الأخبار
أخبار إقليمية
دفع الله حسب الرسول يفتي بعدم جواز تبادل القمصان الرياضية بين لاعبي المريخ وبايرن ميونخ
دفع الله حسب الرسول يفتي بعدم جواز تبادل القمصان الرياضية بين لاعبي المريخ وبايرن ميونخ
دفع الله حسب الرسول يفتي بعدم جواز تبادل  القمصان الرياضية بين لاعبي المريخ وبايرن ميونخ


(دعواتكن معانا يا نسوان)..!!!
01-10-2014 12:37 PM
صلاح الدين عووضة

* من منطلق تشجيع (اللعبة الحلوة) نشجع خطوة شيخ دفع الله في ترك فتاوى (النسوان)- «شوية»- والخوض في فتاوى (كروية)..
* فالخطوة هذه تستحق منا تشجيعاً ذا (تصفيق!!) أشد من (صفقة) برلمان دفع الله عند إجازة قرارات اقتصادية ذات (رهق) إقتصادي على الناس..
* أو تستحق- على الأقل- (رضا) مثل رضا برلمان شيخنا هذا إزاء إجازة (القروض الربوية!!)..
* و(خدوا بالكم) من حكاية القروض الربوية هذه لأنها بمثابة (البطاقة الحمراء!!) التي يمكن أن يُطرد بها شيخ دفع الله من ملاعب كرة القدم لـ((يرتد!!) إلى ملاعب النساء التي (يجيد اللعب) فيها..
* فقد افتى- هذه المرة- شيخنا الذي اشتهر (على حساب الحريم!!) بحرمة تبادل القمصان الرياضية بين لاعبي المريخ وبايرن ميونخ في اللقاء الذي يفترض أنه جرى بين الناديين أمس..
* قال- لا فُضَّ فوه- أن هذا لا يجوز شرعاً بما أن (فنائل) لاعبي النادي الألماني عليها إعلانات ترويجية خاصة بـ(الكفار!!)..
* ولأننا حريصون على بقاء الشيخ (المثير للجدل) في ملاعب الكرة هذه- كي لا يحن إلى «قديمه»- فإننا نذكِّره بكلمة لنا قبل اشهر كان برلمانه منهمكاً خلالها في إجازة (قرض ربوي!!)..
* نذكره إياها- فقط- من باب إشعاره بـ(الحياء!!) علَّه يجد (مخارجة كلامية) تعينه على صد (هجمات مرتدة) قد تُشنُّ ضده من منطلقات (الشريعة) ذاتها التي ينطلق منها..
* ففي كلمتنا تلك عقدنا مقارنة بين برلمان- فيه أمثال شيخ دفع الله- يجيز قرضاً ربوياً، وبين بعض لاعبي نادي نيوكاسل المسلمين الذين رفضوا إرتداء (فنلات) عليها شعارات شركة (ربوية!!)..
* فلاعبو النادي الإنجليزي هذا- يا مولانا- فضلوا العقوبة على الترويج للربا في الوقت الذي (بصمتم!!) فيه أنتم على مشروع قرض ربوي لأن الحكومة كانت (عايزة كده)..
* والآن (تُحرِّمون) على لاعبي المريخ تبادل القمصان مع (الكفار) تماماً مثلما كان الخوارج يسفكون (دماء البشر) ثم (يُحرِّمون) الصلاة بثياب عليها (دم البعوض!!)..
* قل لنا (أي حاجة) يا شيخنا (مخارجة) لنفسك من الورطة هذه لأننا نريدك (لاعباً أساسياً) في ملاعبنا الخاصة بكرة القدم..
* فوجودك فيها- الملاعب هذه- سوف يعطيها (نكهة) يحبها الرجال، ولا تكرهها النساء..
* قل- مثلاً- انك تعترض على إجازة القرض الربوي بأثر رجعي ولا يهمك إن (غضبت!!) الحكومة أم رضيت..
* أو قل إن البرلمان الذي (نُجبَرون!!) على أن (تبصموا) داخله- ولو كان على شيء ضد الشرع- (ده طرفك انت شخصياً منو) متفرغاً من الآن فصاعداً لـ(الكورة وبس)..
* أو قل إنك لم تدل بمثل الفتوى هذه أبداً والصحافة (كضَّابة!!)..
*قل أي حاجة يا شيخنا ونحن جاهزون لـ(التصفيق) إن كانت لعبة (المخارجة!!) حلوة..
* ويا نساء السودان: (دعواتكن معانا!!!!!!!).

آخرلحظة
[email protected]


تعليقات 34 | إهداء 0 | زيارات 14199

التعليقات
#883216 [jafal]
0.00/5 (0 صوت)

01-11-2014 09:40 PM
ياشيخنا شغل الترزية ده لسه ما تركتو على المقاس بتفصل الله يعين عيالك


#883041 [ابو القنفد]
0.00/5 (0 صوت)

01-11-2014 04:17 PM
يا اخوانا حسيو نسوان قصدة لا يجوز تبادل القمصان بين اللاعبين الرجال واللاعبات الحريم لانو ديل بنات يافعات ويمكن يحصل حمل من القنابل دى!!


#882762 [watt]
0.00/5 (0 صوت)

01-11-2014 11:12 AM
ربنا ينور بصيرتو دبل الهجولة البيعمل فيها دي يشوف سجم الحكومة دي والبتعمل فيهو


#882746 [عود عُشر]
5.00/5 (4 صوت)

01-11-2014 10:57 AM
الزول دا جنه وحالتو ما بتمني الآن خلي الجعوز العفنه والجعوز النظيفه والحلوه !! وقابل الكوره ؟؟
أنا قبل كده كتبت ليك يا شيخنا عن إجازة القروض الربويه في البرلمان وهي حرب علي الله ما لقيت منك رد ؟ وسألتك عن الغلف الما مطهارت العفنات إنت شفتوهم وين ومتين وما رديت علي ؟؟ وبالمناسبه الملابس الحلوه التي تلبسها إنت وهيئة علماء السودان مصنوعه في بلاد الكفر والعربات البتركبوها مصنوعه في بلاد الكفر والدواء مصنوع في بلاد الكفر !!!! يا أخي ما تخلينا من أمورك الفارغه دي وجاي تتكلم في لعب البنات للكوره حرام وإنتوا وديتوا البنات للدفاع الشعبي ويختلطن مع الصبيان في الخلا ويدربن علي حمل السلاح ليه دا حلال يا أخي إنتوا حللتوا الربا وسترتوا الزاني بفقه الستره وحميتوا الحرامي بفقه التمكين والربا والمرابين بفقه الضروره . في السودان كل عارف دينو قبل ما تجوا إنتوا علماء ضلال وتنابلة سلطان .


#882574 [saifeldin osman nasr]
5.00/5 (4 صوت)

01-11-2014 04:21 AM
هذه ليست فتوى بل فسوه وارجو ان لا تنشروا لهذا ولامثاله لانهم نكِره


#882562 [المر]
0.00/5 (0 صوت)

01-11-2014 03:15 AM
عمكم ده شايل كراع طفل اعملو حسابكم


ردود على المر
United States [ابو الليل] 01-12-2014 11:58 AM
انا كنت قايلك مرلكن انت طلعت ......

European Union [abumohamed] 01-11-2014 11:47 AM
اها دي عرفتها كيف ؟ وحالتك انت المر


#882501 [عبدالعزيز عبدالله]
0.00/5 (0 صوت)

01-11-2014 12:33 AM
أؤيد الشيخ دفع الله حسب الرسول في فتاويه المثيرة ضد كرة القدم النسائية فهي سوف تتسبب في تشتيت جهد النساء بين ملاعبهن و ملاعب الرجال الذين يحتاجون إليهن في المدرجات لمؤازرة منتخبنا القومي للرجال كي يفوز بكأس إفريقيا للسيدات! خير من مثل بأمدرمان بعد سيول 88 !


#882494 [ود النقرة]
1.75/5 (3 صوت)

01-11-2014 12:19 AM
التحية لشيخنا الجليل دفع الله حفظه الله تعالى .. و اقول للمعلقين الهمج ديل دفع الله افقه بأمور الدين منكم .. التطاول على العلماء هي من علامات الساعه .. يخون فيها الامين و يكذب فيها الصادق لك الله يا الاسلام . حسبي الله و نعم الوكيل .


ردود على ود النقرة
European Union [الحقيقة اولا] 01-12-2014 09:46 AM
لافض فوك ياعود عشر ديل علماء السلطان وعلماء الحيض والنفاس

[saleh] 01-12-2014 03:00 AM
عالم مين يا عم ، هذا الرجل بذئ وفاخش وطعّان ولعّان وسيادتك عاوز تعملو عالم رغم عن انف الرسول صلي الله عليه وسلم ، هذا الرجل صدقني لا يعرف عن العلم الديني شيئا ومل حديث تجادل فيهعبر الاعلام منذ موضوع الواقي الي آخر موضوع افتي فيه لم يورد سند واحد بل ظل يحلل ويحرم بلسانه كل ما لا بعجبه ويتماشى مع رأيه ، العالم يا استاذ من صفاته رحابة الصدر وعفة اللسان والترفع عن الصغائر وصديقك ده ضيق الصدر والافق ويتمرغ في الصغائر والبذائه تسكن اوداجه ، مع جهله بالفقه والتفقه ، هل هناك شخص عاقل ناهيك عن عالم يقول بان اي رجل لا يتزوج ثلاثه نساء ناقص الرجوله ؟ والله اذا كان الاسلام يعتمد علي مثل هذه العقول فعلي الدنيا السلام والحمد لله الذي جعل الهدايه بيده وحده لم يشرك فيها مثل شيخك هذا .

[عود عُشر] 01-11-2014 11:58 AM
يا مغفل إنت وين كنت لما أجازوا القروض الربويه في البرلمان وشيخك كان حاضر وعضو فعال في البرلمان؟ يا حمار إنت وشيخك كنتم وين لما ناس الانقاذ والكلاب الزيك سرقوا البلد بإسم الدين و فقه التمكين ؟؟؟ قال تطاول علي العلماء ؟؟ أي علماء هؤلاء اللذين يرون الباطل أمام أعينهم ويصمتون والساكت عن الحق شيطان أخرس !!! لماذا شيخك لم يتكلم عن فساد الانقاذ والانقاذيين لأنهم أطعموه من سرقاتهم .وهل يجرأ شيخك أن يتحدث عن فساد البشير وإخوانه وزوجتيه هل يستطيع شيخك أن يتحدث عن فساد نافع وإبنه محمد وبكري وإبنه هيثم وعن عبدالرحيم الأهبل وعمولات السلاح من أوكرانيا هل يستطيع شيخك أن يتحدث عن سرقات أبوالجاز وإبنيه وحادثة مطار دبي شاهدة علي السرقه ؟ هل يستطيع شيخك أن يتحدث عن فساد المتعافي وصلاح قوش والقائمة طويله من السراق . ياأخي اتركنا من علماء السلاطين وهيئة علماء السودان هي أكبر مرتشي في السودان باعوا دينهم بدنياهم وإستطاعت الانقاذ أن تدجنهم وتروضهم لصالحها ووصل بهم العهر نعم العهر أن أجازوا القروض الربويه ويأتي واحد أطرش مثلك ويدعي أننا نتطاول علي العلماء !! هؤلاء سفهاء وليسوا علماء !!!!

European Union [العريبية] 01-11-2014 07:21 AM
عليك الله خلى شيخك ده يفتى لينا فى الجمع بين الحسنيين الضرائب والزكاة اى تقنين اكل اموال المسلمين بالباطل

قال عالم قال

وهل يستوى الذين يعلمون والذين لا يعلمون

ام هل يستوى الذين يلغفون والذين لا يلغفون


#882465 [هيسم العجب]
5.00/5 (1 صوت)

01-10-2014 11:27 PM
طيب تبادل القبلات كيف؟


#882457 [الكاميرا الخفية]
5.00/5 (1 صوت)

01-10-2014 11:05 PM
يا ناس الراكوبة انتو جايبين صورة البت العسل دى مع هيثم عايزين فتوى من دفع الله كندوم ولا شنو .


#882430 [الدبيب]
4.00/5 (1 صوت)

01-10-2014 10:22 PM
عمكم ده والله خارج الشبكة والظاهر طايرة لى عرسة بس البرلمان افلس ماديا ومعنوين


#882389 [abdallah]
0.00/5 (0 صوت)

01-10-2014 09:17 PM
ده كل القدرت عليهو ياابو عفنه؟ ربنا ينتقم منكم زي ما دمرتو البلد وأخرتونا سنين طويله ماتحركنا شبر من محلنا


#882380 [من اين لك هذا؟]
1.00/5 (1 صوت)

01-10-2014 08:53 PM
I dont understand what's wrong with guy'Hasabo Neswan'


#882365 [Saleh H saleh]
0.00/5 (0 صوت)

01-10-2014 08:23 PM
ما قول الشيخ في الاف الشباب الذين يلبسون فنايل مشاهير لاعبي العالم باسمائهم وحتى هنالك فنايل لغير لاعبى الكره بصور وكاتابات لا يعرف من يلبسها ما كتب فيها .. اليس من الاولى ان فتوته كانت تكون في ذلك قبل تبادل الفنايل مع لاعبى البايرن..


#882298 [قنقر]
5.00/5 (1 صوت)

01-10-2014 06:23 PM
أكيد يا شيخ فى يوم من الايام مرضت و كذلك بعض افراد اسرتك , ألم تستعمل أدوية صنعها الكفار ؟ معظم الاشياء التى تستعملها صنعها كفار إلا إذا كنت بتحب الصناعة المصرية و كما تعلم بأنها مغشوشة .


#882258 [يا جماعة حيلكم شويه]
5.00/5 (2 صوت)

01-10-2014 05:16 PM
يا جماعة لاعبي البايرن والله ما اعطوا لاعبي المريخ فنائلم بس اعطوه لي السعودي وغاندي .الجماعة ما شغالين بينا .بس والله الراجل دة ماعندوا موضوع واقوليكم حاجة الكاتب وانحن برضنا ما عندنا موضوع قوموا لفوا الصينية يا اجبن شعب في الكون


#882238 [حلفاوي السوداني]
5.00/5 (2 صوت)

01-10-2014 04:29 PM
دائما ما ادعو لامثال الشيخ دفع الله الهداية والشفاء .... فمدرس اللغة العربية الذي دخل مجال الافتاء من دولة نيجيريا التي كان مبعوثا لها يعتبر ( حالة ) مثالية تستحق الدراسة والتشخيص من قبل اطباء واخصائي الامراض النفسية والعقلية وطلاب كليات الطب ......
لم اسمع بالرجل الا في السنتين الاخيرتين
فهل للشيخ فتاوى سابقة بشان الاعلانات ( الكافرة ) لسلع (كفار ) ؟؟
اكيد الشيخ لا يمتطي سيارات المجلس الوطني الفارهة لانها من صنع ( الكفار) ....
ولا يستخدم الموبايل لا نه ( صنيعة كافرة ) وغيرها من صنائع الكفرة والكفار ......

شفاك الله يا شيخنا وهداك فامثالك هم من جعلونا في هذا الدرك السحيق من التخلف ...


#882199 [رابض]
5.00/5 (1 صوت)

01-10-2014 03:36 PM
هذا الرجل اصبح من قبيل ضووا بالشمعة شوفونا


#882182 [Abushihab]
4.00/5 (1 صوت)

01-10-2014 03:10 PM
والله يا اخوانا الرال لذيذ كلما اقراء الفتاوي بتاعته اقعد اضحك وانسي هموم الغربة شكرا ابوالدفاع انت زي وزير الدفاع ضحكتونا والله شكرا


#882176 [baddee]
5.00/5 (1 صوت)

01-10-2014 02:59 PM
يا أهل الخير الراجل ده مسكين . سيبوه فى حاله . ماعنده شغله يشتغله وماعنده حاجه يعمله خلوه يفتى شويه امكن الموضوع ده يريحه ويطلعه من الحالة النفسيه الصعبة العايشه ديه.


#882175 [المهند]
5.00/5 (2 صوت)

01-10-2014 02:59 PM
ياشيخنا اه رايك شنو في العمة والجلابية قماشمهم من سويسرا بلد الكفار


#882168 [طوفان]
0.00/5 (0 صوت)

01-10-2014 02:38 PM
الشيخ دنب كديس يبدى اراءه دون وعى


#882167 [ود البلد]
5.00/5 (1 صوت)

01-10-2014 02:37 PM
فلتو الكتر غلتو


#882166 [فارس عبدالرحمن]
5.00/5 (1 صوت)

01-10-2014 02:36 PM
اذا طلع من البرلمان حيصرف على حريمو التلاته من وين عشان كدا هذا المنافق لابد ان يبصم ويصفق وحبه الشديد للظهور فى الاعلام هو القعد يخليهو يفتى مثل هذه الفتاوى دا راجل فارغ ومخو فاضى


ردود على فارس عبدالرحمن
European Union [الصلاحابي] 01-10-2014 03:22 PM
هذه معلومة انا ما عارفها ان الشيخ له ثلاث نسوان
الموضوع ما واضح الشيخ غالبا يواجه صعوبة في ارضائهن
من الناحة الفيزيولوجية وبالتالي يشعر بالعجز ثم الشك
واصبح عدو للمرأة


#882159 [ممكون وصابر]
5.00/5 (1 صوت)

01-10-2014 02:27 PM
ياخي ده عايز يشتهر وعايز يعمل نجم ويتلمع ساي ,, أسئلة للشيخ لعله يجد فيها ما يشغله عن الكرة وعن النساء 1- هل يجوز إبادة أهلنا في دارفور بالطائرات الغبية التي لا تفرز بين العسكر والمدنيين ؟ 2/ هل يجوز قتل أكثر من 200 شاب وشابة أيام المظاهرات دون تقديم من قتلهم للمحاكمة ؟ 3- هل يجوز والغربة حارة بالخطاب تبخل علي ؟ هههههههههههه الأخيرة دي شكلها بتعجب الشيخ .


#882158 [داوودي]
4.50/5 (2 صوت)

01-10-2014 02:23 PM
في امور كتيرة. وعظيمة. من من مثل هذه الفتاوي ويمكن ذكرها من باب النصح وليس الفتوي ...


#882149 [أبوعلي]
5.00/5 (3 صوت)

01-10-2014 02:11 PM
هذا (الشاخ)
يحتاج إلي إخضاعة إلي فحص طبيّ جسديّ ونفسيّ متكامل
يفحص جينيّا و(جنيّا) لإكتشاف مسببات عقده النفسيّة
وإذا كان ثمة ( خدوش و وجروح عميقة) من زمان فائت
وربّما تعطّلت (محرّكاته) وبات يخفي ذلك (بشاذ القول )


ردود على أبوعلي
United States [اب كروكرو] 01-10-2014 07:15 PM
ههههههههههههههههههههههه ابوعلى الحتة الاخيرة دى لو عندو فيها مشكلة الكفار عندهم ليه العلاج .. عليه بالفيغا


#882137 [الكلس]
0.00/5 (0 صوت)

01-10-2014 01:46 PM
الزول لسع قاعد وليه ما يفتى لينا فى الدولة


#882132 [العريبية]
4.00/5 (2 صوت)

01-10-2014 01:39 PM
والله فعلا ياامى ارحكى ندعى شوية امكن نصادف ساعة الاستجابه الليلة الجمعة

وقولن معاى ياخواتى ياهادى اهدنا ياهادى اهدنا وياهادى اهدى ابودفاع واكفى شر هجمات الهجوم

وياربى ارحمو من دخول الاهداف البدخلها فى قوونو براهو من جهلو والطويل جهلو واااااااااااشقاوة اهلو


ردود على العريبية
European Union [العريبية الاصلية] 01-11-2014 06:56 AM
باختى العربية ده حصرىة على انا بس ماتلفحى ساى والا بفكها ليك

انت شكلك بت ام الحسن لكن مامشكلة برضو بدعى معاكن والله يستجيب لينا يااااااااااااارب


#882128 [ام الحسن]
0.00/5 (0 صوت)

01-10-2014 01:31 PM
والله كل ماترد سيرة هذا الدفع الله 000اجد لسانى ودون ان اشعريردد المثل (الحبوباتى )والذى كنت اسمعه كثيرا منهن فى مناسبات مشابهة

الطويل جهلو واشقاوة اهلو 000اهلو الكيزان طبعن


#882125 [خالد آدم إسحق]
5.00/5 (1 صوت)

01-10-2014 01:21 PM
الاستأذ/عووضة
تسلم ،ويسلم قلمك
والله المقال دة خلي ليك حسبو دة محتار عديييييل
يحلها من وين ولاوين
لكن اقول ليك حاجة
اخير علقة زوج الدكتورة من مقالك دة
إنضرب بالحزام ووجع الجسد زال
لكن وجع الكتابة دة اللي بيزيحوا شنو
مبرووووووك يا نساء السودان
دة الرد الشافي والكافي والمنمق بالقوافي من ودعووضة اللي ما بيقبل فيكن التعالي


#882122 [احمد مصطفى]
5.00/5 (2 صوت)

01-10-2014 01:21 PM
انا اقترح على الاتحاد العام ان يمنح عضوية لدفع الله نسوان
عسى و لعل يطور مستوى الكورة و نقدر نجيب بطولات خارجية


#882121 [ابومرام]
3.00/5 (1 صوت)

01-10-2014 01:19 PM
الزول دا ماعندو موضوع هو مايتكلم في مصائب البلد الكثيرة شغلتو كلها نسوان وختان وهوس فكونا منو


#882115 [jackssa]
4.25/5 (3 صوت)

01-10-2014 12:55 PM
يا شيخنا والله انت طلعت (خرنق ) الم تجد موضوع اخر لتفتي به .فعلا في زمن الأنحطاط يختفي المفكرون والعلماء .



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة