الأخبار
أخبار إقليمية
حنان بلوبلو : أنا ماغنيت لـ(النميري).. وتعدد الأزواج (ما بيدي)!..أهلي (ضربوني) عشان الغنا.. واتعلمت الرقيص في (المراية)!
حنان بلوبلو : أنا ماغنيت لـ(النميري).. وتعدد الأزواج (ما بيدي)!..أهلي (ضربوني) عشان الغنا.. واتعلمت الرقيص في (المراية)!
حنان بلوبلو  : أنا ماغنيت لـ(النميري).. وتعدد الأزواج (ما بيدي)!..أهلي (ضربوني) عشان الغنا.. واتعلمت الرقيص في (المراية)!


هذه (...) أسباب انفصالي من محمود عبد العزيز!
04-19-2014 11:10 AM
حوار: محاسن أحمد عبد الله
تلقب بفنانة الاستعراض الأولى في السودان.. جاء ظهورها متزامنا مع ظروف عصيبة كانت لا تستطيع من خلاله المرأة اعتلاء المسارح ليصدح صوتها بالغناء ناهيك عن أن يتمايل جسدها بالرقص وسط صيحات المعجبين وعلو أصوات الرافضين. إلى جانب ظروف عصيبة أخرى، تمثلت في قبضة الحزب الحاكم آنذاك فيما يتعلق بالفنون، ذلك الأمر الذي ربما ضاعف معاناتها كثيراً.. تحب الفن والغناء منذ نعومة أظفارها، وهي تستمع لعمالقة الفنانين وتلاحق حفلاتهم في الخفاء، عانت كثيراً من أسرتها المتشددة التي كانت تحاصرها بشدة لكي لا تصبح فنانة، إلا أنها ورغم ذلك استطاعت أن تغني وأن تفرض اسمها الفني على المشهد.. ينادونها بـ(كبيرة الفنانات) أو (الزعيمة)، لكن يبقى اسمها الأبرز هو حنان بلوبلو، والتي التقتها (فلاشات) في حوار خاص للغاية.. فماذا قالت؟
*حنان بلوبلو اسم وصوت غنائي تمدد في الساحة الغنائية قبل سنوات طويلة.. من تذكرين من دفعتك آنذاك؟
ما كانوا كتار ومنهم الفنانة بهاء عبد الكريم وعوضية عز الدين وفاتن عبد الحفيظ وأخريات.
*في أي عام كانت البداية الحقيقية التي اشتهرتِ من خلالها كفنانة؟
البداية الحقيقية كانت في العام 1986 وقبلها كنت بغني في بيوت المناسبات وكان ذلك في حي الهاشماب بأمدرمان وبعدها بقيت أشارك في برامج الأطفال بالتلفزيون، واشتهرت عبر أغنية (حمادة ده) وكان أول كاسيت لي ظهر في تلك الفترة.
*ما هو موقف أسرتك تجاه المجال الذي اخترتِه؟
أسرتي كانت رافضة الموضوع جملة وتفصيلاً لدرجة أمي كان (بتضربني) والمشاكل طوالي مدورة بينا.
*ليس لأسرتك علاقة بالغناء.. من الذي حببك فيه؟
الفنان الراحل زيدان إبراهيم والفنانة سمية حسن.. ديل الحببوني الغنا، وكنت بتمنى أبقى زيهم وكنت بلاحق حفلاتهم.
*طيب.. كيف اقتنعت أسرتك بأن تصبحي فنانة؟
لما كنت بمشي برنامج الأطفال جمعتني معرفة بالأستاذ بشير جابر، وحكيت ليه رفض أسرتي للغناء، قال لي ما في حل غير الزواج، وفعلا اتزوجت بشير جابر ووقف معاي وشجعني في الغنا وأنجبت منو أولادي (معزة ومحمد ومعتز) وبعدها انفصلنا وتوفي قبل سنوات قليلة.!
*تميزت عن سائر المطربات بالرقص الاستعراضي.. أين تعلمت الرقص؟
ضحكت ثم قالت: (اتعلمت الرقيص في المرايا).. وتواصل: (أي رقصة بتعجبني كنت بقوم وأقلّدا قدام المرايا لحدي ما بقيت محترفة والظهرو بعدي قلدوني).!
*الم تتخوفي من ردة فعل الشارع السوداني باعتباره فنا جديدا لم يعتادوا عليه؟
يعني واجهتني صعوبات كتيرة وفي جهات سعت لمحاربتي، لكني لم أيأس لأنو في ناس بيحبوا الاستعراض وواصلت فيهو ونجحت.
*من خلال مهنتك تجولتِ في مدن وولايات ودول كثيرة.. كيف كان يتم ذلك؟
فعلاً أنا لفيت السودان ده كلو وسافرت دول خارجية كتيرة ما ليها حد، وبتذكر في الرحلات الداخلية كنا بنسافر بي (بص العيلفون) وكان بيجيبو لينا شلضم متعهد الحفلات وبتستمر الرحلات أيام وكان الدنيا بي خيرا.!
*حدثينا عن أول لقاء جمعك بالفنان الراحل محمود عبد العزيز؟
التقيت بالفنان محمود عبد العزيز في برنامج الأطفال.
*كيف تم زواجك منه.. وهل عشت معه قصة حب؟
كنت وقتها مريضة، وكان عيد ميلادي، فجاء لزيارتي المخرج شكر الله خلف الله والأستاذ عبد الباقي خالد عبيد ومعاهم محمود عبد العزيز، وكان في الغرفة صورة جمعتني بي محمود عبد العزيز في ألبوم (جواب للبلد) فعلق شكر الله وعبد الباقي قائلين: (عاملين كده ذي نوال الزغبي ووائل كافوري)!.. فالظاهر محمود الفكرة عجبتو وفي نفس اليوم اتصل علي قال لي (يا حنان إنتي متزوجة)؟.. قلت ليه (لا).. قال لي (داير أتزوجك)، وفعلاً وافقت واتزوجنا خلال عشرة أيام فقط.!
*هل كان هناك توافق بينكما.. خصوصاً وأنتِ أكبر سناً من محمود بما يقارب العشر سنوات؟
ردت بدهشة: (منو القال كده.. أنا ومحمود عبد العزيز مواليد 1967 يعني قدر بعض).!!
*كيف ذلك وأنتِ تغنيتِ للرئيس الراحل نميري؟
أنا ماغنيت لي نميري لأنو الوقت داك ما احترفت الغنا.. والغنت لي نميري هي الفنانة حنان أحمد.. عشان كده الناس بتخلط بيني وبينها.!
*حنان بصراحة.. هل أحببتِ محمود من أجل شخصيته أم من أجل فنه؟
شوفي.. أنا قبل ما أتزوج محمود كنت معجبة بي غناهو بصورة غير عادية، وأي شريط ليهو موجود عندي من أول ألبوم لحدِّي آخر ألبوم، وفي الغربة ما بسمع لي فنان غيرو إلا ود الأمين، ولما اتزوجتو حبيتو وحتى لما اختلفنا واتفارقنا برضو هو فناني الأول المعجبة بيهو، وأكن له كل احترام وتقدير له الرحمة.
*كم من الزمن استمر زواجك بمحمود عبد العزيز؟
3 سنوات وبعدها انفصلنا.
*هل فرقت بينكما الغيرة أم أسباب أخرى؟
على الرغم من إنو محمود كان فنان، لكن كان بيغير علي شديد، وبعد مرات بيرسل زول يسافر معاي عديل إذا كنت شغالة في أي ولاية أو غيرها، وما أكذب عليك الغيرة كانت سبب أساسي في الانفصال.
*أنتِ متعددة الزيجات.. بعد انفصالك من بشير جابر ومحمود.. هل تزوجتِ مرة أخرى؟
طبعا التعدد دا ما (بيدي أنا).. ممكن نقول القسمة.. وبعد انفصالي من محمود اتزوجت رجل آخر لكن ليس له أي علاقة بالوسط الفني.
*إذا سنحت لك فرصة للزواج مرة أخرى.. هل ستوافقين؟
كل شيء مسطر ومقدر من المولى عز وجل.
*حنان.. كيف هي علاقتك بزملائك في الوسط الفني؟
ظروف الحياة المختلفة خلتنا ما نتلاقى زي زمان.
*هل هي ذات الظروف التي جعلتك تختفين من الساحة مؤخراً؟
أنا حالياً مشغولة بأحوالي الخاصة وترتيبها.
*بمناسبة أحوالك الخاصة.. أنتِ مررت في الفترة الماضية بأزمة مالية حادة جعلتك تقومين بعرض منزلك للبيع.. هل ساهم ذلك الظرف في انفضاض الناس والأصدقاء من حولك؟
التجربة التي عشتها جعلتني أتعرف على (العدو) من الصديق، وانكشفت لي نوايا الناس وعلى الرغم من دا ما بلوم زول.. والناس ظروف.!
*كيف استطعتِ الخروج من تلك الأزمة المالية الكبيرة؟
(حليت نفسي بي نفسي).. بعت بيتي القديم واشتريت آخر، والحمد لله كل أموري ماشة تمام.
*يقال إن من اشترى منزلك لاعب كرة قدم شهير.. هل هذا صحيح؟
أي صاح.. اشتراهو لاعب الهلال مدثر كاريكا.
*بصراحة يا حنان.. أنتِ مشهورة بفعل أعمال الخير واستضافة الناس بمنزلك وإكرامهم، هل ستجعلك هذه الأزمة تعيدين النظر في تعاملاتك؟
والله عمل الخير ده لي الله.. وما بقيف منو نهائي وهو (النجاني وغطاني).. وأنا موجودة مع الأصحاب والأحباب، لكن في الفترة الأخيرة انشغلت منهم عشان تشطيبات البيت الجديد.!
*كيف تتعاملين مع الحسد؟
صاحب مهنتك (عدوك).. والظروف الليلة اختلفت من زمان، نحن في فترة جالسنا نجوم الفن أمثال الراحلين صديق الكحلاوي وبادي وأحمد المصطفي، وكانت المعاملة بينا جميلة وهم أقدم مننا ورغماً عن ذلك ما كان في غيرة وكانوا بيتباروا في تقديم الأغنيات الجديدة، يعني الليلة الكحلاوي قدم أغنية جديدة بكرة بادي بيقدم أغنية أجمل منها والقبول من الله.!
*يتردد أنك تجاملين ابنك محمد كثيراً فيما يتعلق بالفن.. ما هو رأيك؟
محمد له صوت من الخامات الجميلة، وبشهادة فنانين كبار، وأنا مابجاملو.. أنا بنصحو بس يشوف الغناء الجميل ويقدمو، وخصوصا بعد أن أكمل دراسته الجامعية، وبتمنى ربنا يوفقو لأنو درب الفن صعب داير صبر وطولة بال.
*طقوس تقومين بها قبل طلوع المسرح للغناء؟
طبعا بتحصن ودائما بنطق الشهادة لو مارقة أو عند النوم، وبقرا صور قرآنية معينة تكفيني شر العين والحسد.
*أخيراً.. هل لا زال صوت بلوبلو يحتفظ بذات الألق القديم؟
إذا ما بقيت بذات الألق لتركت الغناء قبل أن يطلب الجمهور مني ذلك... لأنو هو الحكم... ولو فقد صوتي البريق لما كنت حتى هذه اللحظة مطلوبة في الحفلات المختلفة.

السوداني


تعليقات 16 | إهداء 0 | زيارات 12687

التعليقات
#979309 [حنين]
0.00/5 (0 صوت)

04-20-2014 10:22 PM
اتمنى لك كل الخير انا لا اعرفها لكن من حورات سابقه يظهر الئ انها انسانه بسيطه وطيبانه وتريد ان تعيش فى هدوء .ربنا يحفظك ويخلى ليك ابنائك .

[حنين]

#979022 [سالم عبد الله]
5.00/5 (1 صوت)

04-20-2014 04:39 PM
منو القال كده

بالله شوفوا البلادة دي


يكد عضمها قولي آمين يا حلوة سابقا

خلاص راحت عليك

( *هل كان هناك توافق بينكما.. خصوصاً وأنتِ أكبر سناً من محمود بما يقارب العشر سنوات؟
ردت بدهشة: (منو القال كده.. أنا ومحمود عبد العزيز مواليد 1967 يعني قدر بعض).!!
*كيف ذلك وأنتِ تغنيتِ للرئيس الراحل نميري؟
أنا ماغنيت لي نميري لأنو الوقت داك ما احترفت الغنا.. والغنت لي نميري هي الفنانة حنان أحمد.. عشان كده الناس بتخلط بيني وبينها.! )

[سالم عبد الله]

#978994 [جدودنا زمان]
4.00/5 (2 صوت)

04-20-2014 04:17 PM
ناس الراكوبة يوم بتكتلو ليكم زول

[جدودنا زمان]

#978983 [حزين جداً]
5.00/5 (1 صوت)

04-20-2014 04:09 PM
فرقنو علينا وضحطتونا ياناس الراكوبة ...

بس حزين .

[حزين جداً]

#978967 [دارفور كادقلى]
5.00/5 (1 صوت)

04-20-2014 03:48 PM
يقال كان هناك شاب يدعوا على الشباب الذين يرقصون ويغنون بالهلاك والوعيد وأن تزلزل الارض تحت أدامهم ويتمنى لهم عذاب حريق جهنم ( وعندما سمعه شيخ وقور سمح الاسلام عالما ببواطن الامور وهو ليس بشيخ متزمت قال له لا يا ابنى لا تدعوا لهم بذلك بل ادعوا لهم بهذا الدعاء وقول (الهم فرحهم في الاخرة كما فرحتهم في الدنيا) وفلسفة الاجابة هي فرح الاخرة يعنى التوبة في نهاية المطاف والاستقامة والعودة الى الله سبحانه وتعالى والسير في الطريق المستقيم ودخول الجنة انشاءالله ) عليه نحن نقول للشباب (الهم فرحهم في الاخرة كما فرحتهم في الدنيا).

[دارفور كادقلى]

#978748 [Asmar]
5.00/5 (1 صوت)

04-20-2014 12:55 PM
يعني نسيت البشير وذلته لكم وقبلتم على البنت المغنيه

[Asmar]

#978642 [سائح]
5.00/5 (1 صوت)

04-20-2014 11:38 AM
طبعا بتحصن ودائما بنطق الشهادة لو مارقة أو عند النوم، وبقرا صور قرآنية معينة تكفيني شر العين والحسد.
الجواب ده مستفذ جداجدا جدا انتى رقاصه شهادة شنووو وقران شنووو يعنى ما يعرف يقول شنو بقى الرقاصات والحساله ليهم قيمه ويعملو معاهم لقاءات هذا زمانك يا مهازل فامرحى

[سائح]

ردود على سائح
[جاكوما] 04-20-2014 05:03 PM
يا سائح اتعلم تكتب كويس وبعدين انتقد الناس
(مستفز) و ( حثالة) وبعدين القران دا ربنا نزله للكل
وما قال العاصى والمذنب مايقرأ القران .. استغفر ربك
وادعوا ليها ولينا كمان بالهداية

United States [الناصح] 04-20-2014 04:10 PM
يا سائح؟؟كيف قران شنو وشهادة شنو..البينه وبين الله يعلمه هو..إنت شنو الدخلك..ممكن تكون علاقتها مع ربها أحسن منك..عالم ما بتختشى.


#978555 [تاتاي في الربع الخالي]
5.00/5 (1 صوت)

04-20-2014 10:26 AM
اقتباس(وبقرا صور قرآنية معينة تكفيني شر العين والحسد)لو هي جاهلة وما عارفة ان اسمها سور فهل كاتب اللقاء برضو جاهل وا ..فضحتونا

[تاتاي في الربع الخالي]

ردود على تاتاي في الربع الخالي
[جاكوما] 04-20-2014 05:05 PM
الخطأ من الصحفى او الكتب المقال .. مش منها


#978543 [رانيا]
5.00/5 (5 صوت)

04-20-2014 10:16 AM
يا خفي الألطاف نجنا مما نخاف ..

[رانيا]

ردود على رانيا
[سودانى طافش] 04-21-2014 12:51 AM
خايفة يامحمود تبقى غناية وترقص للناس ويعرسوها كل سنتين .. قالت شنو ( العازف ) قاليها نتزوج عشان أهلك مايسألوك ويمنوع تغنى وتجى أنصاف الليالى !

[محمود] 04-20-2014 04:09 PM
ممكن تورينا الشئ الخايفة منه شنو؟ مشكورة..


#978346 [حنين امدرمان]
3.00/5 (2 صوت)

04-20-2014 04:07 AM
الله يهديك انت وكل الفنانين.....أأأأأامين

[حنين امدرمان]

#978344 [AL KIRAN]
2.00/5 (2 صوت)

04-20-2014 03:57 AM
To; Hanan } I think money of "X" of husbands !??! because of you, using a goodless "make up". and to much "cream". a lots of men they ran away, and protect themselves to see projected face's, drawn, painted like that

[AL KIRAN]

ردود على AL KIRAN
European Union [جدودنا زمان] 04-20-2014 04:16 PM
كوجين شديد

علا فهمنا قصدك

United States [تاتاي في الربع الخالي] 04-20-2014 10:47 AM
several mistakes in your comment please before you spread your comment check your vocabulary or easily put it in google translation to check ...good regards


#978305 [moy ako]
3.50/5 (2 صوت)

04-20-2014 01:56 AM
اذكر ان بيتها القديم يجاوره عدد من الشخصيات المرموقه ولكنهم كانوا عندما يريدون توصيف بيوتهم يقولونها بخجل وبعد تطويل "لو سالت سيد الدكان وين بيت حنان بلوبلو..اها انا بيتي واقع ..."
بعيدا عن هذا حنان بلوبلو معروف بانها زول سخيه وخصوصا في الحالات الانسانيه في الوسط الفني فلها مواقف عديده حسب ماعلمت.

[moy ako]

#978300 [ود عرب الكواهلة]
1.50/5 (2 صوت)

04-20-2014 01:47 AM
دنيا فرن دقس ... كل عام وانتم ترزلون ... بعد الفلاتية ومهلة العبادية ومني الخير ... طلعت علينا حنان بلا بلا ...

[ود عرب الكواهلة]

#978275 [قوز دونقو]
3.50/5 (4 صوت)

04-20-2014 01:09 AM
طبعا بتحصن ودائما بنطق الشهادة لو مارقة أو عند النوم، وبقرا (( صور )) قرآنية معينة تكفيني شر العين والحسد.
*أخيراً.. هل لا زال صوت بلوبلو يحتفظ بذات الألق القديم؟

يا بنتي محاسن الناس بيقولوا (سور)) قرآنية و ليس (صور)) أتعلمتي العبية دي وين يا محاسن ؟؟؟؟

[قوز دونقو]

#978274 [قوز دونقو]
3.00/5 (2 صوت)

04-20-2014 01:08 AM
طبعا بتحصن ودائما بنطق الشهادة لو مارقة أو عند النوم، وبقرا (( صور )) قرآنية معينة تكفيني شر العين والحسد.
*أخيراً.. هل لا زال صوت بلوبلو يحتفظ بذات الألق القديم؟

يا بنتي محاسن الناس بيقولوا (سور)) قرآنية و ليس (صور)) أتعلمتي العبية دي وين يا محاسن ؟؟؟؟

[قوز دونقو]

#978261 [فنان سابق وحلاق حالياً]
3.25/5 (3 صوت)

04-20-2014 12:52 AM
يا بلو انت ما محتاجة لمكياج ، العواسة دي شنو ؟؟؟

[فنان سابق وحلاق حالياً]

ردود على فنان سابق وحلاق حالياً
United States [أبو حسين] 04-20-2014 03:41 PM
هههههههههههههههه بالجد المكياج يخوف ولكن الكبر حينما ياتي يصعب ترميمه بهذه المساحيق الصارخة ويجد فنانات عربيات اكبر منها سنا ولكن يتعاملن مع خبيرات تجميل ولا يعوسون مثل هذه العواسة



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة