الأخبار
أخبار إقليمية
لصق الخصيتين في "النعاج".." الخراف المحورة نعاجاً "
لصق الخصيتين في "النعاج".." الخراف المحورة نعاجاً "
لصق الخصيتين في


02-09-2014 09:39 AM
الطاهر ساتي

:: بالمناسبة، وقائع زاوية اليوم ليست من وحي الخيال أو التاريخ.. أي هي ليست طُرفة أو قصة تاريخية كتلك التي نقدم بها القضايا لتسهيل هضم القضية وإستيعاب وقائعها بيسر..ولكن، وقائع هذه الزاوية - بكل تفاصيلها المحزنة والمضحكة - من واقع حياة الناس في بلادنا، ومسرحها ولاية البحر الأحمر.. وأرشح توثيقها في موسوعة غينيس - بالصورة والقلم - كأغرب إحتيال وتزوير في (تاريخ الأنعام)، وليس (تاريخ البشرية)..نعم، فالأنعام هي محور الإحتيال والتزوير في قضية اليوم..!!

:: ضحى البارحة، بميناء سواكن، قبل أن تبحر إحدى السفن بصادر مواشينا إلى دول الخليج، شاهد أحد العاملين بالمحاجر (مشهد غير طبيعي).. شاهد (خروفاً يتبول)، ولكن واقفاً ب( وضع نعجة)، وأهل الريف أكثر الناس علماً بالطريقتين، ومع ذلك يجب الشرح للمنفعة العامة و (كده)..فالذكر - الخروف - يكون واقفاً بوضعه الطبيعي عند التبول، ولكن الأنثى - النعجة - تباعد الأقدام الخلفية عن بعضها، (وقع ليكم؟).. تمام..فالعامل بالمحجر شاهد خروفاً يباعد أقدامه الخلفية عن بعضها، أي كما تفعل (النعجة)، ولذلك أبدى دهشته وإستطلع الأمر ..!!

:: ولحسن حظ الناس والبلد، لم يسئ العامل الظن في الخروف، ولم يشكك في فحولته، ولم يتهمه بالتشبه بالإناث، بل أجرى عملية فحص للخروف، وإكتشف ما يُحير الإنس والجان.. (الخرفان دى مزورة)، أوهكذا صاح العامل..وفعلاً، تمت إعادة فحص لكل خراف الباخرة، لتكتشف السلطات أن أكثر من سبعين خروفاً هي في الأصل (نعاج)..وبعملية لصق غريبة، أسمتها مصادر بالمحجر ب (عملية تجميل)، تم لصق أعضاء ذكورية - الخصيتين - في (النعاج)، بحيث تبدوا (خرافاً)..هكذا الحدث، تركيب الأعضاء الذكورية في الإناث، وهي عملية (تقبيح) وليس (تجميل)، وهذا ما يمكن وصفه ب ( إبليس ما يفكر فيهو)، أو كما نقول في مواقف الإحتيال المدهشة..ما لم تراه العين لا يصدق العقل ولا يستطيع أن يتخيل ( كيف تمت العملية؟)..نعم، ليس صعباً جمع أعضاء الخراف من المسالخ، ولكن أي شيطان هذا الذي فكر وقرر لصقها في ( النعاج )..؟؟

:: سألت مدير المحاجر بالبحر الأحمر، الدكتور جعفر علي حسين، عما حدث و إن كانت هناك (سوابق).. تمنيت نفي الوقائع، ولكنه ضحك ثم رد معتذراً : ( معليش، لوائح الوزارة مابتسمح لى بالحديث، وأنا ملتزم باللوائح، شيل تفاصيل الحادث من الوزارة)، فشكرته ثم هاتفت أحد أصحاب الوجع، صديق حيدوب، الأمين العام لشعبة المصدرين، فوجدت عنده تفاصيل الحدث موثقة وبصورها أيضاً..ثم وجدته يتساءل بحزن : ( تفتكر يا ساتي دي أول عملية زراعة أعضاء؟، ولا بتكون في عمليات مرت بدون علم السلطات؟)..نعم، المحزن في الأمر هو إكتشاف هذه العملية (بالصدفة)..ولو لم تتبول تلك الماشية في تلك اللحظة وأمام عامل المحجر مباشرة لما إكتشفت السلطات عملية تصدير ( أكتر من سبعين نعجة)، بمظان أنها خراف..وعليه، نشكر تلك النعجة على التبول ثم نشكر العامل على (الملاحظة)، ثم نسأل كل السلطات : أهكذا أجهزة وإجراءت الكشف والفحص بمحاجركم..؟؟

:: وعلى كل حال، هكذا الحدث الغريب والمراد به تهريب إناث الماشية.. وهناك الف وسيلة ووسيلة لتهريب وتصدير إناث الأنعام المنتجة من بلادنا.. فالإناث المنتجة هي الأعلى سعراً بالخليج، ومن أجل الثراء الفاحش لا يتوارى البعض في تصدير هذه ( مواعين المنتجة)..وما الحدث أعلاه إلا( مجرد وسيلة)، وهناك وسائل أخرى منها التهريب أو المحاباة المسماة رسميا (بالإستثناء)..أي يتم التصديق للبعض بتصدير (إناث المواشي)، وهذه سلطة وزارية وساهمت كثيراً في (تجفيف المراعي)، وإستغلها بعض تجار الإبل وبارشيف الزاوية قصص إستغلالهم بكل شخوصها (موثقة)، بوثائقها..ومع ذلك، لأنهم من النافذين بالحزب وحكومته لم تحاكمهم المحاكم رغم أن عملياتهم تلك بمثابة ( تخريب لإقتصاد بلد)..!!

[email protected]


تعليقات 44 | إهداء 0 | زيارات 10668

التعليقات
#911358 [kamuzu]
0.00/5 (0 صوت)

02-10-2014 12:27 PM
اقترح اعدام كل من شارك في هذا التزوير او تمربره فهو تدمير لاقتصاد هذا البلد المدمر اصلا
نفس الشيئ حصل لاشجار المانجو والموز والتي تم اهداؤها الي اليمن من اجل الانسان اليمني والآن تملا هذه المنتجات اسواق الدول الخليجية تحت مسميات الموز اليمني والماتجو اليمنية وهلم جرا ...مسكين هذا البلد ما ليهو وجيع ..


#911059 [ابو ابراهيم]
0.00/5 (0 صوت)

02-10-2014 08:23 AM
صدقوني اعمال الناس ديل ابليس مافكر فيها


#910973 [نص صديري]
0.00/5 (0 صوت)

02-10-2014 01:52 AM
فعلا لازم تدخل موسوعة سلسلة "تجار العيش 1984 الدخلو الزرائب 2014"
أعملو لينا منا خبر صفحة أولى حتى نترجمها ليعرف العالم كله وسخ الكيزان ودناءتهم التي اهلكت السودان

تعرف انا لما اطلعت على خبر مستوى تصدير البهائم لدول كفلاء مصطفى اسماعيل عرفت ان الكيزان وجدوا ليهم مأكلة لانوا الارقام غير واقعية مع نسبة الانتاج واسعار اللحوم ياخي نيوزيلاند بكل تكنلوجيا تربية المواشي والحظائر والطقس والعشب مابتصدر قدر ده
الناس في كلمة ما قادرة تأكل رغيفة يقولو ليك صدرنا فائض نفس الشيئ يعيد التاريخ نفسه قبل ابريل مارس 1984 الناس تدفن بالالوف وقبائل ربط اهلها بطونهم وانفسهم في عناقريبهم ليموتوا جوعا وناس ود بانقا كانوا يجروا وراء قطر الشمالية يتوسلون كرامة كرامة كان الاسلاميين وعلى رأسهم شيخ ودحوش بانقا المدعي يفتحون صادرات الفتريتة لمصانع البيرة بفضل بنك فيصل ولصوصهم


#910855 [ابوالاء]
5.00/5 (1 صوت)

02-09-2014 09:55 PM
يجب وينبغى ونعول كثيرا على وهلمجرا ...........لكن الاكيد ان بعد هذا التحور هذه النعاج صارت ارجل مننا .....


#910752 [ساب البلد]
5.00/5 (3 صوت)

02-09-2014 06:42 PM
****** للتاريخ ****** اول من سن سنة تصدير الاناث ******** هو المأفون عصام ابن المأفون الاكبر الترابي ****** لقد بدا عمليات التصدير بداية التسعينيات علي مرئي و مسمع المسؤولين ****** لكن يا استاذ ساتي يجب كشف الجهة ***** هل هي شركة ام فرد مع ذكر الاسماء ***** لا يجب التستر علي الفساد ******* هذه جريمة اخطر من الخيانة العظمي ********* يجب تنفيذ حكم الاعدام ****** لان هذا الشخص يهدم اقتصاد البلد ******** بعد 5 او 6 سنين سوف تنتج هذه الاناث الالاف الخراف **** و تلك الدولة بدورها تقوم بتصدير ثروتنا الحيوانية بدلا من استيرادها ********* هناك حالات مماثلة تصدير اناث الابل الي مصر ***********


ردود على ساب البلد
European Union [نص صديري] 02-10-2014 01:59 AM
حنين
المفروض يقول كلام غير ده هم امثالك من المنبطحين نعم يجب اعدامهم حتى ولو اعدم نصف الشعب بقصاص عادل
الفساد هو اس البلاء وغير المبالون من امثالك وموجدي الاعذار هم البلاء نفسه لهذه الامة تف على ناس معليش ولايهمك

United States [ساب البلد] 02-10-2014 01:23 AM
******** حنين اخوي سلام ******المصديرين كيزان ****** او شركاءهم المنتفعين ********* ناس الخلا تعبانين يسعوها و يبيعوها بالرخيص للجماعة ديل **************

[حنين] 02-09-2014 11:04 PM
هو يعنى الخربوا إقتصاد البلد شوية عشان يحاكموه بالاعدام .
على الاقل ده زول بينتج ويعمل فى مجال إنتاج الثروة الحيوانية موش أحسن من الناس المابتنتج وفى نفس الوقت بتاكل فى حق الشعب .
قول كلام غير دة


#910734 [صلاح نور الدين]
0.00/5 (0 صوت)

02-09-2014 06:06 PM
راجين الاداره


#910691 [Adam Ibrahim]
5.00/5 (2 صوت)

02-09-2014 05:21 PM
يا ساتر!!!.. حتى البهائم ما سلمت من التزوير!!.. دى جريمة أمن إقتصادى قومى وأكيد وراها جعبة كبيرة من المتنفذين.. وما اكثر جرائم الكيزان اخوان الشيطان..
على ما اذكر الطاهر ساتى برضو كان كتب فى موضوع تهريب إناث الإبل وحكاية سباق الهجن بدول الخليج.. معتمد فى احد ولايات الشرق طلع شغال تهريب وتخريب فى ثروة قومية!!..


#910675 [كوز كنافه]
0.00/5 (0 صوت)

02-09-2014 05:01 PM
يعني الناس ديل جمعو كل بيوض الهرفان من المسالخ ولصقوها ببوستك امير او غراء وانا بقترح علي المسالخ تسليم البيض ومنع مادة الغراء وبوستك امير من دخول السودان ونتوقع ان يكون سعر جوز بيض الخروف بمبلغ عالي خاصه في سواكن وانت ماعرفتنا البيض ده تركيب سواكن ام الابيض والخرطوم والقضارف


ردود على كوز كنافه
European Union [Wadalfa7al] 02-09-2014 10:27 PM
ههههههههههههههههههه


#910658 [سكسك]
5.00/5 (1 صوت)

02-09-2014 04:35 PM
احد الصحفين وكاتب له عمود مشهور عندما صدرة اناث الابل والضان دافع وقال مامشكلة من تصدير الاناث لانه اصلا مش حيقدرو ينافسونا في السوق ليه لانه السودان احتكاره للسوق بسبب المراعي الطبيعيه ونوع العشب والحشايش ده تبرير مثقفاتي ام زول البيض ده تاكد انه مرفود لانه فتح باب لكل الموظفين وجاب ليهم الهواء وتاكد ان في زول قال له ده من زمان وعارفنه انت مالك اطم اسكت اسع قطعت عيشنا وجبت لينا الجرايد وحيدوب والوتساب


#910652 [حلفانكيل]
5.00/5 (2 صوت)

02-09-2014 04:27 PM
ماذا دهاكم ايها الشعب السوداني .. لماذا اصبحبتم حاقدين على اصحاب النعمة
كانت الفرصة مواتية لكم منذ الاستقلال وحتى سنه 89 ولم تستفيدو شي ولم تاتيكم مثل هذه الافكار الجنونية لجنى الاموال لماذا لم تركبو للنعجة خصيات وتصدروها لجنى اموال كثيرة ما قبل الانقاذ لماذا تحقدوننا في اكل عيشنا ونحن اتينا لانقاذكم والان وصلنا مرحلة انقذنا انفسنا من الفقر والدور القادم لكم .لماذا لم تصبرو حتى ياتيكم دوركم في الغنا .

خلاصة القول :

بالله سيبونا ناكل بي مزاج ولو سكتو بنديكم العظام
عالم ما بتحترمش اولياهم الصالحين


#910634 [كاجا]
0.00/5 (0 صوت)

02-09-2014 04:01 PM
محن سودانية خالصة
- ودا دليل على الجشع وقصر النظر وعدم مراعاة المصلحة العامة وحيكون فى اللاف من الاناث تم تصديرهم بعلم ومعرفة المسئولين بس الحظ العاثر فضح الجماعة المرة دى
- فقدنا الكثير من الميزات التنافسية بسبب بعض التصرفات غير المسئولة لابد من عقاب صارم ولا سنفقد ماتبقى من ميزات النسبية على ضعفها وقلتها وهوانها فى السوق العالمى


#910628 [المنذر]
0.00/5 (0 صوت)

02-09-2014 03:53 PM
وانا اقول العرس بقي غالي كدا ليه اتاريهم ما خلو انثي حايمة يخسي عليك يا بشة (فقط من اجل المزاح)
الجاي اعظم وامر وربنا يكون في العون لكن هل تفتكرو انها تكون ثورة مضادة زي ما بنسمع ولا عدم ضمير وايمان واكل مال الحرام بالباطل ....والله بقينا لوس ما فاهمين اي حاجة


#910614 [الجاسوس]
5.00/5 (6 صوت)

02-09-2014 03:36 PM
قبل عدة سنوات كنت في السعودية وقمت بزيارة ابن عمي وهو طبيب بيطري يشرف علي مزرعة ﻻنتاج الدواجن وتربية الضان في منطقة حائل السعودية و بجولة في المزرعة كانت هنالك عشرات اﻻبقار الهولندية ز ماﻻ يقل عن خمسمائة نعجة حمرية مهربة من السودان والمنظر الذي حجز في نفسي ان اغلب هذة النعاج اما حبلي او مع ضغارها وتبدو عليها اثار النعمة والرعاية خﻻف نظيرتها في كردفان ودارفور .كنت اظن ان تصدير النعاج الي الخليج امر عادي وقانوني حتي شرح لي ابن عمي ان هنالك قوانين صارمة بعدم تصدير اناث الانعام الي دولة .وتصدير انثاث النعاج الي الخليج قطر ة في بحر الفساد .وانا عملية تهريب انثاث اﻻبل الي مصر و ليبيا تجري علي قدم وساق وان مصر في القريب سوف تمتلك ثروة من اﻻبل تفوق السودان وان هنالك جهات رسمية في مصر تشجع تهريب انثاث اﻻبل من السودان .لتدمير اﻻقتصاد السودان وتقليل اعتماد مصر علي اللحوم السودانية .فنوموا ايها الشعب السوداني النائم حتي نصحي في يوم من اﻻيام ونجد حرامية اﻻخوان المسلمين قضوا علي اﻻخضر و اليابس في السودان


ردود على الجاسوس
United States [عباس] 02-09-2014 06:11 PM
ما نقول غير حسبنا الله ونعم الوكيل على كل ظالم وعلى كل حاقد على البلد ونسأله تعالى ان ينتقم منهم جميعا فى هذه الدنيا وفى الاخرة .


#910602 [محمد فريد عوض]
0.00/5 (0 صوت)

02-09-2014 03:23 PM
لا حول ولا قوة إلا بالله العلى العظيم


#910601 [رب لحد قد صار لحدا مرارا ضاحكا من تزاحم الاضداد]
5.00/5 (1 صوت)

02-09-2014 03:23 PM
من امن العقوبة اساء الادب


#910523 [Quite Man]
2.00/5 (1 صوت)

02-09-2014 01:46 PM
ياود ساتي مافي مستحيل وماتستغرش(تستغرب وتندهش) زي ما بيقول الاستاذ جبرة مادام انت في جمهورية السودان.


ردود على Quite Man
European Union [حسن سليمان] 02-09-2014 04:00 PM
جمهورية السودان ام جمهورية الكيزان الخرفان


#910521 [الغاضبة]
1.00/5 (1 صوت)

02-09-2014 01:45 PM
لماذا لا تتقدم صفوف الثوار يا ساتي...


ردود على الغاضبة
European Union [الغاضبة] 02-10-2014 08:17 AM
الشعب هو من أمثالك يا ود ربك الذين يقرأون ويسمعون الأخبار فقط ولا يتأثرون، ، ما ضيعنا غير الكلام الكتير والمقالات، ود ساتي هو الشعب ولو كانت الأوطان تحرر بالمقالات لتحرر السودان منذ 25 عاما لكن للاسف لم نعد نحتاج الى كشف الفساد لانه اصبح مكشوفا نحتاج إلى شعب يتحرك وود ساتي واحد من هذا الشعب ...

European Union [ود ربك] 02-09-2014 07:14 PM
عينك في الفيل تطعني في الضل
ساتي متقدم الصفوف بمقالاته وكشف الفساد لكن اين الشعب ؟


#910519 [وجع]
0.00/5 (0 صوت)

02-09-2014 01:45 PM
وووين الاسمو الامن الاقتصادي؟




جريمه تستاهل الاعدام فورا



البشير مسؤول عن كل ذلك..مايتهرب بالكلام!!!!


#910515 [حسن سليمان]
5.00/5 (5 صوت)

02-09-2014 01:43 PM
يا الطاهر ساتي أنت منتظر السودانيين يفهموا الكلام ده يازول الشعب ده كلمه في الله قال والرسول قال وبنات الحور فما لدينا يعملون السودانيين ديل رامين لي قدام الجنة وبس ... اما موضوع الوطن ده كلام شيوعيين ساكت وقولوا لواحد كافر وماعنده هدف وعايز يدخل النار


#910507 [سودانى فغقط]
1.00/5 (1 صوت)

02-09-2014 01:35 PM
اتركوا مصر تحتلنا ونكون عبيدا لها افضل من ان نكون عبيدا فى بلدنا الهامل ولعبة فى ايدى المؤتمر اللاوطنى انا افضل ان نرزح تحت الاحتلال المصرى مليون مرة خيرا من العبيد


#910505 [جاكوما]
5.00/5 (6 صوت)

02-09-2014 01:35 PM
باكر تسمعوا بالعامل اللاكتشف القصة دى فصلوهو من العمل !!


ردود على جاكوما
[عباس] 02-09-2014 06:16 PM
والله صدقت الله يكون فى عونه وعون عيالة لانو المسكين بيكون منتظر اشادة وترقية ولكن شكلو حا يلقى خلاف ذلك .


#910504 [radona]
5.00/5 (1 صوت)

02-09-2014 01:34 PM
كان يوم الخروف السواكني حقنا ده الواحد بيكفي عشرة نعجات في اليوم تب وهو سمين ومعافى
الجماعة ديل جابوا المحور وراثيا وشنو ماعارف من حركات الفساد دي بقى الخروف بيرضع النعاج ساكت وقاعد معاهم زيه وزي اي نعجة ياللعار
وخليك من الخرفان حتى الرجال بقت شنوبتهم ما زي زمان
وده كله من اللغوسة محور وهرمونات وتقاوي ومبيدات فاسدة
شكيناهم لله ...


ردود على radona
European Union [حزينة] 02-09-2014 04:22 PM
قول ليهم البيلعب في خلق الله الله بيسخطو


#910468 [محمد22]
5.00/5 (1 صوت)

02-09-2014 01:01 PM
سواكن هي ميناء التصدير فيجب أن لا ينسب خراف التصدير للميناء هناك الضأن الحمري المشهود له بكردفان ودار فور أيضا لها الكثير من الحقوق والجزيرة فاذا كان المسمى ينسب لاهل الشرق أو ميناء بوتسودان فتلك الاقاليم ستوقف تصدير مواشيها عبر سواكن


ردود على محمد22
[رانيا] 02-09-2014 11:02 PM
ياخي منذ الأزل معروف الخروف إسمه سواكني حسه جاي تغير تسميته ؟؟ والحيعرفه ليك بإسمه الجديد منو ؟ سواكن الماعاجباك دي هي التاريخ...المصريين لمن يقولوا (شطة أصواني) ما معناها منشأها من هناك وإنما جااااءت عن طريق أسوان .. على كل سواكني سواكني وأقفوا أي تصدير عبر سواكن ..أحسن تريحونا !!

[البلولة] 02-09-2014 03:03 PM
اهه يا محمد22 عاوز تصدرها من اي ميناء؟؟؟ ميناء ابوحمد والا ميناء الجنينة والا ميناء الحصاحيصا!!!!!
الناس في شنو وانتو في شنو؟؟؟
من زماااان عرف اي بهيمة تسمى خروف (جاية) من السودان اسمها سواكني نسبة لميناء الصادر!!!!
هي الناس "فاضية" ليك كمان تسمي كل خروف على حدا هو ذاتو كتر خيرون اعطوه اسم تجاري متعارف عليه
ركز يا حاج محمد فيما يفيد... بيقولك تصدير اناث يعني بعد شوية "حمل" ما حتاقدر تصدره .... تقول حمري ومشهود له!!!! مشهود له بحسن السيرة والسلوك يعني ما كلو لحمة
بعدين هل انت تملك قرار انك توقف تصدير "ماشيتها" عبر سواكن .... مجرد سؤال؟؟؟
عندي احساس انك من جماعة سنة تامنة

United States [البجاوي الوناب] 02-09-2014 02:44 PM
الشرق ومن زمان وللان يصدر الضأن للسعودية,والضان السوداني وهو يسمي sudan desert sheep خصائصه الظاهرية والجينية واحدة الا بعض الاختلافات البيئية,مثلا الضان الحمري قصير الارجل وهو يبدو في حجم اكبر لانه يسوق في عمر 2 الي 3 سنوات..واذا كانت سواكن ما عاجباك يا اخي ما تصدر بدرب الاربعين ولا عن طريق العوينات..لكن ليس من حقك مصادرة ميناء سواكن التاريخي..
مع تحياتنا لذلك العامل..وكفاية كدا


#910461 [عشنا وشفنا]
5.00/5 (1 صوت)

02-09-2014 12:56 PM
أين المسئوووووووووووووووووووووووووووول ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#910426 [راشد]
5.00/5 (3 صوت)

02-09-2014 12:32 PM
ده استرسال في تطوير الدفاع بالنظر اهو الوزارة صار عندها اكتشاف التهريب بالنظر


#910415 [مالك الحزين]
4.13/5 (4 صوت)

02-09-2014 12:26 PM
يعنى عادى بنت تكون ماشه عمره تركب بتاع عشان ماتجيب محرم ولمن ترجع تخلع البتاع


ردود على مالك الحزين
United States [shersh] 02-10-2014 10:35 AM
يامالك ....اه كان ركبتو وابى يطلع بعدين تعمل شنو...ولا كان فيهو باقى بتاع وقامت شالت تعمل كيف....

United States [نوباوي حر] 02-09-2014 03:11 PM
ههههههههههههههههههههههههاهي محن ياهو الفضل ههههه


#910401 [عمر حسن صالح]
4.00/5 (1 صوت)

02-09-2014 12:18 PM
لا تنهي عن خلق وتأتي بمثله.. عار عليك اذا فعلت قبيح .. هكذا نحن والهلع وراء الدولار ومن منا لا يرشي ويرتشي ويهرب الدولار او يخفي ماهو ثمين ومن منا لا يسكت عن باطل .. هكذا اصبح الشعب السوداني (قصة قصيرة لو سمح لي القارئ لاكريم شاهدتها في مطار الخرطوم وانا اتسلم عفشي من السير احد الركاب يحمل في جيبه منديل مبلل بالماء (جاهز) تسلم كرتونه مغلفة بالبلاستيك والجمارك اشرت عليها بجميع الجهات بمجرد استلامها وامام كل الحضور وكأنه شيئ مشروع مسح تاشيرة الطباشير من كل الجهات بالمنديل المبلل من الكرتونه الاولي والثانية والثالثة وحمل عفشه .. هممت بأن ابلغ عنه ثم قلت كل البلد ماشيه كدي وسكت وانا أتألم من وخذ ضميري .. وكلنا كدي جات علي النعجة المسكينة الماشية بلاد بيت الله ومارقه بي حلده وخصيات أحوها الكبش .. علينا كلنا تنظيف انفسنا اولا ثم تعليم ماهية الوطن مع الورع ومخافة الله


ردود على عمر حسن صالح
European Union [نص صديري] 02-10-2014 02:03 AM
هي كان مابلد هملة ووهم شفت مطار بيأشر العفش بطبشيرة للتفتيش؟


#910388 [Touar]
0.00/5 (0 صوت)

02-09-2014 12:11 PM
لو بقت على النعاج ساهل .. خايف يعملو نفس العملية دي في اناث البشر ..


#910376 [المشتهي الكمونية]
4.50/5 (5 صوت)

02-09-2014 12:05 PM
لا أرى وجه غرابة في هذه الحكاية لأن هناك ما هو أغرب في بلادنا ويكفي أن التحوير الوراثي يتم عندنا حتى على مستوى البشر والحمير والبقر ، مثل تحوير أو تحويل بقرة أو حمار إلى رئيس جمهورية أو تحوير جحش أو حمار لوزير دفاع حتى أضحينا أمة تحكمها زريبة مواشي


#910369 [المتغرب البدي]
4.75/5 (6 صوت)

02-09-2014 11:59 AM
لو الكلام دا صاح انتظروا كلها سبعة سنة ويقيف تصدير الماشية للسعودية ، ويبدأ بعد ذلك استيرادها منهم ..

قاتل الله الانقاذ ..


#910366 [أسمر جميل فتان]
4.63/5 (6 صوت)

02-09-2014 11:58 AM
عاوزين نعرف التركيب ده تم بادوات لاصقة ام بعمية جراحية؟؟؟؟ لانها بتفرق كتير وممكن جمعيات الرفق بالحيوان تتدخل فالنفترض انو في خروف (غير مزور) جاته مشاعر غير امينة!!! تجاه خروف (مزور) ولو قام الخروف عملها!!! ممكن خروف تاني (غير مزور) يشوف المنظر!!! يفتكر انو الجماعه قلبو !!!وتشاع الفاحشة بين الخرفان مزورها وغير مزورها وبذلك تتشكل عند الخرفان عقدة "تسمي المثلية الخروفية!!!" ووتوقف عن عملية الانتاج وبالتالي تضيع الثروة الحيوانية بتاعتنا!!!!!!! وصدق من قال شر البلية ما يضحك!!! شفتا يا ابليس احسن حاجه تعملها تعتزل!!!
***********************************************************

بالله دي حالة!!! دي مصيبة لانو تصدير الاناث من الحيونات تعتبر جريمة قومية!!!
ولكن اذا كان رب البيت للدف ضاربا فشيمة اهل البيت الرقص !!!! والناس على دين ملوكهم!!! ماذا تنتظرون من حكومة وزراءها السابقون ووكلاء وزارات يقدمون الي محاكمات في تهم تتعلق بالشرف والامانة!!! يعني حرامية وكدا وهذه التهم كفيلة باسقاط الحكومات ليس بمظاهرات من الشعب!!! ولكن من تلقاء انفسهم باستقالات جماعية!!! وبعد ده يطلعوا علينا ناس غندور ويقولوا معارضة الكيبورادات بدون خجلة !!! ايها السادة كل من خاف من الصحافة الكترونية او غير الكترونية فيلمس راسه لانو معناه خايف طرف الصوت يحصلو!!!
انتو ما بتشوفوا ان الدول الاخري سبب تقدمها شنو؟!!! الشفافية والمصداقية وتقديم نماذج للتضحيات المشرفة للذين تحت رئاستهم!!! ولكن واحد حرامي كيف يحاسب حرامي تاني!!! جريمة زي دي عاوزين الصحافة الالكترونية تسكت عليها انتم واهمون
يا غندور انت وغيرك
انت لو ماسرقت وما زورت وما غغتته وما تحرشتا وبتاخد راتبك زيك وزي الناس (كل الناس!!!)خايف من شنو؟؟؟
وانتو مفتكرين انكم خالدين فيها!!! كلا والله... من سوء حظكم التكنولوجيا وتطورها المتسارع في عمليات الحفظ والارشفة يجعل كل شئ مخزن ومحتفظ بدسامته الي حين!!! صوت وصورة ورائحة كمان سياتي يوم الحساب لناس فقه السترة حتى السرقة عملتو ليها اسماء وهمية ولخبطتوها مع الدين لخداع الناس والبسطاء فالويل لكم

اللهم اضرب الظالمين بالظالمين واخرجنا من بينهم سالمين ..... آمين
ودمتم


#910351 [دقاش]
0.00/5 (0 صوت)

02-09-2014 11:45 AM
والله لاتوجد دولة اصلا ولايوجد وطنية والبلد حالتو اصبحت مزرية كل السودان بقي حرامية وكل واحد عايز اسرق والشعب بقي الطم في خدوده ومنتظر معجزة من السماء تنزل ليه ياشعب كفاك نوم اصحي خلاص ياتموتوا ياتفوتوا البلد دي للكيزان وكدا كدا اصلكم ميتين .


#910334 [ابومحمد]
4.00/5 (2 صوت)

02-09-2014 11:33 AM
الخروف السواكني من اجود انواع الخراف بالخليج وسعره اغلى من الاستالي والاثيوبي والباكستاني
بالطريقة دي خمسة ستة سنة لي قدام ما حيستوردو مننا .. خلاص حيعملوا مزارع انتاج محلية طالما ما عندهم الانثى والذكر.
دي خيانة عظمي ..
والله لو البلد عندها والي .. الزول العمل كده مفروض يتشنق في ميدان عام
يا عمر البشير لو الكلام البتكتب ده بصل ليك وساكت ساي والله حسابك عند ربنا عسير عسير عسير
الا هل بلغت اللهم فاشهد


ردود على ابومحمد
European Union [سيد كرم] 02-09-2014 05:59 PM
والله كضاب ياعلى ابومحمد,, أولا الاسترالى من أردأ الخرفان وريحته عفنه ولايأكله إلا البنغال وهو رخيص جدا في السعوديه ,, السواكنى الآن وصل سعره إلى 1500 ريال ولاسترالى لايتعدى ال300 ريال ولا أحد يريده لان رائحة لحمه رديئه وعفه كمان

[شمال و جنوب فى محنة] 02-09-2014 03:31 PM
القال ليك منو السواكنى سعره اقل من الاسترالى و انا بالزات بفضل الاسترالى المستورد رغم سعره الغالى لان الخروف البجينا هنا من اردأ الخرفان مثيله فقط الصومالى


#910327 [كبسور]
5.00/5 (2 صوت)

02-09-2014 11:26 AM
اصلا الكيزان بفكروا فى التنظيم العالمى للاخوان وما شغالين بالسودان
يعنى ناس حماس اقرب ليهم من الاتحاديين وحزب الامه ويعملون لصالح تركيا وقطر ومستعدين يبيعوا المليون ميل بما فيها لتنظيمهم اللعين


#910326 [بت قضيم]
0.00/5 (0 صوت)

02-09-2014 11:25 AM
ملعون أبوك بلد


#910307 [بت البلد]
5.00/5 (1 صوت)

02-09-2014 11:11 AM
لا حول ولا قوة الا بالله يعني الحكومة مارست افقار البلاد بكل السبل والطرائق غير المشروعة... الشكية لله


#910305 [حمدى]
5.00/5 (1 صوت)

02-09-2014 11:10 AM
هههههههههههههههههههههههههههههههههههههههههههههههههههههههههه

يا خى انت بتبالغ
دى نعاج ماشة عمرة وجاية راجعة وعشان مش معاها محرم عملوليها بيضات
لا تهريب ولا يحزنون
فاتت عليك


ردود على حمدى
European Union [علوب] 02-09-2014 12:23 PM
الله يجازي محنك يا حمدي ... هاهاهاها .


#910259 [اسد]
4.50/5 (6 صوت)

02-09-2014 10:38 AM
ياستاتي ده الفساد لكن رايك شنو في تصدير اناث البني ادم، ولا القصص دي مسكوت عنها ، ياساتي بلادنا انحطت الى الدرك الاسفل ، مافي شيء سليم نهائي الارض ، والناس والشجر ، والحيوان ، كله اصابه السوس ، والله ننتظر الموت ولارجاء ولا أمل ان نشهد تقدم او رقي مثل بقية العالمين.


#910253 [abu shawarib]
5.00/5 (2 صوت)

02-09-2014 10:35 AM
لابد من التحقيق العاجل والتنفيذ الاسرع باخصاء من قام بهذا الجرم


صدر تحت توقيعى
ابوشوارب


#910245 [أبو أواب]
5.00/5 (4 صوت)

02-09-2014 10:20 AM
ديل يا الطاهر يا أخوي

صدور (الذكور) بشراً كانو ام مواشي

فكرك بيغلبهم

يصدرو (الأناث) بشراً كانو أم مواشي؟!!!


#910244 [ودالشريف]
5.00/5 (4 صوت)

02-09-2014 10:20 AM
هم ديل عندهم وطنية ولا غيرة على البلد يا الطاهر ساتى قاعدين تنفخو في قربة مقدودة هولاء شرزمة من اللصوص سطو على السلطة باليل فهل مايحدث من دمار وتمزيق في البلاد فعل ناس عندها ذرة من الوطنية هولاء خدعونا بالدين وهم ابعد الناس عنه واثبتو حقا انهم تجار دين وفاسدين وكاذبين مايحدث اخى الطاهر لايمكن ان يحدث من شخص يملك ذرة من الوطنية


#910240 [سوداني]
4.00/5 (1 صوت)

02-09-2014 10:18 AM
اي عملية تهريب ورآها شخص نافذ السلطة


#910227 [abdulrahim]
5.00/5 (2 صوت)

02-09-2014 10:14 AM
يا اخ ساتي هذه كارثة بكل المقاييس..يجب تطبيق مادة خيانة الوطن وبحاكم مرتكب هذه الجريمة..هو الاضرار بالامن القومي الا زول يشيل بندقية..هذا ايضا اضرار بالامن القومي...بعد شوية الماشية السودانية حتكون زي حيوانات الصيد مافي زول داايرها في السوق العالمي..اناث الماشية تعتبر ثروة قومية يجب الحفاظ عليها..


ردود على abdulrahim
European Union [نص صديري] 02-10-2014 02:11 AM
فعلا
الكارثة لن يعيروا الامر اي اهتمام هذه القصة ستنتشر انتشار النار الهشيم
في اي دولة بها ذرة اخلاق بين اهلها مفترض ان يستقيل مجلس الوزراء غدا
اوسكار للطاهر ساتي لانها فعلا لم تحدث في ايتها دولة في العالم وستسيئ لسمعتنا تماما
فالقضية ليست هنا مسألة تصدير اناث فقط فهي مثال للعقلية الوهم والجشع وعدم اللا مبالة والخيانة بكل معانيها
قولو تفو معاي لاي كوز

[جنوبي] 02-09-2014 04:37 PM
فعلا ده اخطر من الاختلاس لأنو بحارب اقتصادنا في الحاضر والمستقبل !!
ومفروض يتحاكموا كلهم من التاجر المُصدّر لحدي ناس المحجر في سواكن ,
لا حول ولا قوة الا بالله ...........


#910225 [عصمتووف]
4.00/5 (1 صوت)

02-09-2014 10:13 AM
والله ديل يزرعوا الفجلة في دبر العجلة تطورت الجريمة



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة