الأخبار
أخبار إقليمية
( المدير قافلها في الدرج)
( المدير قافلها في الدرج)



02-26-2014 06:38 PM
الطاهر ساتي


:: وزير الإستثمار بالرياض لتكريم ( الراعي الأمين)، بيد أن أحد رعايا الوزير هنا يشكي ويحكي لطوب الأرض عن حال إستثماره، فلنقرأ حكايته الدامعة، ولكن بعد تحذير المصابين بالسكري وأمراض القلب والمصران العصبي ب(عدم المواصلة)..قبل ثلاث سنوات، جاء هذا المواطن بحصاد الغربة ليستثمر في بلاده، أوهكذا كان الحلم..ودفع تكاليف الأرض لخزينة الدولة وإستلم القطعة بالجيلي مربع (8)، وإستورد العدة والعتاد وأسس مصنعاً لصناعة المنتجات الأسمنتية في بلاد تذوب بيوت الطين في مدائنها مع أول الخريف.. وصاحبكم هذا من الذين يحلمون بتحويل بيوت الطين إلى بيوت تقاوم الريح والمطر بواسطة منتجات أسمنتية ذات جودة عالية وأسعار لاترهق البسطاء ..!!

:: جاء بهذا الحلم النبيل، وإستقر بالجيلي..وبعد تركيب المصنع وتوظيف العمالة، قرر توصيل الكهرباء من أعمدة لا تبعد عن أسوار المصنع (أربعة أمتار فقط لاغير).. ولكن، عند إجراءت التوصيل، فاجأته شركة الكهرباء برفض فحواه ( لا، الخط ده ما حقك، الخط ده مملوك لزول تاني، جُر خطك براك)، هكذا كان الرفض.. معلومة جديدة، فالأعمدة الكهربائية التي تمر بجوار منازلنا ومزارعنا ومصانعنا ليست (أعمدة عامة)، أو كما تظن الناس، بل كل هذه الأعمدة وخطوطها المسماة بالعامة يمتلكها (بعض الخواص).. صرف صاحبكم النظر عن التوصيل من الأعمدة التي تبعد عن مصنعه أربعة أمتار، وقدم طلباً للشركة بالتصديق له بخط خاص أيضاً طوله يُعد بالكيلومترات،وتقدم بهذا الطلب مكرهاً ثم عملاً بنظرية (مافيش حد أحسن من حد)، أي ( خلاص أنا كمان بعمل خط خاص بي)..!!

:: وبعد عام وآخر من (إمشي وتعال)، سلموه فاتورة بتكاليف الخط الكهربائي وأرفقوا مع الفاتورة إقراراً هو الأغرب في تاريخ (العقودات والإقرارات)..وقبل الإطلاع عن نصوص العقد وما به من إقرار، نطلع على فاتورة تكاليف توصيل ( خط خاص)..فالمبلغ المطلوب لمد هذا الإستثمار بالكهرباء لاينقص عن نصف المليار جنيه إلا قليلا، (426.393.26 جنيه)، ويقول صاحبكم أن هذا المبلغ يكاد يساوي ربع قيمة المصنع، وينسى - أو يتناسى - قراءة جملة صغيرة مكتوبة في أعلى الفاتورة بالنص (قابلة للزيادة).. أي لحين إكمال الإجراءت ثم التوصيل، قد يدفع ( ملياراً أو أكثر)، فالمهم التكاليف غير قابلة للنقصان، بل (قابلة للزيادة)..أما إقرار العقد، على صاحبنا إزالة العوائق وتصديق مسارات الخط، أي على المستثمر - وليس على حكومة بلد - التفاوض مع أهل الأرض التي تمر بها الأعمدة، وكذلك عليه إزالة كل معيقات (جر الخط)، وبالتأكيد يتحمل (كل التكاليف)..!!

:: ليس ذاك فحسب، بل على صاحبكم المستثمر- وليس على حكومة البلد - تحمل كل تكاليف تكسير وإعادة بناء الطرق والكباري وسكك الحديد و المباني وغيرها من المتاريس التي تعترض (جر الخط).. وبعد هذا، توجس هذا المستثمر من مغبة التنازل عن كل الخط وما فيه من أعمدة وأسلاك لشركة الكهرباء، أو هكذا عقد الإذعان الذي يوقع عليه المواطن، وما توجس إلا بعد قراءة النص الآتي : (فيما لم ير به في هذا العقد تطبق نصوص اللائحة التجارية للشركة)، فطلب من الشركة نصوص اللائحة التجارية ليطمئن قلبه على ( خطو الخاص)..قصد مكتب الجيلي بحثاً عن اللائحة التجارية ، ربما بها من النصوص ما هي أخطر من العقد والإقرار، فأجابوا : ( ما عندنا هسة، عايزة بحث)..غادرهم إلى مكتب الثورات بأمدرمان، فأجابوا : ( ما عندنا، أصلاً ماجابوها لينا)..غاردهم إلى مكتب مدينة النيل، فقالوا : ( المدير قافلها في الدرج، وما قاعد نطلعها).. ولايزال، منذ يناير الفائت وحتى ضحى البارحة، يغادر صاحبكم مكتباً بالخرطوم ليقصد مكتب آخر بأمدرمان، فقط ليعرف ( نصوص اللائحة التجارية)، بحيث لا يوقع على ( شيك على بياض)، أي إقرار به تلك (النصوص المخبوءة)..هذا حال ( إستثمار وطني)، و لايزال الوزير المسؤول عن هذا الحال المعوَج بالرياض ليُكرّم (الراعي الأمين)..!!

tahersati@hotmail.com


تعليقات 47 | إهداء 0 | زيارات 8159

التعليقات
#928543 [أسمر جميل فتان]
0.00/5 (0 صوت)

02-28-2014 12:03 AM
هو طبعا الاصل في "القوانين واللوائح وحتى الاستمارات" مفروض تكون موجودة على موقع الوزارة....
بحيث يراها الجميع سواء ان كان موظف او مدير او مستثمر!!!!!
وعندما يحدث اي تغيير في تلك القوانيين واللوائح مفروض تعدل مباشرة في الموقع ومعها رقم محضر الاجتماع والتاريخ الذي تم فيه التعديل!!!!!

بكده بيكون الجميع عايش في سلام الموظف والمدير بيكون مرتااااح لان القانون الكل شايفه والمستثمر بيكون مرتااااااح لانه عنده ضمان حسب القانون والذي بامكانه بكل بساطة حفظ نسخه منه على جهاز حاسوبه الشخصي !!!!!!!! ولكن بكل اسف اصبحنا "نستمتع" بتعذيب بعضنا البعض ومرات كتيرة بتشعر بنظرات الشماته في عيون اغلبية الموظفين عندما يكون عندك ورقة ناقصة ومن المطلوبات!!!! ناسين انهم لما يلبسوا هدومهم في الصباح انهم ماشيين يخدمونا !!! وانو المواطن الغلبان ده هو "الزبون" والمفروض خدمته "بابتسامة" ولكن .... ولكن ....

وهذه العملية تدخل فيما يسمي "بالحكومة الالكترونية" وهذه حسب علمي مسئولية د.تهاني وزيرة الاتصالات والمعلومات الكل يوم طالعه ليها بتصريح في كلام فارغ ما عندو معني!!!!!؟؟؟؟ ومن المضحك والمبكي مرة مسئول في احدي المؤسسات الحكومية "بيتشدق" وبيقول نحنا فعلنا الحكومة الالكترونية !!! ولما دققنا في كلامه افصح قائلا عملنا ايميلات لكل الاصطاف!!!
يا دكتورة فعلي المواقع الالكترونية دي وخليها ديناميكية وتابعيها بواسطة فريق عمل يزور مواقع الوزارات بتاعتكم دي لانها والله مخلجلة وابسط حاجة فيها انها استاتتيك وليست ديناميك ولما نتصفحها الواحد بيشعر انو في القرن الماضي !!!!!
ودمتم


#928398 [ابو راكان]
0.00/5 (0 صوت)

02-27-2014 07:07 PM
ليس بمستغرب ان يحدث معه ولعلمك اخي الطاهر حتي التوصيل للمنازل علي هذا النحو .. تشتري الاعمدة من حر مالك وكل عمود بحوالي ال 6 مليون بالقديم وتشتري العداد وتدفع رسوم التوصيل والعمال والرشاوي واخير تمضي علي ورق بأن هذة الاعمدة ملك لشركه الكهرباء وحتي العداد بعد شراة تدفع عليه رسوم شهريه


#928328 [سودانير نحن نحلق بارخص الاسعار]
5.00/5 (1 صوت)

02-27-2014 05:40 PM
والغرابةفى شنو ماهو اخو البشير العرص بقى عندو عقارات واملاك من محل حلاقة


#928132 [ابو سيدة السودانى]
0.00/5 (0 صوت)

02-27-2014 02:08 PM
انا حقيقة أتسائل ؟؟؟ اين هيئة علماء السودان من كل الذى يدور ؟؟؟ هل هى فى منأة وبعد عن هذا الذى ؟؟؟ كل ما علمناه من هذا الاخ السودانى المستثمر يحتاج الى فتاوى وعاجلة كمان ؟؟؟ لماذا هذا اللف والدوران ؟؟؟ ام هذه تعاليم مشروعكم الحضارى الذى اهنتم وازللتم به هذا الشعب المغلوب على امره ؟؟؟ من اين اتى هؤلاء الناس ؟؟؟ الذين يمتطون الدين لكى يصلوا الى ما يشتهون ... ام اصبحتم يا علماء كومبارس مدفوع الاجر مقدما لاداء ادوار هامشية ... تفرقون بين المرء وزوجه فى فتوى الدخان ؟؟؟ بالله عليكم حسووووووووا شوية وبطلوا اللعب على الدقون ؟؟؟؟


ردود على ابو سيدة السودانى
United States [العوض] 02-27-2014 08:08 PM
هيئة علماء السودان فيها ناس عصام اسال من وين فرش البيت حقو والعربية الراكبه اسمها شنوا وعندو كم من المرتبات واسال حاج التخريمات الكاروري واسال بتاع مشروع سندس الصافي واسال بتاع مقولة الما قادر علي عيشة الخرطوم يرجع محل جاء ( الخضر ابو زرطه ) واسال بتاع قرار العربات بدون استثناء واسال بتاع المغتربين ليه رجع الضرائب تاني واسال بتاع البتاع وتعال اسال العلماء العلماء عندنا متمسكين بحديث لا تخرج علي السلطان كانو مافي احاديث بتحث على رفع الظلم عن الناس وتامر بالمعروف وتقول كلمة الحق علماء ايه ما عندك راس ديل جماعة لا لدنيا قد عملنا ديل اصحاب ناكل من مانزرع قول لي الان نحن بناكل من وين ونلبس من وين كلوا من بره نهاية القصة اخوي ابو سيدة لا تسال عن اين وكيف بل قول الله يرحم الوطن ومن العوض ليك مليون الف سلام


#928113 [سيمو]
0.00/5 (0 صوت)

02-27-2014 01:48 PM
على هذا المستثمر الإتفاق مع مالك الخط الذى يمر بمصنعه وتعويضه بمبلغ نظير توصيل الخط،، أنا زاتى عندى محاولة ناجحة مع جارى الذى حفر بئر سايفون وبدلا من أن أحفر أنا أعطيته نصف قيمة السايفون وشاركت البئر معه،،، مسألة بسيطة ولا تحتاج لكل هذه البهدلة.


#928077 [عبدو]
0.00/5 (0 صوت)

02-27-2014 01:10 PM
يا زول شوف جباده جر بيها من الخط الجنبك ده
مواعيد الدوام من
1 صباحا الي 5 صباحا
سرقة كهربة الجكومة دي حلال


#928000 [سلو]
5.00/5 (1 صوت)

02-27-2014 12:11 PM
هذا هو الانهيار المؤسسى الذى حدث للهيئة القوميه للكهرباء فكل الذى ذكر فى المقال من تفاصيل والرسوم التى تفرض على توصيل الكهرباء سوأ كانت لستثمر او فرد لا تصل الى هذه المبالغ الفلكيه وانما تخبط واحتيال على المواطن المغلوب على امره ، واذا فرضنا صحه هذه الارقام او المبالغ فلماذا لا تسدد باورنيك 15 المعروف للكل والتى يتم توريدها للماليه ، فاموال الكهرباء مهدره فى سوء الاداره وتخبط السياسيات التى ادت الى تدهور مرفق الكهرباء وستظهر النتيجه للكل عندما ياتى الصيف وتظهر القطوعات المبرمجه وغير المبرمجه وذلك للخل الذى اصاب بدائل توليد الكهرباء كالتوليد الحرارى الذى يساعد فى استقرار الامداد الكهربائى عندما تقل القدره على التوليد المائى وهى فتره الصيف وانخفاض مناسيب النيل


#927980 [زول]
5.00/5 (1 صوت)

02-27-2014 12:00 PM
نقول شنو لينا الله .. والله نتألم لهذا المستثمر اللي بيكون جاهو فشل كلوي .. ويوماتي نتألم على ملايين الما سي في البلد دي .. الله ينعل أبو الكيزان وتجار الدنيا والدين واحد واحد .. كرهتونا البلد اختونا ياخ ...


#927959 [abood]
5.00/5 (2 صوت)

02-27-2014 11:52 AM
والله انا مابقول الحكومه غلطانه غلطان المرحوم ...اسف المستثمر السودانى ..يعنى اسه لو مشيت الامارات دفعت 200 الف درهم لبنك ومشيت البلديه بدوك عقد استثمارى وتقدر تفتح اى شغل تجارى هناك ان شاء الله طبليه وبدوك اقامه ليك ول اسرتك كلها وتقدر تشيل بضاعه بالاجل من جبل على عن طريق البنك ولو ربحت فى تجارتك فى كل حاجه بتجيبا (معدات كمبوتر مثلا ) خمسه درهم معناها دخلك فى اليوم لايقل عن الفين درهم تقريبا حسب السوق الماشى كويس هناك (شفتو بعينى ) ولو بالميت اشتغلت هناك شغل خاص اقل دخل ليك بكون فوق ال 30 الف درهم فى الشهر ( حسب سمعى ) وعربيه من البنك وبيت برضو ودنيا حلوه ونضافه شديده ...ياخ والله انت ماعندك موضوع ودراستك لاستثمارك مع الاعتزار يعنى متخلفه ...او اقول ليك حاجه امشى اوربا (السويد النمسا النرويج ) اطلب اقامه هناك وافتح شغل هناك .....خليك مفتح ..وسمعت تحت تحت انو سويسرا لو عندك فوق لل 200 الف دولار بتديك اقامه وحق استثمار وشغل بدون ماتدفع اى شى بس تفتح حساب بنكى ويكون فيشك نضيف ....ابقى مارق يا اخوى


#927952 [جاهو .سنار فريق قدام]
5.00/5 (1 صوت)

02-27-2014 11:49 AM
هى زاتها كهرباء مافى شفتو الولد اللطلع عمود الكهرباء للانتحار عشان ماعندو حق الدواء لامه لو فى كهرباء كان مات فوق ماكان وقع مانقول الاحسبنا الله ونعم الوكيل


#927937 [الكردفاني]
5.00/5 (1 صوت)

02-27-2014 11:41 AM
الزول ده يحاول يشتري مولدات ،أفضل من جر كهرباء عامة ، لان تكاليف التشغيلية لمولدات أقل بكثير من تكاليف جر خط حكومي . في مصر توجد هيئة تسمى بالهيئةالعامة الإستثمار مسئولة مسئولية كاملة عن كل مايتعلق بالإستثمار ، كل إجراءات الإستثمار تتم في بناية واحدة ( تجديد إقامة - فتح حساب في البنك - الجمارك - الضرائب - اجراءات تسجيل الاراضي في الشهر العقاري - المحامين ، بإختصار كل شئ ميسر و متاح للمستثمر سواء وطنى او اجنبي ) .


#927932 [الدنقلاوي النوبي]
5.00/5 (2 صوت)

02-27-2014 11:37 AM
انا عندي ليك فكرة، بس تنجح او لا، الله اعلم.

في السعودية شركة تسمى طاقة، طاقة هذه توفر الكهرباء لمن لا يريد ان يتعامل مع شركة الكهرباء من أصحاب المصانع والفنادق والأسواق وبتكلفة اقل من شركة الكهرباء.

وما تفعله طاقة انها تجلب مولد ضخم (تقريبا 1*1.5*2 م) وخزان ديزل اسطواني الشكل. ويعمل المولد 24 ساعة في اليوم 7 ايام في الاسبوع دون توقف نظير إيجار يقل عما يدفعه المستهلك لشركة الكهرباء ان هو تعامل معها.

شوف طريقة وحاول تتواصل معاهم عل وعسى تتوفق لشيء ما.


#927921 [Quite Man]
0.00/5 (0 صوت)

02-27-2014 11:32 AM
بسيطة ما عرفت اللعبة وين كان تشارك واحد بس في المصنع وبكرة يعفوك من الضرائب وأي حاجة.......


#927700 [ابو ومضة]
0.00/5 (0 صوت)

02-27-2014 09:23 AM
لعنة الله عليهم ضيعو البلد
واااااه يابلد


#927603 [أبوعلي]
0.00/5 (0 صوت)

02-27-2014 07:33 AM
صفعته كف وضربته برجلي علي مؤخرته
في حد يصل للمناطق الخلفيّة الملغّمة
أمش سريع أعمل فحص إيدز لرجلك


ردود على أبوعلي
European Union [Wadalfa7al] 02-28-2014 02:44 AM
ههههههههههههههههه


#927583 [المتحير]
0.00/5 (0 صوت)

02-27-2014 06:10 AM
أغلب الظن أن نافذآً يملك مصنعاً مماثلاً فى منطقه مجاورة ربما يتأثر سلباً بمنافسة هذا المصنع.


#927484 [المتغرب الأبدي]
5.00/5 (1 صوت)

02-27-2014 12:26 AM
الله يحرق فشفاشكم يا كيزان يا حرامية ..
قوانينكم دي هي الطفشت المستثمرين ..
حريقة تحرقكم ..


#927429 [Wadalfa7al]
5.00/5 (5 صوت)

02-26-2014 11:00 PM
وأنا ماشي بالرياض المدينة الجميلة العصرية قابلني وزير الاستثمار ؛
قلت له: انت يا وزير..ماذا تفعل هنا..
قال: جئت لاكرم الراعي الطيب وبالمرة اعمل لي عمرة وكده
قلت له: وكيف حال الاستثمار بالبلد
قال: علي أحسن حال
قلت: ما قصة الرجل ومصنع الأسمنت بالجيلي مع شركة الكهرباء
هز الوزير كتفيه وقال: لا علم لي
أنا: اديتو كف حار حتي اهتزت لحيته وسقطت عنه علامة الصلاة المزيفة وقلت له بكره دي ترجع..
رجع الوزير واشتكاني الي الريس عمر البشير
قال البشير: هوي يا انت ليه صفعت وزيري العملاق دا كف ورجعتو من إجازته ؟
قلت: كيف حال الرعية بالسودان ؟
قال : تمااام
اغتظت جداً وقبل ان يكمل صفعته كف حار حتي بكي وسالت مخاخيطه..بعد ذالك سلمته الي فتو بنت سودة بمحكمة الجنايات العليا..
بعد ان صدر الحكم بحقه شكاني الي الترابي
قال لي : لماذا تصفع الرجل ..أبعد كل ما سكبناه من مداد تهزأ انت بي راجل وداد
قلت له: كيف كنت تريد ان تقيم مدينة نبينا الكريم محمد صلوات الله عليه في عصرنا هذا؟
وقبل ان ينداح ويرمي بيديه في الهواء ويحاول ان يشرح لي صفعته كف وضربته برجلي علي مؤخرته وسلمته للشعب السوداني الصابر..فقام الشعب بالواجب..


#927423 [محسن]
5.00/5 (1 صوت)

02-26-2014 10:43 PM
من يكرم من؟
يا له من زمن غريب
هذا زمانك يا مهازل فامرحي!!!


#927411 [ابو العلا المعري]
0.00/5 (0 صوت)

02-26-2014 10:16 PM
نصيحة لك اوع تدفع هذا المبلغ ولاتوصل بهذه الطريقة ليس هناك قانون يلزم انسان بان يوصل كهرباء من مسافة بعيدة والعمود علي بعد 4 امتار منه اذهب للوزير مكاوي علي طول وحاول مقابلته باي صورة وستحل لك هذه المشكلة اما من نصحك بذلك لايدري شي ويحاول تعطيلك والله لو التزمت بدفع هذا المبلغ سوف نراك في التيجاني الماحي عن قريب


#927409 [ساب البلد]
5.00/5 (2 صوت)

02-26-2014 10:12 PM
******* اولا تستاهل قال استثمار **** اسال القبلك قبل ما تبدا مشروعك اعرف الاجراءات شنو ؟؟ **** بعد انت شايف الناس كل يوم طافشة من البلد *** هي لو في استثمار كان اولي بيه بني كوز ما كان طلعوا قروشهم ماليزيا و دبي و الصين عشان يستثمروها هناك **** الحل **** بيع عدتك لمستثمر تركي ولا سوري و بيع قطعة الارض ***** و اتخارج **** و الله يعوض في قريشاتك الراحت و زمن الضاع **** و ما تفكر ترجع الا لو سمعت بالكيزان ديل طاروا ************


ردود على ساب البلد
European Union [ساب البلد] 02-26-2014 11:38 PM
******* العزيز "اوبرا" حبابك عشرة ****** الراجل المسكين دا شكلو طلع من السودان من زمن حكومة عبود و ما جايب للدنيا خبر ***** لما ليهو شوية قريشات قال ارجع البلد و اضرب عصفورين بحجر منها ارتاح من الغربة و منها افتح مشروع استفيد منه و افيد البلد **** يكون اتصل علي ناس قريعتي راحت و دلوهو علي شغل الاسمنت "البلك" انو سوقو ماشي ***** هو المسكين ما عارف ناس الطفل المعجزة ديل خربوا البلد ***** و الله لو يسمع نصيحتي يكسب زمنه و يبقي مارق ******

[اوبرا] 02-26-2014 10:53 PM
والله كلامك صاح . واتمني ان يعمل بي نصيحتك , ديل طلعوا دين ام البلد ؟؟؟

[اوبرا] 02-26-2014 10:53 PM
والله كلامك صاح . واتمني ان يعمل بي نصيحتك , ديل طلعوا دين ام البلد ؟؟؟


#927395 [أبو البنات]
5.00/5 (1 صوت)

02-26-2014 09:51 PM
حول فلوسك الي الاستثمار في اثيوبيا ولما يتولي امرنا ما يخاف الله فينا يمكنك مساعدة اهلك الطيبين الغلابة بعمل مشروعاتك التي تخدمهم


#927382 [ابو حمدي]
5.00/5 (1 صوت)

02-26-2014 09:37 PM
وثبة مين يارجل دا تاني الا ربنا

ارفعوا ايديكم الي السماء ان كنتم مؤمنين


#927380 [عصمتووف]
5.00/5 (1 صوت)

02-26-2014 09:32 PM
مغفل نافع للنظام نافق مع الاعتذار له كان تمشي اديس دبي ماليزيا هانوي تل ابيب زاته لو مكانك كنت حولت اموالي الي تل ابيب وتزوجت صهيونية يهودية من اصول افريقية قوقازية يمنية تونسية مغربية وازيد عددهم


#927372 [ابو طارق]
5.00/5 (3 صوت)

02-26-2014 09:21 PM
ما اعرفه ان جميع من وزراء وموظفين ومسئولين كلهم فاشلين فشل ذريع ....ياخى دوختنا بتحركات المسكين اللى يحلم بروجوعه لوطنه واهله والاستقرار ..شوف يا صاحب المشروع المشروع ده وقع فى عين واحد من الكيزان داير يعجزك عشان فى النهايه تبيعه برخص التراب انتبه ..كنت تشوف اى خليجى وتدخل المشروع باسمه صدقنى وبعدين يعمل ليك تنازل .....والا باى باى


#927369 [معقوله بسسسس]
5.00/5 (1 صوت)

02-26-2014 09:12 PM
اللوم علي المستثمر. يكفي ان شركة المياه تحصل رسومها عبر شباك شركة الكهرباء بعد ان يخصموا منك حق الموية الباقي يدوك بيه كهرباء. بعدين بأي حق قانوني تربطوا الشركتين مع بعض و تمنعوا الكهرباء الا تدفع حق الموية اول؟؟ ولا كلهم ملككم؟ انتوا ما بتفهموا حاجه اسمها وطن فعلا جهلاء و حراميه والله انتوا وصمة عار في جبين البلد كونكم سودانيين.يعني الشعب السوداني بيجي منه زيكم.. وقت ما صارفين علي التحصيل بتاعها و ملخبطنها بالسايفونات كمان سارقين فيها؟ ادوني قرار واحد كان في صالح المواطن من يوم جا البشير؟؟


#927359 [ود الدكيم]
5.00/5 (1 صوت)

02-26-2014 09:00 PM
ما اسم هذا المواطن الذي جاء بحصاد الغربة؟؟ لماذا يخفي كاتب المقال اسم المواطن وكأنه عامل مصيبة أم هو يخشى عليه من مزيد من المعاكسة؟؟إلى متى نكون جبناء كالنعام وماذا يضير الشاة سلخها بعد ذبحها.

بعض موظفي الدولة لا يقوموا بواجبهم إلا بالتزبيل بشرط أن تكون الزبالة مخمرة كعقولهم.


#927350 [جنوبي]
5.00/5 (7 صوت)

02-26-2014 08:52 PM
الزول ده يشوف ليهو جنريتر مااااكن ويبدأ شغله وبرضو حيكون ارخص من كهربة الحكومة اليوم في ويوم مافي !
صاحبنا قالوا طالع من امير وداخل علي امير طالع من شيخ وداخل علي شيخ ويقول ليهم انا وزير الطيب الابا يبيع النعجه انت شفت المقطع ؟ وطوالي يطلّع موبايله ويوريهم المقطع !! ظناً منه انه سيستثمر الطيب !!


ردود على جنوبي
United States [الدنقلاوي] 02-26-2014 10:25 PM
...... ويقول ليهم انا وزير الطيب الابا يبيع النعجه انت شفت المقطع ؟

قوية والله قوية


#927333 [AburishA]
5.00/5 (2 صوت)

02-26-2014 08:31 PM
فقالوا : ( المدير قافلها في الدرج وما قاعد يطلعها لينا)

** وعندما يجد المدير.. يقول ليهو المفتاح ضايع تعال الشهر الجاي ..
وعندما يأتيه بعد شهر يقول ليهو ما لقينا نجار الدرج لسه ما اتفتح.. تعال بعد شهر..
ولمايجيه بعد شهر تاني يقول ليه ..والله فتحت الدرج ما لقيتها.. ما عارفها طارت وين!!
امشي يمكن تلقاها عند ناس شرق النيل...او ناس شرق النيل يدلوك على جهة تانية...


#927332 [خليل]
5.00/5 (2 صوت)

02-26-2014 08:31 PM
بسيطة
صاحب المصنع يختف رجله وعلى الصين او ألمانيا ويجيب محطة توليد طاقة شمسية ويبيع للمحتاجين الثانيين بس برضو حا يقولو ليه بعد ما تستعمل الكهرباء بتاعة الشمس تدفع لينا الفاتورة عشان نحن محتكرين الكهرباء وكدة


#927326 [ابو علي]
5.00/5 (2 صوت)

02-26-2014 08:21 PM
الوزير ده خايب وما عنده شغل فاضي ياربي تكاليف رحلته كم من دم الشعب الضاع اللهم سلط عليه من يشغله في نفسه


#927322 [كاكوم]
5.00/5 (1 صوت)

02-26-2014 08:18 PM
معظم العاملين بالمؤسسات والوزارات والشركات الحكومية تعودوا بقصد او بغير قصد منهم على تعطيل مصالح المواطنين وتصعيب اى اجراء مهما كان شكليا والتلذذ بعذاب المراجعين وكانهم قد ادوا قسما مغلظا على تنكيد حياة المواطن الذى هو معذب ومحروق اصلا ..
ماحدث للمواطن المذكور فى القصة من استهتار فج ووتضييق ووقاحة الغرض منها تطفيشه ومعاكسته ودفعه الى الرشوة وابتزازه فيما بعد ليكون لهم بقرة حلوب ومصدر رزق بااااارد من غير تعب ..هذا التصرف لا يمكن ان يصدر الا من نفوس مريضة حاسدة حاقدة تعودت على اكل المال الحرام والرشوة ولا يهمهم مصلحة البلد ..


ردود على كاكوم
[كاكا] 02-27-2014 08:43 AM
صدقت يا كاكوم، فكل موظفي الدولة السودانية وسياساتها مبنية على تعطيل الأفراد والمجتمع (حسادة موظفين ودولة ياللأسف) بالرسوم والجبايات والمكوس والإجراءات العقيمة والمعقدة والورق الكثير وهمهم الوحيد هو زيادة مخصصاتهم وهبراتهم وحوافزهم وهو الامر الذي أوقف الكثيرين (حتى بتاعين الدرداقات متلحينهم) من القيام بأي شئ والانكفاء على ذاتهم انتظاراً لهبرة يخمونها بدون تعب أو جهد أو تعرض لحسادة الدولة وموظفيها وهو أمر يبدو أنه يعجب كبار الحرامية والمتنفذين (أمثلة: البلد تعاني من لافقر العمراني وغلاء مواد لابناء بجميع أنواعها بسبب الرسوم والمكوس والدولة وموظفيها فرحون)- (كل من يستورد ما يعنين على الانتاج يتم تعويقه بالجمارك - كل من يستثمر يعيقونه بالرسوم والجبايات والضلارائب الجزافية والزكاة التي ما أنزل الله بها من سلطان)،، لك الله يا وطن،،


#927321 [خالد]
5.00/5 (2 صوت)

02-26-2014 08:13 PM
احسن شي ما يفتح استثمار بل يبيعه ويهرب بجلده - في بلد لا هم له غير سرقة مدخرات المستثمر حتى لو كان وطنيا - فهو ليس في راسه ريسه كما يقولون - بل ان كثير من المستثمرين الذين تم خداعهم هربوا وتركوا هذا الأمر . اما بن لادن وما ادراك فقد صطوا على كل ما تركه عصابة المؤتمر الوطني
فساد اكثر من هذا لا يوجد في اي بلد متخلف في افريقيا فقد فاق الفساد التصور -


#927317 [الكاتـــــــــــــــــــــــــــــــــــــــــــم]
5.00/5 (2 صوت)

02-26-2014 08:09 PM
رفعت لى الضغط ياالطاهر مالك على
تقصد الوزير ابكضيمات ده ؟؟ ده ما منو فايدة


#927316 [كبسول]
5.00/5 (2 صوت)

02-26-2014 08:08 PM
دا البيفلحوا فيه
الم تري السفير الاهبل ببلدته وكرفتته الغير متناسقة ذي ولد الطهور يتسابق لأخذ الصور الفوتوغرافية مع سعادة الراعي
بينما حملت إلينا الصحف بالأمس نبأ السوداني الذي عذبه كفيله وأجبره علي العمل كراعي لمدة سته أشهر كامله........اتحدي السفير وكل طاقم السفارة ان يكون احدهم قام بمجرد السؤال عنه....
وأنصحك أخونا الطيب ان يبقي عشرة علي قريشاته ما ينهبونها منه.......وأدام الله أفراح طاقم السفارة بالرياض.........وحفظ شيخهم عبد الحافظ للعزايم والحفلات


#927307 [mkes]
5.00/5 (1 صوت)

02-26-2014 07:55 PM
حال بلد يحير المجنون


#927303 [MAHMOUDJADEED]
0.00/5 (0 صوت)

02-26-2014 07:50 PM
زوجة تشتكي لطوب الأرض من زوجها وتعامله وعمايله معها فتدلها زوجة اخرى لفكي كارب يحل لها مشكلتها ولما استعصى الأمر عليه قال لها : ( جيبي لي أتر الأرنب وجلد النمل ) النمل وليس النمر عشان يعمل ليها حجاب يكتّف بيهو الراجل . على المستثمر ان يجهّز ( أتر الأرنب وجلد النمل قبل كل شئ .


#927302 [ابو لكيلك]
5.00/5 (3 صوت)

02-26-2014 07:48 PM
ده سبب مصائب البلد ...اى موظف عايف حياتو او طفشان من مرتو واى موظفة متعقدة من شكلهااو بايرة . يتفشش وينتقم من الاخرين فى مكان عملو ....وياتى هذا الانتقام فى صورة معاكسة وتاخير وكعبلة معاملات خلق الله وفى صياغة القوانين واللوائح فى الموسسات الحكومية ...وهذا الذى تمت معاكسة معاملته وتاخيره وتعذيبه هو الاخر يتفشش ويشفى غليله فى الاخرين ..وهكذا.... يتعطل العمل والانتاج ونتحول بالتدريج الى شعب يحقد ويحسد بعضه بعضا ..ويضمر الشر والضغينة كل منا على الاخر (( كل واحد فينا يعذب الاخرين فى محل شغلو )).. ..نحن شعب شين كرور خبيث النية والطوية (( الا من رحم ربى )) ونستحق العذاب الالهى الواقع بنا الان بجدارة .....


ردود على ابو لكيلك
United States [الدنقلاوي] 02-26-2014 10:33 PM
نعمل شنو يا أبو لكيلك؟
شينين؛ ما ببنكرا لكن دي خلقة ربنا لا بنقدر نغيرها لا بنقدر ناباها
كرور؛ برضو ممكن، ظروفنا الصعبة دي ما ممكن تجيب إلا كرور
خبيثين النية والطوية؛ دي ما بنقبلها وما في شعب بيقبلها، لأنو الأخلاق والتركيبة النفسية نسبية وبتختلف من زول للتاني وما ممكن تعممها تحت أي ظرف.


#927299 [ahmad]
5.00/5 (2 صوت)

02-26-2014 07:46 PM
والله ما عرفت اضحك ولا ابكي ولا الاتنين معا ... البلد دي يبدو لي الحاكم الفعلي فيها هو ابليس ..
قال سبحانه وتعالى { فَرِيقًا هَدَى وَفَرِيقًا حَقَّ عَلَيْهِمُ الضَّلالَةُ إِنَّهُمُ اتَّخَذُوا الشَّيَاطِينَ أَوْلِيَاءَ مِنْ دُونِ اللَّهِ وَيَحْسَبُونَ أَنَّهُم مُّهْتَدُونَ )


#927295 [abood]
4.50/5 (4 صوت)

02-26-2014 07:34 PM
مشى يكرم ولا يلهط التبرعات
شوفو الدناوة وصلت وين
ولا يا ربى مشى يشوف كيف نجأ هذا الراعى من المشروع الحضارى واستطاع ان يحافظ على اخلاقه


#927291 [ابواحمد]
4.50/5 (2 صوت)

02-26-2014 07:27 PM
الله يكون فى عون البلد واهل البلد مصيبة حلت بنا ز


#927286 [بديري]
4.47/5 (6 صوت)

02-26-2014 07:21 PM
يا اهل الخير انتو الكهرباء مافيها زول بخاف الله. ولا الناس دي مالها ضربتها كهرباء ؟؟؟.
شخص اعرفه طبيب بالمانيا بنا عماره من اربع طوابق بكافوري تم تقييم المكيفات واللمبات والمراوح وووو . ثم طلبو منه ان يركب محول (اميه) في طرف الشارع لان حموله المنزل عاليه من حر ماله من شركه محدده. وان يكتب تنازل في نفس العقدلصالح وزاره الكهرباء؟؟؟؟
اشتري خاص واتنازل حكومي؟؟؟؟؟بان اي شخص يستخدم هذه المحول تقوم نفس شركه الكهرباء ببيع الخدمه له مجددا بنسبه 50 الي 60% وهكذا لي اخر الشارع ولا يحق للمشتري الاول بالمطالبه باسترداد المبلغ من المشتركين الاخرين. بمعني اخر ان تبيع الشركه المحول 10 مرات بعد ان باعته للمستهلك الاول.
لن نستفتي قانونيا ولا طالب اولي قانون اذا سالت عوير الحله بقول الكلام دا ماركب صاح.


#927279 [بت قضيم]
5.00/5 (1 صوت)

02-26-2014 07:13 PM
هذا زمن الطفل المعجزة لا احد يستطيع محاسبته فهو طفل محصن اضافة الى انه معجزة يعجز كل تنابلة الانقاذ بفهلوته وخيالاته عن محاسبته واحالته كبقية سلفه ولله في خلقه شؤون


#927276 [Amin]
5.00/5 (1 صوت)

02-26-2014 07:07 PM
المصيبة لو الوزير أقنع الراعي بإستثمار أمواله في السودان



ح يضيع عليه دنيته وآخرته وصحته ..... وعقله


#927272 [hasco]
4.00/5 (3 صوت)

02-26-2014 07:02 PM
هو الجابو شنو راجع البلد دي ؟ ؟؟؟؟ اسي كان اشتغل راعي وجاتو الكمرة الخفية ما كان كرمو الوزير الاسي كايس ليهو مالاقيهو.


#927271 [Professor Khalifa Yousif Hassan]
5.00/5 (2 صوت)

02-26-2014 07:00 PM
لقد قلنا من قبل لا يوجد قانون يشجع او يحمي اي انسان في اي منحي من مناحي الحياه اسمعوا هذه القصه القصيره اتي للسودان صديق لي خليجي وهو من الاسره المالكه وملتي ميليردير اتي للاستثمار وفي نهاية المطاف فر بجلده وقرر الذهاب لبلد مجاور فوجد الصدق والامانه والقوانين التي تحميه نحن نطلب من الشعب السوداني ان ينصب الراعي الامين الطيب ليحل مكان جميع الوزراء والي درجة مدير عام حينها سنقول فزنا ورب الكعبة


#927270 [ودالشريف]
5.00/5 (2 صوت)

02-26-2014 06:57 PM
هو الطفش الناس من البلد شنو غير اساليب النهب والسرقة عينى عينك يا اخوى يا الطاهر دى قطرة من محيط من المعاناة البيعاني منها اهل السودان ديل ما بشر هولاء قوما لانعرفهم ولا يعرفوننا من اين اتو الينا هولاء تستحى الشياطين من افعالهم حسبنا الله ونعم الوكيل نصيحتى لهذا الرجل يلملم اطرافه ويتخارج لانه هولاء لا يؤتمن مكرهم ما يورط نفسو اكتر من كده يمشي اى بلد حتى ولو شاد سيجد الاستقبال وكل التسهيلات ولما البلد ينفك اسرها يرجع اما فى ظل هولاء من يذهب بماله ليستثمر حايندم ويخسر شقاء العمر والتجارب كتيييرة عالم عشرات السنوات ونهبن منهم عينى عينك احزرو هولاء الفاسدين ومخطئ من يظن بانه سيجد منهم العون والمساعدة هولاء ينطبق عليهم القول جو يساعدو فى دفن ابوه دس المحافير



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة