الأخبار
أخبار إقليمية
وائل طه: الجامعة أصدرت لائحة حرمتني من حقي في الإلتحاق بوظيفة مساعد تدريس
وائل طه: الجامعة أصدرت لائحة حرمتني من حقي في الإلتحاق بوظيفة مساعد تدريس



إحتضنته جامعة الخرطوم طالباً لـ13 عاماً وتمنعت عليه أستاذاً
05-19-2014 04:01 PM

حاورته: رابعة أبوحنة

كل شيء في هذا المكان يألفه تماماً.. قاعات الدرس وأركان النقاش بالميدان الغربي والأساتذة والطلاب – على تعاقب الدفعات – فقد أنفق وائل طه ثلاثة عشر عاماً من عمره طالباً بجامعة الخرطوم بمحض وعيه السياسي الذي حبب له المكوث فيها طيلة هذه السنوات لإيمانه بالنشاط السياسي الطلابي الذي خاض غمار معاركه في اتحاد طلاب جامعة الخرطوم.. لم يدر بخلد وائل قط أن يغادر الجامعة في يوم ما، ذلك كرس جهده ليتفوق في سنته الأخيرة وليحجز مكاناً له في هيئة التدريس، وبالفعل تفوق بل كان أول دفعته ولكن حدث أمر غريب حرمه من حلمه في الإلتحاق بهيئة تدريس الجامعة.. إذا أنه تم تعديل اللائحة بحيث لا يلتحق بوظيفة مساعد تدريس من تجاوز عمره الخامسة والعشرين.. وائل يعتقد أنه تم تعديل اللائحة لحرمانه من الوظيفة.

*متى دخلت جامعة الخرطوم وكم مرة فصلت منها؟

-دخلت الجامعة سنة 97 وفصلت منها فصلاً سياسياً سنة 200 بقرار من المدير بدعاوي مخالفة لوائح نشاط الطلاب، وأفتكر أن الإدارة تتعمد فصل خصومها السياسيين وذلك لأنها تتبع للمؤتمر الوطني وليست مستقلة، وفصل معي 5 طلاب آخرين، وعدت للجامعة عقب عودة إتحاد الطلاب في 2002 2003 وإنتخبت عضواً فيه لمدة ثلاث دورات وكنت حينها مفرغاً من الحزب للعمل النقابي وفي العام 2004 تحولت إلى كلية الإقتصاد وتخرجت منها 2010
*بعد ثلاثة عشر عاماً كيف كانت مغادرتك للجامعة؟
-كنت أول الدفعة وكان من المفترض أن أكون مساعد تدريس، لكن الجامعة أصدرت لائحة حدد بموجبها سن معينة للتعيين لذلك إستبعدت من الوظيفة ولا أستطيع أن أجزم بأن المدير يقصدني بالقرار ولكن توقيته وطبيعته يدفعان لذلك.
*كنت الشخصية الأبرز في إتحاد طلاب الجامعة ماذا عن هذه الفترة؟
-عملت في إعلام الإتحاد وكنت رئيس تحرير صحيفة إتحاد الجامعة _(كوسو) ومن 2003 إلى 2005 إنتخبت في مجلس الإتحاد وكنت مسئول الإعلام من 2005 إلى 2006 وناشط في الصوت الإعلامي وأتحدث بإسم الإتحاد خلال كل فترات ترشحه وكانت هنالك كتلتان، كتلة تحالف المعارضة وكتلة الوطني وكان الصراع حاداً ومازال، كنا لا نمتلك المال ولا الإمكانيات ولكنا نمتلك الإرادة والعقل والنشاط خلال فترة وجودنا في الجامعة ولم نهزم سياسياً إطلاقاً وهزمنا النظام منذ أن كان فيه الترابي وحتى بعد خروجه ويعود الفضل في ذلك أولاً لطلاب الجامعة غير المنظمين وكان الإسلاميون ولا زالوا يستعنون بالأجهزة الأمنية ويسخرون إمكانيات الدولة لصالحهم وبالمقابل كنا نستعين بطلاب عزل يواجهون أشباح الإعتقال والفصل والتشريد والإعتقال وقد أغتيل في فترتنا محمد عبد السلام في العام 1998م ومحمد موسى2011 بالإضافة إلى إعتقال وتعذيب الآلاف ويستطيعون الإدلاء بشهادتهم متى ما توفر ذلك وأنا عن نفسي أعتقلت عدة مرات وتعرضت لتعذيب وحشي من بينه الحرق بمكواة كهربائية لكن أفضل أن أتحدث عن تجارب آخرين على سبيل المثال أعتقل صديقنا محمد عبد السلام في 3 أغسطس وتعرض لتعذيب وحشي أفقده حياته وفقاً للتقرير الطبي وقس على ذلك، وأعتبر نفسي من ضمن الناجين من القتل وكفى.
*وماذا عن اللحظات الجميلة في الجامعة؟
-لا أتذكر أي شيء جميل ولكن من الطرائف أننا كطلاب عزل إستطعنا الحاق الهزائم بدولة كاملة تصرف على الأمن والدفاع بنسبة 98 %من أموال الشعب هل هنالك أطرف من هذا؟.
*كم من الساعات كنت تقضي داخل الجامعة؟
-خلال السنوات العادية مثل غالبية الطلاب ندخل في الصباح الباكر ونخرج منها التاسعة مساءً وكانت الحياة السياسية والإجتماعية تسود الجامعة في الأوقات الصباحية والمسائية وبعد رجوع الإتحاد 2002 تفرغنا للعمل النقابي بشكل كامل وكان تواجدنا إما بالجامعة أو إحدى كلياتها حيث النشاط أو بدار الإتحاد حيث العمل الإداري.
*حينما دخلت الجامعة كيف كان حالها.. أحكي لنا؟
-حينما دخلت الجامعة كانت مغلقة وكان يسمح بالدخول لطلاب السنة الأولى فقط وفي ذلك الوقت كانت حرب الجنوب مشتعلة وكانت هنالك معركة الطلاب ضد القبول الخاص والدراسة على النفقة الخاصة، سياسياً كانت الحرب مشتعلة ونظام الجبهة في أشد قبضته على السلطة بزعامة الترابي مهندس بيوت الأشباح، إقليمياً كانت حركة المعارضة ذات صوت عالٍ (لتجمع الوطني الديمقراطي) وطبيعياً كان أغلب طلاب الجامعة من الأقاليم ومن أبناء الطبقة الوسطى وكانت حركة الطلبة ذات مطالب عالية (خدمات، حركة سياسية، حرية تنظيم وكان صوتهم واحد ولم يكن مقسماً أو متسماً بأي خصائص إثنية أو قبلية بل موجه طبقياً
*ولاء زوجتك هي أيضاً طالبة وناشطة سياسياً بجامعة الخرطوم كيف قررتما الزواج؟
-تقابلنا بالجامعة في إطار العمل العام وقادنا إلى علاقة خاصة إنتهت بزواج عقب أشهر فقط من التخرج ومازلنا معاً في العملين الخاص والعام وكانت عضواً في الجبهة الديمقراطية ومتحدثة بإسم الجبهة بالإضافة إلى أنها كانت رئيساً له بجامعة الخرطوم
*طقوس الزواج كيف كانت وهل تمت بحضور طلاب وأساتذة الجامعة؟
-كنت خارج البلاد في فترة الزواج (شرق أفريقيا بصدد الدراسة) لذلك رتبنا لعقد قران بسيط وإتفقنا معاً بإعلام أسرنا على عدم القيام بالتكاليف المتعارف عليها والشنطة والمهر والريحة إلى آخره ورغم أن الزواج كان بسيطاً جداً إلا أن الحضور كان كبيراً جداً حضره طلاب الجامعة والخريجين ولفيف من السياسيين على رأسهم المرحوم نقد.
*في الثانوي هل كنت منتمٍ لحزب أو تمارس نشاطاً معيناً؟
*منذ منتصف التسعينات تم تجفيف العمل السياسي من المدارس الثانوية وتحول إلى عمل سري
أين أنت الآن؟
-الآن أنا صحفي بصحيفة الأيام
*لماذا إتجهت للصحافة؟
-إتجت للإعلام لأن نشاطي في الجامعة كان مرتبطاً به وبكتابة البيانات الصحف الحائطية الحملات الإعلانية، التعبئة بالإضافة إلى العمل في صحيفة الإتحاد ومن خلال مسئوليتي للصحف توسعت علاقاتي بالصحافة والصحفيين وتلقيت تدريباً إعلامياً حول كتابة التقارير الصحفية عبر دورة إعلامية أقامها إتحاد الجامعة ومنها ذهبت في هذا الإتجاه لكن طبيعة دراستي في علم الإجتماع بحثية وبفقدان وظيفتي في الجامعة إتجهت لهذا المسار المحفوف بالمخاطر والقائم على مهب الريح إذ تستطيع السلطة الحاكمة بجرة قلم إغلاق أو مصادرة صحفية وإعتقال أي صحفي.
*ماذا تعني لك الجامعة الآن؟
-منذ تخرجي 2011 لم أدخل الجامعة وتلقيت دعوات للمشاركة في النشاط السياسي لكني أعتبر أن النشاط السياسي الطلابي لطلاب الجامعة هذه حقهم وواجبهم ونحن خريجون نستطيع ممارسة العمل العام في أماكن أخرى وبالقدر الذي إنتزع فيه الطلاب حق ممارسة العمل السياسي بعد معارك دموية قتل فيها طارق، بشير، سليم، التاية وفصل سياسياً 200 طالب أعتقد أن ثمن هذا كله حرية النشاط الطلابي ودفعنا الثمن مثل غيرنا لذلك يجب أن تحافظ الأجيال الحالية على هذه المكتسبات بالتحدث في الأركان وممارسة النشاط.





تعليقات 17 | إهداء 0 | زيارات 8783

التعليقات
#1010638 [zein]
1.00/5 (3 صوت)

05-21-2014 01:48 AM
وائل كوز من المتوسطة وكان فى فرقة الإنشاد

[zein]

#1010362 [ود البلد]
1.50/5 (4 صوت)

05-20-2014 07:34 PM
التحية لجامعة الخرطوم .... لكن للاسف ادتك شهادة فى الاقتصاد بعد 13 سنة خدمة ، بالذمة بعد دا داير تبقى استاذ فيها يعنى انت معاصر سيدة عبادى وحسن جعفر (وكلهم نزلوا معاش ) بالزمة انت متزكر اسم اى مقرر درستو فى السنة الاولى ، خليك من حكاية الريبيت (الاعادة)مع العلم ان لائحة الجامعة لا تسمح باكثر من ثلاثة سنوات للتجميد خلال الدراسة ، بعدين بغض النظر عن مستواك الاكاديمى الجابك من كلية العلوم لكلية الاقتصاد ، انت مقتنع انك ممكن تبقى استاذ فى جامعة الخرطوم يشيل طبشيرة وكتاب ويدخل المحاضرة ويدرس الطلاب منهج اكاديمى علمى بعيد عن تحزب سياسى او رؤى شحصية ، وعشان جامعة الخرطوم الادتك الشهادة بتاعت الاقتصاد دى ارجو ان لا تهوب ناحية السنتر وخلى الاولاد الصغار ديل يشوفوا قرايتهم وما تنسى الفارق الزمنى بينك وبينهم ومستوى تفكيرهم بختلف عن جيلك .
وعشان تسكت كل لسان حول مستواك الاكاديمى ... نرجو ان ترسل لنا صورة من شهادة التفاصيل بتاعتك ، التفاصيل الدقيقة اكيد مطبوعة فى خمسة صفحات مسجلة كلية الاقتصاد بتكون المسكينة شغاله شهر عشان تعرف تطلع ليك شهادة تفاصيل .... وبعد دا تجى فى الاعلام تقول فصلوا ليك لائحة مخصوص عشان ما تتعين مساعد تدريس ، لعلمك ولعلم اهل الراكوبة (الراكوباب ) انو فى قرار وزارى من وزارة التعليم العالى والبحث العلمى بحلول العام 2015 لن يسمح لاى استاذ بان يقوم بعملية التدريس الا ان يكون من حملة الدكتوراة (يعنى مساعد تدريس او محاضر عندو ماجستير ما حيدرس الطلاب ) وانت جاى فى 2014 داير تتعين مساعد تدريس ... ياخى احمد ربك انو الجامعة ادتك شهادة تخرج ........ ولتدوم جامعة الخرطوم نبراس العلم والمعرفة

[ود البلد]

ردود على ود البلد
[Adham] 05-20-2014 11:35 PM
دفعوا ليك كم عشان تكتب الكلام دا ؟


#1009637 [النوباوى]
1.00/5 (3 صوت)

05-20-2014 10:00 AM
ربنا فى السودان ابتلانا بالنرجسية

نرجسية الطلاب مثل وائل طه

نرجسية المجتمع مثل ود الجبل

نرجسية الصحافة مثل الهندى عزالدين

نرجسية السياسة مثل الترابى والمهدى و.....

[النوباوى]

#1009499 [ود جامعة الخرطوم]
1.49/5 (7 صوت)

05-20-2014 07:08 AM
13 سنة طالب؟ تقريباً 3 أضعاف مدة البرنامج الدراسي و برضو طمعان تتعين مساعد تدريس؟
قوانين الجامعة قديمة بخصوص التعيينات، و لما كانت الدنيا بخيرها كان الراسب في مادة واحدة ما بيتم تعيينه، أما المفصول فلا يسمح له بتحضير الدراسات العليا فيها و أبرز مثال د. المعز عمر بخيت.
القرار ما سياسي و إنت غير مؤهل أكاديمياً.

[ود جامعة الخرطوم]

#1009355 [بت المعموره]
5.00/5 (1 صوت)

05-20-2014 12:21 AM
وائل طه محي الدين يحب الزخم والاضواء لدرحة انو جاب جريدة حكايات تصورو داخل قاعة الامتحانات في اخر امتحان في سنه خامسه صحيح كان بجيب معدل كويس لكن بسبب تهافته على الاساتذه في مكاتبهم لكن هذا لا يعني انه غيز ذكي اضافة الى انه مستعلي ويتحدث بصلف ويستبطن كره لابناء الهامش بعبارات عنصرية يقولها مزاحا وجوده في الجامعه اصبح في الاونه الاخيره غير اجتماعي باعتبار دخول طلاب مولودين في السنه التى دخل فيها الجامعه هذا كلام شخص معاه في نفس الاتجاه وائل لم يعتقل طيلة الفترة من 2002 وحتى 2014 لو في تعليق جديد حول هذا الموضوع سنعود بتفاصيل كثيرة يتمنى وائل طه ان لا يعرفها عنه الاخرين

[بت المعموره]

ردود على بت المعموره
[اسلام عمر] 05-20-2014 08:37 AM
يا بت المعمورة استغفري ربك...دا شنو الكلام الغريب البتكتبي فيو دا
شنو كان بجيب معدل كويس لاكين دا بسبب تهافتو على مكاتب الدكاترة وتاني تجي
تقولي لينا انو ذكي؟يعني الخلاصة شنو ذكي ولا كسار تلج؟ وبعدين من متين دكاترة
الجامعة بدو درجات اضافية لى لى الناس البهافتو علي مكاتبم؟
شكلك عندك مشكلة شخصية مع الزول دا لانو بي بساطة شديدة وائل طه في جامعة الخرطوم بعرفو الضغير قبل الكبير والمعروف عنو انو من اكتر السياسيين في جامعة الخرطوم تواضعا..
اما قصة انو مستعلي وبتكلم بالطريقة القلتيها دى كلامك في النقطة دى صح..بس الطريقة دي
كان بتكلم بيها مع الكيزان واشباه الكيزان...ومقصه انو مستبطن كره لابناء الهامش دى دى ممكن تشل اى زول بعرف وائل طه من الضحك (لانو ال 13 سنة الكان قاعدا في الجامعه دى كانت مع اولاد الهامش البتتكلمي عنهم ديل) اما قصه انو يستحقرم بي شكل من الهزل دا شي طبيعي جدا و الهزل دا كان بلقي قبول من اولاد الهامش ديل نفسهم لانهم بعرفو وائل طه وبعرفو هو قاصد شنو من الكلام البقولو دا...وانتي الفسرتي الحاجه دى تفسير غريب..خلاصتو كدا شايفك قلتي فى حالة التعليق الجديد عنك لينا تفاصيل كتيرة بالله اتحفينا....وائل طه ما عندو شى داسيو...او قومي لفي ياخ واعفينا من امراضك النفسيه دى.


#1009337 [عبدالله النوبي]
0.00/5 (0 صوت)

05-19-2014 11:53 PM
من شكل الحوار ياهو زاتو بنفس الفهم ما اتغير وائل طه كان زميل دراسة في مدرسة المقرن حالياً كلية من كليات جامعة السودان القريبه من استاد الخرطوم ولمن جلسنا للامتحان قال ما عاوز السنة دي يجيب اي شي وأبوهو استاذ وفعلاً كان بيكتب اسمو بس ولمن يقولو مضى نصف الزمن يسلم ورقتو كما استلمه دخل مايعرف بالكديت على ايمنا في المدارس الثانوية تنظيم شبه عسكري وكانت دفعة مميزة وعنيفة في نفس الوقت لكن وائل فعلاً اذا عاوز يمتحن وينجح بعمله لانو في السنة الامتحن وعاوز يجيب نسبة دخل جامعة الخرطوم لكن الغريب كان صاحب نوادر وقالب كتيرة ومن الكلام فيه تغيير كبير ... تحية تحية لكل الشجراب واللاماب دفعة المقرن 1994م

[عبدالله النوبي]

#1009297 [مواطن]
0.00/5 (0 صوت)

05-19-2014 10:43 PM
لقد تدنى مستوى جامعة الخرطوم كثيرا .. حتى مساعدى التدريس في الجامعة ضعيفو المستوى ..
فهم عبارة عن حفظة فقط ... ويا وائل طه من الأفضل أن تهاجر للخارج وانسى جامعة الخرطوم التي انتهت منذ 30 يونيو 1989 ...

[مواطن]

ردود على مواطن
[ناصر محمد] 05-21-2014 09:01 PM
المدعو (مواطن ) أنت درست في أي كلية - وتخرجت سنة كم - عشان تحكم على الجامعة واساتذتها- أنا درست بالجامعة وفي السنتروبنفس الكلية التي درس فيها وائل مؤخرا ولكن عندما كنت ادرس بها كان وائل طه في كلية العلوم - قسم الرياضيات - واعرفه حق المعرفة .

[عبدالله النوبي] 05-20-2014 10:56 PM
منو معارض الحكومة ولا اتكلم فيها ما عملو ليهو شي خلال العام ولا في شهادتو لمن يسود منهج الغاية تبرر الوسيلة يبقا ما تستغرب تدهور اكاديمي بس كل تدهور بيكون في كل شي تبقا حياة الغابة أرقى منها بكثير وتبقا عصابات المافيا وغيره من العصابات أرحم بخصومه وأرقى نعامل في جرايمه المنكورة من أتباع منهج ميكافيلي ... وائل طه محي الدين راجل ذكي جداً بس للأسف ما قدر يوظف الذكاء ده بطريقة سليمة وضاع بين التضحيات والبطولات والأمنيات والواقع المستعصي على كل الحلول نتيجة الصلف والاستبداد والتنطع الديني المخروم

United States [مواطن] 05-20-2014 02:13 PM
الأخ عبد الله النوبي ... لقد درست بجامعة الخرطوم ورأيت كيف يدرس الأساتذة .. والحقيقة التي لا مهرب منها أن جامعة الخرطوم تدهورت في كافة كلياتها .... جامعة الخرطوم فصلت الكثيرين النوابغ ولكنهم لم يستسلموا فواصلوا دراستهم بالخارج ومنهم الأستاذ الراحل محمد ابراهيم نقد فقد واصل دراسته بروسيا ....وعاد الى الوطن ..

[عبدالله النوبي] 05-19-2014 11:57 PM
بمناسبة ( ضعيفو المستوى ) دي العربية البنعرفه المجرور عمرو ما يجي وراهو مرفوع يعني من اسفل سافلين الى أعلى عليين دي غايتو عشم ابليس في الجنة زااااتو

الجامعة مابس لغة عربية الكليات علوم وأقتصاد وسياسة وفنون مابتحتاج كيف وليت والخرطوم بالذات دراسته انجليزيه أكثر ولو تعربت واستعربت


#1009200 [bent alnil]
5.00/5 (2 صوت)

05-19-2014 07:28 PM
وائل اختفيت و ظهرت عايز تعمل ضجة لا ننكر نشاطك السياسي لكن حكاية حرموني من حقي و أستاذ تدريس دي ما بتشبهك
لما دفعتك في علوم اتخرجوا و عملوا الماجستير و بدأوا في الدكتوراة انت لسه مباري أركان النقاش شجر الجامعة يعرفك أكتر من القاعة و أحمد الله انك اتخرجت بشهاده السياسي الحقيقي هو من يهتم أيضا بمسيرة أكاديمية و مهنية أذكر في كلية الآداب
عاطف الريح كان يعتقل كثيرا و لكنه حافظ علي مستواه الأكاديمي ما عاد سنة و اتخرج بدرجة الشرف و غيره من الأمثلة ..انت
شوية كنت حتتخرج من دار كوسو ...

[bent alnil]

#1009196 [علي مسبل- الفاشر]
0.00/5 (0 صوت)

05-19-2014 07:24 PM
وائل طه الكثيرون لا يعرفونه...؟

[علي مسبل- الفاشر]

#1009190 [سفيانوف]
5.00/5 (1 صوت)

05-19-2014 07:16 PM
خلي الحزب انفعك ضيعت زمن اسرتك و من خلال كلامك يبدو انك قليل الاهتمام بمستقبلك و تحاول ان تبني لنفسك بطولات وهمية و صدقني لو لا ازدياد عدد الجامعات في عهد الانقاذ لما كان امثالك قد دخلوا الجامعة اصلا ,,,,

[سفيانوف]

ردود على سفيانوف
[اسلام عمر] 05-20-2014 01:19 PM
دى شنو البلادة والبله البتتكلم بيها دى يا سفيانوف ولا شيطانوف...زول يقول ليك سنه 95 خشا جامعه الخرطوم تقول لينا لو ما كترة الجامعات ما كان دخل الجامعه اصلا...اقرا الكلام وافهمو حتا بعد داك تعال اكتب لينا هنا...زول غريب والله....بعدين انتا مالك ومال اسرتو ومال زمنو الضاع...اها اسا اتخرج واول دفعتو ومتزوج وشغال....كدى ورينى ضياع الزمن وين
اصلا الزيك ديل الخربو السودان زاتم ناس قريعتي راحت والسياسة ضياع زمن لما الكيزان ركبو فوق روسينا ووائل من القلة الكان بادبو الكيزان ديل ادب...والله كان بجرو قدامو زي الكلاب ولما يسمعو اسم وائل طه دا بتفرزعو زي الجاهم اسد..دا اذا ما كنتا واحد منهم...وهم

[منذر محمد حمد] 05-20-2014 10:02 AM
هو درس فى جامعة الخرطوم ودخل بنسبة عالية ,,,قال لو ماكترت الجامعات ماكت قريت ههههههههههههههههه يأخى خليك منطقى شوية


#1009187 [بت المك]
5.00/5 (1 صوت)

05-19-2014 07:05 PM
ياحليل الجامعه زمن وائل طه كنت من المعاصرين له كان رجل شده واتمني ان يعود للعمل السياسي داخل الجامعه فعلا الجامعه محتاجه لامثالك

[بت المك]

#1009133 [ودازيرق]
5.00/5 (2 صوت)

05-19-2014 06:00 PM
شخص شرس جدا وممتاز ومنطقي انا بعرفو ابام الجامه له التحية مناضل فلا....

[ودازيرق]

#1009118 [محمد بن اسود الغاب الفنجرى]
5.00/5 (3 صوت)

05-19-2014 05:49 PM
خليك من العمر 25 سنة وتعديل اللائحةالذى اعرفه عن جامعة الخرطوم التى كنت احد طلابه فى عصرها الذهبى ايام البركس والفراخ والحليب المجانى والخدمات المجانية وبد المواصلات مرتين فى العام الذى اعرفه عنها ان من فصل اكاديميا ولو لمرة واحدة او تاخر كثيرا لا تتشرف الجامعة بان يكون عضوا فى هيئة تدريسها وبعدين انا كنت قايل حكاية التاخير فى الدراسة انتهت ولكن ما زالت موجودة
يا بنى نضال ايه ديل ناس فايقة

[محمد بن اسود الغاب الفنجرى]

#1009093 [حنين]
3.47/5 (8 صوت)

05-19-2014 05:31 PM
ماتعمل لنفسك هالة انت مامؤهل حتى لو كانت اللوائح تسمح اكيد بحكم يسارى او غيرة اكيد عندك سجل فى الحرس غير السجل الامنى وتانى لو كنت اتخرجت فى تلاتة سنة بدل اربعة كنا نقول الزول راقد فوق علم و راسو كبير بس انت راسك ليهو مكان تانى وزير رئيس جمهورية ممكن نشهد ليك بتاريخك النضالى بس مساعد تدريس تقرى لينا وليداتنا مرفوض!!!!!!!!!!
ماتعمل تضايقونا ياناس الراكوبة بمشاترات زى دى
وما تضيعو زمن القراء

[حنين]

#1009078 [بنت القضارف]
4.00/5 (3 صوت)

05-19-2014 05:17 PM
وائل طه رغم اني اختلف معه سياسيا ، لكن شجاع واسد هصوووووور ،مش زي الرجال البجرو
لكن حكاية اول الدفعة دي ، اتحروا منها كويس
هههههههه

[بنت القضارف]

#1009053 [magdi]
4.96/5 (7 صوت)

05-19-2014 04:50 PM
عاصرت وائل طه في الجامعة و هو ابن منطقتي و صديقي و عملنا معا في دورة الاتحاد بتاعة التعايشي و علاء الدين لكن للامانة لا تتوفر فيه ادني شروط الاستاذ الجامعي فهو اولا لم يكن اول الدفعة حيث انني عاصرته في كلية الاقتصاد و درسنا سويا ثم انه "مربت" اي عائد ...ثم ان مستواه الاكاديمي في كلية العلوم التي جاء منها محولا الي اقتصاد كان متدني جدا و تشترط الجامعة للتوظيف مساعد تدريس ان يتخرج المرشح بدرجة الشرف الاولي القسم الثاني كحد ادني و هذا لا يتوفر في صديقي وائل .....ثم يشترط ايضا ان لا يكون لديه اي ملحق طوال الدراسة و قد كان له عدد من الملاحق...... يَا أَيُّهَا الَّذِينَ آمَنُوا كُونُوا قَوَّامِينَ بِالْقِسْطِ شُهَدَاءَ لِلَّهِ وَلَوْ عَلَىٰ أَنفُسِكُمْ أَوِ الْوَالِدَيْنِ وَالْأَقْرَبِينَ

[magdi]

ردود على magdi
[اسلام عمر] 05-20-2014 01:12 PM
يا مجدي ياخي انتا راجل كذاب ومنافق (دا اذا منتا راجل ) لانوز الرجال ما بكذبو
انتا درستا معاو فى كليه الاقتصاد؟ وبتقول ما كان اول الدفعة في سنتو الاخيرة؟ كذاب وستين كذاب
وائل كان اول دفعتو في سنتو الاخيرة في الجامعه. والحاجة دى ما صعبة للزول الداير يتاكد مسجل كلية الاقتصاد قاعد...بس الخايب الكذاب دا مستفز شوية...لاكين شكلك كنتا واحد من كيزان الجامعه وشكلك اخدتامنو علقة كاربة كدا

[منذر محمد حمد] 05-20-2014 10:04 AM
كذااااااااااااااااااااااب

United States [يالله دايرنوا وطن كامل] 05-19-2014 06:50 PM
كاااااااااااااااك دا صديقي ولا عدو


#1009048 [عادل]
2.00/5 (3 صوت)

05-19-2014 04:43 PM
وائل طه. رجل المهام الصعبة . وائل يجب ان يكون والي الخرطوم في سودان مابعد الانقاذ.

[عادل]

ردود على عادل
European Union [مجروس ق ش م] 05-20-2014 11:51 AM
ياحركان فاضي تفل في عينك يافاضي .انا عمري 42 سنه يعني انا تفل .ده عمر النبوة وسن الرشد

European Union [Kamal] 05-19-2014 09:44 PM
يا جركان فاضى, يكون زى التفل, دى قطعت مصارينا هههههههههههههههه

[جركان فاضى] 05-19-2014 08:19 PM
قرار الجامعة بان لايتعدى عمر مساعد التدريس 25 سنة قرار صائب جدا...فمساعد التدريس يعمل بالجامعة سنتين حتى يمكن ايجاد فرصة لمنحة تحضير ماجستير...ثم يحتاج للعمل سنتين اخريين حتى يجد فرصة لتحضير الدكتوراة...ثم بعد تحضير الدكتوراة يكون عمرة 34 سنة...اما فى حالة وائل طه فان عمره بعد ان يحضر الدكتوراة يكون قد وصل 42 سنة...والعمر بعد اربعين سنة يكون عبارة عن تفل ...زى تفل الشاى



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة