الأخبار
أخبار إقليمية
كل فيلا بيجفل علي عاجو
كل فيلا بيجفل علي عاجو
كل فيلا بيجفل علي عاجو


04-11-2014 07:54 AM

شوقي بدري


هذا المثل السوداني يعود الي الزمن الذي كان فيه صيد الافيال من سبل كسب العيش في السودان . والافيال كانت تجفل بمجرد ان تتكرف ريحة الصياد ، وتحس بالخطر . الآن الامور في السودان بقت جايطة . وكذاب البقول عارف بكرة الحيحصل شنو. وكل فيلا جافل علي عاجو ؟

بس لو الزول قدر يفهم ، كيف غازي يقدريقول ,, بدانا حملة ضد القبضة الامنية ,, وغازي تسلح من دولة اجنبية وضلل الشباب . وكان يحمل مدفع رشاش ويطلق الرصاص علي مواطنين سودانيين من دار الهاتف ، في ايام ماعرف بالغزو الليبي . وجلس واكل وشرب ومتخ وتجشأ من مال الشعب السوداني . واجاز وناصر بيوت الاشباح . والان ياتي لكي يتقئ مثل هذه التصريحات . كنت وين زمان ؟؟؟؟؟؟ آل ابضة آل . ياخي انتو الشعب دة خنقتوه ربع قرن وقبصتوه من ...

احمد عبد الرحمن يقول ,و الحد الادني للحياة الكريمة غير متوفر . والحد الادني لم يتوفر منذ ان صار احمد وجماعته من خدام النميري . وهو وآخرون قد مكثوامع نميري دستة سنين . لماذا الكلام الآن . واحمد لم يعد له عاج ولا حتي سنون .ولقد صرح بانه عندما يتكلم فان النساء يسكتن . احمد عندما يتكلم يسكت نصف الشعب السوداني . وزوجات النبي صلي الله عليه وسلم كن يجادلنه . ولقد قال سيدنا عمر رضي الله عنه . اصابت المرأة واخطأ عمر .

ونسمع قوله ,, ان خطاب الرئيس سكت عن كثير من القضايا المهمة ,, طيب انتو منتظرين شنو في الحكومة بعد ده ؟؟ المرتبات والمخصصات . ونسمع ,,نناشد دول الجوار باسم الله وباسم الاديان ان تقف معنا في الظروف الصعبة التي نمر بها ,, آ خرتها بقت اديان؟؟ يعني مش دين الكيزان الاوحد . يعني اسرائيل داخلة في مد القرعة ده . اليهودية برضوا من الاديان السماوية . والكلام ده ماكنتوا بتقولوه لمن قرطعتوا البترول . وبنيتوا القصورفي ودبي ومليزيا ولندن . ودورتوا برنامج ساحات الفداء . وانتو خليتو جار ؟؟ . امبارح دي مش اتبجحتوا بتصدير السلاح لي ليبيا عشان الليبيين يكتلوا بعض . والنظام ده مش حاول يكتل حسني مبارك في بلد جار وهو الاقرب لنا . افريقيا الوسطي مسكينة فركتوها فرك ام تكشو . بس لو قدرتا افهم .

ونسمع طه يقول انه يتخوف من ان يتحول الحواربين الاحزاب الي حوار الطرشان . يا مفتفت السودان ، انتم لم تاتوا بحوار الطرشان ، انتم اتيتم بالطاغوت والطغيان . الحوار كان موجود وانت كنت رئيس المعارضة وانت رجل قانون . حولت كل هذا الي بيوت اشباح واغتصبتوا الرجال والنساء . عاوز بعدين تدور نفس الفلم بتاع الترابي بعد مايو اتملصتوا ونكرتوا النميري ومايو . المرة دي مافي زوغان يا علي عثمان .

طرو الحديد نطت الابرة . فضل الله برمه هز ماستر فويس ، طالع مداعي بيلم الناس للدخول في كيس الانقاذ . بس لو قدرتا اتخيل لانه الفهم هني مستحيل . البشير لمن ارتكب جريمة قتل مدنيين في المجلد وكتل اهل فضل اللة برمة في فرح وهو ظابط في الجيش وزمان العسكري بيحاكم علي ضياع فرش متاع ، الم يحمه وزير الدفاع وقتها برمة ؟؟ ومن وقتها الكوز جوه البرمة والشعب السوداني يدفع الثمن . كيف يعفي ظابط كبير من تهمة جنائية وعسكرية ؟؟ لان الظباط لايشاركون في مهزلة اطلاق رصاص بمدافع رشاشة بواسطة مدنيين في حفل. والاغرب ان الترابي هو الذي امر بترك البشير لانه كان مرشحا مع محمدين وآخرين للقيام بالانقلاب .

الماقدر افهموا ، ان البشير اهان الصادق وبلسان الصادق سمعنا الاهانات والتريقة . ايام الاعتقال . وعندما قبض الامن علي عمر اسماعيل المغترب والذي يعمل في جزيرة داس في بترول الامارات عندما زار منزل برمة . تفننوا في البطش به .وعندما قال لهم انه ذهب لزيارة اخته خديجة زوجة فضل الله برمة . قالوا له بانهم سيقتلونه اذا ذهب لزيارة اخته . وفضل الله وقتها في سجون البشير الذي حماه من القانون . بس لو قدرتا اتصور .

شيخ قطر كان في السودان . الراجل قبلما يهضم مرارة الكرامة ، يطب عليه الصادق . بس لو قدرتا اعرف هل دي دعوة لي قيدومة , تجنيد ، قرائة الراتب ، ولا ياربي للاطمئنان علي سلامة الوصول واستلام الايصال. لكن اي انسان ممكن يقول شحدة . انتو رايكم شنوا ؟؟

الاجندة المعلنة هي اصلاح ذات البين . ومصالحة اهل الخليج . غلبا راجلا داير تأدب حماها . المشاكل الفي السودان ، محتاجة لحكمة كسري انوشروان وكنفوشيوس وذرادشت وبوذا ، وانحنا عاوزين نصالح الآخرين .
ويقول الصادق ان قطر تقوم بدور رائد عربيا . يعني انحنا حنعرف العرب بي بعض . في النهاية رضينا ولا ابينا بالنسبة للعرب انحنا غرباء مهما عملنا .

مصطفي عثمان شحادين ، يدعوا للحوار . وهو ليس باحد المداعي كالآخري . شحادين هو ام العروس . والامر يهمه جدا وهو صاحب اجمل عاج . وما بحب التلتلة والتعب . الناس ديل فيهم العسكريين متعودين علي التلتلة والسجون ورقاد الواطا . لكن شحادين مابقدر علي جنس دة . ويقول بكل حنية ,, نصف رأيك عند اخيك ,, اخيرا اعتبرتونا اخوان ؟؟ ومن بتين ، وكيف . نسيت لمن وصفت الشعب السوداني يالشحادين ياكبير الشحادين . مش قلتا الما عاوزنا ما يمشي في ظلطنا ولا يشرب مويتنا وما يولع بي كهربتنا ؟؟؟ وين كان نصنا لمن بتوزع في اراضي السودان ذي الشبال في بيت اللعبة ، ولا الوينا مع ملاح ام بقبق ؟؟
ع . س , شوقي
.
[email protected]


تعليقات 16 | إهداء 0 | زيارات 2673

التعليقات
#970407 [سوداني متابع]
0.00/5 (0 صوت)

04-11-2014 11:22 PM
سلمت يا شوقي مقال ممتع بسرده و طرافته .

[سوداني متابع]

#970131 [ابوغفران]
5.00/5 (1 صوت)

04-11-2014 03:16 PM
ههههههااااا والله ضحكتنى جنس ضحك بمليون دولار مابتلقى...شكرا ليك ياعم شوقى .يافنجرى,يااصيل

[ابوغفران]

#970075 [ارنستو تشي]
5.00/5 (1 صوت)

04-11-2014 01:39 PM
والله يا عم شوقي ما قصرت مع الجماعة لكن الصادق قال عايز الشيخ تميم واسطه
عشان الانتقالية و المائدة المستديرة و تفلحون وتهتد ون وخعخعخعخعهعهعهعهغخعخعهعخعهع
وتميم ما فهم لكن قال الصادق كلامك ده كان علم الله يقبلو وكم دعاء اللهم امين
جمعه مباركة يا ابو الشوق

[ارنستو تشي]

#970044 [كرم]
0.00/5 (0 صوت)

04-11-2014 01:01 PM
شيخ علي عثمان طه المكروه ثقيل الدم يتكلم عن حوار الطرشان والله إنت أكبر أطرش

[كرم]

#970039 [اسامة الكردي]
0.00/5 (0 صوت)

04-11-2014 12:50 PM
بس يا أستاذ شوقي لو ألقى طريقة أوصل بيها كلامك دا وبصوت عالي لهؤلاء الحثالة ؟

[اسامة الكردي]

#969992 [الصادق... فضحنا..وشرط عينا..!!]
5.00/5 (2 صوت)

04-11-2014 11:43 AM
العزيز شوقي... كتر خيرك كتير

ياخ والله ريحتني بكلامك.... لكن من يستمع؟

أحب أعلق ليك على هذه الجزئية من مقالك(..ويقول الصادق ان قطر تقوم بدور رائد عربيا . يعني انحنا

حنعرف العرب بي بعض . في النهاية رضينا ولا ابينا بالنسبة للعرب انحنا غرباء مهما عملنا..)

والله صدقت.... وخليني أحكي ليك قصة حقيقية حدثت بالسعودية....

صديقي بروف يعمل بجامعة سعودية حكومية.... اتلصق فيهو سعودي - لمصلحة طبعاً -

... وصاحبو ليك مدة .... وبقي يشكر ليك السودانيين قدامو...

فقام البروف قال خليني أختبر صدق كلامو...

فسأله: أسه لو سوداني متلي كدا.... تقدم للزواج منكم.... تدوه؟

أها قام عمك السعودي ما كضب.... قال ليه: يا زول ها.... والله نحن السودانة ديل...

حتى فترة قريبة جداً.... بنعتبرهم عبيد..!!

سؤال بالجنبة كدة يا شوقي وانت تفهمها طايرة: هو الصادق ده مشى يشحد ولا شنو؟

والله فضحناوشرط عينا زاتو.... أنا ما حزب أمة... لكن برضو محسوب علينا كسودانيين.... وكمان من

أعيان السودانيين... مش كان رئيس وزراء تلات مرات؟... أها الخلايجة حا يقولو اذا كبارهم بعملو كده

طيب صغار العبيد ديل حا يعملو شنو؟

تحياتي لك

[الصادق... فضحنا..وشرط عينا..!!]

ردود على الصادق... فضحنا..وشرط عينا..!!
European Union [jakoma] 04-11-2014 01:15 PM
يا زول صغار العبيد ديل خليهم ساكت


#969983 [بت قضيم]
0.00/5 (0 صوت)

04-11-2014 11:34 AM
نسيت ديك العدة كمال عمر اخر تصريحاته انه يستغرب من مطالبة الاحزاب الغاء القوانين المقيدة للحريات وناسي انه قبل الوثبة كان احد المطالبين بالغاء هذا القانون

[بت قضيم]

#969973 [سوداني انا]
0.00/5 (0 صوت)

04-11-2014 11:21 AM
تشخيص للشخوص عجيب ..
صدقت والله ..

[سوداني انا]

#969964 [A. Rahman]
0.00/5 (0 صوت)

04-11-2014 11:14 AM
الغريبة يا شوقي يتكلموا عن صعوبة المعيشة بالنسبة للمواطنين، و خادم الله بت عصمان طه يتكلم عن حوار الطرشان، و وزارة الصحة تتكلم عن زيادة انتشار الإيدز و الامراض الاخرى و ان خمسين في المئة ما باقين دواء، و يتحدثون عن انتشار آفة المخدرات و الفساد المالي و الأخلاقي ، كل ذلك دون ان يقولوا لنا من هو الذي تسبب في كل ذلك؟ بس اوع يكون شوقي بدري. تحياتي.

[A. Rahman]

#969955 [sanmka]
0.00/5 (0 صوت)

04-11-2014 11:05 AM
الأستاذ شوقي لك التحية وجمعة مباركة، الواضح جداً أن غازي صلاح الدين والذي ينشط هذه الأيام وبهمة الشباب يسعي جاهداً لإعادة إنتاج سيئة الذكر الجبهة الإسلامية القومية، وهو يبسط مواعين لإستيعاب مرافيت المؤتمر الوطني، وكذلك الغاضبين عليه من عضويته وأكثر من أصابتهم الخيبة من فعائله، وبالتالي يريد أن يكون البديل الإسلامي للجبهة الإسلاميه والمؤتمر الوطني في ثوب جديد، وهو حريص علي أن إستيعاب كل الإسلاميين في وعاء آخر ونسي وتناسي أن هذا الشعب لديه مطالب وأولها نقد الذات، والإعتراف بالجرائم المرتبة بإسمه وفي حقة، ثم الإعتذار وطلب الصفح فيما يمكن فيه الصفح، والمحاسبة والمحاكمة فيما يستوجب المحاكة، وعبرك إستاذنا الجليل نقول للسيد غازي العب غيرها، ولن نجرب المجرب، ولن نلدغ من ذات الجحر مرة أخري

[sanmka]

#969945 [المشتهى السخينه]
0.00/5 (0 صوت)

04-11-2014 10:51 AM
الليله ياعم شوقى ياود العز ياب عينا مليانه صورة آخر اناقه وعينى بارده . وكلام فى المليان ضد المقطعين المقملين الاستحموا اول مرة يوم واحد يوليو سنة 1989 تانى يوم للانقلاب .ورئيسهم يخجل فى لبسو وشكلو ومشيهو وكلامو .والله عم شوقى ده اكل الهوت دوغ والبيتزا والسيمون فيميه والكافيار قبل ما تخلع الجيعانين المشردين .ولما كان بيركب التاكسى وعمرو عشرة سنوات فى امدرمان كانوا الجماعه بيحلبوا فى البقر ..قال فيهم الشاعر احمد عبدالمعطى حجازى .
همج رمت الصحارى بهم جنة المأوى
تهر كلابهم فيها وتجأر فى المدى قطعانهم
يمشون فى سحب الجراد
كأن ارجلهم لذؤبان
واعينهم لغربان
زرعوا خرابهم فى كل واد ..او كما قال .

[المشتهى السخينه]

#969942 [المذهلل]
0.00/5 (0 صوت)

04-11-2014 10:50 AM
الذي يحدث الان في السودان يذكرني ايام الرحمتات زمان..ها شفع الرحمتات جهزت تعالو اتملو،،لكن ما عارف الناس هسع جارية تحاور في شنو،اظن بشبش بقصد محاورة لكن الناس ما فهمتو ساكت

[المذهلل]

#969926 [على حمد ابراهيم]
0.00/5 (0 صوت)

04-11-2014 10:28 AM
حبيبى شوقى

اوقاتك سعيدة - مبتهج من هذا المقال و لا استطيع ان ازيد عليه حتى لا افسجده - يا صنو الاعجاز وتنينه ! تحياتى للاسرة .

على حمد ابراهيم

[على حمد ابراهيم]

#969922 [إسماعيل آدم]
0.00/5 (0 صوت)

04-11-2014 10:20 AM
بضاعتهم رُدت إليهم! وكما تُدين تُدان!و أقول ليك يا أخي شوقي باكر حا تشوفوا يوم القيامه في الجماعة ستأتي الجماهير من كل صوب و حدب و هم مدججين بالسلاح و لعلك تذكر كلام وزير الداخلية الأسبق- الزبير بشير عندما قال" الخرطوم فيها 48 مليشيا مسلحة" ده غير الجيوش الجاهز -خليل- عبد الواحد- محمد نور- عرمان-عقار- الحلو- و مني أركو وكل واحد من ذ الجيوش يمكن يهد الخرطوم طوبة طوبة وأظن شيخ فرح تنبأ بهذا الأمر!و ستبقي سوريا أو الصومال حاجة صغيرة بالنسبة لعركتنا الجاية!و أظن الضحايا معروفين!
قد يتمكن البعض من الهروب و لكن سنأتي بهم كما أتو بعبد العزيز خالد من دبي!يعني بالقانون الدولي و الإنتربول و محكمة لاهاي!
تعرف يا شوقي في مقديشو و في عز الحرب ، سأل مراسل البي بي سي صومالي فارش ليهو بضاعة فاخرة قائلاً " من أين لكم هذه البضاعة؟" تعرف الرد كان شنو ؟ قال الصومالي " البضاعة من فلل مقديشو!" يعني نهبوهم !!!
لذلك عليهم التوبة و طلب العفو من الشعب بعد إعترافهم و إرجاع الحقوق لأصحابها و الإعتذار لأهل الضحايا-أمثال مجدي و محمود محمد طه و د. فضل,,,,,,,إلخ القائمة الطويلة

[إسماعيل آدم]

#969893 [هجو نصر]
0.00/5 (0 صوت)

04-11-2014 09:32 AM
ظلطنا , كهربتنا , مويتنا ! الظاهر انه جدو اسماعيل الذي هو اكثر عروبة من كافة العرب الزهر الوجوه والغربان كما افتي فيلسوف المصاروة الهندي قد سجل لحفيده كاغة السودان حبا وكرامة ! اخونا شوقي ! زح لي ابكي معاك !

[هجو نصر]

#969850 [عنبر عمر الطيب]
0.00/5 (0 صوت)

04-11-2014 08:33 AM
كلام في المليان

[عنبر عمر الطيب]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية

الاكثر تفاعلاً/ق/ش

الاكثر مشاهدةً/ق/ش

الاكثر تفاعلاً/ش

الاكثر مشاهدةً/ش







الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة