الأخبار
أخبار إقليمية
ما هي مفاجأة الرئيس ..؟؟
ما هي مفاجأة الرئيس ..؟؟
ما هي مفاجأة الرئيس ..؟؟


01-26-2014 07:45 AM
الطاهر ساتي


:: لماذا قطعت الدجاجة الطريق؟، سؤال فلسفي عميق حيَر الفلاسفة.. ويظل السؤال يحظى بإجابات مختلفة، وتجاوز الفلاسفة إلى مجالس الناس والصحف، والطريف في الإجابات هي دائما ما تكون حسب أماني متلقي السؤال..ولكن، بعد الإعلان عن مفاجأة الرئيس المرتقبة، سبب قطع الدجاجة الطريق لم يعد سؤالاً فلسفياً بالشارع العام بالسودان، بل تحول ذاك السؤال إلى ( ما هي مفاجأة الرئيس؟)..وبزاوية اليوم، لأهمية هذا السؤال (الفلسفي والعميق) ، ننطلق - من هذا المنطلق - ونجمع إجابات السؤال حسب أماني بعض الأحباب والفلاسفة.. !!

:: مع حسين خوجلي ..أنا إفتكر أهلنا في أمدرمان والشرفة عندهم رؤية مقبولة لمفاجأة الرئيس، وهي تأسيس حزب السودان الكبير..يا جماعة ما نغش نفسنا ساكت، الأحزاب دي ما قادرة تحل مشاكل البلد، ليه ما نخلق حزب السودان الكبير؟..ناس أمدرمان عندهم هناي ..عندهم تجارب ثرة وموثقة في الحتة دي، ليه ما نطور التجارب ونصنع حزب السودان الكبير؟..أنا إفتكر الأخ الرئيس لازم يطلق حزب السودان الكبير..وغير كده ما ح نقبل أي مفاجأة ..!!

:: مع الطيب مصطفى..إنها الرويبضة ياسر عرمان، والله أكاد إتقيأ على الورق عندما اكتب عن مشروع السودان الجديد وأذيال أمريكا والهالك قرنق.. بالله عليكم ما قيمة مفاجأة الرئيس ما لم تخلص البلاد من مشروع أولاد قرنق؟..وما أن تأخرت المفاجأة حتى أخرج بعض المنبطحين أضغانهم وطفقوا يهرفون قدحاً وذماً في توجهات المفاجأة الوطنية ظناً منهم أن المفاجأة لن تعود وتكشف زيف باطلهم وعوار منطقهم ولتعري ثقافة الاستسلام..أعلنها أخي الرئيس، بحق الإسلام أعلنها حتى يعلم قطاع الشمال بأن المجاهدين أمثال تلفون كوكو لهم بالمرصاد ..!!

:: مع إسحق فضل الله..
: وأخبار أمس تقول إن مفاجأة الرئيس مصنوعة ..
: والناس يرخون آذانهم ليسمعوا أن المفاجأة قرشت حلقوم الأحزاب
: وفي مصر يستعيد الناس قصيدة بيرم هذه الأيام و شئ تحت مفاجأة الرئيس يُعيد صناعة الخرطوم ..
: وأفورقي يستضيف معارضاً عجوزاً..
: ويسأله عن المفاجأة..
: وبعض ما يجري فوق المفاجأة يُعيد صياغة شرق السودان..
: وأفورقي يرشف القهوة مع المعارض العجوز..
: والمعارض العجوز يبتسم و يرسل سبعين الف جندي تحت ظلام الخرطوم ..و..
: 60 دوشكا على 30 عربة و 40 قلاب..وسائق العربة خ ب 232 يشعل سيجارته..والمفاجأة تشتعل..!!

:: مع عثمان ميرغني ..والله العظيم صدقوني..مفاجأة الرئيس هي عودة التيار.. هل تذكرون ما قلته لكم في عمود سابق؟..التيار دخلت قلوب الناس بسرعة..صدقوني..ولكن المفاجأة التي تبحث عنها الصحافة بالمعنى المباشر لكلمة ( المفاجأة)..ليس محلها الحكومة.. بل ولا حتى في الأوراق الرسمية للحكومة..لاتضيعوا وقتكم في البحث عن مفاجأة الرئيس .. صدقوني ..حتى هذه اللحظة يزداد يقيني بأن المفاجأة تعرضت لمؤامرة ..إما لمصالح مباشرة ..أو مصالح غير مباشرة ..بكل أسف يا نواب البرلمان..والله العظيم صدقوني ..أنتم أكبر مفاجأة ..!!

:: مع كمال عمر..(لن أقبل )، ونحن في تحالف الإجماع الوطني اجتمعنا وأعلنا موقفنا الرافض للمفاجأة، وأصدرنا بيان ولسنا مسؤولين عن موقف حزب الأمة من مفاجأة الرئيس، هذا يُسال عنه حزب الأمة يا أخي الكريم..!!

:: مع الإمام الصادق ..نحن رفضنا مفاجأة الرئيس في المبتدأ ولكن ينبغي أن نقبلها بتوضيحاتها ..أولا، كتبنا مذكرة تفسيرية للمؤتمر الوطني ووضحنا موقفنا من المفاجأة، وهو موقف يصطحب ثلاثة مبادئ أساسية، أولاً مبدأ التراضي الوطني الذي يشمل خمس نقاط أساسيه، النقطة الأولى إعادة هيكلة الدولة على أربعة أسس جوهرية، أولاً..وشكلنا لجان مشتركة لدراسة المفاجأة..!!

:: مع مولانا الميرغني ..هذا الأمر يرجع إليكم، وأنتم أدرى بمفاجأة الرئيس، ونحن نعلم ذلك، وأنتم تعلمون، وعلينا عدم التفريط في وحدة السودان، وفوضنا لجنة الحزب لدراسة أمر مشاركتنا في المفاجأة، ولكن في سبيل وحدة السودان سوف نقبل المشاركة في المفاجأة..وأنتم تعلمون ذلك ..!!

:: مع دفع الله حسب الرسول..حقوق المرأة هي المطبخ، ومفاجأة الرئيس لاتخالف رأي العلماء إلا في هذه الحقوق، وأنا ما ح أسكت ليكم..وبجاهر بالحق في البرلمان لحد ما النسوان يقعدن في بيوتهن، وأنا ما ملزم بالمفاجأة..مفاجأة شنو والشوارع مليانة بنات؟..المفاجأة لازم تلزم المرأة بعدم الخروج إلى السوق والجامعة إلا مع محرم ..!!


[email protected]


تعليقات 64 | إهداء 0 | زيارات 20639

التعليقات
#898046 [كوارتى]
0.00/5 (0 صوت)

01-27-2014 07:31 PM
بسم الله الرحمن الرحيم
المفاجأة الاولي انه البشير متفاجئ انه فى الحكم حتى الان
المفاجأة الثانية انه تفاجأ بقبول الترابى والصادق للدعوة لحضور المفاجأة
المفاجأة الثالثة انه تفجأ بمنع صدور صحيفة الجريدة
المفاجأة الرابعة انه متفاجئ من سلفاكير الذى طرح له فكرة الوحدة من جديد بين الجنوب والشمال
المفاجأة الخامسة وصلته فجأة رسالة من المحكمة الجنائية بالعفو عنه
المفاجأة السادسة انه إندهش فجأة بمعلومات أمنية ان كل الشعب متفاجئ وينتظر مفاجأته
المفاجأة السابعة ان الريس اصيب فجأة بفاجعة جعلته يتنحنح و يتنحـــــــــــــــــــي
وأخيرا" المفاجأة انو ما فيش مفاااااااااااااااااااااااااااااااااااااااااااااااااجأة


#897066 [ودالباشا]
0.00/5 (0 صوت)

01-26-2014 11:44 PM
المفاجأة.. هى نحنا الراجين المفاجأة


#897056 [hassan]
0.00/5 (0 صوت)

01-26-2014 11:34 PM
المفاجاة ان يزهب هو ومن معه من الجرزان
بالجد تكون مفاجاة
لانو ديل ما صدقو العيشة العمرهم ما كان بحلمو بيها حتي
في الاحلام


#897023 [أبوسارة]
0.00/5 (0 صوت)

01-26-2014 10:54 PM
لينا 25 سنة و ما فاهمين حاجة!!!


#897000 [حداثة صالح]
0.00/5 (0 صوت)

01-26-2014 10:31 PM
وأفورقي يرشف القهوة مع المعارض العجوز..
: والمعارض العجوز يبتسم و يرسل سبعين الف جندي تحت ظلام الخرطوم ..و..
: 60 دوشكا على 30 عربة و 40 قلاب..وسائق العربة خ ب 232 يشعل سيجارته..والمفاجأة تشتعل..!!
والله حق اسحاق والصادق المهدي قوية شديد ازلطا فيها عديل كدا ...دي ذكرتني بالصندوق الذي عرضه احد امراء في زمن هارون الرشيد ب انه فيه كنز واشتراه رجل ودفع 100 الف درهم فوجد صندوق داخل صندوق صغير بداخله ورقة مكتوب عليها من اراد ان تطول ليحته فاليمشطها من تحت الي فوق وضحك الجميع .والزول دفع 100 درهم ..حيكون لعبت كراسي ل اكتر ..انتوفاكرين حيعني انا والي مثلا ؟


#896933 [سوداني وافتخر]
0.00/5 (0 صوت)

01-26-2014 08:59 PM
اخشى مااخشى ان المفاجأة المؤتمرين يبقوا مؤتمر واحد الله يكضب الشينة


#896872 [nagimoneim]
0.00/5 (0 صوت)

01-26-2014 07:46 PM
هذا هو سبب تأخركم في كل المجالات دائما ما تسبقون الاحداث بعد سماع المفاجأة ان كانت هناك مفاجأة علقوا شعب غريب


#896808 [AburishA]
5.00/5 (1 صوت)

01-26-2014 06:09 PM
آراء حسين خةجلي ..الطيب مصطفي..اسحق فضل الله..عثمان ميرغني..كمال عمر..الامام الصادق..مولانا الميرغني..دفع الله حسب الرسول !!!
ياخي (فاجأتنا) بيهم يالطاهر ساتي!!!!


#896781 [أبوالكجص]
4.50/5 (2 صوت)

01-26-2014 05:43 PM
إقتباس: مع دفع الله حسب الرسول..حقوق المرأة هي المطبخ، ومفاجأة الرئيس لاتخالف رأي العلماء إلا في هذه الحقوق، وأنا ما ح أسكت ليكم..وبجاهر بالحق في البرلمان لحد ما النسوان يقعدن في بيوتهن، وأنا ما ملزم بالمفاجأة..مفاجأة شنو والشوارع مليانة بنات؟..المفاجأة لازم تلزم المرأة بعدم الخروج إلى السوق والجامعة إلا مع محرم ..!!

unquote:
خُد ... أنا ما قلت ليكم الزول دا أشتر.


#896742 [ابو شهاب]
0.00/5 (0 صوت)

01-26-2014 04:50 PM
انا اتصلت على المنجم بله الغايب ونستبعد ان تشكل حكومه وطنيه من الاحزاب لانه بله الغائب اسيعد ان يدخل الصادق المهدى الحكومه الا بعد ما يطبق المقوله الشهيره لحس الكوع طبعا دى ما داخله معانا فى المفاجئه

2/ والمفاجاه انه الرئيس البشير راى ان مصلحه السودان فوق كل شىء وشاف ان الوضع متازم فى كل الجبهات وعشان ما يعيش وضميره ما مرتاح وان الشله المعاهو قادوا البلد الى الهاويه قال احسن وبوطنيه صادقه يزوغ من المؤتمر الوطنى ويسلم نفسه الى الجنائيه ويرتاح ويريح الناس والسودان

وحتى البشير اذا راح الجنائيه ينبقى على مالك عقار وياسر عرمان والحلو ان يتبوأ مقاعدهم فى النار
ولا مكان لهم فى قلوب الشعب السودانى

وبعدين دراسه شنو القاله على عثمان 24 سنه يعنى الدراسه دى ياكافى البلاء قاعد الزمن ده كلوا يعنى الواحد يكون يادوب خرج من بطن امه واتخرج من الروضه والاساس والثانوى والجامعه ولافى مالاقى فرصه عمل والدراسه لسع ماخلصت اخروها شويه لحدى ما يتزوج ويخلف بعدين كملوا دراستكم

خلاص نديكم فرصه 7 سنه و25 يوم ذى ماقال بله الغائب وبعد داك ورونا وصلتوا لشنو


#896710 [جارسيفو]
5.00/5 (1 صوت)

01-26-2014 04:25 PM
عليكم الله ياناس الموتمر الوطني استحوا علي دمكم واخجلوا علي المرحلة التي اوصلتم اليها البلاد والعباد
1/ تفتيت الوطن بانفصال الجنوب الذي لم ياتي بالسلام
2/ اهدار مقومات الاقتصاد الوطني في حروب لا جدوه منها مع الجنوب اولا والحروب الجهادية وعرس الشهيد وكذلك الحرب في شرق السودان وكذلك الحرب في جبال النوبه جنوب كردفان والحرب في النيل الازرق والصرف البزخي علي الامن والقوات المسلحة والشرطه بغرض المحافظة علي كرسي الحكم
3/ الفساد في المال العام والثراء الفاحش من مال الوطن والشعب
4/ اهدار البترول قبل انفصال الجنوب في الوحدة الجاذبه والمشروعات الكاذبه الخاسرة واخيرا سلمتم الجمل بما حمل للجنوب
5/ تدمير التعليم في السودان الان الجامعات تخرج في انصاف المتعلمين او ارباع المتعلمين والله النتخرج من رابعة كتاب زمان افضل من الذي حمل الدكتوراه في عهد الانقاذ
6/ تدمير الصحة الان الدواء المنقذ للحياة لم يكن متوفر في السودان وتفشت امراض السرطانات والايدز والتهاب الكبد الوبائي والسل
7/تدمير المشاريع القومية مثل مشروع الجزيرة والرماش وابوقرع والسوكي
8/ تدمير القوة البشرية التي هي اساس كل نهضة وتنمية وتطور اصبحوا الان كلهم وجلهم يطعاطى المخدرات والحبوب المهلوسه واقامة الحفلات الراقصه من فهيمة وندى وانصاف وحسين واحمد الجقر والكل اصبح حواته من هو الحوت وما سبب وفاته تم تدمير الذوق بسماع الاغاني الهابطه يا حليل زمن العمالقة
9/ تدمير الحياة الاجماعية والاخلاقية والتربية واخر دليل شريط الفديو والاغتصاب الجماعي وكذلك شريط رقص الاسلولي لطلاب وطالبات الجامعات هذا هو المشروع الحضاري الذي زعمتم يا منافقين
10/ افقار الشعب بنسبة90% تحت خط الفقر المدقع فاصابتهم الامراض مثل السل والايدز وغيرها من امراض التخلف
11/ تدمير الاخلاق كل يوم يوجد في العاصمة الخرطوم من واحد الي اثين من الاطفال مجهولي الابوين حتى فاضت بهم الميقوما
12/ تم تدويل قضايا السودان واصبحت البلد مستباحة من قبل القوات الدولية
13/ انعدام الامن في السودان وانتشار جرام لم تشبه الشعب السوداني الطيب
14/ وبعد 24 سنه الرئيس عنده مفاجاءة للشعب الاختشوا ماتوا


#896683 [الوالي]
0.00/5 (0 صوت)

01-26-2014 04:03 PM
المفاجأة ، انو (رئيسنا) قال حيسلّم نفسو للجنائية وماشي بكرعينو لي لاهاي ، المشكلة انو السيدة الاولى (متجرسة) يخليها في (السهلا) براها
بس بقولوا السيدة القديمة موافقة (تِحت تِحت) ..


#896642 [المفاجاءة]
4.00/5 (1 صوت)

01-26-2014 03:37 PM
احتمال عاوز يقول زدنا لكم المرتبات ورفعنا الدعم عن المحروقات ونعمل برنامج الزواج الجماعي للخريجين والخريجات


#896580 [ابو صخر]
5.00/5 (1 صوت)

01-26-2014 02:36 PM
مقال طريف وكل زول لبسوه توبه


#896566 [Rebel]
5.00/5 (1 صوت)

01-26-2014 02:23 PM
* لم اسمع قط فى حياتى.. ان هناك دوله واحده فى العالم علقت مصير ادارتها، و مستقبل الحكم فيهاعلى مفاجآت رجل واحد!!!.

* و لم اقرأ فى تاريخ الشعوب المتحضره الحديثه.. و لا القديمه.. و لم اسمع..ان هناك امة واحده ربطت امر تقدمها.. حاضرها.. و مستقبل اجيالها.. ليتم تقريرها، إعتمادا على مفاجآت رجل واحد.. و هو مجرم و فاسد فى آن!!!.

* هل يعقل ان يكون السودان..وطنا و شعبا.. همو اول تلك الدول و الشعوب .. على مر التاريخ الإنسانى؟؟!!!


#896562 [العميد المرفود]
4.63/5 (4 صوت)

01-26-2014 02:17 PM
انا قايتو بفتكر ان المفاجاءة هي السماح للركشات بعبور الكباري عشان كلنا نقول كبري وسد يا ود امقد


#896549 [موسى الضو]
4.50/5 (2 صوت)

01-26-2014 02:11 PM
يالطاهر ياخوي مفاجأة الرئيس لحقت موضوع التوالي بتاع الترابي الزماااان .... خلى ليك الجماعة في حالة جوطة وهرجلة وكل زول يفتي براهو ... ولحدي الليله ما في زول عارف التوالي هو شنو؟؟؟؟
الناس ديل ثعالب متخصصين في الهاء خلق الله فيما لا يفيد


#896542 [احمد جامبو]
0.00/5 (0 صوت)

01-26-2014 02:04 PM
وين راي الترابي من المفاجئة


ردود على احمد جامبو
[المـرق الشـايل الحمـل] 01-26-2014 03:56 PM
لن يســتطيع الكتـابة عن شــــيخو ,, ما تشــوف التفخـة دي


#896528 [هارون]
0.00/5 (0 صوت)

01-26-2014 01:50 PM
المفاجأة هي فبول الاخ الرئيس التفويض الذي منحه له الشعب السوداني للترشح لفترة رئاسية جديدة في عام 2015م. حيث عبر الشعب السوداني عن فرحته وسروره بترشح الرئيس لولاية رئاسية جديدة باصطفافه بكل ادب واحترام في صفوف البنزين والغاز والرغيف طوال فترة الازمة دون ان تحدث اي خروقات امنية او احتجاجات حيث فوت الشعب الفرصة على المندسين والمتربصين - لذا رأى الرئيس ان يكافىء الشعب السوداني بتولي زمام الامور في البلاد بالترشح لولاية جديدة وهو واثق من الفوز الكاسح.
الا رحم الله الشعب السوداني والهم ذويه الصبر وحسن العزاء.


#896507 [مرتضى الحاج]
5.00/5 (1 صوت)

01-26-2014 01:31 PM
كل يغني على ليلاه .. فأين قيس؟؟ بل قل لي أين الوطن !!


#896480 [محروق الحشا ود ام عشاء]
0.00/5 (0 صوت)

01-26-2014 01:08 PM
كلكم


#896450 [محروق الحشى]
0.00/5 (0 صوت)

01-26-2014 12:38 PM
: مع حسين خوجلي ..أنا إفتكر أهلنا في أمدرمان والشرفة عندهم رؤية مقبولة لمفاجأة الرئيس، وهي تأسيس حزب السودان الكبير..يا جماعة ما نغش نفسنا ساكت، الأحزاب دي ما قادرة تحل مشاكل البلد، ليه ما نخلق000


يعنى ياحسين خوجلى تقصد حزب الله السودانى


#896430 [بدرالنهار]
0.00/5 (0 صوت)

01-26-2014 12:24 PM
ناس فارغة وشغالة بالفارغة حكومة وصحافة وإعلام حقاً هذه زمانك يامهازل فامرحي .


#896429 [كاسترو عبدالحميد]
2.00/5 (3 صوت)

01-26-2014 12:23 PM
ولماذا بعـد سنتين ؟ هـذه اللعبة مثل هـذه القصة : يحكى ان رجلا نصابا باع حمارا الى الحاكم وقال له ان هـذا الحمار من فصيلة تمتاز بالذكاء وتعرف القراءة والكتابة. فاشتراه الحاكم منه ودفع له ثمنه من الذهـب والفضة بكمية فاقـت التصور . ثم قال الحاكم لوزيره ابحـث لى عـن مدرس يعلم الحمار القراءة والكتابة . فاحـتار الوزير من هـذا الطلب ولكنه لم يقدر ان يقول للحاكم هـذا مستحيل وكيف يقرأ ويكتب الحمار . واعـلن فى المدينة بأن الحاكم يطلب معلما لحماره ووضع اجرا ومكافاة كبيرة لمن يتقدم لهذه الوظيفة . ومر الوقت ولم يتقدم اى احـد بل صار الناس يضحكون عـلى الحاكم لغبائه . ولما طالت المدة ولم يتقدم احـد زادالحاكم قيمة المكافاة ولكنه اشترط بأن الذى يفشل فى تعليم الحمار سوف يقتله . وقـد تقدم بعض الناس حبا فى الجائزة المغرية ولكنهم بالطبع فشلوا وتم اعـدامهم. وذات يوم تقدم احـد المساطيل بعد أن ضرب ليه سيجارة كاربة الى الحاكم وقال له : انه يتقدم الى الوظيفة وهو قادر عـلى تعليم الحمار القراءة والكتابة. فقال له الحاكم: اتعرف الشروط جيدا . فقال له المسطول : نعم اذا فشلت فى تعليم الحمار سوف اعـدم. فوافق الحاكم وقال لوزيره : سلـموا الحمار لهذا المعلم . لكن المسطول قال للحاكم: يجب ان توفروا لى كل طلباتى من سكن واكل وشرب لى وللحمار وان فترة تعلم الحمار للقراءة والكتابة سوف تستغرق ثلاثة أعـوام . فوافق الحاكم وامر باجابة كل طلبات المعلم المسطول. ولما سمع الناس فى المدينة بالخبر خافوا عـلى هـذا الرجل من القتل وقالوا له : هـل انت مجنون ؟ الم تر الذين قتلوا قبلك ؟ فقال لهم: بعـد ثلاثة سنين يمكن الحاكم يموت أو انا اموت أو الحمار يموت . المهم الآن اعـيش مرتاح وربنا يحلها بعـدين . خلاصة الموضوع بتاع البشير انه عايز ليه سنتين يكون فيها مرتاح من المشاكل ويلهى الشعب والأحزاب وكل الدنيا بموضوع الحكومة القومية والدستور والأنتخابات ولسان حاله يقول ليهم: ربنا يحلها بعدين والحياة من الموت ما معروفة. اذا كان يقصد خيرا فى هـذا الوطن فيجب ان تكون الفترة لذلك شهرين فقط وهـى فترة معقولة , اما خلاف ذلك فهو ضحك على الدقون.


ردود على كاسترو عبدالحميد
United States [ود الحكووومة] 01-27-2014 02:36 PM
أعتقد أنك أصبت كبد الحقيقة مستر كاسترو أو يكون السيد/ البشكير دا عايز يورط الجماعة معاه بباقي البلد الموجوع والمغلوب على أمره

European Union [كاسترو ما تشرع من عندك] 01-26-2014 01:57 PM
القصه حقيقية للشيخ فرح ما تحولها لي مسطول وتحرف التاريخ.

يا مات الامير ، او البعير ، او الفقير


#896412 [عبد الواحد الميت من الاستغراب ولا معين!!]
5.00/5 (1 صوت)

01-26-2014 12:09 PM
لا أدرى حقيقة لماذا قفز الى ذهنى منظر (الركيبين) الذين يقفون فى مواقف الحافلات وهم ينادون على الركاب ليدلونهم الى مسار الحافله التى يقفون بجوارها(الشنقيطى او الكلاكله او الدروشاب.الخ!!)وخيل لى بعد قراءة هذه المقاله أنى ذهبت الى ميدان جاكسون وإعتليت الصينيه الواقعه شمال كوبرى (الحريه)وانادى بأعلى صوتى على الاحزاب قائلا (نفر..نفر.. توالى الترابى بالنص!!)بينما شخص آخر يقف بجوارى وهو ينادى (نفر..نفر.. حزب السودان الكبير باللفه!!).. يا أيها السيدات والساده الكرام هل كتب لنا أن نعيش ربع قرن آخر فى مثل هذا (اللف والدوران)هذا إن كان لنا من العمر بقيه؟!!يا أخوانا شوفوا لينا حل مع (العكاليت) ديل يرحمكم الله !!.


#896407 [مهرود حشا]
0.00/5 (0 صوت)

01-26-2014 12:06 PM
ههههههههههه والله يا الطاهر ابداع .....


في زول قرا كلام الهندي عزالدين عن راكوبتنا ؟


#896394 [حسين عبدالله]
5.00/5 (1 صوت)

01-26-2014 11:58 AM
المفاجأة هي: مافي أيّ مفاجأة.
The surprise is: there is no surprises.

أنسو الموضوع وأمشو شوفو شغلكم.
Forget it and just go to work.

لا مفاجأة، ولكن مؤامرة كبري.
No surprise, but a BIG conspiracy.

الفاشلين الحاليين يُقررون تسليم الحكم للفاشلين القُدامي.
The current losers are deciding to give the power back to the old losers.

والمقابل هو: ضمان سلامة المجرمين.
And the price is: safety assurances for the criminals

كل حزب يحاول الحصول علي أكبر قطعة من بقايا الكيكة.
Every party is hunting for bigger parts of the remaining cake.

ولا عزاء للمهمشين والبائسين.
And no body is sorry for the poor and miserables.

والقوي يأكل الضعيف.
And the strong eat the weak.

نهاية القصة
End of the Story


#896372 [ابو حمدي]
0.00/5 (0 صوت)

01-26-2014 11:41 AM
اتوقع ان يكون من مفاجات الريس اللفظية ايضا

الترابي شيخنا ومعلمنا مهما اختلفنا


#896366 [ابو حمدي]
0.00/5 (0 صوت)

01-26-2014 11:36 AM
:: مع مولانا الميرغني ..هذا الأمر يرجع إليكم، وأنتم أدرى بمفاجأة الرئيس، ونحن نعلم ذلك، وأنتم تعلمون، وعلينا عدم التفريط في وحدة السودان، وفوضنا لجنة الحزب لدراسة أمر مشاركتنا في المفاجأة، ولكن في سبيل وحدة السودان سوف نقبل المشاركة في المفاجأة..وأنتم تعلمون ذلك ..!!

الميرغني دا شكلوا من مواليد الخليج
يديك العافية استاذنا ساتي
تحليل جميل يدل علي ان ساستنا مازالوا متوقفين عند سن البلوغ


#896360 [ابو سكسك]
3.97/5 (8 صوت)

01-26-2014 11:34 AM
ظل الميكرفون يصيح من على عربة بوكس: ايها الناس، هلموا هلموا لتسمعوا وتروا "جمبلق"، جمبلق العظيم، جمبلق الجميل، لن تنسوا المشهد ابدا، الفرص محدودة فلا تدعو الفرصة تفوتكم، كل ذلك مقابل 500 جنيه (بالجديد). سرى الخبر كالنار في الهشيم وعم القرى والحضر في السودان العجيب، الكل يتساءل يا ترى ما هو جمبلق هذا؟ وكيف شكله ولونه؟ الكل يتحدث عن جمبلق العظيم، الكل يمني نفسه برؤية وسماع جمبلق العظيم، التلفزيونات والروادي تتحدث عن جمبلق العظيم، الاعلانات الورقية تملأ الشوارع، حتى الاحزاب السياسية السودانية عقدت ندوات وندوات عن جمبلق وضرورة رؤيته. ازدحمت شبابيك وتدافع الناس لشراء التذاكر، وفي اليوم الموعود تحركت البصات والقطارات والبكاسي واللواري تحمل حوالي 700000 شخص محظوظ برؤية وسماع جمبلق العظيم. اتجهت البصات صوب بورتسودان ومنها الي ميناء عثمان دقنه حيث وجد الناس عشرون سفينة كبيرة في انتظارهم. تحركت السفن الي منتصف البحر الاحمر وتوقفت في شكل دائري. جاء صوت الميكرفون ينادي بأن يصعد الجميع الي سطح السفن استعدادا لرؤية وسماع جمبلق العظيم. تقدمت سفينة متوسطة الحجم الي منتصف الدائرة، ونش كبير رفع حاوية ضخمة ووضعها على سطح السفينة بحيث يراها الجميع، تقدم رجال اشداء وفتحوا الحاوية، الونش اخرج صندوق خشبي كبير من الحاوية، يكسر الرجال الاشداء الصندوق ويخرجون صندوق اخر، يكسرون الصندوق ويخرجون صندوق اصغر. استمر الرجال في كسر صندوق تلو صندوق لاخراج صندوق اصغر منه الي ان وصلوا الي صندوق صغير حجمه اكبر قليلا من علبة السجائر. تقدم رجل عملاق واخذ الصندوق ورفعه بين يديه، انها اللحظة الحاسمة، اشرأبت الاعناق، تدافع الناس، صمت رهيب، الرجل يفتح العلبة الصغيرة ويخرج منها فتيل (قارورة) صغير بدون غطاء ويلقي به في البحر فصدر صوت سمعه الناس عبر مكبرات الصوت: "جمبلق"


ردود على ابو سكسك
[اسد] 01-26-2014 05:05 PM
حلو ياسكسك يا ها دي المفاجأة

[ود ابوراس] 01-26-2014 03:36 PM
يديك العافيه يا ابو سكسك ضحكتنى ٠لانو انا ذاتى كنت متلهيف مع الجماعه عشان اعرف ابو جمبلق ده منو


#896352 [الأحنف بن قيس]
0.00/5 (0 صوت)

01-26-2014 11:29 AM
لك شكرنااخي الطاهر . تبدع حيث مايممت . بك وامثالك من المبدعين نشرف ونفخر


#896330 [غريب ديار]
0.00/5 (0 صوت)

01-26-2014 11:18 AM
الـــطـــاهــــر ســــاتـــي


انت خطير بس ورينا شايت وييييييييييييييييييييييييييييييييييييييييين


#896317 [مدحت عروة]
0.00/5 (0 صوت)

01-26-2014 11:06 AM
المفاجأة هى زى مفاجأة السادات لاعضاء مجلس الشعب وهى ان الفراخ وصلت الجمعية!!(الجمعية التعاونية الاستهلاكية)!!!


#896294 [يوسف ادم]
0.00/5 (0 صوت)

01-26-2014 10:51 AM
وما هو قولك يا مالك في المفاجاة ام انت قوالة لاقوال الغير 59


#896280 [Adam Guma]
0.00/5 (0 صوت)

01-26-2014 10:41 AM
اخونا ساتي والله بالغت تظلم حسين خوجلي وتقول كلام كبار باسم الطيب مصطفي. لالالالا دي ما مقبولة. بعدين المفاجأه في المفاجأه ذاتها راجين شنو.


#896265 [aymen]
0.00/5 (0 صوت)

01-26-2014 10:32 AM
لافض فوووووووووك ياخ


#896251 [المندهش]
0.00/5 (0 صوت)

01-26-2014 10:22 AM
المشكلة ما في المفاجأة إذا كان على الرئيس هو قانعان من بدري ولكن الذين من حول الرئيس .. المنتفعين كلهم خايفين على مصيرهم لا تهمهم مصلحة البلد أبداً..لذلك لن تكون هنالك مفاجأة كما يتوهم البعض.. الرئيس عليه ضغوط كبيرة من هؤلاء المنتفعين .. وبكره حتشوف دعوتهم للخروج في مسيرات رافضة لهذه المفاجأة إذا جات في غير مصلحتهم ( الله أكبر .. لا لدينا قد عملنا)


#896231 [الشاكووش]
3.50/5 (2 صوت)

01-26-2014 10:07 AM
والله أبداع يا الطاهر وإذا كان المبد الآخر الكاريكاريست عمر دفع االله يعبر بالرسوم والصورة فأنت ترسم بالكلمات،،

أعجبنى تخاريف الصادق وتخريفات الميرغنى،،

الصدق: أولا........... ثم 1، 2،،،،، وفى 1: أ ، ب،،،

يا خى الراجل دة مش أحسن يودوه يكاكى فى أى روضة،،


#896225 [المشروع]
0.00/5 (0 صوت)

01-26-2014 10:01 AM
المفاجاة الكبرى هي عودة الترابي واندماج مكوك الشعبي الوطني بعد مسرحية المفاصلة التي لعبوها صح ومن ثم وعودة الاصل للفرع والفرع للأصل وهو ما كان ينفيه بشدة كمال عمر وينأى عنه وبالتالي كأنك يا ابزيد لا جيت ولا غزيت..


#896224 [ودالزين]
1.00/5 (1 صوت)

01-26-2014 10:00 AM
المفاجاة بشارة الريس ان نافع من اهل الجنة


#896217 [المفاجأة بأقلامهم]
2.86/5 (10 صوت)

01-26-2014 09:54 AM
هاهاهاهاها حلوة الفكرة انا في البداية افتكرتها كوتيشن من كل كاتب عجبني المنبطحين اليب مصطفى .... ازيدك من عندي

نافع على نافع
الكل مشغول عن المفاجأة والناس البقولو نحن طردونا خليهم يلحسوا كوعهم ، نحن ما زلنا متماسكين والمؤتمر الوطني بخير والسودان بخير وقولوا للمتخاذلين اللـ يشوفوا ليهم جهة او يقابلونا في المفاجأة الكبرى الانتخابات يكسبوا زمنهم.

على عثمان
هناك خطط ومفاجأت تحت الدراسة سترى النور قريبا ، صحيح انها تأخرت 24 سنة لكنها ستعود بفائدة للمواطن في الـ 24 سنة القادمـة، ستكون هناك مباحثات اخرى والمساعي جارية للتفاوض والجلوس مع المعارضة وسنحاورهم حتى نصل لي نقطة تفاهم ووثيقة جديده نقسم بها الكعكة الكبيرة جنوب دارفور والنيل الازرق نمنحهم فرصة لحل مشاكلهم بانفسهم وستكون المناطق الحدودية مع الدول الجديده معلقة لزيادة رقعة الحرب وضمان استمرارها وهذا خير للمواطن بان تقل عديدة الشباب بالحرب وبالتالي تقل التكلفة والاعباء على الدولة في المنصرفات .

احمد البلال الطيب
في الحقيقة الناس مشغولين والساحة الاعلامية كلها مشغولة بالمفاجأة وانا نفسي اتلهف لمعرفة المفاجأة وتربطني علاقات طيبة بالرجل البشير والتقيته في احدى المناسبات وقلت ليه شنو يا ريس حكاية المفاجأة دي انا صاحبك وريني ليها واديني ضوء اخضر عنها ... واصر طبعا على ان يخرجها في وقتها رغم الحاحي ليه فالرجل معذور امكن فيها بشريات ننتظرها .

الهندي عز الدين لاحظو حرفي ( الغين والقاف )اتعمد كتابتها هكذا...
صحيح انها مفاجاة ( قير) ( يقصد غير) الذي ( يترغبه) الشارع والمفاجآت لها رواجها فيها المتفائلين والمتشائيمن كل حسب رؤيته ( في القالب الاعم ) (الغالب)انها لا تاتي بشئ جديد ( قير) انها تحدث نقله، والسيد الرئيس لم يجد حل ( قير) هذا وبجرءة يقف امام البرلمان والمؤتمر الوطني ليفجر مفاجآته امام الجميع وعلينا ان تقبل بها شئنا أو أبينا ...

لنا عوده مع بقية الشخصيات ....


ردود على المفاجأة بأقلامهم
European Union [يتبع المفاجأة بأقلامهم] 01-26-2014 02:35 PM
بقلم استاذنا الفاتح جبرا مع التحية والتقدير
انا كنت بحلق في دقني مندمج مع صورتي طبق الاصل في المرآية ( فجأتن)اتذكر عنوان بارز مفاده انه السيد الرئيس عنده مفاجأة ( فجأتن) تبادر لي ذهني وظنيت وإن بعض الظن اثم انه عايز يبشرنا بحل موضوع قضية هيثرو وعايز يكرمني لاني كل مرة بذكروا علشان هو مشغول هنا وهناك .. (فجآتن)دق جرس البيت وناديت مين قال لي انا مندوب مطعم فلان وجبت ليك هدية ( بيتزا وهوت دوغ )
تكريما ليك ومكافآة .

كسرة اخبار المفاجأة المخبيها لينا البشير شنووووووووووو

**********


#896211 [الخبير العراقى]
5.00/5 (2 صوت)

01-26-2014 09:50 AM
يخرب بيتك يا شيخ لقد اضحكتنى من الصباح....................


#896191 [فارس عبدالرحمن]
0.00/5 (0 صوت)

01-26-2014 09:42 AM
والله ابدعت يا طاهر


#896185 [بوكا]
0.00/5 (0 صوت)

01-26-2014 09:38 AM
هههههههه والله جدعه حلوه تصور حال البلد المائل وكلِ يغني علي ليلاه ،، لكن اجمل حاجه في سيناريو المفاجأة دا ،، اتخيلت ليك الصادق المهدي بي دقنو الكلها حنه دي ،، ودفع الله بي دقنو العامله ذي مخده القطن المنكوشه وهو يرغي ويزبد في البرلمان هههه ، تنفع بتاع مسرحيات يا ود ساتي ،، هههه اتحفنه بلاهي بي الاسكتشات دي طوالي ،، ههههه عالم وهم ماسكه البلد الطيب اهله


#896182 [الصبار]
0.00/5 (0 صوت)

01-26-2014 09:35 AM
فاشلين فاشلين بكل ما تحمل الكلمة من معنى بلد سادرة حكومته في جهل عقيم ، فشلتم يا ساسة السودان ----- في تكوين بلد للشعب السوداني عليكم لعنة الله _ 25 عاما يا بشير حكم جائر مش حرام يطلق عليكم حكام ووزراء بالله كيف كانت حالة الشعب السوداني قبل تقلدكم للحكم ؟ وانظروا يا بشيرووف وحكومتك الظالمة ماذا فعلتم بهذا البلد الطيب اهله ،


نحن نعلنها للجميع بان ليس بالسودان عاقل وسياسي محنك جميعكم فاشل ايها الاوباش والدليل هو انهيار بلدنا وشعبنا المسكين امام سطوتكم للحكم وتطبيق قانون الجهل الذي مارستوه على كافة اهلنا والنتيجة هي تدميركم للسودان وشعبه ؟


اي مفاجاة تطلقها لن ترجع السودان لماضيه التليد وترجع وضعنا الاقتصادي الذي تدمر الآن تماما .

الشعب فقط يريد منكم يا بشير الترجل عن الحكم وكامل حكومتكم السابقة والحالية ومحاسبة كلابكم الذين سرقوا ونهبوا اموال الشعب السوداني ،

ذاك ما ريده الشعب السوداني مغادرتكم للحكم حالا دون عودة ومحاسبة كل رموزكم السابقة والحالية امام الجميع ايها الاغبياء .


#896180 [حد بيعرف احسن م الحكومه!!]
0.00/5 (0 صوت)

01-26-2014 09:35 AM
F A N T A S T I C WALLAHI, WA BillAhi , WATALLAHI YA TAHIR YA SATTI>
Did'nt I tell you that Nobody knows Better than the Government? The Old and the new generation of its members , all, know But SOME know MORE than the OTHERS (GEORGE ORWELL) Get Up, Comrades, It is time for Prayers


#896171 [بت قضيم]
0.00/5 (0 صوت)

01-26-2014 09:30 AM
وقيت وكفيت في تصوير المسرح السوداني والمشاهد المستمع محمد احمد المواطن الغلبان الذي لا تهمه مفاجات أسيلمة الكذاب بعد ربع قرن من الذل والهوان والبحث عن الدواء والطعام فاليحترق السودان بحكامه الدجالين


#896167 [abu waraga]
0.00/5 (0 صوت)

01-26-2014 09:23 AM
خطييييييييييييييييييييييييييييييييييييييير يا ود ساتي خاصة فيما يتعلق بالمهدي والميرغني وحبيبنا حسب الرسول .


#896161 [الخفسو]
0.00/5 (0 صوت)

01-26-2014 09:21 AM
ارجو من الطاهر ساتي ما "يدقس" ... يجب عليه تسجيل هذا المحتوى في الملكية الفكرية... وكان ما عملت كدا... بكرة بتسمع ما كتبت تردده احدى فرق الكوميديا


#896155 [سوداني وبس]
0.00/5 (0 صوت)

01-26-2014 09:18 AM
المفاجأة انك ما خليت حاجة للفاتح جبره يكتبه


#896145 [وحيد]
0.00/5 (0 صوت)

01-26-2014 09:10 AM
خلينا نتاكد من التسمية: هل هي مفاجأة ام فاجعة؟
نحن لا نتوقع خيرا من هذا الرئيس او من حزبه ... و هل تلد الهرة السوداء الا هرا اسود؟ هل تتوقع خيرا من ثور هائج في مستودع خزف؟


#896138 [nancy gamal]
0.00/5 (0 صوت)

01-26-2014 09:05 AM
مباااااااااااااااااالغة يا ود ساتي


#896117 [حمدالنيل]
0.00/5 (0 صوت)

01-26-2014 08:48 AM
والله يا ود ساتي أنت لم تترك للمفاجأة فرصة فجاءتها فكشفتها بتفاصيلها وتفاصيل تداعياتها على الشارع السياسي، وأنا أتمنى أن تكون مفاجأة الرئيس تنصيف الشيخ دفع الله حسب الرسول رئيسا مدى الحياة لجمهورية السودان.. وأتوقع أن يعلن حكومة تعمل بالنظام الاشتراكي.


#896116 [الفاتح النوبي]
0.00/5 (0 صوت)

01-26-2014 08:47 AM
هل نحن ديمقراطيون؟؟؟؟
هل نحن وطنيون؟؟؟؟؟
ماذا نريد نحن؟؟؟؟؟
المعارضة تبحث عن الديمقراطية وحين تلوح شمعة في الطريق ( انتخابات مثلا تقاطع وتتحدث عن تزوير قبل ان تبدا)
لماذا لا تقدم المعارضة رؤيه واضحة وبرنامج معقول للشعب لكي نخرج في مظاهرات تايدا ؟؟؟؟
هل بقتل الاطفال والنساء وادعاء الانتصار وقتل واسر الجيش السوداني ( وما تسمونه جيش الكيزان ) ستحكمون السودان؟؟؟


#896113 [fadeil]
0.00/5 (0 صوت)

01-26-2014 08:45 AM
بالله يا ناس الراكوبه وحفاظا علي أرواح صغارنا، أوقفوا صور هذه البعاعيت عن صحيفتنا المفضله ولكم الشكر .


#896100 [المدافع عن وحدة السودان]
0.00/5 (0 صوت)

01-26-2014 08:34 AM
اسي دا وش نصتبح بيهو.. اعوذ بالله .. صدق قرن لمن قال وش اسحاق زي افكاروو .. his ideas is similar to his face ..


#896096 [ابونديبو]
5.00/5 (2 صوت)

01-26-2014 08:28 AM
المقال ممتاز ويوصف ما في جعبة السياسين والزعماء بتاعين آخر زمن!!!!!والنتيجة ضياع وطن


#896095 [Shah]
0.00/5 (0 صوت)

01-26-2014 08:28 AM
اصبحنا بالله و الرسول ...


#896088 [ربش]
0.00/5 (0 صوت)

01-26-2014 08:09 AM
إبدااااااع ... يا ود ساتي . وصدقني مفاجأة الرئيس ( تيتي تيتي ذي ما رحتي ذي ما جيتي ) . و الفاجئة الحقيقية نسمع بيهو متوهط في لاهاي .


#896077 [ابو عبد الله]
5.00/5 (1 صوت)

01-26-2014 07:53 AM
تجسيد ذكي لملهاة الساسة في السودان



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة