الأخبار
أخبار إقليمية
الأمين العام للمريخ : دوافع نشر المقطع ضد الوالي عمل خبيث وساذج
الأمين العام للمريخ : دوافع نشر المقطع ضد الوالي عمل خبيث وساذج
الأمين العام للمريخ : دوافع نشر المقطع  ضد الوالي عمل خبيث وساذج


06-17-2014 12:58 AM

الخرطوم
في تعليق للأمين العام عن المقطع المتداول في مواقع التواصل الاجتماعي، بشأن رئيس مجلس الإدارة جمال الوالي، في مقابلته بقناة قوون الفضائية، علق بأن دوافع نشر هذا المقطع معلومة للجميع، وهو عمل خبيث وساذج، لأن التسجيل الكامل وسياق الحديث مسجل بقناة قوون، ولا يحتاج لاجتهاد، وأن الأمر يسيء في المقام الأول لمن يقف وراءه قبل أن يسيء لمن حاولوا التهكم عليه.
وناشد الأمين العام كل المنتسبين للكيان المريخي تضافر جهودهم مع مجلس الإدارة لتهيئة بيئة داخلية صالحة، لقطف ثمار النجاح في فترة التسجيلات، وذلك بإحسان فترة الإعداد لمقابلة استحقاقات المرحلة المقبلة، وذلك لا يتأتى في ظل ما يدور حالياً من انقسامات وخلافات، شملت بعض الإعلام المريخي وعدداً من الإداريين السابقين وبعض قيادات تنظيمات المشجعين.
ودعا الأمين العام كبار أقطاب المريخ ورموزه وقياداته التاريخية، للقيام بمبادرة للمِّ الشمل المريخي، وقال: "إنه في الفترة السابقة قال كل طرف ما يود قوله ولم يتبقَّ شيء ليقال"، كما أن مجلس الإدارة في المرحلة السابقة، قام بتنفيذ خطة ضخمة في مختلف محاور بناء أندية البطولات شملت (المنشآت والبنية التحتية، الاستثمار والتسويق الرياضي، الإدارة التنفيذية، اللوائح ونظم العمل، البناء الفني لفرق كرة القدم الأربعة). والمرحلة القادمة هي لمزيد من تجويد العمل الذي تم والمحافظة عليه، وذلك لا يتم إلا بتضافر الجهود والعمل الجماعي والدعم المادي.
وناشد الأمين العام الإعلام الرياضي بعدم تضخيم فترة إعداد فريق كرة القدم الأول، والتعامل معها بصورة عادية، مع عدم تعلية سقف الطموحات، خاصة أن المريخ يمر بمرحلة إعادة بناء سجَّل خلالها عددا من اللاعبين صغار السِّن، وفق معايير بناء أندية البطولات والتي ستظهر نتائجها تدريجياً.
وطالب الأمين العام بتخفيض الجرعة الإعلامية على لاعبي فرق المراحل السنية بالرديف والشباب، باعتبارهم رصيد المستقبل للفريق الأول، ويجب بناء قدراتهم وتطوير مستوياتهم بعيداً عن الهالة الإعلامية التي أضرَّت ببعضهم في الفترة الماضية.

السوداني


تعليقات 54 | إهداء 0 | زيارات 13812

التعليقات
#1037964 [مجروس ق ش م]
5.00/5 (1 صوت)

06-18-2014 03:11 AM
والله انا مربخابي علي السكين من سيكافا 86 وانا ساكن في أستاد المريخ ما فوت مباره محلية وﻻ دولية اﻻ حضرتها ولكن من ماجاء جمال الوالي ودخل لينا مال السحت اﻻ ودخل علينا بالساحق والمحاق ولكن مادام الهﻻل ايضا دخل دائره السحت فعلي كره القدم في السودان سﻻم

[مجروس ق ش م]

#1037950 [النورس]
0.00/5 (0 صوت)

06-18-2014 01:49 AM
انت امين عام للمريخ ولا امين عام لجمال الوالي ؟
المريخ العظيم لا علاقة له بسقطة جمال الوالي لان الوالي لم يسقط في المجال الرياضي بل سقط سقطة لاتتناسب وانتماؤه للحزب العقائدي القائم على اساس الدين الاسلامي ونحن المريخاب لايشرفنا ان يكون رئيس اكبر نادي في السودان جاهل دينيا ضعيف المعرفة بالثقافة الاسلامية ، رحم الله رجالات المريخ العظام اللذين رحلوا عن الفانية شاخور وابوالعائلة ومهدي الفكي وعبدالحميد الضو حجوج والفاتح المقبول .... الخ ليتركوا الساحة خالية يسرح ويمرح بها الوالي ومن نصبوا انفسهم وكلاء للدفاع عنه .

[النورس]

ردود على النورس
[بتاع بتتييخ] 06-18-2014 09:18 AM
والله ما قلت الا صوابا هذا الصعلوق يهدف الى استغلال جماهير المريخ للتستر على ما بدر منه من بذاءة واستهتار بالاسلام ويستاهل والشي التانى العمل دا بسيء ليو هو بس يعنى متوقع من الصحافة انها تستر عليو ؟


#1037940 [ود الفاضل]
5.00/5 (1 صوت)

06-18-2014 01:34 AM
بدون كضب وكلام فارغ اولا مافي اي اية فى القرءان الكريم تتناسب مع مضمون المثل الشعبي الشهير فى السودان ( العارف عزو مستريح) وهذا الوالي لايعرف كوعه من بوعه فى القرءان او الدين بصفة عامة فهو واحد من النباتات الطفيلية التي نبتت فى ارض الانقاذ المالحة وادت الى تسمم كل الاشجار المثمرة ( رجال الاعمال ) الكانوا معروفين فى جميع انحاء السودان . ولهذا عليه ان يعترف بانه جاهل بالقرءان تماما ، وانه كان يعتقد ان المثل الذي اورده على الهواء هو اية قرءانية .. وهي الفضيحة المدوية تماما كفضيحة البشير بعد ان اعترف بعد عامين من نظام الشؤم بانه كذب على الشعب كله مع شيخه الميكافيلي . وبعد ربع قرن من الزمان اصبح النظام يشيل فضيحة ويخت فضيحة ، واصبحت سمعته زي جلابية الدرويش كلها رقع وقدود . واخيرا اصبح النظام جنازة بحر ، ومافى زول داير يتولى دفنها .. ومبروك قالوا الامام طلع !!!! البلد اصبحت ملطشة ، والسيد/ صلاح دولار اذا كان على قيد الحياة اسألوه من سعر الدولار فى عمارة الاخوة بي كم ؟؟؟؟؟!!!!! والتحية للرائد يونس فقد حصد السودان ثمار حديثه السياسي الصباحي (امريكا دنا عذابها) واصبح الدولار الامريكي يملأ القفة جنيهات سودانية صافية ..واحسرتاه على بلد كانت لقمة العيش فيها ارخص شيء فاصبحت فى عهد الانقاذ غاية الامال ...

[ود الفاضل]

#1037935 [مهند]
5.00/5 (2 صوت)

06-18-2014 01:12 AM
يا ناس
خبيث وسازج
الكلمتين لا يمكن استخدامهن في نفس الجمله لانو معانيهم متتضاربه
عرفناكم قران برضو عربي ما عارفين !!!!!

[مهند]

#1037895 [Xmanما]
0.00/5 (0 صوت)

06-17-2014 11:08 PM
المشكلة مافى زوول قرصو قال ليو دخل القران فى الموضوع يعني كان ممكن يتكلم كلام عادي مادام راسو فاضي او ما بعرف يتكلم...
بس الكيزان صدقوا الكذبة حقتم و مصدقين انهم شيوخ ههههههه ...المهم واصلوا سرقة قبل ما الموضوع يبوظ !

[Xmanما]

#1037865 [ود الدلنج]
0.00/5 (0 صوت)

06-17-2014 10:02 PM
يعني لا كاتب المقال ولا أخواننا المعلقين ما في احد من وضح لنا موضوع الفييو والاجل قل فيه شنو ؟ أو عمل شنو؟ طبعاً حنقدر نعلق . أرجو أن يتبرع أحدكم تدوين الحصل بالضبط كل تفاصيله

[ود الدلنج]

#1037761 [كسار الثلج]
5.00/5 (1 صوت)

06-17-2014 07:30 PM
هذا الاعراب المسمى الوالي لا يصلح حنكوش ولا يصلح مولانا. شوف الشعر المبروم بالجل والوجه مثل وجه من يبيع اللبن على ظهر حمار.

[كسار الثلج]

#1037711 [مواطنx]
5.00/5 (2 صوت)

06-17-2014 06:30 PM
معليش فلتعذرنا! لم نكن ندرك بأن الوالي مرفوع عنه القلم وأنت كذلك أيها الأمين اللبيــــــــــب!

[مواطنx]

#1037684 [ayman]
5.00/5 (1 صوت)

06-17-2014 05:59 PM
لو فى عدل مفترض ي حاكم بس فلاحتكم الماعندو ضهر الله ضهركم ينكسر ي مؤتمر

[ayman]

#1037659 [بركوتا]
5.00/5 (1 صوت)

06-17-2014 05:17 PM
رد على حليمه وجزمتها قديمه ؟؟؟

انت يظهر عليك جزمة قديمة مش جزمتك قديمه وانت فى الجزم بوت قديم .

[بركوتا]

#1037642 [ابوعديلة]
5.00/5 (3 صوت)

06-17-2014 04:53 PM
بدلا من التبرير السخيف وكسير التلج الكتير كان على الوالى وماسحى الجوخ الذين من حوله أن يعتذروا للخطأ ويا دار ما دخلك شر وكل أبن آدم خطاء..لكنها المكابرة والعزة بالأثم...الوالى ما بيغلط . طز فيكم وفى واليكم .

[ابوعديلة]

#1037604 [حليمه وجزمتا القديمه!!]
5.00/5 (2 صوت)

06-17-2014 04:11 PM
اﻻمين العام النكره ده كان نفسوا يشتهر !! ما عايهو غير التوجه ﻻستوديوهات قوون وينجر ليهو آيه او آيتين من راسو ودى الوسيله الوحيده التى تشهر أمثال هؤﻻء النكرات وتخرجهم لﻻضواء حتى يعرفهم الناس على حقيقتهم ويتعاملون معهم بما يستحقونه ورفعت اﻻقﻻم وجفت الصحف فهؤﻻء هم ثمرات ربع قرن من التسلط على رقاب عباد الله الذين يمشون فى اﻻرض هونا بإسم الدين الحنيف الذى يحاول البعض تحويله الى مسخره وهم ﻻ مؤاخذه ﻻ يستطيعون التفريق بين (طظ وسبحان الله!!) ،،

[حليمه وجزمتا القديمه!!]

#1037589 [مازيل تنيبور]
5.00/5 (1 صوت)

06-17-2014 03:58 PM
الظاهر والله واعلم انو جمال الوالي كان داير ينبز الفارة داك وداير يقولو ( إن جاءكم فاسق بنبأ فتبينو …. ). او شعر اذا اتتك مذمتي من ناقص فتلك الشادة لي باني كامل ..وبعدين لقى الكلام قاسي شوية وما من طبعو لانو انسان حيّي ومالقى غير هذه المقولة الشعبية مما احدث الربكة والسبب هو احترام وحياء الوالي

[مازيل تنيبور]

#1037541 [sakarota]
3.50/5 (2 صوت)

06-17-2014 03:07 PM
يااخوانا المستغربين ليها شنو احمدو ربناالفضحو ليكم لو لقيتو في بني كوز واحد فطرته سليمة ورونا ليهو وبعدين كلهم عندهم البدافعو عنهم هسة كمال عمر دا غبيانين منو مابدافع عن الخارجي الترابي ولاطه الملقب ببانكس بتاع ابجاعورة ولامماليك الطائفية كلهم ما سوا امين عام شنو ياخوانا سمعنا انو لو الواحد عايز ليه شاهد زور علي حسب نوع القضية بتلقاه بي كل سهولة بس اهم شئ المعلوم 76

[sakarota]

#1037527 [عصام بيرم]
5.00/5 (1 صوت)

06-17-2014 02:53 PM
هههههههههههههههههها هههههههههههههههههههههههههههههههههههههههها ههههههههههههههههههههههههههههها

[عصام بيرم]

#1037405 [ودالشريف]
3.00/5 (2 صوت)

06-17-2014 01:05 PM
تبا لك فانت وجمال الوالى لا تستحقون ان تنتمون للمريخ مادخلك انت وما ذكر ونشر يتحمله الوالى بصفته عضو مؤتمر وطنى فاسد فما دخل المريخ فى ان تقحمه فى مثل هذا السقوط للفاسد الذى لايستحق حتى الدخول او النطق باسم المريخ ولماذا تحاولون بل حقا انت وامثالك انتهازيون دمرتم المريخ والان تقحمونه فى السياسة اتركو المريخ لاهل المريخ الشرفاء واذهبو انتم وجمالك الى مزابل التاريخ فانتم لاتشبهوننا ولستم منا انتم انقلابيون باليل وحتما ستذهبون وسيعود لنا مريحنا الذى نحب ونعشق من هو هذا الوالى ومن من اهل المريخ الشرفاء كان يعرفه قبل ان تدسه الانقاذ بل هى الدمار فى نادى المريخ ليدمره ويكتسب الشهرة على اكتاف المريخ تبا لك وتبا له ولكل اروقى رخيص

[ودالشريف]

#1037399 [نكس]
5.00/5 (1 صوت)

06-17-2014 01:03 PM
الله يدينا قروش عشان نقري ليكم الفاتحة بالصيني وبرضوا في ناس بيقولواا ااميييين - الزول كان ركز وقال قال تعالي بسم الله الرحمن الرحيم وبعديين استدل بالاية مالوا - او قال كما قال المثل السوداني العارف عزوا مستريح مالوا -- بس عدم الثبات والتركيز دا الضرا الكورة السودانية ونادي المريخ وجمال الوالي

[نكس]

#1037390 [محمد سعيد]
5.00/5 (3 صوت)

06-17-2014 12:58 PM
فليذهب المريخ للجحيم ،
البلد دمرت تماماً ، البنى التحتية، التعليم، الصحة ،الخريطة الديموغرافية، السكك الحديدية، النقل النهرى، النقل الميكانيكى ، المخازن والمهمات، مشاريع الإعاشة بالنيل الأبيض والأزرق ،مؤسسة جبال النوبة لإنتاج القطن المطر قصير التيلة، مشروع الجزيرة وملحقاته من رى ،سكك حديدية، محالج، الغابات المروية، كما دمر هؤلاء مشاريع خشم القربة، مسروع الرعد الزراعى ،مشروع حلفا الجديدة الزراعى، مراكز البحوث الزراعية والبيطرية التي كانت منتشرة فى بلادى الصمغ العربى، وثروتها الحيوانية، والهجرة الغير مسبوقة لعقوك بلادى فى شتى أنحاء المعمورة
اما من الناحية الاجتماعية عم النفاق والكذب، وأكل مال الغير بدون وجه حق، تفشت الدعارة واللواط والفقر المعاب،
الأبالسة ضخوا أموالا ضخمة للمجال الرياضى ويتم صرفه عبر متنفذ النصام كالشيخ جمال الدين وذلك حتى يضمنوا الشريحة الرياضية الى جانبهم، وكذلك المشجعين
أيها الأمين العام وانت تعلم تمام العلم ان هذه الأموال التى يقدقها هذا الافن بن عبد الله بن سلول هى أموال هذا الشعب المغلوب على أمره بواسطة تنظيم الاخوان الماسونى
أيها الأمين العام اى مبلغ من هذا الكوز لخاصتك انت اعلم انه مال هذا الشعب، مال المرضى والمساكين، مال اهلى فى جبال النوبة، والنيل الأزرق، دار فور الذين يمطرون بوابل حمى قنابل الانتنوف والسخوى، وبنادق مرتزقة مالى والنيجر بقيدة
وأختم قولى بقران ولى نعمتك، العرف عزو مستريح ،، اى كما قال

[محمد سعيد]

#1037386 [طه]
5.00/5 (1 صوت)

06-17-2014 12:53 PM
انا بكرة الكيزان ومعترف انو م فى رياضة فى السودان و م بعرف الوالى الا صور بس انتهى ى حااااقدين ى متصيدين الفرص دى زلت لسان والراجل كان منفعل الله م بحاسب عليها تجو انتو ى جهلة تفتو فيها انساكم كرهكم للكيزان الانصاف والعدل والله كل متصيد لكلو السودان بقى م فيهو خير بكرة بكرة بكرة المعارضة للمعارضة والمناصب كلكم ى جهلة بتغلطو وكلكم بتفترو ع الله كزبا يوم تدافعو عن مريم بحجت الكيزان م عادلين واصلا فى نصوص عن قتل المرتد عن دينة واليوم تجرمو الوالى عن زلة لسان ى اخوان الكيزان فى الحكم والمنطق م فى اختلاف بينكم كلكم بتكفرو وتخونو كل انسان ع الاختلاف ف الفكر

[طه]

ردود على طه
[النورس] 06-18-2014 02:03 AM
انت عليك كثير ياطه لحدي ماتصل للمستوى الفكري اللي يخليك تعلق في الراكوبة !
وعليك اكثر لحدي مايكون لديك الدراية الكافية للتفرقة بين الزبد وبين ماينفع الناس ، وحاول كمان تحسن من مستوى الكتابة الاملائية بتاعتك ( انت بتعلق في موقع اسفيري ) يعني العالم كلوا بشوف فيك

European Union [الرد علي طه الدلاهه مرة اخري] 06-17-2014 08:23 PM
يا طه انت البديت الشتيمة بوصفك لخلق الله بالجهلة و الجهل ما فايتك انت و الوالي بتاعك المرة الجاية خليك زول محترم عشان نرد عليك باحترام وشكرا .

[ابوعديلة] 06-17-2014 04:48 PM
يا أخ طه باين عليك فاقد تربوى .أمش بالأول أتعلم كيف تكتب باللغة العربية بعد داك ممكن تجى (تكسر التلج) (وتقدنا)زى ما إنت عاوز .

[طه] 06-17-2014 04:39 PM
اولا مشكور ع التصحيح الاملائى بس دى من الاستعجال م مهم ومشكور ع الشتيمة كمان م مهم انت خليك فى المؤضوع انا لا بهمنى الوالى ولا الرئيس دا اصلا شغلكم زى العيال شتائم وسب

European Union [الرد علي طه الدلاهه] 06-17-2014 03:20 PM
يا طه يا دلاهه انت تصف الناس بالجهل و انت الجهل يمشي علي اثنين اولا دعنا نتصيد اخطاءك الاملائية كزبا ليست هكذا بل هكذا كذبا ثانيا بحجة و ليست بحجت مش اول تمشي محو الامية تتعلم الكتابة و الاملاء و بعدين تقول للناس جهلة ؟ بعدين سيدك الوالي زي ما طلع في قناة قوون ممكن يطلع ينفي الكلام ده او في واحدة من الجرايد بتاعتو الحاجة الثانية اي اية في القران الكريم بمعني العارف عزو مستريح ؟ طه ابريالة اذا كان الكلام من فضة فالصمت من دهب دي ما تفتكرها اية قرانية ههههههه


#1037382 [Mohamed]
5.00/5 (1 صوت)

06-17-2014 12:49 PM
يا أيها (الساذج) حضرة الامين العام،
يا خوي هوي .. هوي... خليك من سذاجتنا وبلادتنا وقرفنا إحنا...
وأهتم بتربية وهداية صاحبك ...
حتي يتطهر ويتسغفر ويتوب الي ربه ..
فهو غفار الذنوب عند الزلل ...
وليس نحن ... جماهير القراء المفتقرين الي رحمته..
إتقي الله وتوب اليه وأصدر بيانا مرفوعا الي المولي عز وجل
وإلا فسوف يأخذكما أخذ عزيز مقتدر
ويسقطكما من عليائكم الكذوب ، وينزع أموالكم.. أمواله التي تتباهون بها
فتفقروا وتذهب ريحكم في الدنيا
وفي الآخرة فسوف تردوا الي قاع جهنم والعياذ بالله..

[Mohamed]

#1037370 [فائز العاقب]
5.00/5 (1 صوت)

06-17-2014 12:38 PM
هكذا الأهبل يدير نادي المريخ
بالكذب والضلال والرشاوي
لكن تصل مرحلة تحريف
تذكروا جلدكم لفتاة الفيديو
وقارنوا بين الإثمين
والله إثمكم أعظم
بس ربنا يمهل ولا يهمل
وشفنا ما حصل للدنماركي مسئ الرسول

[فائز العاقب]

#1037363 [مراد عالمدار]
5.00/5 (1 صوت)

06-17-2014 12:31 PM
سبحان اللة من الشعب السوداني في كلام جمال الوالي الدخل الهلال او المريخ او الحقد شنو الراجل قال قال سبحانو وتعالي. يتحمل مسؤليتة كلامو هو وقت ما قادر يفرق بين مثل واية قرانية بيتكلم لية

[مراد عالمدار]

#1037353 [omo]
5.00/5 (1 صوت)

06-17-2014 12:21 PM
الاخ مريود

في الآية التي اوردتها قال تعالى : ( ولآتيناه من كل شيء سببا ) الصحيح انها بدون لام (( وآتيناه سببا ))وليست (ولآتيناه ) نرجوتوخي الدقة لأنه لا يجوز أي زيادة أو نقصان لإي القرآن حتي ولو كانت حرفا.

نشكركم ونستميحكم عذرا ونطلب حلمكم

[omo]

ردود على omo
[جلد الفيل] 06-17-2014 04:14 PM
تمام الآية في سورة الكهف {إِنَّا مَكَّنَّا لَهُ فِي الْأَرْضِ وَآتَيْنَاهُ مِن كُلِّ شَيْءٍ سَبَبًا ( 84 } يا OMO مع التحية


#1037349 [brins]
5.00/5 (1 صوت)

06-17-2014 12:19 PM
ياخي ده ضحك الناس عليه بيقول ربنا سبحانه وتعالي قال : الي عارف عزه مستريح .

[brins]

#1037313 [سوداني وبس]
5.00/5 (1 صوت)

06-17-2014 11:44 AM
الشغلة ما محتاجة بيان وللا غيرو اذا عندكم المقطع كامل انشروه بنفس الطريقة وبس

[سوداني وبس]

#1037269 [حلفنكو]
5.00/5 (1 صوت)

06-17-2014 11:13 AM
كضاب ما تسمعو كلامو .. مريخ شنو وهلال شنو .. الفساد ايضا ضرب الانديه كمان .. اصلو ميين جمال الوالي دا طلع من فين دا عهد السقاطة .

[حلفنكو]

#1037262 [الغلبان]
5.00/5 (1 صوت)

06-17-2014 11:04 AM
يا ربي عمل خبيث على ربنا والا على السودان والا على المريخ اه يا بلد مريخابي غلبان

[الغلبان]

#1037256 [ود برى]
4.00/5 (3 صوت)

06-17-2014 11:01 AM
يا اخوانا جمال الوالى كما رايتة وشاهدتة وسمعتة ليس بالمستوى الدى تتحدثون بة سمعتة فى مواقف كثيرة متحدث لبق سلس العبارات يستدل كلامة بكثير من الايات القراءنية اتصلت بمن هو على صلة منة الراجل كاد ان يستدل باية قراءنية تحمل صفة المنافقين ولكنة قرر ان يسحبها فدكر هدا المثل فظهرت بهدا السياق لاحملوا الرجل اكثر من هدا فالرجل ظهر لة مليون عدو ومليون شامت الوالى ليس حاقد ولم يضر احد اختلفوا معة فى المريخ والمؤتمر الوطنى ولكن بدون كراهية

[ود برى]

ردود على ود برى
[المستعرب الخلوى] 06-17-2014 02:52 PM
يا ودبرى .. جمال الوالى قبل ورضى ان يكون شخصية عامة والشخصيات العامة عليها المحافظة على كل ما تقول لأنها محاسبة على كل كلمة وإلا كلويجى ويبقا شخصية عامة ويبرطع زى ما عاوز ..
واسالك سؤال ليه الناس أطلقوا على السيد وزير الدفاع بالنظر ؟؟ لأنه وزير وفرض نفسه بالقوة يكون شخصية عامة وبالتالى لابد من محاسبته على اقواله .
ويبدو انا فى عهد الإنقاذ وقد تبدلت الأمور وصار كل رويبضة له شان .وصار اللص هو الشريف ..وسيادة جمال الوالى لم يخطىء فى قول عادى بل فى أخطأ فى شىء عظيم ألا وهو كلام الله ولك يقلها فى مجلس أو إجتماع مصغر بل قالها فى مرفق إعلامى واسع وسمعه الكل ..والان تحاولون ان تجدوا له العذر ؟؟ على جمال الوالى أن يكون قدر المسئولية ويعترف بالخطأ ويعتذر عنه وإلا فللكل الحق فى التندر عليه حتى يعتذر ..
قرفتونا الله يقرفكم ..يا شيخ ..

European Union [ابقو الصمود] 06-17-2014 12:46 PM
كلامك في الصميم الموضوع ما يستاهل النقه دي كلها


#1037250 [الشيخ مصطفى]
4.00/5 (3 صوت)

06-17-2014 10:56 AM
بسم الله الرحمن الرحيم

بداية - الاخ جمال الوالى رئيس نادى المريخ

نحن فى هذا المقام نتحدث عن شخص يعمل رئيس للنادى رياضى وهو ليس داعيه دينيه او فقيه
اذا نعيد الامر الى انه غير ملام كما يلام داعيه او فقيه ولعل الاخ جمال الوالى كان فى شحن كبير بسبب
ما يدور حوله من دسايس ومكايدات كنا نعرفها مخفيه ولكن فى الاونه الاخيرة خرجت للسطح وبداة بغيضه
ولاعلاقة لها بالرياضه .

لا احد يستطيع ان ينكر ان الاخ جمال يعد من رؤساء الانديه العالميه لسبب بسيط انه قدم للنادى ما يقدمه اى رئيس نادى فى العالم لايقل عنهم شئيا واعتقد ان العالميه اذا بداة مغازله من الاخوة الاعلامين فى المريخ فهى فى الواقع حقيقه تتمثل فى عالمية رئيس النادى.

من يطالب رئيس نادى بخطاء فى الكلام فانا احب ان الفت انتباه الجميع فقد تم تداول مقطع فيديو يتناول خطاء لغوى ودينى لملك المملكه العربيه السعوديه .

ثانيا
نحن نعلم فى المريخ ان المعارضه تقوم بفعلها هذا الى الاحباط فى الداخل ورفع الروح المعنويه فى وسط
جماهير الغريم التقليدى للمريخ وهو الهلال

لن تقدم المعارضه شئ للنادى المريخ لانهم لايمتلكون المقومات التى تجعلهم يتولون زمام الامر فى المريخ لسبب معروف ان الانديه المحترفه لايمكن ادارتها بالكلام والحجه بل اهم شئ هو المال والدفع بسخاء كما يفعل الوالى.
اذا على المعارضه ان لاتنتهك الحقوق الشخصيه للرئيس النادى وعليها ان تعمل على اقناع الجمهور بقدرتها على تقديم الافضل لاسيما ان قيام الجمعيه العموميه قريب ولا اعتقد انها بنشرها لمثل هذه الفيديوهات سوف تكسب اصوات الجمهور

[الشيخ مصطفى]

ردود على الشيخ مصطفى
[المستعرب الخلوى] 06-17-2014 02:54 PM
إذن عليه أن يتحلى بالشجاعة الأدبية ويعتذر فهو شخصية عامة ..ولماذا تدافعون عنه ؟ ألا يستطيع هو الدفاع عن نفسه ؟؟

[بنت الناظر] 06-17-2014 01:49 PM
إقتباس ..
نحن فى هذا المقام نتحدث عن شخص يعمل رئيس للنادى رياضى وهو ليس داعيه دينيه او فقيه

لا احد يستطيع ان ينكر ان الاخ جمال يعد من رؤساء الانديه العالميه لسبب بسيط انه قدم للنادى ما يقدمه اى رئيس نادى فى العالم لايقل عنهم شئيا واعتقد ان العالميه

ياسلام مادام إنتوا نادى عالمى مالكم ما مشيتوا بناديكم ده البرازيل؟؟ ما اليومين كل الفرق العالمية هناك ؟؟ ولا هو كلام والسلام ولا خايفين ينطبق عليكم المثل البقول إيه يوديك يا صعلوك وسط الملوك .. كان تورونا العالمية حقتكم دى ..

وسؤال تانى هو مش كوز ؟؟طيب ما الكيزان ديل عاملين هم بس البيعرفوا الدين وأى زول غيرهم كافر عديييييل.. ولا الوالى فى قصة الولد الحيطلع كوز وأهله ختوا ليه المصحف والخمرة والدولارات .. شال الدولارات ختاها فى جيبه وخلى المصحف فى تربيزته ؟؟؟
ثم أهم سؤال لماذا لم يقم جمال الوالى بتقديم إعتذاره عن خطئه لى رب العالمين مش يعتذر للناس ولا هو عشان رئيس النادى العالمى أكبر من أن يعتذر؟؟؟؟
حسبى الله عليكم أيها الدجالين تجار الدين


#1037231 [عبدالواحد المستغرب آشد الاستغراب!!]
4.50/5 (8 صوت)

06-17-2014 10:47 AM
والله يا سكر نبات يؤسفنا أن نقول ليك أن الموضوع طلع من يدنا ورئيسك الانت بتحاول تدافع عنه إبتداءا(غلط فى حق ربنا)ويبدو إنك قررت أن تشيل الشيله نيابة عنه وقصدت تقول سيبوا خناق الوالى وأمسكوا فى خناقى ورأيت أن تفديه بروحك ودمك ونحن بنقول ليك (لاتزر وازرة وزر آخرى)ومحاولتك ستبؤ بالفشل قطع شك وسياسة اللف والدوران لن تفيده ولن تنقذه وإنكار ما شاهده المئات لايعنى غير توجيهك الاساءه الى كل من كان حاضرا وشاهد اللقطه الحيه عيانا بيانا!!مثل هذه المغالطات تجوز فى الملاعب كالتشكيك فى هدف صحيح ولج الشباك او إتهام حكم المباراة بما ليس فيه او إتهام حارس المرمى بالتواطؤ مع الفريق الخصم، وكان الاجدر بك إذا كنت مسلما حقا وغيورا على دينك كان ينبغى عليك أن تنصحه بتقديم الاعتزار لمشاهدى القناة من خلال نفس القناة!! ثم طلب الرحمه والمغفره من الله عز وجل،،واعلم يا فخامة الامين العام العبد لله مريخابى من قبل ان تولد انت وواليك ولكنى لا ابيع دينى بدنياى كما تفعل أنت الآن ومحاولتك تلبيس الآمور وتصوير الآمر بأن الهجوم على رئيسك نابع عن خلافات داخل النادى او خارجه وعدم إقتناعك بأنه أخطاء خطاءا جسيما ومن ثم الاساءه الى الذين قالوا أن جمالا أخطاء فى حق دينهم ووصفهم بإنهم مغرضين هذا يثبت لنا إنك أجهل منه وأقل إيمانا بخالقك منه وجمال إذا إرتكب خطاءا واحدا فسيادتك إرتكبت عدة أخطاء اولها إقرارك بأن الكلام (الكشمشا) الذى دشه ونسبه للقرآن الكريم كان صحيحا!! ثانيها تمسكك بهذا الجاهل الجهول ليقود المسيره رغم زلته الواضحه التى لم ينكرها إلا أنت توضحان بجلاء بأن محبتك لواليك أعظم واجل من محبتك للذى فطرك !! وأعلم بأن لا أحد من الذين تحاول حضهم لنسيان ما إقترفه الوالى على إستعداد لبيع او إستبدال دينهم بدنياهم الفانيه كما إننا ننصحك بالتوبه لما هرفت وهرطقت به وأنت تستميت للدفاع عن واليك وولى نعمتك !!.

[عبدالواحد المستغرب آشد الاستغراب!!]

#1037220 [العشارى]
4.50/5 (2 صوت)

06-17-2014 10:41 AM
تفوا عليكم ناس ما تستحى اى شخص عندو علاقة مع هذا الجاهل فليتحسس موقعه جيدا وخاصة بيته
كلهم فاهمين انا قاصد شنو تبا لكم ضمائرر قذرة ونفوس مريضه وديوسين كمان
ايه دخل المريخ والهلال في هذا الموضوع الذى يتعلق بالعقيده يا بهائم
امين عام قال
والله انت خائن عام
دى كله عشان الفتافيت البيديك ليها ولى نعمتك هذا المعتوه
انتظروا جايكم يوم

[العشارى]

ردود على العشارى
European Union [ali alkhfshey] 06-17-2014 11:42 AM
hhhhhhhhhh


#1037194 [بقية التسجيل وقران الكيزان]
5.00/5 (1 صوت)

06-17-2014 10:13 AM
بقية الاتسجيل فيه جمال الوالي لبس جلابية وعمة وختى الصحف الكيزاني قدامه وتمايل شمال ويمين نعم شمال قبل اليمين لزوم التاثر بالشيطان المهم وجر نفس عمييييييييييييييييق زي الشيخ : صديق المنشاوي

وقال برواية الخضر عن نافع على نافع
بسم الشيطان الرجيم
العارف عزو كلام النااااااس ما بهزو (1) واعلى مااااااافي خيلكم اركبوه (3) وألحسو كوعكم .

صدق نافع على نافع

طبعا للتجويد الناس مد 6 حركات ومافي مد منفصل 6 حركات


استغفر الله العظيم استغفرتك يارب واتوب اليك
انت تعلم ما في صدرونا لا نستخف بكتابك ولكنانستخف بأناس ادعو نشر الاسلام في السودان وبطريقتهم

[بقية التسجيل وقران الكيزان]

ردود على بقية التسجيل وقران الكيزان
European Union [ابو احمد] 06-17-2014 02:14 PM
استغفر الله العظيم واتوب اليه


#1037152 [بت الخرطوم]
5.00/5 (2 صوت)

06-17-2014 09:41 AM
يا أمين عام المريخ نحن المشاهدون بنصدق العمل الخبث الساذج بالشريط المتداول عبر وسائل التواصل الاجتماعى عارف ليه لانو شاهدنا الحلقة على الهوا مباشرة ولا نصدق التسجيل الموجود بقناة قؤون إذا تتدخلت فيه أياديكم المتوضاة لعمل مونتاج بحذف ولصق الم تسمعوا بأن الأعتراف بالخطأ فضيلة لماذا كل هذة المكابرة الوالى فعل فعلته الشنيعة وعلى الهوا مباشرة" وعليه الأعتراف بالخطأ الذى وقع فيه وأن يستغفر ويطلب من الله سبحنه وتعالى المغفرة بدلا من التكبر والأستعلاء وعليكم أن تقولوا قول الحق والا فأصمتوا حتى لا ترتكبوا أثم معه

[بت الخرطوم]

ردود على بت الخرطوم
United States [محمد الامين] 06-17-2014 11:32 AM
يابت الخرطوم قلنا ليك الراجل ما استحضر نص الاية البستشهد بيها على صحة كلامو فاتى بالمعتى ايه القريب ذلك ثم انت مااظن من تلقاء نفسك تكوني متأكدة اهو قران ام كلام ناس فما كان تحوضي في موضوع غير حيوي


#1037141 [محمد عبد الرحمن محمد]
5.00/5 (2 صوت)

06-17-2014 09:34 AM
المابتلحقوا جدعوا البلد في شنو والحسانيه في شنو ابكو الحالة المترديه للاخلاق والتي عمت البلد من اولها الي آخرها الوالي مابتلحقوه وخلوه في حاله انتوا ابكوا الانتو فيه كل ابن ادم خطاؤون وخير الخطائيين التوابون زلة لسان ومماممكن رجل قامة ان يصل الي المستوي الضحل الذي يتداوله المرضي لسانك لاتذكر به عورة انسان فكلك عوراة وللناس السن اتقوا الله واتركو خلق الله ل الله
لماذا لم يتم تداول من وجد يمارس الذني مع طالبات وهو محصن ولماذا لم يتم تداول من يبيعون المسكر والمخدرات وهم معروفون للشعب لماذا لم يتم تداول من يقومون ببيع الاعضاء لجسم البشر اين الاختلاسات اين المحسوبيه اين الضمير الحي ياحليل الزمن الجميل نتحسر علي من ماكان وكنا وماسيكون بيردي الاخلاق النبيلة والقيم التي كان مضرب مثل لسودان العزة والان اين نحن من حلايب والفشقة والجنوب

[محمد عبد الرحمن محمد]

ردود على محمد عبد الرحمن محمد
[المستعرب الخلوى] 06-17-2014 03:01 PM
وانت جايى تدافع عمن أخطأ فى كلام الله وعلى الملأ وسمعه القاصى والدانى ..عليه ان يعترف بالخطا على نفس القناة ونفس المنبر ..ويتحلل كما يتحللون من المال الحرام ..
المال المسروق يتحللون منه ولكن كلام الله يخطئون فيه ويفترون على الله الكذب ولا يتحللون ..
تباً لكم جميعاً ولأمثالكم ..

European Union [aaa] 06-17-2014 11:13 AM
ياسلام عليك الماتلحقو جدعو؟؟؟؟ ما لاحقنو فى شنو زولك دا ؟ سبحان الله دكتورا من جاكعه اسبلاميه والحركه اسلاميه لايفرق ما بين مقوله وايه دى يبقى مشكله والله عارفين فى السودان فى مثل بيقول عبد بيمزت قبال سيدو ؟؟؟؟ الحق زولك دا أنا مـتأكد فرائض الوضوء دى أنت وصحبك ما عارفنوا
استغفروالله يغفر لكم///// أنتم فى معصيه


#1037137 [ود الشبارقة]
5.00/5 (1 صوت)

06-17-2014 09:33 AM
بادر ياوالي في زمن الإمكان

ولقد نصحت جمال المريخ عبر عدة تعليقات ولكن النصيحة ارخص مما يباع ويشترى ، يا اخ جمال ترى العمر محدود وربنا فتح عليك من فضله ويرزقك من الطيبات ، فلا اقل من ان تشكره وتوفي شكره بان تنفق هذا المال على وجهه الصحيح ، اما ترى بل جيت بادر بالتبرع بنصف ماله لعلاج الملاريا بامريكا وامريكا الجنوبية ، وسعودي خير تبرع ببرج على بعد امتار من الحرم ، وانت يا اخي اهلك في الجزيرة قد انهكتهم الملاريا والتايفويد ولم نسمع لك عن مبادرة واحدة كل اموالك شراء لاعبين ومعسكرات خارجية وعلاج مطربين ومطربات ، والله انت مسؤول امام الله في انفاق هذا المال ولولا انني اعلم انك يوجد فيك سجية سمحة وفطرة سليمة ما كتبت لك هذه السطور فامثالك في الخرطوم كثر ، لو علم الله فيهم خيرا ... فانا انصحك بادر قبل ان تبادر وتب قبل ان لا تستطيع ان تتوب ، نريد ان نسمع مركز الوالي لمكافحة الملاريا بالجزيرة ، دعم الوالي للمرضى ، اترك المريخ فلن يفيدك بل يضرك كثيرا وما تكسبه من شهرة في المريخ فهي زائفة ولكن ما تنفقه للخير يخلفه الله لك ويبارك لك في اولادك وفي عمرك ويرفع درجاتك ويسعدك في الدنيا والاخرة ن فهذه نصيحتي لك ايها الوالي فهل استجبت ، فقل في هذا الزمان الناصح وكثر المادح والشاتم وإني لارجو الله ان يلهمك الصواب ويجعلك عونا للمحتاج والمريض لا لشراء اللاعبين والمعسكرات .اللهم هل بلغت اللهم فاشهد .

[ود الشبارقة]

ردود على ود الشبارقة
European Union [بنت الناظر] 06-17-2014 01:28 PM
ود الشبارقة يا راجل يا طيب إن الله طيب لا يقبل إلا كل طيب ولا دى ماسمعتوا بيها؟؟؟ كيف ينفق من مال حرام ..ناس بيل غيتس ياعمى سهروا الليالى وإشتغلوا بعرق جبينهم ومالهم حلال ما سرقوا مال الشعب ..و ما جوعوا الأطفال عشان يغنوا هم ..ولا شردوا الناس من بلدها !!ولا باعوا البلد ..

[abdallah] 06-17-2014 12:12 PM
هل هو مال حلال؟ والا مال المؤتمر الواطي؟

[زول سوداني] 06-17-2014 11:53 AM
ود الشبارقة .. يبدو انك رجل طيب جدا وسوداني اصيل ..
السيد جمال الوالي لايمتلك هذه الاموال ياصديقي وليس له حق التصرف في دولار واحد منها .. انها اموال المؤتمر الوطني المسروقة من الشعب السوداني .. تصرف فقط من اجل السياسة ومن اجل شراء الذمم ومن اجل تدمير كل ماهو جميل في هذا الوطن ....


#1037127 [ابو اياد]
5.00/5 (1 صوت)

06-17-2014 09:20 AM
ماهذة الجليطة يا ***** يا امين عام،امين شنو الفيديو لايحتاج لمتابعة سواء كان مجزء او كاملا،خلاص اية الله الوالي خربها من اول وخلط مابين الاقوال. وقال وتابعهاكثيرون يعني ملايين المشاهدين عبر قناة قون،اسكت خير لك من تهرف بما لا تعرف .

[ابو اياد]

#1037125 [أبوقرجة]
3.50/5 (2 صوت)

06-17-2014 09:17 AM
ههههههههههههههههههههه هههههههههههههههههههههههههههه افتراء على مين سمعنا الفيديو كله .... (العارف عزه مستريح) دي طلعت في القرآن هههههههههههههههههههههههههههههه
طلع البدر علينا .... لا زلت أطلب من جمال الوالي يقول سوره مكيه أم مدنية ... وفي الجزء رقم كم ..

[أبوقرجة]

#1037122 [الحاكم]
0.00/5 (0 صوت)

06-17-2014 09:15 AM
سمعنا بظاهرة الاغتيال السياسي والآن ظهر الاغتيال الرياضي هو الرياضة قائمه

[الحاكم]

#1037119 [مريود]
4.75/5 (3 صوت)

06-17-2014 09:11 AM
جيب التسجيل الكامل والموية تكضب الغطاس .


مثل هذا العمل تقطع فيه رؤوس إذا لم تب صاحبه.


مرة في مجلس قال أحدهم ( وجعلنا لكل شئيء سببا)ناسبا إياها للقرآن .

قلت يا فلان عفوا ليس هذه من القرآن الذي في القرآن في سورة الكهف في قصة ذي القرنين.

قال تعالى : ( ولآتيناه من كل شيء سببا ) ... ( فأتبع سببا) ... ( ثم أتبع سببا ).

صاحبنا أخذته العزة بالإثم وأصر على أنها موجودة في المصحف. قلت يا أخي هذا المصحف ونحن معك إلى الأسوع القادم إن شاء الله دلنا عليها.

فأقول لهذا ((( الأمين ))) .

دلنا على التسجيل الكامل لعل فيه استدراكا أو قطعا أو مراجعة تبرئ صاحب القول.

أما تحسين القبيح وتزيين المنكر فهو أشد خبثا من نشر المقطع أكثر سذاجة من غلطة والوالي.

لأن الغلطة في عداد الغلط أما الدفاع عن الغلط ففي عداد الخبث والسذاجة والحماقة و...

[مريود]

#1037095 [المشتهي الكمونية]
4.50/5 (2 صوت)

06-17-2014 08:24 AM
الهلال والمريخ بقوا مؤسسات تابعة للمؤتمر الوطني والبسطاء من أهلنا لا زالوا متيمين بحبهما لأن البلاد لا يوجد بها وسائل أخرى للترفيه غير كرة القدم ،،، وهذا الحرامي الفاسد الذي يطلق عليه لقب أمين عام المريخ ما كان ليحلم بهذا اللقب إلا في ظل الإحتلال الذي تعيشه بلادنا من قبل عصابة الكيزان ،، والمدعو جمال الوالي الجاهل أبو راسا فاضي الذي ابتلت به مؤسسه رياضية عريقة مثل نادي المريخ يجسد حالة الخواء الفكري التي وصلت اليها مؤسسات الدولة بأجمعها رياضية وغير رياضية ، ولا نملك إزاء هذه الأوضاع الكارثية غير أن نقول حسبنا الله ونعم الوكيل

[المشتهي الكمونية]

ردود على المشتهي الكمونية
United States [كاره الكيزان محب السودان] 06-17-2014 10:26 AM
كلام في السليم


#1037086 [ابو محمد]
5.00/5 (1 صوت)

06-17-2014 08:10 AM
طيب ياخي عيد المقابله كاملة لو كنت فاكر في المقطع اي حدف

[ابو محمد]

#1037085 [الحاج]
5.00/5 (1 صوت)

06-17-2014 08:09 AM
يا اخوانا الزول دا غنيان من زمان كان عندو عجلة رالي بركبها من مدني الي فداسي حيث النكوليب الطوال ومتواسي

[الحاج]

#1037070 [جنوبي]
5.00/5 (1 صوت)

06-17-2014 07:38 AM
ده خائن عام مش امين عام !
جمال الوالي افتري علي القرآن ما علي الهلال يا ابوجهل ..

[جنوبي]

#1037068 [Salah E l Hassan]
0.00/5 (0 صوت)

06-17-2014 07:34 AM
يا اخوانة دة تزوير و دبلجة من اعداء المريخ و الوطن و حفاظا غلى الامن القومى يمنع النشر فى و وسائل الاعلام ..؟؟؟؟؟؟

[Salah E l Hassan]

#1037034 [adil a omer]
5.00/5 (3 صوت)

06-17-2014 04:06 AM
العارف عزو مستريح

وفى رواية اخرى الله فوق زوزو

[adil a omer]

#1037029 [إمام إدريس]
5.00/5 (1 صوت)

06-17-2014 03:37 AM
ناس فارقة ما عندها شغلة ما سكين في كلام الوالي وخالين البلد تضيع لي حرامية الانقاذ ياجاهلين

[إمام إدريس]

ردود على إمام إدريس
[ابوايمن الحلاوى] 06-17-2014 09:49 AM
ياخينا : دا واحد من جماعة الانقاذ ودا راس الحيه ذات السم الزعاف!! انت لو ما بتعرف ود الوالى خلى الناس البتعرفوا تطلع ليك اصله!! قصدى مش جنس او قبيلته،، دا المراه العاكسه لسدنة الانقاذ ومن يحمل اوزارهم فى النهب والسلب المنمق والمنظم وواحد من غاسلى وناشرى الاموال!!! يعنى غلط فى ماكله ومشربه مافيش حد سأله ولهط حق الغلابه ما قلناش حاجه !! لكن فى حق ربنا افتكر دى عاوزه اتكاْءه وجلسه تأديب !! وين ناس التأصيل وناس الافتاء واصحاب الدقون الكثه وأهو كلهم بطلعوا فى القنوات شوف محمد الامين وأممد حسن ويوسف عبدالحى ،، يازول هم كتار وأكتر من مقدمى النشرات بس شيوخ بتوعين وجاهه وترطيبه وكندشه وشنو كدا ما عارف والعداد رامى!!!!

[أبو الكلس] 06-17-2014 09:42 AM
انت يا من تصف الناس بالجهل

فارغة بكتبوها بالغين مش القاف

[ليكم يوم] 06-17-2014 09:40 AM
والوالي ده من حرامية واشنطون ؟؟؟

والجاهل هو من لا يعرف الفرق بين القرآن والأمثال

والأجهل منو هو البدافع عنو بالباطل

ا

European Union [عاشور على عاشور] 06-17-2014 08:25 AM
و هو الوالى مش برضو واحد من حرامية الانقاذ ولا انا غلطان ؟؟؟ مش الوالى دا و بس حتى الوالى التانى داك برضو حرامى .

[كركاب مطر بلا سحاب] 06-17-2014 08:21 AM
يا ناس فارغة ما فارقة ... الوالى ده ما واحد من أكبر حرامية الإنقاذ ولا إنت دقست ؟؟؟؟


#1037023 [Keemo]
5.00/5 (5 صوت)

06-17-2014 02:16 AM
عليكم الله في زول فاهم حاجة؟ هذا الامين العام الما معروف امين عام شنو، همو كلو تسجيلات المريخ والموسم واللاعبين وبس. اما ان ياتي السيد جمال الوالي بايات من عنده ويفتري علي الله كذبا، فهذا غير مهم!!!!!!!!!
عجبي!

[Keemo]

#1037019 [خالد حسن]
5.00/5 (6 صوت)

06-17-2014 01:57 AM
شكلرتها دلوكتها
الدلاليك بهمهم الدفاع عن ولي نعمتهم اكثر من المطالبه باعتراف واعتذار سيدهم لربه

[خالد حسن]

#1037016 [الدم والدهب]
4.25/5 (12 صوت)

06-17-2014 01:46 AM
(فيسبوك)
مسدار جمال الوالي ، الذي جعل المثل الشعبي (العارف عزو مستريح) من القرآن !!
شعر سعد عبد القادر العاقب
تبوك 14- 6- 2014م
**********
بجيب مسداري في سْوَاةَ الكويز العاب
المو حافظ (الحمدُ) وكمان كضاب
مسداراً يباريه ان ظهر وان غاب
يسود عيشتو ديمة ويملا خشمو تراب
******
يا عالْم الغيوب يا باري يا متعالي
يا باعث الحياة في كل جسماً بالي
احفظ بلدي من دار المحس لا الدالي
ونجي الأمة من قرآن جمال الوالي
******
ولداً بالكضب واللف صبح راسمالي
لا راي لا فهم، عاين رويسو الخالي
سخلا في البلد صوتو بيلبلب عالي
مو فارز كلام الرب من الأمثالِ
******
أنا من يومي كارهك يا السنيح ومسيخ
وبي سببك تركت الكورة والمريخ
ما بتبع فريق قايدة الاضينة الخيخ
إن الشمْسْ تعجِّزْ في السما وتشيخ
******
يا البشتنت مريخنا ومليتو دواهي
بعد ما كان زعيم في الكورة آمر وناهي
ما دام في العلم خيطك ملتق واهي
شن وداك تكابس في كتاب اللهِ
******
حقو الشاشة والتلفاز تطَفِّي تضلِّم
بعد عملة جمال القالوا زول متعلم
وما تستغرب إن يوماً لقيت متكّلِّم
يقول (زاد الشجون)، جات في البخاري ومسلم.

[الدم والدهب]

ردود على الدم والدهب
[السفير] 06-17-2014 11:05 AM
هييييييييع عفيت منك يا سعد مسدار قوى وبليغ وخاصة زاد الشجون جات فى البخارى ومسلم...العارف عزو مستريح ههههههه...انت عارف الوالى داير يتمرن على الكلام على حساب الشعب السودانى لكن بلعوهو لسانو وما اعتقد تانى يعيدها.

United States [المتشائل] 06-17-2014 09:15 AM
الله عليك يا سعد يا خطير

United States [الدنقلاوي] 06-17-2014 05:31 AM
مسدار بديع يا أبو السعود


#1037013 [ساب البلد]
5.00/5 (8 صوت)

06-17-2014 01:41 AM
******** اية الله جمال الوالي اجدر بالدفاع عن نفسه ******** الخوف يجي يدافع يستدل بطلع البدر علينا هههههههههههه *********

[ساب البلد]

#1037012 [البتار]
5.00/5 (1 صوت)

06-17-2014 01:39 AM
ساذج ياجاهل هههههه

[البتار]

#1037009 [شروم]
5.00/5 (2 صوت)

06-17-2014 01:36 AM
واااااااا شريري يا الأمين العام .. مرسّلك الوالي عشان تدافع عنو ؟؟؟؟
والله كان احسن ليكم تسكتوا وتملوا خشمكم الترابه انت وواليك الجهلول هذا .
عايز تقول شنو يعني ؟؟؟
والتسجيل الكامل ده بقول شنو .. بقول انو (العارف عزو مستريح ) دي حديث للنبي نوح ولاّ لمولانا عبدالرحمن الخدر ؟؟؟؟

[شروم]

#1037008 [ركابي]
5.00/5 (6 صوت)

06-17-2014 01:33 AM
يعني شنو الوالي ما قال العارف عزو مستريح علي انو نص قرآني؟؟؟؟؟؟
عشقنا المريخ منذ نعومة اظافرنا لكن طالما زي ده وزي الوالي اتسلطوا علي نادينا العريق قلعة الاخلاق والمثل خليناهو ليكم وحنشجع بعد كدة رابطة كاب الجداد او اتحاد ام برمبيطة ههههههههههه

[ركابي]

ردود على ركابي
European Union [تعليق] 06-17-2014 08:07 AM
انا لي تلاته سنين بقيت ما اشوف المريخ مع اني بشجع المريخ .. نحن نشوف الحصل شنو للمريخ في عهد جمال الوالي محليا الهلال يتفوق عليه بعدد بطولة الدوري والأرقام شاهدة ..افريقيا صفر .يعني ما عمل شيء غير خلي المرتبات بالملايين وحتكون مشكلة للناس القادمين لإدارة المريخ ..بالعكس الوالي باسم المريخ اشتهر اكثر ....يعني ما عمل لينا مجمع رياضي او منشاة تجارية تعود للمريخ بالعكس هو يستغل اسم المريخ اسوا استغلال ..ونهايته بقي يألف آيات قرانيه
زمان كنت بحب اخبار الكورة الان حتي كاس العالم ما متابعه الا مرات مرات والسبب كرهت الكورة كره أمثال اكرام ابوسبعة وجمال الوالي
بالمناسبة الأمين العام دا منو واسمو منو لو قلت ليك مابعرف هل تصدق؟؟؟؟؟


#1037005 [العارف عزوز]
4.94/5 (6 صوت)

06-17-2014 01:28 AM
ويا الأمين العام يا منافق التسجيل (الكامل الدسم ) ده بقول شنو غير الشفناه في المقطع أياه .
والله انت الساذج .

[العارف عزوز]

ردود على العارف عزوز
United States [ساب البلد] 06-17-2014 03:32 AM
صحى التسجيل الكامل بيقول شنو .. لم ينفى أويثبت شىء وخلاها عايمة ليظن الناس أنه على صواب .. والدفاع عن الوالى من دون دليل لرضاء الوالى مشكلةاكبر للذى يدافع عنه.. منافق



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة