الأخبار
أخبار إقليمية
بلايين مصطفي عثمان الوهميه!
بلايين مصطفي عثمان الوهميه!
بلايين مصطفي عثمان الوهميه!


03-27-2014 06:44 AM
عبدالله عبد الوهاب



يا جماعه أدونا راسنا! الجماعه ديل حيرونا بحكاية البلايين دي! وزير التجارة يقول ليك عائدات الصمغ العربي ثلاثة مليارات في ثلاثه شهور! فنبلعها جافه!..الكاروري بتاع الـمعادن طالع و نازل مع الشركات الروسيه مبشرا إيانا بمليارات قادمات! فنبلعها جافة أيضا!

أما الطفل ألـمعجزه فدا زول تاني و رسمو تاني و شكلو تاني يستحق بجداره أن نرقص معاهو علي أنغام أغنية عبدالوهاب الصادق { حبيبنا ألأولاني فلان الفلاني لينا معاهو ذكري عايزين نعيدا تاني!!} إذ وقف هذا الطفل الـمعجزة أمام جمهور مهرجان نيالا للتسوق و قال لهم معي مستثمر يجلس بينكم الآن و بحوزته ثلاثة مليار دولا يريد أن يسثمرها هنا في مجالات الحبوب الزيتيه والثروة الحيوانيه وذلك لأن نيالا بها مطار دولي وطرق بريه تربطها بكل من تشاد و أفريقيا الوسطي إضافة لخط سكة حديد يربطها بميناء بورتسوان!!! أضف إلي ذلك فإن جنوب دارفور تعيش في أمن و أمان ! فهل سمعت صوت رصاص منذ قدومك إليها؟؟

شوفوا جنس البرطعه دي!! فيا مصطفي يا حليل مصانع الحبوب الزيتيه لامن كانت بتشتغل ثلاثه ورديات في نيالا والضعين والنهود والأبيض والرهد وامروابه و تندلتي و الـمناقل!! الـمصانع دي كلها وقفت بسبب الحرب وسكن عمالها مدن الصفيح عشوايئا في أطراف الـمدن بحثا عن ملاذ و لا ملاذ!!

فيا مصطفي دارفور خرجت من دائرة الإنتاج نهائيا بـسبب الحرب وأضحي مزارع الحبوب الزيتيه و مربي الـماشية عاطل عن العمل و الإنتاج بنسبة تفوف الستين بالـمائة ليس حبا في العطالة و لكن بسبب الحرب!! فهل يعقل لـمستثمر عاقل أن يستثمر في هكذا مناخ؟

فيا مصطفي وإنت وزير إستثمار الا تعلم أن خارطة الإستثمار حول العالم مظللة بثلاثة ألوان وهي الأحمر والأصفر والأخضر وكل لون يرمز لدرجة الـمخاطر في هذه الدولة أو تلك من حيث الحروبات والبني التحتيه و تقلبات الـمناخ! فسودانك يا مصطفي يقع في زون الأحمر!! و عليه فإن مستثمرك دا أما أن يكون قرعه ساكت و لا زول بتاع غسيل أموال؟

فيا مصطفي يا أبو جضومن زي ضرع البقره العزباء حل عن سمانا عشان يرتاح دماغنا

[email protected]


تعليقات 9 | إهداء 0 | زيارات 3900

التعليقات
#955754 [هدهد]
0.00/5 (0 صوت)

03-28-2014 09:14 AM
يكذبون ولا يستحون مستثمر بثلاثة مليار دولار وكمان فى نيالا منطقة الحرب والنزوح !!!! المستثمرون أجبن الناس ويخافون على ثرواتهم اكثر من ابناءهم كيف لمغامر يجاسف بهذا المال الضخم !!!؟؟؟ هذا الرجل يضحك على الناس ويلهث وراء عمولته لا اكثر ولا اقل ثلاثة مليار !!!!!! لو مشى بيها مصر او لبنان او حتى اثيوبيا لتضاعفت فى سنوات قليلة لكن هناوفى نيالا هل سيجد راس ماله فى هذه الظروف ؟؟؟؟

[هدهد]

#955573 [بتاع الدكان]
0.00/5 (0 صوت)

03-28-2014 12:03 AM
يعني يا ود عبدالوهاب ، انت قايل دكتور الضرس ده ما عارف وين زووون بلاد (الألغاز) ..
وانو الراجل المعاهو ده ما هو الاّ واحد زي المستثمر الحرامي (جمعه الجمعه) .. عارف تّب .. وما فايته عليهو
الحكاية كلها سمسره وليست استثمار .. الحكاية الجيوب وليست مصانع الحبوب ..

[بتاع الدكان]

#955359 [المهندس سلمان إسماعيل بخيت على]
0.00/5 (0 صوت)

03-27-2014 06:17 PM
يا جماعة الخير إنتو الولد أب جضيمات دا كلما قعد مع عرب من عرب الخيلج يضحك - بيضحك فى شنو ؟
فى خيبة إستثماراتنا الزراعية اللى هو راسها

[المهندس سلمان إسماعيل بخيت على]

#955344 [اليبي]
0.00/5 (0 صوت)

03-27-2014 05:58 PM
فهل يعقل لـمستثمر عاقل أن يستثمر في هكذا مناخ؟
أنا ما عارف اللغة دي شنو$ بقت سايدة في الصحافة وهي ترجمة لللهجة اللبنانية((فشي عائل يسثثمر في هيك مناخ))ومن الصحافة اللبنانية انتشرت بلا وعي ولا معرفة
يا جماعة دي ما طرقة دي

[اليبي]

#954872 [habbani]
0.00/5 (0 صوت)

03-27-2014 10:43 AM
هو فعلا البقرة الضاحكة ( لافاش كى رير )لافاش تعنى البقرة وكى تعنى التى ورير تعنى تضحك أى البقرة التى تضحك ومجازا سميت البقرة الضاحكة .
هذا ليس له علاقة بالإستثمار وأصبح شخص غير مرحب به فى الدول الخليجية ما عدا قطر .

[habbani]

#954791 [barca 4 eva]
5.00/5 (1 صوت)

03-27-2014 10:00 AM
وين مليارات الشرق اللى اتعمل ليها كم موتمر استثمارى يا مصطفي ياعثمان ؟ كفاية ضحك علي الدقون !! عملتها لينا مولات كبيرة واسثمارات شخصية ؟؟وطردتو شركات الطيران عشان تطيروا بالقطرية !!!وين النهضة الزراعية ولا النفرة ولا الوثبة ؟؟كفاية افك وضلال !!!دقت ساعة العمل وجهزوا الخوابير ياشباب ..

[barca 4 eva]

#954735 [وحيد]
5.00/5 (4 صوت)

03-27-2014 08:55 AM
الجماعة ديل بسطلوا تسطيل " رسالي" بصنف ممتاز جدا و بعدها يقعدوا يتخيلوا و يعيشوا في الاوهام ....
الله يلعن الخدرا الشديده التي اصبحت الشراب الرسمي للمسئولين!

[وحيد]

#954734 [osama dai elnaiem]
1.00/5 (1 صوت)

03-27-2014 08:54 AM
(فيا مصطفي يا أبو جضومن زي ضرع البقره العزباء حل عن سمانا عشان يرتاح دماغنا)- جزاك الله خيرا اضحكتنا هذا الصباح كثيرا كثيرا بعبارتك الدقيقة هذه والظاهر انك تربية حبوبات لان هذا الوصف عميق ويدل علي عقل وحكمة وتبصر--- واذا جينا لموضوع صاحبك( ابو جضومن) هو كما ربعه يهئ لشركاته الخاصة حول العالم وبوابته توزيره في حكومة البشير لان الامر في موضوع جذب الاستثمارات للسودان بعيد عن الواقع لان الامر اساسا هو تمويل التنمية والتي لابد من تحقيق شروطها علي الارض بتوفير الارض خالية من الموانع والبني التحتية من فنادق واتصالات وسفلتة طرق يعني مستثمر في نيالا حيسكن في اي فندق ويذهب مساء الي اي مطعم لمقابلة فريق عمله واي قاعة اجتماعات سيذهب اليها واي طائرات خاصة يستاجرها للمرور علي مزراعه التي تمتد لكيلومترات واي شركة طيران يستطيع ان تستقل طائراتها من مطار نيالا للحاق باجتماع صباح الاثنين في ( الستي) بلندن او ولل ستريت--- مصطفي ( ابو جضومن) عارف انه لا في استثمار ولا يحزنون والامر كله حرامية علي قوة عين و(فهلوة ) اكتسبها من (الخؤولة)--- بالله شوف ( ابو جضومن)-- اكررالشكر علي اضحاكنا.

[osama dai elnaiem]

#954730 [جركان فاضى]
0.00/5 (0 صوت)

03-27-2014 08:49 AM
طبعا البشير لما شاف البلد وقعت قام بطرد جميع الشلة ما عدا الطفل المعجزة...شات على عثمان وشات نافع والجاز وووو...طيب ليه ماشات الطفل المعجزة؟ الطفل المعجزة قال للبشير عندى فى شنطتى عقود مبدئية لمستثمرين اجانب بثلاثة مليارات دولار...البشير شاف الحكاية كدى قال ليه خلاص انت اقعد...وظل الطفل المعجزة فى ثلاثة ملياراته كلما فتح خشمو..او مشى لى حتة....والبشير يعاين ويمد فى حبل الصبر...الا اننى ارى ان حبل الصبر قصر...والبشير شايتو شايتو...وقبل ما يشوتوا بكرى ناوى ليه بكف من نوع ابوكديس..اما الاستاذ عبد الله عبد الوهاب فقد ابدع فى وصف كضيمات هذا الطفل بضرعات البقرة الشول

[جركان فاضى]

ردود على جركان فاضى
European Union [قونقليذه الريّس] 03-28-2014 12:07 AM
الكور كلها في محلها (في الواطه) يعني ، المشير ما شات حاجة ، امبارح علي عثمان قال لابوعيسى انو مفوّض من رئيسو
للحوار مع التحالف .
ديل مشوا بيوتهم ومن هناك بديروا البلد المعندها سيد ووجيع ..



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة