الأخبار
أخبار إقليمية
"البصل" يهدد مزارعي كسلا بالإعسار



04-08-2014 03:17 PM

حمّل مزارعو ولاية كسلا، الحكومة مسؤولية الإعسار الذي يواجهونه بسبب الانحدار المفاجئ لمؤشر أسعار محصول البصل، مؤكدين أن المحصول الذي ارتفع إنتاجه يواجه كساداً، الأمر الذي جعل شبح الإعسار يتربّص بهم بعد فشلهم في تسويق المحصول.


وطالب نائب رئيس اتحاد منتجي الخضر والفاكهة بالولاية علي زين العابدين في تصريحات للشروق، الحكومة بالبحث عن حلول للأزمة التي يواجهونها بسبب كساد البصل في أكبر الولايات إنتاجاً له.


وقال زين العابدين، إن على البنوك مراعاة ما تعرضوا، وتساءل عن دور ديوان الزكاة الذي كان يأخذ حقوقه كاملة منهم وعن دور الدولة ووزارة الزراعة.


وحمّل بعض الجهات مسؤولية إفشال عملية التسويق الخارجي للمحصول وذلك بعدم تنفيذها لقرار الرئيس عمر البشير الصادر في الرابع من شهر مارس المنصرم والقاضي بإعفاء صادر البصل من الضرائب والجبايات.


وأوضح أنهم في 14 مارس، قاموا بإرسال شحنات من المحصول لإثيوبيا ولكن الجهات المعنية لم تنفذ قرار الرئيس ولم تعفِ الشحنات من الضرائب والجبايات، الأمر الذي جعلهم يتوقفون عن تصدير المحصول.


من جانبه، أكد وزير الزراعة بولاية كسلا مجذوب أبوموسى، أن وزارة الزراعة تسعى لوضع حلول وخيارات لامتصاص المشكلة وفتح أكثر من طريق للهروب من دائرة الأزمة.


شبكة الشروق


تعليقات 7 | إهداء 0 | زيارات 3079

التعليقات
#968066 [همد]
0.00/5 (0 صوت)

04-09-2014 02:34 PM
كويس لقينا واحد يعبرنا ويرد علينا زي اخونا راصد متابع

يا الحبيب الزراعة العمل فيها كلاتي:----

حبيبي انا تربال من يوم قمتا

1- التربال ينظف الارض قبل الموسم ويتابع مع صاحب التركتر المحرات

2- ويرمي التيراب ويسقي وينظفوا ويقلعوا ويربطوا تجهيز للشتل

3- يجيب البقر ويقصب الواطة

4- وبعدين يشتغل واسوق

5- يجيب الشتالين ودا يكون علي حسابوا هوا

6- يقوم يسقي البصل المشتول ويرقع المكان المافيهوا شتل

7- وبعد اسبوع يبدا ينظف ونظافة بي حذر ودقة حتي لايقطع البصل وتفتيت التربة

8- ينظف الجداول والسقاية تكون بعد الرابعة عصرا وتتواصل الي الليل ( وما تنسي الافاعي والعقارب

التي تخرج بسبب الماء المنساب )))

9- وتستمر النظافة والسقاية الليلية لمدة شهرين ونصف

10- ويرش بعد الادوية من الحشرات الضارة بي البصل ومبيد يقلل كميات الطفيليات والعشب الزايد

11- بعد هذا مطلوب من التربال مراقبت العمال اثناء الحصاد والي كل جهده راح شمار في مرقة


وشكرا دي حا جات بسيطة تقابل عمك التربال خلال الموسم عشان يكون عندنا بصل من اصلوا

وتجي حكومة السجم تدمر مصنع تجفيف البصل ولا نلومك لانك ما عارف زراعة البصل والبيحصل فيها ؟؟؟؟

[همد]

#967766 [bullet ant]
0.00/5 (0 صوت)

04-09-2014 10:51 AM
اعلان فشل بالخط العريض

[bullet ant]

#967343 [رانيا]
4.75/5 (5 صوت)

04-08-2014 11:43 PM
حاجة مؤلمة وغريبة في نفس الوقت .. يعني في البلد المنحوسة دي الناس تزرع مشكلة
وما تزرع مشكلة !!

[رانيا]

#967118 [الحقيقة]
4.00/5 (4 صوت)

04-08-2014 06:00 PM
زمااااااان كان عندنا مصنع تجفيف بصل بأروما وينه حسع نميري ومن بعده دمروا كل المصانع من أروما الى كريمة ، وحسع أي زول عنده امكانية مالية وفنية يمكن يشتري كل بصل كسلا وخلال شهرين بيقى ملياردير ةاقتصاد السودان كله بيدار بمثل هذا الاسلوب والشمارات ...

[الحقيقة]

ردود على الحقيقة
[عبد الله] 04-09-2014 12:04 AM
الاخ الحقيقه
تحياتى
مصنع تجفيف البصل بكسلا وليس اروما . وكان باروما مصنع الكرتون ...ومصنع تجفيف البصل موجود بكل الياته وكان فى الامكان ان يعمل بمجرد الضغط على زر ...ولكن اين هى حكومه كسلا ؟ كلهم فى هم انفسهم ولا تعنيهم ولايه كسلا واهل كسلا فى شىء المهم هو مرتباتهم وعرباتهم الفارهه والفلل الخاصه بهم ومشاريعهم الخاصه ومزارعهم الخاصه ...الا تلاحظ بان مدينه كسلا من اوسخ مدن السودان . بكل اسف الجميع فى وادى والسياسه الاقتصاديه فى وادى . ويكفى ان محمد ادم يوسف هو راس السلطه التنفيذيه بالولايه مع انه ليس لديه راس . وقول ياساتر


#967013 [همد]
3.00/5 (3 صوت)

04-08-2014 04:14 PM
السلام عليكم

دا السبب المباشر الجابنا من السودان قبل 16 عام


مزارع من يوم قمتا نفس الشي حدث معنا في كسلا وفي كل السودان بي سبب حكومة السجم والرماد


في الزمن داك شوال البصل بقا بي خمسة جنيه لمن جينا للحصاد البقلع الحوض ياخد (1)جنيه

البقطع ياخد( 1)جنيه البعبي ويخيط (1)جنيه الخيش الفاضي (1)جنيه الناقل للسوق (1)جنيه

كدا الحساب خمسة جنيه ؟؟؟؟؟

طيب وين حق الجاز وين حق التيراب وين حق الاسبير وين المصروفات الماخدهامن التجار علي بال ماتحص

وتسددها وين حق الحراته وين حق الشتل وين حق النظافة وين حق سقايتك وين شغل البقر وين حق الواسوق

وين وين وين وين الي اخره وفي الاخير قفلوا مصنع تجفيف البصل وغلظوا الضرائب والجبايات الما عندها

حد وربنا يجعل البدمر كيدوا في نحروا ولو عرفناهوا والله ما نسامحوا لانوا اخد عمرنا وخلانا نتغرب

ونتبهدل بدل نكون عايشين في بلدنا الحلوة الجميلة كسلا ؟؟؟؟؟

[همد]

ردود على همد
European Union [راصد متابع] 04-08-2014 05:41 PM
انت وكتين لا حراتة ولا شتل ولا نظافة ولا سقاية ولا بتقلع ولا تقطع ولا تخيط ولا بتودي السوق مزارع فوق شنو؟....


#966982 [ابو الخير]
3.00/5 (2 صوت)

04-08-2014 03:49 PM
والله نحن مع الانقاذ نموت جوعا وعطشا وفقرا وذلا
البصل السوداني الابيض جميل الشكل يباع في دول الخليج بثلاثة اضعاف البصل الاحمر الذي يأتي من الهند ، وهذا البصل الابيض يستورد من امريكا وهو على بعد خطوات في السودان لكن الكيزان ليس من مصلحتهم الشعب السوداني يرتاح ويشم نفسه
خافوا الله في هذا الشعب الغلبان
وهذا بذكرني ببيت الشعر العربي القائل

كالعيس في البيداء يقتله الظما والماء فوق ظهورها محمول

[ابو الخير]

#966969 [صاااااااابر]
3.00/5 (2 صوت)

04-08-2014 03:36 PM
السودان ده ماله يابشر.. المشكله ف المواطن.. كل لحظه راجعين لوراااا..والريس بكل استهتار واستخفاف واللا مبالا بررررررررررزقص..هذا زمانك يامهاذل.......مع تحياتي صااااااابر ومرارتي خلاااااااص

[صاااااااابر]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة