الأخبار
منوعات سودانية
الفنان القلع عبد الحفيظ: صمت أول يوم في البحر.. ويا حليل فطور الشارع في العزوزاب
الفنان القلع عبد الحفيظ: صمت أول يوم في البحر.. ويا حليل فطور الشارع في العزوزاب
الفنان القلع عبد الحفيظ: صمت أول يوم في البحر.. ويا حليل فطور الشارع في العزوزاب


07-06-2014 12:02 AM

الخرطوم – نصر حامد

الفنان القلع عبد الحفيظ أحد نجوم الغناء الشعبي الذين قدموا الكثير للأغنية السودانية, قبل صوته الجميل وأغنياته الرائعة عرف بخفة روحه التي تظهر بوضوح عبر تفاصيل هذا الحوار الخفيف الذي أدارته معه (اليوم التالي) فأجاب من خلاله على كل الأسئلة بروح مرحة لا تعرف غير الضحك وصناعة النكتة كما سنطالع كل ذلك عبر تفاصيل هذا الحوار.

في البداية دايرين تحدثنا عن أول يوم صمتو؟

والله كانت في محاولات كتيرة وفاشلة, أول واحدة الساعة عشرة والتانية 12 ظهراً وبعد داك الحكاية مشت وصمت اليوم الأول.

بتذكر اليوم الأول كان كيف؟

أيوة, كنت ساكن في العزوزاب وعديت اليوم كلو في البحر وما رجعت البيت إلا قبل دقائق من أذان المغرب.

كنت بتصوم بالدس؟

مرات كتيرة, الوالد كان تاجر كبير وعندو بقالة كبيرة فيها تلاجة مليانة عصاير, كنت كل ما القى روحي براي بمشي التلاجة وبنزل في العصاير شراب بي اهمال وبعد داك برجع البيت وبعمل فيها صائم ولي حدي ما خليت الحكاية دي ما في زول عرفني كنت بغش ناس البيت.

برنامجك شنو في رمضان؟

بصلي الصبح حاضر, بعداك بنوم وتاني ما بصحى قبل الساعة 12 ظهر, تاني بمشي على التلفزيون لي حدي صلاة الظهر ثم العصر لي حدي الإفطار.

بتفطر وين, في البيت ولا في الشارع؟

لما كنت ساكن العزوزاب كنت بفطر في الشارع لأنو ناس الحي كان عندهم لمة سمحة في الشارع, لكن لما رحلت في بيتي في الواحة أم درمان لقيت حكاية الفطور في الشارع دي ما في وبقيت مجبور على الإفطار في البيت.

ما حاولت تعمل إفطار مجموعة في الشارع في الواحة خصوصاً وانك زول اجتماعي؟

والله حاولت والموضوع مشى في البداية بشكل كويس لكن بعد شوية لقيت روحي براي في الشارع.

بعد الإفطار برنامجك شنو؟

بصلي المغرب وبتابع التلفزيون شوية وبواصل الأهل والأحباب وبمشي بقضي وقت طويل في اتحاد الفنانين.

بتصلي التراويح وين؟

ما بقدر أصلي التراويح, مرض السكري ما بخليني أصلي التراويح.

بتتعشى الساعة كم؟

تلاتة صباحاً.

وجبات بتحبها في رمضان؟

السمك واللحوم في الفطور.

مشروبك بتحبو في رمضان؟

الحلو مر والليمون.

ما ناوي تسافر في رمضان؟

إن شاء الله, بمشي أصوم العشرة الأواخر طوالي في المملكة العربية السعودية.

بتغني في رمضان؟

أيوة, نشاطي ما بقيف في رمضان وبغني في المنتديات والفنادق وفي عدد من إفطارات الشركات في رمضان.

شيء تحرص عليه في رمضان؟

التقرب إلى الله بالدعاء وصالح والأعمال.

حصل صمت رمضان بره السودان؟

والله صمت كتيير بره السودان لكن لو قلت ليك في بلد فيها احساس بي رمضان زي بلدنا اكون كضبت عليك, اي بلد ساخنة ورمضانا حار لكن زيو ما في إلا لما تمشي تصوم العشرة الأواخر في السعودية.

لما تكون عطشان شديد بتعمل شنو؟

بقضي وقت طويل في الحمام مع الموية الباردة لو العطش اتواصل ما عندي حل غير الصبر.

بتشاهد شنو في التلفزيون؟

المسلسلات والأخبار.

حصل فطرت بدون سبب؟

ربنا يغفر لينا, والله مرة كنت صايم رمضان زي العجب, فضلن يومين بس من العيد والساعة كانت اتنين ضهر والشمس مولعة نار وكنت عطشان وجيعان جاني واحد صاحبي مالي عربيتو مياه مثلجة وعصاير ولحوم قال لي ياخي ما تفطر انت تعبان, الشيطان لعب بي وقمت فطرت ولي حدي يوم الليلة أنا ندمان شديد على اليوم الفطرتو بلا سبب.

بتحب تقول شنو في آخر الحوار؟

رمضان كريم وتصوموا وتفطروا على خير وأوصيكم ونفسي بتقوى الله والبعد عن ظلم العباد لأن الظلم ظلمات يوم القيامة.


اليوم التالي


تعليقات 4 | إهداء 0 | زيارات 2362

التعليقات
#1052672 [كجن كتى مرتى قلق]
0.00/5 (0 صوت)

07-06-2014 08:24 PM
اطرف حاجة انو مرض السكر ما بيخليهو يصلى التراويح لكن خلاهو يصوم.

[كجن كتى مرتى قلق]

#1052613 [radona]
0.00/5 (0 صوت)

07-06-2014 05:43 PM
انه الفنان الاول في الساحة الفنية
برحيل العمالقة وردي وابراهيم عوض وغثمان حسين
يكون الفنان القلع قد انفرد بالقمة تماما
من صفات هذا الفنان انه ذو صوت عميق جدا وحساس ومثقف وله موسيقى طروبه
انتبهوا لهذا الفنان القمة

[radona]

#1052532 [ود الغرب البعرف الدرب]
0.00/5 (0 صوت)

07-06-2014 03:30 PM
ياالقلع حلوة دى منك ظلم العباد شين والله يااخوى القلع بالله عايز اسالك من ست الشى وين هى؟؟؟؟؟؟؟

[ود الغرب البعرف الدرب]

#1052325 [مجنووووووون]
1.00/5 (1 صوت)

07-06-2014 11:24 AM
بالله ياخوى القلع ما كان احسن ليك تقلع عمتك الكبيرة وتقسمها مع واحد فقير وتنال الاجر وتخفف الحمل على راسك وتريحو من حمل الامبريلا؟؟؟؟؟؟؟؟

[مجنووووووون]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة