الأخبار
أخبار إقليمية
الممثلة القديرة فائزة عمسيب : اكتشفت إني عايشة بي كلية واحدة..صورة "الفيسبوك " زعلتني لأنهم طلعوني ( شحادة).
الممثلة القديرة فائزة عمسيب : اكتشفت إني عايشة بي كلية واحدة..صورة "الفيسبوك " زعلتني لأنهم طلعوني ( شحادة).
الممثلة القديرة فائزة عمسيب : اكتشفت إني عايشة بي كلية واحدة..صورة


الصورة دي يابتي قديمة من سنة 2004م كانت في البوابة الداخلية للمسرح
02-12-2014 05:42 PM
حوار: محاسن احمد عبدالله

المكان ..أمام بوابة المسرح القومي الداخلي..الزمان ..قبل عدة سنوات مضت.. ظهرت متلفحة ثوبها ومتحكرة على الأرض..بجوارها حقيبة قديمة ..واضعة يدها على خدها و(ممحنة).. ترتدي سفنجة.. نظراتها فيها الكثير من الأسى والتفكير العميق.
هذا وصف دقيق للصورة التي نشرت في الأيام الماضية للممثلة القديرة و(أم الدراميين) فايزة عمسيب على صفحات الفيس وعلى مواقع التواصل المختلفة, التي جسدت معاناتها مع المرض وعدم وقوف المعنيين بالأمر معها في محنتها, او كما أراد من قاموا بنشر الصورة التي تداولها الآلاف من المتصفحين للنت والذين غضبوا للإهمال الذي تعاني منه (بت عمسيب) وذلك لحبهم لها ومن خلال قراءتهم للصورة التي صادفت مآرب آخرين قاموا بنشرها على حد قولها.
كان لا بد من إلقاء الضوء على المشكلة وتوضيح الحقائق كاملة من صاحبة الأمر نفسها ومعرفة الأحداث عن قرب .. لذلك يممت وجهي شطر مدينة ام درمان نهار الأمس قاصدة منزل الأستاذة والدرامية فائزة عمسيب.
وصلت الى المكان المقصود في أحد الأحياء الشعبية مرورا بزقاق ضيق.. وصولا الى المنزل المقصود حيث تقيم .. طرقت الباب وتقدمت الى الداخل لأستمع الى صوتها وهي تقول لي (حبابك, حبابك, اتفضلي يا بتي).. عندما تقدمت الى الأمام فوجدتها جالسة على السرير تعلو وجهها ابتسامة صافية مرحبة بشخصي رغم معاناتها مع المرض ..بادلتها التحايا وجلست الى جوارها ..فإليكم مادار بيننا من حديث بلغتها البسيطة.
قصة عجيبة..
عايزين نعرف حقيقة الصور اللي ظهرتِ فيها على صفحات الفيس بوك وانتِ على الأرض؟
تنهدت وتنفست بعمق شديد قائلة :(والله أنا ذاتي يا بتي احترت عديل واتفاجأت لما شفت الصور على الفيس بوك بالوضع العجيب ده وكأني (شحادة) والله زعلت زعل شديد من العملو الحاجة دي).
طيب قصة الصورة دي شنو..عشان الناس تعرف الحقيقة؟
احتدت نبرتها في الحديث: (الصورة دي يابتي قديمة من سنة 2004م كانت في البوابة الداخلية للمسرح وكنت وقتها تعبانة شوية من البروفات وقعدت على المصطبة ولابسة لي (سفجنة) وطوالي بلبسها عشان مابقدر ألبس الأحذية العالية عشان الرطوبة.. لكني اتفاجأت بيها في الفيس ..يعني ناس الفيس بوك ديل بيستهتروا بي ولا شنو؟).
حقيقة المرض..
طيب حقيقة مرضك شنو بالضبط؟
اعتدلت في جلستها وقالت: (أولا أنا بعاني من بدري من ورم في أقدامي وخشونة في الركب ومشكلة في التنفس بسبب ضيق الشرايين وقبل كده سافرت للخارج عشان أعمل عملية لقيت التكاليف غالية جدا وما كلمت زول وختيت الورق تحت مخدتي وتركت الموضوع ومافي زول جايب لي خبر, وفي عام 2009 سافرت للقاهرة وعملت عدد من العلاجات بمركز غنيم لأني اكتشفت إني عايشة بي كلية واحدة.
مقاطعة.. كيف الكلام ده ..دي معلومة جديدة؟
(لا,لا,لا دي خلقة ربانية وماشغالة بالموضوع كتير).
إذا نرجع لي موضوعنا ..السبب اللي خلى الصورة دي تظهر في التوقيت ده شنو؟
صمتت قليلا ثم أجابت:
الأيام الفاتت كان تكريم الفنان الكبير صلاح بن البادية وصلوا البيت أخدوا مني معلومات عن الفنان صلاح بن البادية لحفل التكريم باعتبار أني مثلت معاه في فيلم (تاجوج) وكان من المفترض أكون متواجدة في التكريم لكن أقدامي كانت متعباني شوية السبب اللي منعني من الحضور واعتذروا نيابة عني, والسبب التاني كان في تكريم في سينما المدنيين وكنت من ضمن المكرمين وما قدرت مشيت في اليوم الختامي رسلت مندوب ينوب عني لأني عيانة بعدها انتشر الخبر في النت بأني مريضة واستغلوا الصور القديمة وزي ما شايفة عملوا العمايل دي.
التكفل بالعلاج..
أنت الآن مريضة ..منو المتكفل بي علاجك؟
ما في زول قدم لي دعم ولا مساعدة من الجهات المسئولة غير رجال الأعمال صابر الخندقاوي اللي قام رسل مندوب من مكتبه متكفل بعلاجي وسفري للأردن مع مرافقين وكتر خيرو.
مقاطعة ..كيف ماسألوا منك الدراميين والأستاذ علي مهدي قال انو اتصل بيك وهو الآن ساع للحصول على المبلغ عشان العملية؟
ضحكت باستهتار ثم قالت: (ااااي اتصل بي لكن ماعمل أي حاجة وكتر خير السيد الصادق المهدي اللي اتصل بملك الأردن من أجل العلاج هناك.
ورد في بعض الصحف انو والي الخرطوم أداك بيت؟
وضعت يدها على خدها مندهشة وردت (سبحان الله ..الناس دي بتقول كلام ساي والسلام ..الكلام ده ما صاح الوالي ما أداني أي حاجة دي إشاعة ساي).
تكلفة العملية كم؟
17 ألف دولار.

في شائعات بتقول انو عندك بيوت كتيرة ومؤجراهم ..يعني (كاتلة الجدادة وخامة بيضها)؟
أطلقت ضحكة طويلة ورفعت يديها نحو السماء قالت (ياريت يابتي.. ياريت يسمع منك الله..أنا بعت كل ممتلكاتي الخاصة كيف يكون عندي بيوت ..دي إشاعات ساي).
البيت القاعدة فيهو الآن ده.. بيت منو؟
أجابت سريعا: ده بيت بت أختي
طيب ماعندك بيت الورثة؟
خلي ده موضوع براه
رسالتك شنو لي أهل المسرح والدراما؟
ماعندي ليهم حاجة..ربنا يزيد العليهم
وناس التلفزيون؟
التلفزيون مات من زمان
قبل ما نغادر ..دايرة تقولي حاجة أخيرة؟
طبعا..أولا بشكر منظمة ( الطيبين) لوقفتهم معاي والأخ احمد الجوهري وخليل وكل من ساهم في علاجي وبالأخص الأستاذ صابر الخندقاوي..وبشكرك إنتي كتير.

السوداني


تعليقات 11 | إهداء 0 | زيارات 12542

التعليقات
#915006 [ابوجاكومة]
0.00/5 (0 صوت)

02-13-2014 08:50 PM
نطالب باكرام كل من خدم البلد سواء ان كان ممثلا أو معلما أو موظف صغير في اي ادارة حكومية، عادة ما نسلط الاضواء علي المشاهير الذين يجور عليهم الزمان وننسي أناس كثر خدموا البلد أكثر من غيرهم(معلمين وأطباء وتمرجية الخ). يجب أن يكون نضالنا من أجل ضمان اجتماعي قوي لكل الفئات يصون كرامة الانسان عندما يخرج من دائرة العمل والانتاج. فائزة عمسيب كانت دافعة للضرائب طيلة مسيرتها الفنية وكل أجورها التي تقاضتها من التلفزيون والاذاعة كان هناك خصم 10 في المائة من اجرها كضريبة وكل عروضها المسرحية كانت مصلحة الضرائب تتحصل نصيبها بلا هوادة ، اذا لها دين علي عاتق دولة السجم والرماد واجب السداد الان وفورا. طالبي بحقك وانتي مرفوعة الرأس فأنتي لا تشحدين بل تطالبين بحقك من دولة علي سدتها لئام.


#914772 [boshab]
0.00/5 (0 صوت)

02-13-2014 04:15 PM
طيب يا فايزة اعذرينا لاننا اتعاطفنا و تضامنا معك, معاكِ حق, اذا كان الوضع دا عاجبك مافى داعى اننا نتحشّر فى الموضوع و لكن الصورة لا تكذب.


ردود على boshab
United States [Nurah] 02-13-2014 05:46 PM
حرام عليك ياخي افهم هي شرحت ليك قصةالصورة قديمة وماليهاعلاقة
ده تعليق قاسي مافي ليه داعي
التحية لفائزة عمسيب

[أبو درقات] 02-13-2014 05:11 PM
يا بوشب سمعته بحاجه اسمها التعفف وعزة النفس, شكلك ما سمعت بيها اقول ليك حاجه القالتو الاستاذه فايزة عمسيب هو احد دروس العفاف وعزة النفس يعني كنت دايرها تنكسر وتقول انا حالي تعبانه وماعندي بيت وووووو


#914689 [سودانى]
5.00/5 (1 صوت)

02-13-2014 02:59 PM
ربنا يديل الصحة والعافية


#914529 [abuahmed]
5.00/5 (1 صوت)

02-13-2014 12:33 PM
الاستاذه الام فايزه واحده من رموز الوطن والتي لم ياتي المسرح السوداني الي الان بافضل منها ولو ما ربنا ابتلانا بالحرامية دول ما كانت تعاني مثل هذه ولا يهمك امي العزيزه انت رمز انت العزه انت الكرامه انت الشجاعه ونحن لنا العار ولنا الذل والهوان لاننا ارتضينا بامثال هؤلاء ان يحكومنا


#914431 [ام رهف]
5.00/5 (1 صوت)

02-13-2014 11:25 AM
تحية واجلال للام العظيمة فائزة عمسيب............حقيقة تالمت لقراءت كلماتها المحبطة من الحاصل .لكن تصويب وللامانة ............صورة فائزة عمسيب التي تم تداولها عبر الفيس بوك لم يكن التداول من اجل الشتهير او الاستهزاء.....بل مست ضمائر الناس .كلهم تعاطفو وحزنو ............ونقموا على حال البلد التي تلفظ بقسوة ابنائها ...........لم اقرا حرف واحد يهزا بها او بحالتها بل كلهم تالمو منق اسوة الصورة ........وهنالك البعض من حالو منع تداولها فقط لتظل صورتها جميلة كما كانت .بينما اصر اخرون على ان تنشر الصورة رغم فظاعتها لكشف ما وصل اليه حال البلد من تهميش للمبدعين .


#914402 [ALI]
5.00/5 (2 صوت)

02-13-2014 10:54 AM
وكتر خير السيد الصادق المهدي اللي اتصل بملك الأردن من أجل العلاج هناك

اهايامدعى النضال شن رايكم

كم انت عظيم ياابوام سلمه


ردود على ALI
[Al-Ansari] 02-14-2014 06:05 AM
شكرا لإمام الأمة و رئيس الوزراء الشرعى


#914087 [رقم 2]
5.00/5 (1 صوت)

02-13-2014 12:41 AM
في عصر الانقاذ ترتيب اشجع الشجعان وعزيزي النفس
1. محمد ابراهيم نقد
2. فايزة عمسيب
وهكذا
في احلك ظروف


#914076 [خليك رايق]
5.00/5 (3 صوت)

02-13-2014 12:15 AM
أهم شيء فضحتي لينا الوالي الله يفضحه دنيا وأخري


ردود على خليك رايق
European Union [هيثم الحلاوي] 02-13-2014 11:37 AM
اما انك زول غريب زوله كبيره عمر و مريضه و تشكي في حاله و انت كايس فضيحة الوالي هو الوالي داير ليهو زول يفضحو يعني ؟ ربنا يديك الصحه و العافية استاذتنا فايزه عمسيب و يشفيك شفاءاً عاجلاً غير آجل .


#914010 [رانيا]
5.00/5 (3 صوت)

02-12-2014 10:33 PM
لا حول ولا قوة إلا بالله ..إن شاء الله ربنا يكرمها ويسخر لها أولاد الحلال وما يحوجها سؤال اللئيم .
دي ست عظيمة جدا وياما أسعدت قلوب بتمثيلها القدير الرائع .


#913958 [عصمتووف]
5.00/5 (2 صوت)

02-12-2014 08:53 PM
قد مات قوم وما ماتت فضائلهم .. وعاش قوم وهم في الناس أموات
لو كنت وزيره ولا مديرهكبيييره التذاكر والاموال السائلة والمجمده والخراف والعجول والحممام والدجاج والسمان وجميع انواع المياة والتلفونات والسيارات تطاقش يكفي اغلي ما تمليكة عزة النفس والفقر ليس عيبا كلنافقراء لكن نفسنا عزيزة علينا حتي لو نموت اما المدعو بالنقيب علي مهدي دائما اشاهده في شارع القصر كل يوم سياره جديده اخر موديل بين ال بي ام والبرادوا ارمي طوبته يكفي ان ندعوا الله لك بالشفاء ونهديك حبنا هو كل العلاج
إِلِّى كمان فى ناس فايتاك بى الصبُر
ساكنين بى الإيجار .. لا طين .. لا تمُر
وواحدين بى الإيجار .. ما لاقين جُحُر
سِلعـتُمْ الضُراع .. والعرق اليخُر
عمال المدن
كلاّت الموانى
الغُبُش التعانى
بحّارة السُفُن
حشّاشة القصوب
لقاطّة القطن
الجالبة الحبال
البصل الفُرُن
الشغلانتو نار
والجو كيف سُخُن
عيشُنْ كمّهو .. وديشُن هان قَدُر
وناساً حالا زين
مصنع .. مصنعين
طين فى طين .. ووين
ما مرابا مُر.. بارد همها
لا يعرق جبين .. ولا وشاً يصُر
عين والله .. عين
كلها كمها .. وهمها هان قدُر
فى الجنة أم نعيم .. فى الجنة أم قُصُر
إِلِّى كمان فى ناس فايتاك بى الصبُر
ساكنين بى الإيجار .. لا طين .. لا تمُر
وواحدين بى الإيجار .. ما لاقين جُحُر
سِلعـتُمْ الضُراع .. والعرق اليخُر
عمال المدن
كلاّت الموانى
الغُبُش التعانى
بحّارة السُفُن
حشّاشة القصوب
لقاطّة القطن
الجالبة الحبال
البصل الفُرُن
الشغلانتو نار
والجو كيف سُخُن
عيشُنْ كمّهو .. وديشُن هان قَدُر
وناساً حالا زين
مصنع .. مصنعين
طين فى طين .. ووين
ما مرابا مُر.. بارد همها
لا يعرق جبين .. ولا وشاً يصُر
عين والله .. عين
كلها كمها .. وهمها هان قدُر
فى الجنة أم نعيم .. فى الجنة أم قُصُر
قيل لحكيم اي الأمور خير
قال دين يشفع و مال ينفع و أخ يسأل و لا يقطع
اللهم ثبتنا على ديننا
و انفعنا بمالنا
و أدم وصلنا
و لا تحرمنا من رؤية بعضنا
بارك الله في أيامكم و غفر لنا و لكم


ردود على عصمتووف
[أسمر جميل فتان] 02-12-2014 11:54 PM
شكرا "امنا" فائزة عمسيب على ما قدمتيه لبلدك ولشعبك وتستاهلي كل الخير والحب وندعوا لك من قلوبنا بان يسهل الله امرك ويرزقك من حيث لا تحتسبين وينزل عليك الشفاء من كل بلاء .. آمين

وكم كنت رائعا اخي عصمتووف كعادتك وانت تتدفق بهذه الكلمات الصادقة ...
"يكفي ان ندعوا الله لك بالشفاء ونهديك حبنا هو كل العلاج" الكلام الصادر من القلب لا يدخل الا الي القلب مباشرة فهو يحمل كل الصدق والاخلاص والوفاء،،، وكنت صادقاً فالحالة النفسية التي تصاحب المرض خاصة للمشاهير امثال امنا فائزة تحتاج الي احساسهم بانهم مازالوا في الميدان وممكن وردة صغيرة ترد عليهم ذلكم الاحساس بالدفء والحنان والاهتمام وقد اهديتها اخي الكريم اروع الورود واجملها متمثلة بهذه الكلمات ... الف مليار شكر ولجميع الاحبة...
ودمتم جميعا



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة