الأخبار
أخبار إقليمية
دولار .. ريال ..شيك سياحي .. وديعة قطرية .؟
دولار .. ريال ..شيك سياحي .. وديعة قطرية .؟
دولار .. ريال ..شيك سياحي .. وديعة قطرية .؟


04-06-2014 05:55 PM
حسن وراق

( $ ) واحد من الجماعة (إياهم ) سألوه عن رأيه في حكومة الإنقاذ ؟ قال ليهم ،حكومة الإنقاذ دي عاملة زي الكلب تجري منو يسكك ، تسكوا يقوم جاري منك . الحكومة عاملة حريفة جداً سخرت كل الإعلام (لتعلمنا) بزيارة أمير قطر للعاصمة الخرطوم . بعد انتهاء زيارة اليوم الواحد لم تصرح الحكومة بدواعي الزيارة وما أسفرت عنه وإمعانا في التضليل كان الخبر الوحيد هو حول وديعة قطرية بمليار دولار للسودان .

( $ ) لا يوجد سبب واحد يجعل الأمير القطري يترك دوحة العرب ومشغولياته الكثيرة ليتكبد (وعث) السفر إلي الخرطوم (ألما فيها كدّة) و كمان يناولنا (عطية مزين) مليار دولار وديعة يعني بالبلدي كدا الأمير القطري عندو مليار دولار محرقات روحوا قال أحسن (يجنبهم) في السودان بعد ما عرف أن الحكومة أحسن (مجنباتي) لأموال الشعب السوداني . تجنيب الوديعة أبو مليار دولار بدون فوائد والأمير السابق ( المخلوع) كان قد جنب قبل عام (زيادة الوقود ) مليار دولار أيضا بدون فوائد لمدة 4 أعوام .

( $ ) الأزمة الاقتصادية كل ما تضيق حلقاته يأتي الفرج من القطريين و بالبلدي الفصيح نسأل وين ذهبت الوديعة السابقة التي أودعها الأمير المخلوع وهي لم تكمل عامها الأول ولا أثر لها في السوق ولم تظهر في استثمارات جديدة أو قديمة وما تزال مشكلة العلاج والأدوية المنقذة للحياة في انتظار رحمة البنك المركزي الذي يمتنع عن بيع الدولار بالسعر الرسمي للمسافرين بغرض الدراسة والعلاج واحتفظ به لسفر الوفود الحكومية وبعض الجهات .

( $ ) الوديعة المصرفية القطرية لا فائدة ترجي منها للاقتصاد القومي مثل (أختها) تذهب للمضاربة في أسعار العملات لأن الحكومة يهمها فقط التأثير (الإعلامي) علي سوق النقد الأجنبي (الأسود) و عليه تبني كل توقعاتها بانخفاض سعر الدولار مقابل الجنيه دون أن تضخ كميات من دولارات الوديعة في البنوك التجارية حتى تحافظ نسبيا علي سعر الدولار في السوق الأسود وعندما تهبط الأسعار فعليا تبدأ الحكومة وعبر بعض (أجهزتها) في عملية تجفيف النقد من الأسواق لترفع أسعاره بالتأثير(فنيا) في الزيادة علي الطلب المفتعل وتبدأ الضخ بسعر السوق الأسود مجددا.

( $ ) قطر تعرف أين وكيف تستثمر مقابل عائدات مضمونة وهي تدرك أن مناخ الاستثمار في السودان لا يرج منه وأصبح طاردا والسودانيون يستثمرون خارج بلدهم . الأخبار تتناول زيارة الأمير بأنها تأتي في ظل الحصار السعودي المصري الخليجي لقطر التي أصبحت تلعب دور العميل المزدوج للإدارة الأمريكية والتنظيم العالمي للإخوان المسلمين المحاصر. المواطن السوداني (ساكّي) الحكومة كي تكشف عن المقابل الفعلي لوديعة المليار دولار و الحكومة زي الكلب جارية من السّك .

[email protected]



تعليقات 9 | إهداء 0 | زيارات 5729

التعليقات
#966211 [ابو خالد]
0.00/5 (0 صوت)

04-07-2014 10:08 PM
التحيه لك مقالك فى الصميم والقروش دى ذى القبلها لحقت امات طه فى ماليزيا

[ابو خالد]

#965802 [ودالشريف]
0.00/5 (0 صوت)

04-07-2014 01:52 PM
فهمنا كلامك الا كلمة (مخلوع) دى جبتها من وين ولا فاكر علشان بتتكلم على الدولار الناس ما ها تركز معاك؟؟؟؟؟؟؟؟؟؟؟؟؟؟؟؟؟؟؟؟؟

[ودالشريف]

#965696 [nashaby]
0.00/5 (0 صوت)

04-07-2014 12:32 PM
ياخى ملياااااااار دولار دى فى السودان تكون هسع فى خبر كان زيها وزى أى حلاوة قطن لأنو الهوة كبيرة والحلاقيم واااااسعة.
عشان كدا ماتسأل تقول عايزين يسووها فى شنوووه.

[nashaby]

#965325 [1969]
0.00/5 (0 صوت)

04-07-2014 06:43 AM
الامير السابقً((المخلوع)) من اين لك بهذه المعلومة امةهي من بنات افكارك وخيالك الخصب

[1969]

#965207 [ابن الشمال]
5.00/5 (1 صوت)

04-07-2014 12:37 AM
كلامك عين الحقيقة , حكومة تدمر عملتها الوطنية باحتكار السوق الاسود . اشاعة يرتفع تبيع , تجفبف ينخفض تشترى لكن بعد ده ما اظن فى زول داقس.

[ابن الشمال]

#965149 [بت قضيم]
5.00/5 (2 صوت)

04-06-2014 11:09 PM
قطروكم بمليار دولار يا كيزان والله رخيصين

[بت قضيم]

#965123 [دي قولة خير...!]
5.00/5 (2 صوت)

04-06-2014 10:38 PM
الأستاذ وراق....

كغيري من المواطنين.... فكرت كثيراً في مقابل هذه الزيارة.... وشوية الفكة الاندفعت دي...

أعتقد أن الزيارة برمتها.... من بنات أفكار.... الثعلب العجوز المكار....

فهناك صفقة ما.... كان على الترابي أن يوضح ما يمكن أن يساهم به.... لكي تتم الصفقة!!

لذلك أمير قطر.... ما ممكن يدي البشير .... إلا شوية الفكة دي.... زي قولة خير عندنا...!

أها المهر.... والشيلة.... واللازم منو.... بعد ضمان اتمام العقد طبعاً.... أقصد الصفقة!!!

لذلك تلاحظ.... جل التصريحات والتوضيحات التي سبقت الزيارة.... تولاها مسؤولو الشعبي..!

بالنسبة لأمير قطر.... أصلاً كان ماشي الجزائر.... ولابأس من وقفة بالسودان لدعم موقف الثعلب... مع

شوية بقشيش... لحرامية ديل... ما الترابي عارف نقطة ضعفهم!!

تحياتي

[دي قولة خير...!]

#964972 [AburishA]
5.00/5 (6 صوت)

04-06-2014 07:00 PM
لك التحية اخ وراق..مقال في الصميم...

هع هع هاااااع..حكومة الإنقاذ دي عاملة زي الكلب تجري منو يسكك ، تسكوا يقوم جاري منك..
** أبلغ تعبير/تمثيل... عشان كده قلنا أحسن نقتل (الكلب) بدل عمرنا كله يكمل في المساككة!!!

[AburishA]

#964971 [عمر]
5.00/5 (3 صوت)

04-06-2014 06:59 PM
كلام فى الصميم ياحاج وراق كل المعلن من الزيارة هو مليار دولار كتر خير الامير القطرى لكن

نحن دولار ما بنشموا منها واحلف ليك لو ادانا مية مليار دولار المواطن السودانى ما بشمها

ياخ حكومتنا دى ماسونية بالدرجة الاوالى كرتى ما بخجل منحنا القطريين الدخول بدون تاشيرة

طيب ده كويس مقابل شنو انكم تقبضو الدولارات باسم شعب السودان وتنفذوا اجنده ما لينا بيها

دعوه المواطن المسكين بسالكم مقابل شنو .

والله واحد قال لى تاشيرة برفضوها فى قطر لو قدمت لسودانى واطره يطلع جواز من دولة مالى عشان

ادوهوا الاقامة وطبعا والله ادوهوا الاقامة بالجواز المالى ورفضوا السودان واخر بجواز اثيوبى

واحد افهمنى قطر دى معانا ولا مع الماليين والاثيوبيين .

ياخ الجزيرة الاخبارية ما بتجيب خبر للسودان الا مطره وبدون تحليل عميق منتهى المهنيه

تانى حاجة الجزيرة الرياضيه وهى من اموال الامير القطرى الزارنا ده شخصيا ومديرها الخليفى

ده مدير اعمال الامير ومليانة عرب من كل الجنسيات واكثر شخصيه محاربة فيها السودانيين

عنصرية عدييل كده ضد السودانيين وبعد ده اليشير رئيس وطنى للسودانيين .

ياجماعة اعملوا ثورة احسن ليكم حكومتكم ما شغالة بيكم .

[عمر]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة