الأخبار
أخبار إقليمية
لن تنفصل ولكن
لن تنفصل ولكن
 لن تنفصل ولكن


04-17-2014 02:41 AM
د.عبد اللطيف البوني

في تقديري أن الذين يتحدثون عن أن تقرير المصير يمكن أن يفضي الى انفصال دارفور عن بقية جسد السودان قد جانبهم التوفيق لعدة أسباب منها أنهم اتخذوا من قصة وقضية الجنوب معيارا وسابقة فقضية الجنوب بدأت بالمطالبة بشكل من أشكال الخصوصية لأن قطار السودنة قد فات الجنوب ثم تطورت الى المطالبة بحكم ذاتي ثم فدرالي ثم كونفدرالي ولكن لعدم الاستجابة والتجاهل والركون للحل العسكري تحرك قطار القضية في خط مواز الى أن وصل محطة الانفصال فهذا لن يحدث في دارفور ليس لأن التاريخ لا يعيد نفسه وإذا حدث تكون الأولى مسخرة والثانية مأساة والنهر لا يجري في ذات المجرى مرتين هذا من حيث المبدأ .

قضية دارفور وإن بدأت بالمطالبة بشيء من الخصوصية والتمييز الإيجابي لكي تلحق ببقية أجزاء السودان التي حاباها الحكم الوطني فتكوين دارفور الديمغرافي والجغرافي والأهم الثقافي مختلف عن الجنوب فدارفور جزء أصيل من نسيج السودان الثقافي الحالي أي سودان ما قبل وبعد انفصال الجنوب لا بل يمكن اعتبارها مرجعية من مرجعيات الثقافة السودانية الحالية. أما من ناحية الجغرافية السياسية فإن كان جنوب السودان منكفئا على نفسه رافعا شعار الهوية الافريقية في مواجهة الهوية العربية فإن دارفور مشدودة نحو العاصمة أكثر من أي إقليم آخر من أقاليم السودان فالأغنياء في دارفور عندما تضيق بهم أسواق دارفور يتجهون للاستثمار في العاصمة وكذا فعل الفقراء والنازحين عندما ضاقت بهم الحياة هناك فقد اتجهوا نحو العاصمة ومن ثم لبقية السودان النيلي حدث هذا ويحدث منذ المهدية الى يوم الناس هذا .

مشكلة جنوب السودان تم تكييفها حقيقة ام تزييفا على أساس قضية مواطنين درجة ثانية ضد جلاديهم فنشأت عقيدة وحدت النخبة الجنوبية ضد الشمال وهذا لم ولن يحدث لأهل دارفور لا بل المكون المحلي لمشكلة دارفور أكبر من المكون الخارجي فالخلافات بين أهل دارفور موجودة أصلا ولكنها كانت تحل في إطار تقليدي لذلك ظلت محدودة فالجديد تدخل الدولة فيها الأمر الذي عملقها وعمقها وشعبها فجناية الدولة في دارفور أنها ناصرت بعض سكان الإقليم على بعضهم فأصبح بعضهم أقرب للمركز من قربه لدارفور من حيث السياسة والمصلحة ولعل هذا كان حادثا في دارفور قبل تفجر أحداث 2003 فحزب الأمة الذي اشترك في حكم السودان ثلاث مرات وكاد أن ينفرد به ذات مرة كان دعمه الأساسي من دارفور.

تطور الأحداث في مشكلة الجنوب مكن الحركة الشعبية من السيطرة السياسية على مجريات الأمور في الجنوب لذلك وقع الجنوب في عبها كدولة مستقلة بكل سهولة وليس هناك فصيلا دارفوريا يمكن أن يصل ما وصلت إليه الحركة الشعبية في الجنوب لكل هذا وغيره فإن أي دعوة لحكم ذاتي او انفصال لدارفور في الوقت الحالي تعتبر غير واقعية لكن إذا استمرات مشكلة دارفور في تفاقمها الحالي فإن كل عقد السودان معرض للانفراط فلن يكون هناك سودان موحد ناقص دارفور بعبارة أخرى دارفور لن تنفصل من السودان ولكن في مقدور مشكلتها أن تفرتق السودان حتة حتة لذلك ينبغي أن تمنح الأولوية في معالجة أوجاع السودان الماثلة والقاتلة في نفس الوقت بعبارة ثالثة دارفور التي تمثل دار حرابة اليوم لن تكون دار انفصال إنما دار تفكيك والشرح الكثير يفسد المعنى.

السوداني


تعليقات 26 | إهداء 0 | زيارات 4433

التعليقات
#977048 [madibo]
0.00/5 (0 صوت)

04-18-2014 06:09 PM
اعوام عددا لم نستفيد من وحدة الدولة السودانية فمن حقنا كشعب دارفور تكون لنا دولة مستقلة وننميها .

[madibo]

#976216 [أبوالكجص]
0.00/5 (0 صوت)

04-17-2014 04:25 PM
حقو دي تعيد فيها النظر يا دكتور فهي ليست حجة كافية لتصبح جزئية مقارنة في طرحك الذي ورد في المقال لأن أهل الجنوب، بنفس القدر، وحتى هذه الساعة، عندما تشتد عليهم الإحن والمحن والبلايا يأتون شمالاً ولايذهبون إلى يوغندا أو غيرها:

إقتباس: فالأغنياء في دارفور عندما تضيق بهم أسواق دارفور يتجهون للاستثمار في العاصمة وكذا فعل الفقراء والنازحين عندما ضاقت بهم الحياة هناك فقد اتجهوا نحو العاصمة ومن ثم لبقية السودان النيلي حدث هذا ويحدث منذ المهدية الى يوم الناس هذا .

[أبوالكجص]

#976215 [كرتوت]
5.00/5 (4 صوت)

04-17-2014 04:24 PM
والله يادكتور البوني نحن ابناء الغرب بسطاء ونحب اهلنا السودانيين في كل مكان ونحن على قناعة تامة ان الافريقية المناهضة للعروبة مجرد كذبة ليس الا ونحن على قناعة ان الثقافة العربية تخدم مصالحنا اكثر من غيرهالارتباطها بالدين الذي اخترناه طواعية لكن حكومات الشمال هي اس البلاء والكل يعرف ذلك .ثم لماذا رسخ في اذهاننا مفهوم ان السودان لن يحكمه الا عربي او شمالي لماذا يقول البشير للصادق المهدي لو ماعملتوا حسابكم حا اكون اخر رئيس عربي يحكم السودان وماذا لوكان غير عربي او غير شمالي ولماذا التخوف؟انا باعتقادي انه لو كان هناك عدل لايمكن ان تتخوف جهة ما من اخرى في مسألة الحكم واتمنى كما فاز المهدي في الانتخابات بمناصرة ابناء الغرب له ,اتمنى ان يفوز واحد من ابناء الغرب بمناصرة من ابناء الشمال اتمنى ان يفوز نوباوي مرشح من حزب تم تأسيسه في شندي او دنقلا ..مع كل الاحترام والود للقراء الافاضل

[كرتوت]

ردود على كرتوت
[ود اللفة] 04-18-2014 10:24 AM
لا تركز علي ابناء الجهات ركز علي صاحب العطاء والكاريزما في ادارة البلاد
الصادق هو سبب البلاوي جاء بمناصريه لمناصب الدولة وسلح القبائل في دارفور وهذا ما جناه السوادن
أترك البساط وكنوا عاقلين تعرفوا حقوقكم وواجباتكم ، هذا هو المفيد ليست البساطة التي تصاحبها تعقيد.


#976201 [ابو احمد]
5.00/5 (1 صوت)

04-17-2014 04:13 PM
.

[ابو احمد]

#976179 [عبيد الله]
0.00/5 (0 صوت)

04-17-2014 03:54 PM
1/ فلن يكون هناك سودان موحد ناقص دارفور . 2 دارفور لن تنفصل من السودان ولكن في مقدور مشكلته أن تفرتق السودان حتة حتة . 3/ دارفور التي تمثل دار حرابة اليوم لن تكون دار انفصال إنما دار تفكيك والشرح الكثير يفسد المعنى .( كأن اللذين أنفصلوا تهنوا بالانفصال . الانفصال أصبح وبال عليهم رغم وجود البترول . ومازال الوبال مستمر حتى يصل للدرك الاسفل . ساعتها تروح السكرة وتجي الفكرة ( بفتح الفاء ) مع كل الحب والاحترام والتقدير لك أخي البوني )

[عبيد الله]

#976176 [mukak]
3.00/5 (2 صوت)

04-17-2014 03:51 PM
دكتورنا العزيز انت تغرد خارج السرب لانك تخاف ان تقول الحقيقة والامر بسيط فالآن نحن نتحدث عن700الف شهيد في 11سنة من الإبادة أي العدد وصل الي ما كان في رواندا 1994م وقد يتجاوزها اذا ما تم الإحصاء بدقة والعدد يتزايد بمعدل كل ساعة وانتم يا اهل السودان تتفرجوا علي مصيبة اهل دارفور بتلذذ أي والله والا لماذا لم تخرجوا طوال 11 عام ولامرة واحدة استنكارا لما يحدث وتضامنا مع الضحاياوضغا للحكومة لايجاد حل واذا حدث ابسط شيء في القاهرة او في غزة ترى المسيرات تترى والمجاهدون والعلماء والمحامون يتقدمون الصفوف ... عجبا يا بلادي !! وانتم أيها الصحفيون شعاركم انكم تنتزعون الحقيقة ولو من بين انياب الذئاب ولكن في حالة دارفور كذبتم فلم يتجرا صحفي سوداني واحد ان يذهب الي دارفور بنفسه وليس في معية وفد حكومي لكي يتقصي الحقائق من مصادرها الأساسية ويصل للحقيقة المرة التي تجعل الحرب مستمرة بل اكتفيتم اما بالتفرج او الكتابة الهزيلة المستحية او ترديد ما تنقله وسائل الدولة الرسمية , وهذا لعمري سيكون واحدا من اقوي دوافع المطالبة بالانفصال أي عدم التضام وكيف تقنع واحد ضحية من دارفور انك معه وان السودان جسد واحد اذا اشتكي منه عضو تداعي له سائر الجسد بالسهر والحمي . أيها الدكتور العزيز هل تستطيع او يستطيع أي صحفي سوداني ان يقول ما قالته الدكتورة عائشة البصري من حقائق ؟ اذا كان لكم شجاعة وامانة وصدق تلك الامرأة حينها سنقول لن تنفصل دارفور . وارجو الا تتفاجا يا دكتور فنحن من الان بدانا نعد العدة لاعلان استقلال دارفور في الذكري المئوية المشؤومة لضمها الي السودان حيث لا معني لان نخدع انفسنا ونتظاهر بالمحبة والوحدة والحقيقة غير ذلك . لك شكري وتقديري

[mukak]

#976129 [mukak]
5.00/5 (2 صوت)

04-17-2014 03:10 PM
دكتورنا العزيز انت تغرد خارج السرب لانك تخاف ان تقول الحقيقة والامر بسيط فالآن نحن نتحدث عن700الف شهيد في 11سنة من الإبادة أي العدد وصل الي ما كان في رواندا 1994م وقد يتجاوزها اذا ما تم الإحصاء بدقة والعدد يتزايد بمعدل كل ساعة وانتم يا اهل السودان تتفرجوا علي مصيبة اهل دارفور بتلذذ أي والله والا لماذا لم تخرجوا طوال 11 عام ولامرة واحدة استنكارا لما يحدث وتضامنا مع الضحاياوضغا للحكومة لايجاد حل واذا حدث ابسط شيء في القاهرة او في غزة ترى المسيرات تترى والمجاهدون والعلماء والمحامون يتقدمون الصفوف ... عجبا يا بلادي !! وانتم أيها الصحفيون شعاركم انكم تنتزعون الحقيقة ولو من بين انياب الذئاب ولكن في حالة دارفور كذبتم فلم يتجرا صحفي سوداني واحد ان يذهب الي دارفور بنفسه وليس في معية وفد حكومي لكي يتقصي الحقائق من مصادرها الأساسية ويصل للحقيقة المرة التي تجعل الحرب مستمرة بل اكتفيتم اما بالتفرج او الكتابة الهزيلة المستحية او ترديد ما تنقله وسائل الدولة الرسمية , وهذا لعمري سيكون واحدا من اقوي دوافع المطالبة بالانفصال أي عدم التضام وكيف تقنع واحد ضحية من دارفور انك معه وان السودان جسد واحد اذا اشتكي منه عضو تداعي له سائر الجسد بالسهر والحمي . أيها الدكتور العزيز هل تستطيع او يستطيع أي صحفي سوداني ان يقول ما قالته الدكتورة عائشة البصري من حقائق ؟ اذا كان لكم شجاعة وامانة وصدق تلك الامرأة حينها سنقول لن تنفصل دارفور . وارجو الا تتفاجا يا دكتور فنحن من الان بدانا نعد العدة لاعلان استقلال دارفور في الذكري المئوية المشؤومة لضمها الي السودان حيث لا معني لان نخدع انفسنا ونتظاهر بالمحبة والوحدة والحقيقة غير ذلك . لك شكري وتقديري

[mukak]

ردود على mukak
[ود اللفة] 04-18-2014 10:02 AM
أنت تطلب الصحفيين يذهبوا ليتقصوا الحقيقة، أنت ما سمعت بمقتل المترجم المرافق لوفد أممي وعايز الصحفيين يمشوا ليهم ديل عايزين اجانب فقط


#976110 [الامين]
5.00/5 (1 صوت)

04-17-2014 02:56 PM
انا من راي السودان عايز حكم دكتاتوري عنيف لا يعرف عربي ولا فوراوي ولا نوباوي يحكم بعنف وبعدل
ويلزم الصمت الى ان ينعدل الحال ويامر كل الشباب بالعمل والتنمية يهمنا كلنا نعيش كويس الحرية ما نفعتنا بشي . معليش اذا جوا الانجليز يحكمونا مافي مانع. تعبنا منكم انتظرناكم خمسين عام وهو هو انتوا
حكام ومعارضة يهمكم نفسكم انانية

[الامين]

#975994 [ود نمر]
0.00/5 (0 صوت)

04-17-2014 01:30 PM
شنو يعنى نميز دارفور عن بقية اقاليم السودان ما اقاليم السودان كلها متخلفة مشكلة دارفور ممكن تتحل في يوم واحد90% من المشكلة في يد الحركات المسلحة والباقى في يد الحكومة

[ود نمر]

#975899 [الحسيني]
0.00/5 (0 صوت)

04-17-2014 12:03 PM
احبطت الكيزان واحبطت علي عثمان واحبطت الصهاينة الجماعة قطعوا شوط كبير في محاولة فصل دارفور انت تجي تقول مستحيل؟؟؟الله يحفظ البلد

[الحسيني]

#975888 [هجام]
0.00/5 (0 صوت)

04-17-2014 11:51 AM
تجربة انفصال الجنوب هى فعلا عظة لعبره ولكن اثبت التجارب
ان كل من اعطى حق تقرير مصيره انفصل وذلك لان مع التقرير
دائما يحصل تحشيد عاطغى فى اتجاه الذاتية ويغيب بعد النظر
المنطقي للمآلات المستقبلية.

[هجام]

#975879 [ali almsnd]
5.00/5 (2 صوت)

04-17-2014 11:45 AM
بسم الله الرحمن الرحيم
يا دكتور البوني المشكلةلبست مشكلة دار فور ولا جنوب كردفان ولا النيل الازرق ولا كانت الجنوب . المشكلة هي مشكلة السودان ككل اذ انه لم يهتم هحد ببناء دولة بل هم ورثوا نظام حكم تركه الاستعمار وسازادوا عليه وتقاتلت الاحزاب في من يحكم او في تطوير نظام الحكم .ام بناء دولة لا اظن انه خطر ببال احد .الاستعمار لم يهتم ببناء دولة فلم تكن تلك رسالته انما حكم المنطقة حسب مصلحته وكفي .ما قاد للالتبس انها كانت اظهر غي الجنوب فجبال النوبة والانقسنة فشرق السودان فدارفور وقد تظهر في منطقة اخري اذااستمر النظر اليها علي اساس انها مشكلة منطقة معزولة عن بقية السودان ( منطق البصيرة أم حمد ).
المشكلة مشكلة الدولة السودانية ككل وتحل في اطار الكل ,

[ali almsnd]

#975871 [هجام]
0.00/5 (0 صوت)

04-17-2014 11:42 AM
4-اذا اردنا لدارفور الا تنفصل يجب تفعيل مبدأ المحاسبة
واامحاكمات لكل من اخطأ لكى كى نغسل ما وقر فى
النفوس من ظلامات كما حصل فى رواندا بعد المجازر البشعة
فى تسعينات القرن الماضى.

[هجام]

#975870 [harera]
0.00/5 (0 صوت)

04-17-2014 11:42 AM
نفس الكلام دا قالوا عن الجنوب وبرضو انفصل ....صدقنى كان الله مدا فى الايام ح تشوف دولة دارفوار يا دكتور .....

[harera]

#975865 [شعيب آدم الجاك]
5.00/5 (2 صوت)

04-17-2014 11:39 AM
صباح الخير استاذ البوني
(قضية دارفور وإن بدأت بالمطالبة بشيء من الخصوصية والتمييز الإيجابي لكي تلحق ببقية أجزاء السودان التي حاباها الحكم الوطني)
نحن من عمقنا في نفوس اهلنا في دار فور بأنهم مهمشين بمثل هذا الكلام
يا بروف الآن ومنذ قيام مشروع الجزيرة تقريبا سكان دار فور شراكة فيهو( والآن ناس دار فور في الجزيرة اكثر من سكان الجزيرة ) هذا حق لكل سوداني أن يستقر في الموقع الذي يجد فيه نفسه إن استطاع الاستقرار .
الآن سكان الخرطوم وامدرمان تحديدا جلهم من ابناء دار فور وهذا ايضا حقهم لأنهم ملكوا لبيوت بجهدهم .
وزي ما ذكرت في مقالك هم ينتشرون في كل انحاء السودان حاضرها وبواديها وهذا ديدن التجار الناجحين .( هذا من الناحية الديموغرافية والحراك .
اما من الناحية الجغرافية
فسؤالي المنطقي أو الذي اظنه منطقي هو
أي اجزاء السودان التي حاباها الحكم الوطني ؟
اللهث وراء ارضاء ابناء دار فور جعلنا نكتب كلام سااااكت يا بروف
كفايه علينا محاولات الكيزان في ارضاء حركات التمرد والشراء بمال الشعب ( الذي اصبح نصفه منهوب ونصفه شراء سلاح وشراء متمردين )
دونكم ما فعلتموه لإرضاء الحركة الشعبية لكني اراكم قوما لا تتعظون

[شعيب آدم الجاك]

ردود على شعيب آدم الجاك
European Union [المندهش] 04-18-2014 02:06 AM
هذا هو المنطق وبالمناسبه دكتور البونى اكثر شخص يعلم ان كل الحكومات ناصبت اهل الجزيره البسطاء العداء الا ان اهل الجزيره يختلفون تماما عن اهل دارفور لانهم يعتمدون على انفسهم وابنائهم بالخارج لحل مشاكلهم بالعون الذاتى اما اهل دارفور يكرهون العمل ودائما يتطلعون للحكومه اوالاخرين لحل مشاكلهم خاصة الرجال وهذا امر معروف وحقيقه على اهلنا فى دارفورالقبول بها.صحيح ان الحكومات المتعاقبه ساهمت فى تعقيد ازمة دارفور ولكن هذا لا ينفى ان اصل الازمه فى دارفور حضارى يتعلق بفهم انسان دارفور للحياه علاوه على الثقافه القذره السائده فى الاقليم والتى لا تسمح الا بسفك الدماء اقبلوا الحقائق المره يا احبتنا الاماجد واوقفوا تمثيل دور الضحيه


#975864 [هجام]
5.00/5 (1 صوت)

04-17-2014 11:38 AM
3-حل معضلة الحكم فى السودان عموما والتى بدأت بدخول
الاتراك وإلغائهم لنظم الحكم التى تعارف عليها السودانيون
وابدالها بمركزية لم تراعى التنوع والتعدد،وتفريخهم لفئات بعينها
لمساعدتهم على الحكم،واستمر هذا الوضع مع الانجليز وبعد
خروجهم،مما ادى لعدم التنمية والظلامات والحروب.

[هجام]

#975857 [ود الدلنج]
5.00/5 (4 صوت)

04-17-2014 11:34 AM
الاسباب التى عجلت بذهاب الجنوب هى الان قائمة وبصورة مخيفة لان الهوة الان أصبحت متسعة جداً وهى القائمة على أساس عنصرى ونقاء عرقى حتى أصبحت هى الثقافة السائدة لمعظم أبناء السودان ستذهب كل من دارفور وجنوب كرفان وجنوب النيل الازرق في عهد الإنقاذ إذا ما اعطيت جزيرة توتى حق تقرير المصير ستختار الانفصال ناهيك عن اهل الهامش الذين سامتهم هذه الحكومة سوء العذاب قتلت ابنائهم واغتصبت حرائرهم وسيبقى مثلث حمدى فقط

[ود الدلنج]

#975780 [هجام]
5.00/5 (2 صوت)

04-17-2014 10:23 AM
2-التدافع الاجتماعى العنيف ما بين رعاة يتحركون بطول الاقليم
وزراع مستقرون مما يؤدى لاحتكاكات متكررة ألجمها فى السابق
العرف الاجتماعى ولكن يظل هذا الحراك مصدر خطير لتمزيق
لحمة المجتمع.يجب مخاطبة هذه المشكلة بابتكار اساليب جديدة
من التنمية تقلل من الحركة الدائبة للرعاة كما حدث فى امريكا
وغيرها من الدول بان تنشئ الدولة حظائر ومصانع مستقرة
للماشية وادخال المفاهيم الصناعية لقطاع الرعى.

[هجام]

#975769 [ابوهاني]
0.00/5 (0 صوت)

04-17-2014 10:14 AM
فلن يكون هناك سودان موحد ناقص دارفور بعبارة أخرى دارفور لن تنفصل من السودان ولكن في مقدور مشكلتها أن تفرتق السودان حتة حتة لذلك ينبغي أن تمنح الأولوية في معالجة أوجاع السودان الماثلة والقاتلة في نفس الوقت بعبارة ثالثة دارفور التي تمثل دار حرابة اليوم لن تكون دار انفصال إنما دار تفكيك والشرح الكثير يفسد المعنى.

يادكتور تفرتق السودان حته حته مش أفضل الانفصال ياخى انتم تتحدثون عن مشكلة دارفور ولم تتطرقوا من الذي اشعل الفتنة وما هو الذي تسبب في الحروب الدائرة في دارفور . فالحكومة الحاضرة هذه سبب المشاكل الان في دارفور فإنت عندما تكتب مقال كهذا أفضل أن تكتب عن جذور المشكلة وما هو الحل وحكومة المؤتمر الوطني ممكن تحل مشكلة دارفور ولكن يوجد بعض المتنفذين فيها لا يريدون حل هذه المشكلة كما فعلوا في الجنوب فالان يعاودون الكرا لدارفور .

[ابوهاني]

#975765 [هجام]
0.00/5 (0 صوت)

04-17-2014 10:11 AM
تحياتى استاذ البونى:
لقضية حريق دارفور عدة ابعاد ان لم تخاطب بشفافية وصدق
فكل السيناريوهات محتملة:
1-العقلية العصبوية التى تدير الامور فى المركز والكتاب
الاسود يقف شاهد ملك بحقائقه الواضحة الرصد منذ الاستقلال
واذكت هذه العقلية تغذية الصراع بابتكار ورطة الجنجويد التى
زادت اللهيب ضرام.

[هجام]

#975737 [ودالجزيره]
5.00/5 (1 صوت)

04-17-2014 09:49 AM
لم توفق فى تحليلك هذا يادكتور البونى..؟؟
مشكلة السودان الرئيسيه الان هى دارفور ...فبانفصال دارفور تحل مشكلة السودان كله...ويرجع السبب فى ان اهل دارفور مشكلتهم الاساسيه عينهم على حق غيرهم ...فهم يريدون ان يكون رئيس الجمهوريه من دارفور وبذلك يتحكموا فى كل السودان .واعادة تجربه الخليفه عبدالله التعايشى الذى اذاق ابناء النيل الويلات ونكل بهم وقتل رجالهم والقت النساء بنفسها فى النيل ...ان انفصال دارفور مطلب اساسى وغير قابل للمساومه ..وسيحدث ذلك عاجلا ام اجلا..؟

[ودالجزيره]

ردود على ودالجزيره
European Union [المندهش] 04-18-2014 02:20 AM
ىا ود الجزيره كلامك صاح 100% والدارفورى ده عارف كلامك صاح لكن خجلان من حكاية ناس دارفور عينهم على حق غيرهم دى لذلك حرف الكلام لمسألة منصب الرئيس والكلام الفارغ ده وكأن الرئيس بمثل اهل الجزيره او الشماليه .لو ما فاهم افهمك يالدارفورى الواحد منكم لو امن النجاة ممكن يقتل اخوه فى سندوتش والمثل الدرفورى بقول اخوك لو سبقك بلقمه اعلن حرب.

United States [ود دارفور] 04-17-2014 02:53 PM
ود الجزيره .. لم اجد سودانى غيرك مريض ومنكفئ على نفسه ومصاب بكل العاهات النفسيه والعقليه .. ده لو اصلا انت سودانى .. من غير المنصف انك تختذل مشكلة دارفور ومن ثم مشكلة السودان فى انو اهل دارفور يسعون خلف مقعد الرئاسة والذى لا يسمن ولا يغنى عن جوع .. دعنى اشرح لك مشكلة دارفور ومشكلة السودان من بعد حسب رؤيتى ؟
اولا .. من يتحكمون فى مصير الوطن من هم على شاكلتك (النخبه البغيضه من كل اثنيات السودان و التى استولت على السلطه والمال العام, مهوسين با الاستعلاء السياسى والدينى الخ ...
ثانيا .. مشكلة دارفور تكمن فى التأخر التنموى وضعف المشاركه فى المؤسسات القوميه ( تمثيل دبلوماسى - الجيش - الشرطه الخ .. وحسب اعتقادى هناك اختلال فى توزيع الفرص ليشمل مناطق اخرى غير دارفور.
ملحوظه : بعض الحركات المسلحه تحمل زات الاجنده(الاقصاء (يعنى زيك كده) والخ .. وبالتالى لا تعبر الا عن نفسها.

الحل !
علاج من هم على شاكلتك ( التأهيل والتدريب على معنى الوطن الكبير واحترام ثقافة الاخر) صدقنى حتجى الطيش ..
لو رضيت او ابيت هى جايه جايه ( ثوره حقيقه ضدك وضد الزيك ,ديمقراطيه حقيقه قايمه على تنظيمات مجتمع مدنى واعى بقضايا الوطن الكبير الخريطه القديمه من حلفا لنمولى.. ومشروع الجزيره ينهض من تانى وحقول القمح فى الشمال تنتج قدرتا والتعدين فى الشرق والمويه داخله كل بيت ودارفور وثروتا الحيوانيه وزراعة المطر فى القضارف وكردفان وووووووووو بس اختونا انتو !

United States [دارفوري] 04-17-2014 12:36 PM
انتو جيتو كيف مادام النساء رمو نفسهم في البحر
طيب البشير عمل اكتر مما عمولو الخليفة

[حاج ابكر] 04-17-2014 11:21 AM
يا ود الجزيره انت لمست الجرح القديم الذى لم يندمل بعد دارفور عقده اكثر من مشكله اقليم وكل القاده الدارفورين يتحدثون بطريقه لا تؤدى الى مصلحه المواطن الدارفورى و عقده الجلابه مسيطره عليهم نحن نحارب الجلابه بالعلم بالفهم بالترقى فى السلام المدنى و الحضارى بعد ذلك الجلابه حيكون عندهم عقده اولاد دارفور وهكذا يقول التاريخ و الصراع الحضارى فهل وعينا الدرس ام الدواس هو الطريق الوحيد الى الخرطوم؟


#975729 [برعي]
5.00/5 (3 صوت)

04-17-2014 09:42 AM
د البوني : مع احترامي الا ان التحليل سطحي ولا يرقي لمستوي صحفي مميز مثلك عموما دارفور تسير نحو الانفصال او التفتت بقوة للاتي :
1)استقلال دارفور حتي العقد الاول من القرن الماضي ، يعني ما دخلت في السودان الا قبل حوالي 100 سنةوعليه فان اطار الانصال موجود كاقليم جغرافي وسكاني ....الخ
2 ) النسيج الاجتماعي الاثني والقبلي المعقد خاصة مع وجود تعالي من القبائل العربية علي القبائل الافريقية، عدم وجود سلم اجتماعي.
3 ) الفقر الاقصتادي الفاضح واعتماد السكان الافارقة علي الزراعة البدائة ( الحواكير ) واعتماد القبائل العربية علي الرعي التقليدي
4 ) الضعف العام في الوضع الاداري الحكومي والمني والعسكري خاصة في عهد الانقاذ وقيام الحكومة بزيادة نار الفتنة باتباع اسليب قذره متمثلة في تكوين مليشيات قبلية عربية ( الجنجويد التي ادمجت الان في الجيش وسميت بقوات التدخل السريع وهي مليشيات تاتمر بامر قواد محليين امثال حمدتي وموسي هلال )
وعليه ، مش دارفور بس الاحتنفصل بس السودان كلو لن يعود له وجود وسيرجع من حيث اتي عبارة عن دويلات تحارب بعضها بعضا وارجوك ارجع للتاريخ السوداني الموجود في الكتب
وشكرا

[برعي]

#975724 [سوداني]
4.00/5 (2 صوت)

04-17-2014 09:35 AM
قل خيراً او صمت
من قال ان دارفور تطالب بالانفصال
نفس النغمة ان الجنوبين نزحوا للشمال ابان الحرب وانتم ايها الصحفيين المطبلاتية قلتم انهم مع الوحدة
من القال اعلاه "( فالأغنياء في دارفور عندما تضيق بهم أسواق دارفور يتجهون للاستثمار في العاصمة وكذا فعل الفقراء والنازحين عندما ضاقت بهم الحياة هناك فقد اتجهوا نحو العاصمة ومن ثم لبقية السودان النيلي حدث هذا ويحدث منذ المهدية الى يوم الناس هذا )."

اي جزء من السودان عزيز علينا ولن نفرط فيهو ابداً وهو قدرنا ان نعيش معاً ونتعايش معاً

وللتاريخ نحمل الحركة الاسلامية الفاشلة فصل جنوب السودان واتمنى ان يعود الجنوب الى الوطن

[سوداني]

#975716 [بت قضيم]
5.00/5 (1 صوت)

04-17-2014 09:29 AM
استاذ البوني لك التحية مقالك المبهم اعلاه هل هو رسالة الي نفسك ام فقط تريد الكتابة لقد افتقدناك فترة في دوحة الراكوبة لعل اسلوبك في الكتابة قد انحرف عن السخرية ولا حاجات تانية اخفتك انا اتحدث عن نقل كتاباتك من الصحف للراكوبة لا نعلم ما هو السبب وفي الغالب يكون تغير اسلوبك الساخر في الكتابة الى اسلوب اكل عيش لنرجع الى دارفور لن تنفصل قد يبدو انك تحاول اقناع نفسك بهذا المقال لتاكد فيه بدون تحليل منطقي بعدم انفصال دارفور وكما قلت التاريخ يعيد نفسه وسترى ثانية سلطنة دارفور وكسوة الكعبة الشريفة

[بت قضيم]

#975622 [نصر الله]
5.00/5 (1 صوت)

04-17-2014 06:32 AM
دكتور البوني لك التحية وانا احد طلابك ----- دار فور لن تنفصل لان دار فور موجودة في كل السودان
ماساة دار فور الحالية صنعتها هذه الحكومة الامنية والتي يمكن ان نقول عنها حكومة عميلة لان ما قامت به وتقوم به في دار فور هو في مصلحة الاعداء وليس مصلحة السودان -- ودافع اقزام هذه الحكومة للقيام بكل هذا هو الخوف وليس الا -- الخوف سببه محاولة ابناء دار فور وكردفان انشاء كيان جهوي عريض باسم كيان الغرب -- فالخوف من ذلك قاد ويقود هذه الحكومة الامنية الى فعل كل ذلك خوفا وليس للسودان مصلحة في ذلك -- فدار القوية هى سند قوي للسودان وفعلا دار فور قوية -- قوية بتاريخها قوية بقوتها البشرية الكبيرة وذات الباس الشديد قوية بعزم رجالها وطموحاتهم الكبيرة قوية بثروتها الضخمة من الماشية الى البتول والذهب واليورانيوم-- اذا توحد اهل دار فور الان وبعد كل هذا الردم بالطائرات وغيرها فعلى هذه الحكومة الامنية الف سلام -- ذلك اذا توحد اهل دار فور فقط من اجل مصلحة السودان -- فما بالك اذا اضفت عليهم الجزء الاخر من كيانهم الذي لا بد ان يكون ومن مصلحة السودان ان يكون هذا الكيان الممتد من الجنينة الى مشارف ام درمان مع جيوبة المتداخلة في ارض الجزيرة وشرق السودان حتما هذه الصورة المقلوبة سيتم تعديلها -- لكن يظل عشمنا ان يتم كل ذلك بالاستدراك العقلي والعاقل للحفاظ على مكونات السودان السمحة جميعها متآلفة ومتوافقة على تحقيق العدالة والمساواة وبناء وطن الجدود الذي نعتزبه جميعا --- لكن يقيني ان هذا التدافع الذي يجرى الان سيوصلنا الى برالامان اذا احببنا وطننا وكل مكوناته-- والا التفكيك ات ولات حين مناص

[نصر الله]

ردود على نصر الله
[ود اللغة] 04-18-2014 09:30 AM
أنت وبروفك عواستكم نية ، دارفور انضممت للسودان 1916 شوف حدودها كانت وين؟!! تقول لي ام درمان والجزيرة وشرق السودان.
كمان بروفك عامل ليكم تميز ايجابي، زول يخلي تعمير منطقته يعمل ليه تميز ايجابي ليه؟!! يابروف ارجع اللعوته وما تكتب تاني كلامك الفطير دا كما علق قارئ هنا


#975589 [انصاري]
5.00/5 (6 صوت)

04-17-2014 03:15 AM
تحليل فطير..دارفور تسير .. حذو النعل بالنعل لمأساة الجنوب .. ماظلت عقلية (الجلابة).. في المركز ونخب الشمال النيلي .. ومن يدور في فلكهم .. تفكر بمثل ما تروج له..

حكم ذاتي .. تقرير مصير .. ثم إنفصال.. وستليها .. جبال النوبه .. النيل الأزرق .. شرق السودان ..
...وهكذا دواليك..
مشكلة دارفور .. أوصلت (السفاح) البشير إلي المحكمة الجنائية الدولية .. وجعلته كالفأر المذعور .. قابع في السودان .. ويباري الحيط .. من تشاد .. إلى أثيوبيا .. وأرتيريا .. وحتي السعودية التي حاول دخولها خلسة طرد منها شر طردة.. وأصبح الباس سجين جرمه المشين.

[انصاري]

ردود على انصاري
European Union [انصاري] 04-17-2014 02:07 PM
إلى [ودالبيك]..

"سلاماً..سلاما" ..!!؟

[ود البيك] 04-17-2014 09:08 AM
يا ابو الفطور انت عشان كلامك دا البروف قال حاتفكك السودان
عالم مدعية بس



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة