أو فانتظر
أو فانتظر


04-03-2014 08:03 AM

محجوب شريف

لا إنتو جند الله

ولا جند الوطن

بل إنتو حقاً جندهم

وبعض من ما عندهم

سندة قفاهم وغمدهم

لكنهم هم

ما ح تسكن حيّهم

ولا ح تاكل زيهم

ولا ح تلبس إنت زي

زي زيهم

واذا عطشت،

بعيد بعيد،

ما تقترب من ريهم

هل شفتهم

ملأوا الشوارع

في الصباح،

عند الظهيرة مغبرين

طالعين من الوردية

والليل انتصف؟

باين على وجوهم تعب؟

وزمن صعب؟

القفة

والدكان

ودخان الفرن

ومرتبات حال الثبات

لا تحل وظيفة ولا نبات

هل شفتهم بين كر وفر

والدنيا حر

بين صف وصف

واحد وقف

هل شفت يوما هؤلاء؟

هل تذكرهم؟

زاروكا يوم أو زرتهم

بس إلاّ في شارع ظلط

ومظللاتهم مسرعة

كلا ولن ولا بالغلط

ما شفتهم

على إيه إذن

لي مين إذن

وانت بتشوف

غرقانة كم

في الدم

مفاتيح الخزن

هم دربوك على الأذى

تقتل تدوس

تحرق

ولا يهمك

كذا ولا كذا ولا كذا

كم فر طاغية من بلد

ما خلا غير كلب الحراسة

يئن وحيداً في القفص

متلك مصيرو

العزلة والخوف والجزع

إن متَ حتى ولا عزا

حكّم ضميرك يا ولد

أمشي استحمى واعتذر

واغسل يديك

من كل ما يخليك

أمام روحك قذر

ألبس عراريق الحياة اليوماتي

واقدل في الدرب

لا يدسو منك لو غشيت

ولا إنت أقرب زول إليك

منك حذر

أو فانتظر

أو فانتظر

أو فانتظر


تعليقات 4 | إهداء 0 | زيارات 2806

التعليقات
#962727 [ناصر حدربي]
0.00/5 (0 صوت)

04-04-2014 10:01 AM
ماك الوليد العاق
لا خنت لا سراق
شاعر الشعب في ضمير الشعب ووجدانه

[ناصر حدربي]

#962056 [كاره الكيزان محب السودان]
5.00/5 (1 صوت)

04-03-2014 12:55 PM
اللهم أرحم عبدك محجوب شريف، وأسكنه فسيح جناتك مع الشهداء الصديقين وحسن أؤلئك رفيقا.

[كاره الكيزان محب السودان]

#961726 [ابولكيلك]
5.00/5 (3 صوت)

04-03-2014 08:21 AM
الله يرحمه ويغفر له ويسكنه فسيح جناته يا من ولد وشب وعاش للسودان وبالسودان دفن

الروح الطاهرة النقية
لا عمارة ولا طيارة
سودانية
بعرآقي وعمه وجلابية
روحاً مطمئنه
عادة الى ربها راضيةً مرضيه .

[ابولكيلك]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة