الأخبار
منوعات سودانية
أمجد حمزة: أنا أتأثر بـ(البنك المركزي).. وندى القلعة لم تسحب البساط من تحت أقدامي!!.. نعم.. هنالك خلافات حادة بين أولاد الصادق وشكر الله وطه سليمان!!
أمجد حمزة: أنا أتأثر بـ(البنك المركزي).. وندى القلعة لم تسحب البساط من تحت أقدامي!!.. نعم.. هنالك خلافات حادة بين أولاد الصادق وشكر الله وطه سليمان!!
أمجد حمزة: أنا أتأثر بـ(البنك المركزي).. وندى القلعة لم تسحب البساط من تحت أقدامي!!.. نعم.. هنالك خلافات حادة بين أولاد الصادق وشكر الله وطه سليمان!!


صاحب (جناي البريدو) و(حرامي القلوب تلب) : لهذا السبب (....) أضع كاميرات مراقبة على بوابة منزلي!
03-29-2014 10:42 PM


حوار: تفاؤل العامري
أمجد حمزة من الشعراء الشباب الذين برزت أسماؤهم في الآونة الأخيرة، ومن الشباب الذين وُجِّهت إليهم سياط النقد من قبل العديد من الكتاب والصحفيين، بعد أغنياته التي تم وصفها بـ(الهابطة)؛ بينما أطلق عليه بعضهم الكثير من الألقاب وفي مقدمتها (المفرخ الأول للأغنيات الهابطة في السودان)، لكن الفتى استمرّ في طرح أغنياته الغريبة دون الالتفات لتلك الأصوات، بالإضافة إلى ذلك بتصريحاته المتعددة حول اختلاف لونيته ومقولته المستمرة: (أنا ما في شاعر غيري في الساحة الفنية)، تلك العبارة التي جلبت له الكثير من المشكلات والحروب. (فلاشات) بحثت عن أمجد حمزة وأجلسته على كرسي ساخن، ليجيبها عن الكثير من الأسئلة التي تدور في أذهان الكثيرين.
*في البدء أنت شاعر مثير للجدل إن صح التعبير، ما سرّ ذلك؟
أنا تخطيت مرحلة الشاعر وأصبحت محترفاً، وحالي مثل حال سيدي بيه المحترف بصفوف الفرقة الهلالية، وأصبحت ناظماً وصانعاً للأغنيات، وسابقاً كنت أكتب كلاماً عادياً، لكن اليوم اختلف الوضع، وأنا مثير للجدل فعلاً لأني (زول ما عادي)!!.
* البعض يصفك بأنك ترزي أغنيات ليس إلا.. ما تعليقك؟
أنا أحترم الترزية، ولا تهمني المسميات لأنني مقتنع ماذا أكون!.
* صرحت من قبل بأنك تبيع أغنياتك مقابل 2000 دولار، هل ما يزال الرقم هو ذات الرقم، أم شهد ارتفاعاً في الفترة الأخيرة؟
رد بسرعة: أنا أتأثر بالبنك المركزي والدولي.. لذلك من الطبيعي أن يزيد الرقم، وأنا أيضاً لي منصرفاتي، وأهتم بنفسي جداً، ولا أرتدي إلا (الملابس الماركة)!!.
* تواجه حملات نقد عنيفة لما تكتب كيف تتعامل معها؟
ضحك ساخراً ثم أجاب: أنا لا أهتم بما يكتب عنّي وكل إنسان بتكلم عني بـ(ينفخ في قربة مقدودة)، ويا ريت بعد يخلص من القربة دي يجيبها لي عشان أعملها دلوكة لي إنصاف مدني!!.
*مطرب ندمت على التعاون معه؟
أحرص على اختيار من أتعامل معه لكي لا أندم بعد ذلك.
* أمجد لا أحد ينفي الموهبة الفطرية التي تتمع بها.. لماذا لم تسعَ لتوظيفها في إنتاج أغنيات ذات قيمة ووزن؟
صمت قليلاً ليجيب قائلاً: أغنياتي كلها ذات قيمة حتى التي خلقت ردود فعل مضادة، لأن إثارة الجدل في حد ذاتها تعتبر قيمة!.
* طه سليمان يريد أن يترشح لرئاسة الجمهورية، ما رأيك وبصراحة؟
كل زول يتمنى الحاجة الفي نفسه!.
* (جناي البريدو).. هل صحيح أن طه سليمان اقتلعها من إنصاف مدني؟
على العكس، العمل كتبته خصيصاً لطه، وكان سبباً في نجاحها وانتشارها، ولو رددتها إنصاف مدني لما حققت كل هذا النجاح.
* من هم أعداء أمجد حمزة؟
ما في زول يقدر يقول إنو عدو لي.. أنا أمتلك جمهوراً شرساً، وأي شاعر أو فنان يقرب منّي بسوء يعرض نفسو للخطر!!.
* شاعر تعتبره مثلك الأعلى؟
أنا لا أحب إلا غناء أمجد حمزة.. وما عندي مثل أعلى.. فقط أحب أغنيات جلال حمدون، رغم أنه لا يستطيع منافستي!!.
*ما هذه النرجسية والغرور، الذي يبدو واضحاً من خلال إجاباتك؟
دي حقيقة ما غرور ولا أستحي من قول ذلك.
* من من المطربين تتمنى التعامل معه؟
أنا أساساً ما فضل لي زول... كلهم اشتغلت معاهم.. وبيتنا من زيارات الفنانين بقى زي اتحاد المهن الموسيقية!!.
* أمجد.. ما هي حقيقة كاميرات المراقبة التي تضعها أمام بوابة منزلك تخوفاً من المتطفلين؟
نعم عندي كاميرات مراقبة.. وحارس شخصي.. وقريباً ستكون هناك كلاب بوليسية!!.
* يقولون إنك تتعامل مع كل الفنانين إلا ندى القلعة لأنك تخاف أن تسحب البساط من تحت قدميك؟
أنا تعاملت مع القلعة من خلال 60 عملاً.. ولا أحد يمكنه سحب البساط من تحت أقدامي، لأنني أقف على (سيراميك)!!.
* بصراحة هل صنعت فناناً من خلال أغنياتك أم أن الفنانين هم الذين صنعوك؟
أغنياتي مكملة للفنان.. وهي إضافة حقيقية لأي فنان في مشواره الفني وفي سيرته الذاتية!.
* أمجد بكل صراحة ما هي حقيقة الخلافات بين أولاد الصادق وشكر الله وطه سليمان؟
نعم هناك خلافات حادة، وأنا حاولت إصلاح الحال وتهدئة النفوس ولكني والله فشلت.
*يردد البعض أن سبب قلة ظهورك على الفضائيات يعود لأنك تخجل من تقديم منتوجك من الأغنيات (الهابطة).. هل هذا صحيح؟
بالعكس.. أنا الذي أرفض الاستضافات، وبصراحة لأنني كذلك أطلب أرقاماً خرافية من أجل الاستضافة. أنا ظهرت مرة على قناة النيل الأزرق الفضائية لمدة (6) دقائق فقط، مقابل مبلغ خرافي (اعفوني من ذكره هنا)!!.

السوداني


تعليقات 70 | إهداء 0 | زيارات 15026

صفحة 1 من 212>
التعليقات
#971913 [شاذلي]
0.00/5 (0 صوت)

04-13-2014 04:50 PM
الله يقرفك

[شاذلي]

#971107 [loay]
0.00/5 (0 صوت)

04-12-2014 10:35 PM
يعجبني في هذا الشاب انه واثق من نفسه ودا في حد زاته يعتبر شاب ذو قيمة
اغنياته الشعب السوداني جله يحبها ويرددها فلماذا تسمى هابطه
انسوا يا جماعه كلمة هابطه دي وشوفوا هل الاغاني دي الشعب بيحبها ام لا
اهنيك يا امجد واستمر في تجاهلك لما يكتب عنك فالذين يكتبون لا يتعدون اصابع اليد وحاقدين واما الجمهور السوداني بيحب اغنياتك

[loay]

#959828 [عادل حسبو]
3.00/5 (2 صوت)

04-01-2014 12:30 PM
والله ياشباب خلو ناس تتنفس بقصائدهذا االشاب مهما كان مستواها بدل ماتموت بقهر ومصائب الانقاذ اهه يلقوا حاجه تخفف عنهم من كاهل الحياة الانقاذية

[عادل حسبو]

#958193 [aziz]
4.66/5 (6 صوت)

03-31-2014 12:44 AM
ولد ده يا مرسي؟

والله صدق من قال
ذهب الذي كنا نعيش بفضله بين الورى **وبقي اللذين حياتهم ووجودهم مثل الخرى

[aziz]

ردود على aziz
Hong Kong [احمد] 04-08-2014 06:49 PM
هههههههههههه
والله لكن بيت شعر بديع


#958092 [زمن إنقاذ]
3.75/5 (4 صوت)

03-30-2014 09:45 PM
مافي حاجة قريب في زمن إنقاذ يا جماعة زول ما عندو غير بوت حاكمكم قرن كامل أتمنى زي ما داير يا ولد إنقاذ بلد حاكمنو بوليس نتمنى تترشح رئاسة انا بديك صوتي يا جناع إنقاذ ههههههههههههههههههه

[زمن إنقاذ]

#958035 [سيف اليماني]
2.75/5 (4 صوت)

03-30-2014 08:16 PM
حبيبة عمري تفشى الخبر وذاع وعم القرى والحضر
وكنت اقمت عليه الحصون وخباته من فضول البشر
تقللي شنو وتقللي منو اه ي زمن

[سيف اليماني]

#958015 [كاتلاني المغصة]
3.50/5 (3 صوت)

03-30-2014 07:56 PM
ده ولد ...................

[كاتلاني المغصة]

#957978 [خلدون]
4.13/5 (5 صوت)

03-30-2014 06:50 PM
يا جماعة الزول المخلوع ده قال بيلبس ماركات ولابس ليه فنيلة تي شيرت اصفر ابو كلب يعني ابو الرخاء من قدام مستشفى بحري انا شفتها ما بتغباني لانو الحاجات الشينة تلفت النظر مفروشة في الواطة عديل شوف قليل الأدب ده لا خلقة لا اخلاق لا ذوق بعد ده طولة لسان .

[خلدون]

ردود على خلدون
European Union [ديموقراطية] 03-31-2014 02:11 AM
ههههههههههههاي ههههههههههههههههههههه ريحتني والله


#957974 [طلق النار]
3.75/5 (5 صوت)

03-30-2014 06:44 PM
خلو الود يسرح شويه"" من دخل فيه لا خير فيييييه"" !!دا باطل!!!
دا من حزب مستثمرين ((خرابة النعمة ))ههههههههه

[طلق النار]

ردود على طلق النار
United States [ودشندي] 03-30-2014 08:21 PM
هههههههه ....من دخل فيه لاخير فييه...والله من الضحك لحدي دموعي نزلو


#957952 [السفير]
4.25/5 (5 صوت)

03-30-2014 06:19 PM
معليش قراء الراكوبة الولد دا حرق روحكم وقطع مصارينكم...وانتو اديتوهو اكبر من حجموا ورديتو عليهو كدا حيكون متكيف للاخر...بيتهم وين انا عايز اقابلوا ضرورى لكن بصراحة خايف من الكلاب البوليسية دى والكاميرات.

[السفير]

#957805 [حاتم أب تفة]
4.25/5 (7 صوت)

03-30-2014 03:49 PM
بلد رئيسا الرقاص..!
وزير دفاعا عبد الرحيم أب ريالا..!
رجل الدين الكاروري..!
العالم الأكبر بلة الغائب..!
المطرب الأعظم طه وأولاد الصادق وشكر الله..!
الأديب الأكبر إسحق أحمد فضل الله..!

شنو الغريب إن يكون الشاعر الأوحد فيها الزول الفوق ده..؟!!

[حاتم أب تفة]

ردود على حاتم أب تفة
United States [امجد] 03-30-2014 08:04 PM
هههه ، اديك العافية والله


#957803 [بابكر ابورتاج العامري]
3.50/5 (4 صوت)

03-30-2014 03:48 PM
من اي كوكب اتي امجد حمزه والله العظيم اول مره اسمع بشاعر اسمه امجد حمزه من اين اتيت يا من تدعي الشعر والشعر برئ منك براءة الذئب من دم يوسف اين انت يامن اتي في غفله من الزمن اين انت من ود الرضي وابوصلاح والمساح وعتيق والبنا اين انت من حميد ومحمد طه القدال وازهري محمد علي وعاطف خيري اين انت من النخلي وهاشم صديق وصلاخ احمد ابراهيم ومحجوب شريف واين اغنياتك من اغاني قائد الاسطول والطير المهاجر والعم عبدالرحيم ولمحتك والحزن النبيل ارجو ان تبحث لك عن حاجه غير الشعر

[بابكر ابورتاج العامري]

#957795 [ماسورة]
3.25/5 (7 صوت)

03-30-2014 03:43 PM
بكتب فى الفارغة يا اللة احفظنى
للداخلة والمارقة يا اللة احفظنى
يبارى فى النسوان يا اللة احفظنى
معاهو ما فارقة يا اللة احفظنى


يتلموا يتعشوا يا اللة احفظنى
يقعدوا يتمشوا يا اللة احفظنى
واحيانآ (يترشوا) يا اللة احفظنى
نفاهة الغلمان يا اللة احفظنى
ظاهرة فى وشو يا اللة احفظنى

مصابح الآذان يا اللة احفظنى
يوزن القافية يا اللة احفظنى
ويرتب الاوزان يا اللة احفظنى
يبيعا بالجملة يا اللة احفظنى
ومرة بالميزان يا اللة احفظنى
جايب الكلاب مالك؟ يا اللة احفظنى
حارسنك الكيزان يا اللة احفظنى

[ماسورة]

ردود على ماسورة
European Union [عادل] 03-30-2014 06:35 PM
ههههههههههههههههههههه طيب ماتبيع بى الفين دولار يافارة


#957754 [سودانيه]
4.74/5 (9 صوت)

03-30-2014 03:02 PM
اول شي فنلتك دي ب10 درهم بس ماركه فرشونا وتانيا انتا ولد عاضاك نعجه وماكويس

[سودانيه]

#957747 [هجام]
4.00/5 (7 صوت)

03-30-2014 02:58 PM
دا شغال بالمثل البقول(اظهر ولو بضرطة) بالله فنيلتك دى هسع ماركة عاملة زى الشاشة من كثرة الغسيل.عامل خلقتك تقول عاضاك نعجة.
قوم يا وسخ بلاء يخمك ويخم البسمعك

[هجام]

ردود على هجام
European Union [ديموقراطية] 03-31-2014 02:13 AM
هههههههههههاي ههههههههههه

European Union [عادل] 03-30-2014 06:36 PM
ههههههههههههههههههههههههههههههههههههههههه ياخى بالغتة


#957706 [جدودنا زمان]
4.50/5 (5 صوت)

03-30-2014 02:20 PM
هذا زمن الوثبات
فدعوه يثب
فقد يعود الى رشده يوما ما

[جدودنا زمان]

#957689 [القعقاع الفي القاع]
4.00/5 (6 صوت)

03-30-2014 02:10 PM
هذا الفتى يسير على خطى السفاح عمر البشير و إنتظروا كم سنة كده و حتصدقوا. ترقبوا قريبا ديوان الفتى اللذي تخطى مرحلة شاعر و أصبح محترف: ديوان "ألحس كوعك" و يعقبه ديوان "تحت جزمتي" و بشراك يا سودان بجيل الأنقاذ و الأسلام قادم لا محالة على يد السفاح و الولد بتاع اللقاء

[القعقاع الفي القاع]

#957687 [زعيم الزهاجة]
5.00/5 (2 صوت)

03-30-2014 02:09 PM
ههههههههه والله يا جماعة ،(زعيم الزهاجة) الليلة اتفطس من الضحك
تعليقات كلها كوميدية ومضحكة ،انا شخصياً طلعت من حالة الزهج ولحدي اللحظة دي
ببكي من الضحك ،والدموع في عيوني ،وحرصت علي قراءة كل التعليقات علي المستشعر ده
مرتين وتلاتة من شدة حلاوتها وسخريتها ،ومهما اكتب ما ح احصل تعليقاتكم ،غايتو فكينا التكشيرة
وكتر خيركم والله ولا عادل امام ذاتو كرهتونا الضحك جانا وجع بطن ههههههههههاييييي

[زعيم الزهاجة]

ردود على زعيم الزهاجة
United States [sasa] 03-30-2014 04:43 PM
ايما والله يازعيم ضحكت وبكيت وضحكت ... اللى يجازيكم بالخير معشر احبتى الراكوباب وانتم قوم عهدتكم بتقولوا الحقيقة وارقدوا عافيه


#957685 [ابواحمد]
4.04/5 (6 صوت)

03-30-2014 02:06 PM
صحف فارغة عايزة تملأ الصفحات باي حاجة قال شاعر قال روح داهية تاخدك انت واللي عامل معاك اللقاء

[ابواحمد]

#957673 [عبد الكريم]
4.50/5 (4 صوت)

03-30-2014 01:58 PM
اه لو تأتين اه من عميق الموج من صلب المياه - مريم الاخرى

اسي انت لو سكروك وكلكلوك الكلام ده بجي علي بالك ؟؟ خليك من تقولو علي بالك ساي بخطر يا ........ألخ

[عبد الكريم]

#957666 [ابو ابراهيم]
4.75/5 (4 صوت)

03-30-2014 01:54 PM
إن كان هذا الجربوع يسمى نفسه شاعر فماذا نسمي المتنبي و حافظ وشوقي والعقاد والهادي آدم والعباسي و حتى روضة الحاج و.... و ...؟ وحتى الذين يكتبون الأغنية بالعامية السودانية كالتجاني حاج موسى و اسماعيل حسن و سعادة عبد الرحمن هل جميعهم نسميهم شعراء أم نخترع لهم صفة أخرى؟ لا عيب أيها المشاغب أن تتكسب من هذا الهراء الذي تكتبه طالما هناك من يشتريه ولكن العيب كل العيب أن يسموك شاعراَ ولكن يبدو أن زمن المجاعات الفكرية هذا سيرينا العجايب. قال شاعر قال؟ يعني سعادة عبد الرحمن مثلاَ ست كسرة ولا شنو ؟ اللهم أحفظنا وأحفظ أبنائنا في هذا الزمن الردئ.

[ابو ابراهيم]

#957662 [ود البطانة]
4.25/5 (8 صوت)

03-30-2014 01:51 PM
آآآآآآآآآآآآآآآآخر قلوط الإنقاذ..العينات دي ..وليعيش المشروع الهراري

[ود البطانة]

#957611 [عالم فارغة]
4.50/5 (5 صوت)

03-30-2014 01:06 PM
الجنا داباااااطل وعاضاهو نعجه والله

[عالم فارغة]

#957590 [احمد]
4.13/5 (5 صوت)

03-30-2014 12:47 PM
اسى فرقك من القاعد جمبه دى شنو فنلتك الصفرا دى اسى ماركه

[احمد]

#957575 [دفن الليل ابكراعاً برة]
4.29/5 (6 صوت)

03-30-2014 12:36 PM
يالطيف !!! ده شنو ده ؟؟؟

[دفن الليل ابكراعاً برة]

#957526 [ود الدخري]
3.00/5 (4 صوت)

03-30-2014 11:52 AM
معليش نحنا بنتبهدل
تشيرت ماركة قيمة 15 جنيه
معليش
حميد
صلاح حاج سعيد
ازهري محمد علي
وبقية العقد
فهذا زمان
الهوانة والاستهانة وااااا

[ود الدخري]

#957519 [ماكلموك]
4.50/5 (5 صوت)

03-30-2014 11:45 AM
شر البلية مايضحك وهزا زمانك يامهازل فامرحي الله يرحنا برحمتة وثبتنا يالله
دا شنو دا شنو دا شوف بالله دا بالله شكل انسان ولبس فنيلة صفيرة ولاهاطة ومعلق سلسل زي الكلب في رقبتك انت الكلب البوليسي يحرسني انت زاتك ماكلب اغاني هابط وفكر هابط وبنطلونك زاتو هابط ياجماعة الخير هوي ياناس الراكوبة اشكال زي دي لو سمحتو ماداير اشوفها لانو ان عند ضغط وسكري شوف جماعتو بالله احمد الصادق وانصاف وندي القلعة الطيور علي اشكالها تقع
انا زي بنك السودان هو السودان بالله فيهو بنوك مالحرامية اكلهن كلهم
امشي العب ياولد وبيتنا زي اتحاد الفناين وانت الحكاية دي كمان مبسوط منها ديوث
الله يكفينا شركم ويدينا خيركم كان عندكم خير
فناطيط وكمان عامل فيها الولد يعني لزوم رد حامض امشي شوفلك ........

[ماكلموك]

#957517 [الحقيقة المرة]
2.25/5 (5 صوت)

03-30-2014 11:45 AM
والفانيلة الضيقة دي ياتو ماركة يا متكبر علي الفاضي ... وجمهورك الذي تقول انه شرس وينو ؟ أخشي أن يكون جمهورك الشرس هذا من رواد مقاهي الشيشة ومدمني المخدرات لان أغنياتك الهابطة لا يسمعها انسان في كامل وعيه وكل المتداخلين ما منهم ولا واحد ذكرك بخير مما يعني أنك لا شيء ..... ومسئولي القنوات التي تدفع لك هذه المبالغ الضخمة مفروض يحاسبوا علي اهدار اموال القناة علي شخص مثلك ..
أعوذ بالله منك ومن أمثالك ومن كل من يتشجع لك ...داهية تلمك

[الحقيقة المرة]

#957516 [الرباطابية]
2.63/5 (6 صوت)

03-30-2014 11:44 AM
غرور أم تكبر أم جهل .سبحان الله وفى النهاية يعنى شنو؟

[الرباطابية]

#957506 [ليفربووووولي]
3.00/5 (2 صوت)

03-30-2014 11:36 AM
*يردد البعض أن سبب قلة ظهورك على الفضائيات يعود لأنك تخجل من تقديم منتوجك من الأغنيات (الهابطة).. هل هذا صحيح؟
بالعكس.. أنا الذي أرفض الاستضافات، وبصراحة لأنني كذلك أطلب أرقاماً خرافية من أجل الاستضافة. أنا ظهرت مرة على قناة النيل الأزرق الفضائية لمدة (6) دقائق فقط، مقابل مبلغ خرافي (اعفوني من ذكره هنا ؟؟

الي المتوهم والمريض أمجد حمزة :

الحمد لله انا شاهدت ال (6) دقائق بتاعتك دي وكانت كلام كلو خارم ليس له اي معني او مدلوول كلامك كلو كان دفاع علي اغنياتك البتقدمه للفنانين دي انها " غير هابطة وانك انت صانع للشعر الغنائي " معللاً ومتحدياً في ذلك اللقاء القصير وبالفم المليان بتقوول " أتحدي اي شخص سوداني في تلفونو مافي اغنية لي امجد حمزة " ياهو دا اسلووبك يامتوهم يا جاهل !!

اذكر في ذلك اللقاء جيدا كانو مستضيفين داخل الاستوديو كل من " الكاتب مؤمن الغالي والكاتبة أم وضاح والشاعر الجميل التجاني حاج موسي والشاب طه سليمان "

[ليفربووووولي]

#957482 [Mohamed]
3.75/5 (4 صوت)

03-30-2014 11:16 AM
عزيزى الشاعر !!!! انا اعمل محاسب قانونى وادرس الاقتصاد والمحاسبة - لكن البنك البنك المركزى والدولى اصلو مالاقانى - ده وين ؟

[Mohamed]

#957474 [سوداني حزين]
2.88/5 (6 صوت)

03-30-2014 11:11 AM
هذا الفتي يتبع نظرية خالف تزكر لكي يشتهر علية أن يقول مثل هذا الكلام حتي يكثر الجدل حولة والدليل كمية الردود الغاضبة وهذا مايسعي أليه هو وأمثالة لذلك تجاهل مثل هذة الحوارات هو طريق الرد المناسب

[سوداني حزين]

#957464 [nagi]
4.00/5 (5 صوت)

03-30-2014 11:06 AM
الحاجة الكويسة انك بقيت شاعر في دولة اسمها السودان وعملت ليك فنانين بيتغنوا باشعارك الهايفة والفارغة والله لو كنت في دولة غير السودان كان شنقوك في اقرب شجرة قوم لف ياخي شاعر شنو انت يا هابط

[nagi]

#957454 [ناصر]
4.00/5 (5 صوت)

03-30-2014 11:00 AM
ما في زول يقدر يقول إنو عدو لي.. أنا أمتلك جمهوراً شرساً، وأي شاعر أو فنان يقرب منّي بسوء يعرض نفسو للخطر!

كسرة :-
ههههههههههههههه هههههههههههه كعكعكعكع كرعرعرعرلاع - قوم شوف ليك عود وأجلس فوقو قال ايه قال شاااااااااااعر شكلك شاعر بالدونية - والله مهازل هاااااااكم دي ياأمجد حمزة

[ناصر]

#957451 [المستعرب الخلوى]
3.75/5 (3 صوت)

03-30-2014 10:59 AM
يثا جماعة الخير .. ما فيكم زول واااااااااااحد يتبرع يقول كلمة كويسه فى حق الشاعر الكبير أسطورة زمانه دا ؟؟
لاكين عشنا وشفنا وسمعنا ..يا امجد ..

[المستعرب الخلوى]

#957426 [omer salih]
4.25/5 (6 صوت)

03-30-2014 10:42 AM
انا احب عمرو موسي واكره اسرائيل
واللي يحب شعرك يا باطل يكون من هذه الشرذمه
انت وهم في العقل والفهم والتفكير سواء والفرق بينكما
ان شعرك اكثر هبوطا... وتردي .. وانا اقفل التلفاز من اولادي
حتي لا يعتادوا علي سماعه .. انت تهبط وتدمر من ثروة السودان الثقافيه
استغفر الله

[omer salih]

#957409 [ود الفاشر]
4.75/5 (4 صوت)

03-30-2014 10:29 AM
قلنا جاهل و سخيف ما مشكله، و لكن قليل ادب برضو كدا بقت مشكله ، و بيتكم دا البقا اتحاد الفنانين فيهو محل شيشه و لا مافي؟ و ثم تانيا يا جاهل ابو الفين دولار للاغنية المفروض بعد انخفاض قيمه الجنيه السوداني تنقص تمن اغنيتك بالدولار مش تزيد،

[ود الفاشر]

#957403 [بدر الدين]
4.50/5 (3 صوت)

03-30-2014 10:25 AM
ده كله من الكيزان. الله لا بارك فيكم

[بدر الدين]

#957385 [ABO OBAYDA]
4.25/5 (3 صوت)

03-30-2014 10:12 AM
هذا نتاج المشروع الحضاري ، مشروع الترابي و علي عثمان ، المشروع الذي طمر اغنيات (على عفافك دوم ز يدني في نيراني) ليفرخ لنا شعراء مثل هذا المسخ ليخرج لنا ب (حرامي القلوب تلب).

[ABO OBAYDA]

#957375 [ابواحمد بشير]
4.50/5 (4 صوت)

03-30-2014 10:07 AM
ليت ( امير الحسن وبلابل الدوح و عويناتك وكلمة و لا وحبك و اخاف و ضاحة ) يعود يوما ليرى مافعل بي ( حرامى القلوب وغيرها )

[ابواحمد بشير]

#957367 [سودانى اصيل]
3.50/5 (3 صوت)

03-30-2014 09:59 AM
ارجو ان تقرأ هذا يا جاهل وهذا نقطة من فيض شعراء بلادى العمالقة
شكلت حروفه الرنانة وكلماته الصادقة المعبرة أجمل الأغنيات في بلادنا، وعلى غزارة إنتاجه الشعري، دفع صلاح حاج سعيد بسهمه الإبداعي منصلتاً ليصيب بدقة مكانة سامقة بين شعراء الغناء الكبار، ويجلس مسترخياً في مقاعد العظام. وإذ ظلت كلماته مثل سهام الحب تخترقك لتحييك، وتثقبك لتعيش ملتئماً، كلمات من معين العشق، تنسرب إلى ثنايا الألحان وتشرب من مظان ينابيعها الصافيات - تغرف بيديها – منها زلالاً.

مطربون كبار، نهلوا من نبعه العذب، تزاحموا حوله وتنكابوا وكأنهم يرددون "والمنهل العذب كثير الزحام"، فأعادوا إنتاج ما نهلوا أغنيات أكثر عذوبة، أغنيات كاملة العناصر، ونثروهاعلى الناس فاستقرت في الأفئدة واحتلتها إلى الأبد.

(1)

وصلاح الدين حاج سعيد البدوي، ولد في الخرطوم، وتلقى تعليمه في المدرسة الأولية، ومن ثم (الخرطوم شرق)، والخرطوم الأهلية الوسطى، ثم جمال عبد الناصر المصرية الثانوية، إلى أن تخرج في جامعة القاهرة فرع الخرطوم "النيلين" كلية الحقوق 1974م. ثم التحق بالعمل في عددٍ من المؤسسات القانونية من ضمنها مؤسسة التأمينات الاجتماعية، وتدرج حتى صار "رئيسا" لها، قبل أن يتقاعد عام 1990م.

(2)

بدأ تجربته الشعرية في عام 1960م، في عمل مع الفنان محمد ميرغني بعنوان (بعد وحيد)، تقول بعض مقاطعه (كفايه الوحدة ما بقدر طريقك تاني أمشيهو/ هو أصلو العمر كم مرة عشان نهدر أمانيهو)، ثم توالت الثنائية بينهما، فقدم صلاح لمحمد ميرغني (ما قلنا ليك) و(لو كان عصيت أمرنا)، ثم اتجه ناحية (البلابل) بـ (نوّر بيتنا) وصوب عثمان مصطفى بـ(صدقني) و(نحن البينا ما ساهل).

وظهر نبوغه الشعري بسطوع عندما شكل ثنائية رائعة مع الراحل مصطفى سيد أحمد فكانت (الشجن الأليم، المسافة، الحزن النبيل، قمر الزمان، كان نفسي اقول لك من زمان، عدى فات، قلت ليها، طوريتك، عزة هوانا، الزمن الخرافي، عينيك مدن) وغيرهم من الروائع، ودفع بعدد من القصائد الجميلة للفنان الهادي الجبل مثل (عفو الخاطر) ولمحمد الأمين (نرجسة)، و(يا جميل) لحسين شندي، ولدى صلاح سعيد أغان جديدة لأحمد بركات وشموس وعصام محمد نور.

(3)

يعتقد كثير من النقاد أن صلاح كتب أجمل أغنية سودانية في الثمانينيات، وهي أغنية (المسافة) لمصطفى سيد أحمد والتي يقول مطلعها: (لسه بياناتنا المسافة والعيون/ واللهفة والخوف والسكوت/ ورنة الحزن البخافا/ تعدي بالفرحة وتفوت

وأمشي بالحسرة وأموت). إذ مثلت كلماته، ولا تزال، ملاذاً للعاشقين، منحتهم أغنيات الوجد والمحبة الدفاقة وحقنتهم بآمال المحبين المنتظره، اجتمع حول شعره الجميع من مختلف الجهات السياسية والفكرية، رموز اليمين واليسار وما بينهما، لأنه شاعر يعبر بك من صغائر السياسة إلى (كبائر) الإنسانية

[سودانى اصيل]

ردود على سودانى اصيل
European Union [عادل] 03-30-2014 06:44 PM
نور بيتنا دى بس لو فلقو بيها الشافع ده ما بتعورو؟؟

United States [الخير عز] 03-30-2014 04:53 PM
تحياتى واشواقى للرائع صلاح حاج سعيد وهذا هو الفرق مابين الثريا والثرى وتحياتى للصديق محمد حاج سعيد (محمد سميره)

European Union [ودالباشا] 03-30-2014 03:48 PM
يا سودانى يا اصيل بالغت عديل

الكلام ده السجمان ده ما بفهوا ليك خالص

انت ما شايف الفلنة الابسا دى وسلسل فى الرقبة

ولا ما سمعت شعره جناى البريدو والله انا كنت قايل الشاعرة مرا

ياسودانى يكفيك بس هذا اللقاء لتدرك نفسية وفهم هذا الادمى

انه غعلا شاعر رمز


#957361 [عبدو]
3.88/5 (4 صوت)

03-30-2014 09:55 AM
فقعت مرارتا .. الله يفقع مرارتك
شوف الخليقة و ...
استغفر الله العظيم

[عبدو]

#957351 [عادل]
4.00/5 (4 صوت)

03-30-2014 09:48 AM
بالله الحوار ده جادى ولا هزل

واجابت الزول ده جد جد ولا حوار فكاهى


قوم لف ياخى قال حارس شخصى قال

هذا زمانك يا مهازل

حرامى يتلب ليك ويخنقك ويكسر رقبتك عامل زى الصارقيل كده

[عادل]

#957346 [ميسو]
2.50/5 (3 صوت)

03-30-2014 09:45 AM
عليكم الله هسي جناي البريدو وحرامي القلوب تلب ...دا شعر ... الله يعلقك من شعرك بين السماء والأرض ...الصحفي المشا عمل لقاء مع الدحش دا زاتو نزل من مصستواهو .... شاعر قال ...

[ميسو]

#957342 [خالد]
2.25/5 (3 صوت)

03-30-2014 09:44 AM
كل إنسان بتكلم عني بـ(ينفخ في قربة مقدودة)، ويا ريت بعد يخلص من القربة دي يجيبها لي عشان أعملها دلوكة لي إنصاف مدني!!.

بالله شوف الدلوكة - اقصد الزول ده فعلا هابط واشكالك ديل العاملين زي النسوان يخجلون من وسائل الاعلام لانك مفلس او بالاحرى فاقد تربوي قال شاعر قال ؟

[خالد]

ردود على خالد
European Union [موجوع وطن] 03-30-2014 04:56 PM
لا يا حيرتونا كدا أديتو فيمة لأن صناع و صانعات الدلاليك محترفين وفنانين وعندهم قيمة و أدب و إخلاق و ناس محترمين ما ذي الأهبل المخلوع مستجد النعمة دا بتكلم تقول تاجر بنقو.. دي ياتو مصيبة النحن فيها دي؟؟ ما كنا متخيلين الكيزان يوصلونا لغاية كدا.. عسي ربنا يسألك لما تقول للذي دا شاعر و صانع شنو ما تعرف.. تعنذر كيف للحلنقي ولسحر الشعر حينما يعربد في القاش و ملحمد المكي ولبعض الرهيق أنا والبرتقالة أنت وللدسوقي و للناس في وطني تعجبك بساطتهم لكن معدنهم أغلي من الذهب ولجماع ولأنت السماء بدت لنا وإستعصمت بالبعد عناولغيرهم و غيرهم من الأعلام الشامخة و الددر النادرة كيف نعتذر لهؤلاءو لأدبهم الجم و إخلاق هذا الصبي الذي رضع وتتلمذ علي بذاءات حرامية السطو اليلي يتطاول بكل سخف علي أدبنا و قيمنا وتراثنا.

United States [حيرتونا] 03-30-2014 11:14 AM
وانا كمان اتعجبت من جملة الدلوكة دي ... دا غير انو شاعر صانع دلاليك !!!!!!!!


#957315 [murmoly]
4.50/5 (3 صوت)

03-30-2014 09:20 AM
ده واحد قليل أدب و عدمان رباية

[murmoly]

#957305 [فاربن جبل]
4.50/5 (5 صوت)

03-30-2014 09:06 AM
لم اتوقع ان اقرأ مثل هذا الكلام في ظل الراكوبة . اتريدون ان تنحدروا لمستوى جريدة ( الضار)

[فاربن جبل]

#957295 [أبو الكلس]
4.66/5 (7 صوت)

03-30-2014 08:50 AM
لقاء صحفي تاريخي ،،، أتمنى أن يتم تدريسه لطلبة القانون كأحدى الجرائم الصحفية و من قبلها الأخلاقية التي تدمر قيم وأخلاقيات الأجيال الناشئة .
إذا كان متنبئ زمانه هذا يأخذ مبلغ خرافي مقابل ظهوره في قناة النيل الأزرق لمدة ستة دقائق -حسب قوله- فكم أخذ مقابل هذه المقابلة ؟؟
مجرد سؤال

[أبو الكلس]

#957291 [كتاحة امريكا]
3.50/5 (6 صوت)

03-30-2014 08:43 AM
وهـــــم

[كتاحة امريكا]

#957280 [المنجلك]
3.82/5 (7 صوت)

03-30-2014 08:14 AM
ياعزيزى انت لست صانع بل صنيعة التردى الغير مسبوق فى كل اوجه الحياة.

[المنجلك]

#957272 [وروار]
4.32/5 (5 صوت)

03-30-2014 07:45 AM
اعتقد كل جيل ليهو زمنوه فلا تأخذوا الرجال

[وروار]

ردود على وروار
United States [sasa] 03-30-2014 04:45 PM
وهل لزمان الالغاز جيل ياهذا!!!


#957260 [esan salih]
3.88/5 (5 صوت)

03-30-2014 06:50 AM
يا تفاؤل ما عندك شغلة و إختيارك لإجراء حوار صحفى مع هذا المخلوق يضع مهنتك كصحفية فى شكك و تساؤل.

[esan salih]

#957252 [ودعمر]
4.29/5 (6 صوت)

03-30-2014 06:00 AM
كلامك المسميهو شعر ده عادي ممكن اي زول يكتبو لكن المشكلة انو بخجل من انو يقول ده شعر ويديهو كمان لزول يغنيهو عشان كده انته براك الشغال في الساحة. الله يهديك ويهدينا

[ودعمر]

#957243 [خضر حبيب الله]
3.00/5 (1 صوت)

03-30-2014 04:40 AM
والله احسن الواحد ما يعلق على ابى نواس زمانه.

[خضر حبيب الله]

#957238 [Asaad Idris]
4.25/5 (3 صوت)

03-30-2014 04:17 AM
البلد في شنو وده يقول انا مع البنك المركزي ومابلبس الا ماركه والله حيرتونا يالسوادنه

[Asaad Idris]

#957227 [sudani]
4.50/5 (3 صوت)

03-30-2014 03:41 AM
الجنرال حسن فضل المولي وطاقم قناة النيل الازرق قناتنا المحببة هل نصدق ما قاله هذا المعتوه بانكم استضفتوا سعادته ل6دقائق وبمبلغ خرافي والله مهزلة ابقي بشجعوا الهابط نامل ان لا يسمح لاي فنان ان يردد اي اغنية غير مجازة في اي جهز اعلامي حتي ولو خاص للارتقاء بالذوق العام ودحر الكلمة التي جعلت امثال هؤلاء يتبجحون

[sudani]

ردود على sudani
[جدودنا زمان] 03-30-2014 02:11 PM
وهو قناة النيل الازرق مترزقة بى شنو غير بى الاشكال دي
قناة تشبهم


#957222 [sudani]
4.25/5 (6 صوت)

03-30-2014 03:28 AM
تعرفوا نوع ده نسي نفسو وتطاول ليه لانو قنوات تلفزيونية كثيرة واذاعات سودانيه بتجيب اغني الوهم ده كل لحظة حتي يتحسن الزوق العام يجب محاربة امثالو والبغنوا ليه سبحان الله وين دور الوزارة

[sudani]

ردود على sudani
European Union [أبو الكلس] 03-30-2014 08:34 AM
اصحى يا سوداني ،،الوزارة هي العايزة كدة


#957218 [Naser]
4.38/5 (5 صوت)

03-30-2014 03:08 AM
والله يا ناس الراكوبة بالغتو عييييل
دا ما بلوموه لكن اللوم عليكم بمثل هذه الهيافه

[Naser]

#957164 [saeed saeed]
2.50/5 (6 صوت)

03-30-2014 01:09 AM
ولد ده

[saeed saeed]

#957159 [fm3]
4.25/5 (6 صوت)

03-30-2014 12:53 AM
هذه الوجوه هى من دمر ما بقى من اخلاق هذا الشعب وصار عبد لها ولمجونها
واقعدته عن ثورته
شعب جعان لكنوا جبااااااااااااااان

[fm3]

ردود على fm3
European Union [أبوعلي] 03-30-2014 07:57 AM
تقييمك للأِشخاص من حقّك (وشخصي أيضا لا يحتمل التصرفات الرديئة لبعضهم )
وصفك للشعب أنّه(عبد للمجون) و(مقعد عن ثورته) مافي داعي ليها
شعب جيعان ، لم يجلبه الشعب لنفسه ، والجوع ليس سبّة أوعيب
أمّاقولك: شعب جبان، ما كنت أتوقّعها منك وليس من حقّك الحكم على الشعب
يـا fm3 مؤكّد أنك لا تعني ما كتبته وليس من أخلاقك وتربيتك
فقط تمالك نفسك ولا تنفعل ، تريّث ، كلّنا مأزومون وعايزين ننفجر من سوء الحال
فقط إنفعل وألعن وحقّر الكيزان ومن يسيرون على نهجهم إلى مالا نهاية!!



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


صفحة 1 من 212>
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة