورمي الطائفية الي مزبلة التاريخ وبذلك يتعافي الوطن.


#879453 [منصور محمد صالح محمد العباسي]
5.00/5 (1 صوت)

01-07-2014 05:38 PM
*


#879351 [صديق]
0.00/5 (0 صوت)

01-07-2014 03:41 PM
كلام مليء بالشتايم و الالفاظ السوقية.حسب اعتقادي الرجل رضيتم ام ابيتم سيصبح رئيسا لانو الكيزان عاوزين يفكوا رقبتم من حبل الجنائية و الثارات و يعتذروا عن انقلابهم بتسليم السلطة لصاحبها ممثلا في العقيد الذيحارب النظام في الشرق و الرجل كما يقال قوي و لديه خبرة في العمل العسكري و السياسي.


ردود على صديق
European Union [جنرال زمان] 01-07-2014 04:51 PM
يا أخي دا كلام في الصميم وبعدين هو النوعية دي من البشر ينفع معاها كلام غير دا ويا ريت بت الجنيد لو كان استخدمت ألفاظ سوقية فعلا تليق بهم!! بعدين تعال شنو ود المهدي اللي عنده خبرة سياسية وعسكرية! يا سلام جابها من وين من أبوه اللي ضيع السودان ولا العسكرية من خبرته في حفر مخنادقها بس ما تقول لي الخبرة العسكرية جابها من تهتدون وتشردون وتسرقون بتاعة أبوه دي؟ بعدين هو زولك دا ما دام قوي ما يمشي يشوف ليه واحدة يتقوزها وكدا ولا دي قوة نمر أجيب؟؟


#879335 [بدرالدين العامرى]
0.00/5 (0 صوت)

01-07-2014 03:31 PM
هؤلاء هم ابناء مصاصى دماء الشعب السودانى الم تسمعى بدائرة المهدى ودائرة المرغنى لحمهم ولحم ابائهم من عرق وجهد الشعب السودانى


#879329 [مدحت عروة]
0.00/5 (0 صوت)

01-07-2014 03:25 PM
يا بت الجنيد الحاصل فى السودان ده كله بسبب غياب الديمقراطية وحكم القانون وفى الدول الديمقراطية المحترمة والسودان ما منها الشعب هو سيد الناس ورئيس الحكومة بيرجف منه ويطلب رضاه ومافى كبير على الشعب وده كله بسبب سيادة القانون والدستور!!!
يعنى عسكرى ولا سيد ولا ماعارف شنو ما هم الا خدم وعمال عند الشعب وطبعا الشعب بيعطيهم امتيازات ومكانة معينة ليس لانهم احسن منه بل لانهم بيمثلوا سلطته وعزته وكرامته وممكن يشيلهم بره الحكم اذا ما شعر بانهم غير صالحين لخدمته!!!
يعنى باختصار فى الدول المحترمة والنضيفة الشعب هو السيد والحكام هم الخدم وينالوا امتيازات ومكانة جراء ذلك!!!!!!!
فى ديمقراطية اى دولة القانون نكون بلد محترم مافى ديمقراطية ودولة القانون نكون بلد جزمة زى ما حاصل الآن!!!!!!!!!!


#879283 [ود البلد]
0.00/5 (0 صوت)

01-07-2014 02:37 PM
زمان قال لهم المرحوم الشريف الهندى
((انكم تتلاعبون على الشعب حتى يعدمكم نفاخ النار )))
والمره دي شكلكم لم تستوعبوا ان هناك اجيال تنظر اليكم
عملاء و اغبياء اكثر من مقدسين


#879266 [عصام حاكم]
0.00/5 (0 صوت)

01-07-2014 02:18 PM
اذا ده حصل الصادف و ابنه امام مقصلة التاريخ ذي الكيزان


#879265 [معتصم الامين]
0.00/5 (0 صوت)

01-07-2014 02:17 PM
فى عملية جرد بسيطة لعمر الميرغنى وُجد أن الرجل العجوز لم يعش بالسودان إلا ما يساوى 10% فقط من عمره المديد وكذا أبناؤه الذين تراوحت نسب عيشهم بين الواحد والثلاثة فى المائة فقط بما يغنى أنهم يعيشون ببلدهم فقط فى حالة كانوا فى سدة الحكم وحتى هذه الاقامة لا تكون دائمة حيث اجازات آخر الاسبوع وآخر الشهر وآخر السنة بمضامير سباق الخيل فى عاصمة الضباب أو فى بملاهى عاصمة النور .
كل المراغنة والمهدية ومنذ ان ذاع صيتهم وعرفهم الناس قبل الاستقلال لم يحملوا طوريه ولم يدقوا حجر دقش وعاشوا على عرق ودماء البسطاء مستغلين الدين وجهل الناس ، وجهل الناس هذه كانت أهم شيء بالنسبة لهم فكانوا يأمرون أتباعهم ويشددون عليهم بعدم ارسال أبنائهم الى المدارس الحكومية حتى لايعودوا اليهم بالضلال وافكار الشرك والحرص على تعليمهم بالخلاوى والمسائد التى اقاموها ممالك يبتزون منها الناس بينما ابناؤهم تلقوا التعليم فى افضل جامعات العالم بعرق البسطاء الذين ارتضوا ان يقاسموا السيد والامام ارضهم ورزقهم ليس هذا فقط بل ان الامام والسيد لم يكن عليه ان يفلح الارض التى مُنحت له لمجرد انه سار عليها برجليه الطاهرتين ، لا ليس عليه الا ان يعين وكيلاً له يصله الحصول حتى عنده ليقوم الوكيل ببيعه وتسليم النقود للسيد !!!!!!!!!!!!
لا استغرب ابداً ان يخرج تابع مثل عبد الباقى الظافر ليبشرنا بمهدى آخر زمان جديد فما هو إلا وكيل بنسخة عصرية ، لا أستغرب ذلك فما زال السادة يقتاتون من عرقنا ويمصُّون دماءنا وما زال الميرغنى يعيش بالخارج ولا يشرفنا بطلعته البهية إلا لتعبئة جيوبه من خزينة الدولة التى استولى عليها لص كافورى بتواطؤ الأسياد أنفسهم .
لك الله يا وطن لكأنه لا يُوجد فيك غير ميرغنية ومُدعى مهدية وترابية وخوازيق تطلع من المدفع .
إلى متى نظلّ قابعين فى هذا المربع الاول والعالم من حولنا يتقدم ونحن نرتعش خوفاً من أن يعوِج لينا سيدى خشومنا أو يحوّل لينا امامى نخرينا فى جبهاتنا ؟!
إلى متى ؟!!!!!!!!!!!!!!!!


#879111 [ثوج]
0.00/5 (0 صوت)

01-07-2014 11:24 AM
امراء المهدية ثلاثة فقط .. بالاضافة إلى الامير عبد الرحمن نقد الله تجازواً لانه يستأهل الله قيل عثرته وأرفعه يا رب يا كريم واشفه شفاءً لا يغادر سقماً وهو الامير الرابع في المهدية .. أما ثانياً لا في أمام ولا في أمير ، أنا استغرب تسمو عبد الرحمن الصادق أمير زول لا درس في السودان ولا تعسمر في السودان ، بس مشى وفي غفلة من الزمن عمل ليه 200 نفر في ارتريا ولم يكن لحزب اللمة دور في المعارضة والان هذه هي النتجية ، كلهم يحبون السلطة يختلفون والعين على السلطة يأتلفون والعين على السلطة المهدي نفسه ما حمن إلا 3 أيام فقط بعد تحيرير الخرطوم ..


#879028 [محموم جدا]
0.00/5 (0 صوت)

01-07-2014 10:19 AM
كل الناس الحكمت السودان من الاستقلال الى الانقاذفي الثمانية و خمسين سنة الماضية هم إما عسكريين تربوا في بيوت الاحزاب الطائفية أو الاحزاب الطائفية عن طريق الكوادر الصفوية التي استثمرت فيها الاحزاب و حتى الاسلاميين هم خرجوا من بيت بنت الصديق المهدي يعني لم يبتعدوا كثيرا من الطائفية و النتيجة هي ما نعايشه اليوم من تدني في كل مقومات الدولة ليحكم عليها بأنها دولة فاشلة بالرغم من كل الموارد البشرية و الموارد الطبيعية التي تتمتع بهاو هذه النتيجة ليست مستخلص من أدبيات السياسة السودانية هي من تقارير عالمية مبنية على بيانات و رصد دقيق و تحليل لهذه النتائج real time mitigation فلا داعي للمغالطة في هذه الحقيقة المجردة و هي أن الدولة السودانية فاشلة بمعنى الكلمة و للإنقاذ القدح المعلى في هذا الفشل لأنه بالرغم من الفشل في مسارات أنظمة الحكم السابقة للإنقاذ كانت هناك بقية من مكونات الدولة التي يمكن البناء عليها لكن ضاعت كل الاحلام وما تبقى هي مرحلة هروب الفكر الشاب من الدولة الى كل ارصفة المدن العالمية بحق هي مرحلة ال BRAIN DRAINAGE و بالتالي ضاع أهم مكونات الدولة و هو المورد البشري و من تبقى فهو مغلوب على أمره أو هو صاحب مصلحة في البقاء داخل هذا المستنقع قادر على التنفس في الخبوب و تحت الوحل و الطين و أما الغلابة فيتكئون على الصبر و عيشة اليوم باليوم أو عدمها (يوما كربتيت يوما عشانا ربيت و يوما نأكل التابا و عليها نبيت) هذا السودان يحتاج لثورة حقيقة تغسل كل المفاهيم و الفكر القديم لتبني و تؤسس لدولة جديدة ..


#878999 [ابومروه]
2.00/5 (1 صوت)

01-07-2014 09:54 AM
يكون عبدالرحمن صدق انو بكون رئيس السودان طبعا الابن سر ابيه فعمك الصادق كايس للحكم حتي القبر وعبدالباقي الظافر كتب حلم لحكم عبدالرحمن ياناس ما كفانا بلاوي


#878985 [برعي]
0.00/5 (0 صوت)

01-07-2014 09:47 AM
والله هملت يا السودان
اردد معك وقلبي يتفطر الما


#878973 [المشروع]
0.00/5 (0 صوت)

01-07-2014 09:35 AM
الاخ عبد الباقي الظافر معجب فقط بشخصية عبدالرحمن المهدي وسوف يكرر هذا الكلام في حديثه ويكرره ويكرره خلاص الفكرة دخلت في نفسه ورشحت منه للخارج وتاني خلاص سوف يدافع عنها ولن يري فيه كل ما قلتيه ودي مشكلتنا ومشكلةالكتاب الواحد يعجب بالشخصية يبدا في الدفاع عنها مثل ما ان حسين خوجلي معجب ببكري حسن صالح لاسباب وحاجة في نفس يعقوب .. خلاص بعد دا حسين خوجلي سوف يذكر بكري ويرى فيه المخلص للسودان مع العلم ان بكري ما عنده ما يقدمه وقد ركنته الحكومة 24 سنة وهو ساكت قانع وراضي القليل.
وعبدالرحمن المهدي بالإضافة الى ما قلتيه من الآن لا يصلح لان فيه انتهازية واختلاف مع حزبه وابوه وهم اصحاب الفضل عليه وتعاون وساند مع من اغتصب الحكم من ابوه مع العلم ان المنصب الذي هو فيه كان بسبب ابوه ويرجع الفضل فيه لأبوه.. واذا كان هذا الانسان ينكر مثل هذه الاشياء فهو لما سواها انكر ولا يرجى خيره للسودان ولا للمساكين..


#878967 [فارس عبدالرحمن]
5.00/5 (1 صوت)

01-07-2014 09:32 AM
ماهو الفرق بين الامير عبدالرحمن المهدى وبين الذين حكموا السودان سابقا اعتقد انه سيكون افضلهم يا بت الجنيد


#878951 [ربش]
5.00/5 (1 صوت)

01-07-2014 09:15 AM
شكيناهم علي الله شكيتن لاتتباطا و لا تقع واطا . قولو آمييييييييين


#878945 [الخمجان]
5.00/5 (1 صوت)

01-07-2014 09:12 AM
بارك الله فيك يا بت الجنيد يا بت الرجال .....


#878934 [احمد البشير]
0.00/5 (0 صوت)

01-07-2014 09:03 AM
بتحلم انت وعبدالرحمن المهدي وماسمع بي ود المهدي حارب فى السودان ايام حكم الصادق رفص زهاب ابنو ومشي الشجاع الشهيد ود شمبات مروان مستحل االكﻻم ده


#878913 [شاويش]
0.00/5 (0 صوت)

01-07-2014 08:40 AM
كلامك سمح بس محتاجة تكوني اكثر دقة لانه التعميم بظلم ناس شملتهم شتايمك يا استاذة



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة