الأخبار
أخبار إقليمية
د. اسامة توفيق : مفاصلة نافع وعلي والمجموعة التي تمت ازاحتها موخرا جاءوا من الصفوف الخلفية ولم يكونوا من اصحاب القرار قبل المفاصلة
د. اسامة توفيق : مفاصلة نافع وعلي والمجموعة التي تمت ازاحتها موخرا جاءوا من الصفوف الخلفية ولم يكونوا من اصحاب القرار قبل المفاصلة
د. اسامة توفيق : مفاصلة نافع وعلي والمجموعة التي تمت ازاحتها موخرا جاءوا من الصفوف الخلفية ولم يكونوا من اصحاب القرار قبل المفاصلة


قيادي بحزب غازي : خرجنا من ضيق الوطني الى رحابة الوطن وليلة خروجنا نمت كما لم انم من قبل!
03-21-2014 03:46 PM
بسم الله الرحمن الرحيم

الدكتور اسامة علي توفيق القيادي بحركة الإصلاح الآن لصحيفة الوان :

* لسنا حزب (زعلانين او فش غبينة) وناس الوطني (بحنسونا) عشان نرجع!!

* طرحنا الية للوفاق الوطني وحتى تتحقق نحتاج لاجراءات بناء الثقة

* خرجنا من ضيق الوطني الى رحابة الوطن وليلة خروجنا نمت كما لم انم من قبل!

* محاولة اسقاط النظام بالقوة ستسبب كارثة لهذا نسعى للتفكيك .

* مفاصلة نافع وعلي والمجموعة التي تمت ازاحتها موخرا جاءوا من الصفوف الخلفية ولم يكونوا من اصحاب القرار قبل المفاصلة .

حاورته الصحفية : هبة الله صلاح الدين .
الدكتور اسامة توفيق من كوادر الحركة الاسلامية الذين عملو من الداخل بداية تم استدعاؤه من المملكة العربية السعودية ليتسلم منصب الامين السياسي للجبهة القومية بعطبرة عام 88 قبل الانقاذ بعشرة شهور لتاتيه اولى التعليمات بعد تسلم الانقاذ للسلطة بالتحرك نحو جوبا ومنها الى البوسنة والبانيا وكوسوفو وشرق اوروبا وغزة ليعود الى الخرطوم بعد عشرة سنوات من التجوال في مناطق العمليات , ليتحرك مرة اخرى رئيساً للبعثة الطبية السودانية لمناصرة الشعب الليبي ليعود مرة اخرى بعد اسقاط النظام الليبي ليمارس عمله السياسي كعضو بالمؤتمر الوطني , بعد فصله من الحزب انضم دكتور اسامة لحركة الإصلاح الآن وصار من المؤسسين لها . الوان زارته في مقر الحزب بشارع عبيد ختم لتقليب اوراق ملف حركة الإصلاح الآن ومعرفة اطروحاتها ورؤيتها لمستقبل السودان فالی مضابط الحوار .

*بداية دكتور اسامة توفيق لماذا غادرتم صفوف الوطني بعد 24 عاما وتنصلتم من عضويته؟

- نحن زي مابقولو عودنا في الانقاذ عود اصيل واول امين عام للمؤتمر الوطني هو الدكتور غاذي صلاح الدين يعني هو المؤسس للمؤتمر الوطني فلايوجد شيء حتى نتنصل منه , نحن تم فصلنا من عضوية الحزب .

*اذن فما كنتم لتغادروا احضان الوطني لولا انكم فصلتم ؟

- قبل 48 ساعة من صدور قرار فصلنا عقدنا مؤتمر صحفي قلنا (لن نفر من مركب الانقاذ الغارقة معذرة الى الله سبحانه وتعالي ) ودي قمة الشجاعة نحن قاعدين جوة رغم علمنا انها مركب غارقة ونحن كنا على علم بالقرارات تسربت لنا , لكن رغماً عن ذلك الناس ديل عيونهم حجب عنها الضوء بعد فصلنا اتي قيادات الوطني جلسوا معانا لغاية الساعة تلاتة صباحا (بعد فصلونا جوا يحنسوا فينا كم وعشرين يوم) ولكن قررنا عدم العودة للوطني , عندها شعرت بانه في جبل انزاح من صدري شعرت واني تصالحت مع نفسي .

* تريد القول بانكم كنتم تودون البقاء رغم غرق مركب الانقاذ ، ولكن يبدو ان السيناريو هو الهرب من المركب قبل ان تغرق؟

- والله شوفي نحن عارفين انه الإصلاح لو جا من برة فيه تدمير مثل البيضة كان كسرتيها من برة نهيتي الحياة لكن اول ما الكتكوت ينمو ويكبر من الداخل براه بكسرها .

* انتو دايرين تكسروا بيضة الانقاذ من برة؟

- نحن كان غرضنا ايجاد الحياة من الداخل الكتكوت ينمو براه يكسر القشرة وتطلع حياة جديدة ده كان غرضنا المهم نحاول كبح لجماح المؤتمر الوطني لانه انا بقولها ليك المؤتمر الوطني الان هم سبب مصايب السودان اذا قدرنا صلحنا ده من جوة واقصينا من تسببوا في هذه المشاكل كنا حنكون خدمنا السودان ده خدمة كبيرة جدا الشيئ التاني لمن نحن فصلنا اصبح ماعندنا خيار غير انه نحن نشتغل ونكون عندنا الية واخدنا زمن هل نكون حزب ام نكون جماعة ضغط ام تيار ، الان التيار الإصلاحي المرق من المؤتمر الوطني (المرق الراس بس) نحن الرفدونا لكن بقية التيار الاصلاحي الغالب قاعد جوة في اصلاحيين اكتر مننا واهم مننا قاعدين جوة شغالين .

*هل ستسعون الى اسقاط النظام بالقوة؟

- لالالا شوفي اذا تم اسقاط النظام بالقوة نحن مانسعى اليه الان هو اول شيء قومية المؤسسات (القوات المسلحة, الامن , الشرطة القضاء) اي محاولة لاسقاط النظام الحاكم بالقوة حيكون كارثي لهذا نحن نسعى لتفكيك هذا النظام بنعومة التقينا مع كل الاحزاب من اقصى اليمين لاقصى اليسار لاول مرة تتفق كل الاحزاب بان اسقاط النظام بالقوة خطا سيحول السودان مثل افريقيا الوسطى والصومال او سوريا .

* الحديث حول ان المؤتمر الوطني دمر البلد دائما ما نسمعه من احزاب المعارضة والمنسلخين من الوطني رغم انكم داخل الحزب ماعندكم اصوات؟

- الدكتور حسن رزق والدكتور غازي صلاح الدين ليه سقطوهم ؟ لانه عاملين غلغلة جوة وانا واحد من كبار المتنفذين قال لي ( ياحلبي غير لسانك الطويل ده شيتا ضاريك مافي) اذا كنا ماشين علی هواهم ماكانو فصلونا .

* لماذا الإصلاح الآن .. الم يكن الوضع في السابق يحتاج الى اصلاح؟

- كنا شغالين من الداخل انتقادات ومذكرات, قلنا الآن لانه بكرة مامعروف يكون في سودان ولا لا الوضع كارثي بكل جوانبه .

* الا تتفق معي ان الدعوة الى الاصلاح جاءت متاخرة كثيرا؟

- حركة الإصلاح واشاعة الشورى بدات قبل المفاصلة ويمكن كانت من جراء المفاصلة فمذكرة العشرة كان الغرض منها اشاعة الشورى والديمقراطية داخل المؤسسة يمكن القول انه ومنذ العام 1995 بدات النزعات الإصلاحية في داخل جسم الحركة الاسلامية الاب الشرعي للمؤتمر الوطني واستمرت النزعات الاصلاحية بعد المفاصلة ,,مذكرة العشرة جاءت بنتائج عكسية وهي خروج المؤتمر الشعبي وكرست السلطة في يد مجموعة محددة وديل جوا من الصفوف الخلفية ولم يراعو فقه الاختلاف يعني جعلو الاختلاف في الراي خلاف بين الافراد, شعرنا انه لابد من وجود فئة داخل هذه الاجهزة الحزبية تحاول تعمل فرامل لانه شايفين البلد ماشة في طريقها للخراب فبدانا محاولة التغيير من الداخل لا لسياسة التمكين لا لتخريب الخدمة الوطنية بحجة الحماية ونادينا بقومية الاجهزة النظامية القوات المسلحة, الامن, الشرطة ,الهيئة القضائية, لابد ان تكون مؤسسات قومية ومانخضعهم لمزايدات حزبية كان في نقد شديد جدا .

*من هم الذين جاءو من الصفوف الخلفية؟

- كل القيادات الموجودة الان جاءت من الصفوف الخلفية ,منذ بدايتنا مع الحركة الاسلامية كانت قياداتها معروفة , المجموعة التي تمت ازاحتها في التغييرات الاخيرة ديل جاءو من الصفوف الخلفية ماكانو اصحاب القر ار قبل المفاصلة امثال نافع وعلى عثمان والمتعافي وكمال عبد اللطيف واسامة عبدالله وغيرهم .

* قلت من قبل لن نعود للوطني ولو فرشو لنا الارض ورودا ..من اين اكتسبتم هذه الثقة؟

- لقد خرجنا من ضيق الوطني الى رحابة الوطن والبتزوق طعم الحرية وحلاوة الانتماء للوطن الكبير الممتد ده صعب يرجع تاني للضيق ,اليوم قررنا فيه الخروج من الوطني نمت كما لم انم من قبل .

* هل وجدتم ضالتكم في الإصلاح الآن ؟

- مؤكد .. اقرب الاقربين لي كانوا بهنوني وقالو لي كنا محتارين انتو قاعدين جوة كيف؟

* لماذا اثارت المذكرة الاخيرة التي قدمتموها لرئيس الجمهورية كل هذه الضجة داخل الوطني خاصة؟

- نائب رئيس البرلمان الحالي حسبو محمد عبد الرحمن قال (ستذهب المذكرة التي قدموها الى سلة المهملات كما ذهبت بقية المذكرات) قلنا طالما المسئول السياسي للمؤتمر الوطني قال مذكرتنا ستذهب الى سلة المهملات قررنا بثها عبر النت وللاعلام فحاسبونا بها .

* بصراحة يقال ان الإصلاح الآن (مؤتمر وطني زعلانين) وحركتكم ماهي الا (فش غبينة)..؟

- زعلانين من شنو انا قلت ليك الناس ديل بعد فصلونا رجعوا يحنسوا فينا .

* هل وجدتم مضايقات في عملكم الجديد؟

- انا كحزب ممنوع امارس اي نشاط خارج مقر الحزب الا في بيوت الناس تقول حنة عروس !! المفترض اقول ليك عاوز اعمل لقاء في ميدان المولد انت تامن اللقاء كسلطة ده حق من حقوقي كحزب,,في ولاية القضارف منعنا من الخروج الناس كانوا بعتلو الحيط لضيق المكان ! نرتب لاقامة ندوات في القاعات يمنحونا الموافقة ولكن بعد اسبوع يعتذروا ليك والله في صيانة وماعارف شنو اسباب واهية !!ياخ عبد الباقي الظافر استضاف دكتور غاذي يوم في برنامج صالة تحرير وقفوا البرنامج ووقفوا الاعادة !!ياخ انت ماممكن تكتم نفسي وتجي تقول لي تعال حاورني! انا ماممكن احاور انسان وعلى راسي طبنجة .

* ماذا عن مقترح المائدة المستديرة الذي طرحتموه على كل القوى السياسية؟

- نعم قدمنا مقترح لاقامة مائدة مستديرة يجي المؤتمر الوطني ذاته يقعد زيه وزي اي حزب طالبنا انه رئيس الجمهورية يكون قومي يقيف على مسافة واحدة من كل القوى السياسية اوباما بعد ان اصبح رئيس امريكا بقى ماعنده علاقة بالحزب الديمقراطي ولا بمشي يحضر مناشطه ,مرسي ده كان رئيس حزب الحرية والعدالة اللحظة الدخل القصر الرئاسي قدم استقالته بحزب الحرية العالم كله كدة,ماممكن انت تكون رئيس الحزب ورئيس الجمهورية والقائد الاعلى للجيش وللكشافة وللشرطة ورئيس الحركة الاسلامية!! من يحاسب من ! لما تكون انت صاحب الامر من يحاسبك! اهم شي تكون في حرية ,الاسلام لاينتشر الا في الحرية ,الرسول قال خلو بيني وبين قومي ماعايز منكم اي حاجة لاتقيفوا معاي لاتدعموني لا اي حاجة ,,نحن طرحنا الية التوافق الوطني حتي تحصل نحتاج لاجراءات بناء ثقة لانه ما ممكن احاورك وانت (خاتي لي مسدس في راسي) فطالبنا باطلاق الحريات الصحفية وحرية التعبير وحرية التظاهر ياخي الله سبحانه وتعالي لما خلق الانسان قال من شاء فليؤمن ومن شاء فليكفر!! .

* عايزين الوطني يخلي بينكم وبين الشعب السوداني؟

- طالبنا بالية وفاق وطني لمصلحة الوطني والوطن نحن لانستجدي .. دي تعليمات عديييل يخلو بيننا وبين الشعب السوداني لانه البلد ماشة لمنزلق خطير قلنا نعمل الية وفاق وطني نلم فيها كل زعماء الاحزاب التقينا بهم وكلهم قالو ماعندهم مانع قضايا رئيسية توكل لالية الوفاق الوطني المكونة من كافة القوي السياسية وفق اجال زمنية محددة وتكون قر اراتها ملزمة لكل القوى السياسية بما فيها المؤتمر الوطني وده المخرج الوحيد للسودان .

* ماذا تقصدون بالية الوفاق الوطني هذا المسمى الهلامي؟

- الية الوفاق دي زي لجنة الحكماء ولجنة الحكماء دي تكون قراراتها ملزمة لكل القوى السياسية وللجهاز التنفيذي تكون قضيتها بحث الازمة الاقتصادية وايجاد حل لها قضية الحرب والسلام قضية الدستور والعلاقات الدولية .

* من هم الحكماء؟

- حكماء السودان امثال سوار الذهب, الصادق المهدي الميرغني الناس ،

* مقاطعة..كنت بتزورو الانتخابات فترة وجودكم داخل الوطني؟

- لا نرفض ذلك وصوتنا كان عالي جدا .

* هل اقنعت افكاركم الشباب؟

- كمية كبيرة من الشباب وحقيقة نحن اجرمنا في حق الشباب لانشغالنا بالتمكين اصبحت فئة كبيرة جدا من الشباب غير منتمية شفنا الشباب عمل شنو ليلة وفاة الفنان محمود عبد العزيز .

* هل تحمل المسئولية للانقاذ؟

- مؤكد

* اذن فانت تعترف بفشل المشروع الحضاري؟

- مليون ف المية

* هل تملكون قوة ندية للوطني؟

- المؤتمر الوطني حتى الآن هو حزب غير مؤسسي , المؤسسات الموجودة كمجلس الشورى وغيرها هي مؤسسات تمرر ولاتقرر هو حزب شمولي ..وينو الاتحاد الاشتراكي بتاع نميري وينو الحزب السوفيتي الكانت عضويته سبعين مليون!! وينو الحزب الوطني بتاع حسني مبارك,,هي اشبه بحلاوة قطن سريعة الذوبان!!اي حزب العندهم علاقات دولية ومقبولية .

* بعد ان شاعت حالة الغزل السياسي بين الشعبي والوطني لماذا حذرتم من هذا التقارب؟

- نحن ضد الاتفاقات الثنائية حتى مع القوی السياسية الاخرى, مابتحل مشكلة نحن مع الحوار الثنائي اي اتفاق ثنائي سيؤزم وضع السودان,, ابراهيم السنوسي اول امس في تصريح قال وحدة الحركة الاسلامية الان ضارة بالسودان وبالاسلاميين نحن مع وحدة قوى اليسار وحدة حزب الامة بدل الاحزاب الصغيرة دي .

* مارايكم في الحل السياسي الذي طرحه الرئيس في خطابه الاخير؟

- الرئيس لغى الحل الطرحه في الخطاب في حديثه في بورتسودان باللاءات الاربعة,,لا لتفكيك الانقاذ لا لتاجيل الانتخابات لا للحكومة الانتقالية لا للحكومة القومية طيب انا احاورك على شنو؟ .

* نازلين انتخابات ولا متنازلين؟

- اذا اتعملت الية الوفاق واتعدلت الانتخابات حننزل لكن اذا بنفس النظام ده انا ما حاسمح لنفسي اجمل اللوحة لكن اذا الامر مشى بنفس الوضع ده انا بقول ليك ستكون انتخابات مزورة مليون في المية نحن كنا جوة وعارفين الانتخابات بتتعمل كيف ، واي حزب شمولي ده مصيره والله لو وضعوا الشمس في يميننا والقمر لافي يسارنا على ان نترك هذا الإصلاح ماتركناه حتى يظهره الله او نهلك دونه دي مقولتنا مافي مؤتمر وطني بالمعنی ,وعلى لساني انا بقول ليك المؤتمر الوطني عاجز عن عقد مؤتمرات اساساً الارقام البتكلموا عنها ناس خمسة مليون وتمنية مليون نحن عارفين بحشدوها كيف!! بدفعوا وبجيبوا الحشود ويدوهم الاعلام قلت ليك في حزب هلامي اسمع صوته ولا اراه , مؤتمر وطني معناها عندك دار عندك لقاءات عندك محو امية,عمل اجتماعي ثقافي واحد من اهم المطالب عندنا فك الارتباط بين الدولة والحزب واتحدى المؤتمر انه يعملها لانه اللحظة الحيعمل كدة ماحيكون في حزب اسمه المؤتمر الوطني,حينفض عنه الناس الرئيس في مجلس شورى الوطني قال حيفك الارتباط ده لكنه لن يستطيع اوباما لما نزل انتخابات للمرة الثانية كان بتحرك بالطائرة الرئاسية وبالسيارات الرئاسية بعد نهاية الانتخابات بتجي فاتورة من الحكومة للحزب الديمقراطي بكل التكاليف .

* من اين لكم بالتمويل؟

- من جيوبنا واشتراكات الاعضاء .,,هذا ليس بعدل ان الاحزاب كلها شغالة بتمويل ذاتي والوطني يتحرك بالية الدولة قعد تجيك اموال من وزارة المالية مباشرة .

* يري البعض ان الإصلاح الآن حزب غير جماهيري لانه دكتور غازي مصنف كمفكر ورجل نخبوي؟

- نحن زي مابقولو عساكر , البيان بالعمل دكتور غازي في اي لقاء هو نجم الشباك الاول نحن لما مشينا القضارف الناس كانوا بيتدافعوا عليه تدافع شديد حتى خفنا عليه لبنيته الضعيفة والدكتور يتحدث بلغة القوم لقد جعل الله سبحانه وتعالی لهذا الشخص ولاخوانه حب في قلوب الجماهير اما ما يقال حول انه نخبوي هذه مردودة وزي ماقلت ليك البيان بالعمل انه الدكتور بتحدث مع اي مجموعة بلغتها اعطاه الله بصر وبصيرة في هذا الامر اهم شي انه الناس مقتنعة ان هذا الرجل شفيف وعفيف اليد واللسان .


تعليقات 15 | إهداء 0 | زيارات 3831

التعليقات
#950271 [adil a omer]
0.00/5 (0 صوت)

03-23-2014 02:33 AM
انتو خليتو فيهو رحابه

يكون قصدو رحابه ست العرقى فى كمبو مقابر حلة حمد

[adil a omer]

#949791 [مدحت عروة]
5.00/5 (1 صوت)

03-22-2014 02:52 PM
وزمان كنتوا سكرانين ولا غبيانين ولا شنو؟؟؟
لمن فصلوا الناس المساكين للصالح العام واعدموا ضباط رمضان بدون محاكمة وشنقوا ناس العملة بدم بارد وخنقوا الحريات وقتلوا د. على فضل تعذيبا وغيره نمتوا كيف قريرى العين ولم تعترضوا او تخرجوا من الحزب او النظام؟؟؟؟؟
ولا الناس ديل كانوا غير مسلمين او مواطنين سودانيين لهم الحق فى ابداء رايهم فى كيف يدار وطنهم؟؟؟
يعنى ناس الحركة الاسلاموية العالمية او الكيزان عرب وعجم وسودانيين ليهم الحق فى اى شىء يخص السودان وباقى السودانيين لا زى الكانهم ما بشر او مواطنين او مسلمين؟؟!!!
ما انا ده البسميه العهر والدعارة السياسية!!!
اقسم بالله الذى لا اله غيره ولا واحد فى الحركة الاسلاموية سودانيين او عرب او عجم يستحق الاحترام او التقدير واشهد الله العلى القدير على ذلك ولا واحد بالغلط!!!
جزمة مواطن سودانى ما حركة اسلاموية مسلم او مسيحى او حتى لا دينى وملوثة بالبراز اقسم بالله انها اطهر واشرف من اى كوز سودانى او عربى او عجمى !!!!!

[مدحت عروة]

ردود على مدحت عروة
European Union [مدحت عروة] 03-23-2014 08:55 AM
انا حافظ كتير جدا من الجمل لكن هذين الجملتين هما البيناسبوا مقام الحركة الاسلاموية !!!

European Union [عادل] 03-22-2014 04:54 PM
العهر والدعارة السياسية!!!


انت ما حافظ غير الجملتين ديل

قديتنا ياخى


#949756 [hassan]
5.00/5 (1 صوت)

03-22-2014 02:19 PM
عندما يختلف اللصوص يظهر المسروق

لسة حا تشوفو تسمعو

[hassan]

#949647 [ابو صادق]
5.00/5 (1 صوت)

03-22-2014 12:41 PM
مبروك للانقاذ ربع قرن اخر
من القتل والسحل وسفك الدماء وبيوت الاشباح والفصل للصالح العام والاغدام من غير محاكمة وووووووووووووووووسيولد نافع جديد وابراهيم وزبير وووو
الله المستعان

[ابو صادق]

#949592 [fenkoosh]
5.00/5 (1 صوت)

03-22-2014 11:51 AM
هنالك مثل عند أهلنا فى الغرب يقول( أم الكلب بعشوم ).....عليكم الله يا د. أسامةو يا د.زغازى و يا أصلاحيين و كل هذه المسميات التى أبتلينا بها منذ مجىء الأنقاذ ...بالله أريحونا .....هل بعد عودة الترابى و طلوعو فى الكفر هذه الأيام ممكن نصدق أنكم مختلفين مع ناسكم و عشان شنو ؟ عشان مصلحة البلد ...لا بلاهى كنتو وين من زمان ...هى البلد خربت الليلة ؟باكر حترجعو لى ناسكم و خاصة عندما تحسو بعزل الشعب ليكم...و تتكلو على المثل أنا وود عمى على الغريب ....كلكم لا يرجى منكم...أريحونا من اللعب على الدقون و تأدية الأدوار المرسومةو مطبوخة من داخل مكاتب الأمن كلكم لاعبين نفس اللعبة التى لعبها الترابى و يلعبها الأن حسين خوجلى ..يللا بلا لمة... فعلا أم الكلب بعشوم.

[fenkoosh]

#949537 [ماسورة]
5.00/5 (1 صوت)

03-22-2014 11:03 AM
اعترفت بمساهمتك فى تثبيت
واستمرارية نظام الاخوان الأرهابى فى الحكم
إعترفت بفشل مشروعكم الحضارى
لو كنت رجل شريف وشجاع وصادق
اعترف ومعاك (غازي بتاعك) بمشاركتك فى قتل مئات الألاف
وتشريد الملايين وتقسيم البلاد
وتعذيب وتصفية الشرفاء من المناضلين
واذلال الناس ونشر الفساد المالى والاخلاقى
ونهب موارد البلاد والمتاجرة بالدين
وكبت الحريات وو..

اعترافك مابفيدك ودموع التماسيح ما بتعيدك
حتمآ سياتى الخلاص والحساب ح يكون عسير
مش ح تقدر تغمض عينيك و(تنوم) سوف تسهر كما لم تسهر من قبل

لعنة الله عليك
وعلى تنظيم الاخوان الارهابى الفاسد القذر

[ماسورة]

#949500 [علي الجمالي]
0.00/5 (0 صوت)

03-22-2014 10:39 AM
اذا كان الحكماء هم الصادق والميرغني وسور الدهب احسن تخلينا مع البشير

[علي الجمالي]

#949225 [الناير]
5.00/5 (1 صوت)

03-21-2014 11:10 PM
عند لاسلاميين توجد مصالح دائمة وهم لايصلحون لحكم السودان وتجربة الانقاذ خير مثال حتي لو سبوا المؤتر الوطني ليل ونهار وطلقوا علي حزبهم "حركة الإصلاح"

[الناير]

#949179 [عصمتووف]
5.00/5 (1 صوت)

03-21-2014 09:11 PM
- حكماء السودان امثال سوار الذهب, الصادق المهدي الميرغني الناس
اني اكتفي دائما بزبدة الحوار لا اقرا لكم ولا اطيق مشاهدتكم

لو كان ما تدعية هؤلاء حكماء السودان علي السودان السلام اسوء 3 امثلة ذكرتها الحكماء والحكمة في بلادي تجدونها لدي جدي وجدتي واجداد كل من يقول لا للاسلام السياسي
وفي افواه المجانين
الي
اعدائي المعتوهين من اعداء الدين والوطن والغوغاء منكم ا
اقول
الي كل سمسار وتاجر دين منكم ومنتظر
لن ينفع ويفيد خروجكم من مايوه (البكيني) الاسلام السياسي الي سروال الوطن العريض

[عصمتووف]

#949171 [يحيي العدل]
0.00/5 (0 صوت)

03-21-2014 08:45 PM
((انا بقول ليك ستكون انتخابات مزورة مليون في المية نحن كنا جوة وعارفين الانتخابات بتتعمل كيف ، ))

* مقاطعة..كنت بتزورو الانتخابات فترة وجودكم داخل الوطني؟

- لا نرفض ذلك وصوتنا كان عالي جدا .




ما هذا التناقض ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[يحيي العدل]

#949152 [kalifa ahmed]
5.00/5 (1 صوت)

03-21-2014 07:56 PM
مقتبس من تصريح د.اسامة توفيق أعلاه(لكن اذا الامر مشى بنفس الوضع ده انا بقول ليك ستكون انتخابات مزورة مليون في المية نحن كنا جوة وعارفين الانتخابات بتتعمل كيف ،),,, وشهد شاهد من داخل الحوش .... قبل كدي قلنا ما في داعي لانتخابات حشو الصناديق وخجها.... وبعدها يجيك اليشير وناس نافع ليتشدقو بالشرعية وصندوق الانتخاب !!!!!!

[kalifa ahmed]

#949117 [لن ترتاحوا يا لصوص]
4.50/5 (2 صوت)

03-21-2014 06:01 PM
-(( الرئيس لغى الحل الطرحه في الخطاب في حديثه في بورتسودان باللاءات الاربعة,,لا لتفكيك الانقاذ لا لتاجيل الانتخابات لا للحكومة الانتقالية لا للحكومة القومية طيب انا احاورك على شنو؟ .))
أسأل شيخك الترابى..

[لن ترتاحوا يا لصوص]

#949100 [المنجلك]
5.00/5 (3 صوت)

03-21-2014 05:23 PM
الصفوف الخلفية هذا هو بيت القصيد
1- بعد الانقلاب 1889 فتح الترابى الباب على مصرعيه لكل من يستطيع الثقة فيه لحماية ظهر الانقاذ وهى طفل وليد وتم تبنى سياسة التمكين وهى الاعتماد على الساقطين اجتماعين واللصوص وعديمى المبادئ والصعاليك لحماية ظهر الانقاذ مقابل حماية وصرف النظر الحكومى والاعلامى عن امراضهم النفسية.

2- سرعان ماتحولت هذه الصفوف الخلفية الى جماعات ضغط داخل السلطة التنفيذية والتشريعة وتم تحويل الحكومة بمجملها الى اقطاعيات وجهوية وسرقة مؤسسية

3- الصفوف الخلفية هى حرباء تتلون مع معطيات الصراع داخل الانقاذ ومفاصلاته المشهورة والاختلافات وتحتفظ بلونين اساسيين الفساد وبقاء الانقاذ.

[المنجلك]

#949089 [love Sudan]
0.00/5 (0 صوت)

03-21-2014 04:51 PM
https://www.facebook.com/lovesudan2014?ref=hl

[love Sudan]

#949075 [لن ترتاحوا يا لصوص]
5.00/5 (2 صوت)

03-21-2014 04:18 PM
((انا بقول ليك ستكون انتخابات مزورة مليون في المية نحن كنا جوة وعارفين الانتخابات بتتعمل كيف ، ))
اسامة توفيق يعترف !!! الان !! ومن زمان مالك ما قلت مجرد راى او نصحت المزورين يعنى كنت عارفا مزورة وساكت والساكت عن الحق شيطان اخرس

[لن ترتاحوا يا لصوص]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة