الأخبار
أخبار إقليمية
دا الجنن المؤتمر الوطني !!
دا الجنن المؤتمر الوطني !!



04-22-2014 05:22 PM
كمال كرار

مسحت الإنقاذ النقابات من الخارطة العمالية ، واعتقلت النقابيين ، وعينت لجان تسيير مهمتها أن تهتف سير يا البشير ، فتمردت القواعد العمالية علي السدنة ، وتوالت الإضرابات ، وتشكلت النقابات الشرعية دون استئذان ، وانطلقت مسيرة انتزاع الحقوق من مدني لبورتسودان .

وحلت الإنقاذ الأحزاب السياسية والصحف ، فلم تتوقف الميدان السرية ، ولم تلجأ الأحزاب للكهوف والمغارات ، بل تكون التجمع الوطني ، واشتغل بهمة سياسياً وعسكرياً حتي قالت الإنقاذ الروب في نيفاشا ، واعترفت بالأحزاب المعارضة ورجعت الصحف الحزبية علنية في الأكشاك .

وزور السدنة الانتخابات في 2010 ، فأعلنت الأحزاب المعارضة عدم شرعية النظام ، والعمل علي إسقاطه .

وكلما انفضت ندوة جماهيرية للمعارضة في شمبات بفعل الأمن والذي منه ، قامت ندوة أخري في بركات وخور أربعات

وعرقل المواطنون مؤامرات الإنقاذ التي اتفقت مع ( حرامية الخارج ) علي شراء الأراضي حول بحيرة سد مروي ، ووقف مزارعو الجزيرة سداً منيعاً أمام قرارات بيع أراضي المشروع ، وقال سكان كجبار ( نهي) للسد الذي سيمسح قراهم .

وكلما زادت أسعار الجازولين هتف الناس تجار الدين سرقوا البنزين

وفي كل حافلة نقل ومواصلات 25 فرداً يكشفون مساوئ الإنقاذ وفسادها بصورة يومية ، أضف إليهم السواق والكمساري .

وفي كل سوق مئات الباعة المتجولين الذين تطاردهم الكشات فيصبون اللعنات علي السدنة والسادنات .

وطلاب الجامعات ، كل يوم مظاهرات ، والمفصولين في استعداد للمسيرات ، والعمال في المكنات يرفعون اللافتات

والجنيه تهاوي أمام الدولار ، والميزانية في إعسار ، والمسمار عند النجار .

أمام هذا الهجوم الشعبي ، فتح السدنة مطعم الحوار ، حوار بالسمنة والبهار ، حوار بدون شمار ، حوار بالدكوة والغبار ، حوار بالزيت الحار ، حوار بطعم الكافيار ، حوار والمخلل خيار .

إلا أن الطريق إلي مطعم السدنة محفوف بدم الشهداء ، وصرخات الجوعي ، وأنات المحرومين ، وعرق العمال والفلاحين

والمائدة داخل المطعم مسمومة ، والمساومات مفهومة ، والشعب يرفض العزومة

ولما رأي السدنة الجماهير في الأهلية وشمبات وسمعوا الهتافات ، قالوا أن الشيوعيين استجلبوا الأجانب والحبشيات ، ولبسوهم جلاليب وعبايات ، لزوم التصوير والقنوات .

هنيئاً للمعارضة بصوتها القوي ، الذي استرعي انتباه العالم وقصر المسافات ، والترجمة علي الشريط يا سكان القصور الفارهات ، أمميون طبقيون والندوات بكل اللغات ، والكورال يغني الأغنيات ، ويا لولي يا ست البنات .

دا الجنن المؤتمر الوطني ، وغني يا خرطوم غني وشدي أوتار المغني

الميدان


تعليقات 5 | إهداء 0 | زيارات 3276

التعليقات
#982514 [ابومرام]
0.00/5 (0 صوت)

04-23-2014 07:21 PM
ياكيزان المشروع الحضاري وصل وين؟ وترعة كناة والرهد خبرا شنو؟ وتمزيق فاتورة القمح حصل والله لسة؟ وتوطين العلاج بالداخل ياوزير الصحة عملت فيه شنو؟ واعادة السكة حديد الي سابق عهده وصل وين؟ ورفع المعاناة عن كاهل المواطن لسة ماتم؟ وين مشروع الجزيرة؟ سودانير وين اتباعت والله لسة؟ النقل النهري شغال؟ المخازن والمهمات لسة في؟ مصانع الغزل والنسيج شغالة والله انتهت؟ الان نحنا بنصدر شنو للعالم؟ التعليم كيف؟ دايرين ترجعوا السلم التعليمي القديم؟ مستشفى الخرطوم قلت كيف ياريس هي صنم؟ الزيتونة دي شنو؟ امريكيا وروسيا دنا عذابها والله لسة؟ في اي ادلجة وتأطير ولجان منبثقة والله خلاص الحكاية خلصت؟ التمكين بكون كيف؟ دمغة الجريح ودعم النزيل والفضائية الحاجات دي انتهت والله لسة فيها باقي؟ بين الراعي والرعية ماشفناه في الاحياء الفقيرة والاسر المتعففة الفقيرة؟ في خطة اسكانية ؟ والي الخرطوم النظافة والمواصلات والصرف الصحي قدرت عليهم والله غلبتك؟ اقول لكم حاجة فكونا منكم بلا وهم معاكم

[ابومرام]

#981799 [الكاهلية]
0.00/5 (0 صوت)

04-23-2014 09:59 AM
حكومة بهذا الفساد لا تستغرب ان وجدت معارضة من الشعيب المسكين

[الكاهلية]

#981517 [karkaba]
4.50/5 (4 صوت)

04-23-2014 12:30 AM
ياكيزان بكرة الاغدام ليكن في الميدان والدفن في الحفر والخيران ولاحزاب الفكة الحشير بي الخيرزان لبقو رجال ماتدسو وراء النسوان

[karkaba]

#981484 [انصاري]
5.00/5 (6 صوت)

04-22-2014 11:06 PM
الاسم الكامل إنسان
الشعب الطيب والدي
الشعب حبيبي وشرياني
اداني بطاقه شخصيه
من غيرو الدنيا وغبالو
قدامي جزائر وهميه
لا لون
لاطعم
ولا ريحه
وايام مطفيه مصابيحها
زي نجمعه بعيده ومنسيه
المهنه بناضل وبتعلم
تعليم في مدرسه الشعب
المدرسه فاتحه علي الشارع
والشارع فاتح في القلب
والقلب مساكن شعبيه
وديني محل ماتوديني
شرد اخواتي واخواني
فتش اصحابي وجيراني
خليني في سجنك وانساني
في سجنك جوه زنازينك
ارميني وكتف إيدي
من اجل الشعب السوداني
وعشان اطفالنا الجايين
والطالع ماشي الورديه
وحياه الشعب السوداني
في وش المدفع تلقاني
قدام السونكي حتلقاني
وانا بهتف تحت السكين
الثوره طريقي وايامي
معدوده وتحيا الحريه

(الراحل المقيم):.. شاعر الشعب محجوب شريف

[انصاري]

#981347 [البشير دقس...]
5.00/5 (5 صوت)

04-22-2014 06:22 PM
والدقسة... فيها اللحسة....

طبعاً عمك بشة.... سمح بالندوات واللقاءات.... عشان يقولو.... في حريات..!!

وده تمهيد....لأكل عقول الساذجين والساذجات... في الجولة الجاية من.... الانتخابات..!!!

لكن باذن الله.... وصبر السودانيين والسودانيات.... يا مزبلة التاريخ.... يا محكمة الجنايات..!!

والجايات... أكتر من الرايحات....

سلامات..

[البشير دقس...]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة