الأخبار
أخبار إقليمية
بطلو لولوه ياناس المؤتمر الوطني
بطلو لولوه ياناس المؤتمر الوطني



02-22-2014 10:21 AM

د الرازي الطيب ابوقنايه

ونحنا مقدمين علي السلام والاجماع الوطني, في حاجتين لو بطلهم المؤتمر الوطني, ممكن نشوف ضوء في نهايه النفق. اللولوه, واغتيال شخصية ياسر عرمان. حكاية ياسر مفهومه بالنسبه لينا لانهم فشلو في استقطابو وزعلانين منو لانو في انتخابات 2010 وقف ضدهم بقوه وقرب يجيب قون. اما حكاية اللولوه دي المامفهومه. ياخ انته مزنوق ومحاط من كل الجوانب داخليا وخارجيا, وماعندك برنامج تقدمو للناس, ومحتاج لي اي زول ينتشلك من الغرقه الانته فيها, اللولوه ليك شنو؟
اول لولوه عملوها في اديس ابابا لمن اصروعلي تحجيم التباحث مع الحركه في المنطقتين رغم طرح الحركه لشموليه التباحث. ودي طبعا فيها ضبابيه وتداخل في تحديد الاجنده لانو المنطقتين اصلا داخل السودان ومشاكلا لا تتجزأ من مشاكل السودان. العجيب في الامر انهم في الخرطوم نادو الجميع للتباحث (بمافيهم الحركه). ولا الدعوه ماقدموها للحركه كمان؟ ويبقي السؤال. هل الحكومه دايره قطاع الشمال يكتفي بالتباحث في مشكله جنوب كردفان والنيل الازرق بس دون مشاكل السودان الاخري ولا دايرين يتباحثو معاهم مرتين متتاليتين. في الاول بخصوص المنطقتين وتاني في السودان كلو. ولا دي زي ماقلنا تكون لولوه ساي.

تاني لولوه بعملو فيها الناس ديل الاسطوانه المشروخه بتاعة التفاوض يكون مع اهل المصلحه الحقيقيه. اها دي بالغو فيها. اذا اصلا التفاوض دايرنو مع اهل المصلحه الحقيقيه طيب امشو اتفاوضو معاهم وبطلو حكايه اديس ابابا دي. فاهل المصلحه الحقيقيه موجودين داخل السودان في الدمازين وكادقلي وفي المجالس التشريعيه, واريح لينا نحنا زاتو بدل السفر والنثريات الكتيره دي. وهل هم من اصحاب المصلحه الحقيقيه؟ وحتي لو فرضنا قطاع الشمال غير الوفد وجاب ناس من المنطقتين بس, الحل حيكون شنو؟ انفصال المنطقتين مثلا؟ وحيكون حل بي معزل عن مشاكل السودان؟ مش الحكومه ياها الحكومه والمؤتمر الوطني ياهو ذاتو؟

بدون شك الحكومه عندها مشكله مع جهه اسمها قطاع الشمال فطبيعي يكون عندها مشكله مع زول اسمو ياسر عرمان لانو احد مؤسسي القطاع. لو الحكومه بتكره الراجل ومفتكره انها ممكن تتجاوزو حقو تنسي المباحثات وتستعد لي حرب طويله الاجل. فقطاع الشمال مازي احزاب الفكه ولا ناس قريعتي راحت ديك ومافي جهه لا الحكومه ولا غيرها ممكن تملي عليو شروط اطلاقا. وزي ما انته (شاميهم) هم برضو (شامنك). لولوة الحكومه في موضوع ياسر عرمان ظاهره في حكايه يتفاوضو معاهو بي جاي ويسلخو في القنوات الفضائيه بي غادي. مثلا قناة الخرطوم قبل يومين جابت زول مؤتمر وطني ومن ناس النيل الازرق في مقابله قال فيها انو ياسر عرمان بعمل ليو عصبي (وهو في الوكت داك كان عمل لينا عصبي). لمن سالو المذيع عن السبب, قال لانو الراجل دا بهلوان وبتاع حركات وقام ضرب مثل بي ترشحه لي رئاسه الجمهوريه. قصدو ياسر يترشح لي رئاسه الجمهوريه حركات بهلوانيه وهي الجابت ليو العصبي. بلاي دا منطق دا؟ بس الولوه الجد في خبر مسرحية محاكمة عرمان وعقار وتوجيه تهم ليهم. ياخ معقول تكون بتتفاوض مع قطاع الشمال وتوزع في الابتسامات يمين وشمال وتكون بي تحت تحت بتجهز في امر قبض للجماعه؟ بلاي دي يسموها شنو؟

المهم حكايه ياسر عرمان وكونو مابمثل المنطقتين حقو المؤتمر الوطني يتجاوزا لو فعلا بسعي للسلام. فالحركه الشعبيه ماحاتجيب رئيس وفد غيرو رضي من رضي وابي من ابي. وغندور يعني خلاص من اهل المنطقتين؟
الخوف انو المؤتمر الوطني يكون بضيع في الزمن لحدي الانتخابات الجايه ناسي انو المعارضه حالفه طلاق ماتشارك فيها بالوضع الحالي. والشعبي والامه برضو حالفين معاهم. فبلاي بطلو لولوه وخليكم جادين شويه واقعدو مع قطاع الشمال بي رئاسة عرمان وارمو البايظ بتاعكم وخلونا شويه نشم نسائم الحريه ونبقي زي بقية خلق الله. عملتو لينا شنو في موضوع سودانير؟؟!!
[email protected]


تعليقات 3 | إهداء 0 | زيارات 2118

التعليقات
#923023 [عثمان حسن]
0.00/5 (0 صوت)

02-22-2014 01:55 PM
يا دكتور انا ما عارف الدكتره دي جايبه من وين بالله لو ياسر عرمان ده فيه مخ يبقي جناح للحركه الشعبيه اها الحركه بعد كضبه ده وشعارات الماقدرت عليها وفلقت راسنا عشرين سنه تحرير السودان والسودان الجديد وهسي جنوبون لا لامي قديم ولاجديد وياسر عرمان الدموع الضيعه علي موت قرن لو قدر كب دموع قدرا احتمال ربنا يغفر ليه قتلوا لبلل والاقرع في جامعة القاهره فرع الخرطوم الجو الرجال وادبوا حسني مبارك وغيروا اسمها لجامعة النيلين الهم بين ايدينا . وعليك الله يادكتور ياسر ده الشعب السوداني بيعرفوا من وين ما هرب في التماننيات بعد جريمتوا البشعه وبعدين شنو نزل الانخابات والمؤتمرالوطني زعلان ياخي ما المؤتمر الوطني عاوز كل زول يجعجع يجي ينزل في الانتخابات عشان نوريه وزنوا الحقيقي كم عشان يمشي يتبع حميه غذائيه معينه ويبقي زي عمالقة المؤتمرالوطني ، و ياسر عرمان ما قال نحن ما عندنا تفاهم مع الحكومه دي الا السلاح هسي مالو بي يبطبط الجنوب بقي نيران ياعرمان وبدل كان عندك سيد واحد بقي عندك اتنين يا تقيف مع سلفاكير يا مع مشار وكان ابيت الاتنين وعاوز تعمل حريف حا يحمروك ويلفوك في قصتير ويرسلوك للاسد الكنت تتجارا منو وتنطط في غابات الجنوب ويقوم الاسد باكلك في صفرة القصر الجمهوري ، وكان حبيت تتراجل وتتواجد شمال خط 1956م تكون وقعت في يد ناسا عجب . عووووووووك جييييييبو حييييييييي .


#922876 [بت قضيم]
0.00/5 (0 صوت)

02-22-2014 12:10 PM
لولوا لولوتا ديل ما شدة بلولوا بقوا زي مساعد الياي ملولون ومنططين وما قادرين يثبتوا في راي واحد وملخبطين


#922795 [الدنقلاوي]
5.00/5 (1 صوت)

02-22-2014 11:12 AM
(ونحنا مقدمين علي السلام والاجماع الوطني, .........)
إمتى حصل الكلام ده؟



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة