الأخبار
منوعات سودانية
عاصم البنا: كنت بغش ناس البيت وبشرب من موية (الدش) في رمضان
عاصم البنا: كنت بغش ناس البيت وبشرب من موية (الدش) في رمضان
عاصم البنا: كنت بغش ناس البيت وبشرب من موية (الدش) في رمضان


07-03-2014 12:43 AM
عاصم البنا, فنان له قاعدة جماهيرية لا يستهان بها صعدت به ليكون أحد نجوم الشباك المطلوبين بشدة في الحفلات, حل ضيفاً رمضانياً عزيزاً على (اليوم التالي) عبر حوار خفيف ومتنوع حكى عن تجاربه الأولى مع الصيام ووجبته المفضلة في رمضان وهل يفضل أن يصوم الشهر الفضيل داخل السودان أم خارجه, وتفضل البنا مشكوراً بالإجابة على جميع تساؤلاتنا عبر السطور التالية.

حدثنا عن أول محاولة صيام؟

كان وقتها عمري عشر سنوات, حاولت الصيام لكن المحاولة انهارت بعد ساعات معدودات.

بكل صراحة, هل كنت تفطر سراً في البدايات الأولى؟

كتر جداً, كنت بقنع ناس البيت اني صائم وعطشان وبدخل الحمام ومع الموية الباردة في (الدش) بطلع رويان, ما في زول عرف الحكاية دي وكان بقولو اني صائم وصابر رغم اني وقتها كنت صغير جداً.

برنامجك شنو في رمضان؟

برنامجي في رمضان اكتر من عادي, بصحى الفجر وبصلي الصبح حاضر وبعد داك ما بصحى إلا الساعة عشرة, بعد داك بمشي السوق وبجيب حاجات ناس البيت, تاني بنوم من جديد وما بصحى إلا مع الإفطار.

بتفطر وين؟

في الشارع العام مع ناس الحي.

بعد الإفطار برنامجك شنو؟

طوالي بمشي على التلفزيون وبختار بلا تردد قناة النيل الأزرق وبحضر برنامج أغاني وأغاني.

يعني عشان بتغني فيهو؟

الحكاية ما كدا, أنا شعبت غنا قبل أغاني وأغاني, لكن بصراحة وبدون مجاملة برنامج ناجح وفيهو معلومات غزيرة من عمنا السر قدور ربنا يديهو الصحة والعافية, والشباب ما بقصروا وبغنو غنا الرواد والحقيبة بصورة جميلة.

لو قلنا ليك اختار نجم أغاني وأغاني بتختار منو؟

كلهم نجوم بدون مجاملة.

حاجة بتحرص عليها في رمضان؟

مواصلة الأهل والأرحام, والله أنا مقصر جداً مع الأهل والأحباب بسبب جري الغنا الما بنتهي لكن الزول بلقى براح في شهر رمضان لأنو ما فيهو غنا وبقدر يصل أكبر عدد من الأهل والأحباب والأصدقاء.

هواية تبتعد عنها في شهر رمضان؟

أعشق الصيد لكني في شهر رمضان ابتعد تماماً عن تلك الهواية.

هل تمارس أي رياضة في شهر رمضان؟

والله بس رياضة المشي في شارع النيل.

لما تكون عطشان ولا جيعان في النهار بتعمل شنو؟

بصبر وبشعر بي متعة خاصة للصيام وبعرف انو كدة الأجر بزيد.

وجبات بتحبها في رمضان؟

الوجبات السودانية الرمضانية الي بتلقاها في أي بيت سوداني.

بتحب تصوم في السودان ولا في دولة تانية؟

رمضان أحلى في السودان وليهو نكهة خاصة وجميلة, لكن بجد متعة كبيرة لما أصوم العشرة الأواخر في المملكة العربية السعودية.

في اختلاف في الإفطار لما تصوم برة السودان؟

شوف طول ما السودانيين موجودين في أي حتة في النهاية الوجبات السودانية أصلو ما بتتغير, أنا مشيت انجلترا وفطرت مع سودانيين ولقيت نفس الوجبات والمشروبات, العصيدة والتقلية والحلو مر.

جديدك شنو؟

عدد كبير من الأغاني الجديدة من بينها أغاني لحنها لي الراحل ناجي القدسي أسأل الله له الرحمة والمغفرة.




اليوم التالي


تعليقات 4 | إهداء 0 | زيارات 3938

التعليقات
#1051004 [وندينق]
0.00/5 (0 صوت)

07-03-2014 07:45 PM
والله حكاوى الصيام فى الصغر طريفه جداً فانا اول مره اصوم غطست فى البحر وخرجت رويان ومن ديك بقيت بقول لاصحابى بوديك البحر بجيبك رويان

[وندينق]

#1050989 [abutilal]
0.00/5 (0 صوت)

07-03-2014 07:08 PM
انت بتغش اهلك ولا بتغش ربك

[abutilal]

#1050939 [محمد عثمان]
0.00/5 (0 صوت)

07-03-2014 05:11 PM
التحية والتهنئة برمضان الكريم للفنان الخلوق الصديق عاصم البنا من أصدقائه ومحبيه في مملكة البحرين .
محمد عثمان محمود ـ السكرتير الثقافي للنادي السوداني ـ مملكة البحرين

[محمد عثمان]

ردود على محمد عثمان
United Arab Emirates [Mohd] 07-03-2014 08:25 PM
كوهين ينعي زوجته ويصلح الساعات...


#1050882 [welli]
0.00/5 (0 صوت)

07-03-2014 03:39 PM
مويه الدوش وله الترعه ههههههه هاي

[welli]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة