اللذيذة ..!!!
اللذيذة ..!!!


03-22-2014 09:24 AM
صلاح الدين عووضة

*و(اللذيذة) التي أعنيها ليست هي (إشراقة) الوارد ذكرها في سياق كلمتنا هذه ..
*أو بالأحرى لا أعني أنها لذيذة (شكلاً) وإلا كنت ذا مؤهلات (غزلية !!) تؤهلني لمنافسة (الأزرق) - وإخوانه - في وزارة الخارجية..
*هي لذيذة بحكم إجادتها استخدام أداة الاستثناء (إلا !!) تماماً مثل الذين سترد أسماؤهم من (رجال) ما كانت لتنظر إليهم (إمرأة العزيز) لو أنهم كانوا في مكان يوسف الصديق ..
*فالحكاية لا علاقة لها بلذة مظهرية وإنما - ولا تتسرعوا في التعجب - بلذة ذات صلة بأداة الاستثناء المذكورة في فقرتنا أعلاه ..
*فالأداء (إلا) هذه كانت بمثابة (عادل إمام !!) في تصريحات هي أشبه بسماجة فاروق الفيشاوي الذي قال (بلدياتنا) جعفر عباس أنه كاد أن يكره السينما المصرية بسببه..
*فهي قد اُستخدمت - الأداة المذكورة - استخداماً لذيذاً في الأيام الماضية لتكون مثل نسمة منعشة شاردة في جو (كلامي) مشبع بـ(سموم الصيف) ..
*فوالي الخرطوم - مثلاً - قال إن حكومته ستبسط الحريات قريباً ليتمكن كل حزب معارض من التفاعل مع جماهيره ..
*و(اللذة) في تصريح الخضر هذا ليس في الإعتراف الـ(ضمني) من تلقائه بأن الحريات هذه لم تكن متوافرة في السابق حسبما كانت (تزعم!!) الإنقاذ كثيراً..
*ولا في عدم التنبه إلى أنه يبدو كمن (يمتن !!) على المعارضة بالحرية هذه رغم إنها (الأصل) في الدين الي ترفع حكومته شعاراته ..
*(اللذة) هي في إقحامه أداة الاستثناء في حديثه هذا ليفرغه من محتواه تماماً ..
*فقد قال : "ولكن الحرية هذه لن نسمح بممارستها (إلا !!) بعد أخذ تصديق قانوني من جهات الإختصاص" ..
*(يعني) - "من الآخر كده" - : (نجوم السماء أقرب لكم يا أهل المعارضة) ..
*و(لذيذ) آخر هو وكيل وزارة المالية ينفي (غاضباً !!) الحديث عن زيادة أخرى مرتقبة في أسعار المحروقات ..
*ثم يبز عادل إمام إضحاكاً – عبر استخدامه الأداة (إياها) – حين يضيف قائلاً : (إلا إذا صادق البرلمان على ذلك !!) ..
*(ياسلام) ؛ ومنذ متى البرلمان هذا لا (يصادق) ؟! ..
*بل هو يصادق بـ(تصفيق !!) داوٍ وليس (من سكات) وحسب ..
*أما ثالثة (اللذيذين) - خلال الإسبوع المنصرم - فهي وزيرة العمل إشراقة سيد محمود في إطار حديثها عن فكرة الحكومة الإنتقالية ..
*فأداة الاستثناء (إلا) هي التي جعلتها تبدو لذيذة (محاكاة !!) من جانبها لأهل الإنقاذ عندما يتحدثون عن الفكرة هذه ..
*فهي قد قالت - مثلهم تماماً - ألا مانع من حكومة إنتقالية شريطة أن (تحل المشكلات الأساسية) أولاً ..
*(طيب) ما هي المشكلات الأساسية هذه يا إشراقة التي (لم تُحل !!) طوال عمر الإنقاذ المديد الذي تجاوز العقدين من الزمان ؟! ..
*قالت إن من بينها (أولوية الدفاع عن حدود السودان بالقوة العسكرية !!) ..
*ولم تشرح لنا - إشراقة - أي حدود تعني : هل هي حلايب شمالاٍ ، أم الفشقة شرقاً، أم التي (بقيت !!) بعد الإنفصال جنوباً ؟! ..
*وكم هي لذيذة أداة الاستثناء هذه حتى في أفواه (المقطورين!!!!!).


الصيحة
[email protected]


تعليقات 36 | إهداء 0 | زيارات 22062

التعليقات
#1463092 [الأرباب]
0.00/5 (0 صوت)

05-18-2016 10:00 PM
alas!

[الأرباب]

#1446490 [محمد]
0.00/5 (0 صوت)

04-18-2016 12:25 PM
هى إشرافه براها

[محمد]

#1445882 [abdalla jiddana]
0.00/5 (0 صوت)

04-17-2016 11:14 AM
منتهى السخف والقرف!!!!!!!!!!!!!!!! حتى الكاتب الصحافي إذا أراد أن يكتب عن أي موضوع فلماذا يلجاً للألفاظ التلميحات السخيفة والتهكم والسخرية واستعراض عضلاته الكتابية بشكل مقزز، لماذا الواحد لا يعرض لرأيه أو فكرته باسلوب مهذب ومعقولية وموضوعية في الطرح!!! لماذا هذا الغرور من الكتاب الصحافيين وظنهم دائماً أنهم فوقنا فهما وشطارة؟؟ قل ما تريد قوله وأكتب فيما شئت وانتقد من تريد فقط أن يكون ذلك بأسلوب مهذب وعفيف وخالي من الإهانة والإستهانة والسخرية والتهكم، حاجة تقرف وترفع عجيب من هؤلاء الكتاب فهم كل شيء ويعرفون كل شيء وغيرهم لا شيء!!

[abdalla jiddana]

#951789 [سوداني ميت كمد من البحصل]
3.00/5 (1 صوت)

03-24-2014 01:48 PM
بعد25سنة عايزة الانقاذ تحمي الحدود زي مالوا الجدود بعد ايه بعد ما انملص السروال(الجنوب) واتشالت طاقيتنا (حلايب والعوينات سمعنابها اخيرا كذلك شالوه اولاد بمبة مهازل) وطنعة في الجنبة(الفشقة) من الاحباش والغريق لي قدام ولا حول ولا قوة الا بالله

[سوداني ميت كمد من البحصل]

#951745 [محمد]
3.00/5 (2 صوت)

03-24-2014 01:14 PM
والله أنا خايف إشراقة دى تكون قايلاك قاصدة هى باللذيذة تقوم تنشن عليك ياعووضة وتحميك النوم بالإتصالات- سبحان الله خليقتها ذى أم قيردون والمابعرف أم قيردون هى طائر كنا زمان فى الجزيرة نشرك ليهو وندودرا - أنا أعتذر لى أم قيردون لو بقى منها شئ مع الكيزان ديل لتشبيهى لهذه الإشراقة بها

[محمد]

#951639 [خالد]
4.50/5 (2 صوت)

03-24-2014 11:42 AM
المقال في غاية الروعة لكن الناس التي تدفن رؤسها في الرمال لا تريد ان ترى كذبها

[خالد]

#951495 [إسماعيل آدم]
0.00/5 (0 صوت)

03-24-2014 09:53 AM
بعد قراءة المقال و التعليقات رجعت للتمعن و التفكر و التبصر في صورة إشراقه

[إسماعيل آدم]

#951261 [منشى]
4.00/5 (2 صوت)

03-24-2014 12:43 AM
يا استاذ عووضه كلام دا هسه ما لذيذ خالص ... ما اصلا ناس المرتمرنجيه ديل يا اخوى ما بيتذوقوا و لا عندهم ذوق اصلا و لا حتى بيستطعموا الاشياء , هم بس بيعرفوا يبلعوا عديل كدا بس و على طوول و لامن الشى ما بيتهضم ليهم بيطرشوا و بيقولوا : الزول يااللى جاب الشى المسيخ دا منو ؟؟؟!!.... يبقى كدا يا العوووضه اطبخ لينا حاجه تانيه لذيذه كدا اللى بيحبو السودانين الكتار النازلين فى مطعمك العامر فى شارع الجمهوريه تقاطع القصر ... فى زحمه شديده لوجباتك السريعه الساخنه ... بس بنقول جر للكلاب الحايمه حول المطبخ ما يدخلوا لسانهم فى الصحون و يقرفون كمان. .

[منشى]

#950371 [ميمو]
0.00/5 (0 صوت)

03-23-2014 08:53 AM
الا لانهم عارفين مابيقدرويقولوغيرا

[ميمو]

#950252 [العازة بت ود المساعد]
5.00/5 (2 صوت)

03-23-2014 02:04 AM
والله أنتو كلكم مغفلين / بطلوا كلام كتير واطلعو الشارع /

الليلي العقيد شوفنو متمحن
في قلب التراب شوفنو متجكن
الرأي فارقو - ضيم الرجال يمكن

[العازة بت ود المساعد]

#950137 [زول ساكت]
5.00/5 (2 صوت)

03-22-2014 10:43 PM
النقد الساخر له أصول وقواعد لا أظن أنها متوفرة لدى الكثير من كتابنا اليوم خاصة أنهم يكتبون يوميا مما يخل بالفكرة الاساسية ويذهب بالقارئ بعيدا أقول ذلك كأستاذ درست مادة الصحافة تاريخا ونشأة ويعلم طلاب قسم الصحافة في الكليات المحترمة أصول الكتابة الصحفية وأسليبها وأنواعها أما صحفيو المهبة فهم كلاعبي الكرة قديما لعب جميل لكن من غير خطة ولا منهج .وقد يعني هذا الكلام الأخ عووضة وقد لا يعنيه .

[زول ساكت]

ردود على زول ساكت
[ADIL MOHYEDDIN] 04-08-2014 10:13 PM
تعلم الطلاب الصحافة وتتخفى وراء لقب؟

European Union [علي البرقاوي] 03-24-2014 12:42 AM
يا اخي بعد تنظيرك دة كله طلعت زول ساااااااااااااااااااااااااااااكت

European Union [حسن] 03-23-2014 11:08 PM
امش انت زول ساكت

European Union [زول كده] 03-23-2014 07:44 AM
طيب بما انك استاذ في فن الكتابة الساخرة وبتدي دروس جامعيه فيها ممكن تدينا نموذج عملي ؟


#949925 [ست الدوكة]
4.75/5 (4 صوت)

03-22-2014 05:30 PM
أجي يا ود عووضة عاد ما بالغتا هسع البت دي مالها ما حلات الدنيا فيها وخشيمها متل بوز البراد.

[ست الدوكة]

#949809 [وحيد]
5.00/5 (2 صوت)

03-22-2014 03:16 PM
المتوركين ديل بيورموا الفشفاش اكتر من اسيادم بتوع الإنقاذ ..... يعني لو لقطوا البرموها ليهم ناس الإنقاذ و اكلوا من سكات ما كان قدونا .. لكن كل واحد داير يوري اسياده انه تبعهم و تبع مشروخهم الهراري ... قبح الله وجوهكم

[وحيد]

#949804 [الطاهر]
4.00/5 (2 صوت)

03-22-2014 03:11 PM
كدا ... كدا بالترلة
القاطرا قندراني

[الطاهر]

#949776 [alnour]
4.75/5 (3 صوت)

03-22-2014 02:37 PM
انا المحيرني لغاية الان لماذا لم تعين اشراقة راجلها سفير زي راجل بدرية سليمان عينوه سفير وكل من يراه في الخارجية ده منو يرد عليه ده ما راجل بدرية في الاجتماعات ده منو ده ما راجل بدرية وبعدين لما يعينوا رجل اشراقة ده منو ده ما رجل اشراقة وديل منو ديل واحد راجل بدرية والتاني راجل اشراقة وهلم جرا اصلها بايظة

[alnour]

ردود على alnour
[راجل المرة] 03-22-2014 05:26 PM
حدث العكس راجل أشراقة عينها وزيرة .. و هي تمت الناقصة بتعيين شقيقها مجدي ( محرم دائم )


#949700 [ابوجلاجل]
5.00/5 (2 صوت)

03-22-2014 01:28 PM
مسعول من الخير ياعووضه قالوا بقيت تكتب في جريدة الصيحه بتاعة الطيب مصطفي. صحي الكلام دا صاح؟

[ابوجلاجل]

#949698 [بت قضيم]
3.50/5 (2 صوت)

03-22-2014 01:26 PM
ما كان اخير يا بتي كان قعدتي في البمبر وجنبك الكانون وحلة الملاح بدل الشلهة دى واكل الهوت دوق والبيرقر

[بت قضيم]

#949684 [sudani]
5.00/5 (2 صوت)

03-22-2014 01:14 PM
اكلكو حلو ........(الا) معانكو ضيق

[sudani]

ردود على sudani
European Union [Keemo] 03-24-2014 01:40 AM
ولَّا تِلِبِّدْكُو للحمة في لُبَّ الكسرة .......


#949659 [bent alnil]
5.00/5 (1 صوت)

03-22-2014 12:53 PM
مالها اشراقة ما لذيذه و ألذ من الناها عليك الله شوف الحاجب التقول مخططنه ناس الطرق و الكباري

[bent alnil]

ردود على bent alnil
European Union [ديموقراطية] 03-23-2014 03:24 AM
هههههههاي هههههه حلوة


#949652 [bent alnil]
5.00/5 (1 صوت)

03-22-2014 12:47 PM
الأستاذ عووضة أسلوبك ممتع و متميز
أي انسان يمكن أن يلاحظ ركاكة لغة أهل الإنقاذ و إن كان أميا و يرصد الكثير في خطابات الدغمسة و الوثبة
سمعنا بتعبير حان الوقت و آن الأوان و غيره بس اول مرة أسمع ب نضج الوقت و الله إلا سوداننا ده ينجض فيهو الزمن
المزعلني في وزارة العمل ماخدة حيز و مساحة بلا عمل اشراقة دي أحسن يدوها حتة مكتب صغير في و سط العربي يمكن تشتغل احسن المكيفات ما بتخليها تنجز و تفكر صاح.

[bent alnil]

#949645 [حسكنيت]
4.00/5 (4 صوت)

03-22-2014 12:39 PM
تبقي شباك ابقى ضلفة
تبقي استاذ ابقى الفه
تبقي خرمان ابقى سفة
وتبقي مرضان ايقى سلفا
تبلعيها وتبلعيني
وما مهم لو تبلعيني
يا اللذيذة الكلكى جنك
-----
تبقي سكر ابقي ضبان
تبقي بوليس ابقي بمبان
تبقي كبده ابقي مصران
تبقي شيته ابقي طرزان
ابقي حفله وتبقي سكران
فرتقيني
وجهجهيني
وبهدليني
ومامهم
هي فرتقيني
بس مهم شوفت عيونك وابقي منك
اي حاجه قريبه منك
-------
يا الهبيلة ( أحيييييي منك)

[حسكنيت]

ردود على حسكنيت
European Union [حسكنيت] 03-22-2014 08:31 PM
أخى الباحث عن الحق ، الحق أنو الكلام دا ما بتاعى ، دا جزء من قصيدة حلمنتيشية قديمة معروفة

United States [الباحث عن الحق] 03-22-2014 02:56 PM
والله إنت اللذيذ يا حسكنيت كلامك عسل.


#949644 [zubairali]
5.00/5 (1 صوت)

03-22-2014 12:39 PM
نحن العطبراوينونلا نرضى مثل قلة احيا و قلة الأدب في إحدى بناتنا ، إنتقدوا حزبها و سياستها في الوزارة و لكن هذه التجاوزات في حق الوزيرة لا تستاهلها أبداً و شوفوا لكم موضوع يهم الناس هي بقت على هذه الوزيرة . كامل تعاطفي معها أدبياً و جهوياً كمان و كفى !84

[zubairali]

ردود على zubairali
United States [الكباشي] 03-24-2014 07:18 AM
يأخي لو عايزنا ما نتكلم في بتكم دي ملؤها عليكم. لكن ما دام هي ماسكن وظيفته عامه وتبرطع فينا يمين وشمال عليها وعليكم تتحملوا الرد. انحنا بن دفع مرتبها كشعب سوداني دمه اتمصه وعليها ان تفكر فيما تقول وتوقف الإثتثنا المافي محله دا.


#949638 [MAHMOUDJADEED]
5.00/5 (2 صوت)

03-22-2014 12:33 PM
*فهي قد قالت - مثلهم تماماً - ألا مانع من حكومة إنتقالية شريطة أن (تحل المشكلات الأساسية)

والمشكلات الأساسية ما تتحل الا تجيبوا أتر الأرنب ودرب النمل لـ ( بله الغائب ) . يعني أنسى يا ود عووضة .

[MAHMOUDJADEED]

#949636 [هيثم الخلا]
5.00/5 (1 صوت)

03-22-2014 12:29 PM
يا عووضة يا لذيد يا رايق ديل الكضب ذاتو بعد دا حتيج ويقول عايز يهاجر من السودان لأن صفاته المتعارف عليها القوم عدوها بهناك،ألم يقل البشير أن لي عشرين سنة حصل يوم كذبت عليكم،

[هيثم الخلا]

#949625 [المشروع]
5.00/5 (2 صوت)

03-22-2014 12:21 PM
على العموم اخونا صلاح الفكرة جميلة جداً وجديدة اقصد فكرة (إلا) واقول للأخ/ بكري الصايغ الجميل فيها انها ثلاثة (إلات) ولو ذادت عن ذلك ربما تمسخ والناس ما تفكر فيها خليها تلاثة (إلات) بس عشان تكون مفهومة ومهضومة وهي فعلا ثلاثة الات مختارات بعناية

وحقت الوالي مفهومة وطبعا هو قال الاسبوع الجاي والاسبوع فات ولا شفنا من كلامو القالو شئ

وحقت وزير المالية استهلالية يعنى مقدمة لشئ

اما حقت اشراقة اصلا دي بتاعت زول خايف على المنصب عشان كدا ناس الدقير ما يهمهم السودان وحل المشاكل الاساسية او غير الاساسية وبودهم أن يظل الحال في السودان هكذا يعتاشون من ضل الفيل ورغبتهم ان لا توجد لا حكومة قومية او حكومة وطنية او حتى ناس تانين وسوف يقيف حزب الدقير ضد اي محاولة للصلح بين الاحزاب سراً حتى بين الشعبي والوطني والشعبي والاصلاح ناهيك عن الوطني وبقية الاحزاب الاخرى والحزب الوحيد الذي يخاف من الاصلاح والوئام هو حزب اشراقة بل هو اشراقة نفسها هم ما عايزين اي واحد ينافسهم في السلطة

[المشروع]

#949571 [حسكنيت]
5.00/5 (5 صوت)

03-22-2014 11:36 AM
الحال دا ما بتغير ( إلا ) تطلعوا الشارع

[حسكنيت]

#949518 [seems]
5.00/5 (4 صوت)

03-22-2014 10:55 AM
طيب مالو ياعوووووضة ما تتغزل فى البنية ماهي لذيذة فعلا - شوف المسيرة بتاعته دى كيف ولا الجطوم لا الخشيم تقول ابريق مكفى لوما متأله ادهوها للشيخ المخرف يمكن تطبطب ليه شيخوخوته - بس خليها فى تيها ويوم قريب تاخد ماسورة القذافى - لعنة الله عليها وعلى الدقير وناس الانقاذ الوثنى

[seems]

#949516 [nagisidahmad]
5.00/5 (2 صوت)

03-22-2014 10:52 AM
وفيها أيه يا عووضة لو قلت إشراقة الوزيرة " لذيذة " أو"حلوة " أو " مليحة " ,,, أكيد ما حتزعل فهي " بنت " ,,, وأيما إمرأة تحب أن يشار إلي جمالها وملا حتها أو حتي " لذتها" .
قال لي أحد الزملاء المجيدين للغة أن فلانة هذه " لذيذة " فقلت له إنها " عادية " وليست جميلة ,, فرد علي قائلا " أنا لم أقل هي " جميلة " بل قلت هي " لذيذة " ,, وأن هنالك فرق بين اللذييذ والجميل . فلتطمئن البنات أن الرجال تختلف أذواقهم ,,, فجمال المرأة ليس في وجهها فحسب ’’’ وأكيد اللذيذة أكثر حظا في الحب من الجميلة ,,, وأقول لصديقي اللغوي أن ليس هنالك لذة دون جمال فاللذيذة اجمل.

[nagisidahmad]

#949505 [عادل حمد]
5.00/5 (1 صوت)

03-22-2014 10:43 AM
بس المقدمة مش و لا بد

[عادل حمد]

#949494 [لن ترتاحوا يا لصوص]
4.50/5 (6 صوت)

03-22-2014 10:33 AM
لن نترك السلطة ( الا ) اذا طالبتم بذلك ولا تكون المطالبة مقبولة ( الا ) اذا جاءت من خلال مظاهرة حاشدة .. ولن نسمح بقيام مظاهرة معارضة للسلطة (الا ) اذا تقدمتم بطلب رسمى للجهات القانونية والعدلية والامنية .. ولن توافق لكم تلك السلطات (الا )اذا كانت المسيرة لتاييد النظام !!!

[لن ترتاحوا يا لصوص]

#949493 [TALHA]
1.50/5 (2 صوت)

03-22-2014 10:33 AM
(والا)انت اللذيذ

[TALHA]

#949461 [ماذا وإلا]
5.00/5 (1 صوت)

03-22-2014 10:07 AM
ماذا وإلا ....بطريقة ممثلة في دور معلمة مصرية(بتاعت قهاوي)...حا أوريك نجوم الضهر... من فيلم مصري سمج لكن اقل سماجة من مسرحية مقطوري الإنقاذ
معلم كبير الاستاذ عووضة keep it up

[ماذا وإلا]

#949451 [داوودي]
3.75/5 (3 صوت)

03-22-2014 09:58 AM
شكلك يا الصحفي متابع الجماعة وبالك طويل ياخي ديل لو عملته زيك بجيني طراش عديل الله يخارجنا منهم جميعا .... قادر يا كريم ...

[داوودي]

#949445 [ود الدكيم]
2.00/5 (1 صوت)

03-22-2014 09:52 AM
أعتب عليك يا أستاذ صلاح عووضة أنك كنت في غاية التهذيب في مقالك.

[ود الدكيم]

#949444 [خالد حسن]
5.00/5 (1 صوت)

03-22-2014 09:51 AM
عووضه يالذيذ يارايق

[خالد حسن]

#949429 [بكري الصائغ]
5.00/5 (2 صوت)

03-22-2014 09:35 AM
والله عجبني شدد كلامك..(الا)..انه قصير!!

[بكري الصائغ]

ردود على بكري الصائغ
United States [ahmed] 05-03-2014 02:15 PM
ياسلام علي الاسلوب لكن اين حريه الصافه التي يتشدقون بها



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة