الأخبار
منوعات سودانية
السلطان كيجاب: أمتلك عمارة من أربعة طوابق في كندا وليس لي منزل في الخرطوم
السلطان كيجاب: أمتلك عمارة من أربعة طوابق في كندا وليس لي منزل في الخرطوم
السلطان كيجاب: أمتلك عمارة من أربعة طوابق في كندا وليس لي منزل في الخرطوم


03-01-2014 12:10 AM

الخرطوم – نصر حامد

السلطان كيجاب من أشهر الأسماء في عالم السباحة في السودان بعد أن حقق العديد من البطولات للوطن وللمريخ لكنه لم يجن شيئاً من السباحة في بلده وجنى ثمار غرسه خارج وطنه عندما كرمته الحكومة الكندية كسباح ماهر ومنحته الجواز الكندي مع عمارة من أربعة طوابق في حين لم يجد أي تكريم في وطنه الكبير السودان والصغير المريخ أو كما يقول عبر سطور هذا الحوار:

في البداية نريد أن نتعرف على السلطان كيجاب أكثر؟

اسمي عبد المجيد سلطان كيجاب, وكيجاب لقب أصبح اسماً, من مواليد الغابة بالولاية الشمالية وجميع مراحلي الدراسية كانت في الغابة, خريج جامعة القاهرة فرع الخرطوم, متزوج وأب لولدين وبنتين.

كيف كانت بداياتك الأولى في السباحة؟

علاقتي بالبحر بدأت في سن باكرة حيث بدأت كصائد للأسماك وكنت أقوم ببيعها وتوزيعها في القرية وفي تلك الفترة تعلمت السباحة على أصولها وعندما جئت للخرطوم وجدت الإخوان فضل وسليم من أميز السباحين في السودان فتعلمت منهم أصول هذا المنشط, وبعدها شاركت في العديد من المنافسات مع نادي المريخ وحققت له العديد من البطولات والإنجازات.

أين تقيم حالياً؟

أبنائي يقيمون في كندا وأنا لي عمارة في كندا من أربعة طوابق قدمتها لي الحكومة الكندية كهدية مع الجواز الكندي أما في الخرطوم التي أمضيت بها كل الشباب والكبر وحققت من خلالها العديد من البطولات لوطني فلا أمتلك قطعة أرض ناهيك عن منزل.

كيف تم منحك الجواز الكندي؟

كانت هناك منافسة في السباحة في كندا وعد من خلالها الرئيس الكندي بتركيم المبرزين وقد منح عدد من السباحين الجواز الكندي.

برنامجك في كندا؟

خصصت لي الحكومة الكندية معاشاً شهرياً يكفي للعيش الكريم ولذلك أنفق كل وقتي في كندا في العلاقات الاجتماعية مع السودانيين المقيمين في كندا, بالمناسبة في هذا البلد المتقدم يوجد الكثير من العلماء من أبناء وطني يقدمون خدمات جليل لكندا ويتحصلون على رواتب خيالية, ودائماً ما أمضي أجمل لحظاتي مع هؤلاء العلماء الأجلاء.

علاقتك بكرة القدم؟

بالمناسبة, أنا كنت لاعب كرة قدم مميز جداً ولعبت في فريق السلام بالشجرة ولعبت مع الصحفي الراحل صلاح سعيد وابراهيم عبد المجيد وكنت مدافع مميز جداً وكان يمكن أن العب للقمة لكن حبي للسباحة كان أكبر من عشقي لكرة القدم.

فريق تشجعه؟

المريخ.

أداري مميز؟

أبو العائلة وعبد الله السماني.

مدرب مميز؟

منصور رمضان.

لاعب مميز؟

ماجد أبو جنزير بطل المتواليات المريخية الثمانية.

شئ في الهلال تتمناه في المريخ؟

ناس الهلال بهتموا بي ناسم شديد عكس ناس المريخ.

لو كنت رئيساً لنادي المريخ؟

لطردت كل المحترفين الأجانب وحولت أموالهم ومخصصاتهم للفرق السنية من أجل نهضةالكرة السودانية.

فنانك المفضل؟

حسن عطية.

فنانة؟

ندى القلعة.

شاعر؟

محمد بشير عتيق وعمر البنا.

هواية؟

الغناء, بالمناسبة أنا كنت فنان صاحب صوت جميل وكنت مطلوباً بشدة في الحفلات.

وجبة مفضلة؟

المشويات.

صحيفة سياسية؟

اليوم التالي والانتباهه.

صحيفة رياضية؟

قوون.

صحفي سياسي؟

صلاح عووضة.

صحفي رياضي؟

ميرغني أبو شنب.

قرار موفق؟

الزواج.

قرار غير موفق؟

التأخر في الزواج.

لماذا التأخير في الزواج؟

ما مني, مشيت لي أكثر من 20 بنت والقسمة ما أدت.

أمنية تحققت؟

الاستقرار والعمل في كندا.

أمنية لم تتحقق؟

أن أصبح رئيساً لجمهورية السودان.

شخصية سياسية؟

جعفر نميري, أنا زعلان شديد من فخامة الرئيس عمر البشير لأنه لم يزرني في مرضي الأخير رغم أنه ظل متواجداً في كل المناسبات الاجتماعية وهو زول ود بلد أصيل ما كنت قايلو بتأخر في زيارتي.

كلمة أخيرة؟

أشكركم كثيراً

اليوم التالي


تعليقات 18 | إهداء 0 | زيارات 7402

التعليقات
#929869 [الشاكووش]
1.00/5 (1 صوت)

03-01-2014 10:59 PM
الزول دة أنا بعرفوا كويس وكان بزورنا فى مكان العمل فى الرياض بالسعودية مع لاعب النصر ماجد عبدالله لكن والله كضاب كضب،، بس كضبه لذيذ ومضحك،، ربنا يديه الصحة والعافية،،


#929948 [ودعمو]
1.00/5 (1 صوت)

03-01-2014 10:28 PM
يملك أربعة فدان ورثها من والده سلطان كيجاب محمد صالح في مشروع الغابة الزراعي في دنقلا. هذا إضافة إلي النخيل و العز الذي تربي فيه عبدالمجيد كيجاب دة. لكين الشقي ما بيسعد و لا شنو يا كيجاب؟!


#929871 [عزيز]
1.00/5 (1 صوت)

03-01-2014 08:04 PM
كذاب درجة اولي.ناس المؤتمر الوطني ضايقوك لما هاجرت؟لكن برضو خيرا فعلت لان الوضع في البلد كل يوم ماشي لوري وزي ما قالو قلبك سدها وسع قدها- واهو كل يوم القد ماشي وااااااسع ولسة الجماعة قااااعدييين.


#929734 [بحر العطاشا نشف]
1.00/5 (1 صوت)

03-01-2014 04:35 PM
يا اخوانا كيجاب دا كلامو سمح وزول دغري لو انت منتظر التكريم من حكومة السودان ياكا ركبت ماسووووره هنا ما في تكريم للحي إلا تكرم وانت ميت ودي مشكله


#929640 [الخير عز]
5.00/5 (2 صوت)

03-01-2014 02:40 PM
وانا مستغرب ليه ماذكر غربته فى استراليا وتمثيلها دوليا؟ اما دراسته بجامعة القاهرة الفرع فقددخل بها موسوعة جينز لللارقام القياسية اذ ظل يكافح الامواج لمدة تزيد عن العشرة سنوات حتى تخرج ولا اعلم هل تمكن من النجاح لانى تركت السودان وهو مازال يسبح فى الجامعة وفقه الله


#929584 [كندمر]
5.00/5 (4 صوت)

03-01-2014 01:54 PM
بطل (سباحة!)سبحان الله ..لكنه (غرق) بالهرطقة..وطبع (الخبل)..حد (يفتخر) بسئ الذكر المقبور (نميرى)وبرميل الروث (البشير)وكلاهما حمل رتبة (الحقير)..وأمكن بطل السباحة*الأهبل.(*حسب تصنيف مخالطيه بلندن)..يرى تشابه ما! مع بعض صفات (الهؤلاء)... يغفر الله لهذا (الميت الحى1) لما نسب اليه.. قد يكون يسعى (للشهادة) بالغرق فى بحر اٌلإنقاذ..بالله من أسأل نفسك و (بائعى الأعمار)و(الأوطان) من حولك من (هجرك) من دفء (الغابة) الى صقيع (كندا)؟.. غير شمولية النميرى! ..وسفاحه(الإنقاذ). عليهم لعنةالله والبشرية..دوليا.ولتميزك(سابقا) فى السباحة.المقدر من (كندا). نتمنى لك الهداية والعودة لتستظل بدوم (كندمر).وتسبح فى (نيلنا) سليل الفراديس الدافى.. وتساهم فى عودة وطننا(الفردوس )الضائع بسبب ضلالة(المتأسلمين) و(العسكر).والطائفين).و(غثاء)حديث ومواقف (السذج!)..ولنحقق شعار(زريبة)و(خيمة) و(بهائم)أو.. (حواشة)و(قطية)و(بقرة)..(حق) مجانى ومدعوم لكل راشد سودانى وسودانية فى موطنه..أنها أمانة فى أعناقنا فهيا (للكفاح)...وأشحذوا (السلاح)..أرفعوا الهتاف ..نحن رفاق الشهداء..الصابرون نحن..


#929579 [غريب]
0.00/5 (0 صوت)

03-01-2014 01:51 PM
انا لاعب كره مميز...برضو صوتي جميل ..فنانتي ندي القلعه...ياراجل انت صاح...جريدتي الانتباهه...والله ماعارف لو كنت بقيت رئيس او فنان او لاعب كره قدم...حتودينا وين ...ياسباح ياسمكه


#929550 [alnasag]
0.00/5 (0 صوت)

03-01-2014 01:24 PM
يا أخوى كيجاب يحفظك الله ويشفيك وما تزعل من الرئيس عمر لأنو عنصرى ومابزورالناس السودعشان كدة مابزورك وأحسن ليك مايزورك لآنو لو زارك برفع منك الرحمة وناس كندا بيشيلو منك عمارتك الأدوك ليها دى ويخلوك فى النقعة وناس البلدية بكشوك ويرجعوك الغابة وماتلقى ليك فرع تغرد فيه ولاشجرة تقيل فيهاعليك الله اسحب موضوع زيارة الرئيس ليك أنى لك من الناصحين


#929482 [كافونجا]
5.00/5 (1 صوت)

03-01-2014 12:20 PM
افتكر حقو تترشح لوزاره الدفاع ودي وزاره تتوافقك مع شخصيتك ،إجاباتك زي إجابات عبد الرحيم محمد حسين وبتتشابهو انتو تيمان ولا شنو،الريااااااله


#929476 [بت قضيم]
0.00/5 (0 صوت)

03-01-2014 12:14 PM
المصيبة محترف في كل الهوايات يعني مجضمه جضيم بس ما يكون كمان مجضم الكذب


#929432 [فتوح]
5.00/5 (2 صوت)

03-01-2014 11:11 AM
أيه المشكلة ... أنا مواطن سودانى أملك عمارة أرعة طوابق فى السودان ولآ أملك شيئا فى كندا .... وين المشكلة هنا ... أخى الموانين سواسية لو سباح والله محاسب والله مهندس ... كل واحد أستهلك موارده فى شبابه وبعد ما يعجز يجى يكورك وين الحكومة ... شى دا سباح ودا لاعب كرة ودا ممثل .... أخوانى كل مواطن أدى وظيفة فى أى مكان هو مواطن يدير موارده ويكون مسئول من نفسه وعائلته ... وبعدين واحد يحب المشويات مش البوش ده معناه مروق


ردود على فتوح
United States [الحقيقة] 03-01-2014 02:13 PM
عفارم عليك كلامك مظبوط ضيع شبابه في السكر والبنات في السبعينيات بينما زميله السباح ممدوح حسه مرتاح وباني بيت فاخر في الكلاكلة الوحدة على شارع الظلط مباشرة ويمتلك مزرعة أبقار ودواجن ودخله ما شاء الله لأنه انسان كان ملتزم مش زي كيجاب وبعدين الحكومة الكندية بتدي الجواز بس ما تدي عمارة تمليك ممكن توفر سكن لكن تمليك لا وألف لا هناك في نظام رقابي جاد بدون لولوة وحتى الرئيس ما من صلاحيته يدي جواز الا بشروط مش زي عندنا التجنيس بكلام ده من نيجريا وداك من اليمن ...


#929354 [ammar]
5.00/5 (1 صوت)

03-01-2014 09:41 AM
يتخيل لي انو كيجاب دا قريب عبدالرحيم محمد حسين . صح


ردود على ammar
United States [ودعمو] 03-01-2014 10:33 PM
يا عبدالرحيم أظنك دنقلاوي أو محسي رطاني. ناس الغابة ما عرب. ناس الغابة أهل بلد و هم ناس دنقلا العجوز القدماء. و هم أصل الحضارة و إنطلقت شعلة الحضارة من هذه المنطقة و إنداحت إلي كل أنحاء السودان و خارجه. بس لأن أهل الغابة ما رطانة أو لأنه الرطانة كادت أن تنقرض من منطقة الغابة لذا تدعون أن أهل الغابة عرب. العرب في عرفناهم من نزحوا من مكان آخر و لا أرض لهم و لا نخيل.

United States [شطة] 03-01-2014 03:32 PM
يا كيجاب والله عربى دهمشى بتاعتك دى بيت فى صقع الجمل ما تجيب ليك, اى فى كندا يدوك عمارة وعربية (سيارة ما زوجة) ومصاريف كمان, هنا والله لو قطعت بحر المالح اوضة جالوص ما تلقاها.
هو الناس فى سبتمبر ماتوا عشان يحافظوا ليك على وطن كل يوم بينقص من اطرافه, جاى ناطى تتمنى انو تكون رئيس جمهورية, هو نحن حاكمنا بتاع مظلات فكانا من سابع سما للان ما وصلنا الارض جاى انت تغرقنا كمان؟ نحن يا جماعة عملنا شنو فى الدنيا بت الذين دى؟

United States [الحقيقة] 03-01-2014 02:15 PM
عبدالرحيم من غدار وكيجاب من عرب الغابة وأصله بديري دهمشي وده للتوضيح وليس للعنصرية ..


#929329 [الصبار]
0.00/5 (0 صوت)

03-01-2014 09:08 AM
وفي دم كل حر يد سلفت ودين مستسحق

جاب الحنان لهذا المتعوس بتعاسة حكومته

وشعبه المغلوب على امره .

افضل ليك العيش هناك في كندا حيث هنا لاقيمة للانسان إلا اذا كنت كوزا عوزب الله .


#929326 [سياتل]
5.00/5 (1 صوت)

03-01-2014 09:04 AM
ده ماعندو موضوع


#929302 [سودانى طافش]
5.00/5 (1 صوت)

03-01-2014 07:49 AM
كضاب !


#929268 [كركبه شديده]
5.00/5 (1 صوت)

03-01-2014 04:10 AM
يا كيجاب ياخي طابظتها مالك ....؟ ماكنا كويسين لحدي المحترفين ....جايب لينا سيرة البحر مالك ؟بعدين انت داير بزيارتو شنو ؟أكان بشرفك المعولق ده أخير تكلمنا ...عشان نحن زاتنا نخت فيك راي .


#929266 [كركاب]
0.00/5 (0 صوت)

03-01-2014 03:58 AM
والله انت زول عسل


#929246 [فك المكعوج]
5.00/5 (3 صوت)

03-01-2014 02:33 AM
من مواليد الغابة و خريج الفرع ولعبت في فريق الشجرة، ود ابرك انت


ردود على فك المكعوج
[مساكم خير] 03-01-2014 08:50 PM
حلوووووة دي والله

[سيف اليماني] 03-01-2014 08:43 PM
الله يجازيك قطعت مصاريني من الضحك قسما بالله لي سنين ما ضحكت
زي اليوم وانا جالس في المكتب لحالي ضحكت لمن خجلت قلت لو دخل
واحد لقاني اضحك براي اقول سيف ده جنه ولا شنو



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة