الأخبار
أخبار إقليمية
سودانير.. قال 10 مليون دولار لصيانه الطائرات!!!
سودانير.. قال 10 مليون دولار لصيانه الطائرات!!!
سودانير.. قال 10 مليون دولار لصيانه الطائرات!!!


03-13-2014 10:23 AM
د الرازي الطيب ابوقنايه


نحن نعتير ان الاعلان الذي اطلقه المهندس عبدالله مسار رئيس لجنه النقل والاتصالات بالمجلس الوطني عن سودانير في الايام الماضيه مستفز ولن نسكت عليه. فرغم قناعتنا بان الرجل (زول حقاني), الا انه في هذا الموضوع اصبح كالمتحري الذي ذهب الي منزل مسروق ومدمر, وقبل ان يستوثق من شكوكه بخصوص الفعل والفاعل , كتب في يومية تحرياته ان المنزل مسروق ومدمر. ياخ انته بتمثل المجلس الوطني يعني زول غريقه, بس رايك في القضيه ان الاداره الحاليه غير مسؤوله عن خط هيثرو, وسودانير تمتلك طائره واحده صالحه للطيران وان الطائرات الباركه في باحه مطار الخرطوم تحتاج لي 10 مليون دولار لصيانتها؟

كدي نبتدي واحده واحده. اولا نحنا بنعتبر موضوع خط هيثرو دا تشتيت للكوره ساكت, وانو الاعلام قد اعطي هذا الملف اهميه اكثر من الازم علي حساب ملفات اخري هي التي اهدرت اموال الشركه كملف لجنه ايجار الطائرات وملف جماعات التمكين مثلا والتي تستنزف الاموال بشكل يومي. فنحن نعرف وطوب الارض يعرف ان المدير الحالي لا ذنب له في بيع الخط ولكنه مسئول مسئوليه مباشره عن كوارث اخري بداناها بفضيحه محطه ابوظبي وسننهايها بمحطة ابوظبي ايضا لانها المحطه التي كانت تعتبر منجم ذهب للشركه منذ القرن الماضي. اما بيع الخط فمسئول منه بصوره مباشره او غير مباشره الاداره الحاليه لانها كانت موجوده حينئذ كمدراء ادارات ومجلس اداره بما فيهم وزاره النقل. فعدم رضاءنا عن اعلانكم يتمثل في فشلكم باطلاعنا علي من هو بالتحديد الذي باع الخط, وبي كم, وقبض كم. فالمتحري لا ينفي التهمه عن شخص دون توجيهها الي شخص او جهه اخري يري انها ربما ارتكبت الجرم. وقد كنا نمني النفس ان يدخل سيادته الي دهاليز الشركه ويتجول في ارشيفها ليطلعنا علي صفحة الاسرار الموجود فيها اسماء المجرمين الحقيقيين للغز الخط الذي حير الراي العام قاطبه. فياسيادة النائب المحترم (الخط الخط الرد الرد).

ثانيا, وجود طائره واحده صالحه للطيران معلومه قديمه ارجو ان لا يتوقع سيادته ان نفغر فاهنا دهشه عند سماعها. فقد كنا سنندهش اذا اخبرنا عن لماذا تمتلك سودانير طائره واحده عامله, ولماذا اصبحت البقيه هالكه. هل الاسباب فنيه او لسوء الاستعمال ام لاستهتار القائمين علي امرها؟ وقد قرانا جميعا في التقرير الفضيحه الذي كتبه الصحفي عثمان ميرغني منذ شهور عن تشليح بعض الاسبيرات من الطائرات الذي يعتبرها سيادته هالكه وبيعها الي شركات محليه منافسه. هل ذلك ماجعلها هالكه؟ فليخبرنا بذلك.

واخيرا, دا كلو كوم وحكايه احتياج الطائرات المتعطله لي مبلغ 10 مليون دولار كوم تاني. عايز طبعا يرفع ضغطنا ويدفع القروش دي. غايتو شوف سيادتك , في اي لحظه نسمع انك دفعت من اموال الشعب الغلبان القروش دي لاداره سودانير حانشكيك لله سبحانه وتعالي وسنقوم بالدعاءعليك وعلي مجلسك ليل نهار. 10 مليون دولار عشان يشترو اسبيرات؟ ياخ انته جادي ولا ماعارف الناس ديل؟ ديل فيهم ناس يسرقو الكحل من العين. اول حاجه نحنا نشك في انو الاحتياج اصلا لي 10 مليون. ونشك في لسته الاسبيرات الكتبوها ليك. ومتاكدين انو بعض الاسبيرات دي موجوده في مخازن الهندسه. ونشك كمان في الاسبيرات الحيجيبوها ذاتها ممكن تكون ضاربه ولا صناعه صينيه درجه رابعه. وبنشك وبشده في الناس القالو ليك حايجيبوهم يصلحو الطيارات دي ممكن يكونو (كوموفلاش) ساي. وبدون شك نحنا متاكدين ال10 مليون دي علي الاقل حايطلعو منها بي 3 مليون لي نفسهم. متقول لي امام مسجد ولا مؤتمر وطني. مافي زول هسع في الاداره الحاليه تستامنو علي قروش كاش.

كدي في الاول فرتق لجنه ايجار الطيارات وانقل امام المسجد والعشره الكرام الحولو الي مساجد تانيه في الدوله وجيب ناس جداد للاداره عشان علي الاقل العاملين يرتاحو من الكابوس العايشنو دا. قلنا ليكم قبل كده جيبو د شمبول او كابتن وداعه او كابتن عبده عزالدين لانهم ديل بقدرو علي اللوبي الخنق الشركه وبفهمو كويس في الاتفاقيات. برضو المدير الحالي لازم تستبعدو لانو مابفهم في شغل الطيارات يقوم يجيب ليكم مكنات كهربتا 110 بدل 220 يلحق الطيارات امات طه وتبقي زي الطياره الماليزيه. تطير مانعرفا مشت وين. ونحنا بي صراحه الفينا مكفينا.

الحكومه في الفتره السابقه عملت منتدي في مجلس الوزراء وكونت لجنه برئاسة د نافع ونشطت لجنة النقل في المجلس الوطني برئاسه مسار عشان تصلح الحال. والحال سيظل كما هو لانو الناس ياهم الناس والمدير مافاهم حاجه وعشان يفهم داير سنين مع (الحبرتجيه) ديل ونحنا مابنقدر نستني كلها فضل لينا كم سنه ونتكل. وبصراحه دايرين نموت مطمئنين علي سودانير الخيرا علينا كتير فهي العلمتنا وربت اولادنا. جيبو د شمبول ومعاهو كابتن وداعه وكابتن عبده عزالدين وهم بجيبو الناس المالعب, وتعالو نتفاهم بعد سنه.


[email protected]


تعليقات 15 | إهداء 0 | زيارات 3199

التعليقات
#942080 [الرمدان كر]
0.00/5 (0 صوت)

03-14-2014 12:40 PM
يا أئمة المساجد غير الكيزان ارجوكم ادعوا علي الكيزان بالسرطان و الجرب و الجزام


#941910 [كندمر]
5.00/5 (6 صوت)

03-14-2014 09:06 AM
(مداهنة) ..وتلميع (أسماء) حشرت فى حياتنا..وعيشتنا (الطائرة).. أضحت (سودانير) وأخريات كثر (منبرا) لردح (الأرزقية) ..(عضمان مرغنى)..الناعم أبو دلامة مفنطر العمامة (حسين خوجلى)..وطرور طائر..(نتطير) بأطلالتهم فى تجسيم جرائم و مآسى..(الهؤلاء!)..ولكى لا يقفز الكل (بالقناية) مستندا على أوجاعنا!..نقولها..*هل يصلح العطار ما أفسده الدهر.. نزلونا من خط( هثرو).. والفساد! سيكنسه (وصول).. الإنتفاضةاالقادمة ..(طيران) حتى النصر.نحن رفاق الشهداء..الصايرون نحن..


#941764 [محمد]
0.00/5 (0 صوت)

03-14-2014 01:14 AM
يا ياخوان اطلعووووا الشارع الموت دا واااحد والله واحد
اكنسوا الكيزان السجم ديل


#941755 [هندسة]
5.00/5 (2 صوت)

03-14-2014 12:54 AM
قلنا ليكم قبل كده جيبو د شمبول او كابتن وداعه او كابتن عبده عزالدين.. ثم كررتها في نهاية المقال وبرضو في مقال سابق رشحت د.شمبول

ياخي نحنا زاتنا البخلينا نثق فيك شنو؟ برضو انا بشك في تلميعك لشمبول...


#941704 [زعيم الزهاجة]
0.00/5 (0 صوت)

03-13-2014 11:14 PM
البلد باظت يا جدعان ،يا دكتور انت وبت سودانير وغيركم
كتيرين بتتكلموا عن تجاوزات ،وناس حايمة ،والعشرة مليون
ح يلحسوها ،ومش عارف ايه،ومحطة ابوظبي ، كلامكم سمح بالحيل ،لكن وين المستندات
والناس لمتين ح تلحس في المال العام ،وليه ما تمشوا تقعدوا مع مسار
وتصححوا المسار ،خاصة وانو راجل دووغووري.


#941623 [خالد]
0.00/5 (0 صوت)

03-13-2014 08:32 PM
الصيانة بي عشرة مليون دولار - هي وين الطيارات - فضل واحدة


#941507 [العرف]
5.00/5 (2 صوت)

03-13-2014 05:57 PM
اطلبوا من( ولد )الجاز يعطيكم قروش (دبي)


#941451 [الأحنف بن قيس]
5.00/5 (1 صوت)

03-13-2014 04:50 PM
يادكتور جماعتك ديل وكت بقت البقت علي
سودانير كانوا وين ما كانوا قاعدين فيها
سووا شنوا ، عملوا رايحين كان ما يكونوا
عودهم رامي ، ماشافوا القاعد يحصل في
شركتهم ، كان ماشافوا يبقوا مغمدين وما
بنفعونا وكان شافوا البحصل وسكتوا كمان
مابنفعونا ، عشان الجماعة الأكلوها قبيل،
قاعدين وماشبعوا ومستعدين يضيعوا أكبر
خطوط في العالم خلي سودانير أم طيارة دي
السؤال هو وكت هي طيارة واحدة ، صغيرة وقديمة وعفينة وجربانة المكاتب الكتيرة هنا وحول العالم لي شنو والطيارين والمهندسين والموظفين والعمال بالآلاف بسووا شنوا وبصرفوا من وين حكاية غريبة سودانير ميته وأولادها يرضعون سديها . شملة كنيزة هي تلاتية وقدها عشاري .
لك ياوطنا أضاعه بنوه


#941433 [بت سودانير]
5.00/5 (1 صوت)

03-13-2014 04:29 PM
يادكتور فشك لي غبينتنا كفايه علينا. اليومين ديل الجماعه يتحاومو ساي في المكاتب. لو سمعنا ادوهم العشره مليون صدقني بكتب ليك طوالي. بالمناسبه انته قايل مكتب ابوظبي فيو موظف واحد ديل كانو كتيبه كامله بس رجعو منهم وكل شهر بتتحول ليهم قروش متلتله. البغيظ حكايه محكمه دبي وجثه مجهوله الهويه رغم مدير مكتب ابوظبي كان هناك


#941413 [لايك القرض]
0.00/5 (0 صوت)

03-13-2014 04:07 PM
اصبت عين الحقيقة د الرازي
عبد المحمود سليمان
وما يسمي امام المسجد الامين عبد القادر واذنابه وصبيته وزبانيته في كل الادارات
عثمان يوسف
عيد الرحمن القضل

ما لم يحاسبوا يجب ان لا يقالوا
فهم داء سودانير الذي اقعدها طوال سنين

اما مسار فلن نتركه يحارب الفسادو المجهول وحده فنحن نعلمه وسناخذ بيده اليه ... وتبقي مصداقيته وقوته علي المحك

فلتكن هذة مهمتكم ومهمة الشرفاء والمغبونون داخل وخارج سودانير


#941389 [ابومحمد]
5.00/5 (1 صوت)

03-13-2014 03:42 PM
مسار ده شكلوا داير ليهو لحسة في العشرة مليون دي


#941307 [الكلس ود البلد]
5.00/5 (1 صوت)

03-13-2014 02:27 PM
فى البداية لك الشكر والتقدير والتجلة اخى د.الرازى لانك ختيت اصبعك فى جرح الاصبع الصغييير للبلد !! اها باقى الجسم كيف ؟؟ المصاب بالداء العضال فى كل عضو كلوووووووووووو !! يعنى مستحيل تعالج ليك اصبع وتخلى باقى الجسم المهترئ يبقى ما عملنا حاجة !!الوطن داير علااااااج مكثف وهو هسع فى غرفة الانعاش ولازم تجيبو ليهو كوادر طبية عالية الكفاءة !! غير كدا على البلاد السلااااااام


#941276 [كيزان بني كلاب]
0.00/5 (0 صوت)

03-13-2014 02:07 PM
يا اخونا كفاية كلام وتنظير الشارع بس


ردود على كيزان بني كلاب
European Union [العصيان المدنى] 03-13-2014 05:15 PM
يا دكتور ذكرت حقيقه مهمه وهى انو موضوع الخط المقصود منه تشتيت الانتباه عن الفساد الاكبر وذكرت مثال لجنة تاجير الطائرات وبعد كده انت ذاتك سرحت فى موضوع الخط عيزين معلومات اكتر عن اللجنة


#941260 [AMJAD]
5.00/5 (1 صوت)

03-13-2014 01:57 PM
هذه شجرة فساد اذا قطعت افرع منها سوف تنمو افروع فساد اخرى , لازم يتم قلعها من جذورها , الدستور و القانون هما اللذان يظمان الخدمه المدنيه فى السودان و غير ذلك كلام بطيخ


#941000 [الغاضبة]
5.00/5 (2 صوت)

03-13-2014 10:33 AM
العصياااااان المدني هو الحل الحاسم لكل هذا الفساد، هذا مرض عضال لن ينفع الكلام والنقد في اعتقادي المتواضع، اصبح الفساد مشكوفا ولا يحتاج إلى حشد كل هذه اللغة والمفردات والجهد الكتابي لكشفه، ما نحتاجه وهذا ايضا من منطلق ايماني المطلق بانه لا حل سوى العصيان المدني



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة