الأخبار
أخبار إقليمية
حزب الترابي : نستغرب من مطالبة الأحزاب بإلغاء القوانين المقيدة للحريات
حزب الترابي : نستغرب من مطالبة الأحزاب بإلغاء القوانين المقيدة للحريات
حزب الترابي : نستغرب من مطالبة الأحزاب بإلغاء القوانين المقيدة للحريات


04-11-2014 02:26 AM
أبدى حزب المؤتمر الشعبي المعارض بالسودان، استغرابه من مطالبة الأحزاب بإلغاء القوانين المقيدة للحريات قبل الدخول في الحوار، مؤكداً قناعته بأن الحوار سينقل البلاد من مربع الأزمة لمربع الحل. وحذّر المؤتمر الوطني من الرجوع لعهده القديم.


وقال الأمين السياسي بالمؤتمر الشعبي كمال عمر عبدالسلام، لـ "الشروق" إن الرئيس عمر البشير وضع إطار تعديل القوانين بقراراته الأخيرة المتعلقة بممارسة الحريات السياسية والإعلامية وإطلاق المعتقلين السياسيين، وعلى الأحزاب أن تضع التعديلات التي تراها مناسبة عبر الحوار الوطني.


ودافع عبدالسلام عن انحياز الشعبي للحوار بهذا الحماس، مؤكداً جدية الحكومة والمؤتمر الوطني "هذه المرة"، وقال إننا على قناعة تامة أن النظام له استعداد للقبول بكل نتائج الحوار سواء دعت للوضع الانتقالي الكامل أو حكومة قومية.


الطريقة القديمة

وحذّر كمال المؤتمر الوطني من الرجوع إلى طريقته القديمة في التعامل مع الأحزاب. وقال إن الحركات المسلحة ما زالت لديها شكوك في جدية الحكومة، وأن المؤتمر الشعبي سيتواصل مع كل من لديه به علاقات من المسلحين لإقناعهم بالجنوح للسلام.


وقال عبدالسلام "المؤتمر الوطني ما عاد هو الحزب القديم، لأنه أصبح يتعامل مع الأزمة بروح جديدة، وما دام النظام لديه استعداد حتى للوضع الانتقالي الكامل، فهذه فرصة وعلينا أن ننتهزها، وعلى الوطني أن يقدر هذه المسؤولية".


وحول رؤية المؤتمر الشعبي لتكوين آلية الحوار قال عبدالسلام، إن ما اتفق عليه هو أن تكون الآلية متوازنة بين المعارضة والحكومة، وربما تؤول رئاستها لأي شخص تتفق عليه الأحزاب غير البشير.

الشروق


تعليقات 50 | إهداء 0 | زيارات 7128

التعليقات
#970485 [المنجلك]
0.00/5 (0 صوت)

04-12-2014 04:41 AM
يا ترابى زمان كانت سجون سياسية حسع لو جيتنا بمكيدة جديدة ما عندنا ليك إلا عود القذافى. ومن خادعنا فى الديمقراطية انخدعنا له ونشوف أخركم شنو.

[المنجلك]

#970356 [عاصم]
5.00/5 (1 صوت)

04-11-2014 11:01 PM
الترابي هو عمر البشير والوطني هو الشعبي مسألة لايجوز فيها النقاش و لا قابلة للتفكير عرافهم واحد ذهب الترابي الى قطر وذلك للاجتماع السري بين قادة الاخوان المسلمين ومندوبين المحفل الماسوني الصهيوني لمناقشة وضع الاخوان بعد القضاء عليهم في مصر وفي الخليج وحظرهم وبعدها جاء الترابي السجمان للخرطوم ويشد من ازر البشير لمواجهة الطوفان القادم و الساحق للكيزان باذن الله تعالى

[عاصم]

ردود على عاصم
United States [علي الامين] 04-12-2014 02:05 AM
استطيع ان اجزم بانك قصير النظر يا استاذ عاصم|!


#970341 [عصمتووف]
0.00/5 (0 صوت)

04-11-2014 10:41 PM
وقال الأمين السياسي بالمؤتمر الشعبي كمال عمر عبدالسلام، لـ "الشروق" إن الرئيس عمر البشير وضع إطار تعديل القوانين بقراراته الأخيرة المتعلقة بممارسة الحريات السياسية والإعلامية وإطلاق المعتقلين السياسيين، وعلى الأحزاب أن تضع التعديلات التي تراها مناسبة عبر الحوار الوطني.


********إن الرئيس عمر البشير وضعكم في إطار الصورة معة وهي معبره تماما *********** شخصيا كنت كنت متاكدا انكم انتهازيون ولصوص ثورات وثوار سبق ان نبهنا التجمع ان لا يعول عليكم وكنا ننادي بطردكم شر طرده لكن كلام الطوال غير مسموع والله كل المجتمعين في تلك القاعة لا يمثلون الا انفسهم وعلي البلاد السلام وعلي الحركات المسلحة تمد كرعيها ما دام الزهاوي وقناة القلب والترابي وعمر وبتاع اللجان الثورية وغيرهم من الاذناب والاظلاف والحوافر يقررون في امر بلاد اكبر منهم

[عصمتووف]

ردود على عصمتووف
United States [علي الامين] 04-12-2014 02:10 AM
الانتهازي واللص هو انت عزيزي عصمتوف. اذا كنت تعتقد انت الوحيد صاحب الحق وغيرك هم الانتهازيون واللصوص!


#970282 [مدحت عروة]
5.00/5 (1 صوت)

04-11-2014 09:13 PM
لا المؤتمر الوطنى ولا المؤتمر الشعبى ولا الحركة الاسلاموية كلها ومعاها كل شذاذ الآفاق ناس ايران والحركة الاسلاموية العالمية يقدروا تانى يرجعوا لمربع الانقاذ الاول واعنى التمكين وكتم الحريات ومنع الاحزاب من العمل السياسى لانهم خلاص مشروعهم فشل وهم ماشين للقبر يعنى كبروا خلاص ولم يعملوا نظام ثابت ومستقر للاستمرار فى مشروع الحركة الاسلاموية لان ذلك غير عملى وغير ممكن فى بلد زى السودان وهم لو ما لقوا الموضوع فاشل وانهم خلاص فى اضعف حالاتهم اقسم بالله ما كانوا عملوا حوار او اعترفوا بالآخر هم هسع عايزين مخارجة لانفسهم من المساءلة والمحاسبة على الفساد والجرائم العملوهم وبعدين يا كمال عمر الحرية والعمل السياسى الحر فى دولة القانون ليست منحة من احد ولا شكرا للمؤتمر الوطنى ولا اى زول فى الحركة الاسلاموية لان هذا حق من حقوق الشعب السودانى الجزمته بالحركة الاسلاموية كلها وايران كمان وكل من يدعمها!!!
لا عليكم لله ابقوا رجال انتو والمؤتمر الوطنى وما تدوا الناس حقوقهم فى الحرية والديمقراطية ودولة القانون ونشوف ح تستمروا كيف انتوا مجبورين على ذلك ولازم تدوا الناس حرياتهم ورجلكم فوق رقبتكم ولا شكرا لكم وغصبا عنكم وانتم الآن الطرف الاضعف واعنى الحركة الاسلاموية شعبى ووطنى خلاص ولى عهد التمكين ومنع الحريات شاءت الحركة الاسلاموية الواطية الحقيرة ام ابت !!!!

[مدحت عروة]

ردود على مدحت عروة
European Union [ابوالحسن الشايقي] 04-12-2014 09:54 AM
يا اخ علي الامين من وين جبت النسبه دي الاحصائيات بتاعتكم دي كلها من وحي خيالكم فقط جماعتكم ديل مؤتمر شعبي علي مؤتمر وطني علي منتفعين زائد مطبلين نسبتكم الحقيقيه هي واحد في المائه فقط وما تحسب كل مسلمي السودان معكم لانهم لا يخونون الامانه ويكفي ان عهدكم شهد ظلم وفساد لم يشهده السودان في تاريخه.

United States [علي الامين] 04-12-2014 02:18 AM
ياعم مدحت بكلمة لا للمؤتمر الوطني لا للمؤتمر الشعبي ولا الحركة الاسلاموية كلها ، هل تعلم انك تلغي اكثر من ٧٠% من الشعب السوداني . هل هذه هي الديمقراطية من وجهت نظركم؟


#970235 [مالك الحزين جدا جدا]
5.00/5 (1 صوت)

04-11-2014 07:22 PM
الله يصرفك يا الترابى ,, كرهتنا السودان

[مالك الحزين جدا جدا]

ردود على مالك الحزين جدا جدا
[البعاتي] 04-12-2014 09:40 AM
الله يأخذك يا " على الامين " ومعاك ترابيك فوق البيعة ...

United States [علي الامين] 04-12-2014 02:25 AM
يا عم مالك الحزين هدانا الله واياكم ونسأل الله ان يحفظ لنا الشيخ د. حسن الترابي ويمد في عمره ويعطيه الصحةوالعافيه امين يا رب.


#970230 [بنه]
5.00/5 (1 صوت)

04-11-2014 07:10 PM
(وحذّر كمال المؤتمر الوطني من الرجوع إلى طريقته القديمة في التعامل مع الأحزاب. وقال إن الحركات المسلحة ما زالت لديها شكوك في جدية الحكومة،) ,والله استفزاز للمعارضين مابعده استفزاز ..اتقي الله في الشهداء والمتطهديين والمعذبين المعتقلين

[بنه]

#970157 [ودالنضيف]
0.00/5 (0 صوت)

04-11-2014 04:55 PM
كمال عمر ده نايم صحوه من الحلمة دي

[ودالنضيف]

#970142 [جاكوما]
5.00/5 (1 صوت)

04-11-2014 04:38 PM
منطق مقلوب .. كيف تفاوض وانت مقيد وليس لديك حرية فى الحركة
وكيف تنور حزبك وشعبك بمايجرى فى المفاوضات؟؟

[جاكوما]

#970126 [مؤتمر شعبي عضويته 150 نفر للحوار]
0.00/5 (0 صوت)

04-11-2014 04:05 PM
يا ناس هوي أسمعوني جاي..
زولكم كمال عمر ده ليه فترة طويلة بعد المفاصلة عامل ليك فيها معارضة (وطنية)..

ويجيبوه يتكلم في الفضائيات ودائما في آخر كلامه يقول ليك يا (نطلع الشارع)..!!

ولا مره من المرات اللي الشعب طلع فيها الشارع في زول شاف عمك ده ولا وآحد من ال150 نفر المعاه..
يا ربي الزول ده بيتكلم عن ياتو شارع بالظبط كده؟؟؟؟

المره الوحيدة اللي صدقوا فيها الإخوان بالخروج للشارع كانت يوم المصريين ختوا ليهم... صاحبهم
.. (مرسي أبو صباع).. جوه السجن.. وتاني يوم القاضي حكم بالإعدام على 529 مجرم من جماعة الإخوان الشيطانيين ..

**قاموا عملوا ليك مظاهرة ضخمة جداً جداً جداً جداً.. فيها ( 150 نفر عداً نقداً..!!) ليشجبوا النظام المصري..

هه آ نفيخة هوي إنت وشيخك ما عندكم إلا الرمادة في خشمكم..

بلاش لعب عيال.. ده إنت طلعت إي كلام يا (حنطلع الشارع).. وطبعاً لو بتتذكروا المقولة البتتردد في أول إغنية (لا للديكتاتورية) العملوها شباب الثورة .. السفاح بيردد عبارة (لو عندهم ناس) وطبعاً كان قاصد ناس ديل .. وما عارف إنو ديل معارضتهم زي الله يكرمكم .. معارضة المرأة لي رآجلها لما يقول ليها كدي أطفي النور ده وتعالي..!!
بلا يخمكم..!!

[مؤتمر شعبي عضويته 150 نفر للحوار]

ردود على مؤتمر شعبي عضويته 150 نفر للحوار
European Union [ود الحركة] 04-11-2014 09:49 PM
والف 150 نفر يساو عندكم بى مليون دة لو عنكم مليون والله المعارض بدون الشعبى ذى السخينة بدون بصل.انتو الجقبلة دة كلها عشان ظهور الشيخ فى الاعلام؟ لو الاخوان ديل اتحدوا تانى حيسلموها انشاء الله ملك الموت. معارض فى الكلام الفارق والنبذ بلاء يخمكم


#970072 [sudani]
5.00/5 (2 صوت)

04-11-2014 02:31 PM
الترابى تانى
اخخخخخخخخخخ من الوسخ الجابوه ناس المهدى
ده ما كان زواج بت

[sudani]

#970061 [ارنستو تشي]
5.00/5 (2 صوت)

04-11-2014 02:14 PM
تاني رجعنا لي شغل الدغمسه يا لترابي
مافي حوار مع المؤتمر الوطني الا بعد الغاء هذه القوانين وتهيئة الجو العام
وتنوير قواعد الأحزاب والسماع لمقترحاتهم
ثم بعد ذلك الحوار في الهواء الطلق أمام وسائل الاعلام المسموعه المقروءة
ما في تاني شغل تحت الطربيز ة

[ارنستو تشي]

#970045 [اشراقة]
5.00/5 (4 صوت)

04-11-2014 02:03 PM
الأنتفاضة تلوح بالأفق،والجيش يترقب،بأنتفاضة سبتمبر لمن يعلم كاد أن يحدث انقلاب عسكري،ولكن الأسلاموين أوقفوه وخرجوا بهذا المخطط،وقام البشير بتأمين نفسه جيدا حتى لا يحدث انقلاب عسكري لا يحمد عقباه.
عند حدوث أول اصطدام سيتسلم الجيش قيادة البلد،وسيقوم الأسلاموين بالأقتتال فيما بينهم وسيقتلعون من السودان اقتلاعا،وهذا ما تنبأ به محمود طه.

*لا ننسى بأن الجيش يضم ضباط متأسلمين وغير متأسلمين.

[اشراقة]

ردود على اشراقة
European Union [ساب البلد] 04-11-2014 06:00 PM
********** وين الجيش يا اختي ؟؟؟ ********* ليس هناك جيش ***********


#970019 [حزب المؤتمر الشعبي النظام نفسه]
0.00/5 (0 صوت)

04-11-2014 01:20 PM
حزب المؤتمر الشعبي ليس بحزب معارض،بل هو النظام نفسه افيـــــــــــــقوا ليفيق شاب هذا الحزب من هذه المسرحية التي مكنت المؤتمر الوطني وجعلت الصادق المهدي والميرغني يأتون السودان ليشاركوا النظام ويتقلدوا هم أيضا أدوار في هذه المسرحية.
ساندوا الجبهة الوطنية العريضة وقوى تحالف المعارضة،حتى نحرر سوداننا،سقوط هؤلاء سيكشف كل المسرحيات والكذب وسيكشف حجم الجرائم التي لم تشهد لها دولة بأفريقيا والشرق الأوسط،وحجم الفساد،واعلموا أن حلايب باعها النظام و وقع بيديه مع الترابي على التنازل من حلايب،وهذه ليست سوى احدى جرائم الانقاذ،وأبيي النظام يساوم عليها اليوم،ويساوم على دارفور كذلك،أنقذوا السودان قبل تدخل الأمم المتحدة تحت البند السابع،واسألوا أنفسكم لماذا الى الآن المجتمع الدولي واعلامه صامت اتجاه ما يحدث بالسودان!!هم يقومون بترتيب التدخل تحت البند السابع،وقتها فلنقل وداعا للسودان،ولا تنسوا التاريخ يعيد نفسه المجتمع الدولي كان صامت اتجاه الأنقاذ في التسعينات وكان البشير وقتها يروج "أصحاب القبعات الزرقاء لن يدخلوا السودان"،وهاهم بقواتهم وفي الخرطوم يتجولون والجنوب مفصول.

[حزب المؤتمر الشعبي النظام نفسه]

#970018 [ود الركابي]
0.00/5 (0 صوت)

04-11-2014 01:19 PM
هسع ياجماعة كل السياسين العندنا ديل 0 اسلاميين وغير هم .منو الفوضهم علشان يتكلمو باسم الشعب السوداني .الواحد فيهم سمين ونظيف والكان ازرق بقي اصفر من الراحات واحد فيهم اغبش مافي بيجيبو القروش دي من وين ماعارف مع انهم كلهم عواطليه .هسع دي اذا حصل المستحيل وجاءت الدمقراطيه .انتو الاسلاميين ديل بلذات البديكم صوتوا منو .قسما عظما اذا بتدخلوني الجنة عديل كده مابصوت ليكم .اذا جا واحد مواطن سوداني مسيحي بصوت ليهو بدون اي تردد .لعنكم الله .دمرتم البلد .نحن بلدنا من اغني بلاد العالم وشعب من اذكي شعوب العالم وكله 30 مليون بس وشعب متعلم مشكلتنا.ربنا مبتلينا باسوة سياسيين في العالم شعب مسكين شعب طيب مابتلقي منه اثنين في العالم شهم كريم خلوق وفي .ربنا يهدي الجميع

[ود الركابي]

#970004 [سوداني انا]
5.00/5 (1 صوت)

04-11-2014 12:54 PM
اقتباس :

()((ﻓﻬﺬﻩ ﻓﺮﺻﺔ ﻭﻋﻠﻴﻨﺎ ﺃﻥ ﻧﻨﺘﻬﺰﻫﺎ، ﻭﻋﻠﻰ ﺍﻟﻮﻃﻨﻲ
ﺃﻥ ﻳﻘﺪﺭ ﻫﺬﻩ ﺍﻟﻤﺴﺆﻭﻟﻴﺔ))



نعم انتم انتهازيون .. و كفي ..

...............................

[سوداني انا]

ردود على سوداني انا
[ساب البلد] 04-11-2014 06:02 PM
******* علي قول عادل امام : الحياة فرص ***** بصراحة انا راجل انتهازي ههههههه *******


#970001 [مشلخ]
5.00/5 (1 صوت)

04-11-2014 12:50 PM
والله البحلمو بالانتفاضه ديل ديل ربنا يكون فى عونهم خلاص الشغلانيه بانت ووضحت رجع الحبيب للمحبوب ياحساد

[مشلخ]

ردود على مشلخ
European Union [بف باف] 04-11-2014 04:37 PM
انت اسي داخل الموقع ده لي؟؟ومتعب نفسك وكاتب تعليق لي؟شوف ليك موقع سكس اخير لك،ولا موقع اكتئاب،ولا موقع ناس فارغه،ولا موقع ناس ما عندهم شغلة،ولا موقع بتاع محششين،تعلق فيه براحتك،حلل القروش البتدفعها في النت في شي يرضي مخك الفاضي ده الما فيه اي أحلام ولا موضوع،
مسطول كاره لنفسه بسجارة مليانة دود والله ما في حاسد وحاقد غيرك.


#969991 [زول زهجان]
5.00/5 (2 صوت)

04-11-2014 12:43 PM
اليكم ما جرى خلف الكواليس مع ناس الترابي والمعارضة بالعامي:

*تحالف المعارضة: "هووووووي يا تطبقوا الدستور وتخلوه الحكم الفاصل بينا وبينكم يا حرررررررم نقلبها ليكم ثورة"

*ناس الترابي والوطني:"يا جماعة روقوا المنقى ثورة شنو مولاكم الصادق والمرغني مشاركين،ومعانا 90% من الأحزاب في القعدة دي لي ما عايزين تجوا وتشربوا جبنه لذييييييييذة"

*تحالف المعارضة: "90% بتاعة الساعة كم دي؟!! ده كلام تمشوا تتبوبروا بيه في قناة الجزيرة وغيره،ما تكتروا الفارغة نحن معانا الشعب،سجارتكم الاديتوها للشعب ولينا فكت،يا تصنقروا لينا الدستور ده يا ثورة"

*ناس الترابي: "ههههه!دقايق بس أفسحوا لينا شوية يا ناس التحالف أنقعد جمبكم هواء المكيف بجاي شغال، هوووي ياناس المؤتمر الوطني أوعكم ترجعوا لأموركم دي!،هههههه! كمان يا ناس التحالف شنو مش في قرار جمهوري ولا الحكاية شنو؟"

ناس التحالف : "ظبط أرجو الجاييييكم،وأبقوا عشرة على بشيركم ونافعكم وقروشكم"

[زول زهجان]

#969989 [Zomrawi Alweli]
5.00/5 (1 صوت)

04-11-2014 12:40 PM
وقال هذا السافر (((وربما تؤول رئاستها لأي شخص تتفق عليه الأحزاب غير البشير.)) هأأأأأوي لا بالله هاك عايز تحكمنا انت والترابي بتاعك تاني مش اخير البشير منكم يا فاسقين الله يلعنكم وبلعن البشير ضعيتو البلاد وازهقتوا روح العباد كل الحركات الاسلامية في مزبلة التاريخ بعون الله.

)

[Zomrawi Alweli]

#969986 [abdullye]
0.00/5 (0 صوت)

04-11-2014 12:37 PM
صدق منى اركو مناوى حينما قال ان كمال عمر كلما علا صوته معارضا للمؤتمر الوطنى كلما كانوا التقارب مع الشعبى يا الله يا حى يا قيوم ارحنا من هذين الكابوسين النوتمر والشعبى وكل الانتهازيين

[abdullye]

ردود على abdullye
European Union [ود الحركة] 04-11-2014 09:59 PM
ههههههههههههههههههههههههههههههههههههههههههههههههها قال منى قال؟


#969977 [albrado]
5.00/5 (2 صوت)

04-11-2014 12:28 PM
الاوضاع سيئة للغاية والحكومة محتاجة لدعم من الاحزاب وقوي الشعب

وعلي عثمان ونافع لم ولن يخرجوا من الحكومة كما يتخيل البعض بل

انسحبوا للخطوط الخلفية انسحاب تكتيكي مؤقت لحين تصحيح اوضاع

الحكومة اقتصاديا واجتماعيا وصحيا وخارجيا بعدها ليعودوا ويلعنوا

سنسبيل الشعب السوداني ....والبيفتكر انه فعلا في حوار وحكومة انتقالية

وغيره متناسيا تاريخ وسجل الكيزان ونقدهم للعهود خلال ربع قرن جاهل

بطبيعة وسلوك الكيزان .... الكيزان طالبين من الاحزاب المساعدة في

الخروج من ازماتهم الخلقوها للسودان ومافي حاجة اسمها حكومة انتقالية

او بديلة او اي تغيير في سلوكهم واجندتهم الخبيثة تجاه السودان وشعبه

وكلما بقوا في مأزق لجأوا للاحزاب بوعود واحلام وردية وعلي الشعب السوداني

واحزابه العودة للتاريخ وسجل الكيزان وعلي سبيل المثال للحصر ليلة قرار

محكمة لاهاي علي البشير ومهرجان فئات الشعب والاحزاب واستنكارهم لقرار المحكمة

( اتوا بالفنان وردي وعبد الماجد حامد خليل وعبد الرحمن الصادف المهدي وغيرهم

وغيرهم ............ وبعدها رجعت حليمة لقديمها )

علي الشعب السوداني ان يتخذ قراره الحازم لنكون او لا نكون وكفي مسرحيات الكيزان

واكاذيبهم ومهزلة الاحزاب وابناء قادتها مساعدي رئيس النظام ومسرحيات الوثبة وبرنامجهم

الحضاري والانقاذ وغيرها حتي اصبحنا واصبح الوطن في الهاوية ...وان غدا لناظره قريب

[albrado]

ردود على albrado
European Union [fatohashim] 04-11-2014 02:41 PM
كلامك مئة بالمئة.يجب وقف هذه المهزلة.تصحيح(سنسفيل وليس سنسبيل).


#969952 [الدرديري]
5.00/5 (1 صوت)

04-11-2014 11:58 AM
السيناريو الجاي انتفاضة شعبية بأذن الواحد في جمعته المباركة،وحزب الأمة حشارك من أول يوم لو لاحظ الحراك كثيف،وحزب المؤتمر الشعبي حرابط ما حنزل بس حنزل جزء من شبابه في اللحظات الآخيرة.

وغازي في الأيام المقبلة حفضح ملفات بسبب الضغط.
وبكري مختوت لحماية البشير من المحاكمة ولتولي الفترة الأنتقالية..............

تحالف قوى المعارضة حنسق في الأيام المقبلة مع الحراك الشبابي وحنسق مع الجبهة الثورية في توحيد الرؤى المستقلية للسودان بعد الثورة.
جمعة مباركة للجميع ولأحلى سودان ما بعد الكيزان.

[الدرديري]

#969932 [علي سليمان البرجو]
5.00/5 (1 صوت)

04-11-2014 11:36 AM
يضحك الترابي ليبكي الشعب فهو الأبليس الأكبر وظنه علي ما يجري في هذه الضيعة الاخوانية إعادة تقسيم المقسم وبيع الرفاة ليكتمل برنامج التمكين الأخواني.
كيف يكون حواراً تحت القبضة الأمنية والتهديد الساطوري وبيوت الأشباح يا فاجر؟ هل تعلم أن السوان بلاد تحتضر بفعل الفساد والاحتراب والطغيان الانقاذي يا كذاب؟
قد نكره كثيراً الحرب التي تفرض على الأقاليم ولكن هل يترك أئمة النفاق هكذا دون وضع حد لترفهم ولا مبالاة الحكم واجترار الكذب والنفاق ......

[علي سليمان البرجو]

#969928 [Darfury]
5.00/5 (1 صوت)

04-11-2014 11:32 AM
سبحان الله مغير الاحوال من حال الي حال بالامس القريب يا كمال عمر في برنامج الاتجاه المعاكس قلت هذا النظام فاسد وعائش في ثراء والشعب السوداني فقير وقلت ايضا سبب في انفصال الجنوب واشعال الحروب في الهامش في النيل الازرق وج كردفان ودارفور وقلت لن تفاوض النظام بل انتم ساعيين مع قوي التجمع المعارض لاسقاط هذا النظام ماذا سار بحق السماء تظهر اليوم بكسير الثلج وحرقى البخور ضد الاحزاب المعارضة في القاء القوانين المقيدة للحريات صحيح من قال اختلاف الرآي لا يفصل في الود قضية اذهب الي القصر رئيسا واذهب الي السجن حبيسا والساقية لسة مدورة

[Darfury]

#969917 [fm3]
5.00/5 (1 صوت)

04-11-2014 11:13 AM
الى كاتب المقال الرجاء لا تكتب حزب الشيطان الشعبى (المعارض) لانه هو حاكم السودان من وراء الكواليس لهذا الشعب الميت المغيب المغلوب على امره
شعب جعان لكنوا جباااااان

[fm3]

#969910 [مواطنx]
5.00/5 (2 صوت)

04-11-2014 11:00 AM
يستغرب المؤتمر الشعبي بمطالبة الشعب و قوى تحالف المعارضة والجبهة الثورية بألغاء القوانين المخالفة والمعارضة لنصوص الدستور!!!!!!ثم يحذر المؤتمر الوطني من العودة الى عهده القديم!!!

الى متى سنظل نلعب هذه اللعبة؟ هذا حديث تخبط الركب مفردها ركبة!حديث المرعوب!حديث المتخبط بهذيانه،نحن لا نطالب يا هذا،هذه حقوقنا ونعلم بانكم مرعوبين لأنكم صرتم تعلمون بأن الشعب لن يساوم على حقوقه.

تحالف قوى المعارضة اليوم يستمد قوته من الشعب،تحية لكل مناضلي السودان.

[مواطنx]

#969909 [ظط]
5.00/5 (1 صوت)

04-11-2014 11:00 AM
هسي ياجماعه الترابي ده وامثاله حكمو فى الشرع شنو ؟

[ظط]

#969906 [Neema]
5.00/5 (1 صوت)

04-11-2014 10:51 AM
انشقاق المؤتمر الشعبي من الام كان كذبة
خروج نافع وعلي عثمان كذبة اكبر
خروج غازي بعد اربعة وعشرون عاما وحركة الاصلاح الان اكبر كذبة ديل الكيزان يتلونون كما الحرباء اصحو يا عااااااالم اصحو

[Neema]

#969903 [دنكاابوطويله]
0.00/5 (0 صوت)

04-11-2014 10:47 AM
كل ماالواحد يشم ليهو سلقه يصفق...........

[دنكاابوطويله]

#969891 [بت قضيم]
5.00/5 (1 صوت)

04-11-2014 10:27 AM
حيرتنا عديل كده يا كيمو قبل الوثبة كنت رقما لا يستهان به من رموز المعارضة الوطنية بالتصريحات المناقدة لممارسات نظام الانقاذ والان تنتقد رفقاء الامس من الاحزاب لمطالبتهم الغاء القوانين المقيدة للحريات خلاص نقول مبروك عليكم زواج المتعة انشاء الله بالهناء والسرور

[بت قضيم]

#969876 [karkaba]
5.00/5 (1 صوت)

04-11-2014 10:07 AM
عار غليك ايها المتلون لقد فقدتك نفسك ومصداقيتك لا اجد وصغا اصفك به غير ان حية رقطاء تبدل جلدها حسب الجو

[karkaba]

#969875 [زنجرابي]
5.00/5 (1 صوت)

04-11-2014 10:05 AM
و القادم أسوأ …….
هذه هي نهاية الحركة الاسلامية ((المهدي.. الميرغني.. الترابي.. البشير.. و ... و...”)) كما تنبأ لها شيخ محمود محمد طه:
1. من الأفضل للشعب السوداني أن يمر بتجربة جماعة الهوس الديني وسوف تكون تجربة مفيدة للغاية،
2. إذ أنها بلا شك ستبين لأبناء هذا الشعب زيف شعارات هذه الجماعة،
3. وسوف تسيطر هذه الجماعة على السودان سياسيا وإقتصاديا حتى ولو بالوسائل العسكرية،
4. وسوف يذيقون الشعب الأمرين،
5. وسوف يدخلون البلاد في فتنة تحيل نهارها إلى ليل،
6. وسوف تنتهي فيما بينهم،
7. وسوف يقتلعون من أرض السودان اقتلاعاً.
الاستاذ محمود محمد طه في حديث لطلاب جامعة الخرطوم عام 1977

هذه هي نهاية الحركة الاسلامية كما تنبأ لها شيخ محمود محمد طه:
1. من الأفضل للشعب السوداني أن يمر بتجربة جماعة الهوس الديني وسوف تكون تجربة مفيدة للغاية،
2. إذ أنها بلا شك ستبين لأبناء هذا الشعب زيف شعارات هذه الجماعة،
3. وسوف تسيطر هذه الجماعة على السودان سياسيا وإقتصاديا حتى ولو بالوسائل العسكرية،
4. وسوف يذيقون الشعب الأمرين،
5. وسوف يدخلون البلاد في فتنة تحيل نهارها إلى ليل،
6. وسوف تنتهي فيما بينهم،
7. وسوف يقتلعون من أرض السودان اقتلاعاً.
الاستاذ محمود محمد طه في حديث لطلاب جامعة الخرطوم عام 1977
هم الآن في (السوف) رقم 6 : وسوف تنتهي (فيما بينهم) أي الفتنة التي أوقدوها في البلاد و أحالت نهارنا إلى ليل.
والآن ننتظر (السوف) رقم 7: وسوف يُقتلعون من أرض السودان اقتلاعاً.
وقوى السودان الجديد (رأس الرمح في التغيير القادم)بكل أجنحتها جنوباً.. غرباً.. شرقاً.. شمالاً.. وسطاً ..شمالاً أقصى لقادرة على (اقتلاعهم من “أرض السود” اقتلاعاً).
هذا النظام لا يتغير بالمظاهرات السلمية بل بالانتفاضة الشعبية (المحمية) لأنها السبيل الوحيد لاقتلاعه وكنس آثاره من سوداننا الحبيب.
فشل المتأسلمون (جميعاً) :: المهدي والميرغني والترابي والبشير ... في حكم السودان لفترة تجاوزت نصف القرن من الزمان ….حكماً راشداً وعادلاً مدنياً يترفق بمواطنيه وينصفهم في الحقوق والواجبات ..ويحميمهم ولا يكون (ذئباً) يأكل لحمهم ولا (أسداً) عليهم و (نعامة) أمام غيرهم …ولا يجعلهم درجة أولى وثانية وثالثة … ليذرع بينهم (الفتنة) التي انقلبت الآن عليهم ….. ثم ماذا بعد هذا الحصاد المر .. وحصاد العاصفة … وجني الشوك…ثم ماذا بعد؟؟!

في اللحظة التي تظنون فيها أنكم ربما تخلصتم من تبعة الأفريقانية بعد انفصال جنوب السودان، وأنكم على أعتاب دولة عروبية نقية… سوف تأتي الأحداث لتثبت لكم أنكم لا تزالون تخضعون للمعايير الأفريقية للتغيير وليس المعايير العروبية. فالتغيير حتمي وقادم… تلوح نذره في الأفق القريب… وهو اقتلاع النظام الحاكم واقتلاع مؤسسة الدولة معاً.. بأيدي الحركات المسلحة في السودان ..وليس بأيدي الأحزاب الهالكة اللاهثة وراء السلطة والجاه في السودان للحصول عليهما بأقصر الطرق وأرخص التكاليف. وهو ما لن يفلحوا فيه مرة أخرى وللأبد.
قد هذا حدث في تشاد وأفريقيا الوسطى والكونغو الديمقراطية ورواندا وبوروندي وأوغندا وإثيوبيا وإريتريا والصومال، وسيحدث في السودان! نتاج ما زرعتم ..فمن يزرع الشوك لا يجني العنب ..ومن يزرع الريح يحصد العاصفة.؟؟؟؟
سوف تزول دولة البشير تحت أقدام وأبوات الحركة الشعبية =الجبهة الثورية= و بمساندة الآلاف من السودانيين (الاصلاء) الذين يسعدهم التخلص من الحكم الكارثي لأمير المنافقين عمر البشير. وان غداً لقريب ليشرق الفجر الجديد ... كل القوة خرطوم جوه ...وثورة ثورة حتى النصر. ثورة ثورة حتى القصر

[زنجرابي]

#969862 [sameer]
0.00/5 (0 صوت)

04-11-2014 09:51 AM
الان والان فقط يحق لى ان اندم على كونى ( سودانى ) الان والان فقط عرفت اننى فى وطن مستحيل , ولذلك ساراجع حقيقة انتمائى للبشر وافحص مطابقتى مع حنس البشر الذين قيل انهم وهبو عقول والسبب واضح فهل كمال هذا من البشر ( والقياس بعقلية الراعى المكلف بحماية البهائم )
ورحم الله نقد الشيوعى الكافر ابن الكلب الذى حاول ان يهدينا صراط المستقيم وقال ابحثو فى مورثات حيناتكم عن الرق , الذى تاكد لى انه المكون الوحيد فى جيناتنا , قوم الى سخرتكم وعند الله الحور والخمر والميسر اذا فلحتم !!!!!!!

[sameer]

#969858 [شليل]
4.50/5 (5 صوت)

04-11-2014 09:47 AM
سبحان الله !!! يتحول الرجل إلى بهلوان بين عشية و ضحاها ، إنه فجور الكيزان خاصموا نافع و علي عثمان فلعنوا الدار بمن فيها و عندما خلا الجو طفقوا يكيلون المديح لهذا الحزب العي المؤتمر الوطني بإعتبارهم اصحاب الدار ، و ها هم يحرقون البخور ليفتنوا الناس بجمال المؤتمر الوطني ، قال جاد هذه المرة عرفو كيف ؟ اين المخرجات التي تعضد ما ذهب إليه ، ربما بشة خلى الرقيص دي علامة الجدية !!

[شليل]

ردود على شليل
European Union [كيانة] 04-11-2014 12:25 PM
قال عبدالسلام "المؤتمر الوطني ما عاد هو الحزب القديم" نعم.. نعم ولكنه عاد بوجه الشعبي هذه المرة. يعني عملية طرة وكشف الحوار تلهفكم للسلطة واحتلال مواقع خلت في الحزب والدولة.
انتم جميع الكيزان عملة واحدة ويجب كنسكم معا بعد ما دمرتوا البلد وتركتوموها خرابا.
ظهر لجميع العيان اصل معدنكمالرخيص.


#969847 [دمسورة]
0.00/5 (0 صوت)

04-11-2014 09:25 AM
سبحان الله ....!

[دمسورة]

#969844 [واحد محتار]
5.00/5 (3 صوت)

04-11-2014 09:19 AM
شخصصياً لا الوم الترابي وامثاله من قادة الاحزاب التقليديين الذين يقدسون بريق السلطة وان تحفهم الحاشية ولكن الوم اتباعهم والذين يربطون وجودهم وحياتهم بهؤلاء وان دخلوا جحر ضب خرب لدخلوه خلفهم فهؤلاء إمئة ليس لهم قرار ، واحتار جداً عندما ارئ الشباب من ضمن اتباعهم .

[واحد محتار]

#969826 [شليل]
4.88/5 (4 صوت)

04-11-2014 08:56 AM
لله في خلقه شؤون الجماعه شمو ريحة الحلة بس رقدوا قش لمن يأكلوهم عديل حيعملوا شنو..!
الترابي بقى سيد بيت خلاص والبشير شكلوا لعبها صح .. لمه طلاب السلطة وداعرات الشيكات كلهم وداير يقسمها بينهم ويطلع هو بضمان على أمواله ونفسه وعائلته وحزبه .
وكأنوا زي ماكان في شي ...
ولسع سعاد هي بتختشي ...

[شليل]

#969825 [نعمان عمر]
5.00/5 (1 صوت)

04-11-2014 08:56 AM
مالذي يضير حزب الترابي اذا تحقق هذا المطلب ما دام يدعي انه معارض للحكومة وهل الغاء هذه القوانين يحتاج الى حوار من الاساس ام لاثبات حسن النوايا ان كان ما يزعم هذا المتحث ان المؤتمر الوطني جاد بالفعل .. تصدقوا بالله ما ارى الا لعبه جديده ومخطط جديد يقوده الاسلامين لنفخ الروح في هذا النظام المتهالك لاطالت عمره ( قال حوار قال)
مافي في الدنيا كلها حوار غير مسبوق بشروط وضمانات للوصول الى حل عادل وسلمي يرضي الجميع
( الترابي عميد الشقاق والنفاق ومفاسد الاخلاق يهرول نحو السلطه باسم المعارضه )عجبي!!!!

[نعمان عمر]

#969813 [البعاتي]
4.50/5 (2 صوت)

04-11-2014 08:44 AM
ودي عاوزه عبقرية المؤتمر الوطني والمؤتمر الشعبي ..... في لباس.

[البعاتي]

#969802 [المشروع]
1.00/5 (1 صوت)

04-11-2014 08:24 AM
رسالة لكمال عمر

والله انتو (المؤتمر الشعبي والمؤتمر الوطني )
تخوفوا؟ منكم جفلة ؟
من وين جيتو انتو؟
شيكتكم للاقوى مني
اذا كان بتتقاتلوا في جيفة ميتة قتلتم السودان وانتهكتموا بكذبكم ودجلكم ونفاقكم وظلمكم للناس ايها (المؤتمرين) وبعد دا عندكم رغبة حتى هو ميت تاخدوا حقكم الله ياخذكم اخذ عزيز مقتدر والله ما فيكم واحد شكله شكل دين ولا فيكم واحد صادق والمشكلة ان نياتكم السودة ظاهرة في عيونكم وفي كلامكم يا اخوان اتقوا الله اتقوا الله اتقوا الله الدين دا ساهل وبسيط وما عايز تعقيد
دخلت امراة النار في هرة
دخلت امراة الجنة في كلب
ودخل من هذا الدين الجنة ناس لم يصلوا لله ركعة واحدة
جاء رجل للرسول (ص) قال يا رسول الله قل لي في الاسلام قولا لا اسأل عنه احدا بعدك قال: قل آمنت بالله ثم استقم
جاء اعرابي يسمي ذو الضفيرتين - مربي شعره في شكل ضفيرتين - جاء للرسول (ص) وقال اين ابن عبد المطلب فقال الرسول (ص) هنذا والحديث طويل وقال ما الاسلام قال له تتشهد وتصلى وتزكي وتصوم وتحج وقال له بس فقال الاعرابي والله لا ازيد ولا انقص - خلاص مع السلامة
وقال العلماء هذه هي بساطة الدين بدون تعقيقد لا قال له رسول الله (ص) صلى زيادة او زكي زيادة او صوم زيادة او اعمل عمرة ولا قال ابقى مؤتمر شعبي ولا مؤتمر وطني اسلام جاء ينقذ الناس من النار الى الجنة هي المقصودة وكل انسان يسعى لهذا لا يسعى للحكم
اخي كمال انت ملازم الترابي ملازمة السوار للمعصم ملازمة القلادة في العنق عليك الله شوف نفسك هذه الرجل يعلمك الدجل والكذب لانك تقول اليوم كلام وغدا تقول نقيضه ... قبل فترة كنتم ضد الحكومة وضد المؤتمر الوطني شكلا وموضمونا ثم الآن توافقتم معها.. لا يمكن ان تكون هذه الحكومة انصلح حاها بين يوم وليلة ..
اليوم الجمعة والساعة الان عندي السابعة والنصف صباح وانا في مكتبي بالسعودية فأنا انصحك لوجه الله يا كمال شوف نفسك شوف نفسك وملك الموت حايم وقد ينزل بساحتكم في اي وقت - بعد عمر طويل - ولن ينفعك الترابي فهذا الرجل اعتقد انه خسر الدنيا والاخرة ... لم نسمع انه يقول قال الله وقال الرسول ولكن كلامه كله سياسة ويبحث وينقب في الكتب عشان يستخرج لنا الفتاوي المتروكة التي اهملها التاريخ لغرابتها ويأتينا بها بإعتبارها افكاره ليقول الناس انه مفكر ويأتي للناس بالغرائب... والاسلام بسيط ياتي بالعجائب والاسلام بسيط عليك الله انصحه انصحه ان يترك السودان وشأنه فإن الله سوف يأتي بالسودان رجل رشيد اما انتم وحكومة المؤتمر الوطني ليس من بينكم رجل رشيد

[المشروع]

#969794 [فاربن جبل]
4.50/5 (2 صوت)

04-11-2014 07:59 AM
BACK TO SQUARE ONE.
!!!!!!!!!!!!!!!!!!

[فاربن جبل]

#969785 [أبوعلي]
0.00/5 (0 صوت)

04-11-2014 07:30 AM
أحسنتم يا المؤتمر الشعبس (الوطني2 ) واستمرّوا
كان لديكم البعض المخدوع في توجهاتكم المتطبّعة
الآن سقطت ورقة التوت وبانت عورتكم المخبّأة

[أبوعلي]

#969765 [ود كركوج]
5.00/5 (1 صوت)

04-11-2014 06:12 AM
عليكم اللعنة يااخوان الشياطين. نسأل الله ان يرينا فيكم عجائب قدراته. (ويمكرون ويمكر الله والله خير الماكرين ) ،

[ود كركوج]

#969742 [ركابي]
4.00/5 (1 صوت)

04-11-2014 04:34 AM
الحمد لله سقطت الاقنعة وبعد كدة علي الشعب فرز الكيمان

[ركابي]

#969741 [خالد حسن]
5.00/5 (1 صوت)

04-11-2014 04:33 AM
انتهزها انت يا انتهازي
نحن ماعندنا ثقة في الانقاذ ولا في اي كوز
كان ماكنسنا الكيزان بره السودان مابهدي لينا بال ياتجار الدين

[خالد حسن]

#969738 [محمد أحمد]
5.00/5 (2 صوت)

04-11-2014 04:26 AM
نحن نعلم أن خلاص السودان هو في خلاصه من الترابي والمهدي والميرغني قبل البشير. خليكم كوم عشان نخلص منكم بضربة واحدة.

[محمد أحمد]

#969727 [ayoubi]
4.00/5 (1 صوت)

04-11-2014 03:52 AM
يا كمال شنو الشي الذي جعلك متاكد من جديه
الحكومة ولا ده ماسوره من سوق مواسير الاسلميين

[ayoubi]

#969718 [بكري الصائغ]
4.00/5 (1 صوت)

04-11-2014 03:31 AM
ده كله من "المليار القطرية!!
مابين غمضة عين وانتباهتها تغير الوديعة من حال لحال...واستغفر الله العظيم.

1-
حزب المؤتمر الشعبي المعارض بالسودان
يطالب الحزب الحاكم بتقديم تنازلات في مجال الحريات
************
المصدر: موقع -صدي البلد-
الأربعاء 05.03.2014 - 10:07 م-
-------------------------
***- طالب حزب المؤتمر الشعبي "المعارض" بالسودان بزعامة حسن الترابي، حزب المؤتمر الوطني "الحاكم"، بتقديم تنازلات في مجال الحريات، من أجل تهيئة الأجواء لإنجاح مبادرة الحوار التي دعا لها الرئيس عمر البشير. ودعا السنوسي ، حزب المؤتمر الوطني "الحاكم" إلى المبادرة بالإصلاح ، وتقديم بعض التنازلات فيما يتعلق ببسط الحريات العامة وحرية الصحافة، لتهيئة المناخ للمعارضة للانخراط في الحوار، وتقديم وجهة نظرها في القضايا التي ستطرح خلاله.

2-
حتي لاننسي تاريخ الحزب الترابي:
********************
(أ)-
الترابى يهاجم اوضاع الحريات ويطالب باخلاء المعتقلات...
(ب)-
الترابي يطالب الحكومة السودانية بمزيد من الحرية...
(ج)-
الترابي يدعو لثورة شعبية لاستعادة الحريات ويطالب بإصلاحات ...
(هـ)-
الترابي يطالب نظام البشير باصلاحات ديموقرطية...

[بكري الصائغ]

ردود على بكري الصائغ
United States [MOJAHID GUSOOMA] 04-11-2014 09:57 AM
طيب ما دى الاشياء البيطالبو بيها الناس قاعدة تتحقق و الشى الما قدرو يحققو الناس طيلة الخمسة و عشرين سنه بدأ تنفيذه ,الناس جربت الخشن وما تحقق شى , اليجربو(الناعم) الحوار و الذى نتائجه باينة للعيان يا أخونا اليس منكم رجل رشيد، يا جماعة جهاد الماوس و الكى بورد ساهل لكن دماء الناس غالية


#969714 [جمعه]
4.50/5 (2 صوت)

04-11-2014 03:20 AM
يا كمال عمر " إنتو ( حاورا) وأعكسوا لينا الكورنة" . بعدين ما تنسى تسوق معاك الأفندى وحسن مكى وحسين خوجلى، ديل ناس ( حاورين جدا) وبعرفوا يلعبوا ( الون - تو) كمان.

[جمعه]

#969710 [مصباح]
5.00/5 (1 صوت)

04-11-2014 03:04 AM
"استغرابه من مطالبة الأحزاب بإلغاء القوانين المقيدة للحريات قبل الدخول في الحوار،" .

وأنا بستغرب بشدة إنكم لسة في الساحة!! ولسة في ناس بتصدقكم وتتعامل معاكم !!؟
وبعد كل " عمايلكم" لسة متحكرين في قلب قوى الإجماع!!؟ وهى " الغبيانة" لسة بتتعامل معاكم و لسة عندها أمل فيكم !!؟

[مصباح]

#969699 [ياسر عبد الوهاب]
5.00/5 (1 صوت)

04-11-2014 02:40 AM
زمان اهلنا قالو التركي ولا المتروك

[ياسر عبد الوهاب]

ردود على ياسر عبد الوهاب
[ساب البلد] 04-11-2014 06:06 PM
*********** الكوز كوز و ان طُلي بماء الذهب ******



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية



الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة