الأخبار
أخبار إقليمية
الحبر ،،سعاد الفاتح وسقوط الكجرة
الحبر ،،سعاد الفاتح وسقوط الكجرة
الحبر ،،سعاد الفاتح وسقوط الكجرة


05-30-2014 08:50 AM
شوقي بدري


اشدت كثيرا ببعض الاخوان المسلمين . وقلنا اننا نختلف معهم جذريا ولكن نحترم صدقهم ونذاهتهم وايمانهم بعقيدتهم وقناعتهم السياسية . وعلي رأس هؤلاء استاذنا في الاحفاد الثانوية الصادق عبد الله عبد الماجد والبروفسر الحبر والبروفسر مالك بدري . وسمعنا ان البطل انس صهر الاستاذ الصادق الذي ترك يد النميري معلقة ورفض ان يصافحه ، والنميري في ذروة قوته وبطشه .
الآن نسمع الحبر يتحدث عن التحلل وبعترض عليه . ويقول ان الشرع لايعرف التحلل . وان هنالك عقوبة رادعة لسرقة المال العام . ولكن ترن ترن الفي القيف حرن . لايجرؤ البروف بتحديد العقوبة وهو سيد العارفين . هل هي جضيم شلاليت تو بيخ ؟ واذا كان كل هذا يحدث ، المقعدكم شنو ؟ الفخفخة والمواهي والمخصصات ؟؟ وكأن البروف لم يسمع بكل الفظائع . ويحذر من محاولة اسقاط النظام .

لقد اشترك الحبر في انقلاب علي حامد وعبد البديع الذين اعدما مع آخرين . ولقد خطط لذلك الانقلاب الاستاذ الصادق . ولقد ابتاع الكيزان سيارة جيب وسلموها للرشيد الطاهر وكانت مسجلة بأسم الصادق. وكان هذا في 1959 . وقبض اللواء عوض عبد الرحمن صغير علي الرشيد خارج السلك الشائك . وتحول الي شاهد ملك وبسببه اعدم الرجال . وارجعت السيارة الي الاستاذ الصادق وكنا نجلس فيها في فسحة الفطور وهي خارج المدرسة .

عندما قام خالد الكد بانقلابه في 1965 وحكم عليه بالسجن كتبت جريدة الاخوان الميثاق ان الظابط شيوعي بسبب القرابة مع عبد الخالق . وعندما اخذ طه الكد الصحيفة وذهب غاضبا الى الاستاذ الصادق مستفسرا - لان طه الكد وخالد الكد من الاخوان المسلمين - كان رد الاستاذ ,, ماهو السياسة كده ,, وترك طه التنظيم . ويبدو ان الكذب من مكونات التركيبة النفسية للكيزان .
والمضحك المبكي ان كرتي يقول ان الحكومه لا صلة لها بالاخوان. يعني مسيلمة ما قدر علي جنس ده. والاستاذه سعاد الفاتح تقول ان من سرق مال الشعب يذبح من الاضان للاضان. اهو كلام والسلام. انتو سرقتوا شرفنا وسمعتنا واخلاقنا. معقول الاستاذة ماعارفة ؟؟ ويشنقوا منو ويخلو منو الفساد من البشير الي بتاع النفايات. الناس بقت تحتفل بالراعي بتاع السعودية لان الصدق والامانه بقت لبن طير .

غندور قبل سنوات عندما ذهب لكي يعزي الاخ فتحي الضو في انتقال زوجته الى الرفيق الاعلى واجال النظر في منزل فتحي مستغرباً لأن مسكنه كان برندة اقتطعها فتحي من منزل الاسرة وبني منها مسكنا. وذي الراجل الجعان القال لي سيد الفرن ,, وكت الرغيف ده كلو هولك ، نان ما تقرض ,, والكوز يحسب ان اي انسان يمكن ان يكتب اربعة كلمات من المفروض ان يكون من الاثرياء . والشاهد ان كل الكيزان جضومن ذي حجر المسن . وقبل الانقاذ كان ابراهيم السنوسي يعمل كمدرس في مدرسة بيت الامانة وكان لفقره وبخله يشارك الفراشين السكن في المدرسة. وكان هو احسن حالا من الكثيرين . ويقول غندور ,, ماتشوفوا زول عمل ليه جضوم وبني ليه بيت تقولوا حرامي . يعني نقول شنو.. كسب كرتلة ولا وفر من حق الفطور .؟

يا الحبر ويا سعاد قتل عوضية عجبنا قدام بيتها وضحايا سبتمبر وقصف المدنيين في جبال النوبة ودارفور وجنوب النيل الازرق واغتصاب النساء والرجال الممنهج، ما هماكم . ولسه قاعدين . راجين الري ماقلتوا لو الناس طلعت وقالت ما عاوزاكم حتتنازلوا والناس طلعت ضربتوهم بالرصاص . وقبل كم يوم الناس طلعت في سودري ، ضربتوهم واعتقلتوهم . وفي ساعتين حاكمتوهم . ساعتين ما بتكفي علشان يكوفتو عزبة خلي محكمه فيها حيثيات وممثل اتهام شهود وترافع وتشاور .

الحبر لا يزال يدعو الناس للحوار . ياخي ده ما حوار ده بيت طاعة . زمان كان بعض الرجال الضعفاء يستعين بالبوليس لارجاع الزوجة واطفالها لبيت الطاعة . ويستاجر بيت تعبان في اطراف البلد ويجيب زير وكم عنقريب وسحارة ويقول ده البقدر عليه . وهو نايم في سرير دبل والمروحة فوق راسه . والمحن انه غندور يدودر والحكومة تحاحي . يحكموا على عقار وياسر بالاعدام وغندور بيحاور .

والصادق يعتقل ويواجه بتهم اقلها تدي اعدام . الدكتور محمد محجوب عثمان شقيق عبد الخالق رحمة الله على الجميع ، قال ان رئيس القضاء العسكري عبد الرحمن الفكي قال له انه صديق والده ويهمه امره ... الخ في ايام المحاكمة واقل تهمة وجهها الي محمد كانت عقوبتها الاعدام . وحكم علي محمد بالاعدام ، وان كان الحكم قد تغير الي المؤبد لصغر سن محمد فقد كان عمره 22 عاما .

نسمع ان قانون الردة خطوط حمراء . ولقد كتبت قبل اسابيع ان الترابي كان قاشرا بعدم وجود حد الردة في الاسلام يؤيد امامة المرأة للصلاه . ولكن لان الكيزان يكذبون بدون خجل او حرج فلقد لزم الآن الصمت . احد الفلاسفة الشعبيين في الدنمارك قال انه من الصعب ان يتنبأ الانسان اذا كان الامر يتعلق بالمستقبل . والتصريحات والكلام ساهل لكن في الحارة شي تاني .

حتي المجرم المريض احمد هارون الذي فاق لؤمه النازيين اشتكي من تفلت الجنجويد . والآن الجنجويد محاوطين الخرطوم . زمان كل حي في امدرمان عنده فتواته . لمن تكون في لعبة في الحي الفتوات بيكونوا جاهزين . ناس حي الملازمين وبعض احياء من اصاب بعض النعمة لم تكن عندها فتوات . كانوا يستاجرون البوليس والسواري . رجل البوليس 15 قرش والسواري بي 35 قرش . دلوكت كرامة البشير جابو ليها الجنجويد علشان لمن البشير في البنج . مافي ود مره يقول اغيرها ولا اقلبها . لكن زمان البوليس والسواري بيضرب الليمونادة وياكل الكيك ويطلب الله . لكن الجماعة ديل بعد ماشافوا القصور وما حيرجعوا بي اخوي واخوك .
والناس الساكنه في القصور دي ما قبل كم سنة حالهم اسوأ من الجنجويد الاسي محاوطين الخرطزم . والحبر وسعاد ديل ماكانوا عارفين بفساد مدير الاراضي والبقية . خلي الاراضي الفاضية ، اراضي حقت ناس ورثة اب عن جد قلعوها . ولمن اسيادها طالبوا بيها لقو انو دمغة المحامي بي 15 الف جنيه . ورسوم المحكمة و3 % من قيمه الارض لازم تندفع في الاول . واسياد الاراضي بيسككوا حبوب السكري والضغط والمواصلات . والمساكين اضطروا يقبلوا يملاليم .

لماذا لا يتطرق الحبر وسعاد الي المخدرات . ولماذا لا تثار هذه القضية المهمة في البرلمان . هذة صحة شبابنا . والبعض يقول ان هذة المخدرات ليست للسودان ولكن لدول الجوار . قالوا حموها الكلوميت بقت تشد العرقي . يعني كل دول الجوار عرفت انو السودانية مخنجية . بدل ماعرفوهم زمان علماء مهندسين رجال قانون وخبراء .

اخونا النف.... رحمة الله علية لمن شالوه من الحراسة للقاضي القاضي ساله عن البنقو امام القاضي كمعروضات .,, البنقو ده بتاعك ؟ ,, والرد كان لا . وواصل انا دخانتي واو اصلي لبكة ، دي فلة انا دخانتي ذي ده . الدخانة دي اتغيرت . واخرج الدخانة من جيبة بكل شجاعة لانه كان رجلا . الاخوان ديل اتلم عليهم الكذب والجبن .

اذا نسينا كل حاجة يالحبر ويا سعاد ، انتو مش كنتو قاعدين لمن البشير ده اشتري يخت بي دقشة ملايين دولارات . وكسروا ليه المباني وقطعوا السلوك . والايتام مالين المايقوما والشماسة ساكنين المجاري. بعد ده عندكم نفس تتكلمو عن الاسلام والتمسك بالاسلام . هل النظام ده ليه دخل بالاسلام . وعلي عثمان يشيد بدون خجل باحمد هارون المجرم ، شكارتا دلاكتا . ولماذا التشدق بالعضوية المليونية . هتلر برضوا كان عنده عضوية اكبر . والنظام ده اسوأ من النازية والفاشية . لم يتغلب عليه سوي نظام الخمير الحمر وبولبوت في كمبوديا . هل هنالك فايروس قد اصابكم او هل حدث لكم غسيل مخ كما كان يقول الالمان بعد سقوط هتلر .؟؟
ع . س . شوقي
[email protected]






تعليقات 25 | إهداء 0 | زيارات 8478

التعليقات
#1021357 [كولوميت]
0.00/5 (0 صوت)

05-31-2014 04:37 PM
يعنى شنو كولوميت ياعمو والدرزن بى كم لاتقول لى اسأل بغاره ؟

[كولوميت]

ردود على كولوميت
[shawgi badri] 05-31-2014 10:26 PM
الكلوميت مشروب يخمر ذي الشربوت والدكاي والانشة والعسلية والبغو والبقنية والحيسونة والمريسة التي تنقسم الي الوردي النوع الاول والاخير التعبان هو كرفين . ودي عملها ساهل لكن العرقي بيسموه ود العود لانه بيحتاج للنار والتقطير ودي عملية معقدة . عمل المونة بياخد اسبوع .


#1021324 [لوممبا]
0.00/5 (0 صوت)

05-31-2014 03:56 PM
التحايا لك استاذ/شوقى الموسوعة السودانية ( الامدرمانية) تخصص لماتتحفنا به من مواضيع ( الف رحمة للخالة ) لم اتمكن من الدخول مع الموضوع والرحمة لكل موتانا والتحايا لك لما تكنه من ود لكل كبير عاشرته .
نسال الله ان يمكنك من السرد المتواصل حتى يستبين الكثير من الاخوة لما حاول اهل الانقاذ من طبعه فى اذهان الكثير مما حاولوا طمسه سماحة اهلنا السمحين البسيطين.
لك التحايا ولكل المتداخلين ونرجو لكل من له معرفة بان ينورنا والله يديكم العافية .

[لوممبا]

#1021303 [لوممبا]
0.00/5 (0 صوت)

05-31-2014 03:35 PM
لك التحايا الاستاذ/شوقى الرجل الموسوعة السودانية (الامدرمانية)تخصص لم اتمكن من المداخلة فى موضوع المرحومة لها الف رحمة ولكل وفياتنا والاحياء منهم ولكل شخص حادب لمصلحة سوداننا امس علقت ﻻكن يظهر راح مع الزحمة بتاعة مواضيع الراكوبة وتمياتنا لهم بالسداد والتوفيق فى مسعاهم ووفقك الله فى المداومة على التواصل حتى يبين الكثير من الامور والشكر لكل متابع ولكل كاتب ينورنا فى امر سوداننا الذى حاول اهل الانقاذ بتجهيل الاجيال وطمس الحقائق ليسود فكرهم الذى خططوا له بليل.
لك التحايا استاذ/شوقى ومازلنا فى انتظار المزيد والتحايا موصولة للمتداخلين.

[لوممبا]

#1021070 [د. ميرغني]
0.00/5 (0 صوت)

05-31-2014 11:32 AM
هل هم كجرة أم فجرة؟

[د. ميرغني]

ردود على د. ميرغني
[shawgi badri] 05-31-2014 10:20 PM
العزيز د ميرغني لك التحية . الكجرة جزء من الغرفة يقتطع بالبروش او الثياب . لكي يستترفيه الانسان .


#1021030 [الحنكول اخو الدعول]
5.00/5 (2 صوت)

05-31-2014 10:52 AM
الله يديك العافية يا ود بدري ريحتني شديداضرب الحرامية بعد شبعوا تب ونشفوا البلد من كل شئ دايرين يتكلموا عن الدين والاخلاق

[الحنكول اخو الدعول]

#1020911 [الجلابي الذكي]
5.00/5 (2 صوت)

05-31-2014 07:14 AM
((( انهم يفوقون سوء الظن العريض...كلما اساءت الظن بالاخوان المسلمين وجدت نفسك كنت تحسن الظن بهم))
محمود محمد طه

بعد خروج كل الخرطوم في استقبال د جون قرنق2005 وتسجيل 18 مليون ناخب..اصيب الكثيرين من اهل السودان القديم وثمود بمتلازمة جون قرنق "انا امثل الاغلبية"....
((الفرز الشعبى)) حصل ولكن ماذا دهى نخب السودان القديم؟؟ بيساره لبائس تصطف ايضا خلف المؤتمر الوطني ورئيسه الذى غوى وعصا قايمة وعصا نايمة ومنقطة رمادية عريضة ومريضة تطمم البطن...
عوامل ابقت الانقاذ 25 سنة
1- القمع
2- الاعلام المضلل
3- تشرزم المعارضة
هذه هي العومل لتي ابقت على -الاخوان المسلمين "المجرمين " وهم ملة واحدة من 1964 وان اختلفوا في الظاهر

وعزلهم فعلا يا عمنا شوقي كمريض الايدز مع اعتذارزن لمريض الايدز ده انجع علاج وكسر ليهم
انظر كيف لفظهم الشعب المصري وفقدوا الحاضنة الشعبية واصبحو ايتام في وطنهم مصر ونحن في النفاق والمجاملة الرخيسة حتى الان...
اردم يا عم شوقي

[الجلابي الذكي]

#1020835 [خالد حسن]
5.00/5 (1 صوت)

05-31-2014 01:48 AM
ود حلتنا لك التحية انت مفخره

[خالد حسن]

#1020694 [nagatabuzaid]
5.00/5 (1 صوت)

05-30-2014 10:24 PM
تورت يا استاذ شوقى بدرى وما عندى تعليق بعد كلامك
يا ابراهيم السنوسىقالوا( البعرفونا وا يحضرونا) لك التحية يا استاذ شوقى

[nagatabuzaid]

ردود على nagatabuzaid
United States [nagatabuzaid] 05-31-2014 05:29 PM
تحياتى اخ شوقى مداخلتك اسعدتنى حقيقة استاذ شوقى انا لا اعرف السنوسى سوى من صورته الثعلبية الشبيهة بصورة الترابى ولكنى اعرف له موقف ساكتبه فى مكان التعليقات

[shawgi badri] 05-30-2014 11:52 PM
الشقيقة نجاة لك التحية . افتكر انت بتعرفي ابراهيم احسن مني , . وبالمناسبة انا مولود في الابيضي واهل الوالدة اغلبهم من كردفان . المؤلم ان ابراهيم لمن كان محافظ طلع المجرمين من السجن وجندهم ووداهم الجنوب كمحاربين وبعضهم قتلة .


#1020522 [ساره عبدالله]
5.00/5 (2 صوت)

05-30-2014 05:16 PM
الاخ شوفى بدرى اراك توضع صورة سعاد الفاتح فى مقاللك انا احد النساء الائ مثلن السودان فى بعثه فنيه الى الكويت وافول وتشهد البعثه من ممثلين وممثلات ان سعاد الفاتح باسمنا اخذت من الحكومة الكويتيه ملاين الدولارات من عملات صعبه وانا اتعجب
ان هذه تفول ان الشعب كله حراميه انت من سكان العباسيه والعرضه فريبه منكم تتذكر
بيت سعاد الفاتح وقصرها الان شوفت البس الاسلامى والعمامة

الله اكبر ولله الحمد

[ساره عبدالله]

ردود على ساره عبدالله
United States [الفار] 05-30-2014 07:10 PM
مزيد من التفاصيل ساره
هؤلاء يحسبون خيرات السودان غنيمه لهم توزع علي حسب جهادهم

[shawgi badri] 05-30-2014 07:03 PM
العزيزة سارة لك التحية . ناس الراكوبة هم النزلو صورة سعاد . انا ماقدر انزل رقم تلفون في تلفوني . انا تمام عبسنجي لكن سكنا في اغلب احياء امدرمان واعرف كل ركن في امدرمان القديمة . وبنعرف البير وغطاها . ومين اكل ومين سرق من زمن تجارة البرشوت .


#1020494 [من المركز]
5.00/5 (2 صوت)

05-30-2014 04:18 PM
اثابك الله
خلاصة الكلام كما قلت يا استاذنا الناس ديل ما بيمشوا باخوي واخوك. وسؤال المليون دولار نحن ناس العاصمه مفروض نعمل شنو عشان نعجل برحيلهم؟
من غير بداية المشوار لن نصل، ولا كيف؟
الا لعنة الله علي الظالمين

[من المركز]

ردود على من المركز
[shawgi badri] 05-30-2014 07:12 PM
اقل حاجة الناس تعزلهم وتتجنب الكلام او الاختلاط بيهم . وده مارسناه في نهاية ايام مايو النميري ذاتو احسوه الناس بانه غير مرغوب فيه . وبلاش طيبة.لانه الناس ذي الصادق بالرغم من كل الاهانات والخيانات لسة بتلما عليهم . في سفراء كانت عندي معهم قرابة او صداقة ز عزموني بيوتهم رفضت وقلت ليهم دي ما بيوتكم دي بيوت الانقاذ الضبحت الناس .


#1020407 [عوج الدرب]
5.00/5 (4 صوت)

05-30-2014 12:58 PM
( لايجرؤ البروف بتحديد العقوبة وهو سيد العارفين . هل هي جضيم شلاليت تو بيخ ؟)
( ويبدو ان الكذب من مكونات التركيبة النفسية للكيزان .)
(والمضحك المبكي ان كرتي يقول ان الحكومه لا صلة لها بالاخوان . يعني مسيلمة ما قدر علي جنس ده
والشاهد ان كل الكيزان جضومن ذي حجر المسن .)
( وقبل الانقاذ كان ابراهيم السنوسي يعمل كمدرس في مدرسة بيت الامانة وكان لفقره وبخله يشارك الفراشين السكن في المدرسة . وكان هو احسن حالا من الكثيرين .)
(الاخوان ديل اتلم عليهم الكذب والجبن .)
...............................................

يا عم شوقي علي اليمين ريحتني في حناني زاتو ... الكيزان ما عندهم دين و لا أخلاق نعرفم من الوسطى ، كتيرين كانوا (من الجماعة إياهم) و دخلوا التنظيم عشان يلقوا مجتمع تاني و مرة مرة يتاورم الحنين ، أصلو ركوب العجلة ما بيتنسي ... الغريبة الشيوعيين ما كانوا بيقبلو أي واحد من (الجماعة إياهم) مرة سألت شيوعي : ليه ما بتقبلوهم ؟ قال لي : من دخل فيه لا خير فيه ... من يوم داك و انا عرفت الحكمة دي الاثبتت الأيام صحتها .... ينصر دينك يا شوقي بدري .

[عوج الدرب]

#1020376 [صبري فخري]
5.00/5 (2 صوت)

05-30-2014 12:35 PM
الحبر قال الشطار هم الذين ينصحون الحكام وانا ما شاطر

[صبري فخري]

ردود على صبري فخري
United States [ابو نواس] 05-30-2014 07:07 PM
ونعم الجهاد

United States [عمر] 05-30-2014 03:24 PM
الحبر يقصد (الشجعان) وليس (الشطار) لأنه معروف بالجبن.. والكيزان يعرفون ذلك جيدا ويروون عن جبنه قصص كثيرة منها:
طلب أساتذة الجامعة من الحبر أن يتولى الرد على الرئيس نميري في اجتماع كان مقررا لهم به فرفض الحبر رفضا باتا وقال: (لا يجوز للمؤمن أن يعرض نفسه للتهلكة).. فقالوا له اعـتبرها جهاد ياشـيخ الحبر.. فقال: إني أفضـل أن أجاهد في زوجـتي فقط!!!
فتركوه يجـاهد في زوجته وكلفوا غيره بالمهمة.... لا أدري ما هي ثمرة جهاده في زوجته؟!! فعسى أن يكون رزق بسببه عددا من البنين والبنات!!!


#1020359 [المهندس سلمان إسماعيل بخيت على]
5.00/5 (5 صوت)

05-30-2014 12:11 PM
الصادق عبد الله عبد الماجد ماعندى بيهو عرفه عشان أشكره أو أفسله ولكن مافى أى كوز يمكن أن تشكره مهما كان تبحث عنه تجد فيهو إنه
كنت من المعجبين بالبروفسر الحبر يوسف نور الدائم - لكن شاءت الأقدار فى منتصف تسعينيات القرن الماضى أن أتى من مسقط فى طريقى للخرطوم عبر الدوحة على طيران الخليج - جلس بجوار شاب فى أواخر العشرينيات من العمر ملامحه سودانيه ولكنه يحمل جواز سفر بريطانى - عرفت أنه محمد الحبر يوسف نور الدائم - من حديثى معه علمت أن الشعب السودانى ( محمد أحمد دافع الضريبة ) أرسل والده لبريطانيا لنيل درجتي الماجستير والدكتوراة وبما أن من ينتدب فى تلك الفترة يكون من المتميزين من صغار السن وخوفا عليهم من أجواء الخواجات يتم تزويجهم ويصطادون عصفورين بحجر واحد - شهر عسل فى لندن وبعثة علمية للدكتوراة - شيخ الحبر أنجب أولاده هناك وحملوا الجواز البريطانى ودا من حقهم - بريطانى بالميلاد - لكن الأمر المؤسف أن عاد بهم للسودان وأخفى الجوازات البريطانية وكسودانيين - درسوا الإبتدائى والوسطى والثانوى والجامعة ( جامعة الخرطوم ) مجانا كسودانيين - وما أن تخرجوا - أخرج لهم الجوازات البريطانية ولم يذهبوا للخدمة العسكرية ولم يذهبوا لمحرقة حرب الجنوب التى كان والدهم من منبر المسجد الذى يخطب فيه كل جمعة بشمبات يحض الشباب على الجهاد - ولده محمد قال لى أنا أعمل بين لندن وعوصم دول الخليج فى التجارة - أنا يا شيخ الحبر عاوزك تشوف أولادك كم كلفوا محمد أحمد دافع الضريبة فى الأولية ، الوسطى ، الثانوية والجامعة وكم كلفوا محمد أحمد دافع الضريبة علاج فى مستشفيات الدولة وكم كان عليهم أن يدفعوا كرسوم إقامة لأننا صرفنا على ( أولاد الإنجليز ) ماء وكهرباء وأمن ومواصلات طلاب مخفضه وكل شىء وتمشى وتسدد هذه الملايين فى خزينة الدولة بأورنيك 15 ثم بعد ذلك تجى تقول قال الله وقال الرسول
الكلام دا ليس لشيخ الحبر الكلام دا موجه لشيوخ وعلماء ودكاتره كتار أرسلناهم يتعلموا بره جنسوا أولادهم ودا ليس لدينا عليه أعتراض ولكن أن يعودوا بأولاد يحملون جنسية أجنبية ويعلموهم على حساب دافع الضريبة ولمان يكملوا الدراسة الجامعية بالسودان يسلموهم جواز سفر الخواجات ويقولوا ليهم خلاص أنتم أحرار وناس دكتور مدثر ولدى يمشوا القطينة ويجوا يمشوا يؤدوا الخدمة العسكرية فى حامية القطينة ويدفعوا الضريبة - كدى يا شيخ الحبر أفتينا فى هذا الأمر وأمسك الألة الحاسبة وشوف أنت مطلوب منك كم مليون جنيه لمحمد أحمد

[المهندس سلمان إسماعيل بخيت على]

ردود على المهندس سلمان إسماعيل بخيت على
[المهندس سلمان إسماعيل بخيت على] 05-31-2014 12:44 PM
الإخوة والأخوات المعقبين على تعليقى على المقال أعلاه
أنا لم أتحدث عن كل سودانى متجنس ولكن هذه حالة خاصة
رجل إمام وخطيب مسجد فى أحد أحياء ولاية الخرطوم يخطب فى الشباب ويحضهم على الجهاد فى الجنوب فى الوقت الذى يخرج فيه جوازات بريطانية لأبنائه ليهربوا من جحيم حرب الجنوب والحالة دى عشناها مع المدعو الطيب مصطفى يربط راسه بعصابه حمراء ويحض فى الشباب للذهاب لمحرقة الجنوب ولمان مشى ولده الكبير مصطفى ومات فى الجنوب إنقلب 180 درجة وبدأ يطالب بفصل الجنوب من قبل الإستفتاء
يا جماعة خلونا نتوجه بهذا السؤال لشيخ الحبر : يا شيخ الحبر محمد ولدك لو طلب للتجنيد فى الجيش البريطانى وأرسل فى كتيبة بريطانية لقتال الأفغان من طالبان وقاعدة ، موقفك أنت شنو كأب ؟
فى بعض بدأ يتحدث أن والده بيدفع ضريبة للوطن عشان كده من حقه يعلم أولاده فى مدارس الشعب - لا يا أخوتى لا تغلطوا نحن علمنا الحبر فى الخلوة والأولية والوسطى والثانوى والجامعة وأرسلناه للتحضير للماجستير والدكتوراة على نفقة الشعب والضريبة التى يدفعها هو ضريبة تربيته وتعليمه ولكن نحن نطالب بضريبة أبنائه تجاه الوطن الذى تعلموا فيه مجانا
الموضوع دا يمس اسر كثيرة لذا لازم يفرد له مقالات كثيرة ويحدث جرد
البلد دى تسرق من كل السودانين الذين يدعون الشرف ولمان تشوف الحبر يتكلم فى البرلمان تحسبه موسى وللأسف كلهم فرعون

United States [حكم] 05-31-2014 12:21 PM
اولا .. متأسف للباشمهندس لأنى شايف الموضوع جرجر ردود كتيرة ..

اخونا خالد حسن .. حياك الله وابقاك ..
شيخى منو ؟؟ .. انت عملتنى منهم ؟؟ معليش .. قالوا المابيعرفك يجهلك
لكن انا بعرفك يا خالد عباسية هههههه
تحياتى

United States [حكم] 05-31-2014 02:56 AM
الأخ متسائل ..لك التحية .. تفهمت وحهة نظرك فى الموضوع

الأخت نجاة ابوزيد ..لك التحية ..
يا اختى ، كدى راجعى كلام الباشمهندس تانى.. هو اتكلم عن حقوق الأبناء فى الدراسة .. ولهم الحق فيها طالما ابوهم بيدفع الضريبة فى السودان (من حق ابوهم دافع الضرائب) .. اما موضوع الخدمة الإلزامية، وصفتيه بالكذب والتدليس .. ماهو بكذب ، لأنه الجواز الأجنبى حقيقى .. لكن الكذب هو حق الناس البجيبوا خطاب حوجة من مصلحة معينة سواء كان تدريس او غيره، ويشيل مرتب مجند سلفقة ساكت من غير ما يداوم حتى .. وفى النهاية يطلع بخطاب تأدية الخدمة الإلزامية
كدى انتى خليك من دا .. رايك شنو فى اولاد الدول المجاورة البقروا على حساب السودان؟؟
الشايلين الجواز السودانى ديل "من الدول المجاورة" كلهم مدين الوطن حقه ؟؟

تحياتى

European Union [خالد حسن] 05-31-2014 01:56 AM
ياحكم ماوريتنا ليه شيخك الدجال القاعد يدعو الشباب للذهاب للمحرقة باسم الجهاد ليه ماودا اولاده ليستشهدوا ويدخلوا الجنه!
ونفس الشي للدجال الترابي وعلي ونافع ولا اولادهم ضامنين الجنه ويحرقوا والادنا
الدجل بقي واضح وتاني مابنثق في دعاة الدجل ناس الحبر والترابي

[nagatabuzaid] 05-30-2014 10:19 PM
رد على حكم :

المهندس سلمان فى تعليقه لم يعترض على حمل الجواز الاجنبى بالميلاد بل قال من حقهم بل هو ركز على نقطة هامة لا ادرى هل اغفلتها عمدا ام سهوا وهى انهم يخفون الجوازات الاجنبية ليدرسوا اولاى مصلحة وعند اداء الخدمة الوطنية يبرزون الجواز الاجنبى وده طبعا كذب واجرام وتدليس

United States [متسائل] 05-30-2014 09:22 PM
نعم يا الحكم أوربا و أمريكا مليانة سودانيين لديهم جوازاتهم, ولكن الامر يختلف فى حالة الاسلاميين فهم مبدئيا ضد كل ما هو أوربى وأمريكى و جعلوا محاربتهم من أولوياتهم فلماذا ازدواج المعايير فى ترتيب أمور أسرهم تحت رعاية تلك الدول و أنظمتها الذين هم فى تصادم دائم معهم فى منابرهم و مواعظهم, كيف نجد المصداقية و الاحترام لمثل هؤلاء القوم.

United States [حكم] 05-30-2014 06:45 PM
خاف الله يا باشمهندس
ما ضرورى يكون ولد مسؤول .. أى واحد عنده جنسية مزدوجة بيستفيد من الميزة دى
ياها دى اوربا وامريكا مليااانة سودانيين عندهم جوازات .. شنو يعنى؟؟

انت ما اعترضت علي حامل الجواز الأجنبى البيحكم عديل .. تجى تعترض على زول قرأ
ابتدائى ومتوسط وثانوى وجامعة ؟؟ ..
من حقه يقرأ لأنو ابوه بيدفع الضرايب .. يعنى من حقوق ابوه انه ولده يقرأ فى السودان
زى ما انت مغترب بتطالب بحقوق اولادك فى القراية فى الجامعات السودانية (لأنك انت دافع ضرايب)

بعدين ما تخلى الزعل يعميك .. البروف لمن كان بيخطب فى جامع شمبات
معروف انه كان بيتمم فى مكاتب الأمن بعد كل خطبة ، لأنه كان معااااارض
حتى ان الجامع كان بيتملى بالمصلين والحوش والناس تصلى فى الشارع
ودى حقيقة اى زول بيعرفها

اما بعد دخوله فى البرلمان .. دا شىء تانى
ولنا عليه فيه بعض المآخذ
بس انت رووووق


#1020345 [radona]
5.00/5 (2 صوت)

05-30-2014 11:59 AM
الدين النصيحة
وبصراحة وبدون لف او دوران او دغمسة ولا جغمسة
لقد اقترن اسم الاخوان المسلمين بالانقاذ وارتبط اسم الانقاذ بالفساد
ولكن هذا لايعني ان ليس هنالك شرفء
نابليون قال الثورات يسرقها الانتهازيون
وبامانة اكثر السواد الاعظم من الانقاذيون انتهازيون فاسدون
نعم انهم فاسدون جدا

[radona]

#1020340 [خليل ابومحمد]
5.00/5 (2 صوت)

05-30-2014 11:54 AM
أســـــتاذ كبير جدا ياشــــــوقي
كلامك كلام زول موجوع حقيقه , يعرف ماضيهم ويعيش حاضرم ويستقرىء مستقبلهم !
كنت احترم الشيخه ســــعاد وأجلها جدا ,,, ليتها صاحت صيحتهاالشهيره ( واااااســـــلاماه ) كما فعلتها في ندوة معهد المعلمين العالي ؟؟؟ لكني غير آسف لسقوط ذلك الاحترام والاجلال ولن يعود ذلك الاحترام الا عندما أراها تقود التظاهرات ضد الفساد وتطالب البرلمان بموقف واضح وعاجل لمحاكمة المفسدين واطلاف سراح نائب ومساعد مدير الاراضي فورا.

[خليل ابومحمد]

ردود على خليل ابومحمد
United States [Husham Hussain] 05-31-2014 12:42 AM
كل المسئلة مسئلة عاطفية لا تخاطب عقل لا منطق ... ماذا بعنى ان تصيح واسلاااااماه هل كانت تتوفع هن يبعث الخليفة المعتصم من قبره ويزحف لنجدتها, طبعأ هذا هو المقصود عندها فهى تتخيل نفسها فى القرن الثالث الهجرى , تمامأ عندما تحدثهم عن امر او فعل حدث ........ مثال الحصار الا مريكى على السودان يردون بان الرسول قد حوصر فى شعاب ابوطالب ايضأ , وهاهو غردون يتحدث بان الفساد كان موجود حتى فى زمن الصحابة وهل وجود الفساد فى زمن الصحابة هذا مبرر بان يفسد المسؤلين الان ؟
هؤلا لا عقول لهم ولا منطف لهم لقد ادمن هؤلا الغيبيات بصورة ادت اى ما ال اليه الحال الان ولا زالوا سادرون فى غيهم حتى تتفجر الحرب لاهلية المرتقبة وتمزق السودان فلا دولة مسلمة ولا دولة كافرة لا يجدونها, عجبى لاناس يعيشون بيننا الان وعقولهم وقلوبهم تعيش فى الفرن الاول الهجرى ,
سيدى : مادام هذا هو التفكير وهذا هو المنطق الذى تدار به الدولة فى القرن الواحد وعشرون اقسم لك جازمأ بان لا مستقبل ولا حل للسودان يرى فى الافق ,
والله من يعول على برلمان او مسيرة او غيرها فانه يرجى سراب لا نهاية له’ فقد سقطت الدولة فى ايدى متخلفين لا عقول لهم , ولا فكاك منهم بطريقة تقليدية فهؤلا يظنون انهم يمثلون الله وان هذه الدولة هى دوله الهية وان ما يحدث ويجرى هى ابتلائات من الله لبختبر صبرهم كما بردد الرئيس المعتوه , هؤلا افنوا سنين شبابهم فى الحركة الاسلامية وعندما تمخض الفيل ولد فار ميت لقد ادرك هؤلا ان كل ما كان يجرى طوال تلك السنوات لم يكن الا وهم كبير وخيال جامح لدرجة الجنون الا ترى ان شيوخهم اصابهم الاحباط مثل المرحوم يسن عمر الامام واحمد عبد الرحمن وغيرهم وحتى هذه السعاد الفاتح لقد ادرك هؤلا ان كل المسئلة والتى كانت تدور منذ الستينات لم تكن الا خبال ووهم لرجل مجنون ’ فلا يوجد دولة اسلامية ولا يوجد ما بسمونه شريعة ولا يحزنون مجرد تهيات وخيالات تقال بالالسن ولا مجال لها على ارض الوافع , بعضهم ادرك ان لا بد من التعويض على هذا العمر والسنوات التى ذهبت ادراج الرياح فجد بعضهم فى نهب كل ما تقع عليه ايديهم فلقد ادرك هؤلا انه لا مجال ولا مستقبل لحركة اسلامية بعد هذا المولد الذى على وشك الانفضاض .


#1020336 [عبد البديع]
5.00/5 (1 صوت)

05-30-2014 11:53 AM
ف مقالك اشرت الي اشتراك الحبر في انقلاب حامد وعبد البديع
او من كان معهم - اتمنيت ان يذهب الزمن لوراء
او يعقد ساعة زمن ويحاسب نفسه هو والذين كانوا معاهم
او لكل من يعرف الشهيد المناضل عبد البديع
اعرف بأن لديه بت واحد تسمي بدرية عبد البديع
تعاني ما تعاني منذ ان قدم حكومة الغير اخلاقية
بدلا م يعينوها هي واطفالها وقصور زوجها لانها تعاني
من مرض زوجها وتربية ابناءها في هذا الزمن الصعب
وبدل ما يقف معها شيخ الحبر واعوانه لكي تكون كفارة علي الاقل
لشخصية والدها المناضلة والقوية
والامثلة كتيرة - ورئيس الجمهورية جعفر النميري لم يقصر معها
اعترافا برجولة الضابط عبد البديع وهو يعلم بأنه الشخصية الفذة
وفي تلك الفترة في تاريخ السودان
كان اي شخص يلدوا له ابن سمي على اسمه " عبد البديع "
واعتقد هذا اجابة شافيه للحبر واعوانه
عن مدي حب الناس لهذا الشهيد البطل
اتمني لهم مراجعة انفسهم وان يقفوا ساعة لتصفية
سرايرهم النفسية لتصحيح م يمكن اصلاحة فبل فتوات الاوان

[عبد البديع]

#1020324 [Almo3lim]
5.00/5 (2 صوت)

05-30-2014 11:40 AM
الشكر للكاتب ع س شوقي ..

ابدعت في الربط و تأمين الهدف الذي ترمي إليه من خلال أسلوب بسيط و شيق مليء بالمقارنات الواقعية المقنعة ...

ليت كل من يكتب يتبع مثل هذا الأسلوب البسيط المباشر الواعي المفضي لشيء..

لله درك و لا تحرمنا من كتاباتك ..

[Almo3lim]

#1020323 [محموم جدا]
5.00/5 (1 صوت)

05-30-2014 11:38 AM
ود المرة ما ود حلال لكن ود الرجال مالو ..... و بعدين ديل الجماعة يودوك البحر و يجيبوك عطشان عليكم الله في اكبر دليل على الفساد من الاعترف بيه شيخ علي عثمان في مسرحية لا لا لا الفي المجلس الوطني يوم قال راتبه عشرة مليون .. طيب ليش النائب العام و وزير العدل ما سأله عن البيت جابه من وين و دا كمان كان مغترب برضو خمسين سنة يا شوقي الجماعة ديل يفتلوا الرملة حبال و بعد ما جابو ضقلها يكركب ماسكين فيها بإيديهم الاتنين و يحاورو بي جاي و يكاوشو علي كوبر بيجاي زي ما قلتها يدودروا و يحاحووا نسأل الله يجي يحاحيهم ود مرة و شركه يقبضهم يفتفتوالما يجنحهم و يرميهم في القفص عشان يبيضوا كل الاكلوا ... آميين

[محموم جدا]

ردود على محموم جدا
[أبوداؤود] 05-30-2014 08:06 PM
مسرحية لا لا لا دى فيها لقطة جديرة بالتسجيل فقد رايت فيها د الحبر يوسف وراء المنصة التى يتحدث منها على عثمان وقد اشترك فى كوبلى لا لا لا عندمااعلن نائب الرئيس الكذاب انه سيودع تفاصيل راتبه فى سكرتارية المجلس ورايت الاتى :
1- كان د الحبر مذهولا مفتوح الفم من شدة تصديقه لكلام النائب الاول .
2- من فرط دهشتى تساءلت من اعطى هذا البروف درجته العلمية وهو يتقلد درجة تستدعى الكثير من الذكاء .
3- تساءلت لماذا اختار النائب الاول بيان راتبه فى المجلس التشريعى لولاية الخرطوم وليس فى المجلس الوطنى .
4- ارجوا ممن عنده نسخة من تسجيل هذا الجطاب للتوثيق فقط .
أما د سعاد الفاتح محركة مسرحية طالب معهد المعلمين التى ادت الى حل الحزب الشيوعى لا اعتقد انها تجهل فساد اخوانها , لكنها فى نظرى تتجاهل لا نها بدورها قد ورطت غى الفساد من خلال مناصب المؤتمر الوطنى والمجلس الوطنى وغيره . كل هذه وكار توريط من يدعون الطهارة والتدين حتى يخرصوا بالفتات . وأنا معجب من تعليق احد المعقبين (من دخل فيه لا خير فيه)
لا حول ولا قوة الا بالله هؤلاء بحق اخوان الشياطين .....


#1020306 [عبادة]
5.00/5 (4 صوت)

05-30-2014 11:24 AM
لله درك يا أستاذنا شوقي بدري والله ديل شبعوا لذلك لا يستطيعون الكلام وهم من25 سنة عارفين وهم ومعهم أخونا حسين الذي يتحدث عن أن حزب السودانيين يمكنه فعل الخير في الشوارع والميادين تناسى أن ال25 سنة هي التي أبادت أخلاق الناس وسرقت قيمهم وطهرهم وعفافهم ونسى أن ذاكرتنا فولاذية ويوم الحساب لن ينجوا كلهم ﻷنهم شاركوا في الفساد بالبقاء والسكوت
لك التحية وسيأتي الفرج قريبا إن شاء الله وسيعرف هولاء من نحن

[عبادة]

#1020247 [ادروب الهداب]
5.00/5 (3 صوت)

05-30-2014 10:01 AM
والله يااستاذ شوقي من كترت ما اصابنا من هول ما نري من هذه الشرذمة ما قادر اجد ليهم
وصف لكن بدعو الله ان يدمرهم كما دمروا البلد

[ادروب الهداب]

ردود على ادروب الهداب
[fadeil] 05-30-2014 12:38 PM
حقيقة لا وصف يوصف به هؤلاء الفسقه الفاسدين والمجرمين الا أن نرفع أكفنا لله تعالي أن يدمرهم تدميرا ويجعل يومهم كيوم عاد وثمود، اللهم شتت شملهم وأرنا فيهم قدرتك يا أرحم الراحمين .


#1020245 [وحيد]
5.00/5 (6 صوت)

05-30-2014 09:59 AM
الترابي لما اختلف مع جماعة الاخوان المسلمين قالوا لانه مستعجل السلطة و عايوين يكبر التنظيم بالخم و الجماعة كانوا مركزين علي التربية أولا لكنه قال التربية بتجي بعد الناس تدخل التنظيم ... لقط كل الملاقيط و السفها عمل بيهم تنظيم و اغراهم بالمال و ما ادبهم و لا رباهم .. لما مسكوا السلطة حكمونا ملاقيط الترابي البدون تربية دينية و لا توجيه، و حتى شيخهم انقلبوا عليه ... زي ديل سعرانين و محدثي نعمة و ما عندهم اخلاق و الما عندو دين و لا اخلاق و حاقد على المجتمع لما يلقى سلطة بيبقى أسوأ من موسوليني .. و قدامنا بيان بالعمل ... حتى الحاجة المسترجلة البتدعي الدين هي زي الجماعة .. كلهم طينة واحدة معجونة بموية ابليس

[وحيد]

ردود على وحيد
United States [عبد الله عبد الله] 05-30-2014 11:30 AM
يعني هو كان متربي، عشان يربي غيره ..؟!!!

بئس التربية.. وبئس المربي ،،،


#1020232 [mansor]
4.75/5 (5 صوت)

05-30-2014 09:31 AM
كلام جميل وسمح تب لكن يااستاذ انهم لا يستحون اعوذ باللة منهم

[mansor]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة