الأخبار
أخبار إقليمية
محمد طاهر حسين (البلدوزر) : المعركة قادمة، والحصل دا شغل صغير ساي قوَّم نفس الوالي
محمد طاهر حسين (البلدوزر) : المعركة قادمة، والحصل دا شغل صغير ساي قوَّم نفس الوالي


إيلا أصبح قذافي الشرق..(...) ما داير أتكلم في الموضوع دا.. هذا ليس وقته!!
06-14-2014 11:30 PM



عاد محمد طاهر حسين الملقب بـ(البلدوزر) لواجهة الأحداث بعد صدور قرار بإسقاط عضويته من المجلس التشريعي بالبحر الأحمر الذي كان فيه الرجل الثاني مثلما هو الحال في الحزب الحاكم المؤتمر الوطني، قبل أن يجور الزمان عليه ويدخل في محاكمات خرج منها منتصرا كما يقول، ولكن الأمور لم تعد كسابق عهدها وتكدر الصفاء بينه ورأس الولاية محمد طاهر إيلا، لينقلب عليه (البلدوزر) الذي كان يدعم مسيرته خلال الفترة الماضية، ويتحول الآن لمربع هدمها. (السوداني) أجرت معه الحوار التالي عبر الهاتف.
<<<<
* كيف تنظر لقرار فصلك؟
هذا قرار أتى بغرض المكايدة السياسية، بعد تفجر الخلاف بيني ووالي البحر الأحمر محمد طاهر إيلا.
* لكن القرار صدر وفقاً للوائح المجلس التشريعي للولاية؟
أبداً.. هذا القرار استند على قرار سابق صادر من محكمة أركويت بتاريخ 12/9/2012، وهذه المحكمة ابتدائية بعرف القانون، فتقدمت باستئناف بعد صدور الحكم، وقمت بإعطاء المجلس التشريعي نسخة من الاستئناف، وعليه لا يجوز إسقاط عضويتي بالمجلس إلا بعد انتهاء التقاضي.
* لكن ما يتردد أنك لم تستطع إحضار ما يثبت براءتك بعدها طوال هذه المدة؟
هذا غير صحيح، في 18/11/2012 سلمتهم قراراً من محكمة الاسئتناف وبإمضاء ثلاثة قضاة ينص على إلغاء قرار المحكمة الابتدائية بالإدانة والعقوبة، وقمت بتسليم نسخة منه لرئيس وأمين ومستشار المجلس إضافة للوالي، وبذلك انتفت إدانتي.
* إذاً، كيف تفسر صدور قرار إسقاط عضويتك من المجلس؟
عندما حدث خلاف بيني والوالي إيلا، أراد هو ومن معه القضاء عليَّ، فأصدروا هذا القرار استنادا على محكمة الموضوع متناسين عن عمد قرار الاستئناف. مستندين على قرار ملغى.
* كيف صدر القرار؟
لقد منعت بواسطة الشرطة من حضور الجلسة، وعملوا عبر سيطرتهم على المجلس على تمرير القرار بسرعة، وهذا القرار يقف وراءه الوالي إيلا.
* ولكن أعضاء المجلس صوتوا بالإجماع لصالحه؟
هم قالوا ذلك، ولكن هذا ليس صحيحاً فالقرار مرر بطريقة (أخنق فطس)، هل تعلم أنه لم يكن الموضوع مدرجاً في أعمال المجلس، ولم تتم مراعاة لوائح المجلس، لك أن تتصور أنه لم تُتَحْ لي فرصة المثول أمام اللجنة القانونية بالمجلس، أو حتى لجنة شؤون المجلس، لقد رفضوا طلباتي ولم يسمح لي بحضور الجلسة وتوضيح موقفي. وحتى عندما احتج نواب على ذلك وطالبوا بمنحي فرصة لمخاطبة المجلس والدفاع عن نفسي، قالوا لهم: لن نعطيه فرصة.
* من الذي قال لهم ذلك؟
رئيس المجلس بالإنابة، وما قاموا به مخالف للوائح المجلس، ودستور ولاية البحر الأحمر، والقانون العام، ولقد قمت باستئناف القرار وسلمت الاستنئاف لمحامين تطوعوا للدفاع عني.
* هل هناك من تطوع للدفاع عن محمد طاهر حسين؟
نعم لقد تطوع عدد من المحامين للدفاع عني.
* دعنا نعود لأصل الخلاف بينك وإيلا، ما تفاصيله؟
هذا الأمر يُسأل عنه الوالي، فمن جانبي ليس عندي شيء ضده، ولكن إيلا يعمل بكل إمكانيات الولاية والدولة للقضاء عليَّ.
* ألا يمكن القول إنه تخلَّى عنك بعد القضية الأخيرة والبلاغات الجنائية؟
لا أعتقد ذلك.
* هل يمكن القول إن ثمة من أوقعوا بينك وبينه خاصة بعد العلاقة القوية التي جمعت بينكما طوال الفترة الماضية وجعلتك بمثابة اليد اليمنى له خاصة في العمل التنظيمي بمختلف أشكاله؟
لا أعتقد أن أحداً حرَّضه علي، هو بدأ العداء ضدي، وحتى إذا قلنا إن هناك من حرضه، فهو يتحمل مسؤولية أفعاله.
* هل تعتقد أن إيلا كان وراء ما حدث لك من اتهامات وإجراءات قانونية كادت أن تقضي على مستقبلك السياسي؟
(صمت برهة).. ما داير أتكلم في الموضوع دا، دا ما وقته، لكن الشيء الواضح والمؤكد لدي أن القرار الأخير صدر بتوجيه من إيلا.
* ليس من المنطقي إذاً، أن يكون العداء ذا طابع شخصي؟
حسناً، دعني أقول لك بصراحة، إن الأوضاع في الولاية تدهورت لأقصى حد، فغابت المؤسسية، وحدث الخلل التنظيمي.
* هل ظهر هذا التدهور في فترة غيابك فقط؟!، لقد كان قديماً وحتى عندما تحدث البعض عنه كنت أنت على رأس المتصدين لهم؟
نعم الخلل قديم ولكنه الآن تفاقم جداً.
* تفاقم؟ أم أنك بعد أن غيَّرت موقعك بِتَّ تتبنى ذات الرؤى التي كنت تصارعها في الماضي؟
لا.. كان هناك خلل، وكنا في إطار العمل المشترك لإصلاحه ولكن فشلنا، وتفاقم الآن بفعل الاحتقان السياسي بالولاية. وخير شاهد المسيرة الهزيلة التي سميت بالردع، وكانت وبالاً على إيلا.. ولكن السؤال الأساسي هو من يردع من؟
* دعني أكون معك صريحاً. لقد بدأت تقود حملة لإسقاط الوالي وكنت وراء الأحداث الأخيرة، وقد وصفكم إيلا بـ(خفافيش الظلام)؟
(ضحك).. لقد سمعت هذا الحديث كثيراً، هذه الاتهامات يرددها أنصار إيلا.
* لماذا أنت بالتحديد دون بقية معارضيه حتى الأقدم منك؟
ربما بسبب أحداث هيا الأخيرة، فكما تعلم هيا هي مسقط رأسي، ومواطنوها الذين تظاهروا ضد إيلا ديل ناسي.
* بعد كل ذلك كيف يمكن ألا تكون وراء ما حدث وتكون أنت زعيم ما يسمى بـ(خفافيش الظلام)؟
الحصل دا كان بسبب لسان إيلا، لأن حديثه الأخير بِـهَيَا كان غير موفق، فثارت الجماهير ضده بسبب كيله للسباب لعدد ممن عملوا معه، ومعاه شوية (كومبارس) يرددون ما يقولوه.
* أها إنت ما زعيم (خفافيش الظلام)؟
(ضحك).. شوف حكاية (خفافيش الظلام) دي ملت البلد (بورتسودان) وتحذيراته لهم في اليافطات كثيرة وأنا ما عندي علاقة بيها، لكن إيلا بقى القذافي عديل مش في طريقة تفكيره وسياسته بس، دا حتى الخطابات بتاعته ولافتاته تلقى فيها (زنقة.. زنقة)، و(مسيرة الردع)، وحتى الجماهير هتفت (إيلا وبس).
* طيب بغض النظر عن (خفافيش الظلام) دي، أنت حالياً قائد الحملة المعارضة للوالي؟
شوف ما بقول ليك بقود حملة معارضة إيلا، لكن الشاهد في الموضوع أن هناك الكثيرين ممن لا يتوافقون مع إيلا في سياساته، وهؤلاء بدأوا في القيام بفعاليات مناوئة له.
* ألم تصل بعد لمرحلة التنسيق مع معارضي إيلا؟
لم نصل بعد لهذه المرحلة، ولن نلجأ إليها، والمركز سيكون الحكم في الصراع داخل أجهزة الحزب.
* إذا سلمنا جدلاً بأنك لا تقود هذه المعارضة، فماذا تفعل؟
أنا مراقب فقط، ولست جزءاً من حراك هذه المجموعات، ولكن أي معارضة تحدث لإيلا وسياساته اتهم بها، رغم أنهم شغالين ضده من زمان.
* لكن ما يحدث الآن يحمل بصماتك في العمل التنظيمي، أضف لذلك أنه لم يحدث إلا بعد خلافك معه وانضمامك لمعسكر معارضيه؟
دعني أكون صريحاً معك، لم يحدث شغل كبير ضد إيلا حتى الآن.
* والحصل دا شنو؟!
دا شغل صغير ساي، لكنه استنفد طاقة الوالي كلها وقوَّم نفسه.
* يعني الشغل الكبير لسه قدام؟
المعركة قادمة، ولكن أتوقع أن يتدخل المركز ويضع حدَّاً لكل هذا.
* بإقالة إيلا كما تشتهون؟
المركز قراءته سليمة ومتفهم لما حدث، حتى وإن أتت معلوماته متأخرة، وأنا متأكد أنه سيضع حدَّاً لصالح الاستقرار بالولاية.
* هل يعني ذلك صحة ما يتردد عن أنك بِتَّ مدعوماً بمراكز نفوذ في المركز؟
أنا أعبر عن رأيي فقط، وأقول أكثر من مرة: السياسات الحالية لوالي البحر الأحمر تحتاج لمراجعة.
* ولكنها ذات السياسات التي بدأ بها، والتي كنت يده القوية في تنفيذها؟
أكرر وأقول: عندما كنت معه لم يكن الوضع بالصورة المزرية هذه.
* هل لديك الشجاعة للاعتراف بالأخطاء التي وقعت إبان وجودك معه؟
نعم لديَّ الشجاعة، فنحن بشر نخطئ ونصيب.
*هل أنت نادم على قرار اتخذته أو عمل قمت به؟
أبداً، أنا راضٍ تماماً عن ما قمت به فضميري مرتاح، وقد يكون البعض أساء فهمنا لكن جمهور الولاية يشهد لنا.
* تزامن قرار إسقاط عضويتك مع تعديلات بشأن الإدارات الأهلية خاصة في هيا، هل ذلك بمثابة مؤشر على انتقال الصراع السياسي لاستخدام سلاح القبلية؟
نحن لم نحب أن ندخل القبائل في هذا الصراع، وما حدث قرارات ارتجالية أحدثت بعض المشكلات، ونرجو من الوالي إيلا أن يقوم بتصحيحها حتى لا تتفاقم الأوضاع أكثر.
* إذاً، وصلت علاقتك بالوالي محمد طاهر إيلا مرحلة اللاعودة؟
نعم.
* ألا يشكل ذلك خطورة عليه باعتبارك تمثل (مخزن أسرار) إيلا؟
أنا لا أشكل خطورة على أحد، وما أفعله هو التعبير عن رأيي، من أجل إصلاح الولاية، كما أنه ليس لديَّ أية أسرار، فأنا كتاب مفتوح أمام الجميع، الأمر الثالث هو أنه لم تكن لي علاقة بالجهاز التنفيذي (الحكومة).
* ما هي المعركة القادمة؟
سيسعون لفصلي من المؤتمر الوطني، فقد كان لديَّ عربة باسم الحزب بحكم موقعي كنائب لرئيس الحزب، وهم (شالوها) هسي بعد خدمة عشر سنوات، وسيتجهون لإسقاط عضويتي بالحزب، ولكن لن يستطيعوا فصلي.
* ولكنهم نجحوا في إسقاط عضويتك بالمجلس التشريعي؟
نعم ولقد استأنفت، ولكنهم لن يستطيعوا في الحزب فلوائحه أكثر انضباطاً.
* وإذا مَرَّ القرار؟
إذاً، قل على المؤتمر الوطني السلام.

السوداني


تعليقات 30 | إهداء 0 | زيارات 10629

التعليقات
#1036441 [عبدو]
0.00/5 (0 صوت)

06-16-2014 11:57 AM
هو ممكن اكون بتاع نسوان ( احد صفات بني كوز ) .. لكن كونه نتهمه بالزنا دي عايزه اثبات قاطع ( مرود في مكحله )
كونه قبضوا معاهو البنات في البيت ده ما يثبت واقعة الزنا .. دي ناس البوليس بيسموها اعمال فاضحه ..

[عبدو]

#1036332 [انا السودان]
5.00/5 (1 صوت)

06-16-2014 10:42 AM
اختشى شايل ليك دقن ابيض دجال وعاصى وفى رمضان كمان امشى ربى اولادك وشوف ليك جامع يلمك انت فشلت خلاص ومهما عملت مابتحصل ايلاء ايلاء انجز للولاية انت كنت وين والمابتلحقو جدعو

[انا السودان]

#1035884 [!joi]
5.00/5 (1 صوت)

06-15-2014 11:32 PM
استحي على وجهك راجل فى ارزل العمر و فى رمضان تمارس الدعارة و بكل وجه تقول براءة .. الزنا فى نهار رمضان يا قليل الحياء .. صحيح الاستحو ماتو ... بعد ده شوف ليك زاوية ولا خلوة استغفر ربك و توب لله ..

[!joi]

#1035605 [سيف الدين الجميلى]
5.00/5 (1 صوت)

06-15-2014 05:03 PM
قال تعالى((وَالَّذِينَ يَرْمُونَ الْمُحْصَنَاتِ ثُمَّ لَمْ يَأْتُوا بِأَرْبَعَةِ شُهَدَاء فَاجْلِدُوهُمْ ثَمَانِينَ جَلْدَةً وَلَا تَقْبَلُوا لَهُمْ شَهَادَةً أَبَداً وَأُوْلَئِكَ هُمُ الْفَاسِقُونَ}) [النور:4] بااخوانى اتقوا الله جريمة الزنا اثباتها ليست بهذه السهوله وانكم لتقولون قولآعظيما فجريمة الزنا لوتم أثباتها فالعقوبة على المحصن فهى الرجم
ونحن دولة تحكم بشرع الله وذلك حدمن حدودالله

[سيف الدين الجميلى]

ردود على سيف الدين الجميلى
[محمد أدروب] 06-15-2014 10:51 PM
ملامك كله موافقك فيه بس سؤال...وين شرع الله الحاكمين بيهو هؤلاء القتلة و اللصوص...احداث ثورة سبتمبر ما حامموا فيها ولا واحد...الشباب القتلوا قتلهم جن؟
بعدين هو اتقبض في خلوة غير شرعية و في غرفة مع واحدة و مافي اي رابط شرعي بينهما...ونسة يعني.
دي في حد ذاتها ادانة تخفيه من واجهة المجتمع.
لكن النظام متعفن و كلهم شبه بعض.


#1035538 [محمد حسن]
5.00/5 (3 صوت)

06-15-2014 03:36 PM
ما تسائلو عن الجريمه المرتكبه حقته رايه فيها شنو

[محمد حسن]

#1035514 [واقف براى]
5.00/5 (1 صوت)

06-15-2014 03:13 PM
شكلها تمثيليه شبيهه بتمثيلية السجن والقصر... وتمثيلية انقسام الوطن والشعبى

[واقف براى]

#1035490 [ابوعديلة]
5.00/5 (4 صوت)

06-15-2014 02:38 PM
رمضان قرب يا بلدوزر,أكيد إنت دلوقت فى مرحلة تسخين للعده .

[ابوعديلة]

#1035486 [مرتضي]
5.00/5 (1 صوت)

06-15-2014 02:34 PM
بسم الله الرحمن الرحيم




هذا الذي وجد يزني بمن هن في اعمار بناته ومعه اربعه في نهار رمضان ولو كان في ليله نفس الذنب الله

يكفينا البلاء فبمثل هذا تقع العقوبة....

[مرتضي]

#1035476 [مواطنX]
5.00/5 (2 صوت)

06-15-2014 02:23 PM
يبدو أن هنالك منافسة بين طموحات أصدقاء الأمس،أو أن الوطني من المركز الخرطوم يحاول في الخفاء ادارة هذه المنافسة لصالحه،عموما الظروف ومعايير القياس والمقاييس تختلف كثيرا في كلا من شرق السودان الجافي الغير الرحيم لأهله،وغرب السودان المتوحش الدموي على أهله!،من الخرطوم،والأنقاذ لم تستوعب جيدا مدى ضخامة هذا الأختلاف الذي قد يزيلها من الوجود في ليلة وضحاها اذا توفرت جزء قليل من العوامل المساعدة،منذ انقلابهم وحتى الآن..!

وبصراحة الأمر لا أعلم لم ما زالت الحكومة تتستر على خلافهاالأستراتيجي مع ايلا الى الآن؟كذلك السؤال يطرح نفسه على ايلا ذاته؟!

رحم الله ما تبقى من سياسات رشيدة في هذا البلد!!!!!

[مواطنX]

#1035437 [سعيد]
5.00/5 (13 صوت)

06-15-2014 01:45 PM
قالوا ادروب وجد دفار ممتلئ بالصبايا سال بتاع الدكان . قال ليه البنات ديل كانن في مظاهرة شيوعيات , جاء جنب الدفار وهتف عاش نقد العسكري نظر اليه وثاني هتف عاش الهزب الشيوعي العسكري قال ليه الليلة يا ادروب لو بقيت لينين ما حا تركب الدفار

[سعيد]

ردود على سعيد
[رانيا] 06-15-2014 04:07 PM
ههههههههههههههه الله يجازيك يا سعيد


#1035431 [9999]
5.00/5 (8 صوت)

06-15-2014 01:42 PM
زاني و في رمضان في شهر التوبة والغفران ياعجوز يافاسد ماذا ينتظر اهل بورتسودان منك
انت لو بقت والي حتركب اي حاجة

[9999]

ردود على 9999
[جنرال زمان] 06-15-2014 02:36 PM
هو بلاي دا بتاع الأربعة مومسات في نهار رمضان!!!!!!! صحيح والله اللي اختشو ماتوا. إنتو ملاحظين أنه بتوع الإنقاذ ديل ما بموتو أصله، وسبحان الله اللي بموت فيهم يا محروق في طيارة يا مقطع في عربية يا موسخ في سريره، موت طبيعي زي باقي البشر مافي، لأنهم ديل ما بشر أصلاً ونسأل الله أن يعجل في هلاكهم ومن والاهم


#1035401 [عدو الكيزان]
5.00/5 (2 صوت)

06-15-2014 01:13 PM
ناس السوداني ديل ذاتم ماعندهم اي موضوع ولا سالفة ،، بالله دي هشس شخصية يعملوا معاه لقاء ؟

تفوووووووو عليكم وعلى صباحكم يا كلاب .

[عدو الكيزان]

ردود على عدو الكيزان
United States [كاكا] 06-15-2014 03:25 PM
افهم يا رجل نحنا لمان كنا ضغار لو اتنين اشاكلوا يجي واحد كبير يشل تراب في يده ويقيف بين الاثنين وينتظر لامان واحد يكشح التراب على التاني وتبدأ المعركة والقاءات الذي دي زي التراب في شكلة الصغار فهم يا عدو الكيزان اذا كان اسمك علي مسمى

United States [ابوعديلة] 06-15-2014 02:34 PM
يا عدو الكيزان مع أحترامى لرأيك لكن المقابلة كان لابد منها حتى نعلم كيف يفكر((ده بأفتراض عنده ذرة مخ)) هذا الزانى الوقح الذى لا يستحى ولا يراعى حرمات الله, وفى الواقع كل الكيزان هكذا, شذوذ ولصوصية وعدم ضمير أو أخلاق .


#1035364 [Rebel]
5.00/5 (3 صوت)

06-15-2014 12:37 PM
* زانى..و فاسق..و عينه قويه!!
لعنة الله على "اخوان الشيطان" جميعهم.

[Rebel]

#1035355 [abdallah]
5.00/5 (4 صوت)

06-15-2014 12:28 PM
ادروب ولوف بلاي دي امه تحكمنا؟ نحنا زاتنا خايسين ساي اذا كان الراجل الشايب العايب ده يزني في نهار رمضان- ويجي هسه يقول كلامه دا

[abdallah]

#1035313 [سيمو]
5.00/5 (2 صوت)

06-15-2014 11:57 AM
هع هع الدفع الرباعى،، وفى نهار رمضان يا راجل؟،، و 4 جكس؟،، والله عينك قوية

[سيمو]

#1035255 [ابونصر]
5.00/5 (3 صوت)

06-15-2014 11:01 AM
ان لم تستحي افعل ما تشاء . هولاء الكيزان السلفة الفاسدين الحرامية غرقانيين في الفساد المالي والاخلاقي وعينهم قوية سبحان الله . انا لو في محلك كنت هجرت بورسودان وانزويت في احي ضواحي هياء خجلا واستحياء

[ابونصر]

#1035200 [خالد]
5.00/5 (2 صوت)

06-15-2014 10:09 AM
الذين تظاهروا ضد إيلا ديل ناسي
واحد مقبوض عليه بالثابته في نهار رمضان بالزنا وتم وضعه في الحراسة لمدة يومين ثم اطلق صراحة
باي نفس يتكلم ؟؟

[خالد]

#1035187 [رانيا]
5.00/5 (3 صوت)

06-15-2014 09:52 AM
وياريت القذافي كان عايش .. حسه الليبيين ما ضاربين نفسهم بالنعال !

أما عن هذا الرجل فبقول له ياخي إذا بليتم فاستتروا وإنت بعد ده كله عينك قوية ولسانك طويل !
بالعكس أنا أحييه إنه زحلقك في أقرب فرصة سنحت له أحسن مما نشوفك قاعد ونتذكرك كل رمضان ونقول ...( متعودة دايما ) ...

[رانيا]

ردود على رانيا
United States [رانيا] 06-16-2014 12:48 AM
لا عندي مصلحة ولا ساذجة وأحمد الله والساذج هو المفتكر إنه بديل إيلا حيكون رجل صالح وفاهم ومتعلم يا خواننا إنتوا عايشين المدة الطويلة دي كلها وما فهمتوا حاجة ؟! ما تخافوا ندعي ليكم بتعيين كبر ولا أي واحد من الهلافيت إياهم ..

[محمد أدروب] 06-15-2014 11:07 PM
ايلا اتعمد اخفاء خريجي الولاية حتى لا يتفوقوا عليه و جاء بالمفلسين علميا و اخلاقيا عندما تم تعيينه بدلا عن حاتم الوسيلة شال مفاتيح الوزارات في جيبه و لو عايزين يشحنوا كهربة الا يشحتوه دمر شركة الثغر الهندسية التابعة للحكومة و التي بناها و أسسها المهندس هاشم طاهر شيخ طه (خريج جامعة الخرطوم في السبعينات و حاصل على شهادات من الولايات المتحدة) خلق و أمانة بناها و صارت مثل (الأشغال...زمان) تقوم بكل الأعمال الحكومية و رصف الطرق...اول حاجة دمرها ايلا و جاب واجهات ليبني امبراطوريته و أبعد كل المتعلمين من أمثال هاشم طاهر و حامد وكيل (دكتوراة في هندسة الطرق من بريطانيا) لملم الصعاليك عشان يحركهم زي ما عاوز و ما غريبة يقبلوا عليه لانهم عارفين البير و غطاها...الولاية مليئة و السودان بالخبرات المتخصصة و النظيفة حكاية البديل منو و حنندم دا كلام فارغ لا يصدر الا من شخص لديه مصلحة من الوضع الحالي او ساذج.

[رانيا] 06-15-2014 01:39 PM
أهلا أخي أبو وسلامتك من الإنتحار وحاشاك وكلاك إنت ما بتعمل ذييهم ديل صنع خصيصا للمؤتمر الوطني .

مرحبا أخي الغلبان وكلامك قوي ما شاءالله وأنا إتكلمت بالمطلق يعني دخلوا عليهم ناس الإسلام السياسي دخلوا عليهم الهكسوس في الآخر " سرقت منهم الثورة " ذي ما بيقولوا المصريين وحللّك على بال ما يقدروا يقفوا على أرجلهم من جديد . والرجل راح لكن وإلى يومنا هذا بسأل ناس من مواليد ليبيا وساكنيها ومن كافة الجنسيات وبيشكروا في القذافي وبيقولوا كانوا في عهده عايشين نعيم !!

الآن نقول إيلا راح ولا للخنوع ولا للهيمنة ولا للإستبداد ولا لل وللا لل أها وبعدين ؟ يا عزيزي فكرك في العهد الحالي ده حتلقى خير من كائنا ما كان ! يا عزيزي إنت صادق وشفاف زيادة عن اللزوم والحمد لله إنه لسه في ناس مثلك بنقاء سريرتك وبحسن ظنك ...
تحياتي لكما .

[الغلبان] 06-15-2014 11:44 AM
نص صح نص خطأ الليبيين ليس ضاربين نفسهم بالنعال الليبيين دخلوا عليهم جماعة الاسلام السياسي وبوظوا عليهم ثورتهم اما ان نستكين لانظمة مثل هذه فهذا هو الخنوع يا ستي وزي ما انتي شايفه هم ابتلوا ولم يستتروا وبقولوا لينا طظ التي كان يقولها القذافي لشعبه ولامريكا

European Union [ابو] 06-15-2014 11:05 AM
انا لو كنت محل هذا الداعر كنت انتحرت لكن بالنسبة للكيزان عادى ما فى اى خجل


#1035180 [ودالنعمة]
5.00/5 (2 صوت)

06-15-2014 09:44 AM
صراع بنات الهوى ... يما حنشوف ونسمع الكثير والكثير
..
..
اللهم سلط الظالمين على الظالمين واخرجنا من بين ايديهم سالمين
حسبى الله ونعم والوكيل ...

[ودالنعمة]

#1035172 [adrob2]
3.00/5 (3 صوت)

06-15-2014 09:33 AM
نتمني كل الولاة يكونو علي مستوي ايلا علي الاقل تكون مدن نظيفة يستطيع المواطن ان يخرج ويتفسح عشان يطلع من الضغط والكبت والزهج - اما الاصلاح والديمقراطية والعدل والشفافية الشعب السوداني قنع وفتر وارهق من المعارضة وحملة السلاح ولحكومة- علي الاقل تكون المدن نظيفة

[adrob2]

ردود على adrob2
United States [Mohamed] 06-15-2014 11:05 AM
وهل الدن النضيفه بتاكل عيش ؟اهل بورتسودان كلهم نزحو مدينه مافيها مويه مافيها علاج نسوي بي نضافتها شنو بعدين بورتسودان من عشرات السنين وهي نضيفه من جوه وبره بس ناس ايلا واصحابه هم الوسخين بي عمايلم دي وفي رمضان كمان ياتو نضافه تتحدث عنها والناس جعانه؟


#1035171 [محمد عثمان]
5.00/5 (2 صوت)

06-15-2014 09:33 AM
ما اعرفه هو ان من له سابقة جنائية او اخلاقية يكون له حدود ضيقة للحراك . فكيف يكون رجل له سابقة جنائية ومع ذلك يكون له كل هذا الشأن ؟؟؟؟

[محمد عثمان]

#1035163 [د. ابوبكر]
5.00/5 (1 صوت)

06-15-2014 09:23 AM
لا اعلم كيف تم انتخابه وكيف ترقى الى هذه المناصب.. امثال هؤلاء مكانهم السوق الشعبي وليس المنابر السياسية وتمثيل المواطنين
هذا الاسلوب ليس باسلوب شخص يمثل فئة من المواطنين..
الله المستعان..

[د. ابوبكر]

ردود على د. ابوبكر
European Union [انا] 06-15-2014 11:51 AM
والله جد للاسف الاسيف مستوانا اصبح في الحضيض وسودوا وشنا قدام العالم شوف بس فضايحهم شكلها شنو لا حول ولا قوة الا بالله العلي القدير

[المغبون] 06-15-2014 11:00 AM
اعتذر يادكتور لقد أسأت للسوق الشعبى ولمن فيه من التجار الشرفاء النظيفين ليسوا امثال هذا الفاسد واعوانه الذين لايملكون زرة من الحياء .

[عبد القادرشيخو] 06-15-2014 10:33 AM
يامن اسمك د ابوبكر السوق الشعبي ماله هو مكان لاكل لقمة العيش الحلال فليس من حقك توصيفة بعين الاحتقار


#1035150 [غاندى]
5.00/5 (4 صوت)

06-15-2014 09:05 AM
من الؤسف الاثنان ايلا والبدوزر هم من اصلوا القبليه فى شرق السودان ولا يستحى محمد طاهر حسين عندما يقول ديل ناسى فى هيا هم قبيلة الجميلاب وليس (الكليت) القورهباب والغروب شرقا دروديب الهاكولاب وغربا الى مسمار هذه القبائل كان محمد طاهر حسين حاول عزلهم وسلب مواطنتهم كسودانيين وهذه مشكلة قياديي الشرق انهم يحتمون بقبائلهم عدم اعترافك بالمواطن الاخر كسودانى هى مشكلة السودان فى زمن الانقاذ الانتماء جهوى وقبلى كما قال الشنبلى والى النيل الابيض انا انسحب من المؤتمر الوطنى ومعى قبيلة الشنابله فليقل البلدوزر هذه المقولة ويريح باله النصيحه لا تنفع العليقه وقت الغاره الخيل عركسن شيل شيلتك ووب واي ماتنفع

[غاندى]

#1035149 [مراقب]
5.00/5 (3 صوت)

06-15-2014 09:02 AM
يا البلدوزر يا العارف ومطنش ما بتفتكر الوالي ايلا بعد ان رفض طلبات المؤتمر الوطني المتكررة والمستمرة بتحويل صندوق دعم المانحين لاتفاق الشرق الي المركز ورفضه لهم ايضاً على توطين ( البدون الكويتيين في الشرق ) مقابل مبلغ مالي ضخم يذهب لصالح المركز المتعطش من الفلس والدولارات بعد ان رفض لهم ايلا كل ذلك تم تكليفك بتنظيم المظاهرات والتعبئة ضده هو سبب اقصاءك برافو يا ايلا نحييك على هذه المواقف الشجاعة

[مراقب]

#1035131 [كتاحة امريكا]
5.00/5 (1 صوت)

06-15-2014 08:47 AM
ماذا فعل ايلا لولاية البحر الاحمر ؟؟

كعادة المؤتمرجية استنفع اكثر مما ينفع ؟؟

[كتاحة امريكا]

#1035117 [المشروع]
5.00/5 (1 صوت)

06-15-2014 08:28 AM
كلكم ملة واحدة في الظلم والفساد ولا يوجد من بينكم رجل رشيد لأن حزبكم اصلا قائم على اكل حقوق الاخرين السياسية والاجتماعية ويقوم على السترة وتغطية فسادكم ونياتكم الفاسدة
الله يكفينا شركم

[المشروع]

#1035088 [عمر]
5.00/5 (1 صوت)

06-15-2014 07:18 AM
قال يتدخل المركز ... المركز ما تدخل عندما كان الطرف الاخر ابو علي وكجر علي موسي وفقراي وحبيب الله وبامكار وهاقواب وعشرات اخرين يتدخل عشانك قوم لف . وانت قراراتك زمان ما كانت اخنق فطس اختشي يااخي وخلي عندك حياء....

[عمر]

#1035086 [مختار الحاره]
5.00/5 (1 صوت)

06-15-2014 07:14 AM
انت خير مثال للطغمة الفاسدة الحاكمة واتفه ما خلق الله لعنة الله عليك وعلى امثالك يافاسق بافاجر فى رمضان تزنى ومع بنات فى عمر اولادك
وعينك قوية كمان لا تستطيع لوى عنق الحقيقة التى اثببت عليك صوت وصورة يامن اساغللتم الدين لخدمة مصالحكم واستغلاللا الضعفاء لارضاء نزواتكم. احرى ان تعتكف فى بيتك بقية عمرك وتطلب مغفرة ربك الله واكبر الله اكبر عليكم ويا وحوش

[مختار الحاره]

ردود على مختار الحاره
[الغلبان] 06-15-2014 11:49 AM
ولو ربه كان ربي ما بغفر ليه لانه استغل دين ربي اما ان كان ربه غير ربي دي انا ما بعرفه (غلوتيه صح) الهم اخرجنا عن دين الكيزان وادخلنا في دينك (ليس المقصود حرفيا واللبييب بالاشارة يفهم)


#1035052 [ركابي]
5.00/5 (3 صوت)

06-15-2014 04:11 AM
الظاهر ناس الانقاذ ادفدغوا في بعض ...ربنا يخلص السودان من البلاوي دي ..هسع الزول ده بعد فضيحة رمضان كان ينزوي ويعتكف

[ركابي]

#1035030 [حكم]
5.00/5 (2 صوت)

06-15-2014 01:03 AM
كلهم كدا .. يا فيها ، يا افسيها
على وعلى اعدائى
نفس منطق الترابى والبقية

[حكم]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة