الأخبار
أخبار إقليمية
مرافعة واحد حرامي
مرافعة واحد حرامي



04-30-2014 12:20 AM
كمال كرار

الدنيا مالها قايمة وقاعدة أصلو سرقنا البنك الدولي ولا خزنة بيل غيتس !! ما كلها 18 مليون جنيه جديد يعني 18 مليار قديم ما تساوي 2 مليون دولار بسعر السوق الأسود !!

بالله شوف الجرايد تكتب والمواقع تنقل ، والمعارضة تتهم ود كلو عشان شوية فلوس كان الواحد محتاج ليها ، بس الناس ما بتقدر الظروف .

قالوا علي حرامي ، طيب ليه ما شافوا الحرامية الكبار اللي أكلوا طريق الإنقاذ الغربي وباعوا خط هيثرو ، دي مليارات دولارات ومافي زول ( شال حس) زول، ولا قالوا ثراء حرام ، إشمعني أنا بالذات !!!

وبعدين شنو يعني 2 مليون دولار، ما نثرية ميشيل أوباما في الشهر تفوت 3 مليون دولار، وملكة بريطانيا في البنك عندها مليار استرليني في زول قال ليها شغالة شنو ولا القروش دي جبتيها من وين ؟!

ثم ثانياً الناس قالت علي حرامي وانا ما قدر دا، انا بس انتهزت فرصة الختم في مكتبي وقلت ياولد ألعب بوليتيكا، والوظيفة ما مضمونة،

أخير نضمن مستقبل العيال وأمهم طالما العلاج بقروش والتعليم برضو بقروش ودي طموحات مشروعة

أما الجرايد اللي اشتغلت فيني تشهير فأنا ماشي ارفع قضية رد شرف أهو اتحللت من الثراء الحرام وطلعت زي الشعرة من العجين تاني في كلام !!

قضية رد الشرف دي تجيب لي مليارات والواحد مفكر يشتري منتجع في أسبانيا عشان نرتاح شوية في همبريب الأندلس العجيب

ثم ثالثاً ما تفتكروا إني قعدت علي الحديدة ، أخوكم ما داقس والأراضي المكتوبة بي إسم ( أم العيال) مافي زول جاب ليها خبر ، والوديعة الفي ماليزيا عشان مكتوبة بالإنجليزي ما عرفوها الحاقدين ، والقروش القالوا لي اتحلل منها هي ذاتها كانت مدورة في السكر والدقيق والذي منه ، يعني مافي ندامة .

وبعدين حكاية استغلال النفوذ دي ما عيب ، ما كل زول هنا قاعد يستغل نفوذه، فلان داك جاب أخوهو مدير مكتبو بي عقد خاص ، وفلانة ديك عينت بت خالها في منصب وكيل وزارة، والغريبة ما كملت الثانوي ، والمعتمد داك ما عنده شهادة أساس، أنا بس الفي راسي ريشة ؟! بلد تستفرد بالضعيف زي حالتي وتخلي التماسيح الكبار ، بالله شوف !!

وبعدين أنا سرقت بيت زول ولا نطيت لي حيطة !! دي أراضي كانت مهملة بي تعريفة ما في زول بشتريها ، لما الحظ ضرب وبقت أراضي مميزة ليه الجوطة والحسد، والدنيا أرزاق، يعني ح أفضل حتة موظف لما أموت ؟!

ولعلمكم كل الإتهامات الظالمة ضدي ما بتهز شعرة في راسي ، سنة سنتين وتتنسي الحكاية، وأنا برضو الوجيه، ورجل البر والإحسان وح اشتري جريدة واكون بزنس مان ، وح اشتري نادي والعجبو عجبو والما عجبو يقعد في علبو .. فاهمين !!

الميدان


تعليقات 9 | إهداء 0 | زيارات 4137

التعليقات
#989928 [Aboahmed]
0.00/5 (0 صوت)

04-30-2014 05:02 PM
تصحيح المال المنهوب 600 مليار جنيه سوداني بالقديم ... يعني 600 مليون جنيه سوداني بالجديد.... يعني بالدولار 75 مليون دولار وتقول لي 2 مليون دولار ..؟؟؟؟؟؟؟؟؟؟؟

[Aboahmed]

#989448 [aboali]
0.00/5 (0 صوت)

04-30-2014 11:10 AM
.

[aboali]

#989424 [abubaker]
0.00/5 (0 صوت)

04-30-2014 10:57 AM
والله حرامي ظريف كتر خيرك الرديت لينا المال وديل ناس حراميه ونباشين حال الله يعوضك في باقي الاراضي والقروش البره في ماليزيا اطلع من الوظيفة وعين اخو مرتك فيها عشان تكتل قلب المرة وما تقوم تقول ليك دا من وين ودا من وين (الله لارد من عينك في الوظيفة ) ما سمعت بالزول الراعي البا يبيع النعجه يانعجة يا ابن النعاج )

[abubaker]

#989418 [محمد سعد]
0.00/5 (0 صوت)

04-30-2014 10:49 AM
الختم فى الدرج ؟

[محمد سعد]

#989376 [ود الركابي]
0.00/5 (0 صوت)

04-30-2014 10:22 AM
هم الجماعة ديل فاكرين الشعب السوداني ده عنده قمبور ولا شنو .. موظفين .. صغار .. يقدرو يهبروا هبر قدر ده وما في حد يحس بيهم ولا واحد حاقد يبلغ عنهم ياخي اتلهوا .. الموضوع كبير كبير كبير جدا جدا جدا كله بعدين بيظهر . الله لا يوفقكم .

[ود الركابي]

#989254 [ابو هند]
0.00/5 (0 صوت)

04-30-2014 08:05 AM
العزيز كمال كرار
يا ايها الانسان المبدع الجميل
استلفت الليلة مكنة الحرامي لامن شككتنا فيك . واصل بقلمك الفنان
تحياتي

[ابو هند]

#989248 [semsem]
5.00/5 (1 صوت)

04-30-2014 07:54 AM
سلمت استاذ كمال كرار
حقيقي هذا لسان حال الحراميه اخر زمن وعيونهم قويه
كل من يبدوا بيهو يشغلها ليك يعني خلاص البلد انتهت من الحراميه جاييني انا الصغير السارق ليا حته ارض وحاسدني عليها

[semsem]

#989201 [Sudanya]
3.00/5 (1 صوت)

04-30-2014 03:58 AM
والله أحلي مقال أقراهو بعد ما أصبح حالنا العارفنو وما داير ليهو شرح.على الأقل شال مني الغم والغبن وخلاني أموت من الضحك وقالو من البلية ما يضحك!!
يلا أنا بقول للزول العلا لسانو إتكتب المقال، أوافقك في كل كلمة جات على لسانك, لأن الغلط ما غلطك ولكن غلطة رئيسك الطبيب البيطري الكان عامل طاشي شبكة, وزي ما قلت هي دي قروش عشان كدا ماهببا ليكم ولكن أولاد الحلال ما بريحو كشفوكم. وبجد حرام يطبو عليك براك والبلد ما أنت الحرامي فيها لوحدك بل عددهمما بتحسب وما في زول بقول ليهم البغلة في الإبريق.وكان ما سمعت صاحبكم الخلا ليكم الحبل على العارب كرموه بتجديد الثقة فيهو, ويا حرام مرقتو إنتو براكم اهل الشغلانيةورحتو تحت الرجلين, وأخلاقكم برضو عالية عشان ما جرجرتم معاكم زول,والله أجدع ناس, على قول أولاد بمبه. إنتو أكيد شفتو الجوابات ططاقش من الوالي لأراضي الخرتوم أدو الدستوري داك قطعة مميزه وين ما عارف, ومزارع لدستوري البحر الأحمر وإمكن بتاعين بحر ابيض كمان، مافي زول بشوف الرحمة تجري قدامو وبقعد إتفرج فيها وإلا يبقا غوير وإنتا حاشاك العوارة ويا ريتك ضناي. ويا أخي المثل السوداني بقول بلاد أبوك كان خربت شيل ليك فيها شليه، وما قصرتو وعفارم عليكم.بس عندي ليك سؤال بسيط, لو إنتو السموكم موظفين في مكتب الوالي قدرتو علي دي والنبي الناس الكبار المافي زول ببحت وراهم بكونو بسوو شنو ومنهم كتار خمسة وعشرين سنه بلتو ويعجنو من وزارة لوزارة وإنتو ما أشطر منهم,قالو غليكم ختة موظفين بس.يا ود أمي تسلم’ وحات تربة أمي فالح ومكمل الفلاحة, بس المحيرني ظلموك وما ورونا لا إسمك لا فصلك لا أصلك, دي حساده ساكت لانو خايفين تبقا محبوب الملايين من الشابات الشايلات شهادات ولا لاقيات شغل ولا عرس.زي نجركم دا مصلح ومن فوق مملح ,االله يهنيك بتحللك ,الما سبقك عليهو زول, في الدارين و كدا كسبت دنيا وآخره.اغدين أسمع دي, سألت شيخ مكرب من الشيوخ إياهم البفتو عن الحور العين وقال لي التحلل دا زي الحجة النصوحا يجب ما قبلو ومكتب الوالي الحيندم علي فراقكم ومبروك عليكم!!!

[Sudanya]

#989160 [اسامة الكردي]
3.00/5 (1 صوت)

04-30-2014 01:23 AM
نحن فاهمين بس انت وبقية كبار الحرامية البهمكم شنو ؟

[اسامة الكردي]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة