الأخبار
أخبار إقليمية
يا اللي بتسمع والما بتسمع
يا اللي بتسمع والما بتسمع
يا اللي بتسمع والما بتسمع


04-06-2014 08:25 AM
محجوب شريف



لازم تفتح اضانك وتسمع
صوت الشارع لمن يدوي
كل قلاع الخونة بتهوي
وكل جباه الكهنة بتركع
وشمس الحق السرقو شعاعها
بكرة بامر الشعب بتطلع
ياللي بتسمع
والما بتسمع
نحن اسودا ما بتدجن
ونحن سدودا ما بتهدن
ونحن جبلا ما بتصدع
لملم ناسك ولحمة راسك
وارفع ايدك عننا ارفع
يا اللي بتسمع
والما بتسمع
لو بي بنادقك ما بترهبنا
ولو بى خنادقك ما بترعبنا
*****
والتاريخ يا جاهل بيشهد
والايام لسع بيناتنا
وكل الحق الضايع بيرجع
يا اللي بتسمع
والما بتسمع
اسأل كل العسكر قبلك
وكل الحاول فكر متلك
الاستأسد والاتنمر
مهما استعلا ومهما استكبر
برضو في يوم الغضبة بيهلك
وبيلقى مصيرو نفس المصرع
واننا أمة عظية اصيلة
لينا خصايص ما في مثيلها
وفينا طباع بالفطرة نبيلة
والاسلام ما جانا الليلة
ولا اخلاقو علينا دخيلة
الايمان من بدري سبيلنا
والقرآن في الصدر دليلنا
انقى وارقى واسمى وارفع
يا اللي بتسمع
والما بتسمع
نحكي ليك لو كان ما بتعرف
حاجة بسيطة بس عن ماضينا
انحنا رضعنا الثورة رضاعة
وبالوطنية انحنا ربينا
التدجيل ما بنفع فينا
والتضليل ما بيمشي علينا
انحنا عبرنا السكة مشينا
وشفنا عدونا وشفنا صفينا
وما بنهاب لا سيخ لا مدفع
يا اللي بتسمع
والما بتسمع
الانقاذ ما بالدبابة
ولا احلام شايلاها سحابة
ولا اوهام عالم كضابة
ولا ارقام خاوية وخلابة
والاصلاح ما جربندية
الاصلاح ما بالزندية
الاصلاح عدل وحرية
الاصلاح موضوع وقضية
الاصلاح عزقة وطورية
نحن بنفكر بتاريخنا
يا اللي بتسمع
والما بتسمع
نحن اولاد الوطن الواحد
متسامحين من يوم ما قمنا
عشنا حبايب ولسه حبايب
ما اتخاصمنا ولا اتصادقنا
فينا مساجد بتهليلها
وفينا كنايس بي انجيلها
وفينا معابد يسرج ليلها
ربنا واحد وشعبنا واحد
وحبنا واحد ودربنا واحد
يا اللي بتسمع
والما بتسمع
دايرين نختم نحن كلامنا
ودايرين نحسن نحن ختامنا
للاحرار نديها تحية
وللثوار تعظيم وسلام
نحن الفوق الشمس مقامنا
ونحن جبين الثمسر مرامنا
ونحن وقود الحارة ونارها
ونحن منية الباغي سهامها
الا ارادة المولى ارادت
حكمت فينا وفي حكامنا
بعد ما ازهري كان هو زعيمنا
بعد المهدي الصلى امامنا
بعده الغرد الضوو جبينا
بعد الدرر الزانو زمانا
جات البقرة عشان تحكمنا
وام رخم الله مشت قدامنا
جل جلالة الملك الواحد
يأتي وينزع
ويعطي ويمنع
ويخفض ويوفع
يا اللي بتسمع
والما بتسمع
يومك قرب يا ظالمنا
وبكرة حناخد منك تارنا وما بنرجاهو حساب الآخرة
داكا حصابا من غفارنا
يمكن يصفح ويمكن يسمح
ويمكن يعدك من اشرارنا
الا انحنا حسابنا براهو
يوم الحارة بتوقد نارنا
تحصد كل الداسو حقوقنا
تحرق كل الخربو ديارنا
دايرين نعرف وين شهدانا
دايرين نعرف وين ابرارنا
والشرفا الراحو اوانطة من طلابنا ومن احرارنا
والآلاف الشردتوها من خبراتنا ومن اخيارنا
والمؤتمرات الدبلجتوها من اخوانا ومن اعمارنا
نحن عرفنا البير وغطاها
ونحن خلاص قرارنا
ونحن حنضرب كل العملا
ونحن حنصلب كل الجهلا
نحن حنغبن عصابة القتلة
ومن الباغي حناخد تارنا
وعالية ترفرف راية العزة
وغالية عزيزة حترجع دارنا
ونور الفجر القادم يسطع
يا اللي بتسمع
والما بتسمع


تعليقات 6 | إهداء 1 | زيارات 4573

التعليقات
#964897 [مقبول تيلم تيلم]
0.00/5 (0 صوت)

04-06-2014 05:53 PM
رحم الله فقيد الوطن

[مقبول تيلم تيلم]

#964772 [عادل]
0.00/5 (0 صوت)

04-06-2014 03:48 PM
لك الرحمة والمغفره ايها الراحل الرائع زعلى الدرب نمضى وعلى شعله الحريه نمشى وعلى وهج حروفكم نسير لك الرحمة يامن علمت الشعب بالكلمه معنى العزة والثبات على المبدا لم تغيرك الايام وانت حلم الغلابه والترابلهزومضيت وانت على المبدا نبراسا للقادمين فى المصادمة والمبدا

[عادل]

#964438 [هجا]
5.00/5 (1 صوت)

04-06-2014 10:45 AM
رحم الله محجوب شريف و جعل الجنة متقلبه و مثواه.

[هجا]

#964378 [ahmed]
5.00/5 (1 صوت)

04-06-2014 09:55 AM
قصيدة مليئة بالاحساس الوطني - وتعكس حال الشعب السوداني ومرارته مع هذا النظام الذي افسد حال البلد -واوهمواالشعب ببناء وطن يرضي طموحاتهم و تطبيق الشريعة ؛ولكنهم لم يستطيعوا - فطبقوا شريعة النفاق والخداع والمتاجرة باسم الدين ؛ التي ادت الي تفشي مناخ الفساد والفقر والانحلال الاخلاقي وسوء الضمير والتدين القشري .

[ahmed]

#964350 [احمد الريح]
0.00/5 (0 صوت)

04-06-2014 09:32 AM
Nice

[احمد الريح]

#964347 [ود بحرى]
0.00/5 (0 صوت)

04-06-2014 09:30 AM
الا انحنا حسابنا براهو
يوم الحارة بتوقد نارنا
تحصد كل الداسو حقوقنا
تحرق كل الخربو ديارنا
دايرين نعرف وين شهدانا
دايرين نعرف وين ابرارنا
والشرفا الراحو اوانطة من طلابنا ومن احرارنا
والآلاف الشردتوها من خبراتنا ومن اخيارنا
والمؤتمرات الدبلجتوها من اخوانا ومن اعمارنا
نحن عرفنا البير وغطاها
ونحن خلاص قرارنا
ونحن حنضرب كل العملا
ونحن حنصلب كل الجهلا
نحن حنغبن عصابة القتلة
ومن الباغي حناخد تارنا


كلام واضح ما فى عفاء الله عما سلف والله اخوى لو كوز اسلمه للثوار يقتصوا منو

[ود بحرى]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة