الأخبار
منوعات سودانية
جمال فرفور في حوار استثنائي : لا أنتمي للمؤتمر الوطني.. ومحمود عبد العزيز أول من قدمني كفنان!
جمال فرفور في حوار استثنائي : لا أنتمي للمؤتمر الوطني.. ومحمود عبد العزيز أول من قدمني كفنان!
جمال فرفور في حوار استثنائي  : لا أنتمي للمؤتمر الوطني.. ومحمود عبد العزيز أول من قدمني كفنان!


أنا (عسكري) من أولى متوسطة..!!
06-08-2014 12:36 AM

حوار: محاسن أحمد/ تصوير: أحمد طلب
عشقه للفن بدأ منذ أن كان طالبا، ساعده على ذلك الحي الذي نشأ فيه والذي أخرج عمالقة الغناء في السودان.. أسس لنفسه أرضية فنية ثابتة وقاعدة جماهيرية عريضة. جمال مصطفى حسن أحمد والشهير بجمال (فرفور).. من مواليد الصبابي 1975 وهو ذات الحي الذي أكمل فيه كل مراحله الدراسية ومن ثم التحق بجامعة القاهرة فرع الخرطوم كلية القانون. (فلاشات) التقت به في هذا الحوار وقامت من خلاله بإلقاء الضوء على عدد من المحاور، والتي قام فرفور بالرد عليها بالكثير من الهدوء وببعض من التوتر.
ما هي توقعاتك لبرنامج (أغاني وأغاني) هذا العام؟
تعتبر مشاركتي هذه للسنة التاسعة، وفي رأيي مشاركة هذا العام ستعيد للبرنامج رسالته وبريقه الأول بعكس الشكل الذي ظهر به خلال العامين الماضيين، وكانت حلقاته تحمل بعض النمطية، لكن النسخة القادمة ستكون مميزة جداً.
نعود بك للخلف قليلاً.. من كان له الفضل في ظهور فرفور في الساحة الفنية؟
أنا أول زول قدمني للغناء -وكنت وقتها في الجامعة- كان هو الفنان الراحل محمود عبد العزيز، ففي ذلك الوقت كان لدينا حفلة في الجامعة أيام المكتبة القبطية والحفلات النهارية وكان محمود عبد العزيز هو فنان ذلك الحفل، وكان يعرف أنني أغني في الحي لكنني لم أكن معروفا للكل، وبتذكر كنت جاري للتذاكر والتجهيزات فقام محمود ربنا يرحمو قال لي تعال هنا إنت مالك جاري وعرقان كدا؟ وأداني منديل عشان أمسح العرق وقال لي: (الليلة حأعمل فيك عملية عجيبة، أنا حأقدمك عشان تغني أغنية ليه بتسأل عني تاني لإبراهيم عوض)، وفعلا قدمني المسرح وقدمت الأغنية، وكانت دي المرة الأولى في حياتي التي أغني فيها أمام جمهور حقيقي.
شخصيات دعمتك وأعلنت وقفتها معك فنياً؟
من الشخصيات الفنية التي وقفت معي في بداياتي الفنان علي إبراهيم اللحو والعوام قسم السيد من عالم النجوم والمرحوم الشاعر حسن الزبير والشاعر التيجاني حاج موسى والشاعر عوض جبريل.
جمال.. أنت متهم بمحاربتك للفنانين الشباب الذين ظهروا من بعدك؟
بالعكس.. أنا واحد من الوقفوا مع الفنانين الشباب ومديت ليهم يدي وغنيت معاهم في مناسبات مختلفة وبشجعهم دائماً، وما في أي زول اتضرر أو اتأذي مني، بالعكس أنا قدمت كتير لأي فنان شاب جاء بعدي، وما حصل حاربت أي زول فيهم لأني بحبهم كتير عشان كده ما ممكن أحاربهم أبداً.
حدثنا عن علاقتك مع الفنان الراحل محمود عبد العزيز على الصعيد الفني؟
الراحل محمود عبد العزيز بالنسبة شخص لا أستطيع وصفه هو الصادق الصديق بالنسبة لي لأنو كان صادق في تعامله معاي لدرجة لا يمكن تخيلها وتربطني بيه علاقة قرابة بالإضافة للعلاقة الفنية، ولكن علاقة الأخوّة البينا أقوى من صلة القرابة وقدم لي حاجات كتيرة ونصحني كتير.. والحمد لله لما مات كان راضي عني ورضاهو عني كفاية جداً.
لكنك كنت تغير منه لجماهيريته الكبيرة وشعبيته اللامحدودة؟
والله العظيم محمود عبد العزيز كان بيمثل ركيزة أساسية في مجال الغناء ولا يمكن في يوم أغير منو أو هو يغير مني لأنو محمود كان فنان واثق من نفسو تماما وأي زول لما يكون داير محمود في أي عمل عام كان بتصل علي أنا عشان أبلغو حتى مشاركته في (أغاني وأغاني) قبل ثلاثة أعوام كانت بوساطتي، وبتذكر إنو مشينا اشترينا ملابس البرنامج سوا وكان بيقول لي ما تسمع الكلام البيقولوه الناس عن وجود غيرة بيني وبينك، وأنا لا زلت أذكر موقفا قديما، وهو الذي حدث بنادي الضباط عندما قال محمود لجمهوره: (فرفور ده ود خالي)، وكان دائماً بيقدمني هو لجمهوره لأنه بيعرف تعصبه الشديد ليهو، وكنت بقدر الحاجة دي كتير والله العظيم، وفي حفلة قدمني لجمهوره وقال ليهم: (أنا وجمال واحد)، عشان كدا ما ممكن في يوم من الأيام تكون حصلت غيرة بينا، وأنا بقول الكلام ده وهو في قبره، والمقربين يعلمون العلاقة التي بيني وبينه، وكان بيتعامل معاي كاني أخوه الصغير وطبعا ما في زول بيغير من أخوه الصغير.
من الملاحظ وجود عداء من بعض (الحواتة) تجاهك.. ما هي الأسباب في رأيك؟
مجموعة (محمود في القلب) بيعرفوا تماما مدى علاقة محمود بشخصي، ولكني أجد العذر لبعض جمهور محمود وذلك لحبهم الشديد له وأنا بقدرهم وبحترمهم كتير، وأنا (حواتي) لا أرضى بالشيء الذي لا يرضاه جمهوره لمحمود حتى ولو كان ذلك على حساب نفسي.
من هو خليفة محمود عبد العزيز؟
ليس له خليفة على الإطلاق وبنصح أي زول يبعد من هذا العملاق ويخلوه لذكراه الجميلة الطبعها في وجدان الشعب كلو وليس الحواتة فقط والتي أتمنى أن يحافظ الشعب عليها.
أحاديث كثيرة تتناول معلومات عن انتساب الفنان جمال فرفور لجهات أمنية.. ما هي حقيقة هذه المعلومات؟
صمت لبرهة قبل أن يجيب: (أنا زول قريت قانون واشتغلت في النيابة وأنا عسكري من أولى متوسطة.. تدرجت من المظلات للشرطة الأمنية... ورجعت مرة تانية للمظلات ومشيت القانون.. ووظيفتي أعتقد أنها عادية جداً بس نظرة الناس ليها بتختلف).
أنت ضابط.. إذاً أنت مؤتمر وطني؟
رد سريعاً: (لا.. أنا ما عندي أي تيار سياسي ولا أفقه في السياسة ولا داير أعرفها لأنها ما جزء من اهتماماتي)، وعملي في جهاز الأمن هو وظيفة دون انتماءات سياسية.. أنا زول قانوني ودي شغلتي.
هل هذا يعني أنك دخلت مجال العسكرية عن رغبة؟
طبعاً.. كانت رغبتي من بدري لما اشتغلت في القانون عشان عشقي للحياة العسكرية، ومن كنت صغير كانت أمنيتي أكون ضابط.. (بس الناس ضخمت الموضوع دا ساكت).
ماذا تعني بذلك؟
شوفي في ناس كتيرة ظلمتني في الموضوع دا، لما عرفوا إني شغال في جهاز الأمن قالوا علي إني خائن وعميل والكثير من الأوصاف غير الحميدة، على الرغم من أني لما اخترت المجال دا عشان أخدم الناس لأني بالجد بحب كل السودانيين وبتمنى دائماً أكون ليهم وسيلة لتحقيق ما يبتغونه.
فرفور من أكثر الفنانين تأثراً بالشائعات؟
أبدا.. ما دام أنا في العمل العام ده الشائعات متوقعة.. فقط يبقى ردة فعلك وتعاملك معها.
ما هي أكثر شائعة هزتك؟
أقوى شائعة هزتني كانت خبر وفاتي، والأخرى أنني أمتلك بيتا في كافوري.!
هل هناك ما يمنع أن تمتلك منزلاً ملك في كافوري؟
أولا دخلي لا يقل عن خمسين إلى ستين ألف في الشهر، ولو داير أوفر بوفر وبشتري بيت في كافوري بس الحقيقة إنو أنا ماعندي بيت أصلاً في كافوري.
دخلك ستين ألف في الشهر بالإضافة إلى مرتبك وحوافزك في جهاز الأمن؟
أبدا.. أنا لم أستفد من جهاز الأمن مادياً.
ما هي رتبتك في الجهاز؟
أتحفظ على الإجابة عن هذا السؤال.
أنت فاشل في مجال البزنس؟.. ما تعليقك؟
دي حقيقة طبعاً.. أنا مابفهم في البزنس إطلاقاً.
كم يبلغ عداد جمال فرفور؟
12 ألف جنيه.
ومن لا يمتلك هذا الرقم؟
البقول ما عندو بغني ليهو ولو أدفع حق الفرقة من جيبي، وبالمناسبة الفنان كلما زادت شهرتو ومكانتو في المجتمع كلما قلّ عدادو مش العكس، وبعدين الحياة تكاتف، وإطلاقاً لا يمكن أن أتمسك مع معجب لإحياء حفل.
هل أنت راضٍ عن نفسك؟
والله أنا راضي تماما عن نفسي في عملي في مجال الفن لأني مديهو حقو كامل.
فرفور.. كيف تتعامل مع المعجبات؟
أنا بحترم أي زول بحب جمال وبحاول يرضيهو وأتعامل معه في حدود المسموح به ولا أتعالى على شخص والدنيا كلها (شبر)، وبقابل المعجبين والمعجبات وبتعامل معاهم برضو في حدود الإعجاب وبتواضع، ومن تواضع لله رفعه.
هل تؤمن بالعين والحسد؟
نعم أؤمن بالعين والحسد لأنو حصل لي كتير.
لهذا السبب ترتدي على عنقك (كمون أسود)؟
ضحك ثم قال: (أيوه..لابس كمون أسود والحسد مذكور في القرآن، ربنا يجعلنا من المحفوظين وما يصيبنا حسد ولا عين).
في رأيك.. ما هو تقييمك للأصوات النسائية في الماضي مقارنة بالآن؟
جيل الفنانة عائئشة الفلاتية وفاطمة الحاج وغيرهما من الرائدات ظهرن في وقت الجو كان فيه معافى، لكن الفنانات الآن على الرغم من أن عددهن زاد بصورة واضحة إلا أن الجو لم يعد صحياً كما السابق، والمجتمع أصبح ينظر للفنانة بعين غير جميلة، وأتمنى أن تتغير نظرة المجتمع تلك.
كان هناك مشروع ألبوم غنائي بينك والفنانة المعتزلة حنان النيل.. حدثنا عنه؟
حقيقي افتقدت صوت حنان النيل وآمال النور وأسرار بابكر وجميعهن تربطني بهم علاقة فنية طيبة، وحقيقي كان هناك شريط جمعني مع الفنانة حنان النيل قبل الاعتزال ولكن لم يرَ النور لأنها اعتزلت وقالت لي يا جمال لو داير تكرمني الشريط ده ما يطلع وفعلا رجعنا القروش، واسم الشريط كان (جمال النيل) أخذ فيه اسمها واسمي وكان في غاية الروعة، لكن أعدمناه تلبية لرغبتها وهي فقد كبير للأصوات النسائية في السودان.
لمن يستمع فرفور؟
أستمع للفنان عثمان حسين وإبراهيم عوض.. أحبهم جدا وأرخي سمعي لهما بمزاج، والبسمعوا بصوت عالي وممكن انفعل معاهو الفنان أبو داؤود.
وعلى النطاق العربي؟
أحب الاستماع للفنانة أم كلثوم وفي مرة كنت في مصر راكب العربية وبستمع لأم كلثوم، وفتحت الباب لواحد سوداني عشان يركب معاي، في اللحظة ديك وقف أحد المصريين بجوار سيارتي وقال لي: (يا ابن النيل أم كلثوم بسمعوها بالليل ما بالنهار)، وبالفعل من الوقت داك وأنا بسمعها بالليل وأطرب معها للغاية.!
شريط كاسيت لا يفارق درج سيارتك؟
شريط أبو داؤود، وأنا زول (متعنصر) لفناني بحري مثل أبو داؤود ومحمد ميرغني ومحمود عبد العزيز وغيرهم، وبحري بالنسبة لي مقدسة لأنها أنجبت هؤلاء العمالقة.
لا زلت تمارس كرة القدم؟
نعم لأنها عشقي.
ألا توجد بجانبها هوايات أخرى؟
الكرة والصيد والسباحة.
كيف تتواصل مع الأهل؟
في حاجات ما بتقدر توقفها زي الفرح أو الكره، ديل ما بتأخر فيهم أبدا، لكن الزيارات بصراحة مقصر فيها.
باعتبارك شخصية مشهورة.. موقف محرج تعرضت له؟
مرة كنت قاعد في صيوان عزاء وفاة شقيقة صديق لي، وتفاجأت به يطلب مني أن أذهب للبيت، فسألته بدهشة عن سبب ذلك، ليقول لي: (الناس دي كلها مركزة معاك.. والعندو حفلة يسأل من السعر.. والداير يتصور.. ياخ ده بكاء أختي يا فرفور).!!
هل لدى فرفور أي مشاريع إنسانية قادمة، خصوصاً أن للفنان رسالة يؤديها تجاه مجتمعه؟
نعم لا بد أن نهتم بالأطفال وكبار السن والمرضى لأنو عندهم حق عند الشعب السوداني والعمل الإنساني بالفعل جزء من رسالة الفنان وأنا بإذن الله لدي عدد من المشاريع في هذه الجوانب.
في بعض الأحيان يكون لديك هواجس تجاه ما تقدمه من عمل إنساني.. لماذا؟
فعلا دي حقيقة.. وفي بعض الأحيان لما أتحرك لأي عمل إنساني يقولوا دا مرسلنو ناس منو؟.. والمفروض الناس تفهم نحنا ما ضد زول في النهاية دايرين الناس تعيش عيشة محترمة.
هل الدولة مقصرة تجاه المواطن؟
لا بد للدولة أن تكون على قدر مساحتنا نحنا، ونحنا مساحتنا ما في الخرطوم فقط، لا بد أن يكون تحركها بحجم السودان عشان يستمتع أهله بموارده وثرواتها الضخمة، ولا بد أن نؤسس لدولة المحبة، وأنا أحلم بأن أرى كل فرد في السودان يعيش عيشة كريمة، وأحلم بالوحدة الكبيرة، وأحلم بالسلام وبإيقاف الحروب وبتنمية ضخمة لهذا البلد الطيب.

السوداني


تعليقات 23 | إهداء 0 | زيارات 11380

التعليقات
#1029692 [يزيد ارباب]
0.00/5 (0 صوت)

06-09-2014 03:25 AM
قايتو كذب في مواليد1975 دي ...اخر دفعة اتخرجت من الفرع كانت سنة 1992 يعني كان عمر
جمال 17 سنة واتخرج وله كيف

[يزيد ارباب]

#1029672 [Rebel]
0.00/5 (0 صوت)

06-09-2014 01:20 AM
* كذاب... انت مؤتمر وطنى سافل، و ضابط منحط فى جهاز الامن و المخابرات.

[Rebel]

#1029671 [Rebel]
0.00/5 (0 صوت)

06-09-2014 01:19 AM
* كذاب... انت مؤتمر وطنى سافل، و ضابط منحط فى جهاز الامن و المخابرات.

[Rebel]

#1029419 [السفير]
5.00/5 (1 صوت)

06-08-2014 06:43 PM
انا اصلا بكره فرفور ولا ااحترمه اطلاقا منافق متدهنس قليل حياء والليلة ظهر انو امنجى بتاع امن دا هو الفضل ....يا ناس اتحاد المهن الموسيقية اعملوا حسابكم فى وسطكم جاسوس ....اعزلوهوا وما تتعاملوا معاهو.

[السفير]

#1029415 [ودالعمدة]
0.00/5 (0 صوت)

06-08-2014 06:33 PM
نعلم من هو جمال فرفور الامنجي وكيف وجد في برنامج اغاني واغاني في قناة النيل الازرق الحكومية وفرض علي هذا البرنامج ومقدمه فرضا لانه جهاز حكومي يتبع للحكومة والامن اللذي هو من منتسبيه ....سنطلب من السر قدور الانسحاب من هذا البرنامج احتراما لارواح شهداء سبتمبر اللذين قتلهم منسوبي الامن والجنجويد بدم بارد لانهم قالوا لا للغلاء فقط ,,,,,شخصيا ساقاطع هذا البرنامج ولن اراه ابدا طالما به هذا الامنجي اب "صلعة" واطالب كل السودانين بمقاطعة هذا البرنامج الامنجي .......
مسطول ماشي ليهو وراء واحده وبقول ليها : يا جمال الليل ....يا جمال النيل ....يا جمال يا جمال ....التفتت عليه لقي راسه ولا شعرة ما فيهو صلعة ...قال ليها : هوي يا جمال فرفور

[ودالعمدة]

#1029396 [خطاي المزالق]
0.00/5 (0 صوت)

06-08-2014 06:07 PM
قال لي احد الاصدقاء من احدى الدول العربية " عندهم في بلدهم عندما تنحرف الفتاة تصبح عاهرة وعندما ينحرف الرجل يصبح رجل مخابرات " يعني رجل الامن ما هو الا عاهرة تحمل سلاح

[خطاي المزالق]

#1029303 [هجو يوسف]
0.00/5 (0 صوت)

06-08-2014 04:21 PM
في مطرب كويس يكون إسمه فرفور . والله الزول دا لما بشوفه بطني بطم وبطرش لا خلقة والآن لا أخلاق . لكن نحن نستاهل البنعمل للخنابير قنابير . واحد ما بعرف يلبس ومابعرف يغني ويقولوا عليه فنان. وحقيقة وموضوعا كدا دراسة القانون ما أضافت له شيئ حتى الكلام ما بعرف يتكلم .الزول ما طلع عسكري ساي .

[هجو يوسف]

#1029265 [صلاح فضل السيد حامد]
0.00/5 (0 صوت)

06-08-2014 03:38 PM
فرفور ده من ظرفاء مدينة بحري وود بلد وراجل بسيط وحبوب وحكاية الآمن دي يا شباب عادي جداً والراجل من زمناً بدري بلعب كورة في سلاح المظلات وتدرج إلى رتبة ضابط وتخرج من الكلية برتبه نقيب .

[صلاح فضل السيد حامد]

ردود على صلاح فضل السيد حامد
European Union [ساب البلد] 06-08-2014 06:57 PM
****** يا صلاح بطل كسيير تلج علاقة المظلات بجهاز الامن شنو ؟؟؟ ********* لو ضابط في الجيش ممكن تتبلع ******* عليك اعمل برنت اوت للتعليق بتاعك و وديهو للامنجي فرفور يرقعك من ال 60 الف الشهرية **********

United States [الباشا] 06-08-2014 06:08 PM
بطل كسير تلج (يعني جمجرة)


#1029254 [وعد اللقيا]
0.00/5 (0 صوت)

06-08-2014 03:26 PM
دا عميل ربنا ينتقم منو

[وعد اللقيا]

#1029201 [Santo]
0.00/5 (0 صوت)

06-08-2014 02:33 PM
الغريبة كنت بحترم فرفور كرجل خريج قانون مثقف وكنت متوقع فى يوم ممكن يدافع عن حقوق الاخرين لكن طلع هو الحرامى نسال الله ان لا يراك ما يريح صدرك

[Santo]

#1029117 [الغضنفر]
3.00/5 (1 صوت)

06-08-2014 01:11 PM
صوت صوت السخلة و دمك أثقل من جبل أحد..
قال فنان قال

[الغضنفر]

#1029090 [nor]
5.00/5 (1 صوت)

06-08-2014 12:47 PM
اذا انت من كان يسلط الشرطة والامن على محمود بالرغم من تصريح والدته بانه كان يعمل كل شئ فى البيت حتى بروفاته ولا يحب الخروج فى البيت إلا لحفالته وانت من تعرف سره فانت المتهم بعد كشف هويتك على العموم ستاسقط جمهورك بعد كشف هويتك ان كان لك جمهور

[nor]

#1029074 [wedhamid]
5.00/5 (1 صوت)

06-08-2014 12:35 PM
هذا الحوار مهداء لديوان الزكاة و ديوان الضرائب ..... فالرجل يقر و يقول بلسانه أن دخله الشهرى لا يقل عن الـ 50 الى الـ 60 ألف جنيه يعنى دخله السنوى لا يقل عن المليار إلا قليلا... فهلا قمتم بواجبكم أم فلاحتكم على المساكين يا ناس الضرائب و العاملين على الزكاة و لهؤلاء على وجه الخصوص أهى جاتكم برجليها لتتحصلوا على ما سينوبكم منها ....

[wedhamid]

ردود على wedhamid
European Union [sasa] 06-08-2014 02:17 PM
لا ياود حامد هذا الامنجى القذر لايدفع لان عمله لله فقط لا لامن ولا لفن ولا لجاه .... تدفع انت لو ماعند تدين وتدفع !!! وستات الشاى يدفعن .... قال فرفور قال ... فرفرك بلى يخمك امنجى كلب


#1029060 [ثورة محمية بالسلاح ( كاودا وبس)]
5.00/5 (2 صوت)

06-08-2014 12:27 PM
حريقــــــــــة ولعـــــت في فــــــــرفور

أحمد البلا الطيب ومبارك البلال وكل العاملين معهم كلاب امن
قبل الانقاذ كانوا لا شيء والان شوف وضعهم كيف كلاب تنبح وبلع وما تشبع

الصحفي المدعو ضياء الدين كلب أمن بلاع زمم زكتال كتلاء

فاطمة شاش الشماشية السطلنجية بتاعة الليالي الحمراء كلبة بس لسانها طويل شوية

عثمان ميرغني ... صوته خفت شويه

معظم الصحفيين تم شرائهم كاش دوان ... يا فاطمة شاش ...

فرفور ضابط من زمان (ونحن) عارفين ومننا بتروح وين ... (نحن) راصدين كل الخاينين ... الذين خانوا الشعب السوداني ... تكتل أولادنا بالدس وشفتك ملثم ومغطي وشك ... يا قناص شايل رصاص تكتل أولاد الناس يا صعلوك يا أوباش ... أنت ما عندك ضمير يا خائن يا عميل ... عشان القروش تبقى كوز وتبقى خاين وعميل وكتال كتلا ...
فرفور يقول أنا بتاع أمن لكن ما كوز ... يا راجل أخجل ... أنت بتاع أمن وما كوز كيف ... أنت فاكر الشعب السوداني ده مسطح زيك ... ناس المشروع الحرامي رافعين شعارات الدين وأطلقوا الصعاليك زيك عشان يفسدوا الذوق العام ويضيعوا الشباب ... حتى لا تقوم الثورة ... وتقلع الوساخة ... فرفور بوق وفنان موجه لهدم القيم السودانية ...

[ثورة محمية بالسلاح ( كاودا وبس)]

ردود على ثورة محمية بالسلاح ( كاودا وبس)
United States [كاره ناس الأمن] 06-08-2014 02:38 PM
اول حاجه يا أخونا ناس الأمن زيهم وزي اي موظف حكومي وما معني الزول في الأمن معناها كوز لأن جهاز الأمن ده موجود قبل هذه الحكومة ،،، وأي حكومة في العالم لها جهاز أمن وذلك لحفظ الأمن والسلام وكل مجتمع أو قطاع أو مؤسسة أو اي شئ آخر فيه الصالح وفيه الطالح والواحد يشغل مخه شوية قبل ما ينتقد ويقول كلام لا معني له . ولو سمحت أقرأ كتير عشان تصلح الإملاء بتاعتك


#1029054 [قوز دونقو]
0.00/5 (0 صوت)

06-08-2014 12:22 PM
سؤال برئ للفنان جمال (( ما هو شعورك و أنت تغني في حفل صاخب في مسرح فخم و سط جمهور عاصمي (مرطب جدا)) و فجأة تنطفئ الأنوار و يصمت كل شئ و من ثم يعرض شريط سينمائي تم تصويره في أحد معسكرات النزوح في دارفور و يظهر في الفيلم نسوة يسكن في العراء بأثمال بالية علي أجسادهن الهزيلة و لا يملكن من حطام الدنيا غير إناء فخاري للطبخ علي نار منحطب يجلبنه من مكان قريب و يستمر الشريط في العرض إلي أن يصل إلي مبتغاه المعلرف للجميع )) تلك الفوارق الكبيرة بين سكان تلك المعسكرات و سكان العاصمة في الملبس و المسكن و المأكل و المشرب ؟؟؟
هل تستطيع أن تستمر في الغناء و إكمال الحفلة بعد مشاهدة تلك المناظر البئسة ؟؟؟؟ أنك تعتذر لجمهورك الخرطومي ؟؟؟ ؟؟؟؟
مجرد سؤال أو قل خاطرة ؟؟؟؟

[قوز دونقو]

ردود على قوز دونقو
United States [عادل] 06-08-2014 03:33 PM
مع احترامي ليك سؤالك بره الشبكة وما عنده أي علاقة بالموضوع ،،، مع العلم كل العالم فيه فقراء وفيه أغنياء وهذه سنة الحياة وبكل صراحة أنا في غاية الدهشة من سؤالك العشوائي وحاولت جاهدا ربط علاقة الحفل الصاخب بفقراء ونازحي دارفور لكنني لم افلح في إيجاد أي رابط بينهما .


#1029015 [ناصر محمد]
5.00/5 (2 صوت)

06-08-2014 11:51 AM
أحاديث كثيرة تتناول معلومات عن انتساب الفنان جمال فرفور لجهات أمنية.. ما هي حقيقة هذه المعلومات؟
صمت لبرهة قبل أن يجيب: (أنا زول قريت قانون واشتغلت في النيابة وأنا عسكري من أولى متوسطة.. تدرجت من المظلات للشرطة الأمنية...

انت انسان أمنجي اذا انت انسان حقير وتافه .... كفى

[ناصر محمد]

#1028919 [المستعرب الخلوى]
5.00/5 (2 صوت)

06-08-2014 10:37 AM
( ولكن علاقة الأخوّة البينا أقوى من صلة القرابة وقدم لي حاجات كتيرة ونصحني كتير.. والحمد لله لما مات كان راضي عني ورضاهو عني كفاية جداً.)
يا سبحان الله ولا حولا ولا قوة إلا بالله العلى العظيم ..الزول دا نصيح وعقله تمام .. دا كلام يقولوا زول عاقل ودارس قانون ..رضا محمود عبدالعزيز كفاية عليهو ..
خلاص خلى محمود عبدالعزيز يبقا ليك شفيع يوم القيامة ويدخلك الجنة برضاه عنك ..

[المستعرب الخلوى]

#1028917 [ساكي أم بيرول]
5.00/5 (2 صوت)

06-08-2014 10:35 AM
خسارة يا فرفور طلعت تظهر خلاف ما تبطن

[ساكي أم بيرول]

#1028912 [عادل]
5.00/5 (2 صوت)

06-08-2014 10:33 AM
المهم انو اقر بالانتساب لجهاز الامن وعقبال احمد البلال الطيب

[عادل]

ردود على عادل
European Union [sasa] 06-08-2014 02:20 PM
ياخى احمد البلا ل الطيب ضابط اوفرد امن منذ ايام نميرى واسماعيل الخاج(الحاج) موسى ايام كان كل وجباته الغذائية من مطعم الحاتى فى الخرطوم نمر2 وانا شاهد اقسم على ذلك


#1028832 [قال مسلمين قال]
5.00/5 (2 صوت)

06-08-2014 09:40 AM
عشان كدة بكرهك يا عديم الضمير تكتل في الناس و تجي تغني ليهم عليك لعنة الله دنيا و آخرة و انشاء الله ما تشوف راحة.

[قال مسلمين قال]

#1028817 [ثورة محمية بالسلاح ( كاودا وبس)]
5.00/5 (2 صوت)

06-08-2014 09:28 AM
الفن زمان والمجتمع السوداني زمان كان نضيف وكان وكان وكان الفنانين يتعاملون مع الفن كرسالة إنسانية في المقاوم الأول ثم يطورون ويضيفون ويحافظون على الموروث الجمعي الثقافي للأمة السودانية ولكن بعد أن جثم المؤتمر الوسخ المعفن على صدرنا سيس كل شيء ودس كلاب الأمن في كل مجال وهذا ناتج عن خوفهم الشديد وفرفور ضابط أمن ويقول أتحفظ على الرد عندما سئل عن رتبته العسكرية (فرفور ضابط أمن برتبة مقدم) يعذب أبناء الشعب السوداني ويمدح البشير وده كله عشان القروش ... والله عندما أشوف صورته يجيني غثيان ودوار وأستغرب كيف يكون الفنان ضابط (أمن) وطبعاً فرفور كان مزروع (ونحن) عارفين من زمان في الوسط الفني لكي يتجسس على زملائه من الفنانين ويرفع عنهم تقارير وهذا نفاق ... ويؤسفني أن يقف كلب وينبح في المسرح القومي ويقول أنه يغني ... فرفور شارك في قتل شباب ثورة سبتمبر ... فرفور أسمه موضوع في قائمة المطلوبين لدى الجبهة الثورية وكل الشعب السوداني عرف حقيقة فرفـــــــــــــــــــــور كلـــــــــــــــــــب الأمــــــــــــــــــــــن.

[ثورة محمية بالسلاح ( كاودا وبس)]

#1028814 [واحد بكره الجماعة الفلانية]
0.00/5 (0 صوت)

06-08-2014 09:26 AM
ياخي دابي رنده اله الاحباش لعنة الله عليه عارف انو رتبتك في الامن



لوااااااااااااااااااااااااااااااااااااااااااااااااااء

طيب انت خايف من شنو ما تقوله عديل كده رتبتك لواء وكان داير بنجيب ليك رقمك.

اعتقد صديقك بتاع العزاء هو ترباس لانو صراحة في السودان كلو مافي زول بقدر يقول الكلام ده الا ترباس

بس برضو صراحة بحيي فيك حسك الانساني واخلاقك العالية لانو كل شئ براهو.

[واحد بكره الجماعة الفلانية]

ردود على واحد بكره الجماعة الفلانية
United States [صلاح] 06-08-2014 12:09 PM
اول حاجه رتبته ما لوااااااااااااء يا ناصح ،،، رتبته رائد . ويا زكي زيكو اذا كان الفنان ترباس زي ما استنتجت كان حيكون عدد الفنانين في العزاء كبير جدا وبالتالي الاضواء ما حتكون كلها مسلطه علي فرفور لكن طالما قال له امشي البيت عشان الناس معناها هو الوحيد المشهور .
تخريمة : كيف يكون مواليد 1975 ويكون خريج جامعة القاهرة فرع الخرطوم وغني ايام المكتبة القيطية ؟؟ لان الكلام ده كان في الثمانينات !!!


#1028674 [ساب البلد]
4.75/5 (5 صوت)

06-08-2014 01:51 AM
******* قول خشيت المدرسة عمرك 7 سنين ********* الابتدائي 6 سنين ******** 7 + 6 = 13 ******* طيب يا فرفور اب صلعة اديناك سنتين من عندنا 13 + 2 = 15 سنة ******** السن القانونية للتجنيد 18 سنة كيف انت عسكري من اولي متوسطة ؟؟؟ ******


****** ما سمعنا بزول في جهاز الامن بخدم الناس ***** بل بالعكس بضر الناس ******** ما في زول في الامن هو ما موتمر وطني يعني كوووووووووز ******** دخلك 60 مليون في الشهر دي تتبلع كيف ؟؟ ***

[ساب البلد]

ردود على ساب البلد
United States [الباشمهندس] 06-08-2014 06:20 PM
sasa و عادل كلها أسماء لشخص واحد عامل لي فيها تفتيحه قوم فز لكن ما كسير تلج شديد يا sasa

European Union [sasa] 06-08-2014 02:23 PM
ياعادل الله يجازى محنك ( قلت سجلوا بالواسطة خوفا على الاطفال؟؟؟ حلوه خالص - من صلعتوا دى شكلو معلم مونة وسريقة جالوص .... هع ع ع ع ع

European Union [عادل] 06-08-2014 10:29 AM
في ذمتك ده راس بيخلص الابتدائي في 6 سنوات ياحبيبي فرفور يكون ربت في خامسة سنتين وفي سادسة 4 سنوات واصلا في ثالثة كان رفدوهو وبعد سنة تاني رجع يعني خلص الابتدائي وعمره فوق العشرين وبالواسطة خلوهو يدخل المتوسطة خوفا على الاطفال يعني عادي دخل العسكريه وعمرو 22 سنة وهو في اولى متوسط

[دينقديت] 06-08-2014 04:59 AM
Good and logical questions bro Sab El Baled



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة