الأخبار
أخبار إقليمية
يا حمدي ابو الاقتصاد سامعني ؟؟
يا حمدي ابو الاقتصاد سامعني ؟؟
يا حمدي ابو الاقتصاد سامعني ؟؟
عبد الرحيم حمدي


01-26-2014 07:22 AM
شوقي بدري

شايفك بديت تتملص وتعمل رايح . الصواطة الحصلت للاقتصاد السوداني مسئول منها انت في المكان الاول . كدي بس طول بالك . قانون تسجيل الشركات الذي اجيز في السودان سنة 1925 ، من احسن القوانين في العالم . عرضته علي اهل الامارات في السبعينات ولم يصدقوا ان السودان كان منظما بهذة الطريقة منذ العشرينات . كانت كل شركة ملزمة بتقديم حساباتها بواسطة محاسب قانوني . والمحاسبين القانونين يتحصلون علي الزمالة من انجلترة مثل المهندسين والاطباء .

وحتي التجار كانوا ملزمين بتقديم حسابات وكان هنالك ما عرف بالاستاذ وهو دفتر الحسابات الضخم . وكان الناس يقولون ساخرين ,, ياخي بتحاسبني كده انت بتاع دوبيا . وعرفنا ونحن صغار ان الدوبيا هي الحساب التجاري الدقيق .

عندما سرقت الانقاذ السلطة استدعي البشير ممثلي كبار الشركات وطلب منهم دعم . طيب ممكن تشرحوا لينا الدعم ده الشركات دي تنزلوا تحت ياتو بند ؟؟ يكون ياربيبند خارج روحك وربي اولادك ؟؟ عندما ذهب بيطار لمقابلة البشير اخذ معه مسئول العلاقات العامة والذي كان خالد الحاج مؤسس سودانيات . وتردد بيطار لانه لم يفهم الحاصل. لان بيطار الكبير لم يسرق بل خلق الشركة بجهده وعرقة . وكان يوزع البريد في امدرمان في بداية حياته . وحجار الكبير كان وكيل بوسطة . وقام مفتش انجيزي زهجان في الاستوائية بتاسيس مزرعة بن وشاي . وعندما عرف المدير البريطاني بأ ن المفتش البريطاني استعان بمساجين . طرد من الخدمة . عرضت المزرعة للبيع واشتري حجار المزرعة بخمسين جنيها ارجعت للخزينة . وحجار انتج وقدم للبلد ووفر العملة الصعبة . وتبرع للتعليم والصحة ومجالات اخري .

واقنع خالد طيب الله ثراه بيطار بان يدفع . وتعهد روجيه بيطار بدفه 2 مليون جنيه . وكان هذا وقتها مبلغا محترما . بكل صفاقة وكأنه صاحب حق ، قال البشير بانهم يتوقعون عشرة مليون . وبدأ بيطار في الاعتذار ولاحظ خالد ان البشير بدأ يغضب . فقال ,, طبعا دي شركة وعندها التزامات ، وفي مشكلة سيولة وانشلء الله الشركة حتساهم اكتر في المستقبل ,, وانكشف خالد . وتبرع من من بلغ عنه كشيوعي . وكانت بيوت الاشباح . ولم يشفع له ان عمه رحمة الله عليه ابراهيم عبيد الله الاقتصادي والاخ المسلم .

عندما تبلطج الدوله وتقلع من الشركات والتجار ، فليس امام التجار والشركات سوي سرقة المواطن والتلاعب بالحسابات، وابداء الولاء حتي لايفتك بها . وعندما تجد الحماية تأتي ببضائع منتهية الصلاحية ، وغير مطابقة للمواصفات . وصارت البلد كرخانة او جبانة هايصة . وتجي يا استاذ حمدي تقول ما سمعوا كلامك . ما هو كلامك الغطس حجر البلد . والعطائات والعقودات المطبوخة ماحصلت وانت شايف بي نضاراتك سامع بي اضيناتك.


عثمان صالح الرجل الامي نافس الشركات الاوربية مثل متشل كوتس وسودان مركنتايل . وقام بالتصدير كاسرا الاحتكار الاوربي . وانشأ شركات لصناعة الاحذية ومطاحن للغلال . كان من المفروض ان يقام له تمثالا . ولكن النميري منفذ سياسة ناصر امم شركاتة وهو جار آل عثمان صالح . وانتم يا حمدي تنفذون سياسة تنظيم الاخوان العالمي . وانت كنتا موجود لمن الاخوان هربوا من مصر للسودان في الخمسينات وحتي القرضاوي كان في السودان وبديتوا بسندوتشلت اللسان والمخ في محلات خيرات واماكن اخري . الي ان سيطرتم علي الاقتصاد السوداني عن طريق البنوك الاسلامية التي هي ربوية .

الناس الجابوهم وسلموهم السوق . كانوا فاكرين السوق ده هو جلابية وعمة كبيرة وملفحة ، وعبارات ممجوجة . مثل في ميزان حسناتك. وبارك الله فيك اخي الكريم ، وتسلم ياشيخنا .

اديك امثلة . من كان . يرتبط بسوق الصاج والحديد والخردة في السودان ، كان العم رجل البر والاحسان الزبيرموسي حامد . لم يقفذ علي رؤوس الآخرين . بدأ حياته مثل العم الجاك جفون في امدرمان كصبي حداد مثل ناصر الحداد . وهؤلاء عرفوا بحدادي الواطة . ورشهم في امدرمان كانت بارضية ترابية وبدون ابواب وشبابيك . ذودوا البلاد بالفئوس والطواري والحشاشات والنجامات والكلابات والعتلات والازمات والمناجل وكل ادوات البناء والزراعة . ووفروا للبلد كثيرا من العملة الصعبة . بل وظفوا وعلموا الاطفال فنون المهنة . وطوروا البلد وانفسهم. ومن تلاميذ ناصر الحداد الفنان ابراهيم عوض وفردته سليمان قلووظ الذي اسس شركة حدادة بمعدات متطوره واعطي عملا للمئات . والصين لم يكن عندها صناعة تذكر وبدا الانتاج بالحديد في الخمسينات والستينات ولم يتوفر لهم الصلب . وكانوا يلفون اليايات للعربت والشاحنات بالايدي . وكان الناس يبيعون اطفالهم بسبب الفقر . ويريطانيا بدأت ثورتها الصناعية بال كوتدشج اندستري ، او صناعة الكوخ . والسويسريون لا يزالوا ينتجون قطع غيار الساعات والاجهزة الدقيقة في منازلهم .

الدولة حتي في ايام برمبل المفتش البريطاني كانت تساعد المهنيين وتحفذهم . ولقد اعطي الحدادون قطع سكنية في حي امبور الذي يجاور المظاهر والعمدة وفي هذا الحي عاش العم رجل البر الزبير موسي حامد وبقية الحداحيد طيب الله ثراهم . ووزعت ورش النجارة والحدادة وصيانة السياران في المناطق الصناعية في كل السودان . وكان البنك الزراعي والبنك الصناعي والبنك التجاري كلها مؤسسات سودانية خالصة .

الاستاذ حمدي . انت من قمت بمحاربة الحرفيين والمنتجين والتجار والشرفاء . فالعم الزبير ملك الصاج كان يعرف السوق ، حجمه احتياجاته وكيف يتنفس . والاهم انه كان يعرف الناس وكان يسلم ويؤجل الدفع ويمهل . واهم شئ في السوق هو الثقة والعامل النفسي . وكما يقول الخواجات يمكنك الآن زراعة اعضاء بشرية ولكن لا يمكنك ان تزرع الخبرة . ناسكم الجبتوهم ومكنتوهم . ولو طلقوهم في امدرمان كانوا راحوا . اديك مثال . ممثل السودان في الامم المتحدة عبد المحمود ابو تفة البشاكل ضله ، لفح ليه كمشة فلوس ودخل سوق الورق . اشتري ورق من فنلندة بواسطة سوداني ابوه كان مرشح قبل نميري لقيادة الانقلاب . والورق بيع لحسين خوجلي للجريدة طلع الورق ما بمسك الحبر . وجماعتكم يا حمدي فاكرين التجارة دي لعب . وحكم البلد ذي انتخابات اتحاد الجامعة والمراهقة الطلابية . والدليل جابوك انت ومسكوك الاقتصاد .

بتكون سمعتا بي الرأجل العظيم ادريس الهادي . انه صاحب مصانع اللحام والهواء السايل . لو ما عرفتوا وده ما غريب عليكم ، ممكن تكون شفتا المسلة العملها في الخمسينات في تقاطع العرضة والاربعين . وديل شوارع في امدرمان . قلت النحدسك امكن ماتكون عارف انت ما ساكن في لكوندة . تعرف يا حمدي سكن اللكوندات واكل المطابخ زمان بينبذوا بيه . . انا ساكن في لكوندة في شاد جاني السفير عبد المنعم ساتي وشاكلني لانه عرف من الوزير حسين كودي انه في سوداني ساكن في لكوندة بحيرة شاد .وقال لي ده عيب في حق السودانيين وطلعني من اللكوندة ده في 1987 ووقتها السودان اكتر قطر مؤث في المنطقة والسوداني مكان تبجيل. طيب لمن يجي مسئول اجنبي لمساعدة السودان او لدعم الايتام والجياع ويلقي وزير المالية ساكن في الهيلتون ، مش ممكن يقول الناس ديل ما محتاجين مساعدة . رئيس الوزراء السويدي مرتبه 12الف دولار وبعد الضرائب بتصفي علي 7 او 8 الف , وانت يا حمودي بتضربها طلبات في ا لهيلتون . في 1995 في الموتمر العالمي انتو مش جيتوا كوبنهاجن مع البشير وسكنتوا في اغلي الهوتيلات وكنتو اربعة دستة وحرباشة . امريكا ماكن عندها 50 زول .

ادريس الهادي طيب الله ثراه كان يعمل بيديه الي ان لقي ربه . هو من انشأ الجملونات التي احتاجها الجيش الامريكي في قاعدة وادي سيدنا . وصار صديقا لماكنمارا وزير الدفاع الامريكي ورئيس البنك الدولي فيما بعد. وكان يتاخر من تلبية دعوتة زيارة امريكا ضيفا علي ماكنمارا لانه مشغول بالعمل . هذا الرجل انشأ امبراطورية صناعية , قام بتصميم الابواب المستعملة في الري في الجزيره وكل السودان . وكان سعرها ربع سعر المستوردة . التي كانت تسبب مشكلة في الترحيل بسبب وزنها . لقد ترك ابنائة احمد وعلي ومحمد . ولكن مع الانقاذ لامجال لعمل شريف . في الثمانينات قال قال لي مهندس سويدي اخذته الي السودان ان اصابع اللحام من مصانع ادريس الهادي كانت اجود من النوعية التي استوردناها من السويد . فاللحام والاسمنت من الواجب ان يكون طازجا. ادريس الهادي . كان مع العميد يوسف بدري يرأسان محكمة الاحداث في ادرمان . وكان ادريس الهادي يوظف الجانحين . وحكومة الاستاذ حمدي تفرض المكوس والجبايات والاتاوات حتي علي ستات اللقيمات والمشاطات والوداعيات.

اول تنظيم للاخوان المسلمين كان برئاسة المفتي و العم بدوي مصطفي وعلي طالب الله . وهؤلاء كانوا اسلاميين شرفاء . والعم بدوي مصطفي هو من ادخل الدين الاسلامي في الشهادة السودانية عندما كان وزيرا للمعارف . وكان من اول المصدرين للجلود . وكان شريكا للتاجر الامدرماني الكبير الشيخ العوض , ومن اشهر التجار كان آل الدعيته واخرين . وكان العمل مبنيا علي التعاون والشرف والثقة . ولكن العم بدوي مصطفي خرج من السوق لان العمل صار همبتة وفساد . وهو الذي رفض الدخول مع السويديين في شراكة مدبغة حديثة تستوعب 300 عامل ، خوفا من شبهة الربا في السبعينات دلوكت انتوا تدخلوا شراكة مع شمهروش . حتي للاخوان المسلمون الشرفاء تركوا لكم السوق يا استاذ حمدي . والعم بدوي مصطفي عمل في التصدير منذ الاربعينات .

يا حمدي انت من نحرالاقتصاد السوداني . قول واحد . البنوك لا تدخل في التجارة بالقانون . ولا انا غلطان . والشركات لايسمح لها بأ، تندمج او تتحد او ان تبني كارتل او كونسورسيوم . قوا اتنين والعقوبة في كثير من الدول قد تعادل عقوبة القتل . ومن اكبر الجرائم هو ما عرف ب انسايد انفورميشن . فتسريب معلومات عن اندماج او افلاس او شراء شركة يعرض المسرب للمعلومات لعقوبة طويلة المدي بنك انرون مثالا . وحمدي دور في الاقتصاد شلاليت وكجم . بناء الكارتل ان تتحد مجموعة من الشركات وتقدم عرض عالي للحكومة . ومن يقع عليه العطاء يقسم مع البقية وبدون منافسة . كلنا كم ؟

اكبر طبخة كانت ان شركات العربات اشترت شركة المواصلات العامة في لوس انجلس وقفلتها . وباعت العربات للناس . ولهذا فلوس انجلس اكتر بلد فيها عربات . ولان الدول تحمي انتاجها فلقد كان ممنوعا استيراد الثياب والملبوسات والاحذية في ايام نميري . وقام تاجر بارسال جزم فردة شمال ولم يستلمهتا وبيعت بملاليم في مزاد علني وكان الناس يتسائلون حيعمل بيها شنوا؟؟ لكن وضح انو التاجر كان جاب الفردة التانية قبل مدة عن طريق مطار الخرطوم . وهذا تحايل علي قانون الحماية الذي يحتاجه اقتصادنا . فما خرب الاقتصاد الافريقي البسيط انه لايستطيع لضعفه ان ينافس , وتجد الالبان والطحين والسمن الفائض في اوربا من يدخلها برشوة الي الاسواق الافريقية . وتحرير الاقتصاد العشوائي لارضاء جشع التجار هو خيانة وطنية .
كلما الدولة تحتاج تدفع للجيش والامن والجنجويد وناس سيدي يدوروا المطابع ويطبعوا ذي اي طاحونة . في عملة في العالم تحت حكومة عندها شوية معقولية الدولار ذا د فيها الف مرة ؟.

انت ياحمدي لمن القروش كانت حبة والرزق تلاقيط ، ما مشيت لجامعة الاحفاد وكنت عاوز تمسك الكافاتيرية . وقالوا ليك هم عندهم دراسة كاملة انو زول يعمل مبني كامل مجهز بكل المعدات . والتكلفة كانت 300 الف دولار وبعد عشرة سنين المبني يكون تابع للاحفاد التي هي مسجلة وتابعة للشعب السوداني مافي ود مرة يمتلك طوبة منها . يعني اقل من 3 الف اجار في الشهر . انت يا حمدي ما قلتا ,, والعارف منو الحكومة دي تستمر عشرة سنة ؟؟؟ ,, علشان كدة سا كن في الهيلتون . جلابيتك في سنونك . كاني ماتي تقوم قطن مش صوف . بالمناسبة سمعت قبل سنين الكافتيريا مسكها واحد سعودي . وانت انتقلت الي مستويات البلايين .

لقد كتبنا وقلنا منذ البداية ان الانقاذ تحمل بذور فنائها في داخلها .لانة ليس هنالك ما يكفي من الاسلاب والغنائم للجميع . ومن اخذ سيطالب بالمزيد . ومن لم ياخذ سيتربص بالاخرين ، وطال الزمن ام قصر سيفتك بهم . والآن عدو الكوز الاول هو الكوز المغبون . وامال ناس ود ابراهيم والسائحون والنائحون والعتباني ديل كانو شيوعيين ؟؟

كان في قانون ونظام . هل تعرف يا حمدي انوا الانجليز حكموا بالسجن علي اثنين من الانجليز بسب الفساد لانهم اتصرفوا في مواد التموين في ايام الحرب واحد القضاة كان سودانيا . ولقد حكم مولانا الدرديري بالجلد علي انجليزي ونفذ الجلد . ورئيسك يعفي عن مجرم مدان باغتصاب فتاة صغيرة . والمفروض ان ينفذ فيه حد الردة . وانت ياحمدي عاوز تاخد شهادة خلو طرف ؟؟ يا حدق دقدق . الست انت المسئول الاول من تخريب الاقتصاد بسياسة التمكين . عندما اتيتم كان هتالك 425 تاجر جملة مسجل . في سنوات قليلة صار العدد 27 تاجرا . لان البقية قد افلست وسجنت وبيعت منازلها . لقد كانوا يستوردون الخيش ويدفعون ويدفعون ويدفعون الجمارك والاتاوات . ليجدوا ان منظماتكم قد ادخلت الخيش معفيا من كل شيء . ومن كان يستورد السكر وضع في السجن ووضع ابنة وهدد بأشياء لا تذكر وتنازل عن كل شئ . ومن كانوا يستوردون السيخ والاخشاب وجدوا ان السوق قد امتلأ بواسطه مؤسسة الشهيد والذبيح و الجريح والسليم والما عتو عوجة . وطلع الشهيد فطيس.

ليس هنالك في كل العالم شئ اسمه اقتصاد حر . الاقتصاد له قوانين و تشريعات وغرف تجارية ومحاكم تجارية . ولا يسمح باستيراد عشوائي . لقد كانت وزارة التجارة لاتسمح باشياء ما عندها معني كانوا يطالبون بالمدخلات الصناعية والادوية اولا. ولكن حمدي حرر الاقتصاد . وصار الناس تستورد الحنة الصناعية في شكل ورق والكريمات المضرة بالصحة ولعب اطفال هايفة تتكسر بعد دقائق . وترامس شاي بتولع . والبلد عدمانا الانسولين وحبوب الضغط ومحاليل غسيل الكلي. لانه الهتش بيكسب اكتر .

امريكا لاتسمح بادخال كل البضائع من كل العالم . البضائع التي تأتينا من الصين يمنع دخولها الي امريكا واوربا . لانها تاتي من السجون او من مصانع تستغل الاطفال او النساء بطريقة مجحفة . وهذه الدول تحمي انتاجها المحلي وتضع قيودا علي كثير من البضائع . وانت ياحمدي تتبجح بانك حررت الاقتصاد وهيئته للاغتصاب . هذا شئ يخجل ان يذكره الانسان ناهيك عن الافتخار به . لقد فرضت امريكا ام الاقتصاد الحر قيودا حتي علي حليفتها اليابان ورفعوا شعار ,, اذا اردت ان تبيعها هنا فلتبنها هنا . ولان الامارات تستورد من امريكا فلها الحق في ان تصدر حسب قانون امريكا . وقامت مصانع صناعة الملابس في الامارات في الثمانينات . وكان الغرض اغراق امريكا بالملبوسات . ولكن تلك المصانع اغلقت بهدوء . وانت ياحمدي بي اقتصادك بتاع ملينتين وتعريفة عاوز تحرر . بعدين الزبير الجا مسك بعدك . مش قال انه ميزانية السودان اقل من ميزابية مانشستر يونايتد . انت يا حمدي الزول دة اقتصادي جد جد ؟؟ ما عارف كل ما اشوفوا اتذكر الحجبات والمحاية .
انت مش قلت السودان ده يطلعوا السنكيت والفليتو والباقي يجدعوه بره ولا انا غلطان ؟؟
ع . س . شوقي
[email protected]


تعليقات 28 | إهداء 0 | زيارات 5727

التعليقات
#898312 [محجوب عبدالمنعم حسن معني]
0.00/5 (0 صوت)

01-28-2014 12:09 AM
التحية لك عمي شوقي ومشكور على الكلان الرائع في حق الزبير موس حامد عليه رحمة
مع مؤدتي


#897735 [إبن السودان البار ***]
0.00/5 (0 صوت)

01-27-2014 02:04 PM
حقيقة الصادق المهدي المرة ؟؟؟
إذا كنت من الذين يعبدون الأفراد ويقدسون زعماء الطوائف الدينية فلن يروق لك هذا الموضوع فلا تواصل في القراءة ؟ وإن كنت تقدس السودان وشعوبه وترابه فستوضح لك هذه الحقائق الكثير ؟؟؟ ثورة الإمام المهدي تاريخ يفتخر به كل سوداني ولكن أن يستقل أحد أفراد أسرته هذا التاريخ ويتاجربه للكسب الشخصي له ولأسرته وطائفته علي حساب السودان فهذا خط أحمر وغير مقبول لكل وطني محب للسودان ؟؟؟ زعم الإمام المهدي بأن مهديته قد جائته بأمر من رسول الله صلي الله عليه وسلم إذ يقول: ( وقد جاءني في اليقظة ومعه الخلفاء الراشدون والأقطاب والخضر عليه السلام وأمسك بيدي صلي الله عليه وسلم وأجلسني علي كرسيه وقال لي : أنت المهدي المنتظر ومن شك في مهديتك فقد كفر ) ومن إفتاءآته : * أن المتهاون في الصلاة كالتارك لها جزاؤه أن يقتل حداً ؟؟؟ * أن من يسف التنباك يؤدب حتي يتوب أو يموت ؟؟؟ ولكم أن تحكموا علي هذا الزعم والإفتاءآت وصلتها بديننا الحنيف ؟؟؟
طائفة الأنصار التي يسميها الجهلة بمعني كلمة حزب بحزب الأمة القومي ؟؟؟ الصادق المهدي أحد أبناء إحدي هذه الأسر والتي تعد أغني اسرتين في السودان مالاً وجاهاً ؟ والأسرة الأخرى يعرفها الجميع وهي أسرة الميرغني الذي دخل السودان ممسكاً بلجام حصان كتشنر عندما دخل السودان غازياً ؟؟؟ هذين الأسرتين قواهم وحماهم الأنجليز وملكوهم الأراضي الشاسعة والمشاريع وإغتنوا بفحش وكونوا طوائف من الجهلة المغيبين دينياً واستعبدوا أعداداً هائلة منهم ليخدمونهم في مزارعهم وقصورهم بدون أجر أو حقوق مخالفين بذلك أبسط حقوق الإنسان في القرن 21 ؟؟؟ فعل الإنجليز ذلك حتي يساعدوهم في حكم السودان ؟؟ فأجادوا هذا الدور بكل تفاني وإخلاص ؟؟؟ وعليه كرمهم المستعمر بتمليكهم الأراضي والمشاريع وكرمهم بالنياشين والألقاب الرفيعة : السير السيد علي الميرغني باشا – حامل نيشان القديسين ميخائيل وجورج من درجة فارس ونيشان الملكة فكتوريا من درجةفارس. السير السيد/ عبدالرحمن المهدي باشا حامل نيشان الإمبراطورية البيريطانية من درجة فارس ونيشان الملكة فكتوريا من درجة قمندان . وهذين السيدين كانا أعضاء شرف في المجلس الحاكم للسودان بقيادة الميجر جنرال السير هيوبرت هدلستون ؟؟؟
عندما رحل الإنجليز وانزل العلم البيريطاني أجهش السيدين بالبكاء تحسراً علي ذهابهم وخوفاً علي مصالحهم وهيبتهم ؟؟؟ هاتين ألأسرتين لعبوا دوراً كبيراً في تخلف السودان وما زالوا يلعبون دوراً كبيراً في حماية حكم الكيزان الفاسدين حفاظاً علي مصالحهم وسمحوا لأبنائهم بمشاركة الكيزان المجرمين بالإنضمام للحكومة ودعمها وألظفر بجزء صغير من الكيكة المصنوعة من عرق ودماء شعوب السودان المغلوبة علي أمرها ؟؟؟
الصادق المهدي منذ صغره يبوس يده الغفير والوزير ويؤشر او يأمر ليطاع ؟؟؟ تعلم في عدة أماكن لأنه كان يستطيع تغيير مكان دراسته كما يريد في السودان بكمبوني المسيحية ثم بمصر كلية فكتوريا ثم باوكسفورد ثم بأميريكا ؟؟؟ ويغير تخصصه كما يريد مرة زراعة ولم يكملها ومرة اقتصاد وسياسة وفلسفة ؟؟؟ نُصب رئيس وزراء وهو في عمر29 سنة وتم تغيير الدستور لخاطره والذي ينص علي ان أصغر عمر لهذا المنصب هو 30 سنة وذلك مباشرةً من كرسي الدراسة الي رئيس وزراء حتة واحدة ؟؟؟ في سابقة تسجل في موسوعة جنس للأرقام القياسية والغرائب والعجائب ؟؟؟ شخص تربي بهذا الشكل الفريد قطعاً سيكون سلوكه فيه نوع من الغرابة ؟ لا أعرف ماذا يسميها علماء النفس ؟؟؟ وفي رأيي إنه مقروراً ويتوهم ان أي كلام يقوله لا بد أن يجد الإستحسان والإحترام ؟؟؟ كيف لا وطائفته مكونة من الجهلاء وأفراد أسرته ونسابته والمنتفعين من بقايا الإدارة الأهلية منذ زمن الإستعمار؟؟؟ وكل من حوله حتي لو متعلمين لا يجرأون علي مجادلته أو توجيهه أو نقده فهو ولد سيد ليكون سيد ؟؟؟ والسيد يأمر أو يؤشر ليطاع ومن يتطاول عليه يعتبر زنديق خارج عن الملة يفصل فوراً إن لم ينكل به ؟؟؟
لنحكي بعض نوادره ومحنه التي تدل علي شخصيته العجيبة وغريبة وتفضحها ؟؟؟
* اشار له أحد المقربين منه بأن الحزب ليس به انتلجينسيا أي متعلمين ؟؟؟ فجمع طلاب من المنسوبين للأسر الأنصارية بلندن وبدأ يخطب فيهم ؟ تجرأ أحدهم وإنتقده هو شخصياً ؟؟؟ فلم يرد الصادق علي نقده وإنما أسكته وقال له أشكرك علي شجاعتك ؟؟؟
* يدعي الديمقراطية وألتداول السلمي للسلطة وينسي أنه أول من خالف هذا المبدأ بأن كون جيش من المرتزقة بتمويل من المعتوه القذافي ودخل السودان غازياً ليخلف أعداداً هائلة من الضحايا ولا يعرف كيف نفد بجلده من هذه الجريمة النكراء دون مسائلة أو محاكمة عادلة والإقتصاص لضحاياه الأبرياء ؟؟؟ أذكر منهم الفنان والرياضي الموهوب وليم أندريا أحد أفراد فريق كرة السلة السوداني الحائز علي البطولة العربية بالكويت رحمه الله ؟؟
*عندما لجأ لإريتريا مع بعض أفراد من أنصاره المسلحين ومكونين ما يسمي بجيش الصادق المساهم به مع بعض الحركات المسلحة والتي كانت تنوي إسقاط الحكومة بقوة السلاح في ماسماها ( تهتدون ) وعندما وجد أنه لا فائدة من ذلك هرب مرة أخري للسودان ليتصالح مع الكيزان تاركاً المعارضين وأفراد جيشه الذين تعرضوا للجوع والعطش في صحاري إرتيريا ؟؟؟ وعندما تمكن أفراد جيشه بعد معاناة شديدة من الوصول للسودان ثائرين ليعتصموا بدار طائفة الأنصار بأمدرمان مطالبين مقابلته لمسائلته عن كيف يتركهم مهملين ويهرب ؟؟؟ تخبي منهم ورفض مقابلتهم ؟؟
* عندما كان بالسلطة عين زوجته مديرة لسودانير في منصب يحتاج لخبرة ومعرفة عالمية مكثفة في شؤون الطيران ؟؟؟ أسنده لسيدة أتت رأساً من الحنانة الي هذا المنصب الخطير دون سابق خبرة أو دراسة ؟؟؟ وللمقارنة محمد بن راشد حاكم دبي بتمويل من مجموعة من البنوك أتي بأكبر خبراء طيران بأنجلترا بمرتبات قياسية وحوافز مجزية ؟ فطوروا طيران الأمارات لتنطلق بسرعة الصاروخ وتتفوق وتخيف كل شركات الطيران العالمية التي سبقتها بمئات السنين في هذا المجال ؟؟؟ وكذلك عين الصادق إبن عمه مبارك الفاضل في وزارة التجارة بعينها ليعيس فيها فساداً ويغتني ببيع قطن السودن الذي كان يقدر سعره ب100 مليون دولار باعه لتاجر هندي أسمه باتيا يحمل الجنسية الإنجليزية ب 60 مليون دولار وهذه الصفقة وصفتها إحدي الصحف البيريطانية بصفقة القرن ؟؟؟ وعندما قام المرحوم محافظ بنك السودان( بليل) بشكوي مبارك بهذا التصرف الإجرامي الي رئيس الدولة الصادق قابله بعدم الرضي ؟؟؟ إذ كيف يسائل إبن العز والقبائل حتة محافظ ؟؟؟ وبعد أن إغتني مبارك من عمولته المهولة الحلال ! من هذه الصفقة الأسطورية تنكر لعمه الذي علمه السحر وإنسلخ من طائفته وأصبح وجيه وكون حزب خاص به ( حزب مبارك الفاضل الخاص ليمتد )؟؟؟
* في أيام حكمه حدث فيضان سببته أمطار غزيرة دمرت أعداداً كبيرة من المنازل بأمدرمان وكل المناطق حول العاصمة وتشرد الآلاف من الذين تهدمت منازلهم ؟؟؟ وكان وقتها جالساً في القصر يقرأ في كتاب سليمان رشدي الشهير( آيات شيطانية ) ؟؟؟ أتي اليه أحد المسؤولين ليخبره بهذه الكارثة ؟ فصدم ذلك المسؤول عندما قال له الصادق بكل برود : انت في الفيضان والا تعال شوف دا بيقول في شنو !!! أشارة لما يقوله إبراهيم رشدي في حق الإسلام ؟؟؟ كان المسؤول يتوقع ان يأمر الصادق بطائرة هيلكوبتر حتي يستطيع أن يتجول بسرعة ويتفقد رعيته كما يفعل كل رؤساء الدول في مثل هذه الكوارث حتي من باب التمثيل الإعلامي لتلميع شخصيتهم ولكن ود العز واصل القراءة في كتاب إبراهيم رشدي ولم يكترس؟؟؟
*أيام حكمه فكر في حل أزمة المواصلات فطلب الإجتماع مع سواقي التاكسي بدلاً من خبراء في مشاكل الحركة والطرق؟؟؟ هل يا تري لا يعرف أن سواقي التاكسي معظمهم جهلاء ؟؟؟ وهل ياتري لا يعرف أنه هنالك مهندسين متخصصين في تنظيم حركة السير والمواصلات وتنظيم مواقف السيارات وتخطيط الطرق ؟؟؟Traffic engineers ) ( ( أم لا يريد أن يكون مستمع للخبراء لأنه سيد يريد أن يستمع اليه ويأمر ليطاع بدون مجادلة ؟؟؟
* أيام حكمه قام بتكريم أول قابلة وأول سائقة سيارة وأخريات ؟ والي الآن لا أعرف ما الهدف من ذلك غير الإستعراض والهيافة وهل هذه أوليات رئيس دولة ؟؟؟
* في أحد الأعياد كان يخطب في جمع غفير من الأنصار رجال طائفته المخلصين ومعظمهم جهلاء من غرب السودان ؟؟؟ وكان علي صهوة جواد أبيض ويلبس بنطلون رياضة ابيض( ترينج ) وجزمة رياضة وعراقي اي جبة انصارية؟؟؟ وفي نظري هذا لبس عجيب ومتناقض لا يلبس في مثل هذه المناسبة الدينية التي لها قدسيتها وإحترامها ؟؟؟ وفي تلك الخطبة كان يشرح لجمع الجهلاء انه مكة أصل اسمها كان بكة ؟؟؟ وعرفت هذه المعلومة القيمة من فضيلته ؟؟؟ لكني أجزم بأن معظم ابناء غرب السودان الجهلاء الفاغرين أفواههم ويستمعون لهذا الخطيب المفكر الفذ لا يعنيهم هذا الشرح المفيد في شيء وهم عطشي يحتاجون الي مياه شرب عكرة من الآبار ؟؟؟
* وسمعته مرة في أحد أيام حكمه يتحدث في التلفزيون وينصح روسيا والصين ويقدم لهم الدروس في كيفية تحسين إقتصادهم معتقداً أن إقتصادهم يديره شخص واحد لص كعبد الرحيم حمدي ؟؟؟
* السفير السوداني في مصر كان أيام حكم الصادق مستاءاً جداً من الإتفاقيات المجحفة في حق السودان مع مصر ؟؟؟ وفي التحضير لزيارة الصادق لمصر قام بتحضير عدة فايلات وأجندة لمناقشة الإتفاقيات الغير متكافئة ومجحفة في حق السودان لعرضها علي الصادق وفي باله أنه وحزبه غير منبطحين لمصر ولا يرضون الظلم للسودان ؟؟؟ وفي المناقشات لسؤ حظ السفير والسودان أنه وجد الصادق يدافع عن المصريين والإتفاقيات المزلة أكثر من المصريين أنفسهم ؟؟؟ صدم السفير وظهرت عليه علامات الغضب والأمتعاض ؟؟؟ وبعد رجوع الصادق الي السودان تم نقل السفير الي السودان من غير رجعة لمصر وهذا ما حكاه السفير المندهش الي الآن بنفسه ؟؟؟

• في أول يوم له من إستلامه للسلطة طالب بالتعويضات وكان وزير المالية آنذلك من اتباع طائفته المخلصين فصرفت له في الحال وأكتفي بهذا الإنجاز العظيم حتي سرقت منه السلطة وهو لاهي في أحد بيوت الأعراس بواسطة البشير الذي لاحقاً عرف نقطة ضعفه وحبه للمال فأغدق عليه بالتصدق عليه بحفنة من دولارات المنكوبين وتعيين أبنائه في مناصب رفيعة وإسكاته ؟؟؟
* يعتبر نفسه أنه مفكر كبير وكذلك يعتبره كثيراً من أنصاف المثقفين الذين يعتقدون ان الفكر هو حزلقة في الكلام وإضافة تعابير لغوية جديدة ( محاور ، ومربعات، أجندة وطنية ، صحوة إسلامية، وسندكالية، تهتدون، وهلم جر ) وأقول لهم الفكر له نتائج ملموسة تفيد الإنسانية جمعاء وليس كلام منمق وتعابير جديدة والسلام يمكن لأي مدرس لغة عربية إبتداع أحسن منها ؟ المرحوم شيخ زايد بن سلطان حاكم الأمارات السابق الذي تخرج من جامعة الصحراء ذات الحرارة اللافحة وشظف العيش له فكر وطني مثمر له نتائج لا تخطأها العين وأحد أفكاره انه قال ( لا فائدة من البترول أن لم يفد انسان الأمارات ) وفعلاً سخر كل أموال البترول لصالح شعبه الذي غدا من أسعد شعوب العالم وتفوق في عدة مجالات حتي في الرياضة العالمية فدولة حديثة التكوين لا يتعدي عدد سكانها عدد سكان حارة بالثورة تشارك في بطولة العالم لكرة القدم وتحرز كأس دورة الخليج الكروية ؟ في الوقت الذي فيه الهند التي تشكل تقريباً ثلث سكان العالم ليس لها أي نجاحات في الرياضة وفي الأولمباد الأخير لم تحرز أي مدالية ولم يرد إسمها حتي في الوقت الذي برز فيه إسم الأمارات بعدة مداليات ؟؟؟ وفكر صادقنا الهمام متمركز حول نفسه وأسرته وطائفته وكرسي الرئاسة ؟؟؟ ولم يخطر علي باله إستخراج بترول أو ذهب وهلم جررر عندما كان بالسلطة وانما فكر في تعويضاته ورفاة أبن عمه ؟؟؟
ومن هذه النشاة الفريدة والهالة والقدسية التي تربي فيها الصادق ونوادره الكثيرة والتي آخرها زيارته لمصر ليصلح بين الأخوان ومعارضيهم ؟؟؟ وبذلك عرض نفسه والسودان لإساءة بالغة لا ترضيه ولا ترضي شعبه المغلوب علي أمره والذي يفعل فيه حلفائه الكيزان ما أرادوا من قتل وتنكيل وسرقة لقوته وأمواله والتفريط في أراضيه قاتلهم الله مع الكهنوتية تجار الدين حلفائهم المخلصين أسياد الطوائف الدينية المقدسين ؟؟؟


#897043 [jackssa]
0.00/5 (0 صوت)

01-26-2014 11:14 PM
شكرا شعبي لعمنا شوقي .(وانفتحت سيرة ) . في موضوع الخصخصة التي طلعت من طاسة هذا الحلبي (حلبي دنقلا ) كان مفتريا وكان في رأسه ريشه ايام كان وزير مالية كان يعمل وزير مالية بالحكومة أيام السبت والأحد والأثنين واخر دوام الثلاثاء يداوم بشركته بلندن باقي الأسبوع . واتي بهذه الخصخصة اللعينة . وقد استخرج لها قانون ومعه بدرالدين سليمان الحرامي الذي حضرت له كف جامد من نميري ووقتها كان وزير مالية مع النميري . والقانون هو بيع المؤسسات والشركات العامة الخاسرة . وقد أضيفت الفنادق والسياحة وادرجت ضمن هذه المؤسسات للبيع وذهبنا كنقابة عامة للوزير حمدي وطلبنا مقابلته لأن مؤسستنا لم تكن خاسرة ولماذا تباع ويشرد كل موظفيها وعامليها . وبعد مشقة استطعنا مقابلته فتخيل ماهو رده لنا (أنا المستخدم لكم وعايز ابيع وماعايز أشتغل في الكسرة والملاح ). فقلت لزملائي شوفوا ليكم شغلة تانية دا همباتي ساكت وليس بوزير ومن وقتها خرجت من السودان ولم أرجع حتي الآن .


#896896 [ابويحيى]
0.00/5 (0 صوت)

01-26-2014 08:11 PM
لافض الله فاك ومتعك بالصحه والعافيه هل تدرى أن الانقاذ افلسوا بالزبير موسى حامد ومات احد ابنائه
عوض الزبير بالسجن شيك مرتجع بل الاسواء من ذلك فالرجل مصاب بالسكر وضغظ الدم منعوا عنه الدواء ومات بالسجن وافلس ابنائه من من بعد بل اختفت كل الاسر العريقة بما فى ذلك اباء الشيخ مصطفى الامين
وظهرت وداد بابكر وكرتى ونافع وقائمة الانقاذ.


#896833 [عائشة الفلاتية]
0.00/5 (0 صوت)

01-26-2014 06:44 PM
عفارم عليك يا ود بدري . لا فض الله فوك ولا كسر قلمك .


#896797 [إبن السودان البار ***]
0.00/5 (0 صوت)

01-26-2014 05:53 PM
عبقري اقتصاد السودان المنهار هو عبد الرحيم حمدي ؟؟؟ والسؤال المحير كيف لشخص واحد ينظر ويخطط ويتلاعب بأقتصاد دولة كاملة دون حسيب او رقيب وهذا ان كان هنالك اصلاً في دولة بمعني دولة ؟؟؟ واقول لنفسي هذا هوالعالم الرابع ؟؟؟ قد يستشعر البعض ان لي عداء شخصي مع هذا الشخص واقول لهم انني لا اعرفه الا عندما سمعت عنه من فم من هم في مجاله وحوله جرائم إقتصادية محيرة ؟ سمعت عنه الاعيب اي واحدة منها مقارنة بالفرية التي اعدم بها المرحوم الشاب مجدي زوراً وبهتانا والذي وجدت كمية ضئيلة من العملات في خزينة والده لا تزيد عن ثمن لاندكروزر تعدمه اكثر من 100 مرة اذا تمت جرائمه هذه في بلد به حكومة وطنية مسؤولة ؟؟؟
العنصري الفاسد عبد الرحيم حمدي الذي وجه اقتصاد السودان كله لمصلحة البنوك الأجنبية وخاصةً البنوك الشخصية المتدثرة بالأسلام ؟ ويكفي انه اتي به المليونيرصالح الكامل صاحب بنك البركة الذي يعمل فقط في مصر والسودان حيث الفساد الذي يزكم الأنوف وحيث كون ثروته بعد ان كان تاجراً عادياً بالسعودية وذلك عندما وجد البيئة القذرة الصالحة لهذا الفساد والحماية من النظام الحاكم ؟ اتي به من لندن وقدمه للبشير ليعينه وزيراً للمالية ؟ وطبعاً الثمن معروف ؟؟ فقد فصل لهم اقتصاد السودان ليتيح لهم النهب في وضح النهار مع كذلك بنك فيصل الأسلامي والذي كذلك لا يعمل الا في مصر والسودان حيث البهلة والفساد المقنن ؟؟؟ نريد ان نتحقق في عمائل بنك فيصل الأسلامي وبنك البركة اللذان عاسا فساداّ في اقتصاد السودان بمساعدة هذا العنصري منذ زمن نميري اي اكثر من25 عاماً والذي في احدي احاديثه في التلفزيون قال ان امنيته عند التقاعد إنشاء بنك خاص به في الجنينة الحارسها نائم ؟؟؟ طبعاً لأنه خبر كيف يكون النهب بواسطة البنوك وحلاوته ؟ وفعلاً كون حديثاً بنك سماه بنك الرواد وطبعاً هؤلاء الرواد سيكونوا من كبار الكيزان وعوائلهم ؟؟؟ انه ضمن عصابة تربطها مصالح مادية وتستقل الدين ومتحوصلة في الخرطوم تشارك البنوك والشركات في النهب ولا يهمها اياً كان خارج نطاق هذه العصابة والخرطوم؟ واي إقتصادي وطني يقدم لهم النصح اوالتوجيه فهو ملحد كافر يمكن ان يزج به في بيوت الأشباح ؟ انهم مكتفين بما يدخله المغتربين من عملات صعبة تقدر بأكثر من 15 مليار دولار في شكل عملة ورقية يجمعونها من السوق السودة لأنهم يملكون مطبعة الجنيهات السودانية ؟؟ بالأضافة الي ما تجود به بعض المنتجات ويصرف منها 75% للجيش والبوليس والأمن والدفاع الشعبي لتأمين سلطتهم وماتبقي لرفاهيتهم وأن تبقي جزء يسير يصرف في الخرطوم والتي تعاني حتي في مياه الشرب النظيفة والمجاري وقنوات تصريف الأمطار والآن الخبز والبنزين ؟؟؟
أقتصادي سوداننا الحبيب ينقسموا الي ثلاثة أقسام قسم ركب الموجة وانخرط مع عصابة الجبهة ومهد لهم الطريق للسرقة والنهب المنظم في وضح النهار وأخذ نصيبه وأغتني وكون نفسه ببذخ واضح وهو علي علم تام بكل الأعيب تجار الجبهة والبنوك المنتشرة في الخرطوم كأنتشار النمل حول بقعة العسل الماعندها سيد ؟؟؟ جريدة الفاينانشيال تايمز اللندنية وصفت الخرطوم بأنها غابة من البنوك وجيوش من الجياع والأطفال المشردين ؟؟؟ البنوك تفتح وتبتهج في البلاد الفيها فلوس سايبة وناسها طرش وحكومتها مكونة من شلة حرامية والبزنس والتجارة فيها تعتمد علي الفهلوة والغش واللبع المهول؟؟؟ واحسن مكان لها بلد يكون حاميها حراميها ويفهم في الأقتصاد مثل ما تفهم جدتي في علم الفضاء ؟؟؟ بلد رئيس الدولة فيها يرأس مجلس إدارة بنك كبير( بنك أمدرمان الوطني ) كل مساهميه من كبار رجالات الجيش والسلطة وحريمهم ؟؟؟ فماذا يتوقع من هؤلاء ؟؟ بلد الأستثمار الطفيلي ينهش عملاته الصعبة في وضح النهار حيث يأتي الشامي او التركي اليها ومعه مبلغ لا يزيد عن 5 الاف دولار ويساعده لونه الفاتح الذي له احترام خاص عند اهلي الطيبين وتمثيله بأنه مستثمر اجنبي ويساعده المرتشين والطرش في عمل محلات شاورمة او باسطة ويخم الدولارات السايبة في السوق السوداء ويحملها في أكياس والي بلده دون رقيب او حسيب في الوقت الذي يعدم فيه المرحوم مجدي البريء لأن في خزينة والده مبلغ بسيط من الدولارات ؟؟؟


#896743 [ود الحاجة]
5.00/5 (1 صوت)

01-26-2014 04:52 PM
ما اعجبني في المقال اثارة الموضوع الاقتصادي بالاستناد الى وقائع محددة و هذا الضرب من المقالات للاسف فيه نقص و يا حبذا لو يركز مثقفونا على الجانب الاقتصادي بواقعية و مهنية فمثلا موضوع الخصخصة التي يصفها حمدي احيانا بتحرير الاقتصاد لا تصلح ابتداء في بلد يئن من الفساد اذ اهم اهم شروط الخصخصة الشفافية المعقولة و لا اقول العالية


ردود على ود الحاجة
European Union [اسامة الكردي] 01-26-2014 06:40 PM
يا ود الحاجة مأشاء الله عارف البير وغطاءها، مالك خائف من ذكر اسمك الحقيقي ؟ ساهم معانا . ولن يصيبك الا ما كتب الله لك .


#896593 [ابومحمد]
4.50/5 (2 صوت)

01-26-2014 02:47 PM
ببزوغ الفجر الجديد والهبة الكبرى ادعوا لمحاكم شعبية تنصب لهؤلاء الخونة المفسدون الذين اوصلونا لهذا الحال وتصاد اموالهم وعقاراته ليعود الحق لاصحابه فهل ياتي ذلك اليوم ؟؟؟؟؟؟؟؟


#896592 [أبوديك الديناري]
5.00/5 (1 صوت)

01-26-2014 02:47 PM
قصة قصيرة بالقراءة جديرة
( كان ياماكان في قريب الزمان ببلاد السودان في مدينة امدرمان رجل (ما عنده ايمان)يأتيه المسكين الغلبان ليستلف منه مبلغا لبعض الزمان فيقول له ذلك المرابي : عند السداد الجنيه سيكون جنيهان ,,, مات المرابي مقتولاً وهو سكران لكنه خلف إبناصار من كبار الأعيان في زمن الكيزان زمن الضياع والهوان )

إن شاء الله فهمتو الحدودته يا حبان


#896519 [radona]
5.00/5 (1 صوت)

01-26-2014 01:42 PM
شوفوا عاد بلا لف او دوران
ابو الاقتصاد ام الاقتصاد ولا خاله او عمه
كل السياسات الاقتصادية خلال ال 24 سنة اثبتت فشلها
وما تلك الا الاعيب بعض الذين مارسوا الفساد حتى اصبح مؤسسة محمية تماما لا يعاقب عليها القانون
كل من اكتسب مال او عقار او شركة او مزارع ولو كان كان ذلك باسمه المباشر او باسماء الزوجات والابناء والاقارب او تحت مسميات اخرى
وكل من تولى منصب نتيجة سياسة التمكين وظلم الاخرين المؤهلين الاكفاء سيتم تطهير الخدمة المدنية منه دون شفقة او رحمة بل وسيجرد من المال الذي اكتسبه ويعود الحق لاهله
وهذا تمشيا مع تعاليم الدين الاسلامي الحنيف


#896428 [Hawari]
3.00/5 (1 صوت)

01-26-2014 12:23 PM
يا اتاذ شوقي ليه نسيت احمد حسن عبد المنعم وال ابو العلاء و عبد المنعم محمد وال عبد المنعم وال عثمان صاح وال الشيخ مصطفي الامين وال النفيدي كلم ناس الانقذ وعبد الرحيم ده عنهم يبدو انه ما عارف حاجة كمان اهله ناس بيومي وناس القباني


#896417 [ARIF]
5.00/5 (1 صوت)

01-26-2014 12:13 PM
الا خ شوقي ,
فعلاُ الاختشوا ماتوا, إ ضافة لما ذكرته عن هذا الرجل أذكر أن الاستاذ الصحفي محمد طه رحمة الله عليه, اتهم كل من الدكاترة( عبد الرحيم حمدي وصابر محمد الحسن وتاج السر مصطفى ) في مقال نشر بجريدة الاسبوع وقتها , و اتهمهم بانهم إختلسوا مبلغ 7 مليون دولار في صفقة تشييد مبنى بنك السودان بالمقرن, وأذكر انه قال لهم بالحرف أنا اتهمكم بالفساد و اطعن في أمانتكم واتحداكم ان تشتكوني في المحاكم. وصمتوا جميعهم


#896415 [ودالشريف]
4.00/5 (1 صوت)

01-26-2014 12:11 PM
حمدي بدرالدين سبب انهيار الاقتصاد السوداني المفروض يقدم للمحاكمة بسبب تعويم الجنية السوداني حتى الان الجنية السوداني لم يذوق طعم العافية انشاء الله ربنا ينتقم منك ياحمدي


ردود على ودالشريف
United States [ابوالشوش] 01-26-2014 06:53 PM
بنك الرواد ده محله وين وموقعه الجغرافي عليك الله عشان نصعه في خطة الدك والاحتلال حتي لاتسرق او تحرق مستنداته اما عن حمدي لو دخل المستراح الجماعة عارفين محله بيكونون لكن الرواد ده نحن كقراء ماعرفتاه الا منك وشكراً علي هذه المعلومات حتي نعلق اي كوز من رقبته في سوق الله اكبر لانه لازم يكون في عقاب وموت لجماعة ديل حتي يبقي السودان ويعود عمنا شوقي بدري الي السودان معزز مكرم وهو في هذا العمر حرام نفقد قلمه ولم نستمتع به الا في الصحف فاصبر يا استاذنا شوقي هانت وقريباً انت في الخرطوم

European Union [إبن السودان البار ***] 01-26-2014 04:41 PM
يا الحبيب حمدي بدرالدين دا مذيع ناجح وذو صوت مميز ومتمكن وقد عمل لفترة بإذاعة صوت أميركا وشخصية محبوبة وهو الآن طريح الفراش مريض مهمل من دولة الكيزان ؟؟؟ ندعوا له بالشفاء العاجل وطولة العمر ؟؟؟ وإعتقد بأنك تقصد الملياردير عبد الرحيم حمدي اللص الظريف والذي الآن كب الزوقة من الكيزان وأسس بنك جديد بأسمه مع إبنه ( بنك الرواد ) والرواد ديل طبعاً حا كونوا كبار لصوص الجبهة وعوائلهم للغف الحلال؟؟؟


#896363 [البانوشى]
5.00/5 (1 صوت)

01-26-2014 11:36 AM
و الله بسطتنا تب ده الكلام الصاح زى ماقلت القبطى ده هو الدمر الاقتصاد لانو ماسودانى و اتحداهو ما سودانى ممكن يكون مجنس و الزى ده كتاااااااااار زى ماقال المثل الجلد الما جلدك جر فيه الشوك . قال سياسة السوق الحر حر لظى بركة الاهى وكمان مكحلها بشهادات شهامة قال لكن حقيقة اثبت شهامتك فى الفساد . ليه يعنى حرية فى السوق و مافى حرية فى اى شئ تانى
وين زمن كل شى عليه دباجة التسعيرة اذا كان فى الدكان فى البقالة فى المعارض فى الشارع كل شئ متفق عيه سعر واحد و بصدق و بضاعة قمة الجودة . ما كان فى اسلوب التفاوض و المجادلة( خلى لى و نقص لى )و لا الشراءولا فى البيع لان السعر كان موحد و ما بيد التاجر فى جهات خاصة للتسعير لا بضر بالتاجر و لا المواطن
شنو يعنى السوق الحر هل تعنى
مواد غذائية فاسدة
اسلحة من روسيا فاسدة
تقاوى من تركيا فاسدة
باصات كورية ولا صينة ماعرف فاسدة
ادوية جاية من وين ماعراف فاسدة
كل الصناعات الصينية الواردة للسودان فاسدة
يعنى ببساطة كدة ادى ناس الجمارك حقهم ووناس حماية المستهلك احمى ليهم جيبوهم بعداك انشاء الله تدخل كوكايين و هيروين ومش كدة وبس لا لازم تسعر بمزاجك يعنى السعر البعجبك


#896359 [معز كشمبه]
0.00/5 (0 صوت)

01-26-2014 11:34 AM
عليك الله الكلام ده كلوا كان في السودان شكيتك علي الله يا حمدي ينتقم منك ومن الكيزان يوم الموقف العظيم . انتو قايلين اليوم ده مابيجي ولا شنو؟ هذا المقال رائع بمعني الكلمه ويصلح لان يدرس في المستقبل لطلاب الجامعات في كليات التاريخ والتجاره والاقتصاد حتي نعتبر .


#896313 [moy ako]
5.00/5 (1 صوت)

01-26-2014 11:03 AM
اكثر مايغيظيني هاته الايام ونحن نراهم يخرجون علينا قائلين بانهم نصحوا ولم يستمع لهم، انظر لحسين خوجلي, قوش, عبدالرحيم حمدي, غازي, حاج ماجد.علي محمود والقائمه تطول.
فاذا كان كلهم يعرفون الصاح من الغلط فلما لم يعملوا به؟
نحن بسببكم سياساتكم نتذيل اغلب قوائم الامم في القرن الواحد والعشرين…من النمو الاقتصادي للصحه للرياضه للتعليم للحريات للسلم الاهلي للحكم الراشد.
انكم تغشون انفسكم ان ظننتم بان تعويض خمس وعشرون عاما وبحساب القرن الواحد والعشرين ممكنا للحاق بركب الامم في التقدم والازدهار؟
بل الحقيقه اننا نشاهد الان فاصل الانقاذ وهي تلعن نفسها!


#896239 [ود دردق]
5.00/5 (1 صوت)

01-26-2014 10:13 AM
شوقي بدري الله يديك العافية والله ما خليت حاجة ده الكلام تنوير ابو اصلي للشعب ونشر الغسيل بصابون داب بتاع العذاب


#896234 [cresbo]
4.00/5 (1 صوت)

01-26-2014 10:09 AM
ياخ ياخ تنسى الشيخ مصطفى الامين كيف؟؟؟؟؟؟


#896221 [بوكا]
4.00/5 (1 صوت)

01-26-2014 09:58 AM
ايوه يا أستاذ شوقي ،، دا اكتر طفيلي ساهم في دمار الاقتصاد ، عليك الله اديهو بالحته الفيها الحديده ، من كان عاوز ياجر كافتريا بقي عندو بنك تنميه الصادرات ،، محن


#896204 [الصبار]
0.00/5 (0 صوت)

01-26-2014 09:49 AM
لعنة الله عليك يا حمدي انت سبب كل البلاوي التي حصلت للاقتصاد السوداني يا كلب يا موساد اظنك ناس الموت وانك لم تكن مخلصا يوما لهذا الشعب المسكين ، ادخلت البلد في ضائقة اقتصادية لن ينساها لك الشعب السوداني كله حتى يوم موتك ايها الخائن اين اخلاصكم لهذا الوطن وشعبه ...

علموكم كدا ان تشبوا انفسكم واولادكم وتتركوا الشعب يعاني الامرين تلك هي رسالتكم لهذا الشعب .


آلا تخلجل بالله من فشلكم الدائم الذي ادى لهلاك الشعب السودان اين تذهب من الله يوم تقبر ايها الوغد ايها الكلب المسعور . اثريتم انفسكم جميعا حكومة ووزراءً على حساب المواطن المسكين ---


#896188 [اسامة الكردي]
4.00/5 (1 صوت)

01-26-2014 09:40 AM
الدرس في الأخلاق دا لازم يصل السفاح مع انه ما حا يفهم منه اي شيء ، ويصل مخرب وليس محرر الاقتصاد وصاحب البتزا وأخيرا لوزارة التربية والتعليم ليدرس في كليات التجارة والاقتصاد


ردود على اسامة الكردي
European Union [كديس من نطاك] 01-26-2014 02:38 PM
ويدرس كذلك في مادة التاريخ للاجيال القادمه


#896142 [كترانج]
0.00/5 (0 صوت)

01-26-2014 09:09 AM
في هذا المقال تم تلخيص الوضع الذي كان عليه السودان قبل الأنقاذ
وماتم فعله بواسطة المدعو حمدي ورفاقه طيلة هذه الحقبه من الزمن
وكان هذا خليط من الفشل والتدمير الممنهج
فهل تدمير البشر بهذه الطريقه التي نراها هي من اهداف وسياسات الأخوان ام هناك شيء لا نفهمه ؟؟؟


#896140 [المتغرب الأبدي]
4.00/5 (1 صوت)

01-26-2014 09:06 AM
يا ريت الكلام دا يقرأه حمدي وكل الكيزان المخدوعين الذين يرون فيه أسطورة اقتصادية عظمى لا ولن تتكرر ..


#896125 [ابراهيم علي ابراهيم]
4.00/5 (2 صوت)

01-26-2014 08:56 AM
والله يا شوقي بدري
مدرسه في الاقتصاد
ومدرسة في التاريخ الاجتماعي
السنه الفاتت قريت ليك كتاب عن امدرمان
بالله جمع الماده دي
يديك العافية


#896122 [Abu]
4.00/5 (2 صوت)

01-26-2014 08:51 AM
UTTERLY FABULOUS…..HOPE SOMEONE WILL BE KIND ENOUGH TO PASS THIS ARTICLE TO THIS BASTARD DEVIOUS CREATURE? SURE HE DOESN'T HAVE THE AUDACITY TO COMMENT INTO YOUR ARTICLE…….


#896109 [ابولكيلك]
5.00/5 (1 صوت)

01-26-2014 08:43 AM
كفى علينا مثلث حمدى الفتنة التى فتت السودان وما زال اثرها يعمل حتى الآن وما زال حمدى يمارس هواية الهروب فهو ليس بسودانى ( بافعاله واعماله ) ولا يكن للسودان ذرة من تقدير فهو شخصية سايكوباتية حاقدة على الانسان كرفاقه مدعى الاسلام وهؤلاء زبد يذهب جفاء ويبقى ما ينفع الناس .


#896102 [ابزرد]
3.00/5 (1 صوت)

01-26-2014 08:36 AM
تسلم يا استاذ والله هري هري وهردت هرد.امبارح شبونه قال عنو الدب العجوز


ردود على ابزرد
European Union [Rebel] 01-26-2014 03:10 PM
* إسمه "الدب البرى العجوز" كما قال شبونه.
* و معروف ان الدب البرى، يا اخى، هو اخطر انواع "الدببه"... و عندما يكبر و يصير عجوزا فهو الأسوأ: فتكثر ضحاياه دون ان يتمكن من الإجهاز و إلتهامها تماما.. فهو فقط "يستمتع" بألإكثار من الضحايا، "تشفيا" و "حسرة" على ايام شبابه و فتونته. و هذا بالضبط ما تفعله "الدببه العجوزه المتاسلمه" حسرة، و تشفيا فى الشعب السودانى، كتعويض "نفسى" على مرحلة شبابهم "المجروح"!! و لا ازيد.


#896091 [مهيره]
0.00/5 (0 صوت)

01-26-2014 08:20 AM
عفيت منك غسلت الحلبي غسيل صاح صحي الاختشوا ماتوا



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة