الأخبار
أخبار إقليمية
مفاجأة السفاح تقديم استقالته من رئاسة المؤتمر الوطني وتأجيل الإنتخابات لمدة عامين
مفاجأة السفاح تقديم استقالته من رئاسة المؤتمر الوطني وتأجيل الإنتخابات لمدة عامين



تشكيل لجنة قومية برئاسة الصادق المهدي
01-26-2014 07:46 AM
الجريدة : سعاد الخضر

يعتزم رئيس الجمهورية عمر البشير تقديم استقالته من رئاسة المؤتمر الوطني وأماطت مصادر الجريدة اللثام عن المفاجأة التي سيعلن عنها الر ئيس خلال الأيام المقبلة وقالت إن الرئيس سيتقدم باستقالته من المؤتمر الوطني وسيعلن عن تأجيل الإنتخابات لمدة عامين عقب إصداره قرار بتشكيل لجنة قومية للدستور برئاسة برئاسة رئيس حزب الأمة الامام الصادق المهدي وبررت الخطوة لتشكيل حكومة قومية و توقعت تعين نائب رئيس الجمهورية لشؤون الحزب بروفيسر ابراهيم غندور خلفا له في رئاسة الحزب ، وأكدت ذات المصادر إن الرئيس وافق على تشكيل حكومة قومية وتشكيل لجنة قومية للدستور برئاسة رئيس حزب الأمة الامام الصادق المهدي وتأجيل الإنتخابات لمدة عامين وقيام مؤتمر جامع لقضايا السلام والاقتصاد .


تعليقات 53 | إهداء 1 | زيارات 19180

التعليقات
#897222 [adil a omer]
0.00/5 (0 صوت)

01-27-2014 03:29 AM
دى اسمها فلنلعب الخيبه باصات اهو برضو خرا الاسياد بركه


#897084 [قول النصيحة والباقى علي الله]
0.00/5 (0 صوت)

01-27-2014 12:00 AM
الاخوة السودانيين الاحرار اصحاب الثورات اهلي الحنان الطيبين ناس الحارة والدواس مافى استسلام تاني اليدوها لذيد ولا عبيد من الناس خلاص نحن فى قناعة تامة ديل ما فيهم خير جربناهم كلهم لاكن طلعو ناس بجم وما بيفهمو فى السياسة التكتح ولا قادرين يديروا احزابهم الدكاكينية الفاشلة المشتتة المتشظية ولو ما هبالة العسكر والدراويش ما كان استمروا فى الفترة طوال ال24 سنة فى الحكم لاكن خليها ينقلع منها ويدينا ضحروا يشفوا نحنا بنعمل شنو والكلام بعدين بيكون لينا نحنا وعندنا راى تاني هم يقولو كلامهم ونحنا نقول كلامنا ونشوف نهايتها ترسي لوين الصادق المهدى ضعيف وما عندو قدرة لادارة البلد الناس عليها تتحزم وتتجهز للتقيلة الجاية حساب يعني حساب وما دايرين مجاملة عشان نقدر ننظف القزارة دى ياناس الزول لو مكانو اتوسخ اول حاجة بيعملها تنظف بيتك ومن ثم تبدا فى تنظيم دارك وبيتك عشان تعيش مرتاح وتصحح طريقك يجب علينا مثل ما فعل المصريين الموضوع كبير وخطير ولازم نضحي عشان الاجيال الجاية تعيش مرتاحة الموضع تاني ما عنده علاقة بي قبيلة ولا حزبية شعب سوداني وقضية سودانية لانو المتضرر الاغلبية من الشعب يعني لو افترضنا نحنا 40 مليون نسمة 35 منا يعاني الزول والهوان والخمسة البقية عايشة فى نعيم وخامنها وعايشين احسن عيشة وخلو لينا الفتافت نتصارع فيها والله حسرة ووجع قلب لمتين نعيش الحال دا ةانا اقول ليك انت كان رئس ولا وزير احسن تحاسب ضميرك قبل ما تجي ساعة الصفر علي الاقل نقول الزول دا حاسب نفسو عمل حاجة لوطنو وخلص نفسو من المصير القاتل انت لو عندك ضمير اعمل بطريقة صحيحة وشفافة ووضح تام لانو الولة ما بتنفع واللف والدروان فى حلقة مفرقة ما بتحقق نتائج القصة واضحة وما دايرة تسويف ومماطلة والفاكر نفسو تانب بيقدر يطبق النظرية بتاعة الحرامية يكون ارتكب فى نفسو اكبر جريمة فى التاريخ والما عارف يسال الشارع السوداني بتقدر تعرف الحقيقة لانو كل الناس مغبونة ودايرة يجي اليوم عشان تفش غلها والملكتوه طوال ال24 سنة ما بينفعك فى دقيقة اسال فى الشارع اصغر شافع ممكن تبين ليك الحقيقة انتو قتلتو فى اى بيت شخص عزيز لي بلدو ووطنو كان بالجوع والمرض ومناطق العمليات انت كان وزير ولا رئيس دولة ولا رئيس حزب وداير تبين ليك الحقيقة امشي اسال الشارع واسال ناس الولايات واسال المغترب واسال الطالب واسال الاستاذ والعسكري ورجل الجيش عشان تعرف الحقيقة ونحن نقول فى ختام الكلام دا زى ما قال الثل السوداني التسويهو بايدك يغلب اجاودك والمثل انطبق تمام وكما تدينو تدانو


#896821 [1+1]
0.00/5 (0 صوت)

01-26-2014 06:30 PM
ماذا يضير لو قدم عمر البشير استقالته من المؤتمر وكل المؤسسات والوزارت والخدمة المدنية وكل التنظيمات والكيانات التابعة للمؤتمر الوطني الحاكمة للبلد من تحت في المحليات والخدمة المدنية مسيسة وادوات مساعدة ومناهضة للمؤتمر الوطني وهي قابضة على كل مفاصل الحياة والفساد مستشري ومنتشر بقذارة
انظمة مثل جهاز الشرطة الشعبية وجهاز الأمن فهذه التنظيمات ارهقت ميزانية الدولة.. ويجب تحويل مواردها لبناء قوات مسلحة قوية جامدة بكل الصلاحيات وشرطة نزيه عفيفه تابعة وتعمل وفق انظمة الشرطة والجيش

لا نريد تكوينات وشرطة شعبية واجهزة امن تابعة لحزب، انما ولاءها للوطن اولا، وان يتم الاختيار من الان في الخدمة المدنية وفق الاجدر والاحسن وأن يتم اعادة من فصلوا من الخدمة المدنية.

التغيير في السودان يغيروا شنو ويخلوا شنو يغيروا النفوس والقيم اللي ضاعت ولا الاحلام والأمان ومحبة الناس.

نسال الله أن يلطف بنا وأن يرحمنا برحمته التي وسعت كل شيء وأن يقدر لنا الخير في كل الأوقات


#896794 [AburishA]
0.00/5 (0 صوت)

01-26-2014 05:51 PM
ياجماعة ده كلام (عيال) ساكت.. ما يحدث من ارهاصات هذه الايام هو محاولات للهروب مما آل اليه الحال ونوع من حيل المخارجة.. المطلوب يا سادة هو اسقاط هذا النظام ومحاسبته على الجرائم التي ارتكبها في حق البلاد والعباد...وهل الصادق المهدي افضل من البشير!!! راجعوا التاريخ وراجعوا انفسكم.. مع خالص الود!!!!


#896770 [صلاح نور الدين]
0.00/5 (0 صوت)

01-26-2014 05:28 PM
كدي النشوف اخرته و ما نشتت حرابنا ساكت


#896723 [مصطفى الجعلي]
0.00/5 (0 صوت)

01-26-2014 04:35 PM
لو البشير قدم إستقالته عن الحزب ما مشكلة ... المشكلة الكبيرة لو قدم إستقالته عن رئاسة الجمهورية حيصبح السودان في مهب الريح ... لو عندك رأي رد على السؤال التالي :
من سيحكم السودان بعد إستقالة البشير ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


ردود على مصطفى الجعلي
United States [يوسف] 01-26-2014 07:41 PM
ياخ بلى يخمو ويريحنا منو ,, اى صعلوك يحكم البلد دى احسن من السفاح دا , ولو شايف البشير كويس طز فيك وفيه .

European Union [مصطفى شفا] 01-26-2014 07:02 PM
أي حمار من أقرب زقاق سيدير الحكم بصورةأفضل ألف مرة من قدر الله الجانا عديييييل

United States [من البداوة إلى الحضور] 01-26-2014 06:56 PM
01- سؤال وجيه يا [مصطفى الجعلي] ... ؟؟؟

02- و فعلاً ... لو البشير قدّم إستقالته عن رئاسة الحزب الحاكم الآن ما مشكلة ... بالنسبة للسودان وللسودانيّين ... بل هو المطلوب ... ويعني تحييد البشير ... كقائد عام للمؤسّسات الأمنيّة الشرطيّة ... في المقام الأوّل ... وكرئيس للجمهوريّة ... بصفة إنتقاليّة ... ولفترة توافقيّة في المقام الثاني ... ؟؟؟

04- وهذا بالضرورة يقتضي ... أن يعلن البشير ... بكلّ الوضوح والشفافيّة ... عن حل الحكومة الحاليّة ... وعن تكوين حكومة إنتقاليّة ... لأنّ الحكومة الحاليّة هي حكومة الحزب الحاكم ... الذي ألّفه البشير من رأسه ... وفوّزه في الإنتخابات ... عبر تبديل صناديق الإقتراعات ... وطالما أنّه قد طلّقه طلاق تلاتة ... والتزم ان يقف ... كعسكري ...على مسافات متساويات .. من المتنافسين السياسيّين المدنيّين القادمين والقادمات ... فينبغي على الحزب المُطلّق ... أن يركب الشارع ... برئاسة غندور أو غيره ... ثمّ ينافس في الإنتخابات القادمة ... ؟؟؟

05- لكنّ المشكلة الكبيرة لو قدم البشير إستقالته عن رئاسة الجمهورية ... قبل أن يقدّم إستقالته عن رئاسة الحزب الحاكم ... وأنت تعلم أنّ دستور الحزب الحاكم ... يقول ... بأنّ الرئيس ... إذا ما أصابه الموت ... أو إستقال ... فسوف يكون نائبه الأوّل في الحزب الحاكم ... هو رئيس الجمهوريّة ... بطريقة أتوماتيكيّة ... وعلى حسب ترتيبات البشير الحاليّة ... فإنّ بكري حسن صالح ... التائب الأوّل لرئيس الجمهوريّة ... سوف يكون هو خليفة رئيس الجمهوريّة ... بطريقة اتوماتيكيّة ...؟؟؟

06- لكنّ الأجدى من ذلك كلّه ... هو أن يتنافس العسكريّون ... على رئاسة الجمهوريّة ... وما يتبع لها من الوظائف السياديّة وليست الجبائيّة ...وأن يتنافس المهنيّون على الوزارات الإختصاصيّة المهنيّة الإنتاجيّة ... وما يتبع لها من سلطات تشريعيّة وتنفيّيّة وقضائيّة وجبائيّة بحيث لا تتجاوز الجبايات 2.5% من صافي أرباح المواطن الذي يريد أن يدفع الجبايات لحكومته ... بمحض إرادته ... ومقابل خدمات معلومة ... أو بنى تحتيّة معلومة ... منصور عليها في الدستور .... وموضّحة في دفتره الضريبي ... وأن تتنافس الأحزاب السياسيّة ... على الوزرارت الفهلوانيّة ... وما يتبع لها من سلطات بهلوانيّة ... ؟؟؟

07- وهذا يقتضي ... أن يتوافق ويتواثق ويتعاون السودانيّون ... أصحاب الإرادة الحقيقيّة ... والعزيمة القويّة ... على أن تكون هنالك آليّة ذكيّة وقويّة وغنيّة ... للحد من ظاهرة الإنقلابات العسكريّة ... والتمرّدات العسكريّة ... من اجل الوصول إلى السلطة الدكتاتوريّة الإستباحيّة البلاطجيّة الأونطجيّة ... وسرقة ثروات الأجيال السودانيّة ... وحيازتها ... هناك ... دولارات اميريكيّة ... ؟؟؟؟

[الصوت] 01-26-2014 06:11 PM
من سيحكم السودان لو مات البشير الآن؟؟؟؟؟؟؟


#896653 [ابوجولة]
0.00/5 (0 صوت)

01-26-2014 03:46 PM
الصادق ، وغير جدير ، بأن يترأس لجمة للدستور ، و غير محايد فهو بهذا الأمر فحليف للكيزان .
ورأيه في قوى الهامش والشباب وفي تسليم (المشير) للجنائيه معروف .


#896564 [مرتضى الحاج]
0.00/5 (0 صوت)

01-26-2014 02:19 PM
بعيدآ عن التكهنات وفرص حصولها مع الكم الكبير من التصريحات المتناقضة هنا وهناك.. هناك نقطة بالغة الاهمية إذا سلمنا أن السيناريو المفاجأة هو كما ذكر اعلاه هل سيكون اعداد الدستور اوﻵ ام الحكومة الانتقالية؟؟ جاء في صياغ الحديث : ((ﺇﻥ ﺍﻟﺮﺋﻴﺲ ﺳﻴﺘﻘﺪﻡ ﺑﺎﺳﺘﻘﺎﻟﺘﻪ ﻣﻦ ﺍﻟﻤﺆﺗﻤﺮ ﺍﻟﻮﻃﻨﻲ ﻭﺳﻴﻌﻠﻦ ﻋﻦ ﺗﺄﺟﻴﻞ ﺍﻹﻧﺘﺨﺎﺑﺎﺕ ﻟﻤﺪﺓ ﻋﺎﻣﻴﻦ ﻋﻘﺐ ﺇﺻﺪﺍﺭﻩ ﻗﺮﺍﺭ ﺑﺘﺸﻜﻴﻞ ﻟﺠﻨﺔ ﻗﻮﻣﻴﺔ ﻟﻠﺪﺳﺘﻮﺭ ﺑﺮﺋﺎﺳﺔ ﺑﺮﺋﺎﺳﺔ ﺭﺋﻴﺲ ﺣﺰﺏ ﺍﻷﻣﺔ ﺍﻻﻣﺎﻡ ﺍﻟﺼﺎﺩﻕ ﺍﻟﻤﻬﺪﻱ ﻭﺑﺮﺭﺕ ﺍﻟﺨﻄﻮﺓ ﻟﺘﺸﻜﻴﻞ ﺣﻜﻮﻣﺔ ﻗﻮﻣﻴﺔ )) انتهى .. يعني نشوف دستوركم الاول اذا عجبنا وقسم معانا نعمل حكومة قومية ما عجبنا الرئيس يرجع يقدم طلب عضوية من جديد للمؤتمر الوطني :) وكل جدادة على بيتا

لذا اعتقد ان أي اجراء ﻻيسبقه حكومة انتقالية لن يفضي لدستور حقيقي وحر يمثل ارادة المجتمع يعبر عن طموحات الاغلبية ويحترم خصوصيات اﻻقليه

دائمآ ما يكون الشيطان في التفاصيل و بين السطور فما بالك اذا كان الاتفاق مع الشيطان "هيم سلف"


ردود على مرتضى الحاج
[Suisse.Soudan] 01-26-2014 03:13 PM
شكرا, ما قلته عين الصواب...


#896563 [ابومحمد]
0.00/5 (0 صوت)

01-26-2014 02:19 PM
خلاص شبعووعايزين يدوالفرصة لغيرهم لاكمال مسلسل نهب الثروات ياتري من هم الحرامياالجدد ( حكومة حرامية والقومية بريئة منهم )


#896513 [radona]
5.00/5 (1 صوت)

01-26-2014 01:35 PM
هذه تسويفات لاتعني شيئا ولا تمثل طموحات الشعب السوداني بعد طول صراع منذ 24 سنة
الشعب السوداني يعلم ان الرئيس البشير سيجدد له لولاية سادسة ويعلم ان الفساد الذي انتظم البلاد يتخذ من وجود الرئيس ضمانة للاستمرار كما يعلم الشعب ان المؤتمر الوطني قد حرق جميع اوراقه داخليا حيث تعتبر علاقته بالشعب السوداني صفر وخارجيا تتربصه قرارات مجلس الامن والمحكمة الجنائية وبدات الرياح تهب عاتية شمالا من مصر وشرقا من السعودية وغربا متمردي دارفور وجنوبا متمردي جنوب كردفان والنيل الازرق ووسطا شعب مكسور يكابد الجوع والفقر والمرض والانهيار الاقتصادي التام وبزوغ عهد الازمات والندرة وكل ذلك وتطارد النظام الحاكم لعنات نيفاشا وانفصال جنوب السودان واضاعة الثروة البترولية وثلاثة خناجر مسمومة غرست في صدر الوطن تتمثل في بروتوكولات ابيي والنيل الازرق وجنوب كردفان مع استحالة رهان النظام الحاكم على القضاء على التمرد في 2014م بالطبع ..
وكما هو معلوم ان النظام الحاكم يشاركه الحكم حزب الامة والحزب الاتحادي وهنالك غزل فاضح ومكشوف مع المؤتمر الشعب اما بقية الاحزاب الاخرى فلاحول لها ولاقوة ضعيفة ومتفرقة تصارع بعضها ولا تكاد تتفق علة واحد زايد واحد تساوي كم .. اما الجبهة الثورية ومتمردي دارفور طالما انهم يحاربون خارج الخرطوم فلا خوف منهم ويستطيع النظام ان يلاعبهم لعبة الموت كيفما شاءوا وارادوا .. ولكن تبقى ارادة الشعب السوداني الذي لن يحتمل المزيد من الضنك والفقر والجوع والمرض فان كلمة اخيرة سيقولها الشعب لا محالة وهي الكلمة الفاصلة والتي ستقلب موازين النظام الحاكم والاحزاب الموالية له بما فيها حزبي الامة والاتحادي وبقية الاحزاب الصغيرة التي ترفع لافتات باسماء اخرى وهي في حقيقتها مؤتمر وطني .. شعار الشعب القادم .. لاحكم لمن حكم ..


#896505 [ود النوبة]
0.00/5 (0 صوت)

01-26-2014 01:26 PM
اقترح تعيين اسحاق احمد فضل الله رئيساً للجمهورية , هذا مجرد اقتراح يا ناس


ردود على ود النوبة
United States [الغووووول] 01-26-2014 05:18 PM
والله انه يستاهل ،،،

[ود ابو زهانة] 01-26-2014 04:44 PM
أثنى الترشيح عشان تتم الناقصة وكمان نفرح الهندى عزالدين برضه بحكم العلاقة

United States [كوز كنافه] 01-26-2014 04:04 PM
نحن شعب وليس بعاعيت ونحن شعب لسانا حلوة وكلامه طيب ليه تعمل فينا كدي يانوبه


#896500 [كمال ابو القاسم محمد]
0.00/5 (0 صوت)

01-26-2014 01:22 PM
لسنا واهمون...لسنا واهمون
المساءلة...المساءلة
لسنا واهمون
المحاسبة...المحاسبة
لسنا واهمون
القصاص ..القصاص
لسنا واهمون
سد كل المنافذ والثغرات للإفلات من العقاب
لسنا واهمون....لسنا واهمون
ربع قرن من العذاب..والإضطهاد...والقتل...وسفك الدماء...والنهب...والفساد والإفساد..والتشريد....والإغتصاب...والجوع ...والمسغبة....تشريط البلاد وشرمطتها....ربع قرن من الإحن...والضغائن...والأحقاد...والفتن ...والكذب....والمرارات...والسخائم...وكوابيس الإنتقام
واهم...واهم...واهم...من يتأبط مظلة ...عفا الله عما سلف
لن نصالح...لن نصالح القتلة والسفلة من جماعات المتأسلمة....وليكن ما يكون
لن نصالح من رماها في وجهنا صريحة مدوية
SHOOT TO KILL
ألحسوا كوعكم
أنتم شعب من الشحاتين
نحنا أصلو صفرنا العداد....وما حنسلما إلا لعزرائيل

في الواقع لسنا في إنتظار مفاجأة من مشير مكجول منفطع منبت عنين

الشعب ..أمى وأبي هو صاحب القرار والمفاجأة.....شاء من شاء ...أبى من أبى.

يجب إسقاط النظام...بكل جدارة وإستحقاق....وإعمال كل أدوات المساءلة والمحاسبة والقصاص الذى لا يعرف المداهنة...ولا المناورة...ولا التسويف والإنتظار....عدالة حاسمة قاصمة...وقصاص يهدىء ثائرة النفوس.


#896495 [عبودى]
0.00/5 (0 صوت)

01-26-2014 01:19 PM
يعنى الصادق فى اجازة 24 سنة بختك والله


#896479 [فاجعه البشير]
0.00/5 (0 صوت)

01-26-2014 01:05 PM
المعارضه الناعمه أتت أكلها،. لو كان الصادق المهدي ذو خبره سياسيه فكريه أو إداريه كان حافظ على حزبه أولا... العقليه الطائفيه سوف تهلك البلاد أكثر ما هي هلكانه و الله يكضب الشينه.


#896456 [abubaker]
0.00/5 (0 صوت)

01-26-2014 12:44 PM
كلها مجموعة كيزان يعني نحن ناقصنا الدستور (تدسترو في النار)


#896454 [مندهش]
0.00/5 (0 صوت)

01-26-2014 12:42 PM
استقالة عمر البشير عن الحزب شيء يخص الحزب وكوادره ام ما يخصنا نحن ان لا يكون عمر البشير وصي علينا لانه جاء من غير تفويض من الشعب ولقد اصبح الشعب السوداني لا يثق في الصادق المهدي لقدمرت مياه كثيرة من تحت الجسر منذو عام 1989 لذلك المطلوب هو تكوين حكومة قومية يؤكل لها عقد مؤتمر دستوري جامع لا يستثني كائن من كان من شعب السودان في التواثق على وضع دستور واضح المعالم ويكون من مقررات المؤتمر ثم اجراء عملية الاستفتاء عليه من قبل الشعب السوداني ثم تجراء انتخابات حره ونزيهه يحكمها ويضبطها الدستور . غير ذلك يصبح كل فعل عباره عن حرث في البحر . لقد انكشفت الالاعيب التي تحاك بين عمر البشير والصادق المهدي إلا لمن لا يريد ان يرى


#896449 [من البداوة إلى الحضور]
1.00/5 (2 صوت)

01-26-2014 12:37 PM
01- إقتباس ... ( وأماطت مصادر الجريدة اللّثام عن المفاجأة التي سيعلن عنها الر ئيس خلال الأيّام المقبلة وقالت إنّ الرئيس سيتقدم باستقالته من المؤتمر الوطني وسيعلن عن تأجيل الإنتخابات لمدة عامين عقب إصداره قرار بتشكيل لجنة قومية للدستور برئاسة رئيس حزب الأمة الامام الصادق المهدي وبررت الخطوة لتشكيل حكومة قومية و توقعت تعين نائب رئيس الجمهورية لشؤون الحزب بروفيسر ابراهيم غندور خلفاً له في رئاسة الحزب ، وأكّدت ذات المصادر إنّ الرئيس وافق على تشكيل حكومة قوميّة وتشكيل لجنة قوميّة للدستور برئاسة رئيس حزب الأمّة الامام الصادق المهدي وتأجيل الإنتخابات لمدّة عامين وقيام مؤتمر جامع لقضايا السلام والاقتصاد ... ؟؟؟

02- إن صحّ هذا الكلام ... فلقد أحسن العسكري البشير القيام ... بالشروع ...التدريجي ... في إعادة هندسة النظام ... بعدما شرع ... تدريجيّاً ... في إعادة هندسة مؤسّسات دولة النظام ... التي كانت تمكينيّة دكاكينيّة عشوائيّة حراميّة ... لا تعرف المؤسّسيّة ولا الشفافيّة ولا المراجعة ولا المُساءلة ولا المُحاسبة ولا النظام ... إنّما تعرف الهمبتة والبلطجة والفهلوة والبهلوة وإستباحة الدماء والأعراض والأموال وتكسير العظام ... ؟؟؟

03- لقد إستدرك سعادة المُشير ... عمر حسن أحمد البشير ... عندما أصابته صحوة ضمير ... أنّ المفكّر الإقتصادي ... السيّد الصادق المهدي ... سليل الذين صنعوا الدولة الوطنيّة الجهاديّة ... ثمّ صنعوا الدولة الوطنيّة الديمقراطيّة الأرستقراطيّة ... عوضاً عن الدولة الملكيّة الدستوريّة ... كان ولا يزال ... هو رئيس مجلس الوزراء المُنتخب ... ؟؟؟

04- ولقد إستدركت الحركة الإخوانيّة الوطنيّة ... عندما أصابتها صحوة ضمير ... وتحرّرت من إستعمار القاعدة الإخوانيّة العالميّة ... أنّ السيّد الصادق المهدي ... هو صاحب ملكيّة ... فكرةالمؤتمر القومي الدستوري ... فقبلت بالتغيير ... الذي يشتمل على على أنّ البشير قد طلّق مؤتمرات الحركة الإخوانيّة ... لكيما يقف على مسافات مُتساويات ... من كلّ السودانيّين والسودانيّات ... من أجل القادمين والقادمات ... من أرحام السودانيّين والسودانيّات ... ؟؟؟

05- ونحن لا نملك في هذا المقام ... إلاّ أن نقول ... التحيّة والإحترام ... للحركة الإخوانيّة الوطنيّة ... التي تحمّلت الفطام ... من ثدي البشير ... المصرّر ... حيث كانت ترضع منه السلطة العسكريّة والمال العام ... ولم تفعل بالبشير ... ما فعله الشيوعيّون الجنوبيّون بصاحبه سلفاكير ... ؟؟؟

05- التحيّة لصاحبنا سلفاكير ... صاحب ملكيّة التغيير ... غير التدريجي ... الذي لم يحتمله الشيوعيّون الجنوبيّون الخرخارون ... لكن والله أحسن ليهم من حكاية كتلوك ... ولا جوج ... جوك ... يا أيّها الحرامي ... الماركسي اللينيني ... العنصري ... الإنفصالي ... الأناني ... بقايا مايو الإشنراكيّة الحاقدة البائدة المرفوضة سودانيّاً وإقليميّاً وعالميّاً ... بتاعين ظاهرة الحيازات الدولاريّة ... تحت حسابات قيادات الحركة الشعبيّة الماركسيّة اللينينيّة ...التي جعلت الحساب ولد والوحدة السودانيّة ضروريّة ... وحتميّة ... كما دشّنها سلفاكير ... للحفاظ على ثروات أجيال السودان الكبير ... من عبث قيادات الحركة الشعبيّة الماركسيّة اللينينيّة ... الحراميّة الإستباحيّة الفهلوانيّة البهلوانيّة الأونطجيّة الساديّة الإباديّة ... ليس إلاّ ... ؟؟؟

06- التحيّة للجميع ... مع إحترامنا للجميع ... ؟؟؟


#896448 [ود البلد]
5.00/5 (1 صوت)

01-26-2014 12:37 PM
يعنى الصادق ورانا ورانا
لا حولة ولا قوة الا بالله
اي عسكرى وراه الصادق
انقلاب
انتقال
هو الصادق استاذ فى كلية القانون ولا كان شغال قاضى ؟؟؟؟؟
حيكتلنا كلنا ومانصل الى اخره معاهو .. والله الزول ده لوما قضى على الشعب تشوفو
يااااااااااااا رب نسأل بأسمك العظيم أن تبعد الصادق من طريق السودان والسودانيين


ردود على ود البلد
European Union [عمادالدين] 01-26-2014 01:56 PM
انتو الحكاية شنو؟ الترابى لا،البشير لا،المهدى لا. حلايب نعم،الفشقة لا. ماذايربط كل هذا؟؟؟. نترك ه لحصافة وذكاء القارى


#896433 [أبوالكجص]
0.00/5 (0 صوت)

01-26-2014 12:27 PM
آآآآه يا البشير صحيح إنك دعول. الأمريكان غطسوا حجركم في نيفاشا وتاني تأمنوهم وتدوهم سركم ونواياكم للإصلاح. كارتر إيه وامريكان إيه وانت ينسى كدا ليه؟ يا أخي خلي الحل يكون سوداني بس إنت ألتزم الصدق ولو مرة عسى أن يغفر لك ذلك من غضب الشعب وما سببته له من كوارث.


#896431 [منحنى النيل]
0.00/5 (0 صوت)

01-26-2014 12:25 PM
ردا على مايروج له هذه الايام بشان مبادرة البشير نقول ياشعبى العظيم الليله حوبتك جات شمر للسواعد وحضر الجايات والجايات بقولو اكتر من الرايحات اكتوبر وابريل فى القلوب قاعدات يوم تهدر جموعك وتملا للساحات لاناس امنهم لاسجون ودبابات بحموا الطغمه منك ياعشا البايتات


#896421 [كاسترو عبدالحميد]
5.00/5 (1 صوت)

01-26-2014 12:16 PM
ولماذا بعـد سنتين ؟ هـذه اللعبة مثل هـذه القصة : يحكى ان رجلا نصابا باع حمارا الى الحاكم وقال له ان هـذا الحمار من فصيلة تمتاز بالذكاء وتعرف القراءة والكتابة. فاشتراه الحاكم منه ودفع له ثمنه من الذهـب والفضة بكمية فاقـت التصور . ثم قال الحاكم لوزيره ابحـث لى عـن مدرس يعلم الحمار القراءة والكتابة . فاحـتار الوزير من هـذا الطلب ولكنه لم يقدر ان يقول للحاكم هـذا مستحيل وكيف يقرأ ويكتب الحمار . واعـلن فى المدينة بأن الحاكم يطلب معلما لحماره ووضع اجرا ومكافاة كبيرة لمن يتقدم لهذه الوظيفة . ومر الوقت ولم يتقدم اى احـد بل صار الناس يضحكون عـلى الحاكم لغبائه . ولما طالت المدة ولم يتقدم احـد زادالحاكم قيمة المكافاة ولكنه اشترط بأن الذى يفشل فى تعليم الحمار سوف يقتله . وقـد تقدم بعض الناس حبا فى الجائزة المغرية ولكنهم بالطبع فشلوا وتم اعـدامهم. وذات يوم تقدم احـد المساطيل بعد أن ضرب ليه سيجارة كاربة الى الحاكم وقال له : انه يتقدم الى الوظيفة وهو قادر عـلى تعليم الحمار القراءة والكتابة. فقال له الحاكم: اتعرف الشروط جيدا . فقال له المسطول : نعم اذا فشلت فى تعليم الحمار سوف اعـدم. فوافق الحاكم وقال لوزيره : سلـموا الحمار لهذا المعلم . لكن المسطول قال للحاكم: يجب ان توفروا لى كل طلباتى من سكن واكل وشرب لى وللحمار وان فترة تعلم الحمار للقراءة والكتابة سوف تستغرق ثلاثة أعـوام . فوافق الحاكم وامر باجابة كل طلبات المعلم المسطول. ولما سمع الناس فى المدينة بالخبر خافوا عـلى هـذا الرجل من القتل وقالوا له : هـل انت مجنون ؟ الم تر الذين قتلوا قبلك ؟ فقال لهم: بعـد ثلاثة سنين يمكن الحاكم يموت أو انا اموت أو الحمار يموت . المهم الآن اعـيش مرتاح وربنا يحلها بعـدين . خلاصة الموضوع بتاع البشير انه عايز ليه سنتين يكون فيها مرتاح من المشاكل ويلهى الشعب والأحزاب وكل الدنيا بموضوع الحكومة القومية والدستور والأنتخابات ولسان حاله يقول ليهم: ربنا يحلها بعدين والحياة من الموت ما معروفة. اذا كان يقصد خيرا فى هـذا الوطن فيجب ان تكون الفترة لذلك شهرين فقط وهـى فترة معقولة , اما خلاف ذلك فهو ضحك على الدقون.


ردود على كاسترو عبدالحميد
European Union [ادنبرا] 01-26-2014 03:10 PM
شكرا اخي كاسترو. قرأت الصة كااااملة واقول لك اذا كان الحمار يحتاج لثلاث سنين حتي يتعلم فان البشير يحتاج ل30 سنة حتي يتعلم الشئ الطفيف من الذي قد يتعلمه الحمار


#896413 [بعشوم]
0.00/5 (0 صوت)

01-26-2014 12:09 PM
طيب وكت انت مديها للصادق المهدي شايلا منو مالك ؟! غلبتك ؟! ول ده اعتراف بفشلك يا أهبل ؟


ردود على بعشوم
European Union [العميد المرفود] 01-26-2014 01:44 PM
شوف يا البعشوم كان مدير الاستحبارات نائل ايدام وكان عارف تحركات الثورة والتنسيق مع الصادق فيوجود الهبل الاتحادين ماكانوا جايبن خبر(كل يوم فته وحشو) بعدين التنسيق بين الترابي والصادق والعميد وقتها ايدام ومكافاءة انه سوف يكون عضو مجلس قيادة الثورة واسع دي تمثيليه يعني اسع الواحد كان جاب له بنت كان ملصت ولا دخلو بفرقة اللباس الفارقه شنو(24 سنة بين البشير والصادق ذي فرقة اللباس)


#896400 [عبد الباقى حمد]
0.00/5 (0 صوت)

01-26-2014 12:03 PM
والله مابهمنا تستقيل

تديها الصادق

تديها ابو رياله

تموت بيها براك

فالثورة خيار الشعب

عشان تتحاسب ونطلع الاكلتوا انت وسفلتك كيزانك ديل من كروشم


بالله بالساهل كده

تانى مافى عفى الله عما سلف ياحبيبى

..............


يااخوانا بالطريقه دى دايرين يتزاكوا على الشعب السودانى

.....

طريقنا واحد لو سلمتها واستقلت مابشفى غليلنا الا تمش لاهاى

ونحن اخترنا طريق واحد ان لاتراجع عن اسقاطكم.


هاكم الخيار دهhttp://www.vb.alrakoba.net/t146484-2.html#post463319


#896395 [موردة حضارة]
0.00/5 (0 صوت)

01-26-2014 11:59 AM
Al Gasheer before he run a way , justice should take place against him and charge him


#896392 [ودعمر]
0.00/5 (0 صوت)

01-26-2014 11:58 AM
ربنا يبدل الحال ويزيح عننا هذه الحكومة الفاشلة ويخرج بلادنا من هذه الحروب التي قضت علي الاخضر واليابس امين قادر ياكريم.


#896384 [الحالم]
0.00/5 (0 صوت)

01-26-2014 11:49 AM
اللهم ولينا خيارنا ولا تولينا شرارنا و ولي فينا من يصلح


#896368 [المحتار]
0.00/5 (0 صوت)

01-26-2014 11:37 AM
نقبل اي شيئ إلا الصادق المهدي يا دوب خربت والله دا قواد الحكومة في المعارضه زي المومس الفي داخلية البنات جرجر المعارضه كلها لترتمي في براثن الرذيلة مع الوطني...والله والله يا اخوانا اخير لينا منو نافع الما نافع للمبالغة في انو الصادق منتهي...والصادق والميرغني دايرين يعيشوا ملوك هم واولادهم زي ال سعود ونبقى نحن خدمهم


#896367 [عبد الواحد الميت من الاستغراب ولا معين!!]
0.00/5 (0 صوت)

01-26-2014 11:37 AM
(وظيفه خاليه)مطلوب لشغل وظيفة (عواسه وخرمجه) لمطبخ متخصص فى تقديم وجبات شعبيه بالمؤهلات التاليه:
أن يكون المرشح لشغل هذه الوظيفه من ابناء حوش بانقا وتخرج من الكليه الحربيه وعمل بوظيفة رئيس جمهوريه برتبة المشير فى غفله من الزمن لمدة خمس وعشرين عاما بلا إنقطاع وله خال إسمه الطيب مصطفى وأشقائه من أكبر اللصوص !!وان يكون قد عمل ببراعه يحسده عليه روؤساء القاره الافريقيه وجزر الموز وفعل بشعبه وبلده ما لايعُمل واراهم (كل جديد ما كان يمكن أن يخطر على بال إنس او جان وحير إبليس ذات نفسو مما أضطراه لاعتزال عمله إحتجاجا على تواجد منافس شرس!!)..المرتب مغرى جدا + المخصصات والحوافز الاخرى والمطبخ على كامل الاستعداد لتوفير (الارامل) لارضاء نزواته واهم شرط لشغل الوظيفه أن يكون اول حرف من إسمه(ع) وحتى يكون الامر واضحا بالنسبه له وحتى لا تضيع منه الفرصه الذهبيه(عممممممر حسسسسسن احمممممد البششششييير)-- ونسأل الله أن يكون قد عرف بعد دا كلو من هو المقصود ؟..إدارة المطبخ ترحب (بتقشيش) الكائن المطلوب للوظيفه...(ابو رياله)يمتنع عن التقدم لهذه الوظيفه على الاقل فى الوقت الراهن وسوف تنظر الاداره فى آمره عندما تتوفر الوظيفه التى تتناسب مع مؤهلاته!!.


#896355 [معقوله بسسسس]
0.00/5 (0 صوت)

01-26-2014 11:31 AM
المعلقين الذين باركوا هذه الفكرة جادين ؟؟؟ ولا جداد؟؟؟


#896342 [ابومؤيد]
0.00/5 (0 صوت)

01-26-2014 11:25 AM
السؤال الذى يطرح نفسه ماذا فعل الصادق المهدى من قبل هل حواء السودانيه اصبحت عاقرا حتى نعود الى المربع الاول مرة اخرى ؟


#896327 [Rio]
0.00/5 (0 صوت)

01-26-2014 11:13 AM
وليه الصادق والمرغني والترابي ؟ وين الحركات المسلحة ؟ وين الجبهة الثورية المسيطرة ولها مؤيدون من افراد الشعب ؟ وين بقية الاحزاب المحترمة ؟ بل اين اهل السودان انفسهم والفضل منهم ؟ واين صديقي حسن على قول احمد مطر ؟
مهزلة
اعوذ بالله


ردود على Rio
United States [الصوت] 01-26-2014 04:28 PM
أفا يا Rio اتريد ان تضع اسماء الخدم من بين قوائم السادة ؟؟؟ ومن سيقدم تورتة الحفل؟؟؟ بل من يصنعها اصلاً؟؟؟؟


#896295 [الكوز الفى الزير التحت الراكوبه]
0.00/5 (0 صوت)

01-26-2014 10:51 AM
أذا صحت هذه المعلومات فهو تقدم كبير وخطوه سليمه وحتى أختيار الصادق المهدى لرئاسه لجنه الدستور أختيار موفق لأن الصادق المهدى هو الأكثر خبره وكفاءه .


ردود على الكوز الفى الزير التحت الراكوبه
United States [الكوز الفى الزير التحت الراكوبه] 01-26-2014 02:03 PM
الاخوه [مندهش] و [بدرالنهار] تحياتى واحترامى .

فى دوريات كره القدم عندما يتوقف الدورى لأى سبب من الأسباب ويحتاج أتحاد الكره لتسميه فريق يمثل البلد خارجيا" يتم أختيار آخر فريق كان قد فاز ببطوله الدورى حتى لو أن الفريق المعنى قد هبط مستواه بسبب توقف الدورى , والصادق المهدى هو الفائز فى آخر دورى نزيه نظم فى السودان .
الاخ بدر النهار لو كان أسمك بدر المساء كان المويه لقيته بارده .

United States [مندهش] 01-26-2014 12:36 PM
استقالة عمر البشير عن الحزب شيء يخص الحزب وكوادره ام ما يخصنا نحن ان لا يكون عمر البشير وصي علينا لانه جاء من غير تفويض من الشعب ولقد اصبح الشعب السوداني لا يثق في الصادق المهدي لقدمرت مياه كثيرة من تحت الجسر منذو عام 1989 لذلك المطلوب هو تكوين حكومة قومية يؤكل لها عقد مؤتمر دستوري جامع لا يستثني كائن من كان من شعب السودان في التواثق على وضع دستور واضح المعالم ويكون من مقررات المؤتمر ثم اجراء عملية الاستفتاء عليه من قبل الشعب السوداني ثم تجراء انتخابات حره ونزيهه يحكمها ويضبطها الدستور . غير ذلك يصبح كل فعل عباره عن حرث في البحر . لقد انكشفت الالاعيب التي تحاك بين عمر البشير والصادق المهدي إلا لمن لا يريد ان يرى

United States [بدرالنهار] 01-26-2014 12:36 PM
لوكان فيه الخير ماكان إستعان بيه الطير لو كان في الصادق عمار ماكان جه النذير ولانسيبه بعد كلامك قلت أخد جغمة مويه من كوزك اللي في الزير لقيت الموية مولعة زي الأسعار في السودان .


#896270 [عزة]
0.00/5 (0 صوت)

01-26-2014 10:35 AM
دخل عليه جمال الوالى اخبره بأن هذا الشعب ساذج وعبيط عندى لك اختراح ابتدع فكرة الهلال والمريخ اخبرهم بأن هناك مفاجأة وسوف تجد هذا الشعب الساذج ينتظر المفاجأة وينسى بأنك فى الحكم وكل مرة دور فيهم لحدى عزرائيل انفخ فى الصور وصاحبك صدق وفكها فينا وما عارف اقول شنو


ردود على عزة
European Union [العميد المرفود] 01-26-2014 01:59 PM
طبعا عارفين الشعب جيعان وسجمان ورمدان وجبان ومرضان كرة طبعا عملو كرة ومعسكر في الدوحة بالتنسيق مع جمال الوالي الحرامي طوالي والسلطان كلهم مؤتمر يجو من الدوحة يدور الدور الممتاز وعالم ساكة التيوه


#896256 [هادي ابراهيم]
5.00/5 (2 صوت)

01-26-2014 10:25 AM
اتمني ان لايكون هذا هو المفاجأة الذي ينظره اذن صاغية من الشعب السوداني وان كانت هذه هي المفاجأة فتكون مباغتة ...من قبل قلنا ان هناك ايدي عاملة للمؤتمر الوطني هذا الذي يدعي الصادق المهدي اكبر مطبلاتي للمؤتمر الوطني لانه يقوم بالسيناريو ومساعدالتنفيذ والمؤتمر الوطني يقوم بالاخراج ...هذا المسلسل الذي تابعه كل السودانين وصلت مرحلة الختام وكان التمثيل بين حزب المؤتمر الوطني وحزب الامة وكانت متابعة جيدة يعني الاخراج من الصادق المهدي..
س سؤال هل السودان ملكيةلاشخاص ؟؟؟
ما الذي يحصل في الساحة السياسية ؟؟
الم يكن هناك عقول نيرة من ابناء الشعب السوداني ؟؟؟
لماذا هذا كل هذا الاستهتار والهرج؟؟؟
نحن وانتم سوف نجيب علي هذه الاسئلة


ردود على هادي ابراهيم
United States [hadi] 01-26-2014 12:19 PM
انتو عارفين في ناس في البلد دي اصبح لا يعجبها العجب ولا الصيام في رجب ناس عايزه تعارض من اجل المعارضه وبس امثال هذا الما هادي. ناس شكلها مستفيده من دمار البلد وحريقه, ناس عاطله وعايزه تعطل الامه معاها لم تجد شئ تتكسب منه او تخلق لنفسها سمعه ومكانه الا من خلال الخراب والدمار. الناس دي كلها تنادي بحكومه قوميه ولجنه للدستور بعيدا عن كنكشة الكيزان ولما ربنا يهديهم ويثوبو لعقلهم وصوت الحكمه يطلعو دعاة الحرب والخراب ينادو بمواصلة الحريق. امثالك يا اخي لم يتاثرو بهذه الحرب المقيته ولا بالاوضاع الاقتصاديه الخانقه زيهم زي قادة التمرد ضاربين الضلله والفنادق يقتاتو من فتات اولي نعمتهم وينفذو تعليماتهم بتدمير هذا البلد. دونك الان الجنوب قامت الدنيا ولم تقعد عندما قام تمرد فيه وتدخلت دول لصالح حليفهم سلفا وقرارات ونداءات من امريكا والامم المتحده لانهاء هذا القتال مع ان هذا لم يحدث مع كم الحركات السرطانيه التي انتشرت في طول البلاد وعرضها. هل سالت نفسك لماذا يدعم الغرب هذه الحركات ولا يردعها مثل ما فعل مع مشار مع اعترافنا بعدالة المطالب التي ينادي بها البعض ولكن للاسف هي كلمة حق اريد بها باطل لانهم اصبحو يزايدو علي اسقاط نظام ليس لهم القدره علي تحرير مدينه واحده من بين ايديهم ناهيك عن وطن والمتضرر الوحيد هو انسان السودان البسيط الذي سرقت منه الطيبه والتسامح بسبب الطرفين حكومه ومعارضه. ختاما يا اخي الناس دي قالو في خطوه مهمه ولم يفصحو عنها وده كلو تاويل وتحليل وتخمين وامنيات من الناس فلننتظر الخطوه وبعدها لكل حدث حديث واذا صدقو وتم تكوين لجنه لا تستثني احد من المعارضه المدنيه والعسكريه لحل مشكلة البلد ما الضير في ذلك؟؟!!!!!!! افيقو هداكم الله شبعنا حرب ودمار وتقتيل وكراهيه عايزين نتقدم ونتطور زي خلق الله .

United States [سوزان] 01-26-2014 11:20 AM
مخططه وبعدين الصادق حيسلم الرآسه لولدو بس السيره بالدلوكه


#896226 [خالد اسماعيل]
5.00/5 (2 صوت)

01-26-2014 10:01 AM
كل ذلك لايخدم الشعب السوداني في شي لا مفاجات ولا احلام هو تخطيط امريكي جديد رسمه كارتر


#896205 [بت قضيم]
0.00/5 (0 صوت)

01-26-2014 09:49 AM
بعد ان سلبتها منه ربع قرن تريد تسليمها له جنازة بحر ويبدو ان العرة قد وافق على هذا المقترح ان كان حقيقة عندما كان السودان في عزه قبل ربع قرن فرط حفيد الصادق فيه وما بالكم اليوم


#896202 [مندي]
0.00/5 (0 صوت)

01-26-2014 09:46 AM
البشير كاذب و مراوغ بالفطرة و فوق ذلك ضيق الافق...... يبدو انه ما زال يراهن على خيار المراوغة لكسب مزيد من الوقت لعل و عسى ان تنفرج الازمة حتى لو كان صادقا في عزمه على التنحي فمن حوله لن يسمحوا له بذلك ( تصريحات غندور و الفاتح عز الدين توحي ان البشير رجع في كلامو بخصوص التنحي).... يا ناس ثوروا ثورتكم ساي فالحقوق لا تمنح بل يجب ان تتنتزع انتزاعا


#896190 [الكردفاني]
0.00/5 (0 صوت)

01-26-2014 09:42 AM
المدعو "ابو نديبو"..
قال رسول الله صلى الله عليه وسلم.. من كان يؤمن بالله و اليوم الاخر فليقل خيرا أو ليصمت..


#896184 [أبوعلي]
0.00/5 (0 صوت)

01-26-2014 09:38 AM
تمخّض (المعقّد العاجز جنسيّا) فولد (هرما فاشلا لا صادقا)


#896173 [دى الحلقة الكم]
0.00/5 (0 صوت)

01-26-2014 09:32 AM
الأخوااااان !! الميثاق !!المصالحة المصالحة !!الجبهة ,, الجبهة !!محاربة نظام مايو من الداخل !!سرقة الإنتفاضة بواسطة الغواصة سوار الدهب والجزولى !!المعارضة فى البرلمان !!إنقلاب الإنقاذ!!حبيس ورئيس!!بيوتالأشباح!!الصالح العام!!الجهاد!!التوالى!!الشهداءفطايس!!المفاصلة!!المؤتمران!!الكتابالأسود!إنفصال الجنوب!!الفساد الفساد !!الإصلاح الإصلاح!!الحوار الحوار !!الدستورالدستور !!المفاجأة ,,المفاجأة!!
ياخى دهـ مسلسل مكسيكى حلقاته 24*12*30 حلقة !!!!! ياخى معقولة بس !!!!


#896156 [لكبريائي حكاية]
0.00/5 (0 صوت)

01-26-2014 09:18 AM
إمكن حس بخطأ الانقلاب على الصادق المهدي ! ويريد ان يرجع الامانة لصاحبها بس ما عارف كيف ؟


#896152 [حد بيعرف احسن م الحكومه!!]
0.00/5 (0 صوت)

01-26-2014 09:16 AM
يا ناس فضوها سيره وكفايه ادعاء وتذاكى على بعض.. الحكايه م ألأول كانت كلام فى كلام وكسب وأت وفهلوه لشغل وقت الناس بالكلام والمؤانسه.. مافى شعب اندحك عليه واتلعب عليهو عبر السنسن زيكو يا سودانه
.آل ايه آل المهدى المنتظر آل كلمه سيد الوقود!! "فين العدل اللى ملأألأرض بعد ما ملئت قورا"
ما خلاص الحكايه بانت أهو وخلصت (بضم الخاء) وآلهالكو الود الغنضور امبارح .. مافيش مباضره ولا مفاقأه من عند الريّس !! كل العندو طرح أديم و فيه تلويح بالعصا ورأصه ورأصتين وتهليل وتكبير وسير سير يا بشير وينتهى عزاؤكو يا عصمان يا ميرعنى (يا اللى عامللنا فيها ابو العريف) عمّال تنظّر وتفتى .. آل ايه .. حل الدصطور وحكومه تكنوكراط ولقنة لعمل دصطور برئاسة صادئ المهدى .. ويمكن :مقلس وظراء برئاسة ابنو قائد قيش ألأمه ..هوانتو يا سودانيين ما سمعتوش الود على كرتى آل عليهم ايه هو والحسيب النسيب أبل كدا (ياخدو فلوسنا بالليل ويشتمونا بالنهار!! ولا داعى لذكر الجزء ألاول من كلام الكرتى .. " قوموا لتوقيعاتكم وتعبئتكم وتصعيدكم" احسن يا عبحميد يافضل ولجمع الصف الوطنى "يا كاتم ألأسرار .. وكلّم اللى آعد فى مقر اقامتو ان الفتّه بردت!!!


#896143 [دوية]
0.00/5 (0 صوت)

01-26-2014 09:09 AM
ما السر بين مهدي و بشير حتى البشير يعين الصادق لرئاسة لجنة قومية لدستور البلد :
ألا توجد أشخاص اخرين يكلفهم؟؟
هل أصبح تعيين دا إنقلبت
عليك بعد اخذ حقك ؟
فهل الصادق لديه رؤية عن قومية ؟؟
إذا كانت كذلك لماذا لا تترك حكاية لجميع قوى السياسية ؟؟
ألا من حقهم؟؟
هذه رؤية لا تكن خدعة من البشيرو مهدي ؟؟
في حق الشعب السوداني ؟؟


#896126 [خالد حسن]
0.00/5 (0 صوت)

01-26-2014 08:56 AM
اسقاط النظام ومحاكمة ومحاسبة كل من شارك في الانقلاب علي الديمقراطية وشارك في حكم الانقاذ ولو ليوم وحظر الاحزاب الدينيه واسترداد الاموال التي نهبها تجار الدين ووقف الحروب العبثيه وحل جهاز الامن واعادة تكوين جيش قومي لاشأن له بالسياسه ولايقتل شعبه مطالب شعبيه لن نتنازل عنها قيد انمله
لن نساهم في تجديد جلد التمساح باعطاءه شرعيه ليحكم عشره سنين اخري
حتي ولو شارك المهدي والميرغني الانقاذ في الحكم لن يعطي هذا البشير الشرعيه
فالشرعيه لدي الشارع والشارع هو البتكلم وليس سيدي فلان او علان اللذان تخطاهما الشارع
تغيرت اللعبه ولم يعد الشعب يثق في السيدان .. فنحن غير جيل اباءنا واجدادنا لانؤمن بالسياده ولا الهيمنه الطائفيه المتخلفه
والشايف غير كده خلي السيدان المخرفان يشاركان عشان نكنسهم مع الانقاذ وونتخلص من هذا السرطان الطائفي للابد
لن تضيع دماء شهداء سبتمبر سدا
ولن نترك من ساهم في قتل الناس في دارفور وكجبار والنيل والازرق وجبال النوبه وبورتسودان والعيلفون دون محاسبه


#896110 [علي سليمان البرجو]
0.00/5 (0 صوت)

01-26-2014 08:44 AM
فاقد الشيء يعطيه والكذاب مطلوب العدالة الدولية خارج عن الملًة وليس له مصداقية أو قوة اتخاذ أي قرار، وأبالسة الانقاذ قد ذهبت ريحهم وانفك الشعب من قبضتهم والثورة آتية لامحال لكنس الجهوية وتجار الدينلوالمحاسبة والمساءلة العدلية ناجزة دون تهاون أو تجاوز لاسترداد الحقوق والمال المنهوب. وبلاش عريضة وتسويات تصفيرية.


#896108 [المتغرب الأبدي]
0.00/5 (0 صوت)

01-26-2014 08:43 AM
ليس قبل أن تتم محاسبة الجبهة الاسلامية القومية ممثلة في حزب البشير على جميع قضايا الفساد وإهدار المال العام وإراقة الدماء التي سفكت في شمال وجنوب وشرق وغرب البلاد وبيع ممتلكات الدولة وقبل ذلك خرق الدستور وما تبعه من تمكين الشرذمة والرجرجة والدهماء والغوغاء وتمكينهم على رؤوس العباد وتشريد السر بتشريد عوائلهم بحجة الصالح العام وووووووو......


#896099 [صلاح الدين محمود اسحق]
3.00/5 (1 صوت)

01-26-2014 08:33 AM
إن قام السيد الرئيس عمر البشير بذلك يعتبر هذا خطوة مهمة فى تاريخ الحركة السياسية بالسودان ولكن لماذا تعيين الصادق المهدى لرئاسة اللجنة ولماذا تأجيل الانتخابات مباشرة مع القرار لمدة عامين دون المشورة مع القوة السياسية الاخرى


#896090 [ابونديبو]
4.00/5 (12 صوت)

01-26-2014 08:18 AM
ليس من حق عمر البشر أن يفرض علي الشعب السوداني تعين لجنة قومية برئاسة الصادق المهدي ....
لماذا الصادق وليس شخص آخر ؟؟؟هل السودان وشعبه ضيعة من املاك البشير وآل المهدي؟؟؟؟ فلتستمر
الحرب وليتها تدخل الموردة وشارع كترينا وشارع الستين!!!!!!!لن نقبل اي حلول مرفوضة حتي ولو قبلها
الصادق والذي حتماً لن يرفض حتي رئاسة الكشافة او جمعية حماية المستهلك ...
اذا صح ذلك فهي محاولة يائسة من المؤتمر الوطني لكسب الوقت والخروج من كل الأزمات ليأتي من بعدها
ويجد الشرعية في انتظاره علي طبق من دهب..
نأمل من جميع الأحزاب والناشطين الاستمرار في المقاومة وتعبئة الناس للخروج واسقاط كاتبقي من شرزمة
المنافقين ....وتجارالدين


ردود على ابونديبو
[الصوت] 01-26-2014 01:01 PM
يبدو ان الخبر الكارثة صحيح وإلا فما سر هذا الاصطفاف ضدك يا ابو نديبو .... انهم خط الهجوم الوقائي لتمهيد الطريق
وكأن الركب لا يعلم ان هذا الصادق قد ركب ظهر السودان من قبل ثلاثاً ففي كل مرة ينزل صاغراً ليسلم الرسن الى احد
العسكر ...هل هذا رجل تأمنه على رباط حذائك ؟؟؟؟؟ والله لا افعل......انا شخصياً وفي كل تعليقاتي السابقة على هذا الحدث كنت اتوقع ان تكون هذه خاتمته خاصةً بعد ملاحظتي لهذا الامام وهو ينافح يمنةً ويسرة عن حوض السفاح فعلمت ان تحت الاكمة ما تحتها وها نحن نرى البيادق تمهد طريق الملوك القادمين .....
هل توقفت الحرب ايام الصادق الاخيرة ؟؟؟؟؟ ومتى كان الرجل رجل سلام ؟؟؟؟؟ إنه لا مع السلام ولا مع غيره إنه فقط
مع مماحكة قرينه التنبول الاخر...... وليس الرجل رجل دولة كما يدعي البعض انه فقط رجل نفسه وفقط بفمه والا فاسألوا حتى جنده الذين ارسلهم ليقاتلوا المتمردين حينها وتركهم ليقتاتوا ذ طرق الاشجار ويلبسوا جلودهم هم وينتعلوا
الحفي ، وحينما ارسلوا له يطلبون زخيرة لبنادقهم الكلاشنكوف وهم في خنادق الحصار اسقط عليهم ذخيرة دوشكا وراجمات.....
ما الفرق بين احمد وحاج احمد ؟؟؟؟؟ اذا كان هذا مكّن علينا البغال و الحمير فالآخر سبقه بالسنة فوضع على رؤوسنا
الجهال و اتبعهم بنِعال .... لذلك لن تفاجأنا حكاية شيلني واشيلك هذه فهذا هو قدرنا ولا حول ولا قوة الا بالله....

[aldo ago] 01-26-2014 12:44 PM
خليك عندك إحترام الرجل مشهود له بالديمقراطية والفهم ويكفي إنه رئيس أكبر حزب سياسي وإمام أكبر كيان

[ود البلد] 01-26-2014 12:42 PM
انتو مصالحكم مع الصادق
ولا يهمكم الشعب السودانى ابدا
الحرب ما مدوره ليها 13 سنه اسه عرفتو
اهل الخرطوم سدنة كل نظام ومفسديه وهو الصادق
بترشح فى كوستى ليه؟؟؟ مات ترشحوه فى امدرمان !!!!!

United States [ali] 01-26-2014 12:25 PM
ما ليك حق يا غراب الشوم انت الحرب لم تتاثر بها ضارب الطراوه وخيرات الخليج ما هماك يموتو الناس او يحرقو . كلامك ده تقولو لما تكون قاعد هنا معانا ومتاثر بالحرب الله يكفينا شركم.

United States [متشعلق] 01-26-2014 12:23 PM
ابو نديبو لو انت عينتا اللجنة دا برضو حتقول لن يهذة اللجنة وانت خليك قاعد فى الكيبورد والثورة والناشطيين . دى دعوات الشعب المطحون اللخلى النظام ينهار من الداخل . ويارب فى الاخير يرناح من هذا الكابوس لبلسمو حكومة ومعارضة

[ودعمر] 01-26-2014 11:54 AM
اعتقد ردود الاخوة كافية يا ابنديبو ووررك راي الشعب السوداني شنو!!!!! يا ابو نديبو لازم تفرق بين كرهك للكيزان والي انحنا بنشاركك فيهو وكره الوطن الذي مصلحته يحب ان تكون عند كل سوداني اكبر من ضغائنه وما حاق به من ظلم سوي كان هذا السوداني يساري اسلامي عربي غير عربي!!!!

اهديك قصيدة شاعر الشعب محجوب شريف وطنا الباسمك كتبنا ورطنا علك تتعلم معني وطن

وطنا الباسمك كتبنا ورطنا
أحبك
مكانك صميم الفؤاد
وباسمك اغنى..
وتغنى السواقى
خيوط الطواقى
سلام التلاقى
ودموع الفراق
واحبك ملاذ
وناسك عزاز
أحبك حقيقه..
وأحبك مجاز
وأحبك بتضحك
وأحبك عبوس
بعزة جبالك ترك الشموس
وما بين ظلالك
افتش وأكوس
أفتش طفولتى وملامح صباى
بناتك عيونن صفاهن سماى
وهيبة رجالك بتسند قفاى
صحى بتملا عينى..
وتشّرف غناى
بحضرة جلالك..
يطيب الجلوس
مهذب أمامك يكون الكلام
لأنك..
محنك
عميق الدروس
مجيد المهابه ومديد القوام
شبابك..
تشابك
شديد الزحام
أراهم..
وراهم
غبار الحياه
مداين..
تعاين
كأمّ العروس
تهلل..
تكلل
جبين الإمام
رزازاً يبلل أغانى الخليل
أصدق كلامك حقيقه وبخاف
أخاف الطريق..
اللى ما بودى ليك
وأعاف الصديق
اللى ما بهم بيك
معاك انتظارى..
ولو بالكفاف
وعنك بعيداً
أبيت الرحيل
وبيك اعتزاز الصباح الجميل
جميع الأغانى اتكالن عليك

United States [من البداوة إلى الحضور] 01-26-2014 11:03 AM
يا [ابونديبو] ... أنحنا خلاص اخترناك إنت ... وخلّينا البشير وسلفاكير والصادق المهدي وغيرهم ... بس عليك الله وقّف لينا حربك دي ... عشان أجيالنا تقدر تعيش معاك في سودانك دا ... ؟؟؟

European Union [ابوريدة] 01-26-2014 10:08 AM
والله لو كانت هذه هي المبادرة فهي عين المطلوب والمرتجي ويا ابو نديبو انت باين عليك ما ناقش ابو النوم ولو وصلت الحرب الموردة وشارع كترينا وشارع الستين كما تمنيت انت فالسلام علي السودان ، يا جماعة خليكم عاقلين واذكياء الحرب طريقها وعر ولا تاتي الا بالشر وأسألوا الجنوبيين وبعدين وين هي الاحزاب التي تناشدها للاستمرار في المقاومة ؟؟؟ هي وينها المقاومة اصلاً يا وهم ؟؟؟؟؟؟؟

[ELSHAFYA A.ALI] 01-26-2014 10:01 AM
روح أدخلها لوحدك...قاعد لشنو؟؟ ومنو العايزو يموت عشانك؟؟
اذا حدث هذا القرار فهو عين العقل للذين يملكون عقولهم...
أما امثالك من مروجي الحروب فليذهبوا ويحاربوا لوحدهم...
السودان مفتوح وأراضيه واسعه...أختار اي منطقه وورينا فيها
رجالتك...أذهب أنت وجماعتك وقاتلا انا هاهونا جالسون ونائمون...

United States [زروق] 01-26-2014 09:56 AM
اسقاط واهم شيئ المحاسبة للجميع من 1985 الي 2014 ومحاسبة كل من سبب اذي لهذا الوطن والشعب

United States [الزيدابى] 01-26-2014 09:49 AM
ربنا يكفينا شر " الشواطين اللابدة "


حقاً انها بلاد العجائب ،

طييييييب ...... انت عايز شنو ياابو نديبو .....!

European Union [ود الامام] 01-26-2014 09:44 AM
يا ابو نديبو انت السودان ده حقك براك ولا شنو حتي تقول باستمرار الحرب قول اللهم سهل الامور ويتم تشكيل حكومة انتقالية قومية ويتم عمل دستور يشارك فيه كل اهل السودان بدون استثناء ودون النظر لانتماءاتهم السياسية او الدينية او العرقية دستور يجد كل سوداني فيه نفسه ويتم الزام الجميع فيه بالديمقراطية حتي الاحزاب يتم انتخاب رئيس الحزب واجهزته كل دورة زمنية والا يتم حل الحزب ومنعه من المشاركة في الانتخابات ثم تقام انتخابات حرة نزيهة وبمشاركة الجميع .... واذا لم تكن المفاجأة كذلك فهي ليست مفاجأة تستحق انتظارها ...قولوا امين ولا تقنطوا من رحمة الله

United States [اهو نوعك ده] 01-26-2014 09:28 AM
اهو نوعك ده اللى بودر السودان اللى لا يعجبه العجب ولا الصيام فى رمضان او رجب

United States [YASEEN] 01-26-2014 09:26 AM
الصادق كان رئيس السودان المنتخب من الشعب والذى فاز فى اخر انتخابات ديمقراطية وله كامل

الحق فى يكون الرئيس وقل لى من أنت يااخى حتى تتطالب بهذا؟؟؟ من الذى فوضك من الشعب حتى

تتحدث بأسمه ؟؟؟؟

عن اى مقاومة تتحدث ؟؟

انتم لاتريدون لهذا البلد ان يستقر انتم تريدون الفوضى مصلحة السودان لاتهمكم!!!


اذا غادر الانقاذيون السلطة وهم مقتنعون بان مصلحة السودان تقتضى ذلك فعلى ماذا انت تحتج ؟؟؟



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة