الأخبار
أخبار إقليمية
الراعي السوداني الطيب يوسف: أنا زول عادي ومسكين فما تدّوني أكبر من حجمي
الراعي السوداني الطيب يوسف: أنا زول عادي ومسكين فما تدّوني أكبر من حجمي
الراعي السوداني الطيب يوسف: أنا زول عادي ومسكين فما تدّوني أكبر من حجمي


03-29-2014 11:54 PM

جدة - عزمي عبد الرازق

عتبة أولى:

بلغ صيته شأواً بعيداً، فصار معروفاً للناس، كل الناس.. على نحو مدبر ساقته الأقدار إلى ديار المملكة العربية السعودية قبل أشهر قليلة، ليحصد ثمار أمانته (كنوز محبة). إنّه الرجل الذي أبهر السعوديين وقدم صورة زاهية لوطنه بددت مداخن السياسة والحرائق. (الطيب يوسف)، أو الراعي السوداني كما اشتهر في الميديا، قصته أقرب للخيال؛ تتناقلها الأسافير بدهشة، رجل مسكين، لم يكن يملك حتى جهاز موبايل! شبّ عن الطوق نقياً كريماً في مضارب قبيلة الكواهلة بشرق سنار. اختبرته الأيادي الخفيّة، فتصرف بشكل تلقائي، دونما تصنّع. بعدها ذهب إلى أغنامه وبراءة الأطفال في عينيه، وهو يمنّي النفس أن ينستر مع كفيله ويحصل على راتبه الشهري، محض ريالات محدودة. ينام الراعي السوداني النبيل ويصحو فيكتشف أنّه يرقد على ثروة مهولة، تنزلت كما ليلة القدر.. في هذه الدردشة الخفيفة التقينا بـ(الرجل) (الطيب) و(الأمين) في مدينة (جدة) وتحدثنا معه عن تفاصيل الواقعة الكبيرة، كان يتحدث ببساطة ولا يخفي في أغوار نفسه حتّى المحبة للناس ولمن أعانوه، والشكر لله رب العالمين، من قبل ومن بعد.. طرحنا عليه الكثير من الأسئلة وأجاب بصراحة، من هو؟ وكيف جاء إلى المملكة؟ وبماذا كان يحلم؟ وماذا سيفعل بهذه الثروة؟ وكيف تسير الأمور الآن بعيداً عن الأضواء؟ إلى تفاصيل الونسة:

* خلّينا نتعرّف عليك عن قرب فقد دار حولك لغط كثير.. من أنت؟

- أنا الطيب يوسف الزين أحمد، مواطن سوداني عادي، من مواليد (إيد الوليد) شرق سنار.

* إنت كاهلي حسب ما علمت؟

- نعم أنا كاهلي أماً عن أب، وقد امتهنت الرعي منذ حضوري للمملكة العربية السعودية..

* هل تعلم أنك أصبحت نجماً مشهوراً؟

- أنا زول عاااادي ومسكين فما تدوني أكبر من حجمي..

* متى حضرت للمملكة؟

- قبل ستة أشهر من تصوير مقطع الفيديو..

* معقول ستة شهور مما جيت والأمور ظبطت؟

- (ضحك وأجاب).. لا أنا أصلاً جيت السعودية شهر (3) في العام (2011) ورجعت السودان عدّيت ستة شهور، وجيت راجع الآن لي أربعة شهور في السعودية..

* كيف وصلت للمملكة؟

- بعقد عمل أرسله لي شقيقي، وجيت على طول إلى ضواحي (أملج) التي جرت فيها الواقعة..

* كنت شغال براتب كم؟

- خليها مستورة..

* ربنا يبارك ويزيد ولكن للمعرفة والعبرة؟

- على قدر الحال.

* ما هى قصة الفيديو بالتفاصيل الكاملة؟

- بالتبادي أنا كنت فازع بالبهائم فوق الخلاء، كان الطقس حار وسمايم الصحراء تلفح، كنت موجود بالقرب من المزرعة التي أعمل فيها ولا أعود إلا عند المغرب، ومرّ بي شخصٌ وطلب مني شراء إحدى الأغنام ورفضت لأنها ملك لكفيلي وليست لي، المهم السعوديين الموجودين في السيارة أشروا لي جيتهم، قالوا لي دايرين لينا ذبيحة للبيع، قلت ليهم ما بقدر دي أمانة، أصروا، قلت ليهم ما عندي حق التصرف والبيع، حاولوا يغروني بالمال فرفضت خوفاً من غضب الله، ولأن البهائم الفي يدي أمانة، في النهاية دورا عربيتهم وانا رجعت للبهائم نسيت الموضوع..

* في كلام أن هذا المقطع مفبرك وغير حقيقي؟

- أبدا أبدا الكلام دا صحيح مائة في المائة وهذا ما دار من غير لولوة..

* لكن إنت شفتهم وهم بصوروا فيك؟

- والله العظيم أنا ما شفت حاجة ولا لاحظت أنهم بصوروني، وبعدما انتهت الحادثة رجعت مكان شغلي عادي..

* ما خطر ببالك أو حلمت بأن حياتك ممكن تتغير على هذا النحو؟

- كنت في كل الصلوات أسأل ربي أن يجنبني فتنة المال، وأن يرزقني بالحلال وكنت سعيد ومبسوط بوضعي السابق..

* ما هو الدعاء الذي كنت تدعوه في صلاتك بالتحديد؟

- كنت أدعو في سري دائما حتى لحظة قدوم الشخص الذي قام بتصويري "يا رب تغنيني بحلالك عن حرامك، وأديني المال الحلال، وأعطيني منه، يا رب جنبني الحرام"

* يعني كنت متفائل؟

- كنت متفائل جداً.

* والآن تغير كل شيء؟

- الحمد لله، وأنا ما بين مصدق ومكذب، دي نتيجة العمل الدغري..

* بصراحة كم بلغ حجم ثروتك؟

- (يصمت قليلاً ويجيب).. بالجد ما عارف.

* بالتقدير كده ما وصلت المليار؟

- بتكون وصلته، وفي ناس تبرعوا لي ورفضوا ذكر أسمائهم (كم فاعل خير كده)..

* طيب أين هى الأموال التي حصلت عليها؟

- طلبت من أحد أقربائي أن يفتح لي حسابا في أحد البنوك وقد انهالت علي الأموال من جهات مختلفة، حتى السودانيين كانوا بيكرموني بطريقتهم، أنا شاكر لي وقفتهم، ووقفة السفارة ومبسوط منهم..

* طيّب يا الطيب.. ما الذي حدث بعد أن تم تصوير الفيديو لك؟

- الأمر كان عادي ومرت خمسة أيام ونسيت الموضوع..

* ما شفت مقطع الفيديو بعد انتشاره؟

- لا أنا كنت مقطوع تماما من العالم وما عندي موبايل أصلا ولا في شبكة..

* ليه ما عندك موبايل؟

- أنا زول راعي ساي، الموبايل أسويبو شنو؟

* ثم ماذا؟

- بعد خمسة أيام على ما أذكر فُوجئت بسيارة وفيها أشخاص نزلوا منها ومعهم كاميرات للتصوير، شعرت بخوف وكنت أسأل نفسي: ما الذي فعلته؟، تقدّموا نحوي وأخبروني بما كان يجري في التلفزيون والصحافة والإنترنت عنّي وكيف انتشر مقطع الفيديو وأعجب الناس، والحقيقة أنا ما كنت عارف حاجة، وأخبروني كذلك عن الهدايا والمكافآت التي رصدت لي.

* هل صدقتهم، ألم تشعر بأنهم ربما يمزحون؟

- في الأول كنت خايف ناس التلفزيون السعودي يكونوا الكاميرا الخفية، لكن تاني لمن وروني مقطع الفيديو وردود الأفعال صدقت، المؤمن صديق..

* ما هي الجهة التي زارتك في الأول عندما انتشر الفيديو؟

- جوني ناس مجلة (تبوك) وقالوا لي مقطع الفيديو الإتصور ليك انتشر وفي جائزة ليك بعشرين ألف ريال مكافأة نظير أمانتك، ومن اليوم داك انهالت علي الزيارات، من جدة والرياض، واتصلوا بي ناس السفارة وكرموني والحكومة اتبرعت لي بمئتي ألف ريال..

* وبعدين؟

- قدمنا للرياض وقمنا بزيارة السفارة السودانية وكان في استقبالي السفير السوداني، وموظفو السفارة وعدد من أبناء بلدي من الجالية السودانية في السعودية، الذين أكرموني ورحبوا بي، وكرموني، وبعدها قمت بزيارة للشيخ إبراهيم الدويّش ومؤسسة الشيخ حمد الحصيني، وأتقدم لهما بالشكر.

* تقريبا دا نفس الشال الكنت لابسو؟

- بالحيل.. لكن الآن مغسل ومكوي..

* ما شفت الشخص الذي ظهر في قناة الشروق باعتباره أنت؟

- لا، وذلك الشخص لا أعرفه، فقط كلموني بيه وناس القناة اتصلوا بي واعتذروا فيما بعد..

* ما هي الكلمة التي تريد أن تقولها بهذا الخصوص؟

- ما قمت به هو طبعي الذي تربيت عليه، ولم أكن أرجو من ورائه مالاً ولا شهرة..

- * ماذا تريد أن تعمل بهذه الأموال؟

- حتى الآن لم أتخذ قرارا بما سيفعله بالأموال التي حصلت عليها، والبريدو ربنا كله ببقى، لكنني سوف دعم أعمال الخير.

* والمساكين؟

- لن أنسى المساكين، أنا واحد منهم.

* فيما تفكر الآن؟

- عايز بأي طريقة أتحل من موضوع الغربة دا، عايز أرجع بلدي وأحتفل مع أهلي بما نلته..

* وما الذي يمنعك؟

- ما بيدي، أنا طلبت إجازة من كفيلي سليمان الفايدي عشان أسافر السودان لكنه لم يبت في الأمر، ولا زلت أنتظر ذلك وربما ألتقي به اليوم أو الأيام القادمة لكنني ذهبت وبحثت عنه، وبحوزته الجواز والأوراق..

* هل ستعود لمزاولة مهنة الرعي؟

- وما الذي يمنع ذلك، فهي مهنة شريفة وقد عمل بها بعض الأنبياء، ولكن في النهاية البسويهو ربنا كله سمح، لكن مؤكد حأسعى الماشية في قريتي (إيد الوليد ) شرق سنار..

* ما الذي ستفعله بالأموال؟

- ما عندي مشروع في رأسي وما فكرت أعمل حاجة بالقروش والبريدو الله كله خير..

* لو طلب منك أن تشغل أي موقع في بلدك هل ستوافق؟

- كيف يعني؟

* لو عينوك مسؤولا بحق الأمانة؟

- طبعا طبعاً أنا جاهز..

* حتى ولو وزير مالية؟

- بس أنا أمي ما بعرف القراية ولا الكتابة، لكنني سوف أوافق على أي حاجة يريدها ربنا..

* كيف يتعامل معك الناس الآن في السعودية؟

- بحفاوة شديدة أصبحوا يعاملوني والسودانيين بتقدير كبير ويلتقطون معهم الصور في الطرقات كما أن أصحاب محلات البيع يرفضون أخذ أموال منهم مقابل الشراء كلما أدخل إلى البقالة لشراء احتياجات امتنعوا عن أخذ ثمنها، ويحلفوا ما يأخدوا مني ولا (هللة)..

* هل ثمة وصية؟

- أتمنى ناس السفارة يتدخلوا ويساعدوني في تسريع إجراءات الرجعة للبلد..

* يعني انت الآن عالق؟

- عالق كيف؟

* يعني عندك مشكلة مع الكفيل؟

- زي ما قلت ليك، ما بقدر أرجع السودان بدون موافقة الكفيل..

* بماذا توصي السودانيين الذين يعملون في الخارج؟

- أوصيهم دائما بالصدق والأمانة، وهم دائما بيشرفوا الزول، السودانيين في أي بلد سيرتهم سمحة وسمعتهم فوق..


اليوم التالي


تعليقات 14 | إهداء 0 | زيارات 6648

التعليقات
#958164 [المشروع]
5.00/5 (1 صوت)

03-30-2014 11:59 PM
الطيب الله يرزقوا والله سبحانه وتعالى اداه على قدر نيته ونحن ما عارفين الخير وين؟ الله سبحانه وتعالى عندما يعطي انسان قروش يكون اعطاه عطية من عنده
وعندما يحرم انسان قروش يكون برضو اعطاه عطية من عنده
اذن
العطاء والحرمان كلها عطية من عند الله
الله سبحانه وتعالى لم يعطى الرسول صلى الله عليه وسلم قروش ولا اموال ؟ بل كان يكون صوته ضعيفا من الجوع. ولكن الله سبحانه وتعالى قال له (ولسوف يعطيك ربك فترضى واعطاه الله حتى كان راضيا دون اموال)

ما اريد ان اقول أن الناس تنظر للموضوع نظرة قروش ونظرة دنيوية فقط واسال الله سبحانه وتعالى ان ينفعه بها في الدنيا والآخرة وان لا تصرفه عن الطاعة والعمل الصالح

ولكن هناك الكثير جدا جدا من السودانيين وحبوباتنا وامهاتنا وابواتنا الكبار وجدودنا لهم قصص في الامانة والمروءة والشهامة والصدق مع النفس ومع الناس ومع الله يشيب لها الرأس والانسان لما يسمعها يقول ديل ما بشر ديل ملائكة عديل ومع ذلك عاشوا وغادروا الدنيا على الكفاف..بل اقل من الكفاف

مثل هذه القصص المفروض ينفعل بها الغير ينفعل بها السعوديين مثلا ولكن نحن لماذا انفعلنا مع هذه القصة لهذه الدرجة؟ انا متأكد 90% مننا لو جاه واحد عشان يعطيه نعجة ب200 ريال لما وافق؟ السؤال هل نحن انفعلنا لأمانة الراعي وهي امانة عادية جدا ام لإنتشارها في اليوتيوب وسط الناس وكانت بمثابة اطراء داخل نفوسنا لاننا فقدنا الثقة في انفسنا واصبحنا نبحث عن كل من يشكرنا ويقول السودانيين ابطال او امناء هل وصل بنا الحال لهذه الدرجة؟ اعتقد ليست القضية قضية امانة الراعي ؟
ملحوظة: انا لا اتحدث عن الراعي في حد ذاته ولكن عن القصة من ناحية نفسية فقط اما الطيب اسال اله ان يوفقه ويسهل طريقه ويفتح له بها وبما وجدا طريقا الى الجنة والى الفضل والصحة والعافية.

[المشروع]

#958021 [العريان]
5.00/5 (1 صوت)

03-30-2014 08:03 PM
دة لوكان اخو حسين خوجلى كان عمل ليهو تمثال لكن هم سيرة
الامانة عندهم منها حساسية ..

[العريان]

#957955 [Jalila Bakheit Alteib]
5.00/5 (1 صوت)

03-30-2014 06:21 PM
والله بقدر ما بتعكس قصة هذا الرجل المواعظ في إنه من يتقي الله يجعل له مخرجا ويرزقه من حيث لا يحتيب . إلا وأن القصة نقسها تخبر عما وصل إليه حال المسلمين في عدم الامانة والتلاعب بقيم الإسلام في حين أن دعوة الرسول صلي الله عليه وسلم الاساسية أنه أتي ليتمم مكارم الأخلاق والامانة إحدي هذه المكارم . فوالله كون أحد المسلمين يجد كل هذا التكريم والإهتمام من قبل جهات رسمية وشعبية. فهو حسرة لما وصلت إليه أخلاق المسلمين وأنا أخشي أن تكون السنوات التي حدث عنها صلي الله عليه وسلم قد أتت حيث قال صلي الله عليه وسلم (سياتى على أمتى سنوات خداعات يكذب فيها الصادق و يصدق فيها الكاذب ويؤتمن الخائن و يخون فيها الامين وينطق فيها الرويبضه) قيل (وما الرويبضه؟) قال: (الرجل التافه السفيه يتكلم فى أمر العامة). نسال الله لهذا الراعي الامين أن ينتفع بامواله جميعها وأن يحفظه الله في خلقه وماله وجميع رزقه. أن تكون قصته هذه عظة لكل مسلم بأن الله يرزق من يشاء بخير حساب .

[Jalila Bakheit Alteib]

#957660 [زعيم الزهاجة]
4.50/5 (2 صوت)

03-30-2014 01:50 PM
والله نجيض يا اللخو ما عايز تكشف
ثروتك ،أي خليك علي كده ياالطيب ما تبقي
مسيكين يلمو فيك ناس الضرائب والجمارك والمحليات
يخلو النمل يجرك ، هيا اللخو امسك ريالاتك عليك وما تتغافل.
بس ما تنسي تتصدق علي الفقراء والمساكين زي حلاتنا .اللخو لا تنسانا.

[زعيم الزهاجة]

#957645 [ركابي]
5.00/5 (2 صوت)

03-30-2014 01:37 PM
يا الطيب ربنا يزيدك من فضله والله انته مامسكين المسكين هو الماكله حرام والملبسه حرام ....ماترجع ياخي خليك شغال في المملكة جرادة في الكف خير من الف طاير ارجع بعد ما الصعاليك الحاكمننا ديل يمشوا

[ركابي]

#957594 [Professor Khalifa Yousif Hassan]
5.00/5 (1 صوت)

03-30-2014 12:50 PM
رد علي نورالدين الطفشان وانت يا اخي لماذا تستحي اوتخاف من كتابة اسمك كاملا انا بروفيسور وهذا ليس افتخارا لكنها الحقيقه ارجو لك الهدايه ورجاحة العقل

[Professor Khalifa Yousif Hassan]

ردود على Professor Khalifa Yousif Hassan
European Union [العاقل] 03-30-2014 01:33 PM
هههههههههههههههههاي وبعدين


#957492 [ابو دكة ما شمه الدلكة]
0.00/5 (0 صوت)

03-30-2014 11:21 AM
((( الكاراكاتير )))
لحدى هنا ما فى مشكلة ( المهم ما يبيع سروالو )

[ابو دكة ما شمه الدلكة]

#957443 [سامي]
1.00/5 (1 صوت)

03-30-2014 10:56 AM
حقوا يعيونك وزير مالية ونجرب لان الناس البقروأ ويكتبوا ديل مشكلتنا ذاتها ( والقلم مابيزيل بلم )

[سامي]

#957428 [bullet ant]
5.00/5 (1 صوت)

03-30-2014 10:44 AM
الله يكون فى عونك "لاقيت ناس السفارة" زى الكرمك ابليس

[bullet ant]

#957421 [Professor Khalifa Yousif Hassan]
5.00/5 (2 صوت)

03-30-2014 10:41 AM
الارزاق بيد الله مكتوبه ولو صبر المجرمون لنالوها من حيث لا يحتسبوا فالله هو الرزاق وهو المهيمن علي هذا الكون فهذا الراعي الطيب وقصته التي تفوق الخيال في زمننا هذا عظه وذكري لنا جميعا ، نسءال الله العفو والعافيه والرزق الحلال وحسن الخاتمه

[Professor Khalifa Yousif Hassan]

ردود على Professor Khalifa Yousif Hassan
European Union [حلال عقد] 03-31-2014 03:37 AM
يا بروف (تسءال) بقوا يكتبوها كدى؟

European Union [نور الدين الطفشان] 03-30-2014 11:36 AM
بالله عليك لو كتبت خليفة يوسف حسن مش اجمل بدل الفنطظة الفارغة - صدقنى كلمة بروفيسور فى السودان الان لاتعنى اى شىء - يقال ان العلامة محجوب العبيد - من اشهر علماء الفيزياء فى العالم لم يسبق اسمه ابدا بكلمة دكتور او بروفيسور حتى توفاه الله .


#957410 [زول]
5.00/5 (1 صوت)

03-30-2014 10:30 AM
ومن يتقي الله يجعل له مخرجاً

[زول]

#957383 [سوداني]
5.00/5 (1 صوت)

03-30-2014 10:11 AM
المسلسل التركي دا لسه
خلو الزول في حالو

[سوداني]

ردود على سوداني
[العاقل] 03-30-2014 11:37 AM
سبحان الله انت المضايقك شنو الراجل امين ونتيجة امانتو الناس كل داير تتعرف عليه انت الواجعك شنو


#957282 [مجهول]
5.00/5 (1 صوت)

03-30-2014 08:22 AM
موضوع كملتو ليهوا ضجه كبيره خلاص الموضوع انتهى وبعدين كلب الشعب السودانى مشعود لهو بالامانه

[مجهول]

ردود على مجهول
[العاقل] 03-30-2014 11:43 AM
تصحيح كل الشعب السودانى مشهود له بالامانه وليس كلب الشعب السودانى مشعود لهو بالامانه انتبه لكتابتك يا استاذ

[معتصم] 03-30-2014 11:02 AM
يامجهول والله انت مجهول فعلآ دى كتابه شنو دى اتمنى ان تراجع كتاباتك ةالاملاء

United States [سامي] 03-30-2014 10:59 AM
يامجهول طلعتنا كلاب ومشعودين بسرعتك دا حق الطيب ماتتكلم فى الطيب .

United States [سامي] 03-30-2014 10:57 AM
يااخوي يامجهول ايه الغلطات الاملائية دي انت فاكينك بي نبلة ؟

European Union [عتمنى] 03-30-2014 10:45 AM
انت انانى عشان بتضايق لما يمدحو غيرك راجع نفسك وبطل الغيره والحسد والانانيه


#957246 [بت البلد]
5.00/5 (4 صوت)

03-30-2014 05:03 AM
يا سلام عليك يا طيب الطيب اسم على مسمى ... لقد امتهنت مهنة الرسول الأمي الكريم صلى الله عليه وسلم فبارك الله لك فيها... وصرت قدوة لغيرك ورحمة لأهلك وللضعفاء والمساكين حفظك الله ورعاك وسدد خطاك ... آآآآآمييييييين

[بت البلد]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة