الأخبار
أخبار إقليمية
لا يوجد بالأمارات
لا يوجد بالأمارات
لا يوجد بالأمارات


06-04-2014 02:54 PM
الفاتح يوسف جبرا

تشرف العبد لله خلال الفترة من 19 مايو إلى 29 مايو 2014 بزيارة دولة الأمارات العربية المتحدة ملتقياً مع الجالية السودانية في ليال ثقافية بكل من مدينة أبوظبي ودبي والعين وقد لفت إنتباهه أن هنالك أشياء لا توجد بدولة الأمارات منها :

• لا يوجد في الأمارات شرطي مرور .. خلال العشرة أيام التي قضيتها متنقلاً من إمارة إلى أخري لم أشاهد مطلقاً أي شرطي مرور (واقف ليهو في إشارة) وللا قاعد ليهو في عربية يتحصل في الغرامات بينما أفراده يقومون بإيقاف السائقين للبحث عن (مخالفاتهم) !
• لا يوجد في الأمارات أكياس نفايات ملقاة (مردومة) في الشوارع أو حتى الأزقة ولم أر ولو مرة واحدة عربة نفايات تقوم بجمع القمامة فجمع النفايات يتم في أوقات يكون فيها الناس نيام (مش قيام)
• لا يوجد في الأمارات شارغ واحد به حفرة واحده .. كل الشوارع مسفلته بمواصفات عالية أذ أن الشركات التي توكل لها هذه المهمة شركات ذات باع طويل في رصف الطرق لا كتلك الشركات التي يتم تأسيسها بين يوم وليلة ليرسو عليها العطاء وهي لا تمتلك من الأليات (ولا كوريك) واحد.
• لا يوجد في الأمارات حظر للمناسبات وموعد لإنتهائها (لا الشاعة حداشر وللا الساعة عشرين) لا أدري من أين أتينا بهذا الحظر المعاهو كمان (رسوم) !
• لا يوجد في الأمارات تقييد في حرية اللبس بالنسبة لغير المواطنين فأي قادم له الحق في إرتداء ما يحب طالما أنه لا يكشف العورات ومع ذلك لا أحد يتجرأ أن يعاكس أحد (تعاين وبس) ! وإلا فإن القانون لا يرحم .
• لا يوجد في الأمارات رجال شرطة في الطرقات .. لم أر شرطياً واحداً لكن على الرغم من ذلك الناس (ماشين ذي الخيط) ولا يمكن لأي من كان أن يقوم (بقطع) إشارة مرور حتى وإن كان
الشارع ما فيهو (زول)
• لا يوجد في الأمارات سلع مغشوشة أو (مضروبة ) ذي اللمبة البتولع مرة واااحده أو (البسكويت) منهي الصلاحية .. كل السلع والخدمات تخضع لرقابة صارمة ما عدا (الصحف)
• لا يوجد في الأمارات مواطنون متسولون فالدخل القومي يوزع على المواطنين بالتساوي في شكل خدمات صحية وتعليمية وأمنية تمشياً مع المقولة التي تقول بان دخل الدول يجب أن يذهب إلى الشعول وليس إلى (الجيوب)
• لا يوجد في الأمارات باعة متجولون أو على شارات المرور فالمواطنين تقوم الدولة بتوظيفهم وإيجاد فرص العمل لهم عملاص بالمقوله (المواطن في ذمة الحكومة) بينما في دول أخري الحكومة ذاااتا ما عندها ذمة !
• لا يوجد في الأمارات (عربات إسعلف) تطلق صافرتها في الشوارع كل دقيقة مع أن عربات الإسعاف لديهم مزودة بكل وسائل وأجهزة ومعدات الإسعاف وليست (نقاله وبس)
• لا يوجد في الأمارات عاملين بالمطار يقابلونك بتكشيرة ووجه مقضب الجبين كل الموظفين يرسمون على وجوههم إبتسامة ترحيب وكأنهم موظفين علاقات عامة لا أحد منهم يخفي عينية بنظارات سوداء ولابس السفاري (البيجية طبعن)
• لا يوجد بالأمارات (ركشات) لحمل البشر بل توجد بصات (أوكوديون) أنيقة طولها أكثر من عشرين متراً يمكنها أن تسع لأكثر من حمولة (خمسين ركشة) بينما لا تخلف من الغازات السامة ما تخلفه ركشة واحدة
• لا يوجد بالأمارات (صبية) يقومون بتوزيع الصخف أو حمل الأغراض على (الدرداقات) فالحكومة تقوم برعايتهم وتوفير كل إحتياجاتهم (هنا تأجرا ليهم) !
• لا يوجد بالأمارات دار للأطفال فاقدي السند إذ يمكن للخريج أن يتزوج بعد (سنة واااحده) من تخرجه بدون المرور على أي لجنة (إحتيار) !
• لا يوجد بالأمارات سائق واحد يمكنه أن يقوم بركن عربته في مكان غير مخصص لذلك
لأن الغرامه في هذه الحالة (500 درهم) أي ما يفوق المليون جنيه سوداني (يعني ما ممكن تجي تلاقي زول قافلك وبعد ساعة يجي يقول ليك معليش)
• لا يوجد بالأمارات ماكينه (صراف ألي) واحده خارج الخدمة إذ تتم صيانه هذه الماكينات بصورة دوريه وليست (سنوية)
• لا يوجد بالأمارات أي وجه للتصحر مع إنو (قاعدة في صحراء) فالخضرة والأشجار في كل مكان وليست في شارع (القصر) فقط

كسرة :
لا يوجد في الأمارات سوداني واحد لم يسألني عن (خط هيثرو) !! وهذا السؤال نحيله لسعادة النائب العام وبهذه المناسبة نهدي له هذه (الواو) الجديدة !!

أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و+و؟


تعليقات 60 | إهداء 1 | زيارات 16416

التعليقات
#1027047 [قال مسلمين قال]
5.00/5 (1 صوت)

06-06-2014 02:33 AM
و الله يا جبرا ما قايلك بتتغزل في الكريمات و الروج و الماسكرا الخليجية دي زلزال و اللا غبار كلها تروح. بس لو جيت Europe و شفت الجمال الطبيعي دة تقول شنو؟ و بعدين العرب الرجرجة ديل جابو النظام و التطور دة من وين؟ كان تقارن لينا كم اماراتي و كم اجنبي في الشارع او المتجر؟ بلد الاجانب فيها اكتر من المواطنين! بلد استثمارهم كلو مباني! بلد شغالة شوفوني! بلد تضع كل البيض في سلة واحدة! ما حقد و لا حاجة ح ازورها شهر اكتوبر هذا العام هي و قطر لكن عارف ح تكون كتاحة و سخانة و اكشي كومار و رأفة بحالك ح نشوف طريقة نوديك اوسلو علي الاقل تخوض تجربة مع الجليد و الربيع و تعاين و تهبش في نص الشارع و قدام قصر الملك زول بيقول احم مافي الا لو هي ما قبلانة (عارف دي عقدتكم بس دي الحقيقة). و الما شاف البحر بتخلعو الترعة!!!!!!!!!!!!!!!!!
قال امارات قال

[قال مسلمين قال]

ردود على قال مسلمين قال
[ِAburishA] 06-06-2014 12:33 PM
بالطبع انت تعلم اخ (قال مسلمين قال) ان الموضوع هو ملاحظات عابرة بتعبير كتابي/ناقد ساخر.. مقارنة بعض ما رأه في الامارات وما هو لدينا في السودان.. وتساؤلك اذا جاء الاخ جبرا الى اوروبا وسيرى فيها ما يرى!!!..فكيف عرفت وحكمت بأن جبرا لم يزر أو ير أوروبا.. أرجو ألا تخرج بالموضوع عن سياقه..
والكثير منا نحن القراء والمعلقين لم نترك شبرا في هذه الدنيا الا ووطأته اقدامنا.. لحدي (مثلث برمودا شفناه.. شفناه)... لك خالص المودة اخي...

[ادب الخصام] 06-06-2014 12:09 PM
انا في الامارات لي 15 سنه لاتقولي اوربا ولا كفار يكفي انك في الامارات ممكن تسافر وتخلي عيالك قاعدين في الشقه وانت مطمئن ترجع بعد يوم شهر سته شهور(يكفي بس نعمة الامن والامان-اللهم ادمها علي دولة الامارات يارب واحفظها من كيد الحاسدييييين) امين.

European Union [barracuda] 06-06-2014 08:16 AM
يا عزيزي ما تجده في الإمارات من لن تجده في اوسلو أو غيرها من دول أوروبا ، إن الإمارات دولة متقدمة بكل المقاييس وبها من الأمن والأمان الذي لن تجده في أوسلوا ، وبعدين لو أن نظرتك هي تقبض ليك بت من نص السارع فيبقى انت ولا تزعل من البشرية المحرومة لأن الجمال في الحشمة وليس في أن تقبض بت ، ويمكن تقبض ليك ايدز بعدين ، ولمن تكبر تموت براك في البرد 25 او 45 درجة تحت الصفر. أما هنا فعندك الأصدقاء والأهل والناس البتقيف معاك وقت الحارة.

European Union [ودالباشا] 06-06-2014 08:02 AM
جنس حقد عليك

اعوذ بالله كما يقول شبونه

ارجع تانى شوف جبرا قاصد شنو يا ابو الجمال انت

European Union [السنجك] 06-06-2014 06:48 AM
امارات وتفتخر بانها امارات بلد جميل شعب كريم زوق وكل شى تمام اروبا مافى شك جميلة وتقدم ولكن يمكن ماتشعر بالامان انت هنا فى الامارات مثل بلدك طول ما احترمت القانون بعدين مافى داعى تسب ناس ما اساءوا اليلك وانت لسع من زمن العرب الرجوج الناس تطورت حتى على مستوى الشيوخ البروف سمو سلطان حاكم الشارقة حاكم دبى سمو محمد بن راشد تعليم وتطور انظر الى دبى هل صارت هكذا من فراق صاحب السمو محمد بن زايد قمة التعليم انت لس مهجوم بالخواجات


#1026830 [Amin]
4.00/5 (3 صوت)

06-05-2014 07:17 PM
لا يوجد كوز حايم خلي حاكم

[Amin]

#1026787 [عود العشر]
0.00/5 (0 صوت)

06-05-2014 06:11 PM
انت منظراتي بس, شكلك بقيت من الجماعة اياهم,اشتروك يا بتاع الواواوووووات
وين ايام الثورة قامت اختفيت, خليك شجاع افصح عن الحقيقة, يا...............؟

[عود العشر]

#1026733 [حسكنيت]
5.00/5 (2 صوت)

06-05-2014 04:41 PM
كان تسوق البشير معاك وكل مرة تقول ليهو ( شايف يا ريس)
البشير آخر مرة زار الأمارات فى 9 مارس 2008 ووقتها الجنوب ما راح والركب كانن نصاح ، لكن تانى باباح

[حسكنيت]

#1026672 [واحد تانى]
4.75/5 (3 صوت)

06-05-2014 03:28 PM
ما عندهم جنجويد ولا دعم سريع،، وما عندهم سامية ورجاء وسعاد الفاتح وربيع عبدالعاطى

[واحد تانى]

#1026638 [الولايات المتحدة السودانية]
0.00/5 (0 صوت)

06-05-2014 03:00 PM
سنظل هكذا نتباكى ونتوحوح ونتشكى (والشكوى لغير الله مذلة) , كما النساء والنساء براء من هكذا خنوع ومذلة !!!
وسيظل ديدننا أنَا كنا !! نستدعى ذكريات الماضى الآفل لنتدثر من ضعة وهوان الحاضر!! وليت المتأسلمين بقوة وشكيمة التتار ,, لكنا قد وجدنا عذراً لضعفنا ,, ولكنهم الهوان وروث البهائم!!
اللهم خذنا إليك فلسنا أهلاً للعيش في دنياك ... وألطف بنا في عليائك فأرواحنا ذبلت بران الذلة والهوان فأنت اللطيف بعبادك الضعفاء ..

[الولايات المتحدة السودانية]

#1026623 [عود العشر]
0.00/5 (0 صوت)

06-05-2014 02:46 PM
س

[عود العشر]

#1026586 [ود البقعة]
5.00/5 (1 صوت)

06-05-2014 02:16 PM
ولايوجد في الامارات جمرة خبيثة ، اي والله العدادات السودا الزمان ابو متر.. لافي زول بخت ليها كيس ملح ولافي زول يحشر ليها اشعة عشان تقيف.. كخخخخ

[ود البقعة]

#1026374 [ساهر]
5.00/5 (3 صوت)

06-05-2014 12:12 PM
فعلاُ (الطشاش في بلد العميِ شوف).من قيض الله له زيارة سنغافورة، وكارتجينا ومديين (مدلين) في (كلومبيا)وشنغهاي، وكوالالمبور، وبانكوك، وغيرها الكثير من مُدن الله في أرضه، لعلم أن كوووووول الإمارات العربية الموووووتحدة دي، عبارة عن ظاهرة إقليمية تصدم جماعة (عرب سات) وأمثالهم فقط من ناس ناحيتنا وما شابههم. نصر على قولنا السابق الذي نالنا منه من أحد المعلقين لقب (حمار)، أن النفخ المبالغ فيه في (الظاهرة) الإماراتية، جعلهم يتصورون ويصدقون هذا التصور المتثمل في أنهم أصبحوا قوة إقليمية وعالمية في المجال الاقتصادي والسياسي، وأنهم أصبحوا قادرين على حذف الأنظمة التي لا تروقهم ، فقط بإشارة من إبهام مدير الشرطة (بتاعهم)، الذي تعهد ب (كنس) كافة الأنظمة الرجعية بالمنطقة (هكذا)؟؟!!!!!

هل يعقل أن السيد جبرا لم ير أي شيء سالب بهذه الإمارة أو الإمارات؟ لاحظوا أن مشاهدات السيد/ جبرا سجلها وهو على سيارة أي على عجلة من أمره. في أخر تقرير (2014م) عن أفضل عشر مطارات في العالم لم يرد اسم مطار دبي أو أي مطار إمااراتي آخر في قائمة العشر العظام هذه. ورغم ذلك يأتي من يقول لك من أهلنا الطيبين (والله عندهم جنس مطار!!!!). عموماً الإمارات العربية المووووتحدة عبارة عن ظاهرة أقليمية صنعتها البنوك السويسرية ولا تصدم إلا أهل الريف والكنيف.

[ساهر]

ردود على ساهر
European Union [عصمتووف] 06-05-2014 10:38 PM
والله ي اخوي سنغافورة دي الوحيده ما بتلقي فيها سوداني صاحب الطبع الشين ممنوع البصق والتمخط في شوارعها غرامتها كانت 200 دولار لا اعرف زادت ام نقصت مابالك غالبيتنا يقولون اوووووخ من الحلق وتف تمشي ما تمشي وتقع في حائط في سيارة في شخص ما مهم المهم ينف غير رمي المخلفات مناديل ورق او اكياس او او او او خليك في مضاربك

European Union [توتو بن حميده آل حميده] 06-05-2014 06:09 PM
إنت كوز مقدود حاقد - البنى التحتيه في دولة الإمارات كلها عشره على عشره - الكهرباء الما خمج - الجسور ذات التصميمات المذهله الطرق الواسعه - أقسم لك بالله إذاشفت طريق واحد من الهاي ويز بتاعتهم تظن أن هذه الدوله مساحتها أكثر من مليون ميل مربع - ممكن تحصل طريق فيه عشره مسارب ذاهبه وعشره ايبه ومداخل ومخارج وحدود وغابات كثيفه بحيث انك لا تري الا لسيارات التي في مسارك والتي في المسارات المجاوره لك. وعلى جانبي الطريق لا تري منازل مرصوصه مثل بلدنا .. ماذا تري ؟ تري مساحات خضراء كانك ليس بالربع الخالي بل في منطقه إستوائيه مطيره. هذه شي يسير وقيس عليه الامور الاخري مثل الخدمات ذات الخمسه نجوم وهي متاحه للجميع بالتساوي في جميع الدوائر الحكوميه أما بالنسبه لإنسان هذه الدوله الطيب فطلباته أوامر. التعليم والصحه والسكن والزواج والسياحه وغير ذلك -- بس قولوا ما شا الله وعين الحسود فيها عود-

[زول ساكت] 06-05-2014 04:58 PM
يا سيد ساهر الاستاذ جبرا عمل مقارنة بسيطة بين بعض اوجه المعاناه البنعانيها هنا و الرفاهيات الكثيرة العايشنها هناك.

European Union [ابو البنات] 06-05-2014 04:02 PM
يا حاسد.....ابوظبي اجمل من هولانده والدنمارك

[سلطان] 06-05-2014 03:15 PM
إنت كوز ولا حاقد ولا عندك جنون عظمة ولا مريض بالأنوية ولا نايم ولا صاحي؟؟؟

United States [ابو السيد] 06-05-2014 02:48 PM
ما براك قلت ( الطشاش في بلد العمي شوف) خلينا في الطشاش وسيبنا من الناس الشايفين لاننا عميانين وما شايفنهم...

United States [فارس] 06-05-2014 02:48 PM
يا ساهر أظنك مساهر وغالبك النعاس،، قبل ثلاثة أشهر تم تصنيف مطار دبى كثانى أكبر مطار فى العالم بعد مطار هيثرو ومن المتوقع أن يحتل المركز الأول العام القادم بعد إكمال الإمتدادات الجديدة وقد أربك هذا التوقع السلطات البريطانية إذ أن إحتلال مطار هيثرو للمركز الأول عالميا كان له مرده فى عالم السياحة والأعمال بجانب أن مساحة المطار قد بلغ مداه ولا يمكن أن تتوسع اكثر من ذلك فى المستقبل ولذلك فإن كل شركات الطيران التى تود فتح خطوط مع لندن تح تحويلها لمطار جادويك،، مطار دبى تجاوز مطار سنغافورة للمركز الثانى فى العام الماضى وسيتجاوز مطار هيثرو للمركز الأول عالميا بحر العام القادم،، ولا تنسى مطار أبو ظبى والذى بدوره يشهد توسعا كبيرا ببناء مطار جديد لا يقل عن مطار دبى،، أحسن تاخد ليك تعسيلة.

European Union [الكنزي] 06-05-2014 02:44 PM
ساهر .... شكلك ما مشيت الامارات ... فما تنظر ساكت ,,, انا مقيم بالامارات ... و تلاتارباع البلاد الزكرتها دي كافضل من الامارات بالمقارنة ... انا الكنزي دا برضو مشيتها .. كان بانكوك (وسخانة) كان ماليزيا ( وشوش الموظفين في مطار كوالالمبور تقطع عجينة القراصةو الليقيمات معا)شانغهاي ... حلوة بس مطارهم بجيك احساس انو ما علي قدر مستوي المدينة .. و طبعا اقل مستوي من مطار دبي .. سنغافورة .. احلي حاجة فيها القطار داخل المطار و دا كان قبل قطار مطار كوالالمبور ... زرتها سنة 97 لمن كنت شافع سغير ,, فما تسالني المطار كان كيف لاني كنت ملخوم مع اللحم الاصفر و الابيض و البنفسجي زاااتو .. كولمبيا دي شعر ما عندي ليهو رقبة ... لاكين نعال هنا انت البوديك كولومبيا ا شنو ... انا غايتو كان مشيت بكون عشان خاطر عيون شكيرة (:.


#1026342 [شهاب]
5.00/5 (1 صوت)

06-05-2014 11:49 AM
كل الظواهر السالبه اتى بها لنا الاخوان المتأسلمين
حكامها يعلمون انهم امام الله تعالى مسؤولون
ولهذا جعلوا الحكم الرشيد ديدنهم
فعاش المواطن لا يحمل عليهم ضغينة

[شهاب]

#1026225 [ساهر]
2.00/5 (3 صوت)

06-05-2014 10:48 AM
فعلاُ (الطشاش في بلد العميِ شوف).من غيض الله له زيارة سنغافورة، وكارتجينا ومديين (مدلين) في (كلومبيا)وشنغهاي، وكوالالمبور، وبانكوك، وغيرها الكثير من مُدن الله في أرضه، لعلم أن كوووووول الإمارات العربية الموووووتحدة دي، عبارة عن ظاهرة إقليمية تصدم جماعة (عرب سات) وأمثالهم فقط من ناس ناحيتنا وما شابههم. نصر على قولنا السابق الذي نالنا منه من أحد المعلقين لقب (حمار)، أن النفخ المبالغ فيه في (الظاهرة) الإماراتية، جعلهم يتصورون ويصدقون هذا التصور المتثمل في أنهم أصبحوا قوة إقليمية وعالمية في المجال الاقتصادي والسياسي، وأنهم أصبحوا قادرين على حذف الأنظمة التي لا تروقهم ، فقط بإشارة من إبهام مدير الشرطة (بتاعهم)، الذي تعهد ب (كنس) كافة الأنظمة الرجعية بالمنطقة (هكذا)؟؟!!!!!

هل يعقل أن السيد جبرا لم ير أي شيء سالب بهذه الإمارة أو الإمارات؟ لاحظوا أن مشاهدات السيد/ جبرا سجلها وهو على سيارة أي على عجلة من أمره. في أخر تقرير (2014م) عن أفضل عشر مطارات في العالم لم يرد اسم مطار دبي أو أي مطار إمااراتي آخر في قائمة العشر العظام هذه. ورغم ذلك يأتي من يقول لك من أهلنا الطيبين (والله عندهم جنس مطار!!!!). عموماً الإمارات العربية المووووتحدة عبارة عن ظاهرة أقليمية صنعتها البنوك السويسرية ولا تصدم إلا أهل الريف والكنيف.

[ساهر]

ردود على ساهر
[البليد الغبى] 06-05-2014 02:52 PM
والله العظيم ياساهر وقت نمشى القاهرة نلقى المقارنة معدومة مع الخرطوم خلى دبى..........

United States [ابو طارق] 06-05-2014 02:20 PM
مع تحياتي وتقديري لشخصك الكريم ( ساهر ) .
حتى لو وجد شيئ سالب كما تزعم .. وطبعاً لا يوجد مكان في الوجود لا يوجد به شيئ سالب .. لا يمكن أن يقارن ويقاس بما يوجد لدينا من سلبيات في شتى المجالات .. .
أما من ناحية أنها ظاهرة إقليمية صنعتها البنوك السويسرية كما تقول .. فهذا ليس بشيئ معيب أو شيئ سالب .. بل جعل من هذه الظاهرة الإقليمية وجهة تسعى لها كل الأنظار لمعرفة هذه الظاهرة ..
وياريت لو عندنا ربع من مطارهم ... أو عندنا مثل شوارعهم ... أو عندنا ربع الموجود عندهم .. لما كان وصل بنا الحال إلى المقارنة ما بيننا وبين أقرب الدول لنا في العالم الثالث ...

European Union [الضقل] 06-05-2014 02:01 PM
يا راجل لو استهديت بالله و قريت كلام الاستاذ ما كنت شطحتا كدا
الاستاذ قارن بين السودان و الامارات ( الظواهر اليومية ) و ما جاب سيرة شنغهاي و لا سنغافورة
بعدين الامارات دي جميل جد جد
انا عيشت في سويسرا و بريطانيا
و اري ان الامارات دي دولة جميلة
و خلاصة الموضوع مافي مقارنة بينها و بين السودان
يعني يا الحبيب لمن تعيش في سودان الهنا بتاعنا و تقوم تسافر الامارات بتشوف المسافة كبيرة جدا
نظام واحترام

United States [tom] 06-05-2014 02:00 PM
صدقت يا ساهر ( سالك ) والله جبرا انا افضل يكون في خط هيثرو ... وكسراتو
الزي كتاباتو ....والله عالم ....

European Union [كاكا] 06-05-2014 01:27 PM
داير تصل شنو يا ساهر أم هي محض خطرفه. .. ياخ ملخص العمود إن بلدنا اتلحست بسياسات الأخوان الكذبة .. 25 سنة نهب وتخريب،، دي الخلاصة،،

European Union [Gashrani] 06-05-2014 12:02 PM
يبدو أنك مفنش أو ما قدرت تدخل الإمارات. شكلك حاقد. قول ربنا يزيدهم ويدينا.

[Isam Hagmusa] 06-05-2014 11:45 AM
يا أخ ساهر، أحب أن أأكد لك صادقاً ومعايشاً أن دولة الأمارات العربية المتحدة طولاً وعرضاً: تنعم بنعمة الأمن والأمان والتي تفتقدها قائمة العشر العظام هذه التي أشرت لها.
وأزيد: أغلب قاطني (من غير المواطنين طبعاً) دولة الأمارات من فئات ذوي الدخل المحدود والمفارقة أنهم أكثر الفئات توفيراً. غلوطية ياساهر بس ماتتعب نفسك فك طلاسمها لأنك سوف تذهل لو عرفت السبب والعجب.
لك كل الود يادكتور الفاتح جبرة فقد إستمتعنا بزيارتكم وسررنا بمعرفتكم وإستفدنا من كتاباتكم الكثير ونشكركم لإهداءنا سلسلة مطبوعاتكم والتي سوف تكون أنيسنا في دولة الأمارات.
وفقكم الله وسدد خطاكم وبرد الله جوفكم بمعرفة مصير حط هيثرو....

[المهاجر] 06-05-2014 11:37 AM
الكمال لله .. ولكن الامارات دولة مكتملة الاركان ونحمد الله ان انعم علينا بالعيش فيها والامارات صنعتها عزيمة واخلاص الشيخ زايد رحمه الله وليست البنوك السويسرية وهنا مع شروق شمس يوم جديد هناك جديد في كل المجالات والدول لاتقاس باخر تقرير عن افضل مطار.. مع خالص الاحترام

[ساهر] 06-05-2014 11:31 AM
أرسلت تصحيح لكلمة (غيض) والصحيح (قيض).


#1026214 [حسن محمد]
5.00/5 (1 صوت)

06-05-2014 10:42 AM
ياناس ماتعبو نفسكم مع عمكم جبرا ود ابروف والذى تتلمذ على يد اساتذة أكفاء بمدرسة ابروف الإبتدائية أمثال ألاستاذ المرحوم فاروق أبراهيم ود ابروف عليه الرحمة والأستاذ الوقور محمد عليش ، والفاتح له صلة قرابة بالرئيس البشير عشان كده ما ترجو منو رجا ، وبحاول اعمل فيها شيوعى ومقددا

[حسن محمد]

ردود على حسن محمد
United States [tom] 06-05-2014 02:02 PM
الرحمة والمغفرة لقريبنا الاستاذ فاروف ابراهيم عمر ... ربنا يسكنه فسيح الجنان
جبرا ... بري انا من ناس ديل هههههه

United States [ابو القدح] 06-05-2014 02:01 PM
الأستاذ الوقور محمد عليش ؟؟؟؟

ياخ بالغت عليش دا حرامي في شكل معلم اكل قروش

مدرسة المعارف اساس بنين في المهندسين وضيع المسكينة

الاستاذة الفاضلة المربية نور


#1026196 [kKambalawi]
5.00/5 (1 صوت)

06-05-2014 10:32 AM
جبرة من أكل الفول النضيف بتاع الأمارات, ظهرت ليهو شليخات بي جنب العيون. الله ينعل الأخوان المسلمين نشفوك.

[kKambalawi]

#1026192 [كاره الكيزان محب السودان]
5.00/5 (1 صوت)

06-05-2014 10:30 AM
يا استاذ، مشيت تغير هواء جبت لروحك نفسيات. المقارنة معدومة بين بلدان الشعوب التي عرفت كيف تتدافع عن بلدانها وكيف تأخذ حقوقها وبين الشعب السوداني الجبان.

[كاره الكيزان محب السودان]

#1026173 [المشتهي الكمونية]
5.00/5 (5 صوت)

06-05-2014 10:22 AM
تعرف يا جبرا لماذا الإمارات فيها كل الذكرتو دا
الإجابة لأن الإمارات ما فيها عمر أبوركبة ولا علي شيطان ولا أبو العفين ولا كرتي ولا الترابي ولا الوالي الخضر وأولاده الحرامية

[المشتهي الكمونية]

ردود على المشتهي الكمونية
[الكوز الفى الزير التحت الراكوبه] 06-06-2014 11:49 PM
وبرضو ما فيها كمونيه .

United States [ابوعديلة] 06-05-2014 01:44 PM
والله يا المشتهى الكمونية كل الذكرتهم ديل موجودين فى الأمارات وكل دول العالم , لكن الفرق بيننا وبين تلك الدول المحترمة أنه ليس هناك كبير على القانون وهم يطبقونه على الوزير والخفير وبيدوهو على راسو بالجزمة القديمة, اما عندنا.....ياعينى ما تبكى .


#1026161 [ابو مازن]
5.00/5 (1 صوت)

06-05-2014 10:17 AM
حمداً لله على السلامة استاذ الفاتح
ماذلنا نقول نحن الخططنا نحنا العلمنا ونحنا السوينا .... ودا سبب تخلفنا لاننا واقفبن فى نفس المكان منذ عشرات السنين ارجو من الجميع ان يتجنبو مقولة نحنا والعندو جديد حبابو

[ابو مازن]

#1026143 [عبدالرحمن الحاج]
0.00/5 (0 صوت)

06-05-2014 10:06 AM
الأستاذ العزيز/ الفاتح
تحية واحتراما
الملاحظ أنك تكتب الاسم (الأمارات) وهي كما معلوم (الإمارات)... والفرق بينهما واضح.. ولك كل الود..

[عبدالرحمن الحاج]

#1026119 [الحقاني]
3.00/5 (2 صوت)

06-05-2014 09:49 AM
الحل بسيط عند الحكومة ! تحرمك من السفر عسان ماتجي مرة تانية وتعقدتقارن بين مايوجد في
1-السعوية والسودان
2-مصر والسودان
3-الاردن والسودان
4- قطاع غزة والسودان
5-اثيوبيا والسودان
6-اريتريا والسودان
7-جيبوتي والسودان
8- الصومال والسودان
9-جنوب السودان والسودان
وتكون المقارنات اتجاه واحد تجاه خط هيثرو
وان يا استاذ كان كنت واحد من كباتن خط هيثرو كنت دبرت لك سفرية لهيثرو ويخلص الموضوع !!!!استغفرالله العظيم من كل ذنب واتوب اليه

[الحقاني]

#1025896 [yassir]
5.00/5 (7 صوت)

06-05-2014 02:16 AM
في الامارت ما في موكب لحاكم ولا لمسؤل مستعجل عشان يطلع قرار غلط
في الامارات مافي مسؤول بفتح كبري ولا جسر غير انو بشيلو علامات السلامه والعربات بتمر
في الامارات مافي مسؤول حكومي بعاكس ويماطل اي بني ادم عندو معامله
في الامارات مافي شرطي بتسلط علي الناس
في الامارات مافي شرطي بخالف القانون
في الامارات يمكنك ان تقاضي اي شرطي والقضيه ما بتاخد وقت
في الامارات الشيوخ بدفعو مخالفات لسيارتهم

[yassir]

#1025881 [Quickly]
5.00/5 (8 صوت)

06-05-2014 01:35 AM
ماقلنا ليك ياجبرا من زمان لازم تسافر وتشوف بلاد الله عشان تعرف انتو عايشين ولادايشين في دولة المشروع الحضاري بتعاتكم دي؟؟!!!
انشاءالله اتضح ليك الآن انو السودان فقط عبارة رئيس جعجاع يسب ويلعن طول الخط في امريكا والمعارضة والعلمانية ويهز مؤخرته امام العامة ويتراقص دون خجل او حياء ولايفيد شعبه بغير الكلام ويفيد نفسه وجماعتة بالنهب والسرقة في الظلام
دا انتو مدفونين بالحياه ياشيخ !!!

[Quickly]

#1025870 [ِAburishA]
4.00/5 (2 صوت)

06-05-2014 12:59 AM
ومافي رئيس جمهورية(***) زي (حقنا)....

[ِAburishA]

ردود على ِAburishA
[ِAburishA] 06-05-2014 11:21 PM
اخ ضي النعيم لك التحية.. مشكور على الاضافة..وانت جبت لينا زبدة الكلام...
ببساطة وجود (حظيرة ) لما يسمي (الاخوان المسلمون) هي التي اخرت البلد..... خالص المودة..

United States [osama dai elnaiem] 06-05-2014 08:45 AM
وما في علي عثمان طه ولا نافع ولا ربيع عبد العاطي ولا(اخوان مسلمون) لان الجميع اخلاقه حميدة وكما تعاليم الاسلام.
وما في صدق في حديث اي مسؤول ومنذ 25 عاما ذات الادبيات حتي انك تعرف حركات الوجه واليدين وبالخبرة صار عندنا حاسة سادسة لفضح الكذبة قبل اطلاقها.
ببساطة وجود (حظيرة ) لما يسمي (الاخوان المسلمون) هي التي اخرت البلد


#1025829 [عصمتووف]
5.00/5 (2 صوت)

06-04-2014 11:30 PM
افتقدناك فعلا وظاهر الرقشة والتفتيحة في الوش والجضوم ديل بلعت ليهم خميره بيرة ي عم عقبال لينا ان شاء الله فد يوم

[عصمتووف]

ردود على عصمتووف
European Union [عصمتووف] 06-05-2014 10:43 PM
الاستاذ فهمها ماذا فهمت انت حتي في المداعبات تتحشرون فيما لا يعنيكم انا بمزح وقصدي انه ارتاح ودمه راق من القرف والاحباط وعقبال لينا نزور او نتخارج من هذه البلد ومن امثالكم افهم وبعدين علق انا احترمة جدا وافتقده حين يقيم انتو شنو انتو احترم نفسك اولا واحترم اراء الاخرين لو مزاح او جد

[لينين] 06-05-2014 09:42 AM
يا عصمتووف: الفتح جبرا ما زول بتاع حاجات زي دي شوف ليك زول تاني.


#1025784 [غسان بابكر]
4.32/5 (5 صوت)

06-04-2014 10:19 PM
أستاذنا الفاتح..
لك التحيه والتجله و حمدا لله علي سلامة الوصول..
خط هيثرو دا أكلو الدودو أو ودأمبعلو وإنت بتعرفو كويس وخايف منو يقوم ياأكلك عشان كدا إنت ما عايز تجيب إسمه..
ناس مكتب الوالي ديل صغار ممكن تصرح بي أساميهم إتكلم في الموضوع دا علي راحتك ما في زول بسألك، برضو اﻷقطان قضيه وناسها صغار بس بنصحك قضية اﻷراضي حساسه شديد شددددددديد لو جبت سيرتها الدودو بياكلك .....أنا كلمممممممتك وإنت مخير....!!!!؟

[غسان بابكر]

#1025721 [صه يا كنار]
5.00/5 (3 صوت)

06-04-2014 08:49 PM
أ/ الفاتح الشيخ زايد عندملا استقلت الامارات من انجلترا الانجليز قالوا ليهم أفضل خدمة مدنية في السودان فاستعينوا بخبراتهم وقد كان استعان بكمال حمزة بالبلدية وسودانيين في مختلف المهن قال لكمال حمزة أبي ابو ظبي كالخرطوم ايام الخرطوم خرطوم وايام الخدمة المدنية مدنية كمال قلت انعكس الحال اين ابو ظبي ومدن الامارات الاخرى واين وصلت الخرطوم كما ذكرت ولا حول ولا قوة الا بالله

[صه يا كنار]

#1025720 [قوز دونقو]
4.97/5 (7 صوت)

06-04-2014 08:49 PM
عندما تكزن المدارس و المعاهد المهنية 10 أضعاف الجامعات و قتها نكون قد قد وضعنا قدمنا علي أول السلم ( سلم الرقي ) لكن و ما دامت جامعاتنا تعادل المعاهد بنسبة 1:100 فلن نتقدم قيد أنملة كل البلاد التي تقدمت و تطورت بدأت بالتعليم المهني المؤسس و ليس بكليات طب أداب و حقوق و محاسبة و ما إلي ذلك من الكلياتالنظرية علي أهميتها لكن الأولوية تكون للكليات التطبيقية المهنية كي نبني بلدنا ؟؟؟
و الله حرام بعد ما يقارب من ال 60 عاما لا نستطيع الإكتفاء الذاتي من الغذاء أو الأرتةواء من الماء الصالح للشرب علي الرغم من أن الله سبحانه و تعالي حبانا بنهر يجري علي طول البلاد من جنوبها إلي شمالها و أمطار غزيرةو أراضي خصبة و شمس مشرقة و هواء عليل لكن لا توجد همة ؟؟؟
قادتنا يفرخون كوادر يؤجرونها للذي يدفع أكثر ... فالتعليم اصبح سلعة تعرض في السوق و حسب الطلب و المقاس الخارجي و ليس جسب طلب السوق المحلي ؟؟؟
و((ان الله لا يغير ما بقوم حتي يغيروا ما بأنفسهم)) الرعد 11 ؟؟؟ و في الآية الأخرى:(( ذَلِكَ بِأَنَّ اللّهَ لَمْ يَكُ مُغَيِّرًا نِّعْمَةً أَنْعَمَهَا عَلَى قَوْمٍ حَتَّى يُغَيِّرُواْ مَا بِأَنفُسِهِمْ )))[الأنفال: 53]
و الرجوع إلي الحق فضيلة فإننا قد ظلمنا أتفسنا و علينا التوبة و الرجوع إلي الله سبحانه و تعالي ليغير ما بنا من حال ؟؟؟ لفإليه وحده الملجأ و المشتكي ؟؟؟؟

[قوز دونقو]

#1025700 [ودالموية]
1.00/5 (1 صوت)

06-04-2014 08:17 PM
الاخطاء الفادحة خربت المقال يا جبرة. لك الشكر على السياحة.

[ودالموية]

#1025650 [ابويحيى]
1.00/5 (1 صوت)

06-04-2014 07:03 PM
عزيزى السيد الفاضل جبره اين تقيم بالخرطوم اريد ان ارى بيتك من الخارج مهما كان بسيط او خلافه اريد ان ارى هل ينعكس هذا لحس العالى على عالمك الداخلى والخارجى اتوقع ان تكون هناك شجيرات لبخ او نخيل كاذب فى تناسق تام خارج المنزل ام داخله حديقه فى قاية الذوق والجمال كما ان جيرانك تأثروا بك من حيث الذوق والنظافة للشارع العام بغض النظر عن نوعية المسكن بسيط ام مشابه لمنازل اهل الانقاذ اقبل الدعوه على البريد الموضح اعلاه وشكرا

[ابويحيى]

#1025630 [ابوكرنك]
4.50/5 (5 صوت)

06-04-2014 06:39 PM
باختصار يا استاذ جبره الناس ديل اهل الامارات وحكامها الله يزيدهم ويديم عليهم هذه النعمة حولوها من ارض صحراء الي ارض خضراء عبارة عن غابة .مع انو ما عندهم نيل طويل وعريض
ولكن نحن اهل السودان وحكام السودان حولنا ارضنا من خضراء وغابة الي صحراء(بنايات عالية واسمنت ).الله يكون في ععوننا . وعون السودان .

[ابوكرنك]

#1025617 [الزول]
5.00/5 (2 صوت)

06-04-2014 06:24 PM
شنو يا ود جبرة دى عشرة أيام ولا عشرة سنين
عينى باردة
العمة والنظارة ماشاء الله ووشك نور

[الزول]

#1025596 [ياسر]
5.00/5 (2 صوت)

06-04-2014 06:05 PM
قصة هيثرو صارت قديمة يا (جبرا) وظهرت حاجات كثيرة غـيرها فلماذا لا تتعرض لها إن كنت جادا حقا في تركيزك على الفساد؟!!! رأيي الشخصي انك تريد فقط ان توهم الناس بأنك بطل ومحارب شرس للفساد في حين لا يخفى على أحد أن الكيزان قد سمحوا لك بتكرار قصـة هـيثرو والعزف على هذه النغمة على أن لا تتعداها لمواضيع اخرى من الفساد وهي بالكوم وإلا فلماذا لم تكتب وتتمسـخر أيها الساخر من فساد الاراضي وفساد الاقطان وفساد عائلة عمر البشير (النتنة) رجالا ونساء؟!!!

تصحيح : الإمارات (Emirates) بكسر الهمزة جمع (إمارة) مكان او بلدة يحكمها أمير
وبالفتح (أمارة) تعني علامة (mark)...

[ياسر]

ردود على ياسر
United States [ياسر] 06-05-2014 02:17 AM
شايفك يا (ساب البلد) بتهابشـني احيانا دفاعا عن (نوارة) وقـد أجد لك بعض العذر لكونك لا تعلم عنها شيئا فهي من أراذل الخلق.. غشيتها اللعنة...
اما الفاتح جبرا فمستهبل كبير يلعب على الناس بأسطوانة مشروخة وبتشجيع من الكيزان لإشـغال الناس بالفارغة: أ
أخبار ملف خط هيثرو العند النائب العام شنو(وووو وو وووو)+و+و+و؟
كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟
هل حدث أن سـمعت يوما بأن الرقابة منعت لجبرا مقالا من النشر؟!!!
القصة واضحة لا تحتاج الى شطارة.. واهلنا اولاد الريف ماشاء الله عليهم وربنا يحفظنا ويحفظهم يعرفون من أين تؤكل الكتف!!

European Union [ساب البلد] 06-04-2014 08:28 PM
********* طيب ما انت شاطر و بتعرف تكتب كويس ******** ما تكتب عن الفساد و تكون بطل ******* ولا فلاحتك بس في ناس نوارة ********


#1025586 [فلان بن علان]
5.00/5 (4 صوت)

06-04-2014 05:58 PM
أها يا أخونا الفاتح جبرا ... شفت الأمارات كلها وما شـفت مدينة النخيل ولشنو؟
أنا أوريك ومع إنني ذهبت للأمارات دي قبل خمسة سنوات تعقريباً في زيارة ... وقالوا ما رأيك في مدينة النخيل دي ..؟ قلت ليهم والله دي جنة... هل تصدق! قالوا لي هذه الجنة دي خاصة بالكيزان بتاعينكم في السودان ... يعني أغلب الفلل الموجودة دي ملك للسودانيين الحرامية النشالين الكذابين عندكم في السودان ... يعني مليزيا رقم (2) ... ودا غير الشئ الفلاني الموجود في البنوك ... يعني نحن برضوا عندنا تقريباً نصف الأمارات ... بس الله يجيب الثورة المحمية بالسلاح ... ما في وثورة تاني بدون سلاح... إنت ما شايف الجنجويد ... جيش سوداني أصبح ببح ببيح ...

[فلان بن علان]

#1025582 [Ayam]
0.00/5 (0 صوت)

06-04-2014 05:54 PM
يا أستاذ جبرا ,,, أذا بالإمكان بالله أضف مفتاح تعريفي يوضح للواو كم يساوي !!!!

[Ayam]

ردود على Ayam
[جساس الثقفي..الطائف] 06-05-2014 10:40 AM
يساوي تبوس الواوا


#1025567 [بنو شنقول]
5.00/5 (2 صوت)

06-04-2014 05:38 PM
المؤسف في الأمر أن الذين خططوا للهياكل الإدارية في البلديات، والقضاء، والأجهزة المدنية الأخرى هم الرعيل الأول من الإداريين والمهندسين ورجال القضاء وضباط الجيش السودانيون... وتتداول الشبكة العنكوتية صورة للأداري كمال حمزة والراحل الشيخ زايد، يقول فيها الشيخ لكمال: يا كمال: أريد أبوظبي تكون مثل الخرطوم، فتأملوا!!

[بنو شنقول]

ردود على بنو شنقول
[سلطان عيال عطيه] 06-04-2014 08:44 PM
بكل اسف تلك الخرطوم بناها الانجليز الذين تعجلنا بطردهم قبل ان يستوى عودنا .

European Union [جكسا وماجد] 06-04-2014 06:54 PM
تجد بصمة السودانيين فى كل مكان فى الخليج وهم من اميز الناس لكن حكومة البشير لا يعنيها الامر شى ان تستفيد من تلك الخبرات كل العائدين من الخليج الان عوطلية تحت الاشجار هم وابناءهم فى انتظار اداء الخدمة الالزامية ودفع الضرائب


#1025562 [برانتود]
4.75/5 (10 صوت)

06-04-2014 05:35 PM
انا هنا من 1977 اى من ايام الرمل والبيوت الشعبية وعشت النهضة خطوة بخطوة وزرت بلدان كثيرة ولكن لم ار اجمل وانظف وارقي من الامارات وعايش وكانها بلدى وحرية ما بعدها حرية وحتى كتابة هذه السطور لم يسالنى احد عن الهوية او الجواز الا فى المطار او الدوائر التى تتطلب ابرازها والكل هنا يعيش وكانه علي تراب بلده

[برانتود]

#1025551 [الباقر احمد]
4.00/5 (3 صوت)

06-04-2014 05:27 PM
نرجو عدم الاساءه للبلد

[الباقر احمد]

ردود على الباقر احمد
European Union [kartagi] 06-04-2014 06:39 PM
هي البلد وينها ياالفالح انت ما بتقرا لجبرة دا بقول في شنو ياأخي الله قادر يحي لينا بلدنا بعد ما ماتت!!!


#1025546 [tarig]
5.00/5 (10 صوت)

06-04-2014 05:23 PM
وازيدك من الشعر بيت يا استاذ الفاتح وزير الخارجية الاماراتي الشيخ عبد الله بن زائد حرروا ليه مخالفة مرورية رسل خطاب شكر لا دارةالمرور معناه انكم ناس شايفين شغلكم لكن لو في السودان كان رفدوا مدير المرور

[tarig]

ردود على tarig
European Union [ودالباشا] 06-06-2014 08:43 AM
هذا هو سر نجاحهم وتقدمهم والعكس طبعا عندنا


#1025544 [الباقر احمد]
4.00/5 (3 صوت)

06-04-2014 05:22 PM
يالا الفاتح جبرة في الكلام القلتو دا كلوا المواطن شريك فيه ما علي الحكومة بس

[الباقر احمد]

ردود على الباقر احمد
United States [mmm] 06-05-2014 09:48 AM
شفتو نوعية الباقر دا الدمرنا ودمر السودان.....

الناس بتقول في شنو وانتو في شنو؟؟؟؟

اذا الانسان بيتطور ويرتقي بدون ادارة وموسسية ما كان في داعي للحكومات

يخلون ساي نتطور برانا......
\
وبعديل الكيزان ديل محكرين 25 سنة بيعملو في شنو؟؟؟؟

الناس بتتكلم عن خدمات غير موجودة في السودان....والموجود تم تدميرو.....

United States [زهجان] 06-04-2014 08:41 PM
كيف...كيف


#1025516 [حكم]
4.88/5 (4 صوت)

06-04-2014 04:57 PM
لأنه لا يوجد بالأمارات قانون تحلل

[حكم]

#1025507 [الشايل المنقة]
5.00/5 (4 صوت)

06-04-2014 04:49 PM
...عشرة ايام, الظاهر جاتك صدمة حضارية , لانو الاخطاء الإملائية عندك في المقال دة في كل سطر والثاني..!..ما تنبهر ببلاد الاغيار,لو كانوا مطبقين الشريعة زينا كانوا راحوا في ستين الف بتاعة,ما شفت جن وولكر ابو جون في اي محل ولا ممنوع ولا حاجة..لانو الله ما بحب الكضب بإسمو..بلادك حلوة ,الحمد لله انك رجعت ليها ,واستفدت من الاحتكاك والتجربة.

[الشايل المنقة]

ردود على الشايل المنقة
[الهمام] 06-04-2014 05:46 PM
شريعة منو دي ال في السودان انت نايم وللا صاحي


#1025499 [اسد]
4.31/5 (11 صوت)

06-04-2014 04:43 PM
لا يوجد في الامارت دارفور وجنوب كردفان جبال النوبة, وجنوب النيل الأزرق والمتمردين في الشرق.
لا يوجد في الامارات خونة يسبون حكومتهم ويسبون رئيسهم على الملأ.
لايوجد بالامارات جواسيس يلفقون الجرائم ويصنعون المشاكل لدولتهم.

[اسد]

ردود على اسد
[Quickly] 06-05-2014 01:20 AM
اخدتا على رأسك تمام
الاخوان مشكورين ماخلوا لينا حاجة نديك بيها في رأسك

[عاصم] 06-04-2014 10:05 PM
عايز اقول ليك يا فاكرنفسك اسد منو الصنع كل هذه المشاكل هل كانت قبل هذا الرئيس اللعين موجودة هل كان السودان يحكمه عملاء صهيون والماسونية رئيسك لا يحتاج لمن يسبه جعل من نفسه مسبة .لا احد يصنع المشاكل سوى حكومتك التي باعت السودان ونفذت اجندة الصهيونية والماسونية الساعي منذ امد بعيد لتفكيك الدولة السودانية الى دويلات ولا يمكن ان يتم هذا الا اذا حكم السودان الاخوان المسلمين عملاء وخدام المحفل الماسوني . بعد ده كله وبتدافع عن هؤلاء ومدعي نفسك اسد ربما الاسد المرسوم في علبة العسل الانجليزي .

European Union [ساب البلد] 06-04-2014 08:32 PM
********* لايوجد في الامارات قمل اسفيري و ذباب اللكتروني ****** قوم لف لفاك قطر صيني ******

European Union [kartagi] 06-04-2014 06:46 PM
ياجبرا باين عليك الليلة دخلت السينما شعب احسن خليك في اللوج دايما دا مش مكانك

United States [سعيد لورد] 06-04-2014 06:34 PM
الإمارات تتكون من سبع إمارة و بها قبائل أيضاً ، بني ياس والنعيم والظواهر و القواسم والمناصير ....الخ
لكن فيها حكومة رشيدة و ربنا نجاهم مؤخراً من جماعة الأخوان الإرهابية الشيطانية
( الخونة الحقيقيين ) الذين ما دخلوا قرية أو بلد إلا عاثوا فيها فساداً واستبداداً.
لكن بفضل من الله تم كشف مخططهم الدنيئ
لذا حماهم الله ونصرهم من الظلم والاستبدادو بالتالي فلا غرو ألا تجد متمردين في الإمارات.
لو حكومة السودان أنجزت واحد على ألف مما أنجزته حكومة الإمارات
و أنا سبيت الرئيس تعال تف على مقالات الأستاذ.
بعدين يا أسد دارفور ما سبة، دارفور حضارة وجنوب كردفان منارة و النيل الأزرق نضارة و المؤتمر الوطني قذارة.

European Union [الكنزي] 06-04-2014 06:27 PM
لايوجد في الامارات ظلم ,وهنا في ظلم عشان كده في دارفور وجنوب كردفان جبال النوبه وجنوب النيل الازرق والمتمردين في الشرق,ومظلومين في كل السودان ,يوجد هنا مسئولين خونه وفاسدين يسيئون الي شعبهم علي الملاء ,يوجد هنا فاجرون وخونه يلفقون الجرائم ويصنعون المشاكل لشعبهم للمستوي الذي فيه مطلوبين دوليا لجرائم ضد الانسانيه اتجاه شعبهم

[abood] 06-04-2014 06:20 PM
لايوجد فى الامارات اسد فى اسمو ولبوه فى الحقيقه ...قال اسد قال ...ان شاء الله تكون قبضت حافز فى تعليقك ده ؟ اختشى وخليك راجل بتقول الحق

[الهمام] 06-04-2014 05:50 PM
لو رئيس بيملا العين كنا قلنا ليهم عيب يا اولاد دا الرئيس ورمز السيادة الوطنية واهم شخصية والبيسئ ليه اساء البلد ,بس هو رئيس دلاهة وعوير وحرامي واهلو حرامية والحولو حرامية , ما بنقدر نقول للناس انتو غلطانين في الحالة دي ,ما خل لينا مجال نغلط البسبوهو

European Union [نبض التعب] 06-04-2014 05:38 PM
لا يوجد في العالم ــ ليس دولة الأمارات فقط ــ رئيس يسب شعبه ويصفه بشذاذ الآفاق ويقتله بالخظة (باء) أو (جيم) أو (دال)!!
لا يوجد في الأمارات فسدة ولصوص وحرامية لذا يحترم شعبها قادتها.
لا يوجد في الأمارات (جداد إلكتروني) يٌزيّن الباطل وبشوّه الحق زيّك يا (لبوة)!!.

European Union [زوول] 06-04-2014 05:14 PM
لا يوجد في الامارات كيزان ..
ماتنسي دي مهمة جدا...


#1025494 [عادل]
5.00/5 (2 صوت)

06-04-2014 04:41 PM
العكس فى السودان تماما كل ذكر فى المقال انار الله طريقك اخى الفاتح جبرا السودان ماشى فى الاتجاه الخظا والحكومة عارفة والشعب عارف لكن منتظرين شنو انا ما عارف هنا مافى حكومة ومافى دواء مجانى ومافى وظيفة بدون رشوشة ولا شرطى بدون رشوشة الكل هنا مرتشى وحرامى الله يكون فى العون

[عادل]

ردود على عادل
[عباس] 06-04-2014 07:33 PM
منتظرين القيامة تجى تخمهم وتريح منهم .


#1025482 [wedhamid]
3.25/5 (3 صوت)

06-04-2014 04:27 PM
ما هنا عندنا مشروع حضارى جا بيهو نظام الأنقاذ فى 30يونيو 1989 و بفهمهم حيودونا على الجنه عدل حتى بذنوبنا كلها.... و مين أحسن مننا؟؟؟.... الدنيا دى شن غرضنا فيها؟؟؟ و أنا ما عارف ليه يا سودانيين إنتو متطلعين لنظام زى البيقولو الفاتح جبره ده...يعنى عايزنها دنيا و آخره؟؟؟؟و اللا شنو يا الخبيييييير رقيع عبالعاطى؟؟؟؟ يا أبو دحل 1800 دولار!!!!

[wedhamid]

#1025479 [بريابى]
4.00/5 (2 صوت)

06-04-2014 04:26 PM
لايوجد فى الامارات جبرا فلولاكم لمات اهلنا ومتنا كمدا

[بريابى]

#1025475 [رقم صفر]
4.79/5 (6 صوت)

06-04-2014 04:24 PM
إذا سرقت أو نهبت أو إرتشيت أو إرتكبت خطأ مروري تحاااسب ولا يسألون من أنت - سوداني أمريكي إماراتي سعودي الخ .. ولا يسألون هل أنت وزير أو خفير أو موظف أو وكيل ..تتحاسب والقانون يأخذ مجراه ... مدير جمارك دبي بدرجة وزير ضرب الهندي في الشارع تأني يوم شاتو بره .. يتم بحث القرار ثم يتم إصداره والراجل يفتح خشمو .. والشغلانة ما إمكانيات بس الناس الفوق نضاف

[رقم صفر]

ردود على رقم صفر
European Union [ودالباشا] 06-06-2014 09:02 AM
شكلك نايم ياخليجى انت الواقعة دى قديمة قاربت السنتين امثالها كثر وهكذا دولة الفانون ولا برضو ماعارف دى

European Union [خليجي] 06-04-2014 05:01 PM
هههه فعلا.. معلوماتك ..صفر .. ما للدرجة دي..شكلك سمعت سمع ساي .. ولا اظن انك عشت في الامارات.. من قبل.


#1025474 [نفسيات]
4.00/5 (1 صوت)

06-04-2014 04:22 PM
جبته لينا نفسيات يا جبره...

[نفسيات]

#1025464 [hassan]
4.50/5 (4 صوت)

06-04-2014 04:14 PM
يا جبره الله بيسألك مافى مراقبه للصحف فى الإمارات

[hassan]

ردود على hassan
[جساس الثقفي..الطائف] 06-05-2014 10:37 AM
جبتها على الجرح


#1025459 [bajaj]
1.00/5 (1 صوت)

06-04-2014 04:12 PM
حمدآ لله علي السلامة يا أستاذ

نورت الراكوبة- ---- إفتقدناك كثيرآ

[bajaj]

#1025441 [ود العجب]
1.88/5 (5 صوت)

06-04-2014 03:56 PM
والعمة السمحة دي اشتريته من الامارات ؟؟؟؟؟؟؟؟؟؟؟؟؟؟؟

[ود العجب]

#1025436 [راشد]
4.00/5 (4 صوت)

06-04-2014 03:52 PM
في حوالى بداية السبعينات قال الشيخ زايد لسودانيين من ضمنهم كمال حمزة اريد ابوظبي تكون مثل الخرطوم والآن لا يوجد اي شخص في العالم يرغب ان تكون بلده مثل الخرطوم ولا يرضى شخصى مجرد ان يكون مصيره السكن في الخرطوم وذلك بفضل مجموعة الخنازير والحلاليف والبعشومات التي تسللت للبلد في 30 يونيو 89 .

[راشد]

#1025435 [أحمد عبدالله]
3.00/5 (1 صوت)

06-04-2014 03:51 PM
مع ان الخرطوم كانت احسن من الامارات سنة 1956 بس الحال اتغير بعد ما الحكومة دي جات

[أحمد عبدالله]

#1025430 [الكاهلية]
3.19/5 (5 صوت)

06-04-2014 03:48 PM
ههههههههههههههههههههههههه
لا يوجد بالامارات كوز مسئول
وهذا هو السر

[الكاهلية]

#1025429 [الزين]
4.50/5 (4 صوت)

06-04-2014 03:47 PM
واي استعلامات بتضرب ليها برد عليك موظف الاستعلامات بالكتير الجرس التالت مش كل الوائر مشغول ويرد ليك بي كل اريحيه واحترام.
ولا حا يلاقيك زي
المتعافن
وعبدالرحمن الخضر
وغسان
لكن لاقنك عمارات الجاز
1
2
هههه
ورسوم تجديد الجواز 250 درهم
ياخي ديل حراااميه عديييييييييل.

[الزين]

#1025426 [الزين]
3.00/5 (1 صوت)

06-04-2014 03:46 PM
واي استعلامات بتضرب ليها برد عليك موظف الاستعلامات بالكتير الجرس التالت مش كل الوائر مشغول ويرد ليك بي كل اريحيه واحترام.
ولا حا يلاقيك زي
المتعافن
وعبدالرحمن الخضر
وغسان
لكن لاقنك عمارات الجاز
1
2
هههه
ورسوم تجديد الجواز 250 درهم
ياخي ديل حراااميه عديييييييييل.

[الزين]

#1025417 [ساهر]
2.88/5 (4 صوت)

06-04-2014 03:35 PM
جنس الكلام دهــ، هو المخليهم (يتعنظوا) علينا ويؤلبوا علينا الدنيا ويتعاملوا معنا كقوة إقليمية، تستطيع تغيير الحكومات والأنظمة، فقط بإشارة من مدير الشرطة بتاعهم وليس من الرئيس أو الأمير الحاكم. ياخي لف بلا إمارات بلا، بلاء أزرق.

[ساهر]

ردود على ساهر
European Union [ساب البلد] 06-04-2014 08:35 PM
*********** هههههههههههه يا ابوبكر اتلومت مع الدونكي شديد !!! ************

[ساهر] 06-04-2014 08:18 PM
رد على الدعي (أبوبكر)

أخرس يا صحاب البطن البيضاء.

European Union [ابوبكر] 06-04-2014 06:37 PM
انت حمار ؟


#1025416 [OMER]
4.50/5 (3 صوت)

06-04-2014 03:35 PM
We didn't hear by your visit to uae it was a good chance to meet one of the great people of sudan

[OMER]

#1025415 [معتصم]
4.71/5 (8 صوت)

06-04-2014 03:34 PM
الأستاذ / الفاتح جبرا
أحييك في البداية على كتاباتك الجريئة وكنا نتمنى أن نراك في الإمارات الشمالية الفجيرة وما جاورهاواسمح لي أن أضيف على ما قلت وأنا مقيم بدولة الإمارات العربية المتحدة منذ يوليو 1999 وأعمل في وظيفة تتيح لي المرور على الكثير من الدوائر الحكومية وكنت أتمنى عليك أن تكون شاهدت بأم عينك الرقي في الخدمات التي تقدم للعملاء على سبيل المثال لا الحصر مكاتب استخراج بطاقة الهوية أو مراكز تسهيل.
كنت في إجازة سنوية في شهر اكتوبر 2013 للأهل بالسودان واحتجت أن استخرج شهادة ميلادى وتعديل الأسم بالشهادة ذهبت لمركز الأحصاء خلف استاد المريخ وهناك رأيت ما لا يخطر على قلب بشر ملفات مكدسة وموظفين في الفطور ممكن يرجعوا وممكن ما يرجعوا من الفطور وقايتوا في النهاية لميت في موظفة قالت لي لازم تمشي تتطلع شهادتك دي بالتعديل المطلوب من مروي وكنت متأكداً ممكن أمشي مروي ويقولوا لي لا يأخ الشهادة دي تمشي تستخرجها من جوبا الملفات مشت بالغلط بعد الإنفصال.
الحاجة يا أخي الأستاذ الفاتح الواحد البستغرب ليها أنو كثيراً من مسئولينا ووزرائنا وحتى الرئيس عمر البشير كانوا هنا في الإمارات وشهدوا النهضة العظيمة التى حققتها الإمارات في فترة وجيزة لكن مافي غيرة ولا أي حاجة.
وكلمة ظللت وأظل أرددها السودان ما عندو وجيع.
وحسبنا الله وهو نعم الوكيل.

[معتصم]

ردود على معتصم
United States [ايمي] 06-05-2014 10:50 AM
والله صدقت يا أخ معتصم ... بيسافرو وبيتفسحوا وبيزوروا مطارات عالمية ... مابيحسو بغيرة ولو حتى يسألو روحهم ليه مطار الخرطوم مثلاً مايبقى زي مطارات الدول التانية ...انتو الناس ديل بشر زينا والا ملتهم شنو .... أوبااااااااااااااااااش


#1025414 [ZAINCO]
4.50/5 (9 صوت)

06-04-2014 03:34 PM
بعد ده كلو نحن احسن منهم ما عندهم جنجويد و لا عندهم حميدتى ؟؟

[ZAINCO]

ردود على ZAINCO
European Union [ياسر نورى] 06-04-2014 05:31 PM
zainco/ ههههههههههههههههه اللة يجازى محنك


#1025413 [صلاح مرتضى سيد احمد]
4.00/5 (2 صوت)

06-04-2014 03:33 PM
الاستاذ الرائع جبرا,لك الشكر على زيارتك لنا فى العين,قرانا كتبك,للاسف كثير من الناس ما عارفين هذه الكتب.دمت للسودان العزيز الذى ليس لديه وجيع

[صلاح مرتضى سيد احمد]

#1025412 [حسكنيت]
4.63/5 (5 صوت)

06-04-2014 03:32 PM
أكان ما ضاحى خلفان ، كان لقيت الكوش والشحاتين والكيزان المكرشين واللعب بالدين وصفوف المتعطلين والتمكين والمشعوذين وتسخير القوانين ، وإمكن كمان تلقى جنجويد ذاتو

[حسكنيت]

#1025390 [ahmed]
3.97/5 (13 صوت)

06-04-2014 03:20 PM
لا يوجد بالسودان دواء و لايوجد سكر ولايوجد عدل ولا حياء ولايوجد رجال ولايوجد مثل واخلاق ولايوجد
ادب ولا توجد حكومة ولا يوجد جيش ولايوجد علاج ولايوجد
من يحمل هموم الشعب السوداني ولايوجد رجل امين ولايوجد شرطي لايختلس وغير فاسد ولايوجد من يحافظ علي اموال الناس
وتاني معناه لايوجد وطن ولايوجد بلد ولايوجد سودان والسلام

[ahmed]

ردود على ahmed
United States [كوش] 06-05-2014 12:44 PM
الأخ أبو فاطمة ، أرجو منك دراسة كورسات مكثفة في اللغة العربية قبل الكتابة في موقع ضخم كالراكوبة ..!!! لا تحبط من الإحباط وليس طحبط ..!!! الله أكون في عون فاطمة ..!!!

European Union [أبوفاطمة] 06-04-2014 03:49 PM
أعوت بالله منت يا أهمد
انت زهجان زهج شديد
لكن والله اطمنك . الناس ديل حرم بنشيلهم وبنكون ليهم محاكم من يعدم منهم يعدم ومن يدخل السجن يدخل والباقي بتصبه لعنة الشعب السوداني ... وبنبني بلدنا تاني وان شاء الله نخليها احسن من الامارات . طول بالك يا ابوحميد واوعك طحبط .



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة